મૂક પઞ્ચ શતિ 5 - મન્દસ્મિત શતકમ્

મૂક પઞ્ચ શતિ 5 - મન્દસ્મિત શતકમ્

શ્લોક 1

બધ્નીમો વયમઞ્જલિં પ્રતિદિનં બન્ધચ્છિદે દેહિનાં

કન્દર્પાગમતન્ત્રમૂલગુરવે કલ્યાણકેલીભુવે ।

કામાક્ષ્યા ઘનસારપુઞ્જરજસે કામદ્રુહશ્ચક્ષુષાં

મન્દારસ્તબકપ્રભામદમુષે મન્દસ્મિતજ્યોતિષે

શ્લોક 2

સધ્રીચે નવમલ્લિકાસુમનસાં નાસાગ્રમુક્તામણે-

રાચાર્યાય મૃણાલકાણ્ડમહસાં નૈસર્ગિકાય દ્વિષે ।

સ્વર્ધુન્યા સહ યુધ્વેન હિમરુચેરર્ધાસનાધ્યાસિને

કામાક્ષ્યાઃ સ્મિતમઞ્જરીધવલિમાદ્વૈતાય તસ્મૈ નમઃ

॥1॥

શ્લોક 3

કર્પૂરદ્યુતિચાતુરીમતિતરામલ્પીયસીં કુર્વતી

દૌર્ભાગ્યોદયમેવ સંવિદધતી દૌષાકરીણાં ત્વિષામ્ ।

ક્ષુલ્લાનેવ મનોજ્ઞમલ્લિનિકરાન્ફુલ્લાનપિ વ્યઞ્જતી

કામાક્ષ્યા મૃદુલસ્મિતાંશુલહરી કામપ્રસૂરસ્તુ મે

॥2॥

શ્લોક 4

યા પીનસ્તનમણ્ડલોપરિ લસત્કર્પૂરલેપાયતે

યા નીલેક્ષણરાત્રિકાન્તિતતિષુ જ્યોત્સ્નાપ્રરોહાયતે ।

યા સૌન્દર્યધુનીતરઙ્ગતતિષુ વ્યાલોલહંસાયતે

કામાક્ષ્યાઃ શિશિરીકરોતુ હૃદયં સા મે સ્મિતપ્રાચુરી

॥3॥

શ્લોક 5

યેષાં ગચ્છતિ પૂર્વપક્ષસરણિં કૌમુદ્વતઃ શ્વેતિમા

યેષાં સન્તતમારુરુક્ષતિ તુલાકક્ષ્યાં શરચ્ચન્દ્રમાઃ ।

યેષામિચ્છતિ કમ્બુરપ્યસુલભામન્તેવસત્પ્રક્રિયાં

કામાક્ષ્યા મમતાં હરન્તુ મમ તે હાસત્વિષામઙ્કુરાઃ

॥4॥

શ્લોક 6

આશાસીમસુ સન્તતં વિદધતી નૈશાકરીં વ્યાક્રિયાં

કાશાનામભિમાનભઙ્ગકલનાકૌશલ્યમાબિભ્રતી ।

ઈશાનેન વિલોકિતા સકુતુકં કામાક્ષિ તે કલ્મષ-

ક્લેશાપાયકરી ચકાસ્તિ લહરી મન્દસ્મિતજ્યોતિષામ્

॥5॥

શ્લોક 7

આરૂઢસ્ય સમુન્નતસ્તનતટીસામ્રાજ્યસિંહાસનં

કન્દર્પસ્ય વિભોર્જગત્ત્રયપ્રાકટ્યમુદ્રાનિધેઃ ।

યસ્યાશ્ચામરચાતુરીં કલયતે રશ્મિચ્છટા ચઞ્ચલા

સા મન્દસ્મિતમઞ્જરી ભવતુ નઃ કામાય કામાક્ષિ તે

॥6॥

શ્લોક 8

શમ્ભોર્યા પરિરમ્ભસમ્ભ્રમવિધૌ નૈર્મલ્યસીમાનિધિઃ

ગૈર્વાણીવ તરઙ્ગિણી કૃતમૃદુસ્યન્દાં કલિન્દાત્મજામ્ ।

કલ્માષીકુરુતે કલઙ્કસુષમાં કણ્ઠસ્થલીચુમ્બિનીં

કામાક્ષ્યાઃ સ્મિતકન્દલી ભવતુ નઃ કલ્યાણસન્દોહિની

॥7॥

શ્લોક 9

જેતું હારલતામિવ સ્તનતટીં સઞ્જગ્મુષી સન્તતં

ગન્તું નિર્મલતામિવ દ્વિગુણિતાં મગ્ના કૃપાસ્ત્રોતસિ ।

લબ્ધું વિસ્મયનીયતામિવ હરં રાગાકુલં કુર્વતી

મઞ્જુસ્તે સ્મિતમઞ્જરી ભવભયં મથ્નાતુ કામાક્ષિ મે

॥8॥

શ્લોક 10

શ્વેતાપિ પ્રકટં નિશાકરરુચાં માલિન્યમાતન્વતી

શીતાપિ સ્મરપાવકં પશુપતેઃ સન્ધુક્ષયન્તી સદા ।

સ્વાભાવ્યાદધરાશ્રિતાપિ નમતામુચ્ચૈર્દિશન્તી ગતિં

કામાક્ષિ સ્ફુટમન્તરા સ્ફુરતુ નસ્ત્વન્મન્દહાસપ્રભા

॥9॥

શ્લોક 11

વક્ત્રશ્રીસરસીજલે તરલિતભ્રૂવલ્લિકલ્લોલિતે

કાલિમ્ના દધતી કટાક્ષજનુષા માધુવ્રતીં વ્યાપૃતિમ્ ।

નિર્નિદ્રામલપુણ્ડરીકકુહનાપાણ્ડિત્યમાબિભ્રતી

કામાક્ષ્યાઃ સ્મિતચાતુરી મમ મનઃ કાતર્યમુન્મૂલયેત્

॥10॥

શ્લોક 12

નિત્યં બાધિતબન્ધુજીવમધરં મૈત્રીજુષં પલ્લવૈઃ

શુદ્ધસ્ય દ્વિજમણ્ડલસ્ય ચ તિરસ્કર્તારમપ્યાશ્રિતા ।

યા વૈમલ્યવતી સદૈવ નમતાં ચેતઃ પુનીતેતરાં

કામાક્ષ્યા હૃદયં પ્રસાદયતુ મે સા મન્દહાસપ્રભા

॥11॥

શ્લોક 13

દ્રુહ્યન્તી તમસે મુહુઃ કુમુદિનીસાહાય્યમાબિભ્રતી

યાન્તી ચન્દ્રકિશોરશેખરવપુઃસૌધાઙ્ગણે પ્રેઙ્ખણમ્ ।

જ્ઞાનામ્ભોનિધિવીચિકાં સુમનસાં કૂલઙ્કષાં કુર્વતી

કામાક્ષ્યાઃ સ્મિતકૌમુદી હરતુ મે સંસારતાપોદયમ્

॥12॥

શ્લોક 14

કાશ્મીરદ્રવધાતુકર્દમરુચા કલ્માષતાં બિભ્રતી

હંસૌધૈરિવ કુર્વતી પરિચિતિં હારીકૃતૈર્મૌક્તિકૈઃ ।

વક્ષોજન્મતુષારશૈલકટકે સઞ્ચારમાતન્વતી

કામાક્ષ્યા મૃદુલસ્મિતદ્યુતિમયી ભાગીરથી ભાસતે

॥13॥

શ્લોક 15

કમ્બોર્વંશપરમ્પરા ઇવ કૃપાસન્તાનવલ્લીભુવઃ

સમ્ફુલ્લસ્તબકા ઇવ પ્રસૃમરા મૂર્તાઃ પ્રસાદા ઇવ ।

વાક્પીયૂષકણા ઇવ ત્રિપથગાપર્યાયભેદા ઇવ

ભ્રાજન્તે તવ મન્દહાસકિરણાઃ કાઞ્ચીપુરીનાયિકે

॥14॥

શ્લોક 16

વક્ષોજે ઘનસારપત્રરચનાભઙ્ગીસપત્નાયિતા

કણ્ઠે મૌક્તિકહારયષ્ટિકિરણવ્યાપારમુદ્રાયિતા ।

ઓષ્ઠશ્રીનિકુરુમ્બપલ્લવપુટે પ્રેઙ્ખત્પ્રસૂનાયિતા

કામાક્ષિ સ્ફુરતાં મદીયહૃદયે ત્વન્મન્દહાસપ્રભા

॥15॥

શ્લોક 17

યેષાં બિન્દુરિવોપરિ પ્રચલિતો નાસાગ્રમુક્તામણિઃ

યેષાં દીન ઇવાધિકણ્ઠમયતે હારઃ કરાલમ્બનમ્ ।

યેષાં બન્ધુરિવોષ્ઠયોરરુણિમા ધત્તે સ્વયં રઞ્જનં

કામાક્ષ્યાઃ પ્રભવન્તુ તે મમ શિવોલ્લાસાય હાસાઙ્કુરાઃ

॥16॥

શ્લોક 18

યા જાડ્યામ્બુનિધિં ક્ષિણોતિ ભજતાં વૈરાયતે કૈરવૈઃ

નિત્યં યાં નિયમેન યા ચ યતતે કર્તું ત્રિણેત્રોત્સવમ્ ।

બિમ્બં ચાન્દ્રમસં ચ વઞ્ચયતિ યા ગર્વેણ સા તાદૃશી

કામાક્ષિ સ્મિતમઞ્જરી તવ કથં જ્યોત્સ્નેત્યસૌ કીર્ત્યતે

॥17॥

શ્લોક 19

આરુઢા રભસાત્પુરઃ પુરરિપોરાશ્લેષણોપક્રમે

યા તે માતરુપૈતિ દિવ્યતટિનીશઙ્કાકરી તત્ક્ષણમ્ ।

ઓષ્ઠૌ વેપયતિ ભ્રુવૌ કુટિલયત્યાનમ્રયત્યાનનં

તાં વન્દે મૃદુહાસપૂરસુષમામેકામ્રનાથપ્રિયે

॥18॥

શ્લોક 20

વક્ત્રેન્દોસ્તવ ચન્દ્રિકા સ્મિતતતિર્વલ્ગુ સ્ફુરન્તી સતાં

સ્યાચ્ચેદ્યુક્તિમિદં ચકોરમનસાં કામાક્ષિ કૌતૂહલમ્ ।

એતચ્ચિત્રમહર્નિશં યદધિકામેષા રુચિં ગાહતે

બિમ્બોષ્ઠદ્યુમણિપ્રભાસ્વપિ ચ યદ્બિબ્બોકમાલમ્બતે

॥19॥

શ્લોક 21

સાદૃશ્યં કલશામ્બુધેર્વહતિ યત્કામાક્ષિ મન્દસ્મિતં

શોભામોષ્ઠરુચામ્બ વિદ્રુમભવામેતાદ્ભિદાં બ્રૂમહે ।

એકસ્માદુદિતં પુરા કિલ પપૌ શર્વઃ પુરાણઃ પુમાન્

એતન્મધ્યસમુદ્ભવં રસયતે માધુર્યરૂપં રસમ્

॥20॥

શ્લોક 22

ઉત્તુઙ્ગસ્તનકુમ્ભશૈલકટકે વિસ્તારિકસ્તૂરિકા-

પત્રશ્રીજુષિ ચઞ્ચલાઃ સ્મિતરુચઃ કામાક્ષિ તે કોમલાઃ ।

સન્ધ્યાદીધિતિરઞ્જિતા ઇવ મુહુઃ સાન્દ્રાધરજ્યોતિષા

વ્યાલોલામલશારદાભ્રશકલવ્યાપારમાતન્વતે

॥21॥

શ્લોક 23

ક્ષીરં દૂરત એવ તિષ્ઠતુ કથં વૈમલ્યમાત્રાદિદં

માતસ્તે સહપાઠવીથિમયતાં મન્દસ્મિતૈર્મઞ્જુલૈઃ ।

કિં ચેયં તુ ભિદાસ્તિ દોહનવશાદેકં તુ સઞ્જાયતે

કામાક્ષિ સ્વયમર્થિતં પ્રણમતામન્યત્તુ દોદુહ્યતે

॥22॥

શ્લોક 24

કર્પૂરૈરમૃતૈર્જગજ્જનનિ તે કામાક્ષિ ચન્દ્રાતપૈઃ

મુક્તાહારગુણૈર્મૃણાલવલયૈર્મુગ્ધસ્મિતશ્રીરિયમ્ ।

શ્રીકાઞ્ચીપુરનાયિકે સમતયા સંસ્તૂયતે સજ્જનૈઃ

તત્તાદૃઙ્મમ તાપશાન્તિવિધયે કિં દેવિ મન્દાયતે

॥23॥

શ્લોક 25

મધ્યેગર્ભિતમઞ્જુવાક્યલહરીમાધ્વીઝરીશીતલા

મન્દારસ્તબકાયતે જનનિ તે મન્દસ્મિતાંશુચ્છટા ।

યસ્યા વર્ધયિતું મુહુર્વિકસનં કામાક્ષિ કામદ્રુહો

વલ્ગુર્વીક્ષણવિભ્રમવ્યતિકરો વાસન્તમાસાયતે

॥24॥

શ્લોક 26

બિમ્બોષ્ઠદ્યુતિપુઞ્જરઞ્જિતરુચિસ્ત્વન્મન્દહાસચ્છટા ।

કલ્યાણં ગિરિસાર્વભૌમતનયે કલ્લોલયત્વાશુ મે ।

ફુલ્લન્મલ્લિપિનદ્ધહલ્લકમયી માલેવ યા પેશલા

શ્રીકાઞ્ચીશ્વરિ મારમર્દિતુરુરોમધ્યે મુહુર્લમ્બતે

॥25॥

શ્લોક 27

બિભ્રાણા શરદભ્રવિભ્રમદશાં વિદ્યોતમાનાપ્યસો

કામાક્ષિ સ્મિતમઞ્જરી કિરતિ તે કારુણ્યધારારસમ્ ।

આશ્ચર્યં શિશિરીકરોતિ જગતીશ્ચાલોક્ય ચૈનામહો

કામં ખેલતિ નીલકણ્ઠહૃદયં કૌતૂહલાન્દોલિતમ્

॥26॥

શ્લોક 28

પ્રેઙ્ખત્પ્રૌઢકટાક્ષકુઞ્જકુહરેષ્વત્યચ્છગુચ્છાયિતં

વક્ત્રેન્દુચ્છવિસિન્ધુવીચિનિચયે ફેનપ્રતાનાયિતમ્ ।

નૈરન્તર્યવિજૃમ્ભિતસ્તનતટે નૈચોલપટ્ટાયિતં

કાલુષ્યં કબલીકરોતુ મમ તે કામાક્ષિ મન્દસ્મિતમ્

॥27॥

શ્લોક 29

પીયૂષં તવ મન્થરસ્મિતમિતિ વ્યર્થૈવ સાપપ્રથા

કામાક્ષિ ધ્રુવમીદૃશં યદિ ભવેદેતત્કથં વા શિવે ।

મન્દારસ્ય કથાલવં ન સહતે મથ્નાતિ મન્દાકિની-

મિન્દું નિન્દતિ કીર્તિતેઽપિ કલશીપાથોધિમીર્ષ્યાયતે

॥28॥

શ્લોક 30

વિશ્વેષાં નયનોત્સવં વિતનુતાં વિદ્યોતતાં ચન્દ્રમા

વિખ્યાતો મદનાન્તકેન મુકુટીમધ્યે ચ સમ્માન્યતામ્ ।

આઃ કિં જાતમનેન હાસસુષમામાલોક્ય કામાક્ષિ તે

કાલઙ્કીમવલમ્બતે ખલુ દશાં કલ્માષહીનોઽપ્યસૌ

॥29॥

શ્લોક 31

ચેતઃ શીતલયન્તુ નઃ પશુપતેરાનન્દજીવાતવો

નમ્રાણાં નયનાધ્વસીમસુ શરચ્ચન્દ્રાતપોપક્રમાઃ ।

સંસારાખ્યસરોરુહાકરખલીકારે તુષારોત્કરાઃ

કામાક્ષિ સ્મરકીર્તિબીજનિકરાસ્ત્વન્મન્દહાસાઙ્કુરાઃ

॥30॥

શ્લોક 32

કર્મૌઘાખ્યતમઃકચાકચિકરાન્કામાક્ષિ સઞ્ચિન્તયે

ત્વન્મન્દસ્મિતરોચિષાં ત્રિભુવનક્ષેમઙ્કરાનઙ્કુરાન્ ।

યે વક્ત્રં શિશિરશ્રિયો વિકસિતં ચન્દ્રાતપામ્ભોરુહ-

દ્વેષોદ્ધેષોણચાતુરીમિવ તિરસ્કર્તું પરિષ્કુર્વતે

॥31॥

શ્લોક 33

કુર્યુર્નઃ કુલશૈલરાજતનયે કૂલઙ્કષં મઙ્ગલં

કુન્દસ્પર્ધનચુઞ્ચવસ્તવ શિવે મન્દસ્મિતપ્રક્રમાઃ ।

યે કામાક્ષિ સમસ્તસાક્ષિનયનં સન્તોષયન્તીશ્વરં

કર્પૂરપ્રકરા ઇવ પ્રસૃમરાઃ પુંસામસાધારણાઃ

॥32॥

શ્લોક 34

કમ્રેણ સ્નપયસ્વ કર્મકુહનાચોરેણ મારાગમ-

વ્યાખ્યાશિક્ષણદીક્ષિતેન વિદુષામક્ષીણલક્ષ્મીપુષા ।

કામાક્ષિ સ્મિતકન્દલેન કલુષસ્ફોટક્રિયાચુઞ્ચુના

કારુણ્યામૃતવીચિકાવિહરણપ્રાચુર્યધુર્યેણ મામ્

॥33॥

શ્લોક 35

ત્વન્મન્દસ્મિતકન્દલસ્ય નિયતં કામાક્ષિ શઙ્કામહે

બિમ્બઃ કશ્ચન નૂતનઃ પ્રચલિતો નૈશાકરઃ શીકરઃ ।

કિઞ્ચ ક્ષીરપયોનિધિઃ પ્રતિનિધિઃ સ્વર્વાહિનીવીચિકા-

બિબ્વોકોઽપિ વિડમ્બ એવ કુહના મલ્લીમતલ્લીરુચઃ

॥34॥

શ્લોક 36

દુષ્કર્માર્કનિસર્ગકર્કશમહસ્સમ્પર્કતપતં મિલ-

ત્પઙ્કં શઙ્કરવલ્લભે મમ મનઃ કાઞ્ચીપુરાલઙ્ક્રિયે ।

અમ્બ ત્વન્મૃદુલસ્મિતામૃતરસે મઙ્ક્ત્વા વિધૂય વ્યથા-

માનન્દોદયસૌધશૃઙ્ગપદવીમારોઢુમાકાઙ્ક્ષતિ

॥35॥

શ્લોક 37

નમ્રાણાં નગરાજશેખરસુતે નાકાલયાનાં પુરઃ

કામાક્ષિ ત્વરયા વિપત્પ્રશમેન કારુણ્યધારાઃ કિરન્ ।

આગચ્છન્તમનુગ્રહં પ્રકટયન્નાનન્દબીજાનિ તે

નાસીરે મૃદુહાસ એવ તનુતે નાથે સુધાશીતલઃ

॥36॥

શ્લોક 38

કામાક્ષિ પ્રથમાનવિભ્રમનિધિઃ કન્દર્પદર્પપ્રસૂઃ

મુગ્ધસ્તે મૃદુહાસ એવ ગિરિજે મુષ્ણાતુ મે કિલ્બિષમ્ ।

યં દ્રષ્ટું વિહિતે કરગ્રહ ઉમે શમ્ભુસ્ત્રપામીલિતં

સ્વૈરં કારયતિ સ્મ તાણ્ડવવિનોદાનન્દિના તણ્ડુના

॥37॥

શ્લોક 39

ક્ષુણ્ણં કેનચિદેવ ધીરમનસા કુત્રાપિ નાનાજનૈઃ

કર્મગ્રન્થિનિયન્ત્રિતૈરસુગમં કામાક્ષિ સામાન્યતઃ ।

મુગ્ધૈર્દ્રુષ્ટુમશક્યમેવ મનસા મૂઢસય મે મૌક્તિકં

માર્ગં દર્શયતુ પ્રદીપ ઇવ તે મન્દસ્મિતશ્રીરિયમ્

॥38॥

શ્લોક 40

જ્યોત્સ્નાકાન્તિભિરેવ નિર્મલતરં નૈશાકરં મણ્ડલં

હંસૈરેવ શરદ્વિલાસસમયે વ્યાકોચમમ્ભોરુહમ્ ।

સ્વચ્છૈરેવ વિકસ્વરૈરુડુગુણૈઃ કામાક્ષિ બિમ્બં દિવઃ

પુણ્યૈરેવ મૃદુસ્મિતૈસ્તવ મુખં પુષ્ણાતિ શોભાભરમ્

॥39॥

શ્લોક 41

માનગ્રન્થિવિધુન્તુદેન રભસાદાસ્વાદ્યમાને નવ-

પ્રેમાડમ્બરપૂર્ણિમાહિમકરે કામાક્ષિ તે તત્ક્ષણમ્ ।

આલોક્ય સ્મિતચન્દ્રિકાં પુનરિમામુન્મીલનં જગ્મુષીં

ચેતઃ શીલયતે ચકોરચરિતં ચન્દ્રાર્ધચૂડામણેઃ

॥40॥

શ્લોક 42

કામાક્ષિ સ્મિતમઞ્જરીં તવ ભજે યસ્યાસ્ત્વિષામઙ્કુરા-

નાપીનસ્તનપાનલાલસતયા નિશ્શઙ્કમઙ્કેશયઃ ।

ઊર્ધ્વં વીક્ષ્ય વિકર્ષતિ પ્રસૃમરાનુદ્દામયા શુણ્ડયા

સૂનુસુતે બિસશઙ્કયાશુ કુહનાદન્તાવલગ્રામણીઃ

॥41॥

શ્લોક 43

ગાઢાશ્લેષવિમર્દસમ્ભ્રમવશાદુદ્દામમુક્તાગુણ-

પ્રાલમ્બે કુચકુમ્ભયોર્વિગલિતે દક્ષદ્વિષો વક્ષસિ ।

યા સખ્યેન પિનહ્યતિ પ્રચુરયા ભાસા તદીયાં દશાં

સા મે ખેલતુ કામકોટિ હૃદયે સાન્દ્રસ્મિતાંશુચ્છટા

॥42॥

શ્લોક 44

મન્દારે તવ મન્થરસ્મિતરુચાં માત્સર્યમાલોક્યતે

કામાક્ષિ સ્મરશાસને ચ નિયતો રાગોદયો લક્ષ્યતે ।

ચાન્દ્રીષુ દ્યુતિમઞ્જરીષુ ચ મહાન્દ્વેષાઙ્કુરો દૃશ્યતે

શુદ્ધાનાં કથમીદૃશી ગિરિસુતેઽતિશુદ્ધા દશા કથ્યતામ્

॥43॥

શ્લોક 45

પીયૂષં ખલુ પીયતે સુરજનૈર્દુગ્ધામ્બુધિર્મથ્યતે

માહેશૈશ્ચ જટાકલાપનિગડૈર્મન્દાકિની નહ્યતે ।

શીતાંશુઃ પરિભૂયતે ચ તમસા તસ્માદનેતાદૃશી

કામાક્ષિ સ્મિતમઞ્જરી તવ વચોવૈદગ્ધ્યમુલ્લઙ્ઘતે

॥44॥

શ્લોક 46

આશઙ્કે તવ મન્દહાસલહરીમન્યાદૃશીં ચન્દ્રિકા-

મેકામ્રેશકુટુમ્બિનિ પ્રતિપદં યસ્યાઃ પ્રભાસઙ્ગમે ।

વક્ષોજામ્બુરુહે ન તે રચયતઃ કાઞ્ચિદ્દશાં કૌઙ્મલી-

માસ્યામ્ભોરુહમમ્બ કિઞ્ચ શનકૈરાલમ્બતે ફુલ્લતામ્

॥45॥

શ્લોક 47

આસ્તીર્ણાધરકાન્તિપલ્લવચયે પાતં મુહુર્જગ્મુષી

મારદ્રોહિણિ કન્દલત્સ્મરશરજ્વાલાવલીર્વ્યઞ્જતી ।

નિન્દન્તી ઘનસારહારવલયજ્યોત્સ્નામૃણાલાનિ તે

કામાક્ષિ સ્મિતચાતુરી વિરહિણીરીતિં જગાહેતરામ્

॥46॥

શ્લોક 48

સૂર્યાલોકવિધૌ વિકાસમધિકં યાન્તી હરન્તી તમ-

સ્સન્દોહં નમતાં નિજસ્મરણતો દોષાકરદ્વેષિણી ।

નિર્યાન્તી વદનારવિન્દકુહરાન્નિર્ધૂતજાડ્યા નૃણાં

શ્રીકામાક્ષિ તવ સ્મિતદ્યુતિમયી ચિત્રીયતે ચન્દ્રિકા

॥47॥

શ્લોક 49

કુણ્ઠીકુર્યુરમી કુબોધઘટનામસ્મન્મનોમાથિનીં

શ્રીકામાક્ષિ શિવઙ્કરાસ્તવ શિવે શ્રીમન્દહાસાઙ્કુરાઃ ।

યે તન્વન્તિ નિરન્તરં તરુણિમસ્તમ્બેરમગ્રામણી-

કુમ્ભદ્વન્દ્વવિડમ્બિનિ સ્તનતટે મુક્તાકુથાડમ્બરમ્

॥48॥

શ્લોક 50

પ્રેઙ્ખન્તઃ શરદમ્બુદા ઇવ શનૈઃ પ્રેમાનિલૈઃ પ્રેરિતા

મજ્જન્તો મન્દનારિકણ્ઠસુષમાસિન્ધૌ મુહુર્મન્થરમ્ ।

શ્રીકામાક્ષિ તવ સ્મિતાંશુનિકરાઃ શ્યામાયમાનશ્રિયો

નીલામ્ભોધરનૈપુણીં તત ઇતો નિર્નિદ્રયન્ત્યઞ્જસા

॥49॥

શ્લોક 51

વ્યાપારં ચતુરાનનૈકવિહૃતૌ વ્યાકુર્વતી કુર્વતી

રુદ્રાક્ષગ્રહણં મહેશિ સતતં વાગૂર્મિકલ્લોલિતા ।

ઉત્ફુલ્લં ધવલારવિન્દમધરીકૃત્ય સ્ફુરન્તી સદા

શ્રીકામાક્ષિ સરસ્વતી વિજયતે ત્વન્મન્દહાસપ્રભા

॥50॥

શ્લોક 52

કર્પૂરદ્યુતિતસ્કરેણ મહસા કલ્માષયત્યાનનં

શ્રીકાઞ્ચીપુરનાયિકે પતિરિવ શ્રીમન્દહાસોઽપિ તે ।

આલિઙ્ગત્યતિપીવરાં સ્તનતટીં બિમ્બાધરં ચુમ્બતિ

પ્રૌઢં રાગભરં વ્યનક્તિ મનસો ધૈર્યં ધુનીતેતરામ્

॥51॥

શ્લોક 53

વૈશદ્યેન ચ વિશ્વતાપહરણક્રીડાપટીયસ્તયા

પાણ્ડિત્યેન પચેલિમેન જગતાં નેત્રોત્સવોત્પાદેન ।

કામાક્ષિ સ્મિતકન્દલૈસ્તવ તુલામારોઢુમુદ્યોગિની

જ્યોત્સ્નાસૌ જલરાશિપોષણતયા દૂષ્યાં પ્રપન્ના દશામ્

॥52॥

શ્લોક 54

લાવણ્યામ્બુજિનીમૃણાલવલયૈઃ શૃઙ્ગારગન્ધદ્વિપ-

ગ્રામણ્યઃ શ્રુતિચામરૈસ્તરુણિમસ્વારાજ્યતેજોઙ્કુરૈઃ ।

આનન્દામૃતસિન્ધુવીચિપૃષતૈરાસ્યાબ્જહંસૈસ્તવ

શ્રીકામાક્ષિ મથાન મન્દહસિતૈર્મત્કં મનઃકલ્મષમ્

॥53॥

શ્લોક 55

ઉત્તુઙ્ગસ્તનમણ્ડલીપરિચલન્માણિક્યહારચ્છટા-

ચઞ્ચચ્છોણિમપુઞ્જમધ્યસરણિં માતઃ પરિષ્કુર્વતી ।

યા વૈદગ્ધ્યમુપૈતિ શઙ્કરજટાકાન્તારવાટીપત-

ત્સ્વર્વાપીપયસઃ સ્મિતદ્યુતિરસૌ કામાક્ષિ તે મઞ્જુલા

॥54॥

શ્લોક 56

સન્નામૈકજુષા જનેન સુલભં સંસૂચયન્તી શનૈ-

રુત્તુઙ્ગસ્ય ચિરાદનુગ્રહતરોરુત્પત્સ્યમાનં ફલમ્ ।

પ્રાથમ્યેન વિકસ્વરા કુસુમવત્પ્રાગલ્ભ્યમભ્યેયુષી

કામાક્ષિ સ્મિતચાતુરી તવ મમ ક્ષેમઙ્કરી કલ્પતામ્

॥55॥

શ્લોક 57

ધાનુષ્કાગ્રસરસ્ય લોલકુટિલભ્રૂલેખયા બિભ્રતો

લીલાલોકશિલીમુખં નવવયસ્સામ્રાજ્યલક્ષ્મીપુષઃ ।

જેતું મન્મથમર્દિનં જનનિ તે કામાક્ષિ હાસઃ સ્વયં

વલ્ગુર્વિભ્રમભૂભૃતો વિતનુતે સેનાપતિપ્રક્રિયામ્

॥56॥

શ્લોક 58

યન્નાકમ્પત કાલકૂટકબલીકારે ચુચુમ્બે ન યદ્-

ગ્લાન્યા ચક્ષુષિ રૂષિતાનલશિખે રુદ્રસ્ય તત્તાદૃશમ્ ।

ચેતો યત્પ્રસભં સ્મરજ્વરશિખિજ્વાલેન લેલિહ્યતે

તત્કામાક્ષિ તવ સ્મિતાંશુકલિકાહેલાભવં પ્રાભવમ્

॥57॥

શ્લોક 59

સમ્ભિન્નેવ સુપર્વલોકતટિની વીચીચયૈર્યામુનૈઃ

સમ્મિશ્રેવ શશાઙ્કદીપ્તિલહરી નીલૈર્મહાનીરદૈઃ ।

કામાક્ષિ સ્ફુરિતા તવ સ્મિતરુચિઃ કાલાઞ્જનસ્પર્ધિના

કાલિમ્ના કચરોચિષાં વ્યતિકરે કાઞ્ચિદ્દશામશ્નુતે

॥58॥

શ્લોક 60

જાનીમો જગદીશ્વરપ્રણયિનિ ત્વન્મન્દહાસપ્રભાં

શ્રીકામાક્ષિ સરોજિનીમભિનવામેષા યતઃ સર્વદા ।

આસ્યેન્દોરવલોકેન પશુપતેરભ્યેતિ સમ્ફુલ્લતાં

તન્દ્રાલુસ્તદભાવ એવ તનુતે તદ્વૈપરીત્યક્રમમ્

॥59॥

શ્લોક 61

યાન્તી લોહિતિમાનમભ્રતટિની ધાતુચ્છટાકર્દમૈઃ

ભાન્તી બાલગભસ્તિમાલિકિરણૈર્મેઘાવલી શારદી ।

બિમ્બોષ્ઠદ્યુતિપુઞ્જચુમ્બનકલાશોણાયમાનેન તે

કામાક્ષિ સ્મિતરોચિષા સમદશામારોઢુમાકાઙ્ક્ષતે

॥60॥

શ્લોક 62

શ્રીકામાક્ષિ મુખેન્દુભૂષણમિદં મન્દસ્મિતં તાવકં

નેત્રાનન્દકરં તથા હિમકરો ગચ્છેદ્યથા તિગ્મતામ્ ।

શીતં દેવિ તથા યથા હિમજલં સન્તાપમુદ્રાસ્પદં

શ્વેતં કિઞ્ચ તથા યથા મલિનતાં ધત્તે ચ મુક્તામણિઃ

॥61॥

શ્લોક 63

ત્વન્મન્દસ્મિતમઞ્જરીં પ્રસૃમરાં કામાક્ષિ ચન્દ્રાતપં

સન્તઃ સન્તતમામનન્ત્યમલતા તલ્લક્ષણં લક્ષ્યતે ।

અસ્માકં ન ધુનોતિ તાપકમધિકં ધૂનોતિ નાભ્યન્તરં

ધ્વાન્તં તત્ખલુ દુઃખિનો વયમિદં કેનોતિ નો વિદ્મહે

॥62॥

શ્લોક 64

નમ્રસ્ય પ્રણયપ્રરૂઢકલહચ્છેદાય પાદાબ્જયોઃ

મન્દં ચન્દ્રકિશોરશેખરમણેઃ કામાક્ષિ રાગેણ તે ।

બન્ધૂકપ્રસવશ્રિયં જિતવતો બંહીયસીં તાદૃશીં

બિમ્બોષ્ઠસ્ય રુચિં નિરસ્ય હસિતજ્યોત્સ્ના વયસ્યાયતે

॥63॥

શ્લોક 65

મુક્તાનાં પરિમોચનં વિદધતસ્તત્પ્રીતિનિષ્પાદિની

ભૂયો દૂરત એવ ધૂતમરુતસ્તત્પાલનં તન્વતી ।

ઉદ્ભૂતસ્ય જલાન્તરાદવિરતં તદ્દૂરતાં જગ્મુષી

કામાક્ષિ સ્મિતમઞ્જરી તવ કથં કમ્બોસ્તુલામશ્નુતે

॥64॥

શ્લોક 66

શ્રીકામાક્ષિ તવ સ્મિતદ્યુતિઝરીવૈદગ્ધ્યલીલાયિતં

પશ્યન્તોઽપિ નિરન્તરં સુવિમલમ્મન્યા જગન્મણ્ડલે ।

લોકં હાસયિતું કિમર્થમનિશં પ્રાકાશ્યમાતન્વતે

મન્દાક્ષં વિરહય્ય મઙ્ગલતરં મન્દારચન્દ્રાદયઃ

॥65॥

શ્લોક 67

ક્ષીરાબ્ધેરપિ શૈલરાજતનયે ત્વન્મન્દહાસસ્ય ચ

શ્રીકામાક્ષિ વલક્ષિમોદયનિધેઃ કિઞ્ચિદ્ભિદાં બ્રૂમહે ।

એકસ્મૈ પુરુષાય દેવિ સ દદૌ લક્ષ્મીં કદાચિત્પુરા

સર્વેભ્યોઽપિ દદાત્યસૌ તુ સતતં લક્ષ્મીં ચ વાગીશ્વરીમ્

॥66॥

શ્લોક 68

શ્રીકાઞ્ચીપુરરત્નદીપકલિકે તાન્યેવ મેનાત્મજે

ચાકોરાણિ કુલાનિ દેવિ સુતરાં ધન્યાનિ મન્યામહે ।

કમ્પાતીરકુટુમ્બચઙ્ક્રમકલાચુઞ્ચૂનિ ચઞ્ચૂપુટૈઃ

નિત્યં યાનિ તવ સ્મિતેન્દુમહસામાસ્વાદમાતન્વતે

॥67॥

શ્લોક 69

શૈત્યપ્રક્રમમાશ્રિતોઽપિ નમતાં જાડ્યપ્રથાં ધૂનયન્

નૈર્મલ્યં પરમં ગતોઽપિ ગિરિશં રાગાકુલં ચારયન્ ।

લીલાલાપપુરસ્સરોઽપિ સતતં વાચંયમાન્પ્રીણયન્

કામાક્ષિ સ્મિતરોચિષાં તવ સમુલ્લાસઃ કથં વર્ણ્યતે

॥68॥

શ્લોક 70

શ્રોણીચઞ્ચલમેખલામુખરિતં લીલાગતં મન્થરં

ભ્રૂવલ્લીચલનં કટાક્ષવલનં મન્દાક્ષવીક્ષાચણમ્ ।

યદ્વૈદગ્ધ્યમુખેન મન્મથરિપું સમ્મોહયન્ત્યઞ્જસા

શ્રીકામાક્ષિ તવ સ્મિતાય સતતં તસ્મૈ નમ્સકુર્મહે

॥69॥

શ્લોક 71

શ્રીકામાક્ષિ મનોજ્ઞમન્દહસિતજ્યોતિષ્પ્રરોહે તવ

સ્ફીતશ્વેતિમસાર્વભૌમસરણિપ્રાગલ્ભ્યમભ્યેયુષિ ।

ચન્દ્રોઽયં યુવરાજતાં કલયતે ચેટીધુરં ચન્દ્રિકા

શુદ્ધા સા ચ સુધાઝરી સહચરીસાધર્મ્યમાલમ્બતે

॥70॥

શ્લોક 72

જ્યોત્સ્ના કિં તનુતે ફલં તનુમતામૌષ્ણ્યપ્રશાન્તિં વિના

ત્વન્મન્દસ્મિતરોચિષા તનુમતાં કામાક્ષિ રોચિષ્ણુના ।

સન્તાપો વિનિવાર્યતે નવવયઃપ્રાચુર્યમઙ્કૂર્યતે

સૌન્દર્યં પરિપૂર્યતે જગતિ સા કીર્તિશ્ચ સઞ્ચાર્યતે

॥71॥

શ્લોક 73

વૈમલ્યં કુમુદશ્રિયાં હિમરુચઃ કાન્ત્યૈવ સન્ધુક્ષ્યતે

જ્યોત્સ્નારોચિરપિ પ્રદોષસમયં પ્રાપ્યૈવ સમ્પદ્યતે ।

સ્વચ્છત્વં નવમૌક્તિકસ્ય પરમં સંસ્કારતો દૃશ્યતે

કામાક્ષ્યાઃ સ્મિતદીધિતેર્વિશદિમા નૈસર્ગિકો ભાસતે

॥72॥

શ્લોક 74

પ્રાકાશ્યં પરમેશ્વરપ્રણયિનિ ત્વન્મન્દહાસશ્રિયઃ

શ્રીકામાક્ષિ મમ ક્ષિણોતુ મમતાવૈચક્ષણીમક્ષયામ્ ।

યદ્ભીત્યેવ નિલીયતે હિમકરો મેઘોદરે શુક્તિકા-

ગર્ભે મૌક્તિકમણ્ડલી ચ સરસીમધ્યે મૃણાલી ચ સા

॥73॥

શ્લોક 75

હેરમ્બે ચ ગુહે હર્ષભરિતં વાત્સલ્યમઙ્કૂરયત્

મારદ્રોહિણિ પૂરુષે સહભુવં પ્રેમાઙ્કુરં વ્યઞ્જયત્ ।

આનમ્રેષુ જનેષુ પૂર્ણકરુણાવૈદગ્ધ્યમુત્તાલયત્

કામાક્ષિ સ્મિતમઞ્જસા તવ કથઙ્કારં મયા કથ્યતે

॥74॥

શ્લોક 76

સઙ્ક્રુદ્ધદ્વિજરાજકોઽપ્યવિરતં કુર્વન્દ્વિજૈઃ સઙ્ગમં

વાણીપદ્ધતિદૂરગોઽપિ સતતં તત્સાહચર્યં વહન્ ।

અશ્રાન્તં પશુદુર્લભોઽપિ કલયન્પત્યૌ પશૂનાં રતિં

શ્રીકામાક્ષિ તવ સ્મિતામૃતરસસ્યન્દો મયિ સ્પન્દતામ્

॥75॥

શ્લોક 77

શ્રીકામાક્ષિ મહેશ્વરે નિરુપમપ્રેમાઙ્કુરપ્રક્રમમં

નિત્યં યઃ પ્રકટીકરોતિ સહજામુન્નિદ્રયન્માધુરીમ્ ।

તત્તાદૃક્તવ મન્દહાસમહિમા માતઃ કથં માનિતાં

તન્મૂર્ધ્ના સુરનિમ્નગાં ચ કલિકામિન્દોશ્ચ તાં નિન્દતિ

॥76॥

શ્લોક 78

યે માધુર્યવિહારમણ્ટપભુવો યે શૈત્યમુદ્રાકરા

યે વૈશદ્યદશાવિશેષસુભગાસ્તે મન્દહાસાઙ્કુરાઃ ।

કામાક્ષ્યાઃ સહજં ગુણત્રયમિદં પર્યાયતઃ કુર્વતાં

વાણીગુમ્ફનડમ્બરે ચ હૃદયે કીર્તિપ્રરોહે ચ મે

॥77॥

શ્લોક 79

કામાક્ષ્યા મૃદુલસ્મિતાંશુનિકરા દક્ષાન્તકે વીક્ષણે

મન્દાક્ષગ્રહિલા હિમદ્યુતિમયૂખાક્ષેપદીક્ષાઙ્કુરાઃ ।

દાક્ષ્યં પક્ષ્મલયન્તુ માક્ષિકગુડદ્રાક્ષાભવં વાક્ષુ મે

સૂક્ષ્મં મોક્ષપથં નિરીક્ષિતુમપિ પ્રક્ષાલયેયુર્મનઃ

॥78॥

શ્લોક 80

જાત્યા શીતશીતલાનિ મધુરાણ્યેતાનિ પૂતાનિ તે

ગાઙ્ગાનીવ પયાંસિ દેવિ પટલાન્યલ્પસ્મિતજ્યોતિષામ્ ।

એનઃપઙ્કપરમ્પરામલિનિતામેકામ્રનાથપ્રિયે

પ્રજ્ઞાનાત્સુતરાં મદીયધિષણાં પ્રક્ષાલયન્તુ ક્ષણાત્

॥79॥

શ્લોક 81

અશ્રાન્તં પરતન્ત્રિતઃ પશુપતિસ્ત્વન્મન્દહાસાઙ્કુરૈઃ

શ્રીકામાક્ષિ તદીયવર્ણસમતાસઙ્ગેન શઙ્કામહે ।

ઇન્દું નાકધુનીં ચ શેખરયતે માલાં ચ ધત્તે નવૈઃ

વૈકુણ્ઠૈરવકુણ્ઠનં ચ કુરુતે ધૂલીચયૈર્ભાસ્મનૈઃ

॥80॥

શ્લોક 82

શ્રીકાઞ્ચીપુરદેવતે મૃદુવચસ્સૌરભ્યમુદ્રાસ્પદં

પ્રૌઢપ્રેમલતાનવીનકુસુમં મન્દસ્મિતં તાવકમ્ ।

મન્દં કન્દલતિ પ્રિયસ્ય વદનાલોકે સમાભાષણે

શ્લક્ષ્ણે કુઙ્મલતિ પ્રરૂઢપુલકે ચાશ્લોષણે ફુલ્લતિ

॥81॥

શ્લોક 83

કિં ત્રૈસ્રોતસમમ્બિકે પરિણતં સ્રોતશ્ચતુર્થં નવં

પીયૂષસ્ય સમસ્તતાપહરણં કિંવા દ્વિતીયં વપુઃ ।

કિંસ્વિત્ત્વન્નિકટં ગતં મધુરિમાભ્યાસાય ગવ્યં પયઃ

શ્રીકાઞ્ચીપુરનાયકપ્રિયતમે મન્દસ્મિતં તાવકમ્

॥82॥

શ્લોક 84

ભૂષા વક્ત્રસરોરુહસ્ય સહજા વાચાં સખી શાશ્વતી

નીવી વિભ્રમસન્તતેઃ પશુપતેઃ સૌધી દૃશાં પારણા ।

જીવાતુર્મદનશ્રિયઃ શશિરુચેરુચ્ચાટની દેવતા

શ્રીકામાક્ષિ ગિરામભૂમિમયતે હાસપ્રભામઞ્જરી

॥83॥

શ્લોક 85

સૂતિઃ શ્વેતિમકન્દલસ્ય વસતિઃ શૃઙ્ગારસારશ્રિયઃ

પૂર્તિઃ સૂક્તિઝરીરસસ્ય લહરી કારુણ્યપાથોનિધેઃ ।

વાટી કાચન કૌસુમી મધુરિમસ્વારાજ્યલક્ષ્મ્યાસ્તવ

શ્રીકામાક્ષિ મમાસ્તુ મઙ્ગલકરી હાસપ્રભાચાતુરી

॥84॥

શ્લોક 86

જન્તૂનાં જનિદુઃખમૃત્યુલહરીસન્તાપનં કૃન્તતઃ

પ્રૌઢાનુગ્રહપૂર્ણશીતલરુચો નિત્યોદયં બિભ્રતઃ ।

શ્રીકામાક્ષિ વિસૃત્વરા ઇવ કરા હાસાઙ્કુરાસ્તે હઠા-

દાલોકેન નિહન્યુરન્ધતમસસ્તોમસ્ય મે સન્તતિમ્

॥85॥

શ્લોક 87

ઉત્તુઙ્ગસ્તનમણ્ડલસ્ય વિલસલ્લાવણ્યલીલાનટી-

રઙ્ગસ્ય સ્ફુટમૂર્ધ્વસીમનિ મુહુઃ પ્રાકાશ્યમભ્યેયુષી ।

શ્રીકામાક્ષિ તવ સ્મિતદ્યુતિતતિર્બિમ્બોષ્ઠકાન્ત્યઙ્કુરૈઃ

ચિત્રાં વિદ્રુમમુદ્રિતાં વિતનુતે મૌક્તીં વિતાનશ્રિયમ્

॥86॥

શ્લોક 88

સ્વાભાવ્યાત્તવ વક્ત્રમેવ લલિતં સન્તોષસમ્પાદનં

શમ્ભોઃ કિં પુનરઞ્ચિતસ્મિતરુચઃ પાણ્ડિત્યપાત્રીકૃતમ્ ।

અમ્ભોજં સ્વત એવ સર્વજગતાં ચક્ષુઃપ્રિયમ્ભાવુકં

કામાક્ષિ સ્ફુરિતે શરદ્વિકસિતે કીદૃગ્વિધં ભ્રાજતે

॥87॥

શ્લોક 89

પુમ્ભિર્નિર્મલમાનસૌર્વિદધતે મૈત્રીં દૃઢં નિર્મલાં

લબ્ધ્વા કર્મલયં ચ નિર્મલતરાં કીર્તિં લભન્તેતરામ્ ।

સૂક્તિં પક્ષ્મલયન્તિ નિર્મલતમાં યત્તાવકાઃ સેવકાઃ

તત્કામાક્ષિ તવ સ્મિતસ્ય કલયા નૈર્મલ્યસીમાનિધેઃ

॥88॥

શ્લોક 90

આકર્ષન્નયનાનિ નાકિસદસાં શૈત્યેન સંસ્તમ્ભય-

ન્નિન્દું કિઞ્ચ વિમોહયન્પશુપતિં વિશ્વાર્તિમુચ્ચાટયન્ ।

હિંસત્સંસૃતિડમ્બરં તવ શિવે હાસાહ્વયો માન્ત્રિકઃ

શ્રીકામાક્ષિ મદીયમાનસતમોવિદ્વેષણે ચેષ્ટતામ્

॥89॥

શ્લોક 91

ક્ષેપીયઃ ક્ષપયન્તુ કલ્મષભયાન્યસ્માકમલ્પસ્મિત-

જ્યોતિર્મણ્ડલચઙ્ક્રમાસ્તવ શિવે કામાક્ષિ રોચિષ્ણવઃ ।

પીડાકર્મઠકર્મઘર્મસમયવ્યાપારતાપાનલ-

શ્રીપાતા નવહર્ષવર્ષણસુધાસ્રોતસ્વિનીશીકરાઃ

॥90॥

શ્લોક 92

શ્રીકામાક્ષિ તવ સ્મિતૈન્દવમહઃપૂરે પરિમ્ફૂર્જતિ

પ્રૌઢાં વારિધિચાતુરીં કલયતે ભક્તાત્મનાં પ્રાતિભમ્ ।

દૌર્ગત્યપ્રસરાસ્તમઃપટલિકાસાધર્મ્યમાબિભ્રતે

સર્વં કૈરવસાહચર્યપદવીરીતિં વિધત્તે પરમ્

॥91॥

શ્લોક 93

મન્દારાદિષુ મન્મથારિમહિષિ પ્રાકાશ્યરીતિં નિજાં

કાદાચિત્કતયા વિશઙ્ક્ય બહુશો વૈશદ્યમુદ્રાગુણઃ ।

સાતત્યેન તવ સ્મિતે વિતનુતે સ્વૈરાસનાવાસનામ્

॥92॥

શ્લોક 94

ઇન્ધાને ભવવીતિહોત્રનિવહે કર્મૌઘચણ્ડાનિલ-

પ્રૌઢિમ્ના બહુલીકૃતે નિપતિતં સન્તાપચિન્તાકુલમ્ ।

માતર્માં પરિષિઞ્ચ કિઞ્ચિદમલૈઃ પીયૂષવર્ષૈરિવ

શ્રીકામાક્ષિ તવ સ્મિતદ્યુતિકણૈઃ શૈશિર્યલીલાકરૈઃ

॥93॥

શ્લોક 95

ભાષાયા રસનાગ્રખેલનજુષઃ શૃઙ્ગારમુદ્રાસખી-

લીલાજાતરતેઃ સુખેન નિયમસ્નાનાય મેનાત્મજે ।

શ્રીકામાક્ષિ સુધામયીવ શિશિરા સ્રોતસ્વિની તાવકી

ગાઢાનન્દતરઙ્ગિતા વિજયતે હાસપ્રભાચાતુરી

॥94॥

શ્લોક 96

સન્તાપં વિરલીકરોતુ સકલં કામાક્ષિ મચ્ચેતના

મજ્જન્તી મધુરસ્મિતામરધુનીકલ્લોલજાલેષુ તે ।

નૈરન્તર્યમુપેત્ય મન્મથમરુલ્લોલેષુ યેષુ સ્ફુટં

પ્રેમેન્દુઃ પ્રતિબિમ્બિતો વિતનુતે કૌતૂહલં ધૂર્જટેઃ

॥95॥

શ્લોક 97

ચેતઃક્ષીરપયોધિમન્થરચલદ્રાગાખ્યમન્થાચલ-

ક્ષોભવ્યાપૃતિસમ્ભવાં જનનિ તે મન્દસ્મિતશ્રીસુધામ્ ।

સ્વાદંસ્વાદમુદીતકૌતુકરસા નેત્રત્રયી શાઙ્કરી

શ્રીકામાક્ષિ નિરન્તરં પરિણમત્યાનન્દવીચીમયી

॥96॥

શ્લોક 98

આલોકે તવ પઞ્ચસાયકરિપોરુદ્દામકૌતૂહલ-

પ્રેઙ્ખન્મારુતઘટ્ટનપ્રચલિતાદાનન્દદુગ્ધામ્બુધેઃ ।

કાચિદ્વીચિરુદઞ્ચતિ પ્રતિનવા સંવિત્પ્રરોહાત્મિકા

તાં કામાક્ષિ કવીશ્વરાઃ સ્મિતમિતિ વ્યાકુર્વતે સર્વદા

॥97॥

શ્લોક 99

સૂક્તિઃ શીલયતે કિમદ્રિતનયે મન્દસ્મિતાત્તે મુહુઃ

માધુર્યાગમસમ્પ્રદાયમથવા સૂક્તેર્નુ મન્દસ્મિતમ્ ।

ઇત્થં કામપિ ગાહતે મમ મનઃ સન્દેહમાર્ગભ્રમિં

શ્રીકામાક્ષિ ન પારમાર્થ્યસરણિસ્ફૂર્તૌ નિધત્તે પદમ્

॥98॥

શ્લોક 100

ક્રીડાલોલકૃપાસરોરુહમુખીસૌધાઙ્ગણેભ્યઃ કવિ-

શ્રેણીવાક્પરિપાટિકામૃતઝરીસૂતીગૃહેભ્યઃ શિવે ।

નિર્વાણાઙ્કુરસાર્વભૌમપદવીસિંહાસનેભ્યસ્તવ

શ્રીકામાક્ષિ મનોજ્ઞમન્દહસિતજ્યોતિષ્કણેભ્યો નમઃ

॥99॥

શ્લોક 101

આર્યામેવ વિભાવયન્મનસિ યઃ પાદારવિન્દં પુરઃ

પશ્યન્નારભતે સ્તુતિં સ નિયતં લબ્ધ્વા કટાક્ષચ્છવિમ્ ।

કામાક્ષ્યા મૃદુલસ્મિતાંશુલહરીજ્યોત્સ્નાવયસ્યાન્વિતામ્

આરોહત્યપવર્ગસૌધવલભીમાનન્દવીચીમયીમ્

॥100॥

શ્લોક 102

॥ ઇતિ મન્દસ્મિતશતકં સમ્પૂર્ણમ્ ॥

॥ ઇતિ શ્રી મૂકપઞ્ચશતી સમ્પૂર્ણા ॥

॥ઔં તત્ સત્ ॥