ಶಿವಾನನ್ದ ಲಹರಿ

ಶಿವಾನನ್ದ ಲಹರಿ

ಶ್ಲೋಕ 1

ಕಲಾಭ್ಯಾಂ ಚೂಡಾಲಙ್ಕೃತ-ಶಶಿಕಲಾಭ್ಯಾಂ ನಿಜತಪಃ-

-ಫಲಾಭ್ಯಾಂ ಭಕ್ತೇಷು ಪ್ರಕಟಿತ-ಫಲಾಭ್ಯಾಂ ಭವತು ಮೇ ।

ಶಿವಾಭ್ಯಾ-ಮಸ್ತೋಕ-ತ್ರಿಭುವನ-ಶಿವಾಭ್ಯಾಂ ಹೃದಿ ಪುನ-

-ರ್ಭವಾಭ್ಯಾ-ಮಾನನ್ದ-ಸ್ಫುರದನುಭವಾಭ್ಯಾಂ ನತಿರಿಯಮ್

ಶ್ಲೋಕ 2

ಗಲನ್ತೀ ಶಮ್ಭೋ ತ್ವಚ್ಚರಿತ-ಸರಿತಃ ಕಿಲ್ಬಿಷರಜೋ

ದಲನ್ತೀ ಧೀಕುಲ್ಯಾ-ಸರಣಿಷು ಪತನ್ತೀ ವಿಜಯತಾಮ್ ।

ದಿಶನ್ತೀ ಸಂಸಾರ-ಭ್ರಮಣ-ಪರಿತಾಪೋಪಶಮನಂ

ವಸನ್ತೀ ಮಚ್ಚೇತೋಹ್ರದಭುವಿ ಶಿವಾನನ್ದಲಹರೀ

॥ 1 ॥

ಶ್ಲೋಕ 3

ತ್ರಯೀವೇದ್ಯಂ ಹೃದ್ಯಂ ತ್ರಿಪುರ-ಹರಮಾದ್ಯಂ ತ್ರಿನಯನಂ

ಜಟಾಭಾರೋದಾರಂ ಚಲದುರಗಹಾರಂ ಮೃಗಧರಮ್ ।

ಮಹಾದೇವಂ ದೇವಂ ಮಯಿ ಸದಯಭಾವಂ ಪಶುಪತಿಂ

ಚಿದಾಲಮ್ಬಂ ಸಾಮ್ಬಂ ಶಿವಮತಿ-ವಿಡಮ್ಬಂ ಹೃದಿ ಭಜೇ

॥ 2 ॥

ಶ್ಲೋಕ 4

ಸಹಸ್ರಂ ವರ್ತನ್ತೇ ಜಗತಿ ವಿಬುಧಾಃ ಕ್ಷುದ್ರಫಲದಾ

ನ ಮನ್ಯೇ ಸ್ವಪ್ನೇ ವಾ ತದನುಸರಣಂ ತತ್ಕೃತಫಲಮ್ ।

ಹರಿ-ಬ್ರಹ್ಮಾದೀನಾ-ಮಪಿ ನಿಕಟ-ಭಾಜಾಮಸುಲಭಂ

ಚಿರಂ ಯಾಚೇ ಶಮ್ಭೋ ಶಿವ ತವ ಪದಾಮ್ಭೋಜ-ಭಜನಮ್

॥ 3 ॥

ಶ್ಲೋಕ 5

ಸ್ಮೃತೌ ಶಾಸ್ತ್ರೇ ವೈದ್ಯೇ ಶಕುನ-ಕವಿತಾ-ಗಾನಫಣಿತೌ

ಪುರಾಣೇ ಮನ್ತ್ರೇ ವಾ ಸ್ತುತಿ-ನಟನ-ಹಾಸ್ಯೇಷ್ವಚತುರಃ ।

ಕಥಂ ರಾಜ್ಞಾಂ ಪ್ರೀತಿರ್ಭವತಿ ಮಯಿ ಕೋಽಹಂ ಪಶುಪತೇ

ಪಶುಂ ಮಾಂ ಸರ್ವಜ್ಞ ಪ್ರಥಿತ ಕೃಪಯಾ ಪಾಲಯ ವಿಭೋ

॥ 4 ॥

ಶ್ಲೋಕ 6

ಘಟೋ ವಾ ಮೃತ್ಪಿಣ್ಡೋ-ಽಪ್ಯಣುರಪಿ ಚ ಧೂಮೋಽಗ್ನಿರಚಲಃ

ಪಟೋ ವಾ ತನ್ತುರ್ವಾ ಪರಿಹರತಿ ಕಿಂ ಘೋರಶಮನಮ್ ।

ವೃಥಾ ಕಣ್ಠಕ್ಷೋಭಂ ವಹಸಿ ತರಸಾ ತರ್ಕವಚಸಾ

ಪದಾಮ್ಭೋಜಂ ಶಮ್ಭೋರ್ಭಜ ಪರಮಸೌಖ್ಯಂ ವ್ರಜ ಸುಧೀಃ

॥ 5 ॥

ಶ್ಲೋಕ 7

ಮನಸ್ತೇ ಪಾದಾಬ್ಜೇ ನಿವಸತು ವಚಃ ಸ್ತೋತ್ರಫಣಿತೌ

ಕರೌ ಚಾಭ್ಯರ್ಚಾಯಾಂ ಶ್ರುತಿರಪಿ ಕಥಾ ಕರ್ಣನವಿಧೌ ।

ತವ ಧ್ಯಾನೇ ಬುದ್ಧಿರ್ನಯನಯುಗಲಂ ಮೂರ್ತಿವಿಭವೇ [ಬುದ್ಧಿಃ ನಯನಯುಗಲಂ]

ಪರ-ಗ್ರನ್ಥಾನ್ಕೈರ್ವಾ ಪರಮಶಿವ ಜಾನೇ ಪರಮತಃ

॥ 6 ॥

ಶ್ಲೋಕ 8

ಯಥಾ ಬುದ್ಧಿಃ ಶುಕ್ತೌ ರಜತಮಿತಿ ಕಾಚಾಶ್ಮನಿ ಮಣಿ- [ಮಣಿಃ ಜಲೇ]

-ರ್ಜಲೇ ಪೈಷ್ಟೇ ಕ್ಷೀರಂ ಭವತಿ ಮೃಗತೃಷ್ಣಾ-ಸು ಸಲಿಲಮ್ ।

ತಥಾ ದೇವಭ್ರಾನ್ತ್ಯಾ ಭಜತಿ ಭವದನ್ಯಂ ಜಡಜನೋ

ಮಹಾದೇವೇಶಂ ತ್ವಾಂ ಮನಸಿ ಚ ನ ಮತ್ವಾ ಪಶುಪತೇ

॥ 7 ॥

ಶ್ಲೋಕ 9

ಗಭೀರೇ ಕಾಸಾರೇ ವಿಶತಿ ವಿಜನೇ ಘೋರವಿಪಿನೇ

ವಿಶಾಲೇ ಶೈಲೇ ಚ ಭ್ರಮತಿ ಕುಸುಮಾರ್ಥಂ ಜಡಮತಿಃ ।

ಸಮರ್ಪ್ಯೈಕಂ ಚೇತಃ ಸರಸಿಜಮು-ಮಾನಾಥ ಭವತೇ

ಸುಖೇ-ನಾವಸ್ಥಾತುಂ ಜನ ಇಹ ನ ಜಾನಾತಿ ಕಿಮಹೋ

॥ 8 ॥

ಶ್ಲೋಕ 10

ನರತ್ವಂ ದೇವತ್ವಂ ನಗವನ-ಮೃಗತ್ವಂ ಮಶಕತಾ

ಪಶುತ್ವಂ ಕೀಟತ್ವಂ ಭವತು ವಿಹಗತ್ವಾದಿ ಜನನಮ್ ।

ಸದಾ ತ್ವತ್ಪಾದಾಬ್ಜ-ಸ್ಮರಣ-ಪರಮಾನನ್ದಲಹರೀ-

-ವಿಹಾರಾಸಕ್ತಂ ಚೇದ್ಧೃದಯಮಿಹ ಕಿಂ ತೇನ ವಪುಷಾ

॥ 9 ॥

ಶ್ಲೋಕ 11

ವಟುರ್ವಾ ಗೇಹೀ ವಾ ಯತಿರಪಿ ಜಟೀ ವಾ ತದಿತರೋ

ನರೋ ವಾ ಯಃ ಕಶ್ಚಿದ್ಭವತು ಭವ ಕಿಂ ತೇನ ಭವತಿ ।

ಯದೀಯಂ ಹೃತ್ಪದ್ಮಂ ಯದಿ ಭವದಧೀನಂ ಪಶುಪತೇ

ತದೀಯಸ್ತ್ವಂ ಶಮ್ಭೋ ಭವಸಿ ಭವಭಾರಂ ಚ ವಹಸಿ

॥ 10 ॥

ಶ್ಲೋಕ 12

ಗುಹಾಯಾಂ ಗೇಹೇ ವಾ ಬಹಿರಪಿ ವನೇ ವಾಽದ್ರಿಶಿಖರೇ

ಜಲೇ ವಾ ವಹ್ನೌ ವಾ ವಸತು ವಸತೇಃ ಕಿಂ ವದ ಫಲಮ್ ।

ಸದಾ ಯಸ್ಯೈವಾನ್ತಃ-ಕರಣಮಪಿ ಶಮ್ಭೋ ತವ ಪದೇ

ಸ್ಥಿತಂ ಚೇದ್ಯೋಗೋಽಸೌ ಸ ಚ ಪರಮಯೋಗೀ ಸ ಚ ಸುಖೀ

॥ 11 ॥

ಶ್ಲೋಕ 13

ಅಸಾರೇ ಸಂಸಾರೇ ನಿಜ-ಭಜನದೂರೇ ಜಡಧಿಯಾ

ಭ್ರಮನ್ತಂ ಮಾಮನ್ಧಂ ಪರಮಕೃಪಯಾ ಪಾತುಮುಚಿತಮ್ ।

ಮದನ್ಯಃ ಕೋ ದೀನಸ್ತವ ಕೃಪಣ-ರಕ್ಷಾತಿನಿಪುಣ- [ರಕ್ಷಾತಿನಿಪುಣಃ ತ್ವದನ್ಯಃ]

-ಸ್ತ್ವದನ್ಯಃ ಕೋ ವಾ ಮೇ ತ್ರಿಜಗತಿ ಶರಣ್ಯಃ ಪಶುಪತೇ

॥ 12 ॥

ಶ್ಲೋಕ 14

ಪ್ರಭುಸ್ತ್ವಂ ದೀನಾನಾಂ ಖಲು ಪರಮಬನ್ಧುಃ ಪಶುಪತೇ

ಪ್ರಮುಖ್ಯೋಽಹಂ ತೇಷಾಮಪಿ ಕಿಮುತ ಬನ್ಧುತ್ವಮನಯೋಃ ।

ತ್ವಯೈವ ಕ್ಷನ್ತವ್ಯಾಃ ಶಿವ ಮದಪರಾಧಾಶ್ಚ ಸಕಲಾಃ

ಪ್ರಯತ್ನಾ-ತ್ಕರ್ತವ್ಯಂ ಮದವನಮಿಯಂ ಬನ್ಧುಸರಣಿಃ

॥ 13 ॥

ಶ್ಲೋಕ 15

ಉಪೇಕ್ಷಾ ನೋ ಚೇತ್ಕಿಂ ನ ಹರಸಿ ಭವದ್ಧ್ಯಾನ-ವಿಮುಖಾಂ

ದುರಾಶಾ-ಭೂಯಿಷ್ಠಾಂ ವಿಧಿಲಿಪಿ-ಮಶಕ್ತೋ ಯದಿ ಭವಾನ್ ।

ಶಿರಸ್ತದ್ವೈಧಾತ್ರಂ ನನಖಲು ಸುವೃತ್ತಂ ಪಶುಪತೇ

ಕಥಂ ವಾ ನಿರ್ಯತ್ನಂ ಕರನಖ-ಮುಖೇನೈವ ಲುಲಿತಮ್

॥ 14 ॥

ಶ್ಲೋಕ 16

ವಿರಿಞ್ಚಿ-ರ್ದೀರ್ಘಾಯು-ರ್ಭವತು ಭವತಾ ತತ್ಪರಶಿರ- [ತತ್ಪರಶಿರಃ ಚತುಷ್ಕಂ]

-ಶ್ಚತುಷ್ಕಂ ಸಂರಕ್ಷ್ಯಂ ಸ ಖಲು ಭುವಿ ದೈನ್ಯಂ ಲಿಖಿತವಾನ್ ।

ವಿಚಾರಃ ಕೋ ವಾ ಮಾಂ ವಿಶದ ಕೃಪಯಾ ಪಾತಿ ಶಿವ ತೇ

ಕಟಾಕ್ಷವ್ಯಾಪಾರಃ ಸ್ವಯಮಪಿ ಚ ದೀನಾವನಪರಃ

॥ 15 ॥

ಶ್ಲೋಕ 17

ಫಲಾದ್ವಾ ಪುಣ್ಯಾನಾಂ ಮಯಿ ಕರುಣಯಾ ವಾ ತ್ವಯಿ ವಿಭೋ

ಪ್ರಸನ್ನೇಽಪಿ ಸ್ವಾಮಿನ್ ಭವದಮಲ-ಪಾದಾಬ್ಜ-ಯುಗಲಮ್ ।

ಕಥಂ ಪಶ್ಯೇಯಂ ಮಾಂ ಸ್ಥಗಯತಿ ನಮಃ ಸಮ್ಭ್ರಮಜುಷಾಂ

ನಿಲಿಮ್ಪಾನಾಂ ಶ್ರೇಣಿ-ರ್ನಿಜ-ಕನಕ-ಮಾಣಿಕ್ಯ-ಮಕುಟೈಃ

॥ 16 ॥

ಶ್ಲೋಕ 18

ತ್ವಮೇಕೋ ಲೋಕಾನಾಂ ಪರಮಫಲದೋ ದಿವ್ಯಪದವೀಂ

ವಹನ್ತಸ್ತ್ವನ್ಮೂಲಾಂ ಪುನರಪಿ ಭಜನ್ತೇ ಹರಿಮುಖಾಃ ।

ಕಿಯದ್ವಾ ದಾಕ್ಷಿಣ್ಯಂ ತವ ಶಿವ ಮದಾಶಾ ಚ ಕಿಯತೀ

ಕದಾ ವಾ ಮದ್ರಕ್ಷಾಂ ವಹಸಿ ಕರುಣಾ-ಪೂರಿತದೃಶಾ

॥ 17 ॥

ಶ್ಲೋಕ 19

ದುರಾಶಾ-ಭೂಯಿಷ್ಠೇ ದುರಧಿಪ-ಗೃಹದ್ವಾರ-ಘಟಕೇ

ದುರನ್ತೇ ಸಂಸಾರೇ ದುರಿತನಿಲಯೇ ದುಃಖಜನಕೇ ।

ಮದಾಯಾಸಂ ಕಿಂ ನ ವ್ಯಪನಯಸಿ ಕಸ್ಯೋಪ-ಕೃತಯೇ

ವದೇಯಂ ಪ್ರೀತಿಶ್ಚೇತ್ತವ ಶಿವ ಕೃತಾರ್ಥಾಃ ಖಲು ವಯಮ್

॥ 18 ॥

ಶ್ಲೋಕ 20

ಸದಾ ಮೋಹಾಟವ್ಯಾಂ ಚರತಿ ಯುವತೀನಾಂ ಕುಚಗಿರೌ

ನಟತ್ಯಾಶಾ-ಶಾಖಾ-ಸ್ವಟತಿ ಝಟಿತಿ ಸ್ವೈರಮಭಿತಃ ।

ಕಪಾಲಿನ್ ಭಿಕ್ಷೋ ಮೇ ಹೃದಯ-ಕಪಿಮತ್ಯನ್ತ-ಚಪಲಂ

ದೃಢಂ ಭಕ್ತ್ಯಾ ಬದ್ಧ್ವಾ ಶಿವ ಭವದಧೀನಂ ಕುರು ವಿಭೋ

॥ 19 ॥

ಶ್ಲೋಕ 21

ಧೃತಿ-ಸ್ತಮ್ಭಾಧಾರಾಂ ದೃಢ-ಗುಣ-ನಿಬದ್ಧಾಂ ಸಗಮನಾಂ

ವಿಚಿತ್ರಾಂ ಪದ್ಮಾಢ್ಯಾಂ ಪ್ರತಿದಿವಸ-ಸನ್ಮಾರ್ಗ-ಘಟಿತಾಮ್ ।

ಸ್ಮರಾರೇ ಮಚ್ಚೇತಃ-ಸ್ಫುಟ-ಪಟಕುಟೀಂ ಪ್ರಾಪ್ಯ ವಿಶದಾಂ

ಜಯ ಸ್ವಾಮಿನ್ ಶಕ್ತ್ಯಾ ಸಹ ಶಿವ ಗಣೈಃ ಸೇವಿತ ವಿಭೋ

॥ 20 ॥

ಶ್ಲೋಕ 22

ಪ್ರಲೋಭಾದ್ಯೈರರ್ಥಾಹರಣ-ಪರತನ್ತ್ರೋ ಧನಿಗೃಹೇ [ಪ್ರಲೋಭಾದ್ಯೈಃ ಅರ್ಥಾಹರಣ-ಪರತನ್ತ್ರೋ]

ಪ್ರವೇಶೋದ್ಯುಕ್ತಃ ಸನ್ ಭ್ರಮತಿ ಬಹುಧಾ ತಸ್ಕರಪತೇ ।

ಇಮಂ ಚೇತಶ್ಚೋರಂ ಕಥಮಿಹ ಸಹೇ ಶಙ್ಕರ ವಿಭೋ

ತವಾಧೀನಂ ಕೃತ್ವಾ ಮಯಿ ನಿರಪರಾಧೇ ಕುರು ಕೃಪಾಮ್

॥ 21 ॥

ಶ್ಲೋಕ 23

ಕರೋಮಿ ತ್ವತ್ಪೂಜಾಂ ಸಪದಿ ಸುಖದೋ ಮೇ ಭವ ವಿಭೋ

ವಿಧಿತ್ವಂ ವಿಷ್ಣುತ್ವಂ ದಿಶಸಿ ಖಲು ತಸ್ಯಾಃ ಫಲಮಿತಿ ।

ಪುನಶ್ಚ ತ್ವಾಂ ದ್ರಷ್ಟುಂ ದಿವಿ ಭುವಿ ವಹನ್ಪಕ್ಷಿ-ಮೃಗತಾ-

-ಮದೃಷ್ಟ್ವಾ ತತ್ಖೇದಂ ಕಥಮಿಹ ಸಹೇ ಶಙ್ಕರ ವಿಭೋ

॥ 22 ॥

ಶ್ಲೋಕ 24

ಕದಾ ವಾ ಕೈಲಾಸೇ ಕನಕಮಣಿಸೌಧೇ ಸಹ ಗಣೈ- [ಸಹ ಗಣೈಃ ವಸನ್]

-ರ್ವಸನ್ ಶಮ್ಭೋರಗ್ರೇ ಸ್ಫುಟ-ಘಟಿತ-ಮೂರ್ಧಾಞ್ಜಲಿಪುಟಃ ।

ವಿಭೋ ಸಾಮ್ಬ ಸ್ವಾಮಿ-ನ್ಪರಮಶಿವ ಪಾಹೀತಿ ನಿಗದ-

-ನ್ವಿಧಾತೄಣಾಂ ಕಲ್ಪಾನ್ ಕ್ಷಣಮಿವ ವಿನೇಷ್ಯಾಮಿ ಸುಖತಃ

॥ 23 ॥

ಶ್ಲೋಕ 25

ಸ್ತವೈ-ರ್ಬ್ರಹ್ಮಾದೀನಾಂ ಜಯಜಯ-ವಚೋಭಿರ್ನಿಯಮಿನಾಂ

ಗಣಾನಾಂ ಕೇಲೀಭಿರ್ಮದಕಲಮಹೋಕ್ಷಸ್ಯ ಕಕುದಿ । [ಕೇಲೀಭಿಃ ಮದಕಲ-ಮಹೋಕ್ಷಸ್ಯ]

ಸ್ಥಿತಂ ನೀಲಗ್ರೀವಂ ತ್ರಿನಯನ-ಮುಮಾಶ್ಲಿಷ್ಟ-ವಪುಷಂ

ಕದಾ ತ್ವಾಂ ಪಶ್ಯೇಯಂ ಕರಧೃತ-ಮೃಗಂ ಖಣ್ಡ-ಪರಶುಮ್

॥ 24 ॥

ಶ್ಲೋಕ 26

ಕದಾ ವಾ ತ್ವಾಂ ದೃಷ್ಟ್ವಾ ಗಿರಿಶ ತವ ಭವ್ಯಾಙ್ಘ್ರಿ ಯುಗಲಂ

ಗೃಹೀತ್ವಾ ಹಸ್ತಾಭ್ಯಾಂ ಶಿರಸಿ ನಯನೇ ವಕ್ಷಸಿ ವಹನ್ ।

ಸಮಾ ಶ್ಲಿಷ್ಯಾ ಘ್ರಾಯ ಸ್ಫುಟ ಜಲಜ ಗನ್ಧಾನ್ ಪರಿಮಲಾ-

-ನಲಾಭ್ಯಾಂ ಬ್ರಹ್ಮಾದ್ಯೈರ್ಮುದಮನುಭವಿಷ್ಯಾಮಿ ಹೃದಯೇ

॥ 25 ॥

ಶ್ಲೋಕ 27

॥ 26 ॥ [ಬ್ರಹ್ಮಾದ್ಯೈಃ ಮುದ-ಮನುಭವಿಷ್ಯಾಮಿ]

ಕರಸ್ಥೇ ಹೇಮಾದ್ರೌ ಗಿರಿಶ ನಿಕಟಸ್ಥೇ ಧನಪತೌ

ಗೃಹಸ್ಥೇ ಸ್ವರ್ಭೂಜಾ ಮರ ಸುರಭಿ ಚಿನ್ತಾಮಣಿಗಣೇ ।

ಶಿರಃಸ್ಥೇ ಶೀತಾಂಶೌ ಚರಣಯುಗಲಸ್ಥೇಽಖಿಲಶುಭೇ

ಕಮರ್ಥಂ ದಾಸ್ಯೇಽಹಂ ಭವತು ಭವದರ್ಥಂ ಮಮ ಮನಃ

ಶ್ಲೋಕ 28

ಸಾರೂಪ್ಯಂ ತವ ಪೂಜನೇ ಶಿವ ಮಹಾದೇವೇತಿ ಸಙ್ಕೀರ್ತನೇ

ಸಾಮೀಪ್ಯಂ ಶಿವಭಕ್ತಿ-ಧುರ್ಯಜನತಾ-ಸಾಙ್ಗತ್ಯ-ಸಮ್ಭಾಷಣೇ ॥

ಸಾಲೋಕ್ಯಂ ಚ ಚರಾಚರಾತ್ಮಕತನುಧ್ಯಾನೇ ಭವಾನೀಪತೇ

ಸಾಯುಜ್ಯಂ ಮಮ ಸಿದ್ಧಮತ್ರ ಭವತಿ ಸ್ವಾಮಿನ್ ಕೃತಾರ್ಥೋಽಸ್ಮ್ಯಹಮ್

॥ 27 ॥

ಶ್ಲೋಕ 29

ತ್ವತ್ಪಾದಾಮ್ಬುಜಮರ್ಚಯಾಮಿ ಪರಮಂ ತ್ವಾಂ ಚಿನ್ತಯಾಮ್ಯನ್ವಹಂ

ತ್ವಾಮೀಶಂ ಶರಣಂ ವ್ರಜಾಮಿ ವಚಸಾ ತ್ವಾಮೇವ ಯಾಚೇ ವಿಭೋ ।

ವೀಕ್ಷಾಂ ಮೇ ದಿಶ ಚಾಕ್ಷುಷೀಂ ಸಕರುಣಾಂ ದಿವ್ಯೈಶ್ಚಿರಂ ಪ್ರಾರ್ಥಿತಾಂ

ಶಮ್ಭೋ ಲೋಕಗುರೋ ಮದೀಯಮನಸಃ ಸೌಖ್ಯೋಪದೇಶಂ ಕುರು

॥ 28 ॥

ಶ್ಲೋಕ 30

ವಸ್ತ್ರೋದ್ಧೂತವಿಧೌ ಸಹಸ್ರಕರತಾ ಪುಷ್ಪಾರ್ಚನೇ ವಿಷ್ಣುತಾ

ಗನ್ಧೇ ಗನ್ಧವಹಾತ್ಮತಾಽನ್ನಪಚನೇ ಬರ್ಹಿರ್ಮುಖಾಧ್ಯಕ್ಷತಾ ।

ಪಾತ್ರೇ ಕಾಞ್ಚನಗರ್ಭತಾಸ್ತಿ ಮಯಿ ಚೇದ್ಬಾಲೇನ್ದುಚೂಡಾಮಣೇ

ಶುಶ್ರೂಷಾಂ ಕರವಾಣಿ ತೇ ಪಶುಪತೇ ಸ್ವಾಮಿಂಸ್ತ್ರಿಲೋಕೀಗುರೋ

॥ 29 ॥

ಶ್ಲೋಕ 31

ನಾಲಂ ವಾ ಪರಮೋಪಕಾರಕಮಿದಂ ತ್ವೇಕಂ ಪಶೂನಾಂ ಪತೇ

ಪಶ್ಯನ್ ಕುಕ್ಷಿಗತಾಂಶ್ಚರಾಚರಗಣಾನ್ ಬಾಹ್ಯಸ್ಥಿತಾನ್ ರಕ್ಷಿತುಮ್ ।

ಸರ್ವಾಮರ್ತ್ಯಪಲಾಯನೌಷಧಮತಿಜ್ವಾಲಾಕರಂ ಭೀಕರಂ

ನಿಕ್ಷಿಪ್ತಂ ಗರಲಂ ಗಲೇ ನ ಗಿಲಿತಂ ನೋದ್ಗೀರ್ಣಮೇವ ತ್ವಯಾ

॥ 30 ॥

ಶ್ಲೋಕ 32

ಜ್ವಾಲೋಗ್ರಃ ಸಕಲಾಮರಾತಿಭಯದಃ ಕ್ಷ್ವೇಲಃ ಕಥಂ ವಾ ತ್ವಯಾ

ದೃಷ್ಟಃ ಕಿಂ ಚ ಕರೇ ಧೃತಃ ಕರತಲೇ ಕಿಂ ಪಕ್ವಜಮ್ಬೂಫಲಮ್ ।

ಜಿಹ್ವಾಯಾಂ ನಿಹಿತಶ್ಚ ಸಿದ್ಧಘುಟಿಕಾ ವಾ ಕಣ್ಠದೇಶೇ ಭೃತಃ

ಕಿಂ ತೇ ನೀಲಮಣಿರ್ವಿಭೂಷಣಮಯಂ ಶಮ್ಭೋ ಮಹಾತ್ಮನ್ ವದ

॥ 31 ॥

ಶ್ಲೋಕ 33

ನಾಲಂ ವಾ ಸಕೃದೇವ ದೇವ ಭವತಃ ಸೇವಾ ನತಿರ್ವಾ ನುತಿಃ

ಪೂಜಾ ವಾ ಸ್ಮರಣಂ ಕಥಾಶ್ರವಣಮಪ್ಯಾಲೋಕನಂ ಮಾದೃಶಾಮ್ ।

ಸ್ವಾಮಿನ್ನಸ್ಥಿರದೇವತಾನುಸರಣಾಯಾಸೇನ ಕಿಂ ಲಭ್ಯತೇ

ಕಾ ವಾ ಮುಕ್ತಿರಿತಃ ಕುತೋ ಭವತಿ ಚೇತ್ಕಿಂ ಪ್ರಾರ್ಥನೀಯಂ ತದಾ

॥ 32 ॥

ಶ್ಲೋಕ 34

ಕಿಂ ಬ್ರೂಮಸ್ತವ ಸಾಹಸಂ ಪಶುಪತೇ ಕಸ್ಯಾಸ್ತಿ ಶಮ್ಭೋ ಭವ-

-ದ್ಧೈರ್ಯಂ ಚೇದೃಶಮಾತ್ಮನಃ ಸ್ಥಿತಿರಿಯಂ ಚಾನ್ಯೈಃ ಕಥಂ ಲಭ್ಯತೇ ।

ಭ್ರಶ್ಯದ್ದೇವಗಣಂ ತ್ರಸನ್ಮುನಿಗಣಂ ನಶ್ಯತ್ಪ್ರಪಞ್ಚಂ ಲಯಂ

ಪಶ್ಯನ್ನಿರ್ಭಯ ಏಕ ಏವ ವಿಹರತ್ಯಾನನ್ದಸಾನ್ದ್ರೋ ಭವಾನ್

॥ 33 ॥

ಶ್ಲೋಕ 35

ಯೋಗಕ್ಷೇಮಧುರನ್ಧರಸ್ಯ ಸಕಲಶ್ರೇಯಃಪ್ರದೋದ್ಯೋಗಿನೋ

ದೃಷ್ಟಾದೃಷ್ಟಮತೋಪದೇಶಕೃತಿನೋ ಬಾಹ್ಯಾನ್ತರವ್ಯಾಪಿನಃ ।

ಸರ್ವಜ್ಞಸ್ಯ ದಯಾಕರಸ್ಯ ಭವತಃ ಕಿಂ ವೇದಿತವ್ಯಂ ಮಯಾ

ಶಮ್ಭೋ ತ್ವಂ ಪರಮಾನ್ತರಙ್ಗ ಇತಿ ಮೇ ಚಿತ್ತೇ ಸ್ಮರಾಮ್ಯನ್ವಹಮ್

॥ 34 ॥

ಶ್ಲೋಕ 36

ಭಕ್ತೋ ಭಕ್ತಿಗುಣಾವೃತೇ ಮುದಮೃತಾಪೂರ್ಣೇ ಪ್ರಸನ್ನೇ ಮನಃ

ಕುಮ್ಭೇ ಸಾಮ್ಬ ತವಾಙ್ಘ್ರಿಪಲ್ಲವಯುಗಂ ಸಂಸ್ಥಾಪ್ಯ ಸಂವಿತ್ಫಲಮ್ ।

ಸತ್ವಂ ಮನ್ತ್ರಮುದೀರಯನ್ನಿಜಶರೀರಾಗಾರಶುದ್ಧಿಂ ವಹನ್

ಪುಣ್ಯಾಹಂ ಪ್ರಕಟೀಕರೋಮಿ ರುಚಿರಂ ಕಲ್ಯಾಣಮಾಪಾದಯನ್

॥ 35 ॥

ಶ್ಲೋಕ 37

ಆಮ್ನಾಯಾಮ್ಬುಧಿಮಾದರೇಣ ಸುಮನಃಸಙ್ಘಾಃ ಸಮುದ್ಯನ್ಮನೋ [ಸಮುದ್ಯನ್ಮನಃ]

ಮನ್ಥಾನಂ ದೃಢಭಕ್ತಿರಜ್ಜುಸಹಿತಂ ಕೃತ್ವಾ ಮಥಿತ್ವಾ ತತಃ ।

ಸೋಮಂ ಕಲ್ಪತರುಂ ಸುಪರ್ವಸುರಭಿಂ ಚಿನ್ತಾಮಣಿಂ ಧೀಮತಾಂ

ನಿತ್ಯಾನನ್ದಸುಧಾಂ ನಿರನ್ತರರಮಾಸೌಭಾಗ್ಯಮಾತನ್ವತೇ

॥ 36 ॥

ಶ್ಲೋಕ 38

ಪ್ರಾಕ್ಪುಣ್ಯಾಚಲಮಾರ್ಗದರ್ಶಿತಸುಧಾಮೂರ್ತಿಃ ಪ್ರಸನ್ನಃ ಶಿವಃ

ಸೋಮಃ ಸದ್ಗಣಸೇವಿತೋ ಮೃಗಧರಃ ಪೂರ್ಣಸ್ತಮೋಮೋಚಕಃ ।

ಚೇತಃ ಪುಷ್ಕರಲಕ್ಷಿತೋ ಭವತಿ ಚೇದಾನನ್ದಪಾಥೋನಿಧಿಃ

ಪ್ರಾಗಲ್ಭ್ಯೇನ ವಿಜೃಮ್ಭತೇ ಸುಮನಸಾಂ ವೃತ್ತಿಸ್ತದಾ ಜಾಯತೇ

॥ 37 ॥

ಶ್ಲೋಕ 39

ಧರ್ಮೋ ಮೇ ಚತುರಙ್ಘ್ರಿಕಃ ಸುಚರಿತಃ ಪಾಪಂ ವಿನಾಶಂ ಗತಂ

ಕಾಮಕ್ರೋಧಮದಾದಯೋ ವಿಗಲಿತಾಃ ಕಾಲಾಃ ಸುಖಾವಿಷ್ಕೃತಾಃ ।

ಜ್ಞಾನಾನನ್ದಮಹೌಷಧಿಃ ಸುಫಲಿತಾ ಕೈವಲ್ಯನಾಥೇ ಸದಾ

ಮಾನ್ಯೇ ಮಾನಸಪುಣ್ಡರೀಕನಗರೇ ರಾಜಾವತಂಸೇ ಸ್ಥಿತೇ

॥ 38 ॥

ಶ್ಲೋಕ 40

ಧೀಯನ್ತ್ರೇಣ ವಚೋಘಟೇನ ಕವಿತಾಕುಲ್ಯೋಪಕುಲ್ಯಾಕ್ರಮೈ- [ಕವಿತಾಕುಲ್ಯೋಪಕುಲ್ಯಾಕ್ರಮೈಃ]

-ರಾನೀತೈಶ್ಚ ಸದಾಶಿವಸ್ಯ ಚರಿತಾಮ್ಭೋರಾಶಿದಿವ್ಯಾಮೃತೈಃ ।

ಹೃತ್ಕೇದಾರಯುತಾಶ್ಚ ಭಕ್ತಿಕಲಮಾಃ ಸಾಫಲ್ಯಮಾತನ್ವತೇ

ದುರ್ಭಿಕ್ಷಾನ್ಮಮ ಸೇವಕಸ್ಯ ಭಗವನ್ವಿಶ್ವೇಶ ಭೀತಿಃ ಕುತಃ

॥ 39 ॥

ಶ್ಲೋಕ 41

ಪಾಪೋತ್ಪಾತವಿಮೋಚನಾಯ ರುಚಿರೈಶ್ವರ್ಯಾಯ ಮೃತ್ಯುಞ್ಜಯ

ಸ್ತೋತ್ರಧ್ಯಾನನತಿಪ್ರದಕ್ಷಿಣಸಪರ್ಯಾಲೋಕನಾಕರ್ಣನೇ ।

ಜಿಹ್ವಾಚಿತ್ತಶಿರೋಙ್ಘ್ರಿಹಸ್ತನಯನಶ್ರೋತ್ರೈರಹಂ ಪ್ರಾರ್ಥಿತೋ

ಮಾಮಾಜ್ಞಾಪಯ ತನ್ನಿರೂಪಯ ಮುಹುರ್ಮಾಮೇವ ಮಾ ಮೇಽವಚಃ

॥ 40 ॥

ಶ್ಲೋಕ 42

ಗಾಮ್ಭೀರ್ಯಂ ಪರಿಖಾಪದಂ ಘನಧೃತಿಃ ಪ್ರಾಕಾರ ಉದ್ಯದ್ಗುಣ- [ಉದ್ಯದ್ಗುಣಸ್ತೊಮಃ]

-ಸ್ತೋಮಶ್ಚಾಪ್ತಬಲಂ ಘನೇನ್ದ್ರಿಯಚಯೋ ದ್ವಾರಾಣಿ ದೇಹೇ ಸ್ಥಿತಃ ।

ವಿದ್ಯಾ ವಸ್ತುಸಮೃದ್ಧಿರಿತ್ಯಖಿಲಸಾಮಗ್ರೀಸಮೇತೇ ಸದಾ

ದುರ್ಗಾತಿಪ್ರಿಯದೇವ ಮಾಮಕಮನೋದುರ್ಗೇ ನಿವಾಸಂ ಕುರು

॥ 41 ॥

ಶ್ಲೋಕ 43

ಮಾ ಗಚ್ಛ ತ್ವಮಿತಸ್ತತೋ ಗಿರಿಶ ಭೋ ಮಯ್ಯೇವ ವಾಸಂ ಕುರು

ಸ್ವಾಮಿನ್ನಾದಿಕಿರಾತ ಮಾಮಕಮನಃಕಾನ್ತಾರಸೀಮಾನ್ತರೇ ।

ವರ್ತನ್ತೇ ಬಹುಶೋ ಮೃಗಾ ಮದಜುಷೋ ಮಾತ್ಸರ್ಯಮೋಹಾದಯ- [ ಮಾತ್ಸರ್ಯಮೋಹಾದಯಃ]

-ಸ್ತಾನ್ಹತ್ವಾ ಮೃಗಯಾವಿನೋದರುಚಿತಾ ಲಾಭಂ ಚ ಸಮ್ಪ್ರಾಪ್ಸ್ಯಸಿ

॥ 42 ॥

ಶ್ಲೋಕ 44

ಕರಲಗ್ನಮೃಗಃ ಕರೀನ್ದ್ರಭಙ್ಗೋ

ಘನಶಾರ್ದೂಲವಿಖಣ್ಡನೋಽಸ್ತಜನ್ತುಃ ।

ಗಿರಿಶೋ ವಿಶದಾಕೃತಿಶ್ಚ ಚೇತಃ-

-ಕುಹರೇ ಪಞ್ಚಮುಖೋಽಸ್ತಿ ಮೇ ಕುತೋ ಭೀಃ

॥ 43 ॥

ಶ್ಲೋಕ 45

ಛನ್ದಃ ಶಾಖಿಶಿಖಾನ್ವಿತೈರ್ [ಶಾಖಿಶಿಖಾನ್ವಿತೈರಃ] ದ್ವಿಜವರೈಃ ಸಂಸೇವಿತೇ ಶಾಶ್ವತೇ

ಸೌಖ್ಯಾಪಾದಿನಿ ಖೇದಭೇದಿನಿ ಸುಧಾಸಾರೈಃ ಫಲೈರ್ದೀಪಿತೇ ।

ಚೇತಃಪಕ್ಷಿಶಿಖಾಮಣೇ ತ್ಯಜ ವೃಥಾ ಅಞ್ಚಾರಮನ್ಯೈರಲಂ

ನಿತ್ಯಂ ಶಙ್ಕರ ಪಾದಪದ್ಮಯುಗಲೀನೀಡೇ ವಿಹಾರಂ ಕುರು

॥ 44 ॥

ಶ್ಲೋಕ 46

ಆಕೀರ್ಣೇ ನಖರಾಜಿಕಾನ್ತಿವಿಭವೈ [ನಖರಾಜಿಕಾನ್ತಿವಿಭವೈಃ] ರುದ್ಯತ್ಸುಧಾವೈಭವೈ-[ರುದ್ಯತ್ಸುಧಾವೈಭವೈಃ]

-ರಾಧೌತೇಽಪಿ ಚ ಪದ್ಮರಾಗಲಲಿತೇ ಹಂಸವ್ರಜೈರಾಶ್ರಿತೇ ।

ನಿತ್ಯಂ ಭಕ್ತಿವಧೂಗಣೈಶ್ಚ ರಹಸಿ ಸ್ವೇಚ್ಛಾವಿಹಾರಂ ಕುರು

ಸ್ಥಿತ್ವಾ ಮಾನಸರಾಜಹಂಸ ಗಿರಿಜಾನಾಥಾಙ್ಘ್ರಿಸೌಧಾನ್ತರೇ

॥ 45 ॥

ಶ್ಲೋಕ 47

ಶಮ್ಭುಧ್ಯಾನ ವಸನ್ತಸಙ್ಗಿನಿ ಹೃದಾರಾಮೇಽಘಜೀರ್ಣಚ್ಛದಾಃ

ಸ್ರಸ್ತಾ ಭಕ್ತಿಲತಾಚ್ಛಟಾ ವಿಲಸಿತಾಃ ಪುಣ್ಯಪ್ರವಾಲಶ್ರಿತಾಃ ।

ದೀಪ್ಯನ್ತೇ ಗುಣಕೋರಕಾ ಜಪವಚಃಪುಷ್ಪಾಣಿ ಸದ್ವಾಸನಾ

ಜ್ಞಾನಾನನ್ದ ಸುಧಾಮರನ್ದಲಹರೀ ಸಂವಿತ್ಫಲಾಭ್ಯುನ್ನತಿಃ

॥ 46 ॥

ಶ್ಲೋಕ 48

ನಿತ್ಯಾನನ್ದರಸಾಲಯಂ ಸುರಮುನಿಸ್ವಾನ್ತಾಮ್ಬುಜಾತಾಶ್ರಯಂ

ಸ್ವಚ್ಛಂ ಸದ್ದ್ವಿಜಸೇವಿತಂ ಕಲುಷಹೃತ್ಸದ್ವಾಸನಾ ವಿಷ್ಕೃತಮ್ ।

ಶಮ್ಭುಧ್ಯಾನ ಸರೋವರಂ ವ್ರಜ ಮನೋಹಂ ಸಾವತಂಸ ಸ್ಥಿರಂ

ಕಿಂ ಕ್ಷುದ್ರಾ ಶ್ರಯಪಲ್ವಲ ಭ್ರಮಣ ಸಞ್ಜಾತಶ್ರಮಂ ಪ್ರಾಪ್ಸ್ಯಸಿ

॥ 47 ॥

ಶ್ಲೋಕ 49

ಆನನ್ದಾಮೃತ ಪೂರಿತಾ ಹರಪದಾಂ ಭೋಜಾ ಲವಾಲೋದ್ಯತಾ

ಸ್ಥೈರ್ಯೋಪಘ್ನಮುಪೇತ್ಯ ಭಕ್ತಿಲತಿಕಾ ಶಾಖೋಪ ಶಾಖಾನ್ವಿತಾ ।

ಉಚ್ಛೈರ್ ಮಾನಸ ಕಾಯಮಾನ ಪಟಲೀಮಾಕ್ರಮ್ಯ ನಿಷ್ಕಲ್ಮಷಾ

ನಿತ್ಯಾಭೀಷ್ಟ ಫಲಪ್ರದಾ ಭವತು ಮೇ ಸತ್ಕರ್ಮ ಸಂವರ್ಧಿತಾ

॥ 48 ॥

ಶ್ಲೋಕ 50

ಸನ್ಧ್ಯಾ ರಮ್ಭ ವಿಜೃಮ್ಭಿತಂ ಶ್ರುತಿಶಿರಃ ಸ್ಥಾನಾನ್ತರಾಧಿ ಷ್ಠಿತಂ

ಸಪ್ರೇಮ ಭ್ರಮರಾಭಿರಾಮಂ ಅಸಕೃತ್ ಸದ್ವಾಸನಾ ಶೋಭಿತಮ್ ।

ಭೋಗೀನ್ದ್ರಾ ಭರಣಂ ಸಮಸ್ತಸುಮನಃ ಪೂಜ್ಯಂ ಗುಣಾವಿಷ್ಕೃತಂ

ಸೇವೇ ಶ್ರೀಗಿರಿ ಮಲ್ಲಿಕಾರ್ಜುನ ಮಹಾಲಿಙ್ಗಂ ಶಿವಾಲಿಙ್ಗಿತಮ್

॥ 49 ॥

ಶ್ಲೋಕ 51

ಭೃಙ್ಗೀಚ್ಛಾ ನಟನೋತ್ಕಟಃ ಕರಮದಗ್ರಾಹೀ ಸ್ಫುರನ್ ಮಾಧವಾ- [ಸ್ಫುರನ್ ಮಾಧವಾವ್ಹ್ಲಾದೋ]

-ಹ್ಲಾದೋ ನಾದಯುತೋ ಮಹಾಸಿತವಪುಃ ಪಞ್ಚೇಷುಣಾ ಚಾದೃತಃ ।

ಸತ್ಪಕ್ಷಃ ಸುಮನೋ ವನೇಷು ಸ ಪುನಃ ಸಾಕ್ಷಾನ್ಮದೀಯೇ ಮನೋ-

-ರಾಜೀವೇ ಭ್ರಮರಾಧಿಪೋ ವಿಹರತಾಂ ಶ್ರೀಶೈಲವಾಸೀ ವಿಭುಃ

॥ 50 ॥

ಶ್ಲೋಕ 52

ಕಾರುಣ್ಯಾಮೃತ ವರ್ಷಿಣಂ ಘನವಿಪದ್ಗ್ರೀಷ್ಮಚ್ ಛಿದಾಕರ್ಮಠಂ

ವಿದ್ಯಾಸಸ್ಯ ಫಲೋದಯಾಯ ಸುಮನಃ ಸಂಸೇವ್ಯ ಮಿಚ್ಛಾಕೃತಿಮ್ ।

ನೃತ್ಯದ್ ಭಕ್ತ ಮಯೂರಮದ್ರಿ ನಿಲಯಂ ಚಞ್ಚಜ್ಜಟಾಮಣ್ಡಲಂ

ಶಮ್ಭೋ ವಾಞ್ಛತಿ ನೀಲಕನ್ಧರ ಸದಾ ತ್ವಾಂ ಮೇ ಮನಶ್ಚಾತಕಃ

॥ 51 ॥

ಶ್ಲೋಕ 53

ಆಕಾಶೇನ ಶಿಖೀ ಸಮಸ್ತಫಣಿನಾಂ ನೇತ್ರಾ ಕಲಾಪೀ ನತಾ-[ನತಾನುಗ್ರಾಹಿ]

-ನುಗ್ರಾಹಿ ಪ್ರಣವೋಪದೇ ಶನಿನದೈಃ ಕೇಕೀತಿ ಯೋ ಗೀಯತೇ ।

ಶ್ಯಾಮಾಂ ಶೈಲಸಮುದ್ಭವಾಂ ಘನರುಚಿಂ ದೃಷ್ಟ್ವಾ ನಟನ್ತಂ ಮುದಾ

ವೇದಾನ್ತೋಪವನೇ ವಿಹಾರರಸಿಕಂ ತಂ ನೀಲಕಣ್ಠಂ ಭಜೇ

॥ 52 ॥

ಶ್ಲೋಕ 54

ಸನ್ಧ್ಯಾ ಘರ್ಮದಿನಾತ್ಯಯೋ ಹರಿಕರಾಘಾತ ಪ್ರಭೂತಾನಕ- [ಪ್ರಭೂತಾನಕಧ್ವಾನೋ ]

-ಧ್ವಾನೋ ವಾರಿದಗರ್ಜಿತಂ ದಿವಿಷದಾಂ ದೃಷ್ಟಿಚ್ಛಟಾ ಚಞ್ಚಲಾ ।

ಭಕ್ತಾನಾಂ ಪರಿತೋಷಬಾಷ್ಪ ವಿತತಿರ್ ವೃಷ್ಟಿರ್ ಮಯೂರೀ ಶಿವಾ

ಯಸ್ಮಿನ್ನುಜ್ಜ್ವಲ ತಾಣ್ಡವಂ ವಿಜಯತೇ ತಂ ನೀಲಕಣ್ಠಂ ಭಜೇ

॥ 53 ॥

ಶ್ಲೋಕ 55

ಆದ್ಯಾಯಾಮಿತ ತೇಜಸೇ ಶ್ರುತಿಪದೈರ್ವೇದ್ಯಾಯ ಸಾಧ್ಯಾಯ ತೇ

ವಿದ್ಯಾನನ್ದಮಯಾತ್ಮನೇ ತ್ರಿಜಗತಃ ಸಂರಕ್ಷಣೋದ್ಯೋಗಿನೇ ।

ಧ್ಯೇಯಾಯಾಖಿಲಯೋಗಿಭಿಃ ಸುರಗಣೈರ್ಗೇಯಾಯ ಮಾಯಾವಿನೇ

ಸಮ್ಯಕ್ತಾಣ್ಡವ ಸಮ್ಭ್ರಮಾಯ ಜಟಿನೇ ಸೇಯಂ ನತಿಃ ಶಮ್ಭವೇ

॥ 54 ॥

ಶ್ಲೋಕ 56

ನಿತ್ಯಾಯ ತ್ರಿಗುಣಾತ್ಮನೇ ಪುರಜಿತೇ ಕಾತ್ಯಾಯನೀ ಶ್ರೇಯಸೇ

ಸತ್ಯಾಯಾದಿ ಕುಟುಮ್ಬಿನೇ ಮುನಿಮನಃ ಪ್ರತ್ಯಕ್ಷ ಚಿನ್ಮೂರ್ತಯೇ ।

ಮಾಯಾಸೃಷ್ಟ ಜಗತ್ತ್ರಯಾಯ ಸಕಲಾಮ್ನಾಯಾನ್ತಸಞ್ಚಾರಿಣೇ

ಸಾಯಂ ತಾಣ್ಡವ ಸಮ್ಭ್ರಮಾಯ ಜಟಿನೇ ಸೇಯಂ ನತಿಃ ಶಮ್ಭವೇ

॥ 55 ॥

ಶ್ಲೋಕ 57

ನಿತ್ಯಂ ಸ್ವೋದರಪೋಷಣಾಯ ಸಕಲಾನುದ್ದಿಶ್ಯ ವಿತ್ತಾಶಯಾ

ವ್ಯರ್ಥಂ ಪರ್ಯಟನಂ ಕರೋಮಿ ಭವತಃ ಸೇವಾಂ ನ ಜಾನೇ ವಿಭೋ ।

ಮಜ್ಜನ್ಮಾನ್ತರ ಪುಣ್ಯ ಪಾಕ ಬಲತಸ್ತ್ವಂ ಶರ್ವ ಸರ್ವಾನ್ತರ- [ಸರ್ವಾನ್ತರಃ]

-ಸ್ತಿಷ್ಠಸ್ಯೇವ ಹಿ ತೇನ ವಾ ಪಶುಪತೇ ತೇ ರಕ್ಷಣೀಯೋಽಸ್ಮ್ಯಹಮ್

॥ 56 ॥

ಶ್ಲೋಕ 58

ಏಕೋ ವಾರಿಜ ಬಾನ್ಧವಃ ಕ್ಷಿತಿನಭೋ ವ್ಯಾಪ್ತಂ ತಮೋ ಮಣ್ಡಲಂ

ಭಿತ್ತ್ವಾ ಲೋಚನ ಗೋಚರೋಽಪಿ ಭವತಿ ತ್ವಂ ಕೋಟಿ ಸೂರ್ಯಪ್ರಭಃ ।

ವೇದ್ಯಃ ಕಿಂ ನ ಭವಸ್ಯಹೋ ಘನತರಂ ಕೀದೃಗ್ಭವೇನ್ಮತ್ತಮ- [ಕೀದೃಗ್ಭವೇನ್ಮತ್ತಮಃ]

-ಸ್ತತ್ಸರ್ವಂ [ತತ್ಸರ್ವಂ] ವ್ಯಪನೀಯ ಮೇ ಪಶುಪತೇ ಸಾಕ್ಷಾತ್ಪ್ರಸನ್ನೋ ಭವ

॥ 57 ॥

ಶ್ಲೋಕ 59

ಹಂಸಃ ಪದ್ಮವನಂ ಸಮಿಚ್ಛತಿ ಯಥಾ ನೀಲಾಮ್ಬುದಂ ಚಾತಕಃ

ಕೋಕಃ ಕೋಕನದಪ್ರಿಯಂ ಪ್ರತಿದಿನಂ ಚನ್ದ್ರಂ ಚಕೋರಸ್ತಥಾ ।

ಚೇತೋ ವಾಞ್ಛತಿ ಮಾಮಕಂ ಪಶುಪತೇ ಚಿನ್ಮಾರ್ಗಮೃಗ್ಯಂ ವಿಭೋ

ಗೌರೀನಾಥ ಭವತ್ಪದಾಬ್ಜ ಯುಗಲಂ ಕೈವಲ್ಯ ಸೌಖ್ಯಪ್ರದಮ್

॥ 58 ॥

ಶ್ಲೋಕ 60

ರೋಧಸ್ತೋಯಹೃತಃ ಶ್ರಮೇಣ ಪಥಿಕಶ್ಛಾಯಾಂ ತರೋರ್ವೃಷ್ಟಿತೋ [ತರೋರ್ವೃಷ್ಟಿತಃ]

ಭೀತಃ ಸ್ವಸ್ಥಗೃಹಂ ಗೃಹಸ್ಥಮತಿಥಿರ್ ದೀನಃ ಪ್ರಭುಂ ಧಾರ್ಮಿಕಮ್ ।

ದೀಪಂ ಸನ್ತಮಸಾಕುಲಶ್ಚ ಶಿಖಿನಂ ಶೀತಾ ವೃತಸ್ತ್ವಂ ತಥಾ

ಚೇತಃ ಸರ್ವಭಯಾಪಹಂ ವ್ರಜ ಸುಖಂ ಶಮ್ಭೋಃ ಪದಾಮ್ಭೋರುಹಮ್

॥ 59 ॥

ಶ್ಲೋಕ 61

ಅಙ್ಕೋಲಂ ನಿಜ-ಬೀಜ-ಸನ್ತತಿರಯಸ್ಕಾನ್ತೋಪಲಂ [ಸನ್ತತಿಃ ಅಯಸ್ಕಾನ್ತೋಪಲಂ] ಸೂಚಿಕಾ

ಸಾಧ್ವೀ ನೈಜವಿಭುಂ ಲತಾ ಕ್ಷಿತಿರುಹಂ ಸಿನ್ಧುಃ ಸರಿದ್ ವಲ್ಲಭಮ್ ।

ಪ್ರಾಪ್ನೋತೀಹ ಯಥಾ ತಥಾ ಪಶುಪತೇಃ ಪಾದಾರವಿನ್ದ ದ್ವಯಂ

ಚೇತೋವೃತ್ತಿ ರುಪೇತ್ಯ ತಿಷ್ಠತಿ ಸದಾ ಸಾ ಭಕ್ತಿ ರಿತ್ಯುಚ್ಯತೇ

॥ 60 ॥

ಶ್ಲೋಕ 62

ಆನನ್ದಾಶ್ರುಭಿರಾತನೋತಿ ಪುಲಕಂ ನೈರ್ಮಲ್ಯತಶ್ಛಾದನಂ

ವಾಚಾ-ಶಙ್ಖಮುಖೇ ಸ್ಥಿತೈಶ್ಚ ಜಠರಾಪೂರ್ತಿಂ ಚರಿತ್ರಾಮೃತೈಃ ।

ರುದ್ರಾಕ್ಷೈರ್ ಹಸಿತೇನ ದೇವ ವಪುಷೋ ರಕ್ಷಾಂ ಭವದ್ಭಾವನಾ-

-ಪರ್ಯಙ್ಕೇ ವಿನಿವೇಶ್ಯ ಭಕ್ತಿಜನನೀ ಭಕ್ತಾರ್ಭಕಂ ರಕ್ಷತಿ

॥ 61 ॥

ಶ್ಲೋಕ 63

ಮಾರ್ಗಾವರ್ತಿತಪಾದುಕಾ ಪಶುಪತೇರಙ್ಗಸ್ಯ ಕೂರ್ಚಾಯತೇ

ಗಣ್ಡೂಷಾಮ್ಬುನಿಷೇಚನಂ ಪುರರಿಪೋರ್ದಿವ್ಯಾಭಿಷೇಕಾಯತೇ ।

ಕಿಞ್ಚಿ-ದ್ಭಕ್ಷಿತ-ಮಾಂಸ-ಶೇಷಕಬಲಂ ನವ್ಯೋಪಹಾರಾಯತೇ

ಭಕ್ತಿಃ ಕಿಂ ನ ಕರೋತ್ಯಹೋ ವನಚರೋ ಭಕ್ತಾವತಂಸಾಯತೇ

॥ 62 ॥

ಶ್ಲೋಕ 64

ವಕ್ಷಸ್ತಾಡನಮನ್ತಕಸ್ಯ ಕಠಿನಾಪಸ್ಮಾರಸಮ್ಮರ್ದನಂ

ಭೂಭೃತ್ಪರ್ಯಟನಂ ನಮತ್ಸುರಶಿರಃಕೋಟೀರಸಙ್ಘರ್ಷಣಮ್ ।

ಕರ್ಮೇದಂ ಮೃದುಲಸ್ಯ ತಾವಕಪದದ್ವನ್ದ್ವಸ್ಯ ಕಿಂ ವೋಚಿತಂ

ಮಚ್ಚೇತೋಮಣಿಪಾದುಕಾವಿಹರಣಂ ಶಮ್ಭೋ ಸದಾಙ್ಗೀಕುರು

॥ 63 ॥

ಶ್ಲೋಕ 65

ವಕ್ಷಸ್ತಾಡನಶಙ್ಕಯಾ ವಿಚಲಿತೋ ವೈವಸ್ವತೋ ನಿರ್ಜರಾಃ

ಕೋಟೀರೋಜ್ಜ್ವಲರತ್ನದೀಪಕಲಿಕಾನೀರಾಜನಂ ಕುರ್ವತೇ ।

ದೃಷ್ಟ್ವಾ ಮುಕ್ತಿವಧೂಸ್ತನೋತಿ ನಿಭೃತಾಶ್ಲೇಷಂ ಭವಾನೀಪತೇ

ಯಚ್ಚೇತಸ್ತವ ಪಾದಪದ್ಮಭಜನಂ ತಸ್ಯೇಹ ಕಿಂ ದುರ್ಲಭಮ್

॥ 64 ॥

ಶ್ಲೋಕ 66

ಕ್ರೀಡಾರ್ಥಂ ಸೃಜಸಿ ಪ್ರಪಞ್ಚಮಖಿಲಂ ಕ್ರೀಡಾಮೃಗಾಸ್ತೇ ಜನಾಃ

ಯತ್ಕರ್ಮಾಚರಿತಂ ಮಯಾ ಚ ಭವತಃ ಪ್ರೀತ್ಯೈ ಭವತ್ಯೇವ ತತ್ ।

ಶಮ್ಭೋ ಸ್ವಸ್ಯ ಕುತೂಹಲಸ್ಯ ಕರಣಂ ಮಚ್ಚೇಷ್ಟಿತಂ ನಿಶ್ಚಿತಂ

ತಸ್ಮಾನ್ಮಾಮಕರಕ್ಷಣಂ ಪಶುಪತೇ ಕರ್ತವ್ಯಮೇವ ತ್ವಯಾ

॥ 65 ॥

ಶ್ಲೋಕ 67

ಬಹುವಿಧಪರಿತೋಷಬಾಷ್ಪಪೂರ-

-ಸ್ಫುಟಪುಲಕಾಙ್ಕಿತಚಾರುಭೋಗಭೂಮಿಮ್ ।

ಚಿರಪದಫಲಕಾಙ್ಕ್ಷಿಸೇವ್ಯಮಾನಾಂ

ಪರಮಸದಾಶಿವಭಾವನಾಂ ಪ್ರಪದ್ಯೇ

॥ 66 ॥

ಶ್ಲೋಕ 68

ಅಮಿತಮುದಮೃತಂ ಮುಹುರ್ದುಹನ್ತೀಂ

ವಿಮಲಭವತ್ಪದಗೋಷ್ಠಮಾವಸನ್ತೀಮ್ ।

ಸದಯ ಪಶುಪತೇ ಸುಪುಣ್ಯಪಾಕಾಂ

ಮಮ ಪರಿಪಾಲಯ ಭಕ್ತಿಧೇನುಮೇಕಾಮ್

॥ 67 ॥

ಶ್ಲೋಕ 69

ಜಡತಾ ಪಶುತಾ ಕಲಙ್ಕಿತಾ

ಕುಟಿಲಚರತ್ವಂ ಚ ನಾಸ್ತಿ ಮಯಿ ದೇವ ।

ಅಸ್ತಿ ಯದಿ ರಾಜಮೌಲೇ

ಭವದಾಭರಣಸ್ಯ ನಾಸ್ಮಿ ಕಿಂ ಪಾತ್ರಮ್

॥ 68 ॥

ಶ್ಲೋಕ 70

ಅರಹಸಿ ರಹಸಿ ಸ್ವತನ್ತ್ರಬುದ್ಧ್ಯಾ

ವರಿವಸಿತುಂ ಸುಲಭಃ ಪ್ರಸನ್ನಮೂರ್ತಿಃ ।

ಅಗಣಿತಫಲದಾಯಕಃ ಪ್ರಭುರ್ಮೇ

ಜಗದಧಿಕೋ ಹೃದಿ ರಾಜಶೇಖರೋಽಸ್ತಿ

॥ 69 ॥

ಶ್ಲೋಕ 71

ಆರೂಢಭಕ್ತಿಗುಣಕುಞ್ಚಿತಭಾವಚಾಪ-

-ಯುಕ್ತೈಃ ಶಿವಸ್ಮರಣಬಾಣಗಣೈರಮೋಘೈಃ ।

ನಿರ್ಜಿತ್ಯ ಕಿಲ್ಬಿಷರಿಪೂನ್ವಿಜಯೀ ಸುಧೀನ್ದ್ರಃ

ಸಾನನ್ದಮಾವಹತಿ ಸುಸ್ಥಿರರಾಜಲಕ್ಷ್ಮೀಮ್

॥ 70 ॥

ಶ್ಲೋಕ 72

ಧ್ಯಾನಾಞ್ಜನೇನ ಸಮವೇಕ್ಷ್ಯ ತಮಃಪ್ರದೇಶಂ

ಭಿತ್ತ್ವಾ ಮಹಾಬಲಿಭಿರೀಶ್ವರನಾಮಮನ್ತ್ರೈಃ ।

ದಿವ್ಯಾಶ್ರಿತಂ ಭುಜಗಭೂಷಣಮುದ್ವಹನ್ತಿ

ಯೇ ಪಾದಪದ್ಮಮಿಹ ತೇ ಶಿವ ತೇ ಕೃತಾರ್ಥಾಃ

॥ 71 ॥

ಶ್ಲೋಕ 73

ಭೂದಾರತಾಮುದವಹದ್ಯದಪೇಕ್ಷಯಾ ಶ್ರೀ-

-ಭೂದಾರ ಏವ ಕಿಮತಃ ಸುಮತೇ ಲಭಸ್ವ ।

ಕೇದಾರಮಾಕಲಿತಮುಕ್ತಿಮಹೌಷಧೀನಾಂ

ಪಾದಾರವಿನ್ದಭಜನಂ ಪರಮೇಶ್ವರಸ್ಯ

॥ 72 ॥

ಶ್ಲೋಕ 74

ಆಶಾಪಾಶಕ್ಲೇಶದುರ್ವಾಸನಾದಿ-

-ಭೇದೋದ್ಯುಕ್ತೈರ್ದಿವ್ಯಗನ್ಧೈರಮನ್ದೈಃ ।

ಆಶಾಶಾಟೀಕಸ್ಯ ಪಾದಾರವಿನ್ದಂ

ಚೇತಃಪೇಟೀಂ ವಾಸಿತಾಂ ಮೇ ತನೋತು

॥ 73 ॥

ಶ್ಲೋಕ 75

ಕಲ್ಯಾಣಿನಂ ಸರಸಚಿತ್ರಗತಿಂ ಸವೇಗಂ

ಸರ್ವೇಙ್ಗಿತಜ್ಞಮನಘಂ ಧ್ರುವಲಕ್ಷಣಾಢ್ಯಮ್ ।

ಚೇತಸ್ತುರಙ್ಗಮಧಿರುಹ್ಯ ಚರ ಸ್ಮರಾರೇ

ನೇತಃ ಸಮಸ್ತಜಗತಾಂ ವೃಷಭಾಧಿರೂಢ

॥ 74 ॥

ಶ್ಲೋಕ 76

ಭಕ್ತಿರ್ಮಹೇಶಪದಪುಷ್ಕರಮಾವಸನ್ತೀ

ಕಾದಮ್ಬಿನೀವ ಕುರುತೇ ಪರಿತೋಷವರ್ಷಮ್ ।

ಸಮ್ಪೂರಿತೋ ಭವತಿ ಯಸ್ಯ ಮನಸ್ತಟಾಕ-

-ಸ್ತಜ್ಜನ್ಮಸಸ್ಯಮಖಿಲಂ ಸಫಲಂ ಚ ನಾನ್ಯತ್

॥ 75 ॥

ಶ್ಲೋಕ 77

ಬುದ್ಧಿಃ ಸ್ಥಿರಾ ಭವಿತುಮೀಶ್ವರಪಾದಪದ್ಮ-

-ಸಕ್ತಾ ವಧೂರ್ವಿರಹಿಣೀವ ಸದಾ ಸ್ಮರನ್ತೀ ।

ಸದ್ಭಾವನಾಸ್ಮರಣದರ್ಶನಕೀರ್ತನಾದಿ

ಸಮ್ಮೋಹಿತೇವ ಶಿವಮನ್ತ್ರಜಪೇನ ವಿನ್ತೇ

॥ 76 ॥

ಶ್ಲೋಕ 78

ಸದುಪಚಾರವಿಧಿಷ್ವನುಬೋಧಿತಾಂ

ಸವಿನಯಾಂ ಸುಹೃದಂ ಸಮುಪಾಶ್ರಿತಾಮ್ ।

ಮಮ ಸಮುದ್ಧರ ಬುದ್ಧಿಮಿಮಾಂ ಪ್ರಭೋ

ವರಗುಣೇನ ನವೋಢವಧೂಮಿವ

॥ 77 ॥

ಶ್ಲೋಕ 79

ನಿತ್ಯಂ ಯೋಗಿಮನಃ ಸರೋಜದಲಸಞ್ಚಾರಕ್ಷಮಸ್ತ್ವತ್ಕ್ರಮಃ

ಶಮ್ಭೋ ತೇನ ಕಥಂ ಕಠೋರಯಮರಾಡ್ವಕ್ಷಃಕವಾಟಕ್ಷತಿಃ ।

ಅತ್ಯನ್ತಂ ಮೃದುಲಂ ತ್ವದಙ್ಘ್ರಿಯುಗಲಂ ಹಾ ಮೇ ಮನಶ್ಚಿನ್ತಯ-

-ತ್ಯೇತಲ್ಲೋಚನಗೋಚರಂ ಕುರು ವಿಭೋ ಹಸ್ತೇನ ಸಂವಾಹಯೇ

॥ 78 ॥

ಶ್ಲೋಕ 80

ಏಷ್ಯತ್ಯೇಷ ಜನಿಂ ಮನೋಽಸ್ಯ ಕಠಿನಂ ತಸ್ಮಿನ್ನಟಾನೀತಿ ಮ-

-ದ್ರಕ್ಷಾಯೈ ಗಿರಿಸೀಮ್ನಿ ಕೋಮಲಪದನ್ಯಾಸಃ ಪುರಾಭ್ಯಾಸಿತಃ ।

ನೋ ಚೇದ್ದಿವ್ಯಗೃಹಾನ್ತರೇಷು ಸುಮನಸ್ತಲ್ಪೇಷು ವೇದ್ಯಾದಿಷು

ಪ್ರಾಯಃ ಸತ್ಸು ಶಿಲಾತಲೇಷು ನಟನಂ ಶಮ್ಭೋ ಕಿಮರ್ಥಂ ತವ

॥ 79 ॥

ಶ್ಲೋಕ 81

ಕಞ್ಚಿತ್ಕಾಲಮುಮಾಮಹೇಶ ಭವತಃ ಪಾದಾರವಿನ್ದಾರ್ಚನೈಃ

ಕಞ್ಚಿದ್ಧ್ಯಾನಸಮಾಧಿಭಿಶ್ಚ ನತಿಭಿಃ ಕಞ್ಚಿತ್ಕಥಾಕರ್ಣನೈಃ ।

ಕಞ್ಚಿತ್ಕಞ್ಚಿದವೇಕ್ಷಣೈಶ್ಚ ನುತಿಭಿಃ ಕಞ್ಚಿದ್ದಶಾಮೀದೃಶೀಂ

ಯಃ ಪ್ರಾಪ್ನೋತಿ ಮುದಾ ತ್ವದರ್ಪಿತಮನಾ ಜೀವನ್ ಸ ಮುಕ್ತಃ ಖಲು

॥ 80 ॥

ಶ್ಲೋಕ 82

ಬಾಣತ್ವಂ ವೃಷಭತ್ವಮರ್ಧವಪುಷಾ ಭಾರ್ಯಾತ್ವಮಾರ್ಯಾಪತೇ

ಘೋಣಿತ್ವಂ ಸಖಿತಾ ಮೃದಙ್ಗವಹತಾ ಚೇತ್ಯಾದಿ ರೂಪಂ ದಧೌ ।

ತ್ವತ್ಪಾದೇ ನಯನಾರ್ಪಣಂ ಚ ಕೃತವಾಂಸ್ತ್ವದ್ದೇಹಭಾಗೋ ಹರಿಃ

ಪೂಜ್ಯಾತ್ಪೂಜ್ಯತರಃ ಸ ಏವ ಹಿ ನ ಚೇತ್ಕೋ ವಾ ತದನ್ಯೋಽಧಿಕಃ

॥ 81 ॥

ಶ್ಲೋಕ 83

ಜನನಮೃತಿಯುತಾನಾಂ ಸೇವಯಾ ದೇವತಾನಾಂ

ನ ಭವತಿ ಸುಖಲೇಶಃ ಸಂಶಯೋ ನಾಸ್ತಿ ತತ್ರ ।

ಅಜನಿಮಮೃತರೂಪಂ ಸಾಮ್ಬಮೀಶಂ ಭಜನ್ತೇ

ಯ ಇಹ ಪರಮಸೌಖ್ಯಂ ತೇ ಹಿ ಧನ್ಯಾ ಲಭನ್ತೇ

॥ 82 ॥

ಶ್ಲೋಕ 84

ಶಿವ ತವ ಪರಿಚರ್ಯಾಸನ್ನಿಧಾನಾಯ ಗೌರ್ಯಾ

ಭವ ಮಮ ಗುಣಧುರ್ಯಾಂ ಬುದ್ಧಿಕನ್ಯಾಂ ಪ್ರದಾಸ್ಯೇ ।

ಸಕಲಭುವನಬನ್ಧೋ ಸಚ್ಚಿದಾನನ್ದಸಿನ್ಧೋ

ಸದಯ ಹೃದಯಗೇಹೇ ಸರ್ವದಾ ಸಂವಸ ತ್ವಮ್

॥ 83 ॥

ಶ್ಲೋಕ 85

ಜಲಧಿಮಥನದಕ್ಷೋ ನೈವ ಪಾತಾಲಭೇದೀ

ನ ಚ ವನಮೃಗಯಾಯಾಂ ನೈವ ಲುಬ್ಧಃ ಪ್ರವೀಣಃ ।

ಅಶನಕುಸುಮಭೂಷಾವಸ್ತ್ರಮುಖ್ಯಾಂ ಸಪರ್ಯಾಂ

ಕಥಯ ಕಥಮಹಂ ತೇ ಕಲ್ಪಯಾನೀನ್ದುಮೌಲೇ

॥ 84 ॥

ಶ್ಲೋಕ 86

ಪೂಜಾದ್ರವ್ಯಸಮೃದ್ಧಯೋ ವಿರಚಿತಾಃ ಪೂಜಾಂ ಕಥಂ ಕುರ್ಮಹೇ

ಪಕ್ಷಿತ್ವಂ ನ ಚ ವಾ ಕಿಟಿತ್ವಮಪಿ ನ ಪ್ರಾಪ್ತಂ ಮಯಾ ದುರ್ಲಭಮ್ ।

ಜಾನೇ ಮಸ್ತಕಮಙ್ಘ್ರಿಪಲ್ಲವಮುಮಾಜಾನೇ ನ ತೇಽಹಂ ವಿಭೋ

ನ ಜ್ಞಾತಂ ಹಿ ಪಿತಾಮಹೇನ ಹರಿಣಾ ತತ್ತ್ವೇನ ತದ್ರೂಪಿಣಾ

॥ 85 ॥

ಶ್ಲೋಕ 87

ಅಶನಂ ಗರಲಂ ಫಣೀ ಕಲಾಪೋ

ವಸನಂ ಚರ್ಮ ಚ ವಾಹನಂ ಮಹೋಕ್ಷಃ ।

ಮಮ ದಾಸ್ಯಸಿ ಕಿಂ ಕಿಮಸ್ತಿ ಶಮ್ಭೋ

ತವ ಪಾದಾಮ್ಬುಜಭಕ್ತಿಮೇವ ದೇಹಿ

॥ 86 ॥

ಶ್ಲೋಕ 88

ಯದಾ ಕೃತಾಮ್ಭೋನಿಧಿಸೇತುಬನ್ಧನಃ

ಕರಸ್ಥಲಾಧಃಕೃತಪರ್ವತಾಧಿಪಃ ।

ಭವಾನಿ ತೇ ಲಙ್ಘಿತಪದ್ಮಸಮ್ಭವ-

-ಸ್ತದಾ ಶಿವಾರ್ಚಾಸ್ತವಭಾವನಕ್ಷಮಃ

॥ 87 ॥

ಶ್ಲೋಕ 89

ನತಿಭಿರ್ನುತಿಭಿಸ್ತ್ವಮೀಶ ಪೂಜಾ-

-ವಿಧಿಭಿರ್ಧ್ಯಾನಸಮಾಧಿಭಿರ್ನ ತುಷ್ಟಃ ।

ಧನುಷಾ ಮುಸಲೇನ ಚಾಶ್ಮಭಿರ್ವಾ

ವದ ತೇ ಪ್ರೀತಿಕರಂ ತಥಾ ಕರೋಮಿ

॥ 88 ॥

ಶ್ಲೋಕ 90

ವಚಸಾ ಚರಿತಂ ವದಾಮಿ ಶಮ್ಭೋ-

-ರಹಮುದ್ಯೋಗವಿಧಾಸು ತೇಽಪ್ರಸಕ್ತಃ ।

ಮನಸಾಕೃತಿಮೀಶ್ವರಸ್ಯ ಸೇವೇ

ಶಿರಸಾ ಚೈವ ಸದಾಶಿವಂ ನಮಾಮಿ

॥ 89 ॥

ಶ್ಲೋಕ 91

ಆದ್ಯಾವಿದ್ಯಾ ಹೃದ್ಗತಾ ನಿರ್ಗತಾಸೀ-

-ದ್ವಿದ್ಯಾ ಹೃದ್ಯಾ ಹೃದ್ಗತಾ ತ್ವತ್ಪ್ರಸಾದಾತ್ ।

ಸೇವೇ ನಿತ್ಯಂ ಶ್ರೀಕರಂ ತ್ವತ್ಪದಾಬ್ಜಂ

ಭಾವೇ ಮುಕ್ತೇರ್ಭಾಜನಂ ರಾಜಮೌಲೇ

॥ 90 ॥

ಶ್ಲೋಕ 92

ದೂರೀಕೃತಾನಿ ದುರಿತಾನಿ ದುರಕ್ಷರಾಣಿ

ದೌರ್ಭಾಗ್ಯದುಃಖದುರಹಙ್ಕೃತಿದುರ್ವಚಾಂಸಿ ।

ಸಾರಂ ತ್ವದೀಯಚರಿತಂ ನಿತರಾಂ ಪಿಬನ್ತಂ

ಗೌರೀಶ ಮಾಮಿಹ ಸಮುದ್ಧರ ಸತ್ಕಟಾಕ್ಷೈಃ

॥ 91 ॥

ಶ್ಲೋಕ 93

ಸೋಮಕಲಾಧರಮೌಲೌ

ಕೋಮಲಘನಕನ್ಧರೇ ಮಹಾಮಹಸಿ ।

ಸ್ವಾಮಿನಿ ಗಿರಿಜಾನಾಥೇ

ಮಾಮಕಹೃದಯಂ ನಿರನ್ತರಂ ರಮತಾಮ್

॥ 92 ॥

ಶ್ಲೋಕ 94

ಸಾ ರಸನಾ ತೇ ನಯನೇ

ತಾವೇವ ಕರೌ ಸ ಏವ ಕೃತಕೃತ್ಯಃ ।

ಯಾ ಯೇ ಯೌ ಯೋ ಭರ್ಗಂ

ವದತೀಕ್ಷೇತೇ ಸದಾರ್ಚತಃ ಸ್ಮರತಿ

॥ 93 ॥

ಶ್ಲೋಕ 95

ಅತಿಮೃದುಲೌ ಮಮ ಚರಣಾ-

-ವತಿಕಠಿನಂ ತೇ ಮನೋ ಭವಾನೀಶ ।

ಇತಿ ವಿಚಿಕಿತ್ಸಾಂ ಸನ್ತ್ಯಜ

ಶಿವ ಕಥಮಾಸೀದ್ಗಿರೌ ತಥಾ ವೇಶಃ

॥ 94 ॥

ಶ್ಲೋಕ 96

ಧೈರ್ಯಾಙ್ಕುಶೇನ ನಿಭೃತಂ

ರಭಸಾದಾಕೃಷ್ಯ ಭಕ್ತಿಶೃಙ್ಖಲಯಾ ।

ಪುರಹರ ಚರಣಾಲಾನೇ

ಹೃದಯಮದೇಭಂ ಬಧಾನ ಚಿದ್ಯನ್ತ್ರೈಃ

॥ 95 ॥

ಶ್ಲೋಕ 97

ಪ್ರಚರತ್ಯಭಿತಃ ಪ್ರಗಲ್ಭವೃತ್ತ್ಯಾ

ಮದವಾನೇಷ ಮನಃ ಕರೀ ಗರೀಯಾನ್ ।

ರಿಗೃಹ್ಯ ನಯೇನ ಭಕ್ತಿರಜ್ವಾ

ಪರಮ ಸ್ಥಾಣು ಪದಂ ದೃಢಂ ನಯಾಮುಮ್

॥ 96 ॥

ಶ್ಲೋಕ 98

ಸರ್ವಾಲಙ್ಕಾರಯುಕ್ತಾಂ ಸರಲಪದಯುತಾಂ ಸಾಧುವೃತ್ತಾಂ ಸುವರ್ಣಾಂ

ಸದ್ಭಿಃ ಸಂಸ್ತೂಯಮಾನಾಂ ಸರಸಗುಣಯುತಾಂ ಲಕ್ಷಿತಾಂ ಲಕ್ಷಣಾಢ್ಯಾಮ್ ।

ಉದ್ಯದ್ಭೂಷಾವಿಶೇಷಾಮುಪಗತವಿನಯಾಂ ದ್ಯೋತಮಾನಾರ್ಥರೇಖಾಂ

ಕಲ್ಯಾಣೀಂ ದೇವ ಗೌರೀಪ್ರಿಯ ಮಮ ಕವಿತಾಕನ್ಯಕಾಂ ತ್ವಂ ಗೃಹಾಣ

॥ 97 ॥

ಶ್ಲೋಕ 99

ಇದಂ ತೇ ಯುಕ್ತಂ ವಾ ಪರಮಶಿವ ಕಾರುಣ್ಯಜಲಧೇ

ಗತೌ ತಿರ್ಯಗ್ರೂಪಂ ತವ ಪದಶಿರೋದರ್ಶನಧಿಯಾ ।

ಹರಿಬ್ರಹ್ಮಾಣೌ ತೌ ದಿವಿ ಭುವಿ ಚರನ್ತೌ ಶ್ರಮಯುತೌ

ಕಥಂ ಶಮ್ಭೋ ಸ್ವಾಮಿನ್ಕಥಯ ಮಮ ವೇದ್ಯೋಽಸಿ ಪುರತಃ

॥ 98 ॥

ಶ್ಲೋಕ 100

ಸ್ತೋತ್ರೇಣಾಲಮಹಂ ಪ್ರವಚ್ಮಿ ನ ಮೃಷಾ ದೇವಾ ವಿರಿಞ್ಚಾದಯಃ

ಸ್ತುತ್ಯಾನಾಂ ಗಣನಾಪ್ರಸಙ್ಗಸಮಯೇ ತ್ವಾಮಗ್ರಗಣ್ಯಂ ವಿದುಃ ।

ಮಾಹಾತ್ಮ್ಯಾಗ್ರವಿಚಾರಣಪ್ರಕರಣೇ ಧಾನಾತುಷಸ್ತೋಮವ-

-ದ್ಧೂತಾಸ್ತ್ವಾಂ ವಿದುರುತ್ತಮೋತ್ತಮಫಲಂ ಶಮ್ಭೋ ಭವತ್ಸೇವಕಾಃ

॥ 99 ॥

ಶ್ಲೋಕ 101

ಇತಿ ಶ್ರೀಮತ್ಪರಮಹಂಸಪರಿವ್ರಾಜಕಾಚಾರ್ಯಸ್ಯ ಶ್ರೀಗೋವಿನ್ದಭಗವತ್ಪೂಜ್ಯಪಾದಶಿಷ್ಯಸ್ಯ ಶ್ರೀಮಚ್ಛಙ್ಕರಭಗವತಃ ಕೃತೌ ಶಿವಾನನ್ದಲಹರೀ ॥