Narayaniyam Dashaka 2
നാരായണീയം ദശക 2 - ഭഗവതഃ സ്വരൂപമാധുര്യം തഥാ ഭക്തിമഹത്ത്വമ്
Narayaniyam Dashaka 2
നാരായണീയം ദശക 2 - ഭഗവതഃ സ്വരൂപമാധുര്യം തഥാ ഭക്തിമഹത്ത്വമ്
ശ്ലോക 1
സൂര്യസ്പര്ധികിരീടമൂര്ധ്വതിലകപ്രോദ്ഭാസിഫാലാന്തരം
കാരുണ്യാകുലനേത്രമാര്ദ്രഹസിതോല്ലാസം സുനാസാപുടമ്।
ഗണ്ഡോദ്യന്മകരാഭകുണ്ഡലയുഗം കണ്ഠോജ്വലത്കൌസ്തുഭം
ത്വദ്രൂപം വനമാല്യഹാരപടലശ്രീവത്സദീപ്രം ഭജേ
ശ്ലോക 2
കേയൂരാങ്ഗദകങ്കണോത്തമമഹാരത്നാങ്ഗുലീയാങ്കിത-
ശ്രീമദ്ബാഹുചതുഷ്കസങ്ഗതഗദാശങ്ഖാരിപങ്കേരുഹാമ് ।
കാഞ്ചിത് കാഞ്ചനകാഞ്ചിലാഞ്ച്ഛിതലസത്പീതാമ്ബരാലമ്ബിനീ-
മാലമ്ബേ വിമലാമ്ബുജദ്യുതിപദാം മൂര്തിം തവാര്തിച്ഛിദമ്
॥1॥
ശ്ലോക 3
യത്ത്ത്രൈലോക്യമഹീയസോഽപി മഹിതം സമ്മോഹനം മോഹനാത്
കാന്തം കാന്തിനിധാനതോഽപി മധുരം മാധുര്യധുര്യാദപി ।
സൌന്ദര്യോത്തരതോഽപി സുന്ദരതരം ത്വദ്രൂപമാശ്ചര്യതോഽ-
പ്യാശ്ചര്യം ഭുവനേ ന കസ്യ കുതുകം പുഷ്ണാതി വിഷ്ണോ വിഭോ
॥2॥
ശ്ലോക 4
തത്താദൃങ്മധുരാത്മകം തവ വപുഃ സമ്പ്രാപ്യ സമ്പന്മയീ
സാ ദേവീ പരമോത്സുകാ ചിരതരം നാസ്തേ സ്വഭക്തേഷ്വപി ।
തേനാസ്യാ ബത കഷ്ടമച്യുത വിഭോ ത്വദ്രൂപമാനോജ്ഞക -
പ്രേമസ്ഥൈര്യമയാദചാപലബലാച്ചാപല്യവാര്തോദഭൂത്
॥3॥
ശ്ലോക 5
ലക്ഷ്മീസ്താവകരാമണീയകഹൃതൈവേയം പരേഷ്വസ്ഥിരേ-
ത്യസ്മിന്നന്യദപി പ്രമാണമധുനാ വക്ഷ്യാമി ലക്ഷ്മീപതേ ।
യേ ത്വദ്ധ്യാനഗുണാനുകീര്തനരസാസക്താ ഹി ഭക്താ ജനാ-
സ്തേഷ്വേഷാ വസതി സ്ഥിരൈവ ദയിതപ്രസ്താവദത്താദരാ
॥4॥
ശ്ലോക 6
ഏവമ്ഭൂതമനോജ്ഞതാനവസുധാനിഷ്യന്ദസന്ദോഹനം
ത്വദ്രൂപം പരചിദ്രസായനമയം ചേതോഹരം ശൃണ്വതാമ് ।
സദ്യഃ പ്രേരയതേ മതിം മദയതേ രോമാഞ്ചയത്യങ്ഗകം
വ്യാസിഞ്ചത്യപി ശീതവാഷ്പവിസരൈരാനന്ദമൂര്ഛോദ്ഭവൈഃ
॥5॥
ശ്ലോക 7
ഏവമ്ഭൂതതയാ ഹി ഭക്ത്യഭിഹിതോ യോഗസ്സ യോഗദ്വയാത്
കര്മജ്ഞാനമയാത് ഭൃശോത്തമതരോ യോഗീശ്വരൈര്ഗീയതേ ।
സൌന്ദര്യൈകരസാത്മകേ ത്വയി ഖലു പ്രേമപ്രകര്ഷാത്മികാ
ഭക്തിര്നിശ്രമമേവ വിശ്വപുരുഷൈര്ലഭ്യാ രമാവല്ലഭ
॥6॥
ശ്ലോക 8
നിഷ്കാമം നിയതസ്വധര്മചരണം യത് കര്മയോഗാഭിധം
തദ്ദൂരേത്യഫലം യദൌപനിഷദജ്ഞാനോപലഭ്യം പുനഃ ।
തത്ത്വവ്യക്തതയാ സുദുര്ഗമതരം ചിത്തസ്യ തസ്മാദ്വിഭോ
ത്വത്പ്രേമാത്മകഭക്തിരേവ സതതം സ്വാദീയസീ ശ്രേയസീ
॥7॥
ശ്ലോക 9
അത്യായാസകരാണി കര്മപടലാന്യാചര്യ നിര്യന്മലാ
ബോധേ ഭക്തിപഥേഽഥവാഽപ്യുചിതതാമായാന്തി കിം താവതാ ।
ക്ലിഷ്ട്വാ തര്കപഥേ പരം തവ വപുര്ബ്രഹ്മാഖ്യമന്യേ പുന-
ശ്ചിത്താര്ദ്രത്വമൃതേ വിചിന്ത്യ ബഹുഭിസ്സിദ്ധ്യന്തി ജന്മാന്തരൈഃ
॥8॥
ശ്ലോക 10
ത്വദ്ഭക്തിസ്തു കഥാരസാമൃതഝരീനിര്മജ്ജനേന സ്വയം
സിദ്ധ്യന്തീ വിമലപ്രബോധപദവീമക്ലേശതസ്തന്വതീ ।
സദ്യസ്സിദ്ധികരീ ജയത്യയി വിഭോ സൈവാസ്തു മേ ത്വത്പദ-
പ്രേമപ്രൌഢിരസാര്ദ്രതാ ദ്രുതതരം വാതാലയാധീശ്വര
॥9॥