મૂક પઞ્ચ શતિ 2 - પાદારવિન્દ શતકમ્

મૂક પઞ્ચ શતિ 2 - પાદારવિન્દ શતકમ્

શ્લોક 1

મહિમ્નઃ પન્થાનં મદનપરિપન્થિપ્રણયિનિ

પ્રભુર્નિર્ણેતું તે ભવતિ યતમાનોઽપિ કતમઃ ।

તથાપિ શ્રીકાઞ્ચીવિહૃતિરસિકે કોઽપિ મનસો

વિપાકસ્ત્વત્પાદસ્તુતિવિધિષુ જલ્પાકયતિ મામ્

શ્લોક 2

ગલગ્રાહી પૌરન્દરપુરવનીપલ્લવરુચાં

ધૃતપાથમ્યાનામરુણમહસામાદિમગુરુઃ ।

સમિન્ધે બન્ધૂકસ્તબકસહયુધ્વા દિશિ દિશિ

પ્રસર્પન્કામાક્ષ્યાશ્ચરણકિરણાનામરુણિમા

॥1॥

શ્લોક 3

મરાલીનાં યાનાભ્યસનકલનામૂલગુરવે

દરિદ્રાણાં ત્રાણવ્યતિકરસુરોદ્યાનતરવે ।

તમસ્કાણ્ડપ્રૌઢિપ્રકટનતિરસ્કારપટવે

જનોઽયં કામાક્ષ્યાશ્ચરણનલિનાય સ્પૃહયતે

॥2॥

શ્લોક 4

વહન્તી સૈન્દૂરીં સરણિમવનમ્રામરપુર઼ી-

પુરન્ધ્રીસીમન્તે કવિકમલબાલાર્કસુષમા ।

ત્રયીસીમન્તિન્યાઃ સ્તનતટનિચોલારુણપટી

વિભાન્તી કામાક્ષ્યાઃ પદનલિનકાન્તિર્વિજયતે

॥3॥

શ્લોક 5

પ્રણમ્રીભૂતસ્ય પ્રણયકલહત્રસ્તમનસઃ

સ્મરારાતેશ્ચૂડાવિયતિ ગૃહમેધી હિમકરઃ ।

યયોઃ સાન્ધ્યાં કાન્તિં વહતિ સુષમાભિશ્ચરણયોઃ

તયોર્મે કામાક્ષ્યા હૃદયમપતન્દ્રં વિહરતામ્

॥4॥

શ્લોક 6

યયોઃ પીઠાયન્તે વિબુધમુકુટીનાં પટલિકા

યયોઃ સૌધાયન્તે સ્વયમુદયભાજો ભણિતયઃ ।

યયોઃ દાસાયન્તે સરસિજભવાદ્યાશ્ચરણયોઃ

તયોર્મે કામાક્ષ્યા દિનમનુ વરીવર્તુ હૃદયમ્

॥5॥

શ્લોક 7

નયન્તી સઙ્કોચં સરસિજરુચં દિક્પરિસરે

સૃજન્તી લૌહિત્યં નખકિરણચન્દ્રાર્ધખચિતા ।

કવીન્દ્રાણાં હૃત્કૈરવવિકસનોદ્યોગજનની

સ્ફુરન્તી કામાક્ષ્યાઃ ચરણરુચિસન્ધ્યા વિજયતે

॥6॥

શ્લોક 8

વિરાવૈર્માઞ્જીરૈઃ કિમપિ કથયન્તીવ મધુરં

પુરસ્તાદાનમ્રે પુરવિજયિનિ સ્મેરવદને ।

વયસ્યેવ પ્રૌઢા શિથિલયતિ યા પ્રેમકલહ-

પ્રરોહં કામાક્ષ્યાઃ ચરણયુગલી સા વિજયતે

॥7॥

શ્લોક 9

સુપર્વસ્ત્રીલોલાલકપરિચિતં ષટ્પદકુલૈઃ

સ્ફુરલ્લાક્ષારાગં તરુણતરણિજ્યોતિરરુણૈઃ ।

ભૃતં કાન્ત્યમ્ભોભિઃ વિસૃમરમરન્દૈઃ સરસિજૈઃ

વિધત્તે કામાક્ષ્યાઃ ચરણયુગલં બન્ધુપદવીમ્

॥8॥

શ્લોક 10

રજઃસંસર્ગેઽપિ સ્થિતમરજસામેવ હૃદયે

પરં રક્તત્વેન સ્થિતમપિ વિરક્તૈકશરણમ્ ।

અલભ્યં મન્દાનાં દધદપિ સદા મન્દગતિતાં

વિધત્તે કામાક્ષ્યાઃ ચરણયુગમાશ્ચર્યલહરીમ્

॥9॥

શ્લોક 11

જટાલા મઞ્જીરસ્ફુરદરુણરત્નાંશુનિકરૈઃ

નિષિદન્તી મધ્યે નખરુચિઝરીગાઙ્ગપયસામ્ ।

જગત્ત્રાણં કર્તું જનનિ મમ કામાક્ષિ નિયતં

તપશ્ચર્યાં ધત્તે તવ ચરણપાથોજયુગલી

॥10॥

શ્લોક 12

તુલાકોટિદ્વન્દ્વક્કણિતભણિતાભીતિવચસોઃ

વિનમ્રં કામાક્ષી વિસૃમરમહઃપાટલિતયોઃ ।

ક્ષણં વિન્યાસેન ક્ષપિતતમસોર્મે લલિતયોઃ

પુનીયાન્મૂર્ધાનં પુરહરપુરન્ધ્રી ચરણયોઃ

॥11॥

શ્લોક 13

ભવાનિ દ્રુહ્યેતાં ભવનિબિડિતેભ્યો મમ મુહુ-

સ્તમોવ્યામોહેભ્યસ્તવ જનનિ કામાક્ષિ ચરણૌ ।

યયોર્લાક્ષાબિન્દુસ્ફુરણધરણાદ્ધ્વર્જટિજટા-

કુટીરા શોણાઙ્કં વહતિ વપુરેણાઙ્કકલિકા

॥12॥

શ્લોક 14

પવિત્રીકુર્યુર્નુઃ પદતલભુવઃ પાટલરુચઃ

પરાગાસ્તે પાપપ્રશમનધુરીણાઃ પરશિવે ।

કણં લબ્ધું યેષાં નિજશિરસિ કામાક્ષિ વિવશા

વલન્તો વ્યાતન્વન્ત્યહમહમિકાં માધવમુખાઃ

॥13॥

શ્લોક 15

બલાકામાલાભિર્નખરુચિમયીભિઃ પરિવૃતે

વિનમ્રસ્વર્નારીવિકચકચકાલામ્બુદકુલે ।

સ્ફુરન્તઃ કામાક્ષિ સ્ફુટદલિતબન્ધૂકસુહૃદ-

સ્તટિલ્લેખાયન્તે તવ ચરણપાથોજકિરણાઃ

॥14॥

શ્લોક 16

સરાગઃ સદ્વેષઃ પ્રસૃમરસરોજે પ્રતિદિનં

નિસર્ગાદાક્રામન્વિબુધજનમૂર્ધાનમધિકમ્ ।

કથઙ્કારં માતઃ કથય પદપદ્મસ્તવ સતાં

નતાનાં કામાક્ષિ પ્રકટયતિ કૈવલ્યસરણિમ્

॥15॥

શ્લોક 17

જપાલક્ષ્મીશોણો જનિતપરમજ્ઞાનનલિની-

વિકાસવ્યાસઙ્ગો વિફલિતજગજ્જાડ્યગરિમા ।

મનઃપૂર્વાદ્રિં મે તિલકયતુ કામાક્ષિ તરસા

તમસ્કાણ્ડદ્રોહી તવ ચરણપાથોજરમણઃ

॥16॥

શ્લોક 18

નમસ્કુર્મઃ પ્રેઙ્ખન્મણિકટકનીલોત્પલમહઃ-

પયોધૌ રિઙ્ખદ્ભિર્નખકિરણફેનૈર્ધવલિતે ।

સ્ફુટં કુર્વાણાય પ્રબલચલદૌર્વાનલશિખા-

વિતર્કં કામાક્ષ્યાઃ સતતમરુણિમ્ને ચરણયોઃ

॥17॥

શ્લોક 19

શિવે પાશાયેતામલઘુનિ તમઃકૂપકુહરે

દિનાધીશાયેતાં મમ હૃદયપાથોજવિપિને ।

નભોમાસાયેતાં સરસકવિતારીતિસરિતિ

ત્વદીયૌ કામાક્ષિ પ્રસૃતકિરણૌ દેવિ ચરણૌ

॥18॥

શ્લોક 20

નિષક્તં શ્રુત્યન્તે નયનમિવ સદ્વૃત્તરુચિરૈઃ

સમૈર્જુષ્ટં શુદ્ધૈરધરમિવ રમ્યૈર્દ્વિજગણૈઃ ।

શિવે વક્ષોજન્મદ્વિતયમિવ મુક્તાશ્રિતમુમે

ત્વદીયં કામાક્ષિ પ્રણતશરણં નૌમિ ચરણમ્

॥19॥

શ્લોક 21

નમસ્યાસંસજ્જન્નમુચિપરિપન્થિપ્રણયિની-

નિસર્ગપ્રેઙ્ખોલત્કુરલકુલકાલાહિશબલે ।

નખચ્છાયાદુગ્ધોદધિપયસિ તે વૈદ્રુમરુચાં

પ્રચારં કામાક્ષિ પ્રચુરયતિ પાદાબ્જસુષમા

॥20॥

શ્લોક 22

કદા દૂરીકર્તું કટુદુરિતકાકોલજનિતં

મહાન્તં સન્તાપં મદનપરિપન્થિપ્રિયતમે ।

ક્ષણાત્તે કામાક્ષિ ત્રિભુવનપરીતાપહરણે

પટીયાંસં લપ્સ્યે પદકમલસેવામૃતરસમ્

॥21॥

શ્લોક 23

યયોઃ સાન્ધ્યં રોચિઃ સતતમરુણિમ્ને સ્પૃહયતે

યયોશ્ચાન્દ્રી કાન્તિઃ પરિપતતિ દૃષ્ટ્વા નખરુચિમ્ ।

યયોઃ પાકોદ્રેકં પિપઠિષતિ ભક્ત્યા કિસલયં

મ્રદિમ્નઃ કામાક્ષ્યા મનસિ ચરણૌ તૌ તનુમહે

॥22॥

શ્લોક 24

જગન્નેદં નેદં પરમિતિ પરિત્યજ્ય યતિભિઃ

કુશાગ્રીયસ્વાન્તૈઃ કુશલધિષણૈઃ શાસ્ત્રસરણૌ ।

ગવેષ્યં કામાક્ષિ ધ્રુવમકૃતકાનાં ગિરિસુતે

ગિરામૈદમ્પર્યં તવ ચરણપદ્મં વિજયતે

॥23॥

શ્લોક 25

કૃતસ્નાનં શાસ્ત્રામૃતસરસિ કામાક્ષિ નિતરાં

દધાનં વૈશદ્યં કલિતરસમાનન્દસુધયા ।

અલઙ્કારં ભૂમેર્મુનિજનમનશ્ચિન્મયમહા-

પયોધેરન્તસ્સ્થં તવ ચરણરત્નં મૃગયતે

॥24॥

શ્લોક 26

મનોગેહે મોહોદ્ભવતિમિરપૂર્ણે મમ મુહુઃ

દરિદ્રાણીકુર્વન્દિનકરસહસ્રાણિ કિરણૈઃ ।

વિધત્તાં કામાક્ષિ પ્રસૃમરતમોવઞ્ચનચણઃ

ક્ષણાર્ધં સાન્નિધ્યં ચરણમણિદીપો જનનિ તે

॥25॥

શ્લોક 27

કવીનાં ચેતોવન્નખરરુચિસમ્પર્કિ વિબુધ-

સ્રવન્તીસ્રોતોવત્પટુમુખરિતં હંસકરવૈઃ ।

દિનારમ્ભશ્રીવન્નિયતમરુણચ્છાયસુભગં

મદન્તઃ કામાક્ષ્યાઃ સ્ફુરતુ પદપઙ્કેરુહયુગમ્

॥26॥

શ્લોક 28

સદા કિં સમ્પર્કાત્પ્રકૃતિકઠિનૈર્નાકિમુકુટૈઃ

તટૈર્નીહારાદ્રેરધિકમણુના યોગિમનસા ।

વિભિન્તે સમ્મોહં શિશિરયતિ ભક્તાનપિ દૃશામ્

અદૃશ્યં કામાક્ષિ પ્રકટયતિ તે પાદયુગલમ્

॥27॥

શ્લોક 29

પવિત્રાભ્યામમ્બ પ્રકૃતિમૃદુલાભ્યાં તવ શિવે

પદાભ્યાં કામાક્ષિ પ્રસભમભિભૂતૈઃ સચકિતૈઃ ।

પ્રવાલૈરમ્ભોજૈરપિ ચ વનવાસવ્રતદશાઃ

સદૈવારભ્યન્તે પરિચરિતનાનાદ્વિજગણૈઃ

॥28॥

શ્લોક 30

ચિરાદ્દૃશ્યા હંસૈઃ કથમપિ સદા હંસસુલભં

નિરસ્યન્તી જાડ્યં નિયતજડમધ્યૈકશરણમ્ ।

અદોષવ્યાસઙ્ગા સતતમપિ દોષાપ્તિમલિનં

પયોજં કામાક્ષ્યાઃ પરિહસતિ પાદાબ્જયુગલી

॥29॥

શ્લોક 31

સુરાણામાનન્દપ્રબલનતયા મણ્ડનતયા

નખેન્દુજ્યોત્સ્નાભિર્વિસૃમરતમઃખણ્ડનતયા ।

પયોજશ્રીદ્વેષવ્રતરતતયા ત્વચ્ચરણયોઃ

વિલાસઃ કામાક્ષિ પ્રકટયતિ નૈશાકરદશામ્

॥30॥

શ્લોક 32

સિતિમ્ના કાન્તીનાં નખરજનુષાં પાદનલિન-

ચ્છવીનાં શોણિમ્ના તવ જનનિ કામાક્ષિ નમને ।

લભન્તે મન્દારગ્રથિતનવબન્ધૂકકુસુમ-

સ્રજાં સામીચીન્યં સુરપુરપુરન્ધ્રીકચભરાઃ

॥31॥

શ્લોક 33

સ્ફુરન્મધ્યે શુદ્ધે નખકિરણદુગ્ધાબ્ધિપયસાં

વહન્નબ્જં ચક્રં દરમપિ ચ લેખાત્મકતયા ।

શ્રિતો માત્સ્યં રૂપં શ્રિયમપિ દધાનો નિરુપમાં

ત્રિધામા કામાક્ષ્યાઃ પદનલિનનામા વિજયતે

॥32॥

શ્લોક 34

નખશ્રીસન્નદ્ધસ્તબકનિચિતઃ સ્વૈશ્ચ કિરણૈઃ

પિશઙ્ગૈઃ કામાક્ષિ પ્રકટિતલસત્પલ્લવરુચિઃ ।

સતાં ગમ્યઃ શઙ્કે સકલફલદાતા સુરતરુઃ

ત્વદીયઃ પાદોઽયં તુહિનગિરિરાજન્યતનયે

॥33॥

શ્લોક 35

વષટ્કુર્વન્માઞ્જીરકલકલૈઃ કર્મલહરી-

હવીંષિ પ્રૌદ્દણ્ડં જ્વલતિ પરમજ્ઞાનદહને ।

મહીયાન્કામાક્ષિ સ્ફુટમહસિ જોહોતિ સુધિયાં

મનોવેદ્યાં માતસ્તવ ચરણયજ્વા ગિરિસુતે

॥34॥

શ્લોક 36

મહામન્ત્રં કિઞ્ચિન્મણિકટકનાદૈર્મૃદુ જપન્

ક્ષિપન્દિક્ષુ સ્વચ્છં નખરુચિમયં ભાસ્મનરજઃ ।

નતાનાં કામાક્ષિ પ્રકૃતિપટુરચ્ચાટ્ય મમતા-

પિશાચીં પાદોઽયં પ્રકટયતિ તે માન્ત્રિકદશામ્

॥35॥

શ્લોક 37

ઉદીતે બોધેન્દૌ તમસિ નિતરાં જગ્મુષિ દશાં

દરિદ્રાં કામાક્ષિ પ્રકટમનુરાગં વિદધતી ।

સિતેનાચ્છાદ્યાઙ્ગં નખરુચિપટેનાઙ્ઘ્રિયુગલી-

પુરન્ધ્રી તે માતઃ સ્વયમભિસરત્યેવ હૃદયમ્

॥36॥

શ્લોક 38

દિનારમ્ભઃ સમ્પન્નલિનવિપિનાનામભિનવો

વિકાસો વાસન્તઃ સુકવિપિકલોકસ્ય નિયતઃ ।

પ્રદોષઃ કામાક્ષિ પ્રકટપરમજ્ઞાનશશિન-

શ્ચકાસ્તિ ત્વત્પાદસ્મરણમહિમા શૈલતનયે

॥37॥

શ્લોક 39

ધૃતચ્છાયં નિત્યં સરસિરુહમૈત્રીપરિચિતં

નિધાનં દીપ્તીનાં નિખિલજગતાં બોધજનકમ્ ।

મુમુક્ષૂણાં માર્ગપ્રથનપટુ કામાક્ષિ પદવીં

પદં તે પાતઙ્ગીં પરિકલયતે પર્વતસુતે

॥38॥

શ્લોક 40

શનૈસ્તીર્ત્વા મોહામ્બુધિમથ સમારોઢુમનસઃ

ક્રમાત્કૈવલ્યાખ્યાં સુકૃતિસુલભાં સૌધવલભીમ્ ।

લભન્તે નિઃશ્રેણીમિવ ઝટિતિ કામાક્ષિ ચરણં

પુરશ્ચર્યાભિસ્તે પુરમથનસીમન્તિનિ જનાઃ

॥39॥

શ્લોક 41

પ્રચણ્ડાર્તિક્ષોભપ્રમથનકૃતે પ્રાતિભસરિ-

ત્પ્રવાહપ્રોદ્દણ્ડીકરણજલદાય પ્રણમતામ્ ।

પ્રદીપાય પ્રૌઢે ભવતમસિ કામાક્ષિ ચરણ-

પ્રસાદૌન્મુખ્યાય સ્પૃહયતિ જનોઽયં જનનિ તે

॥40॥

શ્લોક 42

મરુદ્ભિઃ સંસેવ્યા સતતમપિ ચાઞ્ચલ્યરહિતા

સદારુણ્યં યાન્તી પરિણતિદરિદ્રાણસુષમા ।

ગુણોત્કર્ષાન્માઞ્જીરકકલકલૈસ્તર્જનપટુઃ

પ્રવાલં કામાક્ષ્યાઃ પરિહસતિ પાદાબ્જયુગલી

॥41॥

શ્લોક 43

જગદ્રક્ષાદક્ષા જલજરુચિશિક્ષાપટુતરા

સમૈર્નમ્યા રમ્યા સતતમભિગમ્યા બુધજનૈઃ ।

દ્વયી લીલાલોલા શ્રુતિષુ સુરપાલાદિમુકુટી-

તટીસીમાધામા તવ જનનિ કામાક્ષિ પદયોઃ

॥42॥

શ્લોક 44

ગિરાં દૂરૌ ચોરૌ જડિમતિમિરાણાં કૃતજગ-

ત્પરિત્રાણૌ શોણૌ મુનિહૃદયલીલૈકનિપુણૌ ।

નખૈઃ સ્મેરૌ સારૌ નિગમવચસાં ખણ્ડિતભવ-

ગ્રહોન્માદૌ પાદૌ તવ જનનિ કામાક્ષિ કલયે

॥43॥

શ્લોક 45

અવિશ્રાન્તં પઙ્કં યદપિ કલયન્યાવકમયં

નિરસ્યન્કામાક્ષિ પ્રણમનજુષાં પઙ્કમખિલમ્ ।

તુલાકોટિદ્વન્દં દધદપિ ચ ગચ્છન્નતુલતાં

ગિરાં માર્ગં પાદો ગિરિવરસુતે લઙ્ઘયતિ તે

॥44॥

શ્લોક 46

પ્રવાલં સવ્રીલં વિપિનવિવરે વેપયતિ યા

સ્ફુરલ્લીલં બાલાતપમધિકબાલં વદતિ યા ।

રુચિં સાન્ધ્યાં વન્ધ્યાં વિરચયતિ યા વર્ધયતુ સા

શિવં મે કામાક્ષ્યાઃ પદનલિનપાટલ્યલહરી

॥45॥

શ્લોક 47

કિરઞ્જ્યોત્સ્નારીતિં નખમુખરુચા હંસમનસાં

વિતન્વાનઃ પ્રીતિં વિકચતરુણામ્ભોરુહરુચિઃ ।

પ્રકાશઃ શ્રીપાદસ્તવ જનનિ કામાક્ષિ તનુતે

શરત્કાલપ્રૌઢિં શશિશકલચૂડપ્રિયતમે

॥46॥

શ્લોક 48

નખાઙ્કૂરસ્મેરદ્યુતિવિમલગઙ્ગામ્ભસિ સુખં

કૃતસ્નાનં જ્ઞાનામૃતમમલમાસ્વાદ્ય નિયતમ્ ।

ઉદઞ્ચન્મઞ્જીરસ્ફુરણમણિદીપે મમ મનો

મનોજ્ઞે કામાક્ષ્યાશ્ચરણમણિહર્મ્યે વિહરતામ્

॥47॥

શ્લોક 49

ભવામ્ભોધૌ નૌકાં જડિમવિપિને પાવકશિખા-

મમર્ત્યેન્દ્રાદીનામધિમુકુટમુત્તંસકલિકામ્ ।

જગત્તાપે જ્યોત્સ્નામકૃતકવચઃપઞ્જરપુટે

શુકસ્ત્રીં કામાક્ષ્યા મનસિ કલયે પાદયુગલીમ્

॥48॥

શ્લોક 50

પરત્મપ્રાકાશ્યપ્રતિફલનચુઞ્ચુઃ પ્રણમતાં

મનોજ્ઞસ્ત્વત્પાદો મણિમુકુરમુદ્રાં કલયતે ।

યદીયાં કામાક્ષિ પ્રકૃતિમસૃણાઃ શોધકદશાં

વિધાતું ચેષ્ઠન્તે બલરિપુવધૂટીકચભરાઃ

॥49॥

શ્લોક 51

અવિશ્રાન્તં તિષ્ઠન્નકૃતકવચઃકન્દરપુટી-

કુટીરાન્તઃ પ્રૌઢં નખરુચિસટાલીં પ્રકટયન્ ।

પ્રચણ્ડં ખણ્ડત્વં નયતુ મમ કામાક્ષિ તરસા

તમોવેતણ્ડેન્દ્રં તવ ચરણકણ્ઠીરવપતિઃ

॥50॥

શ્લોક 52

પુરસ્તાત્કામાક્ષિ પ્રચુરરસમાખણ્ડલપુરી-

પુરન્ધ્રીણાં લાસ્યં તવ લલિતમાલોક્ય શનકૈઃ ।

નખશ્રીભિઃ સ્મેરા બહુ વિતનુતે નૂપુરરવૈ-

શ્ચમત્કૃત્યા શઙ્કે ચરણયુગલી ચાટુરચનાઃ

॥51॥

શ્લોક 53

સરોજં નિન્દન્તી નખકિરણકર્પૂરશિશિરા

નિષિક્તા મારારેર્મુકુટશશિરેખાહિમજલૈઃ ।

સ્ફુરન્તી કામાક્ષિ સ્ફુટરુચિમયે પલ્લવચયે

તવાધત્તે મૈત્રીં પથિકસુદૃશા પાદયુગલી

॥52॥

શ્લોક 54

નતાનાં સમ્પત્તેરનવરતમાકર્ષણજપઃ

પ્રરોહત્સંસારપ્રસરગરિમસ્તમ્ભનજપઃ ।

ત્વદીયઃ કામાક્ષિ સ્મરહરમનોમોહનજપઃ

પટીયાન્નઃ પાયાત્પદનલિનમઞ્જીરનિનદઃ

॥53॥

શ્લોક 55

વિતન્વીથા નાથે મમ શિરસિ કામાક્ષિ કૃપયા

પદામ્ભોજન્યાસં પશુપરિબૃઢપ્રાણદયિતે ।

પિબન્તો યન્મુદ્રાં પ્રકટમુપકમ્પાપરિસરં

દૃશા નાનન્દ્યન્તે નલિનભવનારાયણમુખાઃ

॥54॥

શ્લોક 56

પ્રણામોદ્યદ્બૃન્દારમુકુટમન્દારકલિકા-

વિલોલલ્લોલમ્બપ્રકરમયધૂમપ્રચુરિમા ।

પ્રદીપ્તઃ પાદાબ્જદ્યુતિવિતતિપાટલ્યલહરી-

કૃશાનુઃ કામાક્ષ્યા મમ દહતુ સંસારવિપિનમ્

॥55॥

શ્લોક 57

વલક્ષશ્રીરૃક્ષાધિપશિશુસદૃક્ષૈસ્તવ નખૈઃ

જિઘૃક્ષુર્દક્ષત્વં સરસિરુહભિક્ષુત્વકરણે ।

ક્ષણાન્મે કામાક્ષિ ક્ષપિતભવસઙ્ક્ષોભગરિમા

વચોવૈચક્ષન્યં ચરણયુગલી પક્ષ્મલયતાત્

॥56॥

શ્લોક 58

સમન્તાત્કામાક્ષિ ક્ષતતિમિરસન્તાનસુભગાન્

અનન્તાભિર્ભાભિર્દિનમનુ દિગન્તાન્વિરચયન્ ।

અહન્તાયા હન્તા મમ જડિમદન્તાવલહરિઃ

વિભિન્તાં સન્તાપં તવ ચરણચિન્તામણિરસૌ

॥57॥

શ્લોક 59

દધાનો ભાસ્વત્તામમૃતનિલયો લોહિતવપુઃ

વિનમ્રાણાં સૌમ્યો ગુરુરપિ કવિત્વં ચ કલયન્ ।

ગતૌ મન્દો ગઙ્ગાધરમહિષિ કામાક્ષિ ભજતાં

તમઃકેતુર્માતસ્તવ ચરણપદ્મો વિજયતે

॥58॥

શ્લોક 60

નયન્તીં દાસત્વં નલિનભવમુખ્યાનસુલભ-

પ્રદાનાદ્દીનાનામમરતરુદૌર્ભાગ્યજનનીમ્ ।

જગજ્જન્મક્ષેમક્ષયવિધિષુ કામાક્ષિ પદયો-

ર્ધુરીણામીષ્ટે કરસ્તવ ભણિતુમાહોપુરુષિકામ્

॥59॥

શ્લોક 61

જનોઽયં સન્તપ્તો જનનિ ભવચણ્ડાંશુકિરણૈઃ

અલબ્ધવૈકં શીતં કણમપિ પરજ્ઞાનપયસઃ ।

તમોમાર્ગે પાન્થસ્તવ ઝટિતિ કામાક્ષિ શિશિરાં

પદામ્ભોજચ્છાયાં પરમશિવજાયે મૃગયતે

॥60॥

શ્લોક 62

જયત્યમ્બ શ્રીમન્નખકિરણચીનાંશુકમયં

વિતાનં બિભ્રાણે સુરમુકુટસઙ્ઘટ્ટમસૃણે ।

નિજારુણ્યક્ષૌમાસ્તરણવતિ કામાક્ષિ સુલભા

બુધૈઃ સંવિન્નારી તવ ચરણમાણિક્યભવને

॥61॥

શ્લોક 63

પ્રતીમઃ કામાક્ષિ સ્ફુરિતતરુણાદિત્યકિરણ-

શ્રિયો મૂલદ્રવ્યં તવ ચરણમદ્રીન્દ્રતનયે ।

સુરેન્દ્રાશામાપૂરયતિ યદસૌ ધ્વાન્તમખિલં

ધુનીતે દિગ્ભાગાનપિ ચ મહસા પાટલયતે

॥62॥

શ્લોક 64

મહાભાષ્યવ્યાખ્યાપટુશયનમારોપયતિ વા

સ્મરવ્યાપારેર્ષ્યાપિશુનનિટિલં કારયતિ વા ।

દ્વિરેફાણામધ્યાસયતિ સતતં વાધિવસતિં

પ્રણમ્રાન્કામાક્ષ્યાઃ પદનલિનમાહાત્મ્યગરિમા

॥63॥

શ્લોક 65

વિવેકામ્ભસ્સ્રોતસ્સ્નપનપરિપાટીશિશિરિતે

સમીભૂતે શાસ્ત્રસ્મરણહલસઙ્કર્ષણવશાત્ ।

સતાં ચેતઃક્ષેત્રે વપતિ તવ કામાક્ષિ ચરણો

મહાસંવિત્સસ્યપ્રકરવરબીજં ગિરિસુતે

॥64॥

શ્લોક 66

દધાનો મન્દારસ્તબકપરિપાટીં નખરુચા

વહન્દીપ્તાં શોણાઙ્ગુલિપટલચામ્પેયકલિકામ્ ।

અશોકોલ્લાસં નઃ પ્રચુરયતુ કામાક્ષિ ચરણો

વિકાસી વાસન્તઃ સમય ઇવ તે શર્વદયિતે

॥65॥

શ્લોક 67

નખાંશુપ્રાચુર્યપ્રસૃમરમરાલાલિધવલઃ

સ્ફુરન્મઞ્જીરોદ્યન્મરકતમહશ્શૈવલયુતઃ ।

ભવત્યાઃ કામાક્ષિ સ્ફુટચરણપાટલ્યકપટો

નદઃ શોણાભિખ્યો નગપતિતનૂજે વિજયતે

॥66॥

શ્લોક 68

ધુનાનં પઙ્કૌઘં પરમસુલભં કણ્ટકકુલૈઃ

વિકાસવ્યાસઙ્ગં વિદધદપરાધીનમનિશમ્ ।

નખેન્દુજ્યોત્સ્નાભિર્વિશદરુચિ કામાક્ષિ નિતરામ્

અસામાન્યં મન્યે સરસિજમિદં તે પદયુગમ્

॥67॥

શ્લોક 69

કરીન્દ્રાય દ્રુહ્યત્યલસગતિલીલાસુ વિમલૈઃ

પયોજૈર્માત્સર્યં પ્રકટયતિ કામં કલયતે ।

પદામ્ભોજદ્વન્દ્વં તવ તદપિ કામાક્ષિ હૃદયં

મુનીનાં શાન્તાનાં કથમનિશમસ્મૈ સ્પૃહયતે

॥68॥

શ્લોક 70

નિરસ્તા શોણિમ્ના ચરણકિરણાનાં તવ શિવે

સમિન્ધાના સન્ધ્યારુચિરચલરાજન્યતનયે ।

અસામર્થ્યાદેનં પરિભવિતુમેતત્સમરુચાં

સરોજાનાં જાને મુકુલયતિ શોભાં પ્રતિદિનમ્

॥69॥

શ્લોક 71

ઉપાદિક્ષદ્દાક્ષ્યં તવ ચરણનામા ગુરુરસૌ

મરાલાનાં શઙ્કે મસૃણગતિલાલિત્યસરણૌ ।

અતસ્તે નિસ્તન્દ્રં નિયતમમુના સખ્યપદવીં

પ્રપન્નં પાથોજં પ્રતિ દધતિ કામાક્ષિ કુતુકમ્

॥70॥

શ્લોક 72

દધાનૈઃ સંસર્ગં પ્રકૃતિમલિનૈઃ ષટ્પદકુલૈઃ

દ્વિજાધીશશ્લાઘાવિધિષુ વિદધદ્ભિર્મુકુલતામ્ ।

રજોમિશ્રૈઃ પદ્મૈર્નિયતમપિ કામાક્ષિ પદયોઃ

વિરોધસ્તે યુક્તો વિષમશરવૈરિપ્રિયતમે

॥71॥

શ્લોક 73

કવિત્વશ્રીમિશ્રીકરણનિપુણૌ રક્ષણચણૌ

વિપન્નાનાં શ્રીમન્નલિનમસૃણૌ શોણકિરણૌ ।

મુનીન્દ્રાણામન્તઃકરણશરણૌ મન્દસરણૌ

મનોજ્ઞૌ કામાક્ષ્યા દુરિતહરણૌ નૌમિ ચરણૌ

॥72॥

શ્લોક 74

પરસ્માત્સર્વસ્માદપિ ચ પરયોર્મુક્તિકરયોઃ

નખશ્રીભિર્જ્યોત્સ્નાકલિતતુલયોસ્તામ્રતલયોઃ ।

નિલીયે કામાક્ષ્યા નિગમનુતયોર્નાકિનતયોઃ

નિરસ્તપ્રોન્મીલન્નલિનમદયોરેવ પદયોઃ

॥73॥

શ્લોક 75

સ્વભાવાદન્યોન્યં કિસલયમપીદં તવ પદં

મ્રદિમ્ના શોણિમ્ના ભગવતિ દધાતે સદૃશતામ્ ।

વને પૂર્વસ્યેચ્છા સતતમવને કિં તુ જગતાં

પરસ્યેત્થં ભેદઃ સ્ફુરતિ હૃદિ કામાક્ષિ સુધિયામ્

॥74॥

શ્લોક 76

કથં વાચાલોઽપિ પ્રકટમણિમઞ્જીરનિનદૈઃ

સદૈવાનન્દાર્દ્રાન્વિરચયતિ વાચંયમજનાન્ ।

પ્રકૃત્યા તે શોણચ્છવિરપિ ચ કામાક્ષિ ચરણો

મનીષાનૈર્મલ્યં કથમિવ નૃણાં માંસલયતે

॥75॥

શ્લોક 77

ચલત્તૃષ્ણાવીચીપરિચલનપર્યાકુલતયા

મુહુર્ભ્રાન્તસ્તાન્તઃ પરમશિવવામાક્ષિ પરવાન્ ।

તિતીર્ષુઃ કામાક્ષિ પ્રચુરતરકર્મામ્બુધિમમું

કદાહં લપ્સ્યે તે ચરણમણિસેતું ગિરિસુતે

॥76॥

શ્લોક 78

વિશુષ્યન્ત્યાં પ્રજ્ઞાસરિતિ દુરિતગ્રીષ્મસમય-

પ્રભાવેણ ક્ષીણે સતિ મમ મનઃકેકિનિ શુચા ।

ત્વદીયઃ કામાક્ષિ સ્ફુરિતચરણામ્ભોદમહિમા

નભોમાસાટોપં નગપતિસુતે કિં ન કુરુતે

॥77॥

શ્લોક 79

વિનમ્રાણાં ચેતોભવનવલભીસીમ્નિ ચરણ-

પ્રદીપે પ્રાકાશ્યં દધતિ તવ નિર્ધૂતતમસિ ।

અસીમા કામાક્ષિ સ્વયમલઘુદુષ્કર્મલહરી

વિઘૂર્ણન્તી શાન્તિં શલભપરિપાટીવ ભજતે

॥78॥

શ્લોક 80

વિરાજન્તી શુક્તિર્નખકિરણમુક્તામણિતતેઃ

વિપત્પાથોરાશૌ તરિરપિ નરાણાં પ્રણમતામ્ ।

ત્વદીયઃ કામાક્ષિ ધ્રુવમલઘુવહ્નિર્ભવવને

મુનીનાં જ્ઞાનાગ્નેરરણિરયમઙ્ઘિર્વિજયતે

॥79॥

શ્લોક 81

સમસ્તૈઃ સંસેવ્યઃ સતતમપિ કામાક્ષિ વિબુધૈઃ

સ્તુતો ગન્ધર્વસ્ત્રીસુલલિતવિપઞ્ચીકલરવૈઃ ।

ભવત્યા ભિન્દાનો ભવગિરિકુલં જૃમ્ભિતતમો-

બલદ્રોહી માતશ્ચરણપુરુહૂતો વિજયતે

॥80॥

શ્લોક 82

વસન્તં ભક્તાનામપિ મનસિ નિત્યં પરિલસદ્-

ઘનચ્છાયાપૂર્ણં શુચિમપિ નૃણાં તાપશમનમ્ ।

નખેન્દુજ્યોત્સ્નાભિઃ શિશિરમપિ પદ્મોદયકરં

નમામઃ કામાક્ષ્યાશ્ચરણમધિકાશ્ચર્યકરણમ્

॥81॥

શ્લોક 83

કવીન્દ્રાણાં નાનાભણિતિગુણચિત્રીકૃતવચઃ-

પ્રપઞ્ચવ્યાપારપ્રકટનકલાકૌશલનિધિઃ ।

અધઃકુર્વન્નબ્જં સનકભૃગુમુખ્યૈર્મુનિજનૈઃ

નમસ્યઃ કામાક્ષ્યાશ્ચરણપરમેષ્ઠી વિજયતે

॥82॥

શ્લોક 84

ભવત્યાઃ કામાક્ષિ સ્ફુરિતપદપઙ્કેરુહભુવાં

પરાગાણાં પૂરૈઃ પરિહૃતકલઙ્કવ્યતિકરૈઃ ।

નતાનામામૃષ્ટે હૃદયમુકુરે નિર્મલરુચિ

પ્રસન્ને નિશ્શેષં પ્રતિફલતિ વિશ્વં ગિરિસુતે

॥83॥

શ્લોક 85

તવ ત્રસ્તં પાદાત્કિસલયમરણ્યાન્તરમગાત્

પરં રેખારૂપં કમલમમુમેવાશ્રિતમભૂત્ ।

જિતાનાં કામાક્ષિ દ્વિતયમપિ યુક્તં પરિભવે

વિદેશે વાસો વા શરણગમનં વા નિજરિપોઃ

॥84॥

શ્લોક 86

ગૃહીત્વા યાથાર્થ્યં નિગમવચસાં દેશિકકૃપા-

કટાક્ષર્કજ્યોતિશ્શમિતમમતાબન્ધતમસઃ ।

યતન્તે કામાક્ષિ પ્રતિદિવસમન્તર્દ્રઢયિતું

ત્વદીયં પાદાબ્જં સુકૃતપરિપાકેન સુજનાઃ

॥85॥

શ્લોક 87

જડાનામપ્યમ્બ સ્મરણસમયે તવચ્ચરણયોઃ

ભ્રમન્મન્થક્ષ્માભૃદ્ધુમુઘુમિતસિન્ધુપ્રતિભટાઃ ।

પ્રસન્નાઃ કામાક્ષિ પ્રસભમધરસ્પન્દનકરા

ભવન્તિ સ્વચ્છન્દં પ્રકૃતિપરિપક્કા ભણિતયઃ

॥86॥

શ્લોક 88

વહન્નપ્યશ્રાન્તં મધુરનિનદં હંસકમસૌ

તમેવાધઃ કર્તું કિમિવ યતતે કેલિગમને ।

ભવસ્યૈવાનન્દં વિદધદપિ કામાક્ષિ ચરણો

ભવત્યાસ્તદ્દ્રોહં ભગવતિ કિમેવં વિતનુતે

॥87॥

શ્લોક 89

યદત્યન્તં તામ્યત્યલસગતિવાર્તાસ્વપિ શિવે

તદેતત્કામાક્ષિ પ્રકૃતિમૃદુલં તે પદયુગમ્ ।

કિરીટૈઃ સઙ્ઘટ્ટં કથમિવ સુરૌઘસ્ય સહતે

મુનીન્દ્રાણામાસ્તે મનસિ ચ કથં સૂચિનિશિતે

॥88॥

શ્લોક 90

મનોરઙ્ગે મત્કે વિબુધજનસમ્મોદજનની

સરાગવ્યાસઙ્ગં સરસમૃદુસઞ્ચારસુભગા ।

મનોજ્ઞા કામાક્ષિ પ્રકટયતુ લાસ્યપ્રકરણં

રણન્મઞ્જીરા તે ચરણયુગલીનર્તકવધૂઃ

॥89॥

શ્લોક 91

પરિષ્કુર્વન્માતઃ પશુપતિકપર્દં ચરણરાટ્

પરાચાં હૃત્પદ્મં પરમભણિતીનાં ચ મકુટમ્ ।

ભવાખ્યે પાથોધૌ પરિહરતુ કામાક્ષિ મમતા-

પરાધીનત્વં મે પરિમુષિતપાથોજમહિમા

॥90॥

શ્લોક 92

પ્રસૂનૈઃ સમ્પર્કાદમરતરુણીકુન્તલભવૈઃ

અભીષ્ટાનાં દાનાદનિશમપિ કામાક્ષિ નમતામ્ ।

સ્વસઙ્ગાત્કઙ્કેલિપ્રસવજનકત્વેન ચ શિવે

ત્રિધા ધત્તે વાર્તાં સુરભિરિતિ પાદો ગિરિસુતે

॥91॥

શ્લોક 93

મહામોહસ્તેનવ્યતિકરભયાત્પાલયતિ યો

વિનિક્ષિપ્તં સ્વસ્મિન્નિજજનમનોરત્નમનિશમ્ ।

સ રાગસ્યોદ્રેકાત્સતતમપિ કામાક્ષિ તરસા

કિમેવં પાદોઽસૌ કિસલયરુચિં ચોરયતિ તે

॥92॥

શ્લોક 94

સદા સ્વાદુઙ્કારં વિષયલહરીશાલિકણિકાં

સમાસ્વાદ્ય શ્રાન્તં હૃદયશુકપોતં જનનિ મે ।

કૃપાજાલે ફાલેક્ષણમહિષિ કામાક્ષિ રભસાત્

ગૃહીત્વા રુન્ધીથારસ્તવ પદયુગીપઞ્જરપુટે

॥93॥

શ્લોક 95

ધુનાનં કામાક્ષિ સ્મરણલવમાત્રેણ જડિમ-

જ્વરપ્રૌઢિં ગૂઢસ્થિતિ નિગમનૈકુઞ્જકુહરે ।

અલભ્યં સર્વેષાં કતિચન લભન્તે સુકૃતિનઃ

ચિરાદન્વિષ્યન્તસ્તવ ચરણસિદ્ધૌષધમિદમ્

॥94॥

શ્લોક 96

રણન્મઞ્જીરાભ્યાં લલિતગમનાભ્યાં સુકૃતિનાં

મનોવાસ્તવ્યાભ્યાં મથિતતિમિરાભ્યાં નખરુચા ।

નિધેયાભ્યાં પત્યા નિજશિરસિ કામાક્ષિ સતતં

નમસ્તે પાદાભ્યાં નલિનમૃદુલાભ્યાં ગિરિસુતે

॥95॥

શ્લોક 97

સુરાગે રાકેન્દુપ્રતિનિધિમુખે પર્વતસુતે

ચિરાલ્લભ્યે ભક્ત્યા શમધનજનાનાં પરિષદા ।

મનોભૃઙ્ગો મત્કઃ પદકમલયુગ્મે જનનિ તે

પ્રકામં કામાક્ષિ ત્રિપુરહરવામાક્ષિ રમતામ્

॥96॥

શ્લોક 98

શિવે સંવિદ્રૂપે શશિશકલચૂડપ્રિયતમે

શનૈર્ગત્યાગત્યા જિતસુરવરેભે ગિરિસુતે ।

યતન્તે સન્તસ્તે ચરણનલિનાલાનયુગલે

સદા બદ્ધં ચિત્તપ્રમદકરિયૂથં દૃઢતરમ્

॥97॥

શ્લોક 99

યશઃ સૂતે માતર્મધુરકવિતાં પક્ષ્મલયતે

શ્રિયં દત્તે ચિત્તે કમપિ પરિપાકં પ્રથયતે ।

સતાં પાશગ્રન્થિં શિથિલયતિ કિં કિં ન કુરુતે

પ્રપન્ને કામાક્ષ્યાઃ પ્રણતિપરિપાટી ચરણયોઃ

॥98॥

શ્લોક 100

મનીષાં માહેન્દ્રીં કકુભમિવ તે કામપિ દશાં

પ્રધત્તે કામાક્ષ્યાશ્ચરણતરુણાદિત્યકિરણઃ ।

યદીયે સમ્પર્કે ધૃતરસમરન્દા કવયતાં

પરીપાકં ધત્તે પરિમલવતી સૂક્તિનલિની

॥99॥

શ્લોક 101

પુરા મારારાતિઃ પુરમજયદમ્બ સ્તવશતૈઃ

પ્રસન્નાયાં સત્યાં ત્વયિ તુહિનશૈલેન્દ્રતનયે ।

અતસ્તે કામાક્ષિ સ્ફુરતુ તરસા કાલસમયે

સમાયાતે માતર્મમ મનસિ પાદાબ્જયુગલમ્

॥100॥

શ્લોક 102

પદદ્વન્દ્વં મન્દં ગતિષુ નિવસન્તં હૃદિ સતાં

ગિરામન્તે ભ્રાન્તં કૃતકરહિતાનાં પરિબૃઢે ।

જનાનામાનન્દં જનનિ જનયન્તં પ્રણમતાં

ત્વદીયં કામાક્ષિ પ્રતિદિનમહં નૌમિ વિમલમ્

॥101॥

શ્લોક 103

ઇદં યઃ કામાક્ષ્યાશ્ચરણનલિનસ્તોત્રશતકં

જપેન્નિત્યં ભક્ત્યા નિખિલજગદાહ્લાદજનકમ્ ।

સ વિશ્વેષાં વન્દ્યઃ સકલકવિલોકૈકતિલકઃ

ચિરં ભુક્ત્વા ભોગાન્પરિણમતિ ચિદ્રૂપકલયા

॥102॥

શ્લોક 104

॥ ઇતિ પાદારવિન્દશતકં સમ્પૂર્ણમ્ ॥