Narayaniyam Dashaka 84
નારાયણીયં દશક 84 - સમન્તપઞ્ચકતીર્થયાત્રા - બન્ધુમિત્રાદિ સમાગમમ્
Narayaniyam Dashaka 84
નારાયણીયં દશક 84 - સમન્તપઞ્ચકતીર્થયાત્રા - બન્ધુમિત્રાદિ સમાગમમ્
શ્લોક 1
ક્વચિદથ તપનોપરાગકાલે પુરિ નિદધત્ કૃતવર્મકામસૂનૂ ।
યદુકુલમહિલાવૃતઃ સુતીર્થં સમુપગતોઽસિ સમન્તપઞ્ચકાખ્યમ્
શ્લોક 2
બહુતરજનતાહિતાય તત્ર ત્વમપિ પુનન્ વિનિમજ્ય તીર્થતોયમ્ ।
દ્વિજગણપરિમુક્તવિત્તરાશિઃ સમમિલથાઃ કુરુપાણ્ડવાદિમિત્રૈઃ
॥1॥
શ્લોક 3
તવ ખલુ દયિતાજનૈઃ સમેતા દ્રુપદસુતા ત્વયિ ગાઢભક્તિભારા ।
તદુદિતભવદાહૃતિપ્રકારૈઃ અતિમુમુદે સમમન્યભામિનીભિઃ
॥2॥
શ્લોક 4
તદનુ ચ ભગવન્ નિરીક્ષ્ય ગોપાનતિકુતુકાદુપગમ્ય માનયિત્વા।
ચિરતરવિરહાતુરાઙ્ગરેખાઃ પશુપવધૂઃ સરસં ત્વમન્વયાસીઃ
॥3॥
શ્લોક 5
સપદિ ચ ભવદીક્ષણોત્સવેન પ્રમુષિતમાનહૃદાં નિતમ્બિનીનામ્ ।
અતિરસપરિમુક્તકઞ્ચુલીકે પરિચયહૃદ્યતરે કુચે ન્યલૈષીઃ
॥4॥
શ્લોક 6
રિપુજનકલહૈઃ પુનઃ પુનર્મે સમુપગતૈરિયતી વિલમ્બનાઽભૂત્ ।
ઇતિ કૃતપરિરમ્ભણેત્વયિ દ્રાક્ અતિવિવશા ખલુ રાધિકા નિલિલ્યે
॥5॥
શ્લોક 7
અપગતવિરહવ્યથાસ્તદા તા રહસિ વિધાય દદાથ તત્ત્વબોધમ્ ।
પરમસુખચિદાત્મકોઽહમાત્મેત્યુદયતુ વઃ સ્ફુટમેવ ચેતસીતિ
॥6॥
શ્લોક 8
સુખરસપરિમિશ્રિતો વિયોગઃ કિમપિ પુરાઽભવદુદ્ધવોપદેશૈઃ ।
સમભવદમુતઃ પરં તુ તાસાં પરમસુખૈક્યમયી ભવદ્વિચિન્તા
॥7॥
શ્લોક 9
મુનિવરનિવહૈસ્તવાથ પિત્રા દુરિતશમાય શુભાનિ પૃચ્છ્યમાનૈઃ ।
ત્વયિ સતિ કિમિદં શુભાન્તરૈઃ રિત્યુરુહસિતૈરપિ યાજિતસ્તદાઽસૌ
॥8॥
શ્લોક 10
સુમહતિ યજને વિતાયમાને પ્રમુદિતમિત્રજને સહૈવ ગોપાઃ ।
યદુજનમહિતાસ્ત્રિમાસમાત્રં ભવદનુષઙ્ગરસં પુરેવ ભેજુ ઃ
॥9॥
શ્લોક 11
વ્યપગમસમયે સમેત્ય રાધાં દૃઢમુપગૂહ્ય નિરીક્ષ્ય વીતખેદામ્ ।
પ્રમુદિતહૃદયઃ પુરં પ્રયાતઃ પવનપુરેશ્વર પાહિ માં ગદેભ્યઃ
॥10॥