Sri Lalitha Trishati Stotram

श्री ललिता त्रिशति स्तोत्रम्

श्लोक 1

अस्य श्रीललिता त्रिशतीस्तोत्र महामन्त्रस्य, भगवान् हयग्रीव ऋषिः, अनुष्टुप् छन्दः, श्रीललितामहात्रिपुरसुन्दरी देवता, ऐं बीजं, सौः शक्तिः, क्लीं कीलकं, मम चतुर्विधपुरुषार्थफलसिद्ध्यर्थे जपे विनियोगः ।

ऐमित्यादिभिरङ्गन्यासकरन्यासाः कार्याः ।

ध्यानम् ।

अतिमधुरचापहस्ता-

-मपरिमितामोदबाणसौभाग्याम् ।

अरुणामतिशयकरुणा-

-मभिनवकुलसुन्दरीं वन्दे ।

श्री हयग्रीव उवाच ।

ककाररूपा कल्याणी कल्याणगुणशालिनी ।

कल्याणशैलनिलया कमनीया कलावती

श्लोक 2

कमलाक्षी कल्मषघ्नी करुणामृतसागरा ।

कदम्बकाननावासा कदम्बकुसुमप्रिया

॥ 1 ॥

श्लोक 3

कन्दर्पविद्या कन्दर्पजनकापाङ्गवीक्षणा ।

कर्पूरवीटिसौरभ्यकल्लोलितककुप्तटा

॥ 2 ॥

श्लोक 4

कलिदोषहरा कञ्जलोचना कम्रविग्रहा ।

कर्मादिसाक्षिणी कारयित्री कर्मफलप्रदा

॥ 3 ॥

श्लोक 5

एकाररूपा चैकाक्षर्येकानेकाक्षराकृतिः ।

एतत्तदित्यनिर्देश्या चैकानन्दचिदाकृतिः

॥ 4 ॥

श्लोक 6

एवमित्यागमाबोध्या चैकभक्तिमदर्चिता ।

एकाग्रचित्तनिर्ध्याता चैषणारहितादृता

॥ 5 ॥

श्लोक 7

एलासुगन्धिचिकुरा चैनःकूटविनाशिनी ।

एकभोगा चैकरसा चैकैश्वर्यप्रदायिनी

॥ 6 ॥

श्लोक 8

एकातपत्रसाम्राज्यप्रदा चैकान्तपूजिता ।

एधमानप्रभा चैजदनेकजगदीश्वरी

॥ 7 ॥

श्लोक 9

एकवीरादिसंसेव्या चैकप्राभवशालिनी ।

ईकाररूपा चेशित्री चेप्सितार्थप्रदायिनी

॥ 8 ॥

श्लोक 10

ईदृगित्यविनिर्देश्या चेश्वरत्वविधायिनी ।

ईशानादिब्रह्ममयी चेशित्वाद्यष्टसिद्धिदा

॥ 9 ॥

श्लोक 11

ईक्षित्रीक्षणसृष्टाण्डकोटिरीश्वरवल्लभा ।

ईडिता चेश्वरार्धाङ्गशरीरेशाधिदेवता

॥ 10 ॥

श्लोक 12

ईश्वरप्रेरणकरी चेशताण्डवसाक्षिणी ।

ईश्वरोत्सङ्गनिलया चेतिबाधाविनाशिनी

॥ 11 ॥

श्लोक 13

ईहाविरहिता चेशशक्तिरीषत्स्मितानना ।

लकाररूपा ललिता लक्ष्मीवाणीनिषेविता

॥ 12 ॥

श्लोक 14

लाकिनी ललनारूपा लसद्दाडिमपाटला ।

ललन्तिकालसत्फाला ललाटनयनार्चिता

॥ 13 ॥

श्लोक 15

लक्षणोज्ज्वलदिव्याङ्गी लक्षकोट्यण्डनायिका ।

लक्ष्यार्था लक्षणागम्या लब्धकामा लतातनुः

॥ 14 ॥

श्लोक 16

ललामराजदलिका लम्बिमुक्तालताञ्चिता ।

लम्बोदरप्रसूर्लभ्या लज्जाढ्या लयवर्जिता

॥ 15 ॥

श्लोक 17

ह्रीं‍काररूपा ह्रीं‍कारनिलया ह्रीं‍पदप्रिया ।

ह्रीं‍कारबीजा ह्रीं‍कारमन्त्रा ह्रीं‍कारलक्षणा

॥ 16 ॥

श्लोक 18

ह्रीं‍कारजपसुप्रीता ह्रीं‍मती ह्रीं‍विभूषणा ।

ह्रीं‍शीला ह्रीं‍पदाराध्या ह्रीं‍गर्भा ह्रीं‍पदाभिधा

॥ 17 ॥

श्लोक 19

ह्रीं‍कारवाच्या ह्रीं‍कारपूज्या ह्रीं‍कारपीठिका ।

ह्रीं‍कारवेद्या ह्रीं‍कारचिन्त्या ह्रीं ह्रीं‍शरीरिणी

॥ 18 ॥

श्लोक 20

हकाररूपा हलधृक्पूजिता हरिणेक्षणा ।

हरप्रिया हराराध्या हरिब्रह्मेन्द्रवन्दिता

॥ 19 ॥

श्लोक 21

हयारूढासेविताङ्घ्रिर्हयमेधसमर्चिता ।

हर्यक्षवाहना हंसवाहना हतदानवा

॥ 20 ॥

श्लोक 22

हत्यादिपापशमनी हरिदश्वादिसेविता ।

हस्तिकुम्भोत्तुङ्गकुचा हस्तिकृत्तिप्रियाङ्गना

॥ 21 ॥

श्लोक 23

हरिद्राकुङ्कुमादिग्धा हर्यश्वाद्यमरार्चिता ।

हरिकेशसखी हादिविद्या हालामदालसा

॥ 22 ॥

श्लोक 24

सकाररूपा सर्वज्ञा सर्वेशी सर्वमङ्गला ।

सर्वकर्त्री सर्वभर्त्री सर्वहन्त्री सनातना

॥ 23 ॥

श्लोक 25

सर्वानवद्या सर्वाङ्गसुन्दरी सर्वसाक्षिणी ।

सर्वात्मिका सर्वसौख्यदात्री सर्वविमोहिनी

॥ 24 ॥

श्लोक 26

सर्वाधारा सर्वगता सर्वावगुणवर्जिता ।

सर्वारुणा सर्वमाता सर्वभूषणभूषिता

॥ 25 ॥

श्लोक 27

ककारार्था कालहन्त्री कामेशी कामितार्थदा ।

कामसञ्जीवनी कल्या कठिनस्तनमण्डला

॥ 26 ॥

श्लोक 28

करभोरूः कलानाथमुखी कचजिताम्बुदा ।

कटाक्षस्यन्दिकरुणा कपालिप्राणनायिका

॥ 27 ॥

श्लोक 29

कारुण्यविग्रहा कान्ता कान्तिधूतजपावलिः ।

कलालापा कम्बुकण्ठी करनिर्जितपल्लवा

॥ 28 ॥

श्लोक 30

कल्पवल्लीसमभुजा कस्तूरीतिलकाञ्चिता ।

हकारार्था हंसगतिर्हाटकाभरणोज्ज्वला

॥ 29 ॥

श्लोक 31

हारहारिकुचाभोगा हाकिनी हल्यवर्जिता ।

हरित्पतिसमाराध्या हठात्कारहतासुरा

॥ 30 ॥

श्लोक 32

हर्षप्रदा हविर्भोक्त्री हार्दसन्तमसापहा ।

हल्लीसलास्यसन्तुष्टा हंसमन्त्रार्थरूपिणी

॥ 31 ॥

श्लोक 33

हानोपादाननिर्मुक्ता हर्षिणी हरिसोदरी ।

हाहाहूहूमुखस्तुत्या हानिवृद्धिविवर्जिता

॥ 32 ॥

श्लोक 34

हय्यङ्गवीनहृदया हरिगोपारुणांशुका ।

लकाराख्या लतापूज्या लयस्थित्युद्भवेश्वरी

॥ 33 ॥

श्लोक 35

लास्यदर्शनसन्तुष्टा लाभालाभविवर्जिता ।

लङ्घ्येतराज्ञा लावण्यशालिनी लघुसिद्धिदा

॥ 34 ॥

श्लोक 36

लाक्षारससवर्णाभा लक्ष्मणाग्रजपूजिता ।

लभ्येतरा लब्धभक्तिसुलभा लाङ्गलायुधा

॥ 35 ॥

श्लोक 37

लग्नचामरहस्तश्रीशारदापरिवीजिता ।

लज्जापदसमाराध्या लम्पटा लकुलेश्वरी

॥ 36 ॥

श्लोक 38

लब्धमाना लब्धरसा लब्धसम्पत्समुन्नतिः ।

ह्रीं‍कारिणी ह्रीं‍काराद्या ह्रीं‍मध्या ह्रीं‍शिखामणिः

॥ 37 ॥

श्लोक 39

ह्रीं‍कारकुण्डाग्निशिखा ह्रीं‍कारशशिचन्द्रिका ।

ह्रीं‍कारभास्कररुचिर्ह्रीं‍काराम्भोदचञ्चला

॥ 38 ॥

श्लोक 40

ह्रीं‍कारकन्दाङ्कुरिका ह्रीं‍कारैकपरायणा ।

ह्रीं‍कारदीर्घिकाहंसी ह्रीं‍कारोद्यानकेकिनी

॥ 39 ॥

श्लोक 41

ह्रीं‍कारारण्यहरिणी ह्रीं‍कारावालवल्लरी ।

ह्रीं‍कारपञ्जरशुकी ह्रीं‍काराङ्गणदीपिका

॥ 40 ॥

श्लोक 42

ह्रीं‍कारकन्दरासिंही ह्रीं‍काराम्भोजभृङ्गिका ।

ह्रीं‍कारसुमनोमाध्वी ह्रीं‍कारतरुमञ्जरी

॥ 41 ॥

श्लोक 43

सकाराख्या समरसा सकलागमसंस्तुता ।

सर्ववेदान्ततात्पर्यभूमिः सदसदाश्रया

॥ 42 ॥

श्लोक 44

सकला सच्चिदानन्दा साध्या सद्गतिदायिनी ।

सनकादिमुनिध्येया सदाशिवकुटुम्बिनी

॥ 43 ॥

श्लोक 45

सकालाधिष्ठानरूपा सत्यरूपा समाकृतिः ।

सर्वप्रपञ्चनिर्मात्री समनाधिकवर्जिता

॥ 44 ॥

श्लोक 46

सर्वोत्तुङ्गा सङ्गहीना सगुणा सकलेष्टदा ।

ककारिणी काव्यलोला कामेश्वरमनोहरा

॥ 45 ॥

श्लोक 47

कामेश्वरप्राणनाडी कामेशोत्सङ्गवासिनी ।

कामेश्वरालिङ्गिताङ्गी कामेश्वरसुखप्रदा

॥ 46 ॥

श्लोक 48

कामेश्वरप्रणयिनी कामेश्वरविलासिनी ।

कामेश्वरतपःसिद्धिः कामेश्वरमनःप्रिया

॥ 47 ॥

श्लोक 49

कामेश्वरप्राणनाथा कामेश्वरविमोहिनी ।

कामेश्वरब्रह्मविद्या कामेश्वरगृहेश्वरी

॥ 48 ॥

श्लोक 50

कामेश्वराह्लादकरी कामेश्वरमहेश्वरी ।

कामेश्वरी कामकोटिनिलया काङ्क्षितार्थदा

॥ 49 ॥

श्लोक 51

लकारिणी लब्धरूपा लब्धधीर्लब्धवाञ्छिता ।

लब्धपापमनोदूरा लब्धाहङ्कारदुर्गमा

॥ 50 ॥

श्लोक 52

लब्धशक्तिर्लब्धदेहा लब्धैश्वर्यसमुन्नतिः ।

लब्धवृद्धिर्लब्धलीला लब्धयौवनशालिनी

॥ 51 ॥

श्लोक 53

लब्धातिशयसर्वाङ्गसौन्दर्या लब्धविभ्रमा ।

लब्धरागा लब्धपतिर्लब्धनानागमस्थितिः

॥ 52 ॥

श्लोक 54

लब्धभोगा लब्धसुखा लब्धहर्षाभिपूरिता ।

ह्रीं‍कारमूर्तिर्ह्रीं‍कारसौधशृङ्गकपोतिका

॥ 53 ॥

श्लोक 55

ह्रीं‍कारदुग्धाब्धिसुधा ह्रीं‍कारकमलेन्दिरा ।

ह्रीं‍कारमणिदीपार्चिर्ह्रीं‍कारतरुशारिका

॥ 54 ॥

श्लोक 56

ह्रीं‍कारपेटकमणिर्ह्रीं‍कारादर्शबिम्बिता ।

ह्रीं‍कारकोशासिलता ह्रीं‍कारास्थाननर्तकी

॥ 55 ॥

श्लोक 57

ह्रीं‍कारशुक्तिकामुक्तामणिर्ह्रीं‍कारबोधिता ।

ह्रीं‍कारमयसौवर्णस्तम्भविद्रुमपुत्रिका

॥ 56 ॥

श्लोक 58

ह्रीं‍कारवेदोपनिषद् ह्रीं‍काराध्वरदक्षिणा ।

ह्रीं‍कारनन्दनारामनवकल्पकवल्लरी

॥ 57 ॥

श्लोक 59

ह्रीं‍कारहिमवद्गङ्गा ह्रीं‍कारार्णवकौस्तुभा ।

ह्रीं‍कारमन्त्रसर्वस्वा ह्रीं‍कारपरसौख्यदा

॥ 58 ॥

श्लोक 60

उत्तरपीठिका (फलशृतिः)

हयग्रीव उवाच ।

इत्येवं ते मयाख्यातं देव्या नामशतत्रयम् ।

रहस्यातिरहस्यत्वाद्गोपनीयं त्वया मुने

॥ 59 ॥

श्लोक 61

शिववर्णानि नामानि श्रीदेव्या कथितानि हि ।

शक्त्यक्षराणि नामानि कामेशकथितानि च

॥ 1 ॥

श्लोक 62

उभयाक्षरनामानि ह्युभाभ्यां कथितानि वै ।

तदन्यैर्ग्रथितं स्तोत्रमेतस्य सदृशं किमु

॥ 2 ॥

श्लोक 63

नानेन सदृशं स्तोत्रं श्रीदेवीप्रीतिदायकम् ।

लोकत्रयेऽपि कल्याणं सम्भवेन्नात्र संशयः

॥ 3 ॥

श्लोक 64

सूत उवाच ।

इति हयमुखगीतं स्तोत्रराजं निशम्य

प्रगलितकलुषोऽभूच्चित्तपर्याप्तिमेत्य ।

निजगुरुमथ नत्वा कुम्भजन्मा तदुक्तं

पुनरधिकरहस्यं ज्ञातुमेवं जगाद

॥ 4 ॥

श्लोक 65

अगस्त्य उवाच ।

अश्वानन महाभाग रहस्यमपि मे वद ।

शिववर्णानि कान्यत्र शक्तिवर्णानि कानि हि

॥ 5 ॥

श्लोक 66

उभयोरपि वर्णानि कानि वा वद देशिक ।

इति पृष्टः कुम्भजेन हयग्रीवोऽवदत्पुनः

॥ 6 ॥

श्लोक 67

हयग्रीव उवाच ।

तव गोप्यं किमस्तीह साक्षादम्बानुशासनात् ।

इदं त्वतिरहस्यं ते वक्ष्यामि शृणु कुम्भज

॥ 7 ॥

श्लोक 68

एतद्विज्ञानमात्रेण श्रीविद्या सिद्धिदा भवेत् ।

कत्रयं हद्वयं चैव शैवो भागः प्रकीर्तितः

॥ 8 ॥

श्लोक 69

शक्त्यक्षराणि शेषाणि ह्रीङ्कार उभयात्मकः ।

एवं विभागमज्ञात्वा ये विद्याजपशालिनः

॥ 9 ॥

श्लोक 70

न तेषां सिद्धिदा विद्या कल्पकोटिशतैरपि ।

चतुर्भिः शिवचक्रैश्च शक्तिचक्रैश्च पञ्चभिः

॥ 10 ॥

श्लोक 71

नवचक्रैश्च संसिद्धं श्रीचक्रं शिवयोर्वपुः ।

त्रिकोणमष्टकोणं च दशकोणद्वयं तथा

॥ 11 ॥

श्लोक 72

चतुर्दशारं चैतानि शक्तिचक्राणि पञ्च च ।

बिन्दुश्चाष्टदलं पद्मं पद्मं षोडशपत्रकम्

॥ 12 ॥

श्लोक 73

चतुरश्रं च चत्वारि शिवचक्राण्यनुक्रमात् ।

त्रिकोणे बैन्दवं श्लिष्टं अष्टारेऽष्टदलाम्बुजम्

॥ 13 ॥

श्लोक 74

दशारयोः षोडशारं भूगृहं भुवनाश्रके ।

शैवानामपि शाक्तानां चक्राणां च परस्परम्

॥ 14 ॥

श्लोक 75

अविनाभावसम्बन्धं यो जानाति स चक्रवित् ।

त्रिकोणरूपिणी शक्तिर्बिन्दुरूपपरः शिवः

॥ 15 ॥

श्लोक 76

अविनाभावसम्बन्धं तस्माद्बिन्दुत्रिकोणयोः ।

एवं विभागमज्ञात्वा श्रीचक्रं यः समर्चयेत्

॥ 16 ॥

श्लोक 77

न तत्फलमवाप्नोति ललिताम्बा न तुष्यति ।

ये च जानन्ति लोकेऽस्मिन् श्रीविद्याचक्रवेदिनः

॥ 17 ॥

श्लोक 78

सामन्यवेदिनः सर्वे विशेषज्ञोऽतिदुर्लभः ।

स्वयंविद्याविशेषज्ञो विशेषज्ञं समर्चयेत्

॥ 18 ॥

श्लोक 79

तस्मै देयं ततो ग्राह्यमशक्तस्तस्य दापयेत् ।

अन्धं तमः प्रविशन्ति येऽविद्यां समुपासते

॥ 19 ॥

श्लोक 80

इति श्रुतिरपाहैतानविद्योपासकान्पुनः ।

विद्यान्योपासकानेव निन्दत्यारुणिकी श्रुतिः

॥ 20 ॥

श्लोक 81

अश्रुता सश्रुतासश्च यज्वानो येऽप्ययज्वनः ।

स्वर्यन्तो नापेक्षन्ते इन्द्रमग्निं च ये विदुः

॥ 21 ॥

श्लोक 82

सिकता इव संयन्ति रश्मिभिः समुदीरिताः ।

अस्माल्लोकादमुष्माच्चेत्याह चारण्यकश्रुतिः

॥ 22 ॥

श्लोक 83

यस्य नो पश्चिमं जन्म यदि वा शङ्करः स्वयम् ।

तेनैव लभ्यते विद्या श्रीमत्पञ्चदशाक्षरी

॥ 23 ॥

श्लोक 84

इति मन्त्रेषु बहुधा विद्याया महिमोच्यते ।

मोक्षैकहेतुविद्या तु श्रीविद्या नात्र संशयः

॥ 24 ॥

श्लोक 85

न शिल्पादिज्ञानयुक्ते विद्वच्छब्धः प्रयुज्यते ।

मोक्षैकहेतुविद्या सा श्रीविद्यैव न संशयः

॥ 25 ॥

श्लोक 86

तस्माद्विद्याविदेवात्र विद्वान्विद्वानितीर्यते ।

स्वयं विद्याविदे दद्यात्ख्यापयेत्तद्गुणान्सुधीः

॥ 26 ॥

श्लोक 87

स्वयंविद्यारहस्यज्ञो विद्यामाहात्म्यवेद्यपि ।

विद्याविदं नार्चयेच्चेत्को वा तं पूजयेज्जनः

॥ 27 ॥

श्लोक 88

प्रसङ्गादिदमुक्तं ते प्रकृतं शृणु कुम्भज ।

यः कीर्तयेत्सकृद्भक्त्या दिव्यनामशतत्रयम्

॥ 28 ॥

श्लोक 89

तस्य पुण्यमहं वक्ष्ये शृणु त्वं कुम्भसम्भव ।

रहस्यनामसाहस्रपाठे यत्फलमीरितम्

॥ 29 ॥

श्लोक 90

तत्फलं कोटिगुणितमेकनामजपाद्भवेत् ।

कामेश्वरीकामेशाभ्यां कृतं नामशतत्रयम्

॥ 30 ॥

श्लोक 91

नान्येन तुलयेदेतत् स्तोत्रेणान्यकृतेन च ।

श्रियः परम्परा यस्य भावि वा चोत्तरोत्तरम्

॥ 31 ॥

श्लोक 92

तेनैव लभ्यते चैतत्पश्चाच्छ्रेयः परीक्षयेत् ।

अस्या नाम्नां त्रिशत्यास्तु महिमा केन वर्ण्यते

॥ 32 ॥

श्लोक 93

या स्वयं शिवयोर्वक्त्रपद्माभ्यां परिनिःसृता ।

नित्यं षोडशसङ्ख्याकान्विप्रानादौ तु भोजयेत्

॥ 33 ॥

श्लोक 94

अभ्यक्तांस्तिलतैलेन स्नातानुष्णेन वारिणा ।

अभ्यर्च्य गन्धपुष्पाद्यैः कामेश्वर्यादिनामभिः

॥ 34 ॥

श्लोक 95

सूपापूपैः शर्कराद्यैः पायसैः फलसंयुतैः ।

विद्याविदो विशेषेण भोजयेत्षोडश द्विजान्

॥ 35 ॥

श्लोक 96

एवं नित्यार्चनं कुर्यादादौ ब्राह्मणभोजनम् ।

त्रिशतीनामभिः पश्चाद्ब्राह्मणान्क्रमशोऽर्चयेत्

॥ 36 ॥

श्लोक 97

तैलाभ्यङ्गादिकं दत्वा विभवे सति भक्तितः ।

शुक्लप्रतिपदारभ्य पौर्णमास्यवधि क्रमात्

॥ 37 ॥

श्लोक 98

दिवसे दिवसे विप्रा भोज्या विंशतिसङ्ख्यया ।

दशभिः पञ्चभिर्वापि त्रिभिरेकेन वा दिनैः

॥ 38 ॥

श्लोक 99

त्रिंशत्षष्टिः शतं विप्राः सम्भोज्यास्त्रिशतं क्रमात् ।

एवं यः कुरुते भक्त्या जन्ममध्ये सकृन्नरः

॥ 39 ॥

श्लोक 100

तस्यैव सफलं जन्म मुक्तिस्तस्य करे स्थिरा ।

रहस्यनामसाहस्रभोजनेऽप्येवमेव हि

॥ 40 ॥

श्लोक 101

आदौ नित्यबलिं कुर्यात्पश्चाद्ब्राह्मणभोजनम् ।

रहस्यनामसाहस्रमहिमा यो मयोदितः

॥ 41 ॥

श्लोक 102

स शीकराणुरत्नैकनाम्नो महिमवारिधेः ।

वाग्देवीरचिते नामसाहस्रे यद्यदीरितम्

॥ 42 ॥

श्लोक 103

तत्फलं कोटिगुणितं नाम्नोऽप्येकस्य कीर्तनात् ।

एतदन्यैर्जपैः स्तोत्रैरर्चनैर्यत्फलं भवेत्

॥ 43 ॥

श्लोक 104

तत्फलं कोटिगुणितं भवेन्नामशतत्रयात् ।

वाग्देवीरचिते स्तोत्रे तादृशो महिमा यदि

॥ 44 ॥

श्लोक 105

साक्षात्कामेशकामेशीकृतेऽस्मिन्गृह्यतामिति ।

सकृत्सङ्कीर्तनादेव नाम्नामस्मिन् शतत्रये

॥ 45 ॥

श्लोक 106

भवेच्चित्तस्य पर्याप्तिर्न्यूनमन्यानपेक्षिणी ।

न ज्ञातव्यमितोऽप्यन्यत्र जप्तव्यं च कुम्भज

॥ 46 ॥

श्लोक 107

यद्यत्साध्यतमं कार्यं तत्तदर्थमिदं जपेत् ।

तत्तत्फलमवाप्नोति पश्चात्कार्यं परीक्षयेत्

॥ 47 ॥

श्लोक 108

ये ये प्रयोगास्तन्त्रेषु तैस्तैर्यत्साध्यते फलम् ।

तत्सर्वं सिध्यति क्षिप्रं नामत्रिशतकीर्तनात्

॥ 48 ॥

श्लोक 109

आयुष्करं पुष्टिकरं पुत्रदं वश्यकारकम् ।

विद्याप्रदं कीर्तिकरं सुकवित्वप्रदायकम्

॥ 49 ॥

श्लोक 110

सर्वसम्पत्प्रदं सर्वभोगदं सर्वसौख्यदम् ।

सर्वाभीष्टप्रदं चैव देव्या नामशतत्रयम्

॥ 50 ॥

श्लोक 111

एतज्जपपरो भूयान्नान्यदिच्छेत्कदाचन ।

एतत्कीर्तनसन्तुष्टा श्रीदेवी ललिताम्बिका

॥ 51 ॥

श्लोक 112

भक्तस्य यद्यदिष्टं स्यात्तत्तत्पूरयते ध्रुवम् ।

तस्मात्कुम्भोद्भव मुने कीर्तय त्वमिदं सदा

॥ 52 ॥

श्लोक 113

नापरं किञ्चिदपि ते बोद्धव्यमवशिष्यते ।

इति ते कथितं स्तोत्रं ललिताप्रीतिदायकम्

॥ 53 ॥

श्लोक 114

नाविद्यावेदिने ब्रूयान्नाभक्ताय कदाचन ।

न शठाय न दुष्टाय नाविश्वासाय कर्हिचित्

॥ 54 ॥

श्लोक 115

यो ब्रूयात्त्रिशतीं नाम्नां तस्यानर्थो महान्भवेत् ।

इत्याज्ञा शाङ्करी प्रोक्ता तस्माद्गोप्यमिदं त्वया

॥ 56 ॥

श्लोक 116

ललिताप्रेरितेनैव मयोक्तं स्तोत्रमुत्तमम् ।

रहस्यनामसाहस्रादपि गोप्यमिदं मुने

॥ 57 ॥

श्लोक 117

सूत उवाच ।

एवमुक्त्वा हयग्रीवः कुम्भजं तापसोत्तमम् ।

स्तोत्रेणानेन ललितां स्तुत्वा त्रिपुरसुन्दरीम् ।

आनन्दलहरीमग्नमानसः समवर्तत

॥ 58 ॥

श्लोक 118

इति ब्रह्माण्डपुराणे उत्तरखण्डे हयग्रीवागस्त्यसंवादे ललितोपाख्याने स्तोत्रखण्डे श्रीललितात्रिशतीस्तोत्ररत्नम् ।