ಮೂಕ ಪಞ್ಚ ಶತಿ 2 - ಪಾದಾರವಿನ್ದ ಶತಕಮ್

ಮೂಕ ಪಞ್ಚ ಶತಿ 2 - ಪಾದಾರವಿನ್ದ ಶತಕಮ್

ಶ್ಲೋಕ 1

ಮಹಿಮ್ನಃ ಪನ್ಥಾನಂ ಮದನಪರಿಪನ್ಥಿಪ್ರಣಯಿನಿ

ಪ್ರಭುರ್ನಿರ್ಣೇತುಂ ತೇ ಭವತಿ ಯತಮಾನೋಽಪಿ ಕತಮಃ ।

ತಥಾಪಿ ಶ್ರೀಕಾಞ್ಚೀವಿಹೃತಿರಸಿಕೇ ಕೋಽಪಿ ಮನಸೋ

ವಿಪಾಕಸ್ತ್ವತ್ಪಾದಸ್ತುತಿವಿಧಿಷು ಜಲ್ಪಾಕಯತಿ ಮಾಮ್

ಶ್ಲೋಕ 2

ಗಲಗ್ರಾಹೀ ಪೌರನ್ದರಪುರವನೀಪಲ್ಲವರುಚಾಂ

ಧೃತಪಾಥಮ್ಯಾನಾಮರುಣಮಹಸಾಮಾದಿಮಗುರುಃ ।

ಸಮಿನ್ಧೇ ಬನ್ಧೂಕಸ್ತಬಕಸಹಯುಧ್ವಾ ದಿಶಿ ದಿಶಿ

ಪ್ರಸರ್ಪನ್ಕಾಮಾಕ್ಷ್ಯಾಶ್ಚರಣಕಿರಣಾನಾಮರುಣಿಮಾ

॥1॥

ಶ್ಲೋಕ 3

ಮರಾಲೀನಾಂ ಯಾನಾಭ್ಯಸನಕಲನಾಮೂಲಗುರವೇ

ದರಿದ್ರಾಣಾಂ ತ್ರಾಣವ್ಯತಿಕರಸುರೋದ್ಯಾನತರವೇ ।

ತಮಸ್ಕಾಣ್ಡಪ್ರೌಢಿಪ್ರಕಟನತಿರಸ್ಕಾರಪಟವೇ

ಜನೋಽಯಂ ಕಾಮಾಕ್ಷ್ಯಾಶ್ಚರಣನಲಿನಾಯ ಸ್ಪೃಹಯತೇ

॥2॥

ಶ್ಲೋಕ 4

ವಹನ್ತೀ ಸೈನ್ದೂರೀಂ ಸರಣಿಮವನಮ್ರಾಮರಪುಱೀ-

ಪುರನ್ಧ್ರೀಸೀಮನ್ತೇ ಕವಿಕಮಲಬಾಲಾರ್ಕಸುಷಮಾ ।

ತ್ರಯೀಸೀಮನ್ತಿನ್ಯಾಃ ಸ್ತನತಟನಿಚೋಲಾರುಣಪಟೀ

ವಿಭಾನ್ತೀ ಕಾಮಾಕ್ಷ್ಯಾಃ ಪದನಲಿನಕಾನ್ತಿರ್ವಿಜಯತೇ

॥3॥

ಶ್ಲೋಕ 5

ಪ್ರಣಮ್ರೀಭೂತಸ್ಯ ಪ್ರಣಯಕಲಹತ್ರಸ್ತಮನಸಃ

ಸ್ಮರಾರಾತೇಶ್ಚೂಡಾವಿಯತಿ ಗೃಹಮೇಧೀ ಹಿಮಕರಃ ।

ಯಯೋಃ ಸಾನ್ಧ್ಯಾಂ ಕಾನ್ತಿಂ ವಹತಿ ಸುಷಮಾಭಿಶ್ಚರಣಯೋಃ

ತಯೋರ್ಮೇ ಕಾಮಾಕ್ಷ್ಯಾ ಹೃದಯಮಪತನ್ದ್ರಂ ವಿಹರತಾಮ್

॥4॥

ಶ್ಲೋಕ 6

ಯಯೋಃ ಪೀಠಾಯನ್ತೇ ವಿಬುಧಮುಕುಟೀನಾಂ ಪಟಲಿಕಾ

ಯಯೋಃ ಸೌಧಾಯನ್ತೇ ಸ್ವಯಮುದಯಭಾಜೋ ಭಣಿತಯಃ ।

ಯಯೋಃ ದಾಸಾಯನ್ತೇ ಸರಸಿಜಭವಾದ್ಯಾಶ್ಚರಣಯೋಃ

ತಯೋರ್ಮೇ ಕಾಮಾಕ್ಷ್ಯಾ ದಿನಮನು ವರೀವರ್ತು ಹೃದಯಮ್

॥5॥

ಶ್ಲೋಕ 7

ನಯನ್ತೀ ಸಙ್ಕೋಚಂ ಸರಸಿಜರುಚಂ ದಿಕ್ಪರಿಸರೇ

ಸೃಜನ್ತೀ ಲೌಹಿತ್ಯಂ ನಖಕಿರಣಚನ್ದ್ರಾರ್ಧಖಚಿತಾ ।

ಕವೀನ್ದ್ರಾಣಾಂ ಹೃತ್ಕೈರವವಿಕಸನೋದ್ಯೋಗಜನನೀ

ಸ್ಫುರನ್ತೀ ಕಾಮಾಕ್ಷ್ಯಾಃ ಚರಣರುಚಿಸನ್ಧ್ಯಾ ವಿಜಯತೇ

॥6॥

ಶ್ಲೋಕ 8

ವಿರಾವೈರ್ಮಾಞ್ಜೀರೈಃ ಕಿಮಪಿ ಕಥಯನ್ತೀವ ಮಧುರಂ

ಪುರಸ್ತಾದಾನಮ್ರೇ ಪುರವಿಜಯಿನಿ ಸ್ಮೇರವದನೇ ।

ವಯಸ್ಯೇವ ಪ್ರೌಢಾ ಶಿಥಿಲಯತಿ ಯಾ ಪ್ರೇಮಕಲಹ-

ಪ್ರರೋಹಂ ಕಾಮಾಕ್ಷ್ಯಾಃ ಚರಣಯುಗಲೀ ಸಾ ವಿಜಯತೇ

॥7॥

ಶ್ಲೋಕ 9

ಸುಪರ್ವಸ್ತ್ರೀಲೋಲಾಲಕಪರಿಚಿತಂ ಷಟ್ಪದಕುಲೈಃ

ಸ್ಫುರಲ್ಲಾಕ್ಷಾರಾಗಂ ತರುಣತರಣಿಜ್ಯೋತಿರರುಣೈಃ ।

ಭೃತಂ ಕಾನ್ತ್ಯಮ್ಭೋಭಿಃ ವಿಸೃಮರಮರನ್ದೈಃ ಸರಸಿಜೈಃ

ವಿಧತ್ತೇ ಕಾಮಾಕ್ಷ್ಯಾಃ ಚರಣಯುಗಲಂ ಬನ್ಧುಪದವೀಮ್

॥8॥

ಶ್ಲೋಕ 10

ರಜಃಸಂಸರ್ಗೇಽಪಿ ಸ್ಥಿತಮರಜಸಾಮೇವ ಹೃದಯೇ

ಪರಂ ರಕ್ತತ್ವೇನ ಸ್ಥಿತಮಪಿ ವಿರಕ್ತೈಕಶರಣಮ್ ।

ಅಲಭ್ಯಂ ಮನ್ದಾನಾಂ ದಧದಪಿ ಸದಾ ಮನ್ದಗತಿತಾಂ

ವಿಧತ್ತೇ ಕಾಮಾಕ್ಷ್ಯಾಃ ಚರಣಯುಗಮಾಶ್ಚರ್ಯಲಹರೀಮ್

॥9॥

ಶ್ಲೋಕ 11

ಜಟಾಲಾ ಮಞ್ಜೀರಸ್ಫುರದರುಣರತ್ನಾಂಶುನಿಕರೈಃ

ನಿಷಿದನ್ತೀ ಮಧ್ಯೇ ನಖರುಚಿಝರೀಗಾಙ್ಗಪಯಸಾಮ್ ।

ಜಗತ್ತ್ರಾಣಂ ಕರ್ತುಂ ಜನನಿ ಮಮ ಕಾಮಾಕ್ಷಿ ನಿಯತಂ

ತಪಶ್ಚರ್ಯಾಂ ಧತ್ತೇ ತವ ಚರಣಪಾಥೋಜಯುಗಲೀ

॥10॥

ಶ್ಲೋಕ 12

ತುಲಾಕೋಟಿದ್ವನ್ದ್ವಕ್ಕಣಿತಭಣಿತಾಭೀತಿವಚಸೋಃ

ವಿನಮ್ರಂ ಕಾಮಾಕ್ಷೀ ವಿಸೃಮರಮಹಃಪಾಟಲಿತಯೋಃ ।

ಕ್ಷಣಂ ವಿನ್ಯಾಸೇನ ಕ್ಷಪಿತತಮಸೋರ್ಮೇ ಲಲಿತಯೋಃ

ಪುನೀಯಾನ್ಮೂರ್ಧಾನಂ ಪುರಹರಪುರನ್ಧ್ರೀ ಚರಣಯೋಃ

॥11॥

ಶ್ಲೋಕ 13

ಭವಾನಿ ದ್ರುಹ್ಯೇತಾಂ ಭವನಿಬಿಡಿತೇಭ್ಯೋ ಮಮ ಮುಹು-

ಸ್ತಮೋವ್ಯಾಮೋಹೇಭ್ಯಸ್ತವ ಜನನಿ ಕಾಮಾಕ್ಷಿ ಚರಣೌ ।

ಯಯೋರ್ಲಾಕ್ಷಾಬಿನ್ದುಸ್ಫುರಣಧರಣಾದ್ಧ್ವರ್ಜಟಿಜಟಾ-

ಕುಟೀರಾ ಶೋಣಾಙ್ಕಂ ವಹತಿ ವಪುರೇಣಾಙ್ಕಕಲಿಕಾ

॥12॥

ಶ್ಲೋಕ 14

ಪವಿತ್ರೀಕುರ್ಯುರ್ನುಃ ಪದತಲಭುವಃ ಪಾಟಲರುಚಃ

ಪರಾಗಾಸ್ತೇ ಪಾಪಪ್ರಶಮನಧುರೀಣಾಃ ಪರಶಿವೇ ।

ಕಣಂ ಲಬ್ಧುಂ ಯೇಷಾಂ ನಿಜಶಿರಸಿ ಕಾಮಾಕ್ಷಿ ವಿವಶಾ

ವಲನ್ತೋ ವ್ಯಾತನ್ವನ್ತ್ಯಹಮಹಮಿಕಾಂ ಮಾಧವಮುಖಾಃ

॥13॥

ಶ್ಲೋಕ 15

ಬಲಾಕಾಮಾಲಾಭಿರ್ನಖರುಚಿಮಯೀಭಿಃ ಪರಿವೃತೇ

ವಿನಮ್ರಸ್ವರ್ನಾರೀವಿಕಚಕಚಕಾಲಾಮ್ಬುದಕುಲೇ ।

ಸ್ಫುರನ್ತಃ ಕಾಮಾಕ್ಷಿ ಸ್ಫುಟದಲಿತಬನ್ಧೂಕಸುಹೃದ-

ಸ್ತಟಿಲ್ಲೇಖಾಯನ್ತೇ ತವ ಚರಣಪಾಥೋಜಕಿರಣಾಃ

॥14॥

ಶ್ಲೋಕ 16

ಸರಾಗಃ ಸದ್ವೇಷಃ ಪ್ರಸೃಮರಸರೋಜೇ ಪ್ರತಿದಿನಂ

ನಿಸರ್ಗಾದಾಕ್ರಾಮನ್ವಿಬುಧಜನಮೂರ್ಧಾನಮಧಿಕಮ್ ।

ಕಥಙ್ಕಾರಂ ಮಾತಃ ಕಥಯ ಪದಪದ್ಮಸ್ತವ ಸತಾಂ

ನತಾನಾಂ ಕಾಮಾಕ್ಷಿ ಪ್ರಕಟಯತಿ ಕೈವಲ್ಯಸರಣಿಮ್

॥15॥

ಶ್ಲೋಕ 17

ಜಪಾಲಕ್ಷ್ಮೀಶೋಣೋ ಜನಿತಪರಮಜ್ಞಾನನಲಿನೀ-

ವಿಕಾಸವ್ಯಾಸಙ್ಗೋ ವಿಫಲಿತಜಗಜ್ಜಾಡ್ಯಗರಿಮಾ ।

ಮನಃಪೂರ್ವಾದ್ರಿಂ ಮೇ ತಿಲಕಯತು ಕಾಮಾಕ್ಷಿ ತರಸಾ

ತಮಸ್ಕಾಣ್ಡದ್ರೋಹೀ ತವ ಚರಣಪಾಥೋಜರಮಣಃ

॥16॥

ಶ್ಲೋಕ 18

ನಮಸ್ಕುರ್ಮಃ ಪ್ರೇಙ್ಖನ್ಮಣಿಕಟಕನೀಲೋತ್ಪಲಮಹಃ-

ಪಯೋಧೌ ರಿಙ್ಖದ್ಭಿರ್ನಖಕಿರಣಫೇನೈರ್ಧವಲಿತೇ ।

ಸ್ಫುಟಂ ಕುರ್ವಾಣಾಯ ಪ್ರಬಲಚಲದೌರ್ವಾನಲಶಿಖಾ-

ವಿತರ್ಕಂ ಕಾಮಾಕ್ಷ್ಯಾಃ ಸತತಮರುಣಿಮ್ನೇ ಚರಣಯೋಃ

॥17॥

ಶ್ಲೋಕ 19

ಶಿವೇ ಪಾಶಾಯೇತಾಮಲಘುನಿ ತಮಃಕೂಪಕುಹರೇ

ದಿನಾಧೀಶಾಯೇತಾಂ ಮಮ ಹೃದಯಪಾಥೋಜವಿಪಿನೇ ।

ನಭೋಮಾಸಾಯೇತಾಂ ಸರಸಕವಿತಾರೀತಿಸರಿತಿ

ತ್ವದೀಯೌ ಕಾಮಾಕ್ಷಿ ಪ್ರಸೃತಕಿರಣೌ ದೇವಿ ಚರಣೌ

॥18॥

ಶ್ಲೋಕ 20

ನಿಷಕ್ತಂ ಶ್ರುತ್ಯನ್ತೇ ನಯನಮಿವ ಸದ್ವೃತ್ತರುಚಿರೈಃ

ಸಮೈರ್ಜುಷ್ಟಂ ಶುದ್ಧೈರಧರಮಿವ ರಮ್ಯೈರ್ದ್ವಿಜಗಣೈಃ ।

ಶಿವೇ ವಕ್ಷೋಜನ್ಮದ್ವಿತಯಮಿವ ಮುಕ್ತಾಶ್ರಿತಮುಮೇ

ತ್ವದೀಯಂ ಕಾಮಾಕ್ಷಿ ಪ್ರಣತಶರಣಂ ನೌಮಿ ಚರಣಮ್

॥19॥

ಶ್ಲೋಕ 21

ನಮಸ್ಯಾಸಂಸಜ್ಜನ್ನಮುಚಿಪರಿಪನ್ಥಿಪ್ರಣಯಿನೀ-

ನಿಸರ್ಗಪ್ರೇಙ್ಖೋಲತ್ಕುರಲಕುಲಕಾಲಾಹಿಶಬಲೇ ।

ನಖಚ್ಛಾಯಾದುಗ್ಧೋದಧಿಪಯಸಿ ತೇ ವೈದ್ರುಮರುಚಾಂ

ಪ್ರಚಾರಂ ಕಾಮಾಕ್ಷಿ ಪ್ರಚುರಯತಿ ಪಾದಾಬ್ಜಸುಷಮಾ

॥20॥

ಶ್ಲೋಕ 22

ಕದಾ ದೂರೀಕರ್ತುಂ ಕಟುದುರಿತಕಾಕೋಲಜನಿತಂ

ಮಹಾನ್ತಂ ಸನ್ತಾಪಂ ಮದನಪರಿಪನ್ಥಿಪ್ರಿಯತಮೇ ।

ಕ್ಷಣಾತ್ತೇ ಕಾಮಾಕ್ಷಿ ತ್ರಿಭುವನಪರೀತಾಪಹರಣೇ

ಪಟೀಯಾಂಸಂ ಲಪ್ಸ್ಯೇ ಪದಕಮಲಸೇವಾಮೃತರಸಮ್

॥21॥

ಶ್ಲೋಕ 23

ಯಯೋಃ ಸಾನ್ಧ್ಯಂ ರೋಚಿಃ ಸತತಮರುಣಿಮ್ನೇ ಸ್ಪೃಹಯತೇ

ಯಯೋಶ್ಚಾನ್ದ್ರೀ ಕಾನ್ತಿಃ ಪರಿಪತತಿ ದೃಷ್ಟ್ವಾ ನಖರುಚಿಮ್ ।

ಯಯೋಃ ಪಾಕೋದ್ರೇಕಂ ಪಿಪಠಿಷತಿ ಭಕ್ತ್ಯಾ ಕಿಸಲಯಂ

ಮ್ರದಿಮ್ನಃ ಕಾಮಾಕ್ಷ್ಯಾ ಮನಸಿ ಚರಣೌ ತೌ ತನುಮಹೇ

॥22॥

ಶ್ಲೋಕ 24

ಜಗನ್ನೇದಂ ನೇದಂ ಪರಮಿತಿ ಪರಿತ್ಯಜ್ಯ ಯತಿಭಿಃ

ಕುಶಾಗ್ರೀಯಸ್ವಾನ್ತೈಃ ಕುಶಲಧಿಷಣೈಃ ಶಾಸ್ತ್ರಸರಣೌ ।

ಗವೇಷ್ಯಂ ಕಾಮಾಕ್ಷಿ ಧ್ರುವಮಕೃತಕಾನಾಂ ಗಿರಿಸುತೇ

ಗಿರಾಮೈದಮ್ಪರ್ಯಂ ತವ ಚರಣಪದ್ಮಂ ವಿಜಯತೇ

॥23॥

ಶ್ಲೋಕ 25

ಕೃತಸ್ನಾನಂ ಶಾಸ್ತ್ರಾಮೃತಸರಸಿ ಕಾಮಾಕ್ಷಿ ನಿತರಾಂ

ದಧಾನಂ ವೈಶದ್ಯಂ ಕಲಿತರಸಮಾನನ್ದಸುಧಯಾ ।

ಅಲಙ್ಕಾರಂ ಭೂಮೇರ್ಮುನಿಜನಮನಶ್ಚಿನ್ಮಯಮಹಾ-

ಪಯೋಧೇರನ್ತಸ್ಸ್ಥಂ ತವ ಚರಣರತ್ನಂ ಮೃಗಯತೇ

॥24॥

ಶ್ಲೋಕ 26

ಮನೋಗೇಹೇ ಮೋಹೋದ್ಭವತಿಮಿರಪೂರ್ಣೇ ಮಮ ಮುಹುಃ

ದರಿದ್ರಾಣೀಕುರ್ವನ್ದಿನಕರಸಹಸ್ರಾಣಿ ಕಿರಣೈಃ ।

ವಿಧತ್ತಾಂ ಕಾಮಾಕ್ಷಿ ಪ್ರಸೃಮರತಮೋವಞ್ಚನಚಣಃ

ಕ್ಷಣಾರ್ಧಂ ಸಾನ್ನಿಧ್ಯಂ ಚರಣಮಣಿದೀಪೋ ಜನನಿ ತೇ

॥25॥

ಶ್ಲೋಕ 27

ಕವೀನಾಂ ಚೇತೋವನ್ನಖರರುಚಿಸಮ್ಪರ್ಕಿ ವಿಬುಧ-

ಸ್ರವನ್ತೀಸ್ರೋತೋವತ್ಪಟುಮುಖರಿತಂ ಹಂಸಕರವೈಃ ।

ದಿನಾರಮ್ಭಶ್ರೀವನ್ನಿಯತಮರುಣಚ್ಛಾಯಸುಭಗಂ

ಮದನ್ತಃ ಕಾಮಾಕ್ಷ್ಯಾಃ ಸ್ಫುರತು ಪದಪಙ್ಕೇರುಹಯುಗಮ್

॥26॥

ಶ್ಲೋಕ 28

ಸದಾ ಕಿಂ ಸಮ್ಪರ್ಕಾತ್ಪ್ರಕೃತಿಕಠಿನೈರ್ನಾಕಿಮುಕುಟೈಃ

ತಟೈರ್ನೀಹಾರಾದ್ರೇರಧಿಕಮಣುನಾ ಯೋಗಿಮನಸಾ ।

ವಿಭಿನ್ತೇ ಸಮ್ಮೋಹಂ ಶಿಶಿರಯತಿ ಭಕ್ತಾನಪಿ ದೃಶಾಮ್

ಅದೃಶ್ಯಂ ಕಾಮಾಕ್ಷಿ ಪ್ರಕಟಯತಿ ತೇ ಪಾದಯುಗಲಮ್

॥27॥

ಶ್ಲೋಕ 29

ಪವಿತ್ರಾಭ್ಯಾಮಮ್ಬ ಪ್ರಕೃತಿಮೃದುಲಾಭ್ಯಾಂ ತವ ಶಿವೇ

ಪದಾಭ್ಯಾಂ ಕಾಮಾಕ್ಷಿ ಪ್ರಸಭಮಭಿಭೂತೈಃ ಸಚಕಿತೈಃ ।

ಪ್ರವಾಲೈರಮ್ಭೋಜೈರಪಿ ಚ ವನವಾಸವ್ರತದಶಾಃ

ಸದೈವಾರಭ್ಯನ್ತೇ ಪರಿಚರಿತನಾನಾದ್ವಿಜಗಣೈಃ

॥28॥

ಶ್ಲೋಕ 30

ಚಿರಾದ್ದೃಶ್ಯಾ ಹಂಸೈಃ ಕಥಮಪಿ ಸದಾ ಹಂಸಸುಲಭಂ

ನಿರಸ್ಯನ್ತೀ ಜಾಡ್ಯಂ ನಿಯತಜಡಮಧ್ಯೈಕಶರಣಮ್ ।

ಅದೋಷವ್ಯಾಸಙ್ಗಾ ಸತತಮಪಿ ದೋಷಾಪ್ತಿಮಲಿನಂ

ಪಯೋಜಂ ಕಾಮಾಕ್ಷ್ಯಾಃ ಪರಿಹಸತಿ ಪಾದಾಬ್ಜಯುಗಲೀ

॥29॥

ಶ್ಲೋಕ 31

ಸುರಾಣಾಮಾನನ್ದಪ್ರಬಲನತಯಾ ಮಣ್ಡನತಯಾ

ನಖೇನ್ದುಜ್ಯೋತ್ಸ್ನಾಭಿರ್ವಿಸೃಮರತಮಃಖಣ್ಡನತಯಾ ।

ಪಯೋಜಶ್ರೀದ್ವೇಷವ್ರತರತತಯಾ ತ್ವಚ್ಚರಣಯೋಃ

ವಿಲಾಸಃ ಕಾಮಾಕ್ಷಿ ಪ್ರಕಟಯತಿ ನೈಶಾಕರದಶಾಮ್

॥30॥

ಶ್ಲೋಕ 32

ಸಿತಿಮ್ನಾ ಕಾನ್ತೀನಾಂ ನಖರಜನುಷಾಂ ಪಾದನಲಿನ-

ಚ್ಛವೀನಾಂ ಶೋಣಿಮ್ನಾ ತವ ಜನನಿ ಕಾಮಾಕ್ಷಿ ನಮನೇ ।

ಲಭನ್ತೇ ಮನ್ದಾರಗ್ರಥಿತನವಬನ್ಧೂಕಕುಸುಮ-

ಸ್ರಜಾಂ ಸಾಮೀಚೀನ್ಯಂ ಸುರಪುರಪುರನ್ಧ್ರೀಕಚಭರಾಃ

॥31॥

ಶ್ಲೋಕ 33

ಸ್ಫುರನ್ಮಧ್ಯೇ ಶುದ್ಧೇ ನಖಕಿರಣದುಗ್ಧಾಬ್ಧಿಪಯಸಾಂ

ವಹನ್ನಬ್ಜಂ ಚಕ್ರಂ ದರಮಪಿ ಚ ಲೇಖಾತ್ಮಕತಯಾ ।

ಶ್ರಿತೋ ಮಾತ್ಸ್ಯಂ ರೂಪಂ ಶ್ರಿಯಮಪಿ ದಧಾನೋ ನಿರುಪಮಾಂ

ತ್ರಿಧಾಮಾ ಕಾಮಾಕ್ಷ್ಯಾಃ ಪದನಲಿನನಾಮಾ ವಿಜಯತೇ

॥32॥

ಶ್ಲೋಕ 34

ನಖಶ್ರೀಸನ್ನದ್ಧಸ್ತಬಕನಿಚಿತಃ ಸ್ವೈಶ್ಚ ಕಿರಣೈಃ

ಪಿಶಙ್ಗೈಃ ಕಾಮಾಕ್ಷಿ ಪ್ರಕಟಿತಲಸತ್ಪಲ್ಲವರುಚಿಃ ।

ಸತಾಂ ಗಮ್ಯಃ ಶಙ್ಕೇ ಸಕಲಫಲದಾತಾ ಸುರತರುಃ

ತ್ವದೀಯಃ ಪಾದೋಽಯಂ ತುಹಿನಗಿರಿರಾಜನ್ಯತನಯೇ

॥33॥

ಶ್ಲೋಕ 35

ವಷಟ್ಕುರ್ವನ್ಮಾಞ್ಜೀರಕಲಕಲೈಃ ಕರ್ಮಲಹರೀ-

ಹವೀಂಷಿ ಪ್ರೌದ್ದಣ್ಡಂ ಜ್ವಲತಿ ಪರಮಜ್ಞಾನದಹನೇ ।

ಮಹೀಯಾನ್ಕಾಮಾಕ್ಷಿ ಸ್ಫುಟಮಹಸಿ ಜೋಹೋತಿ ಸುಧಿಯಾಂ

ಮನೋವೇದ್ಯಾಂ ಮಾತಸ್ತವ ಚರಣಯಜ್ವಾ ಗಿರಿಸುತೇ

॥34॥

ಶ್ಲೋಕ 36

ಮಹಾಮನ್ತ್ರಂ ಕಿಞ್ಚಿನ್ಮಣಿಕಟಕನಾದೈರ್ಮೃದು ಜಪನ್

ಕ್ಷಿಪನ್ದಿಕ್ಷು ಸ್ವಚ್ಛಂ ನಖರುಚಿಮಯಂ ಭಾಸ್ಮನರಜಃ ।

ನತಾನಾಂ ಕಾಮಾಕ್ಷಿ ಪ್ರಕೃತಿಪಟುರಚ್ಚಾಟ್ಯ ಮಮತಾ-

ಪಿಶಾಚೀಂ ಪಾದೋಽಯಂ ಪ್ರಕಟಯತಿ ತೇ ಮಾನ್ತ್ರಿಕದಶಾಮ್

॥35॥

ಶ್ಲೋಕ 37

ಉದೀತೇ ಬೋಧೇನ್ದೌ ತಮಸಿ ನಿತರಾಂ ಜಗ್ಮುಷಿ ದಶಾಂ

ದರಿದ್ರಾಂ ಕಾಮಾಕ್ಷಿ ಪ್ರಕಟಮನುರಾಗಂ ವಿದಧತೀ ।

ಸಿತೇನಾಚ್ಛಾದ್ಯಾಙ್ಗಂ ನಖರುಚಿಪಟೇನಾಙ್ಘ್ರಿಯುಗಲೀ-

ಪುರನ್ಧ್ರೀ ತೇ ಮಾತಃ ಸ್ವಯಮಭಿಸರತ್ಯೇವ ಹೃದಯಮ್

॥36॥

ಶ್ಲೋಕ 38

ದಿನಾರಮ್ಭಃ ಸಮ್ಪನ್ನಲಿನವಿಪಿನಾನಾಮಭಿನವೋ

ವಿಕಾಸೋ ವಾಸನ್ತಃ ಸುಕವಿಪಿಕಲೋಕಸ್ಯ ನಿಯತಃ ।

ಪ್ರದೋಷಃ ಕಾಮಾಕ್ಷಿ ಪ್ರಕಟಪರಮಜ್ಞಾನಶಶಿನ-

ಶ್ಚಕಾಸ್ತಿ ತ್ವತ್ಪಾದಸ್ಮರಣಮಹಿಮಾ ಶೈಲತನಯೇ

॥37॥

ಶ್ಲೋಕ 39

ಧೃತಚ್ಛಾಯಂ ನಿತ್ಯಂ ಸರಸಿರುಹಮೈತ್ರೀಪರಿಚಿತಂ

ನಿಧಾನಂ ದೀಪ್ತೀನಾಂ ನಿಖಿಲಜಗತಾಂ ಬೋಧಜನಕಮ್ ।

ಮುಮುಕ್ಷೂಣಾಂ ಮಾರ್ಗಪ್ರಥನಪಟು ಕಾಮಾಕ್ಷಿ ಪದವೀಂ

ಪದಂ ತೇ ಪಾತಙ್ಗೀಂ ಪರಿಕಲಯತೇ ಪರ್ವತಸುತೇ

॥38॥

ಶ್ಲೋಕ 40

ಶನೈಸ್ತೀರ್ತ್ವಾ ಮೋಹಾಮ್ಬುಧಿಮಥ ಸಮಾರೋಢುಮನಸಃ

ಕ್ರಮಾತ್ಕೈವಲ್ಯಾಖ್ಯಾಂ ಸುಕೃತಿಸುಲಭಾಂ ಸೌಧವಲಭೀಮ್ ।

ಲಭನ್ತೇ ನಿಃಶ್ರೇಣೀಮಿವ ಝಟಿತಿ ಕಾಮಾಕ್ಷಿ ಚರಣಂ

ಪುರಶ್ಚರ್ಯಾಭಿಸ್ತೇ ಪುರಮಥನಸೀಮನ್ತಿನಿ ಜನಾಃ

॥39॥

ಶ್ಲೋಕ 41

ಪ್ರಚಣ್ಡಾರ್ತಿಕ್ಷೋಭಪ್ರಮಥನಕೃತೇ ಪ್ರಾತಿಭಸರಿ-

ತ್ಪ್ರವಾಹಪ್ರೋದ್ದಣ್ಡೀಕರಣಜಲದಾಯ ಪ್ರಣಮತಾಮ್ ।

ಪ್ರದೀಪಾಯ ಪ್ರೌಢೇ ಭವತಮಸಿ ಕಾಮಾಕ್ಷಿ ಚರಣ-

ಪ್ರಸಾದೌನ್ಮುಖ್ಯಾಯ ಸ್ಪೃಹಯತಿ ಜನೋಽಯಂ ಜನನಿ ತೇ

॥40॥

ಶ್ಲೋಕ 42

ಮರುದ್ಭಿಃ ಸಂಸೇವ್ಯಾ ಸತತಮಪಿ ಚಾಞ್ಚಲ್ಯರಹಿತಾ

ಸದಾರುಣ್ಯಂ ಯಾನ್ತೀ ಪರಿಣತಿದರಿದ್ರಾಣಸುಷಮಾ ।

ಗುಣೋತ್ಕರ್ಷಾನ್ಮಾಞ್ಜೀರಕಕಲಕಲೈಸ್ತರ್ಜನಪಟುಃ

ಪ್ರವಾಲಂ ಕಾಮಾಕ್ಷ್ಯಾಃ ಪರಿಹಸತಿ ಪಾದಾಬ್ಜಯುಗಲೀ

॥41॥

ಶ್ಲೋಕ 43

ಜಗದ್ರಕ್ಷಾದಕ್ಷಾ ಜಲಜರುಚಿಶಿಕ್ಷಾಪಟುತರಾ

ಸಮೈರ್ನಮ್ಯಾ ರಮ್ಯಾ ಸತತಮಭಿಗಮ್ಯಾ ಬುಧಜನೈಃ ।

ದ್ವಯೀ ಲೀಲಾಲೋಲಾ ಶ್ರುತಿಷು ಸುರಪಾಲಾದಿಮುಕುಟೀ-

ತಟೀಸೀಮಾಧಾಮಾ ತವ ಜನನಿ ಕಾಮಾಕ್ಷಿ ಪದಯೋಃ

॥42॥

ಶ್ಲೋಕ 44

ಗಿರಾಂ ದೂರೌ ಚೋರೌ ಜಡಿಮತಿಮಿರಾಣಾಂ ಕೃತಜಗ-

ತ್ಪರಿತ್ರಾಣೌ ಶೋಣೌ ಮುನಿಹೃದಯಲೀಲೈಕನಿಪುಣೌ ।

ನಖೈಃ ಸ್ಮೇರೌ ಸಾರೌ ನಿಗಮವಚಸಾಂ ಖಣ್ಡಿತಭವ-

ಗ್ರಹೋನ್ಮಾದೌ ಪಾದೌ ತವ ಜನನಿ ಕಾಮಾಕ್ಷಿ ಕಲಯೇ

॥43॥

ಶ್ಲೋಕ 45

ಅವಿಶ್ರಾನ್ತಂ ಪಙ್ಕಂ ಯದಪಿ ಕಲಯನ್ಯಾವಕಮಯಂ

ನಿರಸ್ಯನ್ಕಾಮಾಕ್ಷಿ ಪ್ರಣಮನಜುಷಾಂ ಪಙ್ಕಮಖಿಲಮ್ ।

ತುಲಾಕೋಟಿದ್ವನ್ದಂ ದಧದಪಿ ಚ ಗಚ್ಛನ್ನತುಲತಾಂ

ಗಿರಾಂ ಮಾರ್ಗಂ ಪಾದೋ ಗಿರಿವರಸುತೇ ಲಙ್ಘಯತಿ ತೇ

॥44॥

ಶ್ಲೋಕ 46

ಪ್ರವಾಲಂ ಸವ್ರೀಲಂ ವಿಪಿನವಿವರೇ ವೇಪಯತಿ ಯಾ

ಸ್ಫುರಲ್ಲೀಲಂ ಬಾಲಾತಪಮಧಿಕಬಾಲಂ ವದತಿ ಯಾ ।

ರುಚಿಂ ಸಾನ್ಧ್ಯಾಂ ವನ್ಧ್ಯಾಂ ವಿರಚಯತಿ ಯಾ ವರ್ಧಯತು ಸಾ

ಶಿವಂ ಮೇ ಕಾಮಾಕ್ಷ್ಯಾಃ ಪದನಲಿನಪಾಟಲ್ಯಲಹರೀ

॥45॥

ಶ್ಲೋಕ 47

ಕಿರಞ್ಜ್ಯೋತ್ಸ್ನಾರೀತಿಂ ನಖಮುಖರುಚಾ ಹಂಸಮನಸಾಂ

ವಿತನ್ವಾನಃ ಪ್ರೀತಿಂ ವಿಕಚತರುಣಾಮ್ಭೋರುಹರುಚಿಃ ।

ಪ್ರಕಾಶಃ ಶ್ರೀಪಾದಸ್ತವ ಜನನಿ ಕಾಮಾಕ್ಷಿ ತನುತೇ

ಶರತ್ಕಾಲಪ್ರೌಢಿಂ ಶಶಿಶಕಲಚೂಡಪ್ರಿಯತಮೇ

॥46॥

ಶ್ಲೋಕ 48

ನಖಾಙ್ಕೂರಸ್ಮೇರದ್ಯುತಿವಿಮಲಗಙ್ಗಾಮ್ಭಸಿ ಸುಖಂ

ಕೃತಸ್ನಾನಂ ಜ್ಞಾನಾಮೃತಮಮಲಮಾಸ್ವಾದ್ಯ ನಿಯತಮ್ ।

ಉದಞ್ಚನ್ಮಞ್ಜೀರಸ್ಫುರಣಮಣಿದೀಪೇ ಮಮ ಮನೋ

ಮನೋಜ್ಞೇ ಕಾಮಾಕ್ಷ್ಯಾಶ್ಚರಣಮಣಿಹರ್ಮ್ಯೇ ವಿಹರತಾಮ್

॥47॥

ಶ್ಲೋಕ 49

ಭವಾಮ್ಭೋಧೌ ನೌಕಾಂ ಜಡಿಮವಿಪಿನೇ ಪಾವಕಶಿಖಾ-

ಮಮರ್ತ್ಯೇನ್ದ್ರಾದೀನಾಮಧಿಮುಕುಟಮುತ್ತಂಸಕಲಿಕಾಮ್ ।

ಜಗತ್ತಾಪೇ ಜ್ಯೋತ್ಸ್ನಾಮಕೃತಕವಚಃಪಞ್ಜರಪುಟೇ

ಶುಕಸ್ತ್ರೀಂ ಕಾಮಾಕ್ಷ್ಯಾ ಮನಸಿ ಕಲಯೇ ಪಾದಯುಗಲೀಮ್

॥48॥

ಶ್ಲೋಕ 50

ಪರತ್ಮಪ್ರಾಕಾಶ್ಯಪ್ರತಿಫಲನಚುಞ್ಚುಃ ಪ್ರಣಮತಾಂ

ಮನೋಜ್ಞಸ್ತ್ವತ್ಪಾದೋ ಮಣಿಮುಕುರಮುದ್ರಾಂ ಕಲಯತೇ ।

ಯದೀಯಾಂ ಕಾಮಾಕ್ಷಿ ಪ್ರಕೃತಿಮಸೃಣಾಃ ಶೋಧಕದಶಾಂ

ವಿಧಾತುಂ ಚೇಷ್ಠನ್ತೇ ಬಲರಿಪುವಧೂಟೀಕಚಭರಾಃ

॥49॥

ಶ್ಲೋಕ 51

ಅವಿಶ್ರಾನ್ತಂ ತಿಷ್ಠನ್ನಕೃತಕವಚಃಕನ್ದರಪುಟೀ-

ಕುಟೀರಾನ್ತಃ ಪ್ರೌಢಂ ನಖರುಚಿಸಟಾಲೀಂ ಪ್ರಕಟಯನ್ ।

ಪ್ರಚಣ್ಡಂ ಖಣ್ಡತ್ವಂ ನಯತು ಮಮ ಕಾಮಾಕ್ಷಿ ತರಸಾ

ತಮೋವೇತಣ್ಡೇನ್ದ್ರಂ ತವ ಚರಣಕಣ್ಠೀರವಪತಿಃ

॥50॥

ಶ್ಲೋಕ 52

ಪುರಸ್ತಾತ್ಕಾಮಾಕ್ಷಿ ಪ್ರಚುರರಸಮಾಖಣ್ಡಲಪುರೀ-

ಪುರನ್ಧ್ರೀಣಾಂ ಲಾಸ್ಯಂ ತವ ಲಲಿತಮಾಲೋಕ್ಯ ಶನಕೈಃ ।

ನಖಶ್ರೀಭಿಃ ಸ್ಮೇರಾ ಬಹು ವಿತನುತೇ ನೂಪುರರವೈ-

ಶ್ಚಮತ್ಕೃತ್ಯಾ ಶಙ್ಕೇ ಚರಣಯುಗಲೀ ಚಾಟುರಚನಾಃ

॥51॥

ಶ್ಲೋಕ 53

ಸರೋಜಂ ನಿನ್ದನ್ತೀ ನಖಕಿರಣಕರ್ಪೂರಶಿಶಿರಾ

ನಿಷಿಕ್ತಾ ಮಾರಾರೇರ್ಮುಕುಟಶಶಿರೇಖಾಹಿಮಜಲೈಃ ।

ಸ್ಫುರನ್ತೀ ಕಾಮಾಕ್ಷಿ ಸ್ಫುಟರುಚಿಮಯೇ ಪಲ್ಲವಚಯೇ

ತವಾಧತ್ತೇ ಮೈತ್ರೀಂ ಪಥಿಕಸುದೃಶಾ ಪಾದಯುಗಲೀ

॥52॥

ಶ್ಲೋಕ 54

ನತಾನಾಂ ಸಮ್ಪತ್ತೇರನವರತಮಾಕರ್ಷಣಜಪಃ

ಪ್ರರೋಹತ್ಸಂಸಾರಪ್ರಸರಗರಿಮಸ್ತಮ್ಭನಜಪಃ ।

ತ್ವದೀಯಃ ಕಾಮಾಕ್ಷಿ ಸ್ಮರಹರಮನೋಮೋಹನಜಪಃ

ಪಟೀಯಾನ್ನಃ ಪಾಯಾತ್ಪದನಲಿನಮಞ್ಜೀರನಿನದಃ

॥53॥

ಶ್ಲೋಕ 55

ವಿತನ್ವೀಥಾ ನಾಥೇ ಮಮ ಶಿರಸಿ ಕಾಮಾಕ್ಷಿ ಕೃಪಯಾ

ಪದಾಮ್ಭೋಜನ್ಯಾಸಂ ಪಶುಪರಿಬೃಢಪ್ರಾಣದಯಿತೇ ।

ಪಿಬನ್ತೋ ಯನ್ಮುದ್ರಾಂ ಪ್ರಕಟಮುಪಕಮ್ಪಾಪರಿಸರಂ

ದೃಶಾ ನಾನನ್ದ್ಯನ್ತೇ ನಲಿನಭವನಾರಾಯಣಮುಖಾಃ

॥54॥

ಶ್ಲೋಕ 56

ಪ್ರಣಾಮೋದ್ಯದ್ಬೃನ್ದಾರಮುಕುಟಮನ್ದಾರಕಲಿಕಾ-

ವಿಲೋಲಲ್ಲೋಲಮ್ಬಪ್ರಕರಮಯಧೂಮಪ್ರಚುರಿಮಾ ।

ಪ್ರದೀಪ್ತಃ ಪಾದಾಬ್ಜದ್ಯುತಿವಿತತಿಪಾಟಲ್ಯಲಹರೀ-

ಕೃಶಾನುಃ ಕಾಮಾಕ್ಷ್ಯಾ ಮಮ ದಹತು ಸಂಸಾರವಿಪಿನಮ್

॥55॥

ಶ್ಲೋಕ 57

ವಲಕ್ಷಶ್ರೀರೃಕ್ಷಾಧಿಪಶಿಶುಸದೃಕ್ಷೈಸ್ತವ ನಖೈಃ

ಜಿಘೃಕ್ಷುರ್ದಕ್ಷತ್ವಂ ಸರಸಿರುಹಭಿಕ್ಷುತ್ವಕರಣೇ ।

ಕ್ಷಣಾನ್ಮೇ ಕಾಮಾಕ್ಷಿ ಕ್ಷಪಿತಭವಸಙ್ಕ್ಷೋಭಗರಿಮಾ

ವಚೋವೈಚಕ್ಷನ್ಯಂ ಚರಣಯುಗಲೀ ಪಕ್ಷ್ಮಲಯತಾತ್

॥56॥

ಶ್ಲೋಕ 58

ಸಮನ್ತಾತ್ಕಾಮಾಕ್ಷಿ ಕ್ಷತತಿಮಿರಸನ್ತಾನಸುಭಗಾನ್

ಅನನ್ತಾಭಿರ್ಭಾಭಿರ್ದಿನಮನು ದಿಗನ್ತಾನ್ವಿರಚಯನ್ ।

ಅಹನ್ತಾಯಾ ಹನ್ತಾ ಮಮ ಜಡಿಮದನ್ತಾವಲಹರಿಃ

ವಿಭಿನ್ತಾಂ ಸನ್ತಾಪಂ ತವ ಚರಣಚಿನ್ತಾಮಣಿರಸೌ

॥57॥

ಶ್ಲೋಕ 59

ದಧಾನೋ ಭಾಸ್ವತ್ತಾಮಮೃತನಿಲಯೋ ಲೋಹಿತವಪುಃ

ವಿನಮ್ರಾಣಾಂ ಸೌಮ್ಯೋ ಗುರುರಪಿ ಕವಿತ್ವಂ ಚ ಕಲಯನ್ ।

ಗತೌ ಮನ್ದೋ ಗಙ್ಗಾಧರಮಹಿಷಿ ಕಾಮಾಕ್ಷಿ ಭಜತಾಂ

ತಮಃಕೇತುರ್ಮಾತಸ್ತವ ಚರಣಪದ್ಮೋ ವಿಜಯತೇ

॥58॥

ಶ್ಲೋಕ 60

ನಯನ್ತೀಂ ದಾಸತ್ವಂ ನಲಿನಭವಮುಖ್ಯಾನಸುಲಭ-

ಪ್ರದಾನಾದ್ದೀನಾನಾಮಮರತರುದೌರ್ಭಾಗ್ಯಜನನೀಮ್ ।

ಜಗಜ್ಜನ್ಮಕ್ಷೇಮಕ್ಷಯವಿಧಿಷು ಕಾಮಾಕ್ಷಿ ಪದಯೋ-

ರ್ಧುರೀಣಾಮೀಷ್ಟೇ ಕರಸ್ತವ ಭಣಿತುಮಾಹೋಪುರುಷಿಕಾಮ್

॥59॥

ಶ್ಲೋಕ 61

ಜನೋಽಯಂ ಸನ್ತಪ್ತೋ ಜನನಿ ಭವಚಣ್ಡಾಂಶುಕಿರಣೈಃ

ಅಲಬ್ಧವೈಕಂ ಶೀತಂ ಕಣಮಪಿ ಪರಜ್ಞಾನಪಯಸಃ ।

ತಮೋಮಾರ್ಗೇ ಪಾನ್ಥಸ್ತವ ಝಟಿತಿ ಕಾಮಾಕ್ಷಿ ಶಿಶಿರಾಂ

ಪದಾಮ್ಭೋಜಚ್ಛಾಯಾಂ ಪರಮಶಿವಜಾಯೇ ಮೃಗಯತೇ

॥60॥

ಶ್ಲೋಕ 62

ಜಯತ್ಯಮ್ಬ ಶ್ರೀಮನ್ನಖಕಿರಣಚೀನಾಂಶುಕಮಯಂ

ವಿತಾನಂ ಬಿಭ್ರಾಣೇ ಸುರಮುಕುಟಸಙ್ಘಟ್ಟಮಸೃಣೇ ।

ನಿಜಾರುಣ್ಯಕ್ಷೌಮಾಸ್ತರಣವತಿ ಕಾಮಾಕ್ಷಿ ಸುಲಭಾ

ಬುಧೈಃ ಸಂವಿನ್ನಾರೀ ತವ ಚರಣಮಾಣಿಕ್ಯಭವನೇ

॥61॥

ಶ್ಲೋಕ 63

ಪ್ರತೀಮಃ ಕಾಮಾಕ್ಷಿ ಸ್ಫುರಿತತರುಣಾದಿತ್ಯಕಿರಣ-

ಶ್ರಿಯೋ ಮೂಲದ್ರವ್ಯಂ ತವ ಚರಣಮದ್ರೀನ್ದ್ರತನಯೇ ।

ಸುರೇನ್ದ್ರಾಶಾಮಾಪೂರಯತಿ ಯದಸೌ ಧ್ವಾನ್ತಮಖಿಲಂ

ಧುನೀತೇ ದಿಗ್ಭಾಗಾನಪಿ ಚ ಮಹಸಾ ಪಾಟಲಯತೇ

॥62॥

ಶ್ಲೋಕ 64

ಮಹಾಭಾಷ್ಯವ್ಯಾಖ್ಯಾಪಟುಶಯನಮಾರೋಪಯತಿ ವಾ

ಸ್ಮರವ್ಯಾಪಾರೇರ್ಷ್ಯಾಪಿಶುನನಿಟಿಲಂ ಕಾರಯತಿ ವಾ ।

ದ್ವಿರೇಫಾಣಾಮಧ್ಯಾಸಯತಿ ಸತತಂ ವಾಧಿವಸತಿಂ

ಪ್ರಣಮ್ರಾನ್ಕಾಮಾಕ್ಷ್ಯಾಃ ಪದನಲಿನಮಾಹಾತ್ಮ್ಯಗರಿಮಾ

॥63॥

ಶ್ಲೋಕ 65

ವಿವೇಕಾಮ್ಭಸ್ಸ್ರೋತಸ್ಸ್ನಪನಪರಿಪಾಟೀಶಿಶಿರಿತೇ

ಸಮೀಭೂತೇ ಶಾಸ್ತ್ರಸ್ಮರಣಹಲಸಙ್ಕರ್ಷಣವಶಾತ್ ।

ಸತಾಂ ಚೇತಃಕ್ಷೇತ್ರೇ ವಪತಿ ತವ ಕಾಮಾಕ್ಷಿ ಚರಣೋ

ಮಹಾಸಂವಿತ್ಸಸ್ಯಪ್ರಕರವರಬೀಜಂ ಗಿರಿಸುತೇ

॥64॥

ಶ್ಲೋಕ 66

ದಧಾನೋ ಮನ್ದಾರಸ್ತಬಕಪರಿಪಾಟೀಂ ನಖರುಚಾ

ವಹನ್ದೀಪ್ತಾಂ ಶೋಣಾಙ್ಗುಲಿಪಟಲಚಾಮ್ಪೇಯಕಲಿಕಾಮ್ ।

ಅಶೋಕೋಲ್ಲಾಸಂ ನಃ ಪ್ರಚುರಯತು ಕಾಮಾಕ್ಷಿ ಚರಣೋ

ವಿಕಾಸೀ ವಾಸನ್ತಃ ಸಮಯ ಇವ ತೇ ಶರ್ವದಯಿತೇ

॥65॥

ಶ್ಲೋಕ 67

ನಖಾಂಶುಪ್ರಾಚುರ್ಯಪ್ರಸೃಮರಮರಾಲಾಲಿಧವಲಃ

ಸ್ಫುರನ್ಮಞ್ಜೀರೋದ್ಯನ್ಮರಕತಮಹಶ್ಶೈವಲಯುತಃ ।

ಭವತ್ಯಾಃ ಕಾಮಾಕ್ಷಿ ಸ್ಫುಟಚರಣಪಾಟಲ್ಯಕಪಟೋ

ನದಃ ಶೋಣಾಭಿಖ್ಯೋ ನಗಪತಿತನೂಜೇ ವಿಜಯತೇ

॥66॥

ಶ್ಲೋಕ 68

ಧುನಾನಂ ಪಙ್ಕೌಘಂ ಪರಮಸುಲಭಂ ಕಣ್ಟಕಕುಲೈಃ

ವಿಕಾಸವ್ಯಾಸಙ್ಗಂ ವಿದಧದಪರಾಧೀನಮನಿಶಮ್ ।

ನಖೇನ್ದುಜ್ಯೋತ್ಸ್ನಾಭಿರ್ವಿಶದರುಚಿ ಕಾಮಾಕ್ಷಿ ನಿತರಾಮ್

ಅಸಾಮಾನ್ಯಂ ಮನ್ಯೇ ಸರಸಿಜಮಿದಂ ತೇ ಪದಯುಗಮ್

॥67॥

ಶ್ಲೋಕ 69

ಕರೀನ್ದ್ರಾಯ ದ್ರುಹ್ಯತ್ಯಲಸಗತಿಲೀಲಾಸು ವಿಮಲೈಃ

ಪಯೋಜೈರ್ಮಾತ್ಸರ್ಯಂ ಪ್ರಕಟಯತಿ ಕಾಮಂ ಕಲಯತೇ ।

ಪದಾಮ್ಭೋಜದ್ವನ್ದ್ವಂ ತವ ತದಪಿ ಕಾಮಾಕ್ಷಿ ಹೃದಯಂ

ಮುನೀನಾಂ ಶಾನ್ತಾನಾಂ ಕಥಮನಿಶಮಸ್ಮೈ ಸ್ಪೃಹಯತೇ

॥68॥

ಶ್ಲೋಕ 70

ನಿರಸ್ತಾ ಶೋಣಿಮ್ನಾ ಚರಣಕಿರಣಾನಾಂ ತವ ಶಿವೇ

ಸಮಿನ್ಧಾನಾ ಸನ್ಧ್ಯಾರುಚಿರಚಲರಾಜನ್ಯತನಯೇ ।

ಅಸಾಮರ್ಥ್ಯಾದೇನಂ ಪರಿಭವಿತುಮೇತತ್ಸಮರುಚಾಂ

ಸರೋಜಾನಾಂ ಜಾನೇ ಮುಕುಲಯತಿ ಶೋಭಾಂ ಪ್ರತಿದಿನಮ್

॥69॥

ಶ್ಲೋಕ 71

ಉಪಾದಿಕ್ಷದ್ದಾಕ್ಷ್ಯಂ ತವ ಚರಣನಾಮಾ ಗುರುರಸೌ

ಮರಾಲಾನಾಂ ಶಙ್ಕೇ ಮಸೃಣಗತಿಲಾಲಿತ್ಯಸರಣೌ ।

ಅತಸ್ತೇ ನಿಸ್ತನ್ದ್ರಂ ನಿಯತಮಮುನಾ ಸಖ್ಯಪದವೀಂ

ಪ್ರಪನ್ನಂ ಪಾಥೋಜಂ ಪ್ರತಿ ದಧತಿ ಕಾಮಾಕ್ಷಿ ಕುತುಕಮ್

॥70॥

ಶ್ಲೋಕ 72

ದಧಾನೈಃ ಸಂಸರ್ಗಂ ಪ್ರಕೃತಿಮಲಿನೈಃ ಷಟ್ಪದಕುಲೈಃ

ದ್ವಿಜಾಧೀಶಶ್ಲಾಘಾವಿಧಿಷು ವಿದಧದ್ಭಿರ್ಮುಕುಲತಾಮ್ ।

ರಜೋಮಿಶ್ರೈಃ ಪದ್ಮೈರ್ನಿಯತಮಪಿ ಕಾಮಾಕ್ಷಿ ಪದಯೋಃ

ವಿರೋಧಸ್ತೇ ಯುಕ್ತೋ ವಿಷಮಶರವೈರಿಪ್ರಿಯತಮೇ

॥71॥

ಶ್ಲೋಕ 73

ಕವಿತ್ವಶ್ರೀಮಿಶ್ರೀಕರಣನಿಪುಣೌ ರಕ್ಷಣಚಣೌ

ವಿಪನ್ನಾನಾಂ ಶ್ರೀಮನ್ನಲಿನಮಸೃಣೌ ಶೋಣಕಿರಣೌ ।

ಮುನೀನ್ದ್ರಾಣಾಮನ್ತಃಕರಣಶರಣೌ ಮನ್ದಸರಣೌ

ಮನೋಜ್ಞೌ ಕಾಮಾಕ್ಷ್ಯಾ ದುರಿತಹರಣೌ ನೌಮಿ ಚರಣೌ

॥72॥

ಶ್ಲೋಕ 74

ಪರಸ್ಮಾತ್ಸರ್ವಸ್ಮಾದಪಿ ಚ ಪರಯೋರ್ಮುಕ್ತಿಕರಯೋಃ

ನಖಶ್ರೀಭಿರ್ಜ್ಯೋತ್ಸ್ನಾಕಲಿತತುಲಯೋಸ್ತಾಮ್ರತಲಯೋಃ ।

ನಿಲೀಯೇ ಕಾಮಾಕ್ಷ್ಯಾ ನಿಗಮನುತಯೋರ್ನಾಕಿನತಯೋಃ

ನಿರಸ್ತಪ್ರೋನ್ಮೀಲನ್ನಲಿನಮದಯೋರೇವ ಪದಯೋಃ

॥73॥

ಶ್ಲೋಕ 75

ಸ್ವಭಾವಾದನ್ಯೋನ್ಯಂ ಕಿಸಲಯಮಪೀದಂ ತವ ಪದಂ

ಮ್ರದಿಮ್ನಾ ಶೋಣಿಮ್ನಾ ಭಗವತಿ ದಧಾತೇ ಸದೃಶತಾಮ್ ।

ವನೇ ಪೂರ್ವಸ್ಯೇಚ್ಛಾ ಸತತಮವನೇ ಕಿಂ ತು ಜಗತಾಂ

ಪರಸ್ಯೇತ್ಥಂ ಭೇದಃ ಸ್ಫುರತಿ ಹೃದಿ ಕಾಮಾಕ್ಷಿ ಸುಧಿಯಾಮ್

॥74॥

ಶ್ಲೋಕ 76

ಕಥಂ ವಾಚಾಲೋಽಪಿ ಪ್ರಕಟಮಣಿಮಞ್ಜೀರನಿನದೈಃ

ಸದೈವಾನನ್ದಾರ್ದ್ರಾನ್ವಿರಚಯತಿ ವಾಚಂಯಮಜನಾನ್ ।

ಪ್ರಕೃತ್ಯಾ ತೇ ಶೋಣಚ್ಛವಿರಪಿ ಚ ಕಾಮಾಕ್ಷಿ ಚರಣೋ

ಮನೀಷಾನೈರ್ಮಲ್ಯಂ ಕಥಮಿವ ನೃಣಾಂ ಮಾಂಸಲಯತೇ

॥75॥

ಶ್ಲೋಕ 77

ಚಲತ್ತೃಷ್ಣಾವೀಚೀಪರಿಚಲನಪರ್ಯಾಕುಲತಯಾ

ಮುಹುರ್ಭ್ರಾನ್ತಸ್ತಾನ್ತಃ ಪರಮಶಿವವಾಮಾಕ್ಷಿ ಪರವಾನ್ ।

ತಿತೀರ್ಷುಃ ಕಾಮಾಕ್ಷಿ ಪ್ರಚುರತರಕರ್ಮಾಮ್ಬುಧಿಮಮುಂ

ಕದಾಹಂ ಲಪ್ಸ್ಯೇ ತೇ ಚರಣಮಣಿಸೇತುಂ ಗಿರಿಸುತೇ

॥76॥

ಶ್ಲೋಕ 78

ವಿಶುಷ್ಯನ್ತ್ಯಾಂ ಪ್ರಜ್ಞಾಸರಿತಿ ದುರಿತಗ್ರೀಷ್ಮಸಮಯ-

ಪ್ರಭಾವೇಣ ಕ್ಷೀಣೇ ಸತಿ ಮಮ ಮನಃಕೇಕಿನಿ ಶುಚಾ ।

ತ್ವದೀಯಃ ಕಾಮಾಕ್ಷಿ ಸ್ಫುರಿತಚರಣಾಮ್ಭೋದಮಹಿಮಾ

ನಭೋಮಾಸಾಟೋಪಂ ನಗಪತಿಸುತೇ ಕಿಂ ನ ಕುರುತೇ

॥77॥

ಶ್ಲೋಕ 79

ವಿನಮ್ರಾಣಾಂ ಚೇತೋಭವನವಲಭೀಸೀಮ್ನಿ ಚರಣ-

ಪ್ರದೀಪೇ ಪ್ರಾಕಾಶ್ಯಂ ದಧತಿ ತವ ನಿರ್ಧೂತತಮಸಿ ।

ಅಸೀಮಾ ಕಾಮಾಕ್ಷಿ ಸ್ವಯಮಲಘುದುಷ್ಕರ್ಮಲಹರೀ

ವಿಘೂರ್ಣನ್ತೀ ಶಾನ್ತಿಂ ಶಲಭಪರಿಪಾಟೀವ ಭಜತೇ

॥78॥

ಶ್ಲೋಕ 80

ವಿರಾಜನ್ತೀ ಶುಕ್ತಿರ್ನಖಕಿರಣಮುಕ್ತಾಮಣಿತತೇಃ

ವಿಪತ್ಪಾಥೋರಾಶೌ ತರಿರಪಿ ನರಾಣಾಂ ಪ್ರಣಮತಾಮ್ ।

ತ್ವದೀಯಃ ಕಾಮಾಕ್ಷಿ ಧ್ರುವಮಲಘುವಹ್ನಿರ್ಭವವನೇ

ಮುನೀನಾಂ ಜ್ಞಾನಾಗ್ನೇರರಣಿರಯಮಙ್ಘಿರ್ವಿಜಯತೇ

॥79॥

ಶ್ಲೋಕ 81

ಸಮಸ್ತೈಃ ಸಂಸೇವ್ಯಃ ಸತತಮಪಿ ಕಾಮಾಕ್ಷಿ ವಿಬುಧೈಃ

ಸ್ತುತೋ ಗನ್ಧರ್ವಸ್ತ್ರೀಸುಲಲಿತವಿಪಞ್ಚೀಕಲರವೈಃ ।

ಭವತ್ಯಾ ಭಿನ್ದಾನೋ ಭವಗಿರಿಕುಲಂ ಜೃಮ್ಭಿತತಮೋ-

ಬಲದ್ರೋಹೀ ಮಾತಶ್ಚರಣಪುರುಹೂತೋ ವಿಜಯತೇ

॥80॥

ಶ್ಲೋಕ 82

ವಸನ್ತಂ ಭಕ್ತಾನಾಮಪಿ ಮನಸಿ ನಿತ್ಯಂ ಪರಿಲಸದ್-

ಘನಚ್ಛಾಯಾಪೂರ್ಣಂ ಶುಚಿಮಪಿ ನೃಣಾಂ ತಾಪಶಮನಮ್ ।

ನಖೇನ್ದುಜ್ಯೋತ್ಸ್ನಾಭಿಃ ಶಿಶಿರಮಪಿ ಪದ್ಮೋದಯಕರಂ

ನಮಾಮಃ ಕಾಮಾಕ್ಷ್ಯಾಶ್ಚರಣಮಧಿಕಾಶ್ಚರ್ಯಕರಣಮ್

॥81॥

ಶ್ಲೋಕ 83

ಕವೀನ್ದ್ರಾಣಾಂ ನಾನಾಭಣಿತಿಗುಣಚಿತ್ರೀಕೃತವಚಃ-

ಪ್ರಪಞ್ಚವ್ಯಾಪಾರಪ್ರಕಟನಕಲಾಕೌಶಲನಿಧಿಃ ।

ಅಧಃಕುರ್ವನ್ನಬ್ಜಂ ಸನಕಭೃಗುಮುಖ್ಯೈರ್ಮುನಿಜನೈಃ

ನಮಸ್ಯಃ ಕಾಮಾಕ್ಷ್ಯಾಶ್ಚರಣಪರಮೇಷ್ಠೀ ವಿಜಯತೇ

॥82॥

ಶ್ಲೋಕ 84

ಭವತ್ಯಾಃ ಕಾಮಾಕ್ಷಿ ಸ್ಫುರಿತಪದಪಙ್ಕೇರುಹಭುವಾಂ

ಪರಾಗಾಣಾಂ ಪೂರೈಃ ಪರಿಹೃತಕಲಙ್ಕವ್ಯತಿಕರೈಃ ।

ನತಾನಾಮಾಮೃಷ್ಟೇ ಹೃದಯಮುಕುರೇ ನಿರ್ಮಲರುಚಿ

ಪ್ರಸನ್ನೇ ನಿಶ್ಶೇಷಂ ಪ್ರತಿಫಲತಿ ವಿಶ್ವಂ ಗಿರಿಸುತೇ

॥83॥

ಶ್ಲೋಕ 85

ತವ ತ್ರಸ್ತಂ ಪಾದಾತ್ಕಿಸಲಯಮರಣ್ಯಾನ್ತರಮಗಾತ್

ಪರಂ ರೇಖಾರೂಪಂ ಕಮಲಮಮುಮೇವಾಶ್ರಿತಮಭೂತ್ ।

ಜಿತಾನಾಂ ಕಾಮಾಕ್ಷಿ ದ್ವಿತಯಮಪಿ ಯುಕ್ತಂ ಪರಿಭವೇ

ವಿದೇಶೇ ವಾಸೋ ವಾ ಶರಣಗಮನಂ ವಾ ನಿಜರಿಪೋಃ

॥84॥

ಶ್ಲೋಕ 86

ಗೃಹೀತ್ವಾ ಯಾಥಾರ್ಥ್ಯಂ ನಿಗಮವಚಸಾಂ ದೇಶಿಕಕೃಪಾ-

ಕಟಾಕ್ಷರ್ಕಜ್ಯೋತಿಶ್ಶಮಿತಮಮತಾಬನ್ಧತಮಸಃ ।

ಯತನ್ತೇ ಕಾಮಾಕ್ಷಿ ಪ್ರತಿದಿವಸಮನ್ತರ್ದ್ರಢಯಿತುಂ

ತ್ವದೀಯಂ ಪಾದಾಬ್ಜಂ ಸುಕೃತಪರಿಪಾಕೇನ ಸುಜನಾಃ

॥85॥

ಶ್ಲೋಕ 87

ಜಡಾನಾಮಪ್ಯಮ್ಬ ಸ್ಮರಣಸಮಯೇ ತವಚ್ಚರಣಯೋಃ

ಭ್ರಮನ್ಮನ್ಥಕ್ಷ್ಮಾಭೃದ್ಧುಮುಘುಮಿತಸಿನ್ಧುಪ್ರತಿಭಟಾಃ ।

ಪ್ರಸನ್ನಾಃ ಕಾಮಾಕ್ಷಿ ಪ್ರಸಭಮಧರಸ್ಪನ್ದನಕರಾ

ಭವನ್ತಿ ಸ್ವಚ್ಛನ್ದಂ ಪ್ರಕೃತಿಪರಿಪಕ್ಕಾ ಭಣಿತಯಃ

॥86॥

ಶ್ಲೋಕ 88

ವಹನ್ನಪ್ಯಶ್ರಾನ್ತಂ ಮಧುರನಿನದಂ ಹಂಸಕಮಸೌ

ತಮೇವಾಧಃ ಕರ್ತುಂ ಕಿಮಿವ ಯತತೇ ಕೇಲಿಗಮನೇ ।

ಭವಸ್ಯೈವಾನನ್ದಂ ವಿದಧದಪಿ ಕಾಮಾಕ್ಷಿ ಚರಣೋ

ಭವತ್ಯಾಸ್ತದ್ದ್ರೋಹಂ ಭಗವತಿ ಕಿಮೇವಂ ವಿತನುತೇ

॥87॥

ಶ್ಲೋಕ 89

ಯದತ್ಯನ್ತಂ ತಾಮ್ಯತ್ಯಲಸಗತಿವಾರ್ತಾಸ್ವಪಿ ಶಿವೇ

ತದೇತತ್ಕಾಮಾಕ್ಷಿ ಪ್ರಕೃತಿಮೃದುಲಂ ತೇ ಪದಯುಗಮ್ ।

ಕಿರೀಟೈಃ ಸಙ್ಘಟ್ಟಂ ಕಥಮಿವ ಸುರೌಘಸ್ಯ ಸಹತೇ

ಮುನೀನ್ದ್ರಾಣಾಮಾಸ್ತೇ ಮನಸಿ ಚ ಕಥಂ ಸೂಚಿನಿಶಿತೇ

॥88॥

ಶ್ಲೋಕ 90

ಮನೋರಙ್ಗೇ ಮತ್ಕೇ ವಿಬುಧಜನಸಮ್ಮೋದಜನನೀ

ಸರಾಗವ್ಯಾಸಙ್ಗಂ ಸರಸಮೃದುಸಞ್ಚಾರಸುಭಗಾ ।

ಮನೋಜ್ಞಾ ಕಾಮಾಕ್ಷಿ ಪ್ರಕಟಯತು ಲಾಸ್ಯಪ್ರಕರಣಂ

ರಣನ್ಮಞ್ಜೀರಾ ತೇ ಚರಣಯುಗಲೀನರ್ತಕವಧೂಃ

॥89॥

ಶ್ಲೋಕ 91

ಪರಿಷ್ಕುರ್ವನ್ಮಾತಃ ಪಶುಪತಿಕಪರ್ದಂ ಚರಣರಾಟ್

ಪರಾಚಾಂ ಹೃತ್ಪದ್ಮಂ ಪರಮಭಣಿತೀನಾಂ ಚ ಮಕುಟಮ್ ।

ಭವಾಖ್ಯೇ ಪಾಥೋಧೌ ಪರಿಹರತು ಕಾಮಾಕ್ಷಿ ಮಮತಾ-

ಪರಾಧೀನತ್ವಂ ಮೇ ಪರಿಮುಷಿತಪಾಥೋಜಮಹಿಮಾ

॥90॥

ಶ್ಲೋಕ 92

ಪ್ರಸೂನೈಃ ಸಮ್ಪರ್ಕಾದಮರತರುಣೀಕುನ್ತಲಭವೈಃ

ಅಭೀಷ್ಟಾನಾಂ ದಾನಾದನಿಶಮಪಿ ಕಾಮಾಕ್ಷಿ ನಮತಾಮ್ ।

ಸ್ವಸಙ್ಗಾತ್ಕಙ್ಕೇಲಿಪ್ರಸವಜನಕತ್ವೇನ ಚ ಶಿವೇ

ತ್ರಿಧಾ ಧತ್ತೇ ವಾರ್ತಾಂ ಸುರಭಿರಿತಿ ಪಾದೋ ಗಿರಿಸುತೇ

॥91॥

ಶ್ಲೋಕ 93

ಮಹಾಮೋಹಸ್ತೇನವ್ಯತಿಕರಭಯಾತ್ಪಾಲಯತಿ ಯೋ

ವಿನಿಕ್ಷಿಪ್ತಂ ಸ್ವಸ್ಮಿನ್ನಿಜಜನಮನೋರತ್ನಮನಿಶಮ್ ।

ಸ ರಾಗಸ್ಯೋದ್ರೇಕಾತ್ಸತತಮಪಿ ಕಾಮಾಕ್ಷಿ ತರಸಾ

ಕಿಮೇವಂ ಪಾದೋಽಸೌ ಕಿಸಲಯರುಚಿಂ ಚೋರಯತಿ ತೇ

॥92॥

ಶ್ಲೋಕ 94

ಸದಾ ಸ್ವಾದುಙ್ಕಾರಂ ವಿಷಯಲಹರೀಶಾಲಿಕಣಿಕಾಂ

ಸಮಾಸ್ವಾದ್ಯ ಶ್ರಾನ್ತಂ ಹೃದಯಶುಕಪೋತಂ ಜನನಿ ಮೇ ।

ಕೃಪಾಜಾಲೇ ಫಾಲೇಕ್ಷಣಮಹಿಷಿ ಕಾಮಾಕ್ಷಿ ರಭಸಾತ್

ಗೃಹೀತ್ವಾ ರುನ್ಧೀಥಾರಸ್ತವ ಪದಯುಗೀಪಞ್ಜರಪುಟೇ

॥93॥

ಶ್ಲೋಕ 95

ಧುನಾನಂ ಕಾಮಾಕ್ಷಿ ಸ್ಮರಣಲವಮಾತ್ರೇಣ ಜಡಿಮ-

ಜ್ವರಪ್ರೌಢಿಂ ಗೂಢಸ್ಥಿತಿ ನಿಗಮನೈಕುಞ್ಜಕುಹರೇ ।

ಅಲಭ್ಯಂ ಸರ್ವೇಷಾಂ ಕತಿಚನ ಲಭನ್ತೇ ಸುಕೃತಿನಃ

ಚಿರಾದನ್ವಿಷ್ಯನ್ತಸ್ತವ ಚರಣಸಿದ್ಧೌಷಧಮಿದಮ್

॥94॥

ಶ್ಲೋಕ 96

ರಣನ್ಮಞ್ಜೀರಾಭ್ಯಾಂ ಲಲಿತಗಮನಾಭ್ಯಾಂ ಸುಕೃತಿನಾಂ

ಮನೋವಾಸ್ತವ್ಯಾಭ್ಯಾಂ ಮಥಿತತಿಮಿರಾಭ್ಯಾಂ ನಖರುಚಾ ।

ನಿಧೇಯಾಭ್ಯಾಂ ಪತ್ಯಾ ನಿಜಶಿರಸಿ ಕಾಮಾಕ್ಷಿ ಸತತಂ

ನಮಸ್ತೇ ಪಾದಾಭ್ಯಾಂ ನಲಿನಮೃದುಲಾಭ್ಯಾಂ ಗಿರಿಸುತೇ

॥95॥

ಶ್ಲೋಕ 97

ಸುರಾಗೇ ರಾಕೇನ್ದುಪ್ರತಿನಿಧಿಮುಖೇ ಪರ್ವತಸುತೇ

ಚಿರಾಲ್ಲಭ್ಯೇ ಭಕ್ತ್ಯಾ ಶಮಧನಜನಾನಾಂ ಪರಿಷದಾ ।

ಮನೋಭೃಙ್ಗೋ ಮತ್ಕಃ ಪದಕಮಲಯುಗ್ಮೇ ಜನನಿ ತೇ

ಪ್ರಕಾಮಂ ಕಾಮಾಕ್ಷಿ ತ್ರಿಪುರಹರವಾಮಾಕ್ಷಿ ರಮತಾಮ್

॥96॥

ಶ್ಲೋಕ 98

ಶಿವೇ ಸಂವಿದ್ರೂಪೇ ಶಶಿಶಕಲಚೂಡಪ್ರಿಯತಮೇ

ಶನೈರ್ಗತ್ಯಾಗತ್ಯಾ ಜಿತಸುರವರೇಭೇ ಗಿರಿಸುತೇ ।

ಯತನ್ತೇ ಸನ್ತಸ್ತೇ ಚರಣನಲಿನಾಲಾನಯುಗಲೇ

ಸದಾ ಬದ್ಧಂ ಚಿತ್ತಪ್ರಮದಕರಿಯೂಥಂ ದೃಢತರಮ್

॥97॥

ಶ್ಲೋಕ 99

ಯಶಃ ಸೂತೇ ಮಾತರ್ಮಧುರಕವಿತಾಂ ಪಕ್ಷ್ಮಲಯತೇ

ಶ್ರಿಯಂ ದತ್ತೇ ಚಿತ್ತೇ ಕಮಪಿ ಪರಿಪಾಕಂ ಪ್ರಥಯತೇ ।

ಸತಾಂ ಪಾಶಗ್ರನ್ಥಿಂ ಶಿಥಿಲಯತಿ ಕಿಂ ಕಿಂ ನ ಕುರುತೇ

ಪ್ರಪನ್ನೇ ಕಾಮಾಕ್ಷ್ಯಾಃ ಪ್ರಣತಿಪರಿಪಾಟೀ ಚರಣಯೋಃ

॥98॥

ಶ್ಲೋಕ 100

ಮನೀಷಾಂ ಮಾಹೇನ್ದ್ರೀಂ ಕಕುಭಮಿವ ತೇ ಕಾಮಪಿ ದಶಾಂ

ಪ್ರಧತ್ತೇ ಕಾಮಾಕ್ಷ್ಯಾಶ್ಚರಣತರುಣಾದಿತ್ಯಕಿರಣಃ ।

ಯದೀಯೇ ಸಮ್ಪರ್ಕೇ ಧೃತರಸಮರನ್ದಾ ಕವಯತಾಂ

ಪರೀಪಾಕಂ ಧತ್ತೇ ಪರಿಮಲವತೀ ಸೂಕ್ತಿನಲಿನೀ

॥99॥

ಶ್ಲೋಕ 101

ಪುರಾ ಮಾರಾರಾತಿಃ ಪುರಮಜಯದಮ್ಬ ಸ್ತವಶತೈಃ

ಪ್ರಸನ್ನಾಯಾಂ ಸತ್ಯಾಂ ತ್ವಯಿ ತುಹಿನಶೈಲೇನ್ದ್ರತನಯೇ ।

ಅತಸ್ತೇ ಕಾಮಾಕ್ಷಿ ಸ್ಫುರತು ತರಸಾ ಕಾಲಸಮಯೇ

ಸಮಾಯಾತೇ ಮಾತರ್ಮಮ ಮನಸಿ ಪಾದಾಬ್ಜಯುಗಲಮ್

॥100॥

ಶ್ಲೋಕ 102

ಪದದ್ವನ್ದ್ವಂ ಮನ್ದಂ ಗತಿಷು ನಿವಸನ್ತಂ ಹೃದಿ ಸತಾಂ

ಗಿರಾಮನ್ತೇ ಭ್ರಾನ್ತಂ ಕೃತಕರಹಿತಾನಾಂ ಪರಿಬೃಢೇ ।

ಜನಾನಾಮಾನನ್ದಂ ಜನನಿ ಜನಯನ್ತಂ ಪ್ರಣಮತಾಂ

ತ್ವದೀಯಂ ಕಾಮಾಕ್ಷಿ ಪ್ರತಿದಿನಮಹಂ ನೌಮಿ ವಿಮಲಮ್

॥101॥

ಶ್ಲೋಕ 103

ಇದಂ ಯಃ ಕಾಮಾಕ್ಷ್ಯಾಶ್ಚರಣನಲಿನಸ್ತೋತ್ರಶತಕಂ

ಜಪೇನ್ನಿತ್ಯಂ ಭಕ್ತ್ಯಾ ನಿಖಿಲಜಗದಾಹ್ಲಾದಜನಕಮ್ ।

ಸ ವಿಶ್ವೇಷಾಂ ವನ್ದ್ಯಃ ಸಕಲಕವಿಲೋಕೈಕತಿಲಕಃ

ಚಿರಂ ಭುಕ್ತ್ವಾ ಭೋಗಾನ್ಪರಿಣಮತಿ ಚಿದ್ರೂಪಕಲಯಾ

॥102॥

ಶ್ಲೋಕ 104

॥ ಇತಿ ಪಾದಾರವಿನ್ದಶತಕಂ ಸಮ್ಪೂರ್ಣಮ್ ॥