Narayaniyam Dashaka 8
നാരായണീയം ദശക 8 - പ്രലയവര്ണനമ്
Narayaniyam Dashaka 8
നാരായണീയം ദശക 8 - പ്രലയവര്ണനമ്
ശ്ലോക 1
ഏവം താവത് പ്രാകൃതപ്രക്ഷയാന്തേ
ബ്രാഹ്മേ കല്പേ ഹ്യാദിമേ ലബ്ധജന്മാ ।
ബ്രഹ്മാ ഭൂയസ്ത്വത്ത ഏവാപ്യ വേദാന്
സൃഷ്ടിം ചക്രേ പൂര്വകല്പോപമാനാമ്
ശ്ലോക 2
സോഽയം ചതുര്യുഗസഹസ്രമിതാന്യഹാനി
താവന്മിതാശ്ച രജനീര്ബഹുശോ നിനായ ।
നിദ്രാത്യസൌ ത്വയി നിലീയ സമം സ്വസൃഷ്ടൈ-
ര്നൈമിത്തികപ്രലയമാഹുരതോഽസ്യ രാത്രിമ്
॥1॥
ശ്ലോക 3
അസ്മാദൃശാം പുനരഹര്മുഖകൃത്യതുല്യാം
സൃഷ്ടിം കരോത്യനുദിനം സ ഭവത്പ്രസാദാത് ।
പ്രാഗ്ബ്രാഹ്മകല്പജനുഷാം ച പരായുഷാം തു
സുപ്തപ്രബോധനസമാസ്തി തദാഽപി സൃഷ്ടിഃ
॥2॥
ശ്ലോക 4
പഞ്ചാശദബ്ദമധുനാ സ്വവയോര്ധരൂപ-
മേകം പരാര്ധമതിവൃത്യ ഹി വര്തതേഽസൌ ।
തത്രാന്ത്യരാത്രിജനിതാന് കഥയാമി ഭൂമന്
പശ്ചാദ്ദിനാവതരണേ ച ഭവദ്വിലാസാന്
॥3॥
ശ്ലോക 5
ദിനാവസാനേഽഥ സരോജയോനിഃ
സുഷുപ്തികാമസ്ത്വയി സന്നിലില്യേ ।
ജഗന്തി ച ത്വജ്ജഠരം സമീയു-
സ്തദേദമേകാര്ണവമാസ വിശ്വമ്
॥4॥
ശ്ലോക 6
തവൈവ വേഷേ ഫണിരാജി ശേഷേ
ജലൈകശേഷേ ഭുവനേ സ്മ ശേഷേ ।
ആനന്ദസാന്ദ്രാനുഭവസ്വരൂപഃ
സ്വയോഗനിദ്രാപരിമുദ്രിതാത്മാ
॥5॥
ശ്ലോക 7
കാലാഖ്യശക്തിം പ്രലയാവസാനേ
പ്രബോധയേത്യാദിശതാ കിലാദൌ ।
ത്വയാ പ്രസുപ്തം പരിസുപ്തശക്തി-
വ്രജേന തത്രാഖിലജീവധാമ്നാ
॥6॥
ശ്ലോക 8
ചതുര്യുഗാണാം ച സഹസ്രമേവം
ത്വയി പ്രസുപ്തേ പുനരദ്വിതീയേ ।
കാലാഖ്യശക്തിഃ പ്രഥമപ്രബുദ്ധാ
പ്രാബോധയത്ത്വാം കില വിശ്വനാഥ
॥7॥
ശ്ലോക 9
വിബുധ്യ ച ത്വം ജലഗര്ഭശായിന്
വിലോക്യ ലോകാനഖിലാന് പ്രലീനാന് ।
തേഷ്വേവ സൂക്ഷ്മാത്മതയാ നിജാന്തഃ -
സ്ഥിതേഷു വിശ്വേഷു ദദാഥ ദൃഷ്ടിമ്
॥8॥
ശ്ലോക 10
തതസ്ത്വദീയാദയി നാഭിരന്ധ്രാ-
ദുദഞ്ചിതം കിഞ്ചന ദിവ്യപദ്മമ് ।
നിലീനനിശ്ശേഷപദാര്ഥമാലാ-
സങ്ക്ഷേപരൂപം മുകുലായമാനമ്
॥9॥
ശ്ലോക 11
തദേതദമ്ഭോരുഹകുഡ്മലം തേ
കലേവരാത് തോയപഥേ പ്രരൂഢമ് ।
ബഹിര്നിരീതം പരിതഃ സ്ഫുരദ്ഭിഃ
സ്വധാമഭിര്ധ്വാന്തമലം ന്യകൃന്തത്
॥10॥
ശ്ലോക 12
സമ്ഫുല്ലപത്രേ നിതരാം വിചിത്രേ
തസ്മിന് ഭവദ്വീര്യധൃതേ സരോജേ ।
സ പദ്മജന്മാ വിധിരാവിരാസീത്
സ്വയമ്പ്രബുദ്ധാഖിലവേദരാശിഃ
॥11॥
ശ്ലോക 13
അസ്മിന് പരാത്മന് നനു പാദ്മകല്പേ
ത്വമിത്ഥമുത്ഥാപിതപദ്മയോനിഃ ।
അനന്തഭൂമാ മമ രോഗരാശിം
നിരുന്ധി വാതാലയവാസ വിഷ്ണോ
॥12॥