ನಾರಾಯಣೀಯಂ ದಶಕ 8 - ಪ್ರಲಯವರ್ಣನಮ್

ನಾರಾಯಣೀಯಂ ದಶಕ 8 - ಪ್ರಲಯವರ್ಣನಮ್

ಶ್ಲೋಕ 1

ಏವಂ ತಾವತ್ ಪ್ರಾಕೃತಪ್ರಕ್ಷಯಾನ್ತೇ

ಬ್ರಾಹ್ಮೇ ಕಲ್ಪೇ ಹ್ಯಾದಿಮೇ ಲಬ್ಧಜನ್ಮಾ ।

ಬ್ರಹ್ಮಾ ಭೂಯಸ್ತ್ವತ್ತ ಏವಾಪ್ಯ ವೇದಾನ್

ಸೃಷ್ಟಿಂ ಚಕ್ರೇ ಪೂರ್ವಕಲ್ಪೋಪಮಾನಾಮ್

ಶ್ಲೋಕ 2

ಸೋಽಯಂ ಚತುರ್ಯುಗಸಹಸ್ರಮಿತಾನ್ಯಹಾನಿ

ತಾವನ್ಮಿತಾಶ್ಚ ರಜನೀರ್ಬಹುಶೋ ನಿನಾಯ ।

ನಿದ್ರಾತ್ಯಸೌ ತ್ವಯಿ ನಿಲೀಯ ಸಮಂ ಸ್ವಸೃಷ್ಟೈ-

ರ್ನೈಮಿತ್ತಿಕಪ್ರಲಯಮಾಹುರತೋಽಸ್ಯ ರಾತ್ರಿಮ್

॥1॥

ಶ್ಲೋಕ 3

ಅಸ್ಮಾದೃಶಾಂ ಪುನರಹರ್ಮುಖಕೃತ್ಯತುಲ್ಯಾಂ

ಸೃಷ್ಟಿಂ ಕರೋತ್ಯನುದಿನಂ ಸ ಭವತ್ಪ್ರಸಾದಾತ್ ।

ಪ್ರಾಗ್ಬ್ರಾಹ್ಮಕಲ್ಪಜನುಷಾಂ ಚ ಪರಾಯುಷಾಂ ತು

ಸುಪ್ತಪ್ರಬೋಧನಸಮಾಸ್ತಿ ತದಾಽಪಿ ಸೃಷ್ಟಿಃ

॥2॥

ಶ್ಲೋಕ 4

ಪಞ್ಚಾಶದಬ್ದಮಧುನಾ ಸ್ವವಯೋರ್ಧರೂಪ-

ಮೇಕಂ ಪರಾರ್ಧಮತಿವೃತ್ಯ ಹಿ ವರ್ತತೇಽಸೌ ।

ತತ್ರಾನ್ತ್ಯರಾತ್ರಿಜನಿತಾನ್ ಕಥಯಾಮಿ ಭೂಮನ್

ಪಶ್ಚಾದ್ದಿನಾವತರಣೇ ಚ ಭವದ್ವಿಲಾಸಾನ್

॥3॥

ಶ್ಲೋಕ 5

ದಿನಾವಸಾನೇಽಥ ಸರೋಜಯೋನಿಃ

ಸುಷುಪ್ತಿಕಾಮಸ್ತ್ವಯಿ ಸನ್ನಿಲಿಲ್ಯೇ ।

ಜಗನ್ತಿ ಚ ತ್ವಜ್ಜಠರಂ ಸಮೀಯು-

ಸ್ತದೇದಮೇಕಾರ್ಣವಮಾಸ ವಿಶ್ವಮ್

॥4॥

ಶ್ಲೋಕ 6

ತವೈವ ವೇಷೇ ಫಣಿರಾಜಿ ಶೇಷೇ

ಜಲೈಕಶೇಷೇ ಭುವನೇ ಸ್ಮ ಶೇಷೇ ।

ಆನನ್ದಸಾನ್ದ್ರಾನುಭವಸ್ವರೂಪಃ

ಸ್ವಯೋಗನಿದ್ರಾಪರಿಮುದ್ರಿತಾತ್ಮಾ

॥5॥

ಶ್ಲೋಕ 7

ಕಾಲಾಖ್ಯಶಕ್ತಿಂ ಪ್ರಲಯಾವಸಾನೇ

ಪ್ರಬೋಧಯೇತ್ಯಾದಿಶತಾ ಕಿಲಾದೌ ।

ತ್ವಯಾ ಪ್ರಸುಪ್ತಂ ಪರಿಸುಪ್ತಶಕ್ತಿ-

ವ್ರಜೇನ ತತ್ರಾಖಿಲಜೀವಧಾಮ್ನಾ

॥6॥

ಶ್ಲೋಕ 8

ಚತುರ್ಯುಗಾಣಾಂ ಚ ಸಹಸ್ರಮೇವಂ

ತ್ವಯಿ ಪ್ರಸುಪ್ತೇ ಪುನರದ್ವಿತೀಯೇ ।

ಕಾಲಾಖ್ಯಶಕ್ತಿಃ ಪ್ರಥಮಪ್ರಬುದ್ಧಾ

ಪ್ರಾಬೋಧಯತ್ತ್ವಾಂ ಕಿಲ ವಿಶ್ವನಾಥ

॥7॥

ಶ್ಲೋಕ 9

ವಿಬುಧ್ಯ ಚ ತ್ವಂ ಜಲಗರ್ಭಶಾಯಿನ್

ವಿಲೋಕ್ಯ ಲೋಕಾನಖಿಲಾನ್ ಪ್ರಲೀನಾನ್ ।

ತೇಷ್ವೇವ ಸೂಕ್ಷ್ಮಾತ್ಮತಯಾ ನಿಜಾನ್ತಃ -

ಸ್ಥಿತೇಷು ವಿಶ್ವೇಷು ದದಾಥ ದೃಷ್ಟಿಮ್

॥8॥

ಶ್ಲೋಕ 10

ತತಸ್ತ್ವದೀಯಾದಯಿ ನಾಭಿರನ್ಧ್ರಾ-

ದುದಞ್ಚಿತಂ ಕಿಞ್ಚನ ದಿವ್ಯಪದ್ಮಮ್ ।

ನಿಲೀನನಿಶ್ಶೇಷಪದಾರ್ಥಮಾಲಾ-

ಸಙ್ಕ್ಷೇಪರೂಪಂ ಮುಕುಲಾಯಮಾನಮ್

॥9॥

ಶ್ಲೋಕ 11

ತದೇತದಮ್ಭೋರುಹಕುಡ್ಮಲಂ ತೇ

ಕಲೇವರಾತ್ ತೋಯಪಥೇ ಪ್ರರೂಢಮ್ ।

ಬಹಿರ್ನಿರೀತಂ ಪರಿತಃ ಸ್ಫುರದ್ಭಿಃ

ಸ್ವಧಾಮಭಿರ್ಧ್ವಾನ್ತಮಲಂ ನ್ಯಕೃನ್ತತ್

॥10॥

ಶ್ಲೋಕ 12

ಸಮ್ಫುಲ್ಲಪತ್ರೇ ನಿತರಾಂ ವಿಚಿತ್ರೇ

ತಸ್ಮಿನ್ ಭವದ್ವೀರ್ಯಧೃತೇ ಸರೋಜೇ ।

ಸ ಪದ್ಮಜನ್ಮಾ ವಿಧಿರಾವಿರಾಸೀತ್

ಸ್ವಯಮ್ಪ್ರಬುದ್ಧಾಖಿಲವೇದರಾಶಿಃ

॥11॥

ಶ್ಲೋಕ 13

ಅಸ್ಮಿನ್ ಪರಾತ್ಮನ್ ನನು ಪಾದ್ಮಕಲ್ಪೇ

ತ್ವಮಿತ್ಥಮುತ್ಥಾಪಿತಪದ್ಮಯೋನಿಃ ।

ಅನನ್ತಭೂಮಾ ಮಮ ರೋಗರಾಶಿಂ

ನಿರುನ್ಧಿ ವಾತಾಲಯವಾಸ ವಿಷ್ಣೋ

॥12॥

ಶ್ಲೋಕ 14