ಮೂಕ ಪಞ್ಚ ಶತಿ 1 - ಆರ್ಯ ಶತಕಮ್

ಮೂಕ ಪಞ್ಚ ಶತಿ 1 - ಆರ್ಯ ಶತಕಮ್

ಶ್ಲೋಕ 1

ಕಾರಣಪರಚಿದ್ರೂಪಾ ಕಾಞ್ಚೀಪುರಸೀಮ್ನಿ ಕಾಮಪೀಠಗತಾ ।

ಕಾಚನ ವಿಹರತಿ ಕರುಣಾ ಕಾಶ್ಮೀರಸ್ತಬಕಕೋಮಲಾಙ್ಗಲತಾ

ಶ್ಲೋಕ 2

ಕಞ್ಚನ ಕಾಞ್ಚೀನಿಲಯಂ ಕರಧೃತಕೋದಣ್ಡಬಾಣಸೃಣಿಪಾಶಮ್ ।

ಕಠಿನಸ್ತನಭರನಮ್ರಂ ಕೈವಲ್ಯಾನನ್ದಕನ್ದಮವಲಮ್ಬೇ

॥1॥

ಶ್ಲೋಕ 3

ಚಿನ್ತಿತಫಲಪರಿಪೋಷಣಚಿನ್ತಾಮಣಿರೇವ ಕಾಞ್ಚಿನಿಲಯಾ ಮೇ ।

ಚಿರತರಸುಚರಿತಸುಲಭಾ ಚಿತ್ತಂ ಶಿಶಿರಯತು ಚಿತ್ಸುಖಾಧಾರಾ

॥2॥

ಶ್ಲೋಕ 4

ಕುಟಿಲಕಚಂ ಕಠಿನಕುಚಂ ಕುನ್ದಸ್ಮಿತಕಾನ್ತಿ ಕುಙ್ಕುಮಚ್ಛಾಯಮ್ ।

ಕುರುತೇ ವಿಹೃತಿಂ ಕಾಞ್ಚ್ಯಾಂ ಕುಲಪರ್ವತಸಾರ್ವಭೌಮಸರ್ವಸ್ವಮ್

॥3॥

ಶ್ಲೋಕ 5

ಪಞ್ಚಶರಶಾಸ್ತ್ರಬೋಧನಪರಮಾಚಾರ್ಯೇಣ ದೃಷ್ಟಿಪಾತೇನ ।

ಕಾಞ್ಚೀಸೀಮ್ನಿ ಕುಮಾರೀ ಕಾಚನ ಮೋಹಯತಿ ಕಾಮಜೇತಾರಮ್

॥4॥

ಶ್ಲೋಕ 6

ಪರಯಾ ಕಾಞ್ಚೀಪುರಯಾ ಪರ್ವತಪರ್ಯಾಯಪೀನಕುಚಭರಯಾ ।

ಪರತನ್ತ್ರಾ ವಯಮನಯಾ ಪಙ್ಕಜಸಬ್ರಹ್ಮಚಾರಿಲೋಚನಯಾ

॥5॥

ಶ್ಲೋಕ 7

ಐಶ್ವರ್ಯಮಿನ್ದುಮೌಲೇರೈಕತ್ಮ್ಯಪ್ರಕೃತಿ ಕಾಞ್ಚಿಮಧ್ಯಗತಮ್ ।

ಐನ್ದವಕಿಶೋರಶೇಖರಮೈದಮ್ಪರ್ಯಂ ಚಕಾಸ್ತಿ ನಿಗಮಾನಾಮ್

॥6॥

ಶ್ಲೋಕ 8

ಶ್ರಿತಕಮ್ಪಸೀಮಾನಂ ಶಿಥಿಲಿತಪರಮಶಿವಧೈರ್ಯಮಹಿಮಾನಮ್ ।

ಕಲಯೇ ಪಟಲಿಮಾನಂ ಕಞ್ಚನ ಕಞ್ಚುಕಿತಭುವನಭೂಮಾನಮ್

॥7॥

ಶ್ಲೋಕ 9

ಆದೃತಕಾಞ್ಚೀನಿಲಯಮಾದ್ಯಾಮಾರೂಢಯೌವನಾಟೋಪಾಮ್ ।

ಆಗಮವತಂಸಕಲಿಕಾಮಾನನ್ದಾದ್ವೈತಕನ್ದಲೀಂ ವನ್ದೇ

॥8॥

ಶ್ಲೋಕ 10

ತುಙ್ಗಾಭಿರಾಮಕುಚಭರಶೃಙ್ಗಾರಿತಮಾಶ್ರಯಾಮಿ ಕಾಞ್ಚಿಗತಮ್ ।

ಗಙ್ಗಾಧರಪರತನ್ತ್ರಂ ಶೃಙ್ಗಾರಾದ್ವೈತತನ್ತ್ರಸಿದ್ಧಾನ್ತಮ್

॥9॥

ಶ್ಲೋಕ 11

ಕಾಞ್ಚೀರತ್ನವಿಭೂಷಾಂ ಕಾಮಪಿ ಕನ್ದರ್ಪಸೂತಿಕಾಪಾಙ್ಗೀಮ್ ।

ಪರಮಾಂ ಕಲಾಮುಪಾಸೇ ಪರಶಿವವಾಮಾಙ್ಕಪೀಠಿಕಾಸೀನಾಮ್

॥10॥

ಶ್ಲೋಕ 12

ಕಮ್ಪಾತೀಚರಾಣಾಂ ಕರುಣಾಕೋರಕಿತದೃಷ್ಟಿಪಾತಾನಾಮ್ ।

ಕೇಲೀವನಂ ಮನೋ ಮೇ ಕೇಷಾಞ್ಚಿದ್ಭವತು ಚಿದ್ವಿಲಾಸಾನಾಮ್

॥11॥

ಶ್ಲೋಕ 13

ಆಮ್ರತರುಮೂಲವಸತೇರಾದಿಮಪುರುಷಸ್ಯ ನಯನಪೀಯೂಷಮ್ ।

ಆರಬ್ಧಯೌವನೋತ್ಸವಮಾಮ್ನಾಯರಹಸ್ಯಮನ್ತರವಲಮ್ಬೇ

॥12॥

ಶ್ಲೋಕ 14

ಅಧಿಕಾಞ್ಚಿ ಪರಮಯೋಗಿಭಿರಾದಿಮಪರಪೀಠಸೀಮ್ನಿ ದೃಶ್ಯೇನ ।

ಅನುಬದ್ಧಂ ಮಮ ಮಾನಸಮರುಣಿಮಸರ್ವಸ್ವಸಮ್ಪ್ರದಾಯೇನ

॥13॥

ಶ್ಲೋಕ 15

ಅಙ್ಕಿತಶಙ್ಕರದೇಹಾಮಙ್ಕುರಿತೋರೋಜಕಙ್ಕಣಾಶ್ಲೇಷೈಃ ।

ಅಧಿಕಾಞ್ಚಿ ನಿತ್ಯತರುಣೀಮದ್ರಾಕ್ಷಂ ಕಾಞ್ಚಿದದ್ಭುತಾಂ ಬಾಲಾಮ್

॥14॥

ಶ್ಲೋಕ 16

ಮಧುರಧನುಷಾ ಮಹೀಧರಜನುಷಾ ನನ್ದಾಮಿ ಸುರಭಿಬಾಣಜುಷಾ ।

ಚಿದ್ವಪುಷಾ ಕಾಞ್ಚಿಪುರೇ ಕೇಲಿಜುಷಾ ಬನ್ಧುಜೀವಕಾನ್ತಿಮುಷಾ

॥15॥

ಶ್ಲೋಕ 17

ಮಧುರಸ್ಮಿತೇನ ರಮತೇ ಮಾಂಸಲಕುಚಭಾರಮನ್ದಗಮನೇನ ।

ಮಧ್ಯೇಕಾಞ್ಚಿ ಮನೋ ಮೇ ಮನಸಿಜಸಾಮ್ರಾಜ್ಯಗರ್ವಬೀಜೇನ

॥16॥

ಶ್ಲೋಕ 18

ಧರಣಿಮಯೀಂ ತರಣಿಮಯೀಂ ಪವನಮಯೀಂ ಗಗನದಹನಹೋತೃಮಯೀಮ್ ।

ಅಮ್ಬುಮಯೀಮಿನ್ದುಮಯೀಮಮ್ಬಾಮನುಕಮ್ಪಮಾದಿಮಾಮೀಕ್ಷೇ

॥17॥

ಶ್ಲೋಕ 19

ಲೀನಸ್ಥಿತಿ ಮುನಿಹೃದಯೇ ಧ್ಯಾನಸ್ತಿಮಿತಂ ತಪಸ್ಯದುಪಕಮ್ಪಮ್ ।

ಪೀನಸ್ತನಭರಮೀಡೇ ಮೀನಧ್ವಜತನ್ತ್ರಪರಮತಾತ್ಪರ್ಯಮ್

॥18॥

ಶ್ಲೋಕ 20

ಶ್ವೇತಾ ಮನ್ಥರಹಸಿತೇ ಶಾತಾ ಮಧ್ಯೇ ಚ ವಾಡ್ಭನೋಽತೀತಾ ।

ಶೀತಾ ಲೋಚನಪಾತೇ ಸ್ಫೀತಾ ಕುಚಸೀಮ್ನಿ ಶಾಶ್ವತೀ ಮಾತಾ

॥19॥

ಶ್ಲೋಕ 21

ಪುರತಃ ಕದಾ ನ ಕರವೈ ಪುರವೈರಿವಿಮರ್ದಪುಲಕಿತಾಙ್ಗಲತಾಮ್ ।

ಪುನತೀಂ ಕಾಞ್ಚೀದೇಶಂ ಪುಷ್ಪಾಯುಧವೀರ್ಯಸರಸಪರಿಪಾಟೀಮ್

॥20॥

ಶ್ಲೋಕ 22

ಪುಣ್ಯಾ ಕಾಽಪಿ ಪುರನ್ಧ್ರೀ ಪುಙ್ಖಿತಕನ್ದರ್ಪಸಮ್ಪದಾ ವಪುಷಾ ।

ಪುಲಿನಚರೀ ಕಮ್ಪಾಯಾಃ ಪುರಮಥನಂ ಪುಲಕನಿಚುಲಿತಂ ಕುರುತೇ

॥21॥

ಶ್ಲೋಕ 23

ತನಿಮಾದ್ವೈತವಲಗ್ನಂ ತರುಣಾರುಣಸಮ್ಪ್ರದಾಯತನುಲೇಖಮ್ ।

ತಟಸೀಮನಿ ಕಮ್ಪಾಯಾಸ್ತರುಣಿಮಸರ್ವಸ್ವಮಾದ್ಯಮದ್ರಾಕ್ಷಮ್

॥22॥

ಶ್ಲೋಕ 24

ಪೌಷ್ಟಿಕಕರ್ಮವಿಪಾಕಂ ಪೌಷ್ಪಶರಂ ಸವಿಧಸೀಮ್ನಿ ಕಮ್ಪಾಯಾಃ ।

ಅದ್ರಾಕ್ಷಮಾತ್ತಯೌವನಮಭ್ಯುದಯಂ ಕಞ್ಚಿದರ್ಧಶಶಿಮೌಲೈಃ

॥23॥

ಶ್ಲೋಕ 25

ಸಂಶ್ರಿತಕಾಞ್ಚೀದೇಶೇ ಸರಸಿಜದೌರ್ಭಾಗ್ಯಜಾಗ್ರದುತ್ತಂಸೇ ।

ಸಂವಿನ್ಮಯೇ ವಿಲೀಯೇ ಸಾರಸ್ವತಪುರುಷಕಾರಸಾಮ್ರಾಜ್ಯೇ

॥24॥

ಶ್ಲೋಕ 26

ಮೋದಿತಮಧುಕರವಿಶಿಖಂ ಸ್ವಾದಿಮಸಮುದಾಯಸಾರಕೋದಣ್ಡಮ್ ।

ಆದೃತಕಾಞ್ಚೀಖೇಲನಮಾದಿಮಮಾರುಣ್ಯಭೇದಮಾಕಲಯೇ

॥25॥

ಶ್ಲೋಕ 27

ಉರರೀಕೃತಕಾಞ್ಚಿಪುರೀಮುಪನಿಷದರವಿನ್ದಕುಹರಮಧುಧಾರಾಮ್ ।

ಉನ್ನಮ್ರಸ್ತನಕಲಶೀಮುತ್ಸವಲಹರೀಮುಪಾಸ್ಮಹೇ ಶಮ್ಭೋಃ

॥26॥

ಶ್ಲೋಕ 28

ಏಣಶಿಶುದೀರ್ಘಲೋಚನಮೇನಃಪರಿಪನ್ಥಿ ಸನ್ತತಂ ಭಜತಾಮ್ ।

ಏಕಾಮ್ರನಾಥಜೀವಿತಮೇವಮ್ಪದದೂರಮೇಕಮವಲಮ್ಬೇ

॥27॥

ಶ್ಲೋಕ 29

ಸ್ಮಯಮಾನಮುಖಂ ಕಾಞ್ಚೀಭಯಮಾನಂ ಕಮಪಿ ದೇವತಾಭೇದಮ್ ।

ದಯಮಾನಂ ವೀಕ್ಷ್ಯ ಮುಹುರ್ವಯಮಾನನ್ದಾಮೃತಾಮ್ಬುಧೌ ಮಗ್ನಾಃ

॥28॥

ಶ್ಲೋಕ 30

ಕುತುಕಜುಷಿ ಕಾಞ್ಚಿದೇಶೇ ಕುಮುದತಪೋರಾಶಿಪಾಕಶೇಖರಿತೇ ।

ಕುರುತೇ ಮನೋವಿಹಾರಂ ಕುಲಗಿರಿಪರಿಬೃಢಕುಲೈಕಮಣಿದೀಪೇ

॥29॥

ಶ್ಲೋಕ 31

ವೀಕ್ಷೇಮಹಿ ಕಾಞ್ಚಿಪುರೇ ವಿಪುಲಸ್ತನಕಲಶಗರಿಮಪರವಶಿತಮ್ ।

ವಿದ್ರುಮಸಹಚರದೇಹಂ ವಿಭ್ರಮಸಮವಾಯಸಾರಸನ್ನಾಹಮ್

॥30॥

ಶ್ಲೋಕ 32

ಕುರುವಿನ್ದಗೋತ್ರಗಾತ್ರಂ ಕೂಲಚರಂ ಕಮಪಿ ನೌಮಿ ಕಮ್ಪಾಯಾಃ ।

ಕೂಲಙ್ಕಷಕುಚಕುಮ್ಭಂ ಕುಸುಮಾಯುಧವೀರ್ಯಸಾರಸಂರಮ್ಭಮ್

॥31॥

ಶ್ಲೋಕ 33

ಕುಡೂಮಲಿತಕುಚಕಿಶೋರೈಃ ಕುರ್ವಾಣೈಃ ಕಾಞ್ಚಿದೇಶಸೌಹಾರ್ದಮ್ ।

ಕುಙ್ಕುಮಶೋಣೈರ್ನಿಚಿತಂ ಕುಶಲಪಥಂ ಶಮ್ಭುಸುಕೃತಸಮ್ಭಾರೈಃ

॥32॥

ಶ್ಲೋಕ 34

ಅಙ್ಕಿತಕಚೇನ ಕೇನಚಿದನ್ಧಙ್ಕರಣೌಷಧೇನ ಕಮಲಾನಾಮ್ ।

ಅನ್ತಃಪುರೇಣ ಶಮ್ಭೋರಲಙ್ಕ್ರಿಯಾ ಕಾಽಪಿ ಕಲ್ಪ್ಯತೇ ಕಾಞ್ಚ್ಯಾಮ್

॥33॥

ಶ್ಲೋಕ 35

ಊರೀಕರೋಮಿ ಸನ್ತತಮೂಷ್ಮಲಫಾಲೇನ ಲಲಿತಂ ಪುಂಸಾ ।

ಉಪಕಮ್ಪಮುಚಿತಖೇಲನಮುರ್ವೀಧರವಂಶಸಮ್ಪದುನ್ಮೇಷಮ್

॥34॥

ಶ್ಲೋಕ 36

ಅಙ್ಕುರಿತಸ್ತನಕೋರಕಮಙ್ಕಾಲಙ್ಕಾರಮೇಕಚೂತಪತೇಃ ।

ಆಲೋಕೇಮಹಿ ಕೋಮಲಮಾಗಮಸಂಲಾಪಸಾರಯಾಥಾರ್ಥ್ಯಮ್

॥35॥

ಶ್ಲೋಕ 37

ಪುಞ್ಜಿತಕರುಣಮುದಞ್ಚಿತಶಿಞ್ಜಿತಮಣಿಕಾಞ್ಚಿ ಕಿಮಪಿ ಕಾಞ್ಚಿಪುರೇ ।

ಮಞ್ಜರಿತಮೃದುಲಹಾಸಂ ಪಿಞ್ಜರತನುರುಚಿ ಪಿನಾಕಿಮೂಲಧನಮ್

॥36॥

ಶ್ಲೋಕ 38

ಲೋಲಹೃದಯೋಽಸ್ತಿ ಶಮ್ಭೋರ್ಲೋಚನಯುಗಲೇನ ಲೇಹ್ಯಮಾನಾಯಾಮ್ ।

ಲಲಿತಪರಮಶಿವಾಯಾಂ ಲಾವಣ್ಯಾಮೃತತರಙ್ಗಮಾಲಾಯಾಮ್

॥37॥

ಶ್ಲೋಕ 39

ಮಧುಕರಸಹಚರಚಿಕುರೈರ್ಮದನಾಗಮಸಮಯದೀಕ್ಷಿತಕಟಾಕ್ಷೈಃ ।

ಮಣ್ಡಿತಕಮ್ಪಾತೀರೈರ್ಮಙ್ಗಲಕನ್ದೈರ್ಮಮಾಸ್ತು ಸಾರೂಪ್ಯಮ್

॥38॥

ಶ್ಲೋಕ 40

ವದನಾರವಿನ್ದವಕ್ಷೋವಾಮಾಙ್ಕತಟೀವಶಂವದೀಭೂತಾ ।

ಪೂರುಷತ್ರಿತಯೇ ತ್ರೇಧಾ ಪುರನ್ಧ್ರಿರೂಪಾ ತ್ವಮೇವ ಕಾಮಾಕ್ಷಿ

॥39॥

ಶ್ಲೋಕ 41

ಬಾಧಾಕರೀಂ ಭವಾಬ್ಧೇರಾಧಾರಾದ್ಯಮ್ಬುಜೇಷು ವಿಚರನ್ತೀಮ್ ।

ಆಧಾರೀಕೃತಕಾಞ್ಚೀ ಬೋಧಾಮೃತವೀಚಿಮೇವ ವಿಮೃಶಾಮಃ

॥40॥

ಶ್ಲೋಕ 42

ಕಲಯಾಮ್ಯನ್ತಃ ಶಶಧರಕಲಯಾಽಙ್ಕಿತಮೌಲಿಮಮಲಚಿದ್ವಲಯಾಮ್ ।

ಅಲಯಾಮಾಗಮಪೀಠೀನಿಲಯಾಂ ವಲಯಾಙ್ಕಸುನ್ದರೀಮಮ್ಬಾಮ್

॥41॥

ಶ್ಲೋಕ 43

ಶರ್ವಾದಿಪರಮಸಾಧಕಗುರ್ವಾನೀತಾಯ ಕಾಮಪೀಠಜುಷೇ ।

ಸರ್ವಾಕೃತಯೇ ಶೋಣಿಮಗರ್ವಾಯಾಸ್ಮೈ ಸಮರ್ಪ್ಯತೇ ಹೃದಯಮ್

॥42॥

ಶ್ಲೋಕ 44

ಸಮಯಾ ಸಾನ್ಧ್ಯಮಯೂಖೈಃ ಸಮಯಾ ಬುದ್ಧಯಾ ಸದೈವ ಶೀಲಿತಯಾ ।

ಉಮಯಾ ಕಾಞ್ಚೀರತಯಾ ನ ಮಯಾ ಲಭ್ಯತೇ ಕಿಂ ನು ತಾದಾತ್ಮ್ಯಮ್

॥43॥

ಶ್ಲೋಕ 45

ಜನ್ತೋಸ್ತವ ಪದಪೂಜನಸನ್ತೋಷತರಙ್ಗಿತಸ್ಯ ಕಾಮಾಕ್ಷಿ ।

ವನ್ಧೋ ಯದಿ ಭವತಿ ಪುನಃ ಸಿನ್ಧೋರಮ್ಭಸ್ಸು ಬಮ್ಭ್ರಮೀತಿ ಶಿಲಾ

॥44॥

ಶ್ಲೋಕ 46

ಕುಣ್ಡಲಿ ಕುಮಾರಿ ಕುಟಿಲೇ ಚಣ್ಡಿ ಚರಾಚರಸವಿತ್ರಿ ಚಾಮುಣ್ಡೇ ।

ಗುಣಿನಿ ಗುಹಾರಿಣಿ ಗುಹ್ಯೇ ಗುರುಮೂರ್ತೇ ತ್ವಾಂ ನಮಾಮಿ ಕಾಮಾಕ್ಷಿ

॥45॥

ಶ್ಲೋಕ 47

ಅಭಿದಾಕೃತಿರ್ಭಿದಾಕೃತಿರಚಿದಾಕೃತಿರಪಿ ಚಿದಾಕೃತಿರ್ಮಾತಃ ।

ಅನಹನ್ತಾ ತ್ವಮಹನ್ತಾ ಭ್ರಮಯಸಿ ಕಾಮಾಕ್ಷಿ ಶಾಶ್ವತೀ ವಿಶ್ವಮ್

॥46॥

ಶ್ಲೋಕ 48

ಶಿವ ಶಿವ ಪಶ್ಯನ್ತಿ ಸಮಂ ಶ್ರೀಕಾಮಾಕ್ಷೀಕಟಾಕ್ಷಿತಾಃ ಪುರುಷಾಃ ।

ವಿಪಿನಂ ಭವನಮಮಿತ್ರಂ ಮಿತ್ರಂ ಲೋಷ್ಟಂ ಚ ಯುವತಿಬಿಮ್ಬೋಷ್ಠಮ್

॥47॥

ಶ್ಲೋಕ 49

ಕಾಮಪರಿಪನ್ಥಿಕಾಮಿನಿ ಕಾಮೇಶ್ವರಿ ಕಾಮಪೀಠಮಧ್ಯಗತೇ ।

ಕಾಮದುಘಾ ಭವ ಕಮಲೇ ಕಾಮಕಲೇ ಕಾಮಕೋಟಿ ಕಾಮಾಕ್ಷಿ

॥48॥

ಶ್ಲೋಕ 50

ಮಧ್ಯೇಹೃದಯಂ ಮಧ್ಯೇನಿಟಿಲಂ ಮಧ್ಯೇಶಿರೋಽಪಿ ವಾಸ್ತವ್ಯಾಮ್ ।

ಚಣ್ಡಕರಶಕ್ರಕಾರ್ಮುಕಚನ್ದ್ರಸಮಾಭಾಂ ನಮಾಮಿ ಕಾಮಾಕ್ಷೀಮ್

॥49॥

ಶ್ಲೋಕ 51

ಅಧಿಕಾಞ್ಚಿ ಕೇಲಿಲೋಲೈರಖಿಲಾಗಮಯನ್ತ್ರತನ್ತ್ರಮಯೈಃ ।

ಅತಿಶೀತಂ ಮಮ ಮಾನಸಮಸಮಶರದ್ರೋಹಿಜೀವನೋಪಾಯೈಃ

॥50॥

ಶ್ಲೋಕ 52

ನನ್ದತಿ ಮಮ ಹೃದಿ ಕಾಚನ ಮನ್ದಿರಯನ್ತಾ ನಿರನ್ತರಂ ಕಾಞ್ಚೀಮ್ ।

ಇನ್ದುರವಿಮಣ್ಡಲಕುಚಾ ಬಿನ್ದುವಿಯನ್ನಾದಪರಿಣತಾ ತರುಣೀ

॥51॥

ಶ್ಲೋಕ 53

ಶಮ್ಪಾಲತಾಸವರ್ಣಂ ಸಮ್ಪಾದಯಿತುಂ ಭವಜ್ವರಚಿಕಿತ್ಸಾಮ್ ।

ಲಿಮ್ಪಾಮಿ ಮನಸಿ ಕಿಞ್ಚನ ಕಮ್ಪಾತಟರೋಹಿ ಸಿದ್ಧಭೈಷಜ್ಯಮ್

॥52॥

ಶ್ಲೋಕ 54

ಅನುಮಿತಕುಚಕಾಠಿನ್ಯಾಮಧಿವಕ್ಷಃಪೀಠಮಙ್ಗಜನ್ಮರಿಪೋಃ ।

ಆನನ್ದದಾಂ ಭಜೇ ತಾಮಾನಙ್ಗಬ್ರಹ್ಮತತ್ವಬೋಧಸಿರಾಮ್

॥53॥

ಶ್ಲೋಕ 55

ಐಕ್ಷಿಷಿ ಪಾಶಾಙ್ಕುಶಧರಹಸ್ತಾನ್ತಂ ವಿಸ್ಮಯಾರ್ಹವೃತ್ತಾನ್ತಮ್ ।

ಅಧಿಕಾಞ್ಚಿ ನಿಗಮವಾಚಾಂ ಸಿದ್ಧಾನ್ತಂ ಶೂಲಪಾಣಿಶುದ್ಧಾನ್ತಮ್

॥54॥

ಶ್ಲೋಕ 56

ಆಹಿತವಿಲಾಸಭಙ್ಗೀಮಾಬ್ರಹ್ಮಸ್ತಮ್ಬಶಿಲ್ಪಕಲ್ಪನಯಾ ।

ಆಶ್ರಿತಕಾಞ್ಚೀಮತುಲಾಮಾದ್ಯಾಂ ವಿಸ್ಫೂರ್ತಿಮಾದ್ರಿಯೇ ವಿದ್ಯಾಮ್

॥55॥

ಶ್ಲೋಕ 57

ಮೂಕೋಽಪಿ ಜಟಿಲದುರ್ಗತಿಶೋಕೋಽಪಿ ಸ್ಮರತಿ ಯಃ ಕ್ಷಣಂ ಭವತೀಮ್ ।

ಏಕೋ ಭವತಿ ಸ ಜನ್ತುರ್ಲೋಕೋತ್ತರಕೀರ್ತಿರೇವ ಕಾಮಾಕ್ಷಿ

॥56॥

ಶ್ಲೋಕ 58

ಪಞ್ಚದಶವರ್ಣರೂಪಂ ಕಞ್ಚನ ಕಾಞ್ಚೀವಿಹಾರಧೌರೇಯಮ್ ।

ಪಞ್ಚಶರೀಯಂ ಶಮ್ಭೋರ್ವಞ್ಚನವೈದಗ್ಧ್ಯಮೂಲಮವಲಮ್ಬೇ

॥57॥

ಶ್ಲೋಕ 59

ಪರಿಣತಿಮತೀಂ ಚತುರ್ಧಾ ಪದವೀಂ ಸುಧಿಯಾಂ ಸಮೇತ್ಯ ಸೌಷುಮ್ನೀಮ್ ।

ಪಞ್ಚಾಶದರ್ಣಕಲ್ಪಿತಮದಶಿಲ್ಪಾಂ ತ್ವಾಂ ನಮಾಮಿ ಕಾಮಾಕ್ಷಿ

॥58॥

ಶ್ಲೋಕ 60

ಆದಿಕ್ಷನ್ಮಮ ಗುರುರಾಡಾದಿಕ್ಷಾನ್ತಾಕ್ಷರಾತ್ಮಿಕಾಂ ವಿದ್ಯಾಮ್ ।

ಸ್ವಾದಿಷ್ಠಚಾಪದಣ್ಡಾಂ ನೇದಿಷ್ಠಾಮೇವ ಕಾಮಪೀಠಗತಾಮ್

॥59॥

ಶ್ಲೋಕ 61

ತುಷ್ಯಾಮಿ ಹರ್ಷಿತಸ್ಮರಶಾಸನಯಾ ಕಾಞ್ಚಿಪುರಕೃತಾಸನಯಾ ।

ಸ್ವಾಸನಯಾ ಸಕಲಜಗದ್ಭಾಸನಯಾ ಕಲಿತಶಮ್ಬರಾಸನಯಾ

॥60॥

ಶ್ಲೋಕ 62

ಪ್ರೇಮವತೀ ಕಮ್ಪಾಯಾಂ ಸ್ಥೇಮವತೀ ಯತಿಮನಸ್ಸು ಭೂಮವತೀ ।

ಸಾಮವತೀ ನಿತ್ಯಗಿರಾ ಸೋಮವತೀ ಶಿರಸಿ ಭಾತಿ ಹೈಮವತೀ

॥61॥

ಶ್ಲೋಕ 63

ಕೌತುಕಿನಾ ಕಮ್ಪಾಯಾಂ ಕೌಸುಮಚಾಪೇನ ಕೀಲಿತೇನಾನ್ತಃ ।

ಕುಲದೈವತೇನ ಮಹತಾ ಕುಡ್ಮಲಮುದ್ರಾಂ ಧುನೋತು ನಃಪ್ರತಿಭಾ

॥62॥

ಶ್ಲೋಕ 64

ಯೂನಾ ಕೇನಾಪಿ ಮಿಲದ್ದೇಹಾ ಸ್ವಾಹಾಸಹಾಯತಿಲಕೇನ ।

ಸಹಕಾರಮೂಲದೇಶೇ ಸಂವಿದ್ರೂಪಾ ಕುಟುಮ್ಬಿನೀ ರಮತೇ

॥63॥

ಶ್ಲೋಕ 65

ಕುಸುಮಶರಗರ್ವಸಮ್ಪತ್ಕೋಶಗೃಹಂ ಭಾತಿ ಕಾಞ್ಚಿದೇಶಗತಮ್ ।

ಸ್ಥಾಪಿತಮಸ್ಮಿನ್ಕಥಮಪಿ ಗೋಪಿತಮನ್ತರ್ಮಯಾ ಮನೋರತ್ನಮ್

॥64॥

ಶ್ಲೋಕ 66

ದಗ್ಧಷಡಧ್ವಾರಣ್ಯಂ ದರದಲಿತಕುಸುಮ್ಭಸಮ್ಭೃತಾರುಣ್ಯಮ್ ।

ಕಲಯೇ ನವತಾರುಣ್ಯಂ ಕಮ್ಪಾತಟಸೀಮ್ನಿ ಕಿಮಪಿ ಕಾರುಣ್ಯಮ್

॥65॥

ಶ್ಲೋಕ 67

ಅಧಿಕಾಞ್ಚಿ ವರ್ಧಮಾನಾಮತುಲಾಂ ಕರವಾಣಿ ಪಾರಣಾಮಕ್ಷ್ಣೋಃ ।

ಆನನ್ದಪಾಕಭೇದಾಮರುಣಿಮಪರಿಣಾಮಗರ್ವಪಲ್ಲವಿತಾಮ್

॥66॥

ಶ್ಲೋಕ 68

ಬಾಣಸೃಣಿಪಾಶಕಾರ್ಮುಕಪಾಣಿಮಮುಂ ಕಮಪಿ ಕಾಮಪೀಠಗತಮ್ ।

ಏಣಧರಕೋಣಚೂಡಂ ಶೋಣಿಮಪರಿಪಾಕಭೇದಮಾಕಲಯೇ

॥67॥

ಶ್ಲೋಕ 69

ಕಿಂ ವಾ ಫಲತಿ ಮಮಾನ್ಯೌರ್ಬಿಮ್ಬಾಧರಚುಮ್ಬಿಮನ್ದಹಾಸಮುಖೀ ।

ಸಮ್ಬಾಧಕರೀ ತಮಸಾಮಮ್ಬಾ ಜಾಗರ್ತಿ ಮನಸಿ ಕಾಮಾಕ್ಷೀ

॥68॥

ಶ್ಲೋಕ 70

ಮಞ್ಚೇ ಸದಾಶಿವಮಯೇ ಪರಿಶಿವಮಯಲಲಿತಪೌಷ್ಪಪರ್ಯಙ್ಕೇ ।

ಅಧಿಚಕ್ರಮಧ್ಯಮಾಸ್ತೇ ಕಾಮಾಕ್ಷೀ ನಾಮ ಕಿಮಪಿ ಮಮ ಭಾಗ್ಯಮ್

॥69॥

ಶ್ಲೋಕ 71

ರಕ್ಷ್ಯೋಽಸ್ಮಿ ಕಾಮಪೀಠೀಲಾಸಿಕಯಾ ಘನಕೃಪಾಮ್ಬುರಾಶಿಕಯಾ ।

ಶ್ರುತಿಯುವತಿಕುನ್ತಲೀಮಣಿಮಾಲಿಕಯಾ ತುಹಿನಶೈಲಬಾಲಿಕಯಾ

॥70॥

ಶ್ಲೋಕ 72

ಲೀಯೇ ಪುರಹರಜಾಯೇ ಮಾಯೇ ತವ ತರುಣಪಲ್ಲವಚ್ಛಾಯೇ ।

ಚರಣೇ ಚನ್ದ್ರಾಭರಣೇ ಕಾಞ್ಚೀಶರಣೇ ನತಾರ್ತಿಸಂಹರಣೇ

॥71॥

ಶ್ಲೋಕ 73

ಮೂರ್ತಿಮತಿ ಮುಕ್ತಿಬೀಜೇ ಮೂರ್ಧ್ನಿ ಸ್ತಬಕಿತಚಕೋರಸಾಮ್ರಾಜ್ಯೇ ।

ಮೋದಿತಕಮ್ಪಾಕೂಲೇ ಮುಹುರ್ಮುಹುರ್ಮನಸಿ ಮುಮುದಿಷಾಽಸ್ಮಾಕಮ್

॥72॥

ಶ್ಲೋಕ 74

ವೇದಮಯೀಂ ನಾದಮಯೀಂ ಬಿನ್ದುಮಯೀಂ ಪರಪದೋದ್ಯದಿನ್ದುಮಯೀಮ್ ।

ಮನ್ತ್ರಮಯೀಂ ತನ್ತ್ರಮಯೀಂ ಪ್ರಕೃತಿಮಯೀಂ ನೌಮಿ ವಿಶ್ವವಿಕೃತಿಮಯೀಮ್

॥73॥

ಶ್ಲೋಕ 75

ಪುರಮಥನಪುಣ್ಯಕೋಟೀ ಪುಞ್ಜಿತಕವಿಲೋಕಸೂಕ್ತಿರಸಧಾಟೀ ।

ಮನಸಿ ಮಮ ಕಾಮಕೋಟೀ ವಿಹರತು ಕರುಣಾವಿಪಾಕಪರಿಪಾಟೀ

॥74॥

ಶ್ಲೋಕ 76

ಕುಟಿಲಂ ಚಟುಲಂ ಪೃಥುಲಂ ಮೃದುಲಂ ಕಚನಯನಜಘನಚರಣೇಷು ।

ಅವಲೋಕಿತಮವಲಮ್ಬಿತಮಧಿಕಮ್ಪಾತಟಮಮೇಯಮಸ್ಮಾಭಿಃ

॥75॥

ಶ್ಲೋಕ 77

ಪ್ರತ್ಯಙ್ಮುಖ್ಯಾ ದೃಷ್ಟಯಾ ಪ್ರಸಾದದೀಪಾಙ್ಕುರೇಣ ಕಾಮಾಕ್ಷ್ಯಾಃ ।

ಪಶ್ಯಾಮಿ ನಿಸ್ತುಲಮಹೋ ಪಚೇಲಿಮಂ ಕಮಪಿ ಪರಶಿವೋಲ್ಲಾಸಮ್

॥76॥

ಶ್ಲೋಕ 78

ವಿದ್ಯೇ ವಿಧಾತೃವಿಷಯೇ ಕಾತ್ಯಾಯನಿ ಕಾಲಿ ಕಾಮಕೋಟಿಕಲೇ ।

ಭಾರತಿ ಭೈರವಿ ಭದ್ರೇ ಶಾಕಿನಿ ಶಾಮ್ಭವಿ ಶಿವೇ ಸ್ತುವೇ ಭವತೀಮ್

॥77॥

ಶ್ಲೋಕ 79

ಮಾಲಿನಿ ಮಹೇಶಚಾಲಿನಿ ಕಾಞ್ಚೀಖೇಲಿನಿ ವಿಪಕ್ಷಕಾಲಿನಿ ತೇ ।

ಶೂಲಿನಿ ವಿದ್ರುಮಶಾಲಿನಿ ಸುರಜನಪಾಲಿನಿ ಕಪಾಲಿನಿ ನಮೋಽಸ್ತು

॥78॥

ಶ್ಲೋಕ 80

ದೇಶಿಕ ಇತಿ ಕಿಂ ಶಙ್ಕೇ ತತ್ತಾದೃಕ್ತವ ನು ತರುಣಿಮೋನ್ಮೇಷಃ ।

ಕಾಮಾಕ್ಷಿ ಶೂಲಪಾಣೇಃ ಕಾಮಾಗಮಸಮಯದೀಕ್ಷಾಯಾಮ್

॥79॥

ಶ್ಲೋಕ 81

ವೇತಣ್ಡಕುಮ್ಭಡಮ್ಬರವೈತಣ್ಡಿಕಕುಚಭರಾರ್ತಮಧ್ಯಾಯ ।

ಕುಙ್ಕುಮರುಚೇ ನಮಸ್ಯಾಂ ಶಙ್ಕರನಯನಾಮೃತಾಯ ರಚಯಾಮಃ

॥80॥

ಶ್ಲೋಕ 82

ಅಧಿಕಾಞ್ಚಿತಮಣಿಕಾಞ್ಚನಕಾಞ್ಚೀಮಧಿಕಾಞ್ಚಿ ಕಾಞ್ಚಿದದ್ರಾಕ್ಷಮ್ ।

ಅವನತಜನಾನುಕಮ್ಪಾಮನುಕಮ್ಪಾಕೂಲಮಸ್ಮದನುಕೂಲಾಮ್

॥81॥

ಶ್ಲೋಕ 83

ಪರಿಚಿತಕಮ್ಪಾತೀರಂ ಪರ್ವತರಾಜನ್ಯಸುಕೃತಸನ್ನಾಹಮ್ ।

ಪರಗುರುಕೃಪಯಾ ವೀಕ್ಷೇ ಪರಮಶಿವೋತ್ಸಙ್ಗಮಙ್ಗಲಾಭರಣಮ್

॥82॥

ಶ್ಲೋಕ 84

ದಗ್ಧಮದನಸ್ಯ ಶಮ್ಭೋಃ ಪ್ರಥೀಯಸೀಂ ಬ್ರಹ್ಮಚರ್ಯವೈದಗ್ಧೀಮ್ ।

ತವ ದೇವಿ ತರುಣಿಮಶ್ರೀಚತುರಿಮಪಾಕೋ ನ ಚಕ್ಷಮೇ ಮಾತಃ

॥83॥

ಶ್ಲೋಕ 85

ಮದಜಲತಮಾಲಪತ್ರಾ ವಸನಿತಪತ್ರಾ ಕರಾದೃತಖಾನಿತ್ರಾ ।

ವಿಹರತಿ ಪುಲಿನ್ದಯೋಷಾ ಗುಞ್ಜಾಭೂಷಾ ಫಣೀನ್ದ್ರಕೃತವೇಷಾ

॥84॥

ಶ್ಲೋಕ 86

ಅಙ್ಕೇ ಶುಕಿನೀ ಗೀತೇ ಕೌತುಕಿನೀ ಪರಿಸರೇ ಚ ಗಾಯಕಿನೀ ।

ಜಯಸಿ ಸವಿಧೇಽಮ್ಬ ಭೈರವಮಣ್ಡಲಿನೀ ಶ್ರವಸಿ ಶಙ್ಖಕುನ್ಡಲಿನೀ

॥85॥

ಶ್ಲೋಕ 87

ಪ್ರಣತಜನತಾಪವರ್ಗಾ ಕೃತಬಹುಸರ್ಗಾ ಸಸಿಂಹಸಂಸರ್ಗಾ ।

ಕಾಮಾಕ್ಷಿ ಮುದಿತಭರ್ಗಾ ಹತರಿಪುವರ್ಗಾ ತ್ವಮೇವ ಸಾ ದುರ್ಗಾ

॥86॥

ಶ್ಲೋಕ 88

ಶ್ರವಣಚಲದ್ವೇತಣ್ಡಾ ಸಮರೋದ್ದಣ್ಡಾ ಧುತಾಸುರಶಿಖಣ್ಡಾ ।

ದೇವಿ ಕಲಿತಾನ್ತ್ರಷಣ್ಡಾ ಧೃತನರಮುಣ್ಡಾ ತ್ವಮೇವ ಚಾಮುಣ್ಡಾ

॥87॥

ಶ್ಲೋಕ 89

ಉರ್ವೀಧರೇನ್ದ್ರಕನ್ಯೇ ದರ್ವೀಭರಿತೇನ ಭಕ್ತಪೂರೇಣ ।

ಗುರ್ವೀಮಕಿಞ್ಚನಾರ್ತಿ ಖರ್ವೀಕುರುಷೇ ತ್ವಮೇವ ಕಾಮಾಕ್ಷಿ

॥88॥

ಶ್ಲೋಕ 90

ತಾಡಿತರಿಪುಪರಿಪೀಡನಭಯಹರಣ ನಿಪುಣಹಲಮುಸಲಾ ।

ಕ್ರೋಡಪತಿಭೀಷಣಮುಖೀ ಕ್ರೀಡಸಿ ಜಗತಿ ತ್ವಮೇವ ಕಾಮಾಕ್ಷಿ

॥89॥

ಶ್ಲೋಕ 91

ಸ್ಮರಮಥನವರಣಲೋಲಾ ಮನ್ಮಥಹೇಲಾವಿಲಾಸಮಣಿಶಾಲಾ ।

ಕನಕರುಚಿಚೌರ್ಯಶೀಲಾ ತ್ವಮಮ್ಬ ಬಾಲಾ ಕರಾಬ್ಜಧೃತಮಾಲಾ

॥90॥

ಶ್ಲೋಕ 92

ವಿಮಲಪಟೀ ಕಮಲಕುಟೀ ಪುಸ್ತಕರುದ್ರಾಕ್ಷಶಸ್ತಹಸ್ತಪುಟೀ ।

ಕಾಮಾಕ್ಷಿ ಪಕ್ಷ್ಮಲಾಕ್ಷೀ ಕಲಿತವಿಪಞ್ಚೀ ವಿಭಾಸಿ ವೈರಿಞ್ಚೀ

॥91॥

ಶ್ಲೋಕ 93

ಕುಙ್ಕುಮರುಚಿಪಿಙ್ಗಮಸೃಕ್ಪಙ್ಕಿಲಮುಣ್ಡಾಲಿಮಣ್ಡಿತಂ ಮಾತಃ ।

ಶ್ರೀಕಾಮಾಕ್ಷಿ ತದೀಯಸಙ್ಗಮಕಲಾಮನ್ದೀಭವತ್ಕೌತುಕಃ

ಜಯತಿ ತವ ರೂಪಧೇಯಂ ಜಪಪಟಪುಸ್ತಕವರಾಭಯಕರಾಬ್ಜಮ್

॥92॥

ಶ್ಲೋಕ 94

ಕನಕಮಣಿಕಲಿತಭೂಷಾಂ ಕಾಲಾಯಸಕಲಹಶೀಲಕಾನ್ತಿಕಲಾಮ್ ।

ಕಾಮಾಕ್ಷಿ ಶೀಲಯೇ ತ್ವಾಂ ಕಪಾಲಶೂಲಾಭಿರಾಮಕರಕಮಲಾಮ್

॥93॥

ಶ್ಲೋಕ 95

ಲೋಹಿತಿಮಪುಞ್ಜಮಧ್ಯೇ ಮೋಹಿತಭುವನೇ ಮುದಾ ನಿರೀಕ್ಷನ್ತೇ ।

ವದನಂ ತವ ಕುವಯುಗಲಂ ಕಾಞ್ಚೀಸೀಮಾಂ ಚ ಕೇಽಪಿ ಕಾಮಾಕ್ಷಿ

॥94॥

ಶ್ಲೋಕ 96

ಜಲಧಿದ್ವಿಗುಣಿತಹುತಬಹದಿಶಾದಿನೇಶ್ವರಕಲಾಶ್ವಿನೇಯದಲೈಃ ।

ನಲಿನೈರ್ಮಹೇಶಿ ಗಚ್ಛಸಿ ಸರ್ವೋತ್ತರಕರಕಮಲದಲಮಮಲಮ್

॥95॥

ಶ್ಲೋಕ 97

ಸತ್ಕೃತದೇಶಿಕಚರಣಾಃ ಸಬೀಜನಿರ್ಬೀಜಯೋಗನಿಶ್ರೇಣ್ಯಾ ।

ಅಪವರ್ಗಸೌಧವಲಭೀಮಾರೋಹನ್ತ್ಯಮ್ಬ ಕೇಽಪಿ ತವ ಕೃಪಯಾ

॥96॥

ಶ್ಲೋಕ 98

ಅನ್ತರಪಿ ಬಹಿರಪಿ ತ್ವಂ ಜನ್ತುತತೇರನ್ತಕಾನ್ತಕೃದಹನ್ತೇ ।

ಚಿನ್ತಿತಸನ್ತಾನವತಾಂ ಸನ್ತತಮಪಿ ತನ್ತನೀಷಿ ಮಹಿಮಾನಮ್

॥97॥

ಶ್ಲೋಕ 99

ಕಲಮಞ್ಜುಲವಾಗನುಮಿತಗಲಪಞ್ಜರಗತಶುಕಗ್ರಹೌತ್ಕಣ್ಠ್ಯಾತ್ ।

ಅಮ್ಬ ರದನಾಮ್ಬರಂ ತೇ ಬಿಮ್ಬಫಲಂ ಶಮ್ಬರಾರಿಣಾ ನ್ಯಸ್ತಮ್

॥98॥

ಶ್ಲೋಕ 100

ಜಯ ಜಯ ಜಗದಮ್ಬ ಶಿವೇ ಜಯ ಜಯ ಕಾಮಾಕ್ಷಿ ಜಯ ಜಯಾದ್ರಿಸುತೇ ।

ಜಯ ಜಯ ಮಹೇಶದಯಿತೇ ಜಯ ಜಯ ಚಿದ್ಗಗನಕೌಮುದೀಧಾರೇ

॥99॥

ಶ್ಲೋಕ 101

ಆರ್ಯಾಶತಕಂ ಭಕ್ತ್ಯಾ ಪಠತಾಮಾರ್ಯಾಕಟಾಕ್ಷೇಣ ।

ನಿಸ್ಸರತಿ ವದನಕಮಲಾದ್ವಾಣೀ ಪೀಯೂಷಧೋರಣೀ ದಿವ್ಯಾ

॥100॥

ಶ್ಲೋಕ 102

॥ ಇತಿ ಆರ್ಯಾಶತಕಂ ಸಮ್ಪೂರ್ಣಮ್ ॥