મૂક પઞ્ચ શતિ 1 - આર્ય શતકમ્

મૂક પઞ્ચ શતિ 1 - આર્ય શતકમ્

શ્લોક 1

કારણપરચિદ્રૂપા કાઞ્ચીપુરસીમ્નિ કામપીઠગતા ।

કાચન વિહરતિ કરુણા કાશ્મીરસ્તબકકોમલાઙ્ગલતા

શ્લોક 2

કઞ્ચન કાઞ્ચીનિલયં કરધૃતકોદણ્ડબાણસૃણિપાશમ્ ।

કઠિનસ્તનભરનમ્રં કૈવલ્યાનન્દકન્દમવલમ્બે

॥1॥

શ્લોક 3

ચિન્તિતફલપરિપોષણચિન્તામણિરેવ કાઞ્ચિનિલયા મે ।

ચિરતરસુચરિતસુલભા ચિત્તં શિશિરયતુ ચિત્સુખાધારા

॥2॥

શ્લોક 4

કુટિલકચં કઠિનકુચં કુન્દસ્મિતકાન્તિ કુઙ્કુમચ્છાયમ્ ।

કુરુતે વિહૃતિં કાઞ્ચ્યાં કુલપર્વતસાર્વભૌમસર્વસ્વમ્

॥3॥

શ્લોક 5

પઞ્ચશરશાસ્ત્રબોધનપરમાચાર્યેણ દૃષ્ટિપાતેન ।

કાઞ્ચીસીમ્નિ કુમારી કાચન મોહયતિ કામજેતારમ્

॥4॥

શ્લોક 6

પરયા કાઞ્ચીપુરયા પર્વતપર્યાયપીનકુચભરયા ।

પરતન્ત્રા વયમનયા પઙ્કજસબ્રહ્મચારિલોચનયા

॥5॥

શ્લોક 7

ઐશ્વર્યમિન્દુમૌલેરૈકત્મ્યપ્રકૃતિ કાઞ્ચિમધ્યગતમ્ ।

ઐન્દવકિશોરશેખરમૈદમ્પર્યં ચકાસ્તિ નિગમાનામ્

॥6॥

શ્લોક 8

શ્રિતકમ્પસીમાનં શિથિલિતપરમશિવધૈર્યમહિમાનમ્ ।

કલયે પટલિમાનં કઞ્ચન કઞ્ચુકિતભુવનભૂમાનમ્

॥7॥

શ્લોક 9

આદૃતકાઞ્ચીનિલયમાદ્યામારૂઢયૌવનાટોપામ્ ।

આગમવતંસકલિકામાનન્દાદ્વૈતકન્દલીં વન્દે

॥8॥

શ્લોક 10

તુઙ્ગાભિરામકુચભરશૃઙ્ગારિતમાશ્રયામિ કાઞ્ચિગતમ્ ।

ગઙ્ગાધરપરતન્ત્રં શૃઙ્ગારાદ્વૈતતન્ત્રસિદ્ધાન્તમ્

॥9॥

શ્લોક 11

કાઞ્ચીરત્નવિભૂષાં કામપિ કન્દર્પસૂતિકાપાઙ્ગીમ્ ।

પરમાં કલામુપાસે પરશિવવામાઙ્કપીઠિકાસીનામ્

॥10॥

શ્લોક 12

કમ્પાતીચરાણાં કરુણાકોરકિતદૃષ્ટિપાતાનામ્ ।

કેલીવનં મનો મે કેષાઞ્ચિદ્ભવતુ ચિદ્વિલાસાનામ્

॥11॥

શ્લોક 13

આમ્રતરુમૂલવસતેરાદિમપુરુષસ્ય નયનપીયૂષમ્ ।

આરબ્ધયૌવનોત્સવમામ્નાયરહસ્યમન્તરવલમ્બે

॥12॥

શ્લોક 14

અધિકાઞ્ચિ પરમયોગિભિરાદિમપરપીઠસીમ્નિ દૃશ્યેન ।

અનુબદ્ધં મમ માનસમરુણિમસર્વસ્વસમ્પ્રદાયેન

॥13॥

શ્લોક 15

અઙ્કિતશઙ્કરદેહામઙ્કુરિતોરોજકઙ્કણાશ્લેષૈઃ ।

અધિકાઞ્ચિ નિત્યતરુણીમદ્રાક્ષં કાઞ્ચિદદ્ભુતાં બાલામ્

॥14॥

શ્લોક 16

મધુરધનુષા મહીધરજનુષા નન્દામિ સુરભિબાણજુષા ।

ચિદ્વપુષા કાઞ્ચિપુરે કેલિજુષા બન્ધુજીવકાન્તિમુષા

॥15॥

શ્લોક 17

મધુરસ્મિતેન રમતે માંસલકુચભારમન્દગમનેન ।

મધ્યેકાઞ્ચિ મનો મે મનસિજસામ્રાજ્યગર્વબીજેન

॥16॥

શ્લોક 18

ધરણિમયીં તરણિમયીં પવનમયીં ગગનદહનહોતૃમયીમ્ ।

અમ્બુમયીમિન્દુમયીમમ્બામનુકમ્પમાદિમામીક્ષે

॥17॥

શ્લોક 19

લીનસ્થિતિ મુનિહૃદયે ધ્યાનસ્તિમિતં તપસ્યદુપકમ્પમ્ ।

પીનસ્તનભરમીડે મીનધ્વજતન્ત્રપરમતાત્પર્યમ્

॥18॥

શ્લોક 20

શ્વેતા મન્થરહસિતે શાતા મધ્યે ચ વાડ્ભનોઽતીતા ।

શીતા લોચનપાતે સ્ફીતા કુચસીમ્નિ શાશ્વતી માતા

॥19॥

શ્લોક 21

પુરતઃ કદા ન કરવૈ પુરવૈરિવિમર્દપુલકિતાઙ્ગલતામ્ ।

પુનતીં કાઞ્ચીદેશં પુષ્પાયુધવીર્યસરસપરિપાટીમ્

॥20॥

શ્લોક 22

પુણ્યા કાઽપિ પુરન્ધ્રી પુઙ્ખિતકન્દર્પસમ્પદા વપુષા ।

પુલિનચરી કમ્પાયાઃ પુરમથનં પુલકનિચુલિતં કુરુતે

॥21॥

શ્લોક 23

તનિમાદ્વૈતવલગ્નં તરુણારુણસમ્પ્રદાયતનુલેખમ્ ।

તટસીમનિ કમ્પાયાસ્તરુણિમસર્વસ્વમાદ્યમદ્રાક્ષમ્

॥22॥

શ્લોક 24

પૌષ્ટિકકર્મવિપાકં પૌષ્પશરં સવિધસીમ્નિ કમ્પાયાઃ ।

અદ્રાક્ષમાત્તયૌવનમભ્યુદયં કઞ્ચિદર્ધશશિમૌલૈઃ

॥23॥

શ્લોક 25

સંશ્રિતકાઞ્ચીદેશે સરસિજદૌર્ભાગ્યજાગ્રદુત્તંસે ।

સંવિન્મયે વિલીયે સારસ્વતપુરુષકારસામ્રાજ્યે

॥24॥

શ્લોક 26

મોદિતમધુકરવિશિખં સ્વાદિમસમુદાયસારકોદણ્ડમ્ ।

આદૃતકાઞ્ચીખેલનમાદિમમારુણ્યભેદમાકલયે

॥25॥

શ્લોક 27

ઉરરીકૃતકાઞ્ચિપુરીમુપનિષદરવિન્દકુહરમધુધારામ્ ।

ઉન્નમ્રસ્તનકલશીમુત્સવલહરીમુપાસ્મહે શમ્ભોઃ

॥26॥

શ્લોક 28

એણશિશુદીર્ઘલોચનમેનઃપરિપન્થિ સન્તતં ભજતામ્ ।

એકામ્રનાથજીવિતમેવમ્પદદૂરમેકમવલમ્બે

॥27॥

શ્લોક 29

સ્મયમાનમુખં કાઞ્ચીભયમાનં કમપિ દેવતાભેદમ્ ।

દયમાનં વીક્ષ્ય મુહુર્વયમાનન્દામૃતામ્બુધૌ મગ્નાઃ

॥28॥

શ્લોક 30

કુતુકજુષિ કાઞ્ચિદેશે કુમુદતપોરાશિપાકશેખરિતે ।

કુરુતે મનોવિહારં કુલગિરિપરિબૃઢકુલૈકમણિદીપે

॥29॥

શ્લોક 31

વીક્ષેમહિ કાઞ્ચિપુરે વિપુલસ્તનકલશગરિમપરવશિતમ્ ।

વિદ્રુમસહચરદેહં વિભ્રમસમવાયસારસન્નાહમ્

॥30॥

શ્લોક 32

કુરુવિન્દગોત્રગાત્રં કૂલચરં કમપિ નૌમિ કમ્પાયાઃ ।

કૂલઙ્કષકુચકુમ્ભં કુસુમાયુધવીર્યસારસંરમ્ભમ્

॥31॥

શ્લોક 33

કુડૂમલિતકુચકિશોરૈઃ કુર્વાણૈઃ કાઞ્ચિદેશસૌહાર્દમ્ ।

કુઙ્કુમશોણૈર્નિચિતં કુશલપથં શમ્ભુસુકૃતસમ્ભારૈઃ

॥32॥

શ્લોક 34

અઙ્કિતકચેન કેનચિદન્ધઙ્કરણૌષધેન કમલાનામ્ ।

અન્તઃપુરેણ શમ્ભોરલઙ્ક્રિયા કાઽપિ કલ્પ્યતે કાઞ્ચ્યામ્

॥33॥

શ્લોક 35

ઊરીકરોમિ સન્તતમૂષ્મલફાલેન લલિતં પુંસા ।

ઉપકમ્પમુચિતખેલનમુર્વીધરવંશસમ્પદુન્મેષમ્

॥34॥

શ્લોક 36

અઙ્કુરિતસ્તનકોરકમઙ્કાલઙ્કારમેકચૂતપતેઃ ।

આલોકેમહિ કોમલમાગમસંલાપસારયાથાર્થ્યમ્

॥35॥

શ્લોક 37

પુઞ્જિતકરુણમુદઞ્ચિતશિઞ્જિતમણિકાઞ્ચિ કિમપિ કાઞ્ચિપુરે ।

મઞ્જરિતમૃદુલહાસં પિઞ્જરતનુરુચિ પિનાકિમૂલધનમ્

॥36॥

શ્લોક 38

લોલહૃદયોઽસ્તિ શમ્ભોર્લોચનયુગલેન લેહ્યમાનાયામ્ ।

લલિતપરમશિવાયાં લાવણ્યામૃતતરઙ્ગમાલાયામ્

॥37॥

શ્લોક 39

મધુકરસહચરચિકુરૈર્મદનાગમસમયદીક્ષિતકટાક્ષૈઃ ।

મણ્ડિતકમ્પાતીરૈર્મઙ્ગલકન્દૈર્મમાસ્તુ સારૂપ્યમ્

॥38॥

શ્લોક 40

વદનારવિન્દવક્ષોવામાઙ્કતટીવશંવદીભૂતા ।

પૂરુષત્રિતયે ત્રેધા પુરન્ધ્રિરૂપા ત્વમેવ કામાક્ષિ

॥39॥

શ્લોક 41

બાધાકરીં ભવાબ્ધેરાધારાદ્યમ્બુજેષુ વિચરન્તીમ્ ।

આધારીકૃતકાઞ્ચી બોધામૃતવીચિમેવ વિમૃશામઃ

॥40॥

શ્લોક 42

કલયામ્યન્તઃ શશધરકલયાઽઙ્કિતમૌલિમમલચિદ્વલયામ્ ।

અલયામાગમપીઠીનિલયાં વલયાઙ્કસુન્દરીમમ્બામ્

॥41॥

શ્લોક 43

શર્વાદિપરમસાધકગુર્વાનીતાય કામપીઠજુષે ।

સર્વાકૃતયે શોણિમગર્વાયાસ્મૈ સમર્પ્યતે હૃદયમ્

॥42॥

શ્લોક 44

સમયા સાન્ધ્યમયૂખૈઃ સમયા બુદ્ધયા સદૈવ શીલિતયા ।

ઉમયા કાઞ્ચીરતયા ન મયા લભ્યતે કિં નુ તાદાત્મ્યમ્

॥43॥

શ્લોક 45

જન્તોસ્તવ પદપૂજનસન્તોષતરઙ્ગિતસ્ય કામાક્ષિ ।

વન્ધો યદિ ભવતિ પુનઃ સિન્ધોરમ્ભસ્સુ બમ્ભ્રમીતિ શિલા

॥44॥

શ્લોક 46

કુણ્ડલિ કુમારિ કુટિલે ચણ્ડિ ચરાચરસવિત્રિ ચામુણ્ડે ।

ગુણિનિ ગુહારિણિ ગુહ્યે ગુરુમૂર્તે ત્વાં નમામિ કામાક્ષિ

॥45॥

શ્લોક 47

અભિદાકૃતિર્ભિદાકૃતિરચિદાકૃતિરપિ ચિદાકૃતિર્માતઃ ।

અનહન્તા ત્વમહન્તા ભ્રમયસિ કામાક્ષિ શાશ્વતી વિશ્વમ્

॥46॥

શ્લોક 48

શિવ શિવ પશ્યન્તિ સમં શ્રીકામાક્ષીકટાક્ષિતાઃ પુરુષાઃ ।

વિપિનં ભવનમમિત્રં મિત્રં લોષ્ટં ચ યુવતિબિમ્બોષ્ઠમ્

॥47॥

શ્લોક 49

કામપરિપન્થિકામિનિ કામેશ્વરિ કામપીઠમધ્યગતે ।

કામદુઘા ભવ કમલે કામકલે કામકોટિ કામાક્ષિ

॥48॥

શ્લોક 50

મધ્યેહૃદયં મધ્યેનિટિલં મધ્યેશિરોઽપિ વાસ્તવ્યામ્ ।

ચણ્ડકરશક્રકાર્મુકચન્દ્રસમાભાં નમામિ કામાક્ષીમ્

॥49॥

શ્લોક 51

અધિકાઞ્ચિ કેલિલોલૈરખિલાગમયન્ત્રતન્ત્રમયૈઃ ।

અતિશીતં મમ માનસમસમશરદ્રોહિજીવનોપાયૈઃ

॥50॥

શ્લોક 52

નન્દતિ મમ હૃદિ કાચન મન્દિરયન્તા નિરન્તરં કાઞ્ચીમ્ ।

ઇન્દુરવિમણ્ડલકુચા બિન્દુવિયન્નાદપરિણતા તરુણી

॥51॥

શ્લોક 53

શમ્પાલતાસવર્ણં સમ્પાદયિતું ભવજ્વરચિકિત્સામ્ ।

લિમ્પામિ મનસિ કિઞ્ચન કમ્પાતટરોહિ સિદ્ધભૈષજ્યમ્

॥52॥

શ્લોક 54

અનુમિતકુચકાઠિન્યામધિવક્ષઃપીઠમઙ્ગજન્મરિપોઃ ।

આનન્દદાં ભજે તામાનઙ્ગબ્રહ્મતત્વબોધસિરામ્

॥53॥

શ્લોક 55

ઐક્ષિષિ પાશાઙ્કુશધરહસ્તાન્તં વિસ્મયાર્હવૃત્તાન્તમ્ ।

અધિકાઞ્ચિ નિગમવાચાં સિદ્ધાન્તં શૂલપાણિશુદ્ધાન્તમ્

॥54॥

શ્લોક 56

આહિતવિલાસભઙ્ગીમાબ્રહ્મસ્તમ્બશિલ્પકલ્પનયા ।

આશ્રિતકાઞ્ચીમતુલામાદ્યાં વિસ્ફૂર્તિમાદ્રિયે વિદ્યામ્

॥55॥

શ્લોક 57

મૂકોઽપિ જટિલદુર્ગતિશોકોઽપિ સ્મરતિ યઃ ક્ષણં ભવતીમ્ ।

એકો ભવતિ સ જન્તુર્લોકોત્તરકીર્તિરેવ કામાક્ષિ

॥56॥

શ્લોક 58

પઞ્ચદશવર્ણરૂપં કઞ્ચન કાઞ્ચીવિહારધૌરેયમ્ ।

પઞ્ચશરીયં શમ્ભોર્વઞ્ચનવૈદગ્ધ્યમૂલમવલમ્બે

॥57॥

શ્લોક 59

પરિણતિમતીં ચતુર્ધા પદવીં સુધિયાં સમેત્ય સૌષુમ્નીમ્ ।

પઞ્ચાશદર્ણકલ્પિતમદશિલ્પાં ત્વાં નમામિ કામાક્ષિ

॥58॥

શ્લોક 60

આદિક્ષન્મમ ગુરુરાડાદિક્ષાન્તાક્ષરાત્મિકાં વિદ્યામ્ ।

સ્વાદિષ્ઠચાપદણ્ડાં નેદિષ્ઠામેવ કામપીઠગતામ્

॥59॥

શ્લોક 61

તુષ્યામિ હર્ષિતસ્મરશાસનયા કાઞ્ચિપુરકૃતાસનયા ।

સ્વાસનયા સકલજગદ્ભાસનયા કલિતશમ્બરાસનયા

॥60॥

શ્લોક 62

પ્રેમવતી કમ્પાયાં સ્થેમવતી યતિમનસ્સુ ભૂમવતી ।

સામવતી નિત્યગિરા સોમવતી શિરસિ ભાતિ હૈમવતી

॥61॥

શ્લોક 63

કૌતુકિના કમ્પાયાં કૌસુમચાપેન કીલિતેનાન્તઃ ।

કુલદૈવતેન મહતા કુડ્મલમુદ્રાં ધુનોતુ નઃપ્રતિભા

॥62॥

શ્લોક 64

યૂના કેનાપિ મિલદ્દેહા સ્વાહાસહાયતિલકેન ।

સહકારમૂલદેશે સંવિદ્રૂપા કુટુમ્બિની રમતે

॥63॥

શ્લોક 65

કુસુમશરગર્વસમ્પત્કોશગૃહં ભાતિ કાઞ્ચિદેશગતમ્ ।

સ્થાપિતમસ્મિન્કથમપિ ગોપિતમન્તર્મયા મનોરત્નમ્

॥64॥

શ્લોક 66

દગ્ધષડધ્વારણ્યં દરદલિતકુસુમ્ભસમ્ભૃતારુણ્યમ્ ।

કલયે નવતારુણ્યં કમ્પાતટસીમ્નિ કિમપિ કારુણ્યમ્

॥65॥

શ્લોક 67

અધિકાઞ્ચિ વર્ધમાનામતુલાં કરવાણિ પારણામક્ષ્ણોઃ ।

આનન્દપાકભેદામરુણિમપરિણામગર્વપલ્લવિતામ્

॥66॥

શ્લોક 68

બાણસૃણિપાશકાર્મુકપાણિમમું કમપિ કામપીઠગતમ્ ।

એણધરકોણચૂડં શોણિમપરિપાકભેદમાકલયે

॥67॥

શ્લોક 69

કિં વા ફલતિ મમાન્યૌર્બિમ્બાધરચુમ્બિમન્દહાસમુખી ।

સમ્બાધકરી તમસામમ્બા જાગર્તિ મનસિ કામાક્ષી

॥68॥

શ્લોક 70

મઞ્ચે સદાશિવમયે પરિશિવમયલલિતપૌષ્પપર્યઙ્કે ।

અધિચક્રમધ્યમાસ્તે કામાક્ષી નામ કિમપિ મમ ભાગ્યમ્

॥69॥

શ્લોક 71

રક્ષ્યોઽસ્મિ કામપીઠીલાસિકયા ઘનકૃપામ્બુરાશિકયા ।

શ્રુતિયુવતિકુન્તલીમણિમાલિકયા તુહિનશૈલબાલિકયા

॥70॥

શ્લોક 72

લીયે પુરહરજાયે માયે તવ તરુણપલ્લવચ્છાયે ।

ચરણે ચન્દ્રાભરણે કાઞ્ચીશરણે નતાર્તિસંહરણે

॥71॥

શ્લોક 73

મૂર્તિમતિ મુક્તિબીજે મૂર્ધ્નિ સ્તબકિતચકોરસામ્રાજ્યે ।

મોદિતકમ્પાકૂલે મુહુર્મુહુર્મનસિ મુમુદિષાઽસ્માકમ્

॥72॥

શ્લોક 74

વેદમયીં નાદમયીં બિન્દુમયીં પરપદોદ્યદિન્દુમયીમ્ ।

મન્ત્રમયીં તન્ત્રમયીં પ્રકૃતિમયીં નૌમિ વિશ્વવિકૃતિમયીમ્

॥73॥

શ્લોક 75

પુરમથનપુણ્યકોટી પુઞ્જિતકવિલોકસૂક્તિરસધાટી ।

મનસિ મમ કામકોટી વિહરતુ કરુણાવિપાકપરિપાટી

॥74॥

શ્લોક 76

કુટિલં ચટુલં પૃથુલં મૃદુલં કચનયનજઘનચરણેષુ ।

અવલોકિતમવલમ્બિતમધિકમ્પાતટમમેયમસ્માભિઃ

॥75॥

શ્લોક 77

પ્રત્યઙ્મુખ્યા દૃષ્ટયા પ્રસાદદીપાઙ્કુરેણ કામાક્ષ્યાઃ ।

પશ્યામિ નિસ્તુલમહો પચેલિમં કમપિ પરશિવોલ્લાસમ્

॥76॥

શ્લોક 78

વિદ્યે વિધાતૃવિષયે કાત્યાયનિ કાલિ કામકોટિકલે ।

ભારતિ ભૈરવિ ભદ્રે શાકિનિ શામ્ભવિ શિવે સ્તુવે ભવતીમ્

॥77॥

શ્લોક 79

માલિનિ મહેશચાલિનિ કાઞ્ચીખેલિનિ વિપક્ષકાલિનિ તે ।

શૂલિનિ વિદ્રુમશાલિનિ સુરજનપાલિનિ કપાલિનિ નમોઽસ્તુ

॥78॥

શ્લોક 80

દેશિક ઇતિ કિં શઙ્કે તત્તાદૃક્તવ નુ તરુણિમોન્મેષઃ ।

કામાક્ષિ શૂલપાણેઃ કામાગમસમયદીક્ષાયામ્

॥79॥

શ્લોક 81

વેતણ્ડકુમ્ભડમ્બરવૈતણ્ડિકકુચભરાર્તમધ્યાય ।

કુઙ્કુમરુચે નમસ્યાં શઙ્કરનયનામૃતાય રચયામઃ

॥80॥

શ્લોક 82

અધિકાઞ્ચિતમણિકાઞ્ચનકાઞ્ચીમધિકાઞ્ચિ કાઞ્ચિદદ્રાક્ષમ્ ।

અવનતજનાનુકમ્પામનુકમ્પાકૂલમસ્મદનુકૂલામ્

॥81॥

શ્લોક 83

પરિચિતકમ્પાતીરં પર્વતરાજન્યસુકૃતસન્નાહમ્ ।

પરગુરુકૃપયા વીક્ષે પરમશિવોત્સઙ્ગમઙ્ગલાભરણમ્

॥82॥

શ્લોક 84

દગ્ધમદનસ્ય શમ્ભોઃ પ્રથીયસીં બ્રહ્મચર્યવૈદગ્ધીમ્ ।

તવ દેવિ તરુણિમશ્રીચતુરિમપાકો ન ચક્ષમે માતઃ

॥83॥

શ્લોક 85

મદજલતમાલપત્રા વસનિતપત્રા કરાદૃતખાનિત્રા ।

વિહરતિ પુલિન્દયોષા ગુઞ્જાભૂષા ફણીન્દ્રકૃતવેષા

॥84॥

શ્લોક 86

અઙ્કે શુકિની ગીતે કૌતુકિની પરિસરે ચ ગાયકિની ।

જયસિ સવિધેઽમ્બ ભૈરવમણ્ડલિની શ્રવસિ શઙ્ખકુન્ડલિની

॥85॥

શ્લોક 87

પ્રણતજનતાપવર્ગા કૃતબહુસર્ગા સસિંહસંસર્ગા ।

કામાક્ષિ મુદિતભર્ગા હતરિપુવર્ગા ત્વમેવ સા દુર્ગા

॥86॥

શ્લોક 88

શ્રવણચલદ્વેતણ્ડા સમરોદ્દણ્ડા ધુતાસુરશિખણ્ડા ।

દેવિ કલિતાન્ત્રષણ્ડા ધૃતનરમુણ્ડા ત્વમેવ ચામુણ્ડા

॥87॥

શ્લોક 89

ઉર્વીધરેન્દ્રકન્યે દર્વીભરિતેન ભક્તપૂરેણ ।

ગુર્વીમકિઞ્ચનાર્તિ ખર્વીકુરુષે ત્વમેવ કામાક્ષિ

॥88॥

શ્લોક 90

તાડિતરિપુપરિપીડનભયહરણ નિપુણહલમુસલા ।

ક્રોડપતિભીષણમુખી ક્રીડસિ જગતિ ત્વમેવ કામાક્ષિ

॥89॥

શ્લોક 91

સ્મરમથનવરણલોલા મન્મથહેલાવિલાસમણિશાલા ।

કનકરુચિચૌર્યશીલા ત્વમમ્બ બાલા કરાબ્જધૃતમાલા

॥90॥

શ્લોક 92

વિમલપટી કમલકુટી પુસ્તકરુદ્રાક્ષશસ્તહસ્તપુટી ।

કામાક્ષિ પક્ષ્મલાક્ષી કલિતવિપઞ્ચી વિભાસિ વૈરિઞ્ચી

॥91॥

શ્લોક 93

કુઙ્કુમરુચિપિઙ્ગમસૃક્પઙ્કિલમુણ્ડાલિમણ્ડિતં માતઃ ।

શ્રીકામાક્ષિ તદીયસઙ્ગમકલામન્દીભવત્કૌતુકઃ

જયતિ તવ રૂપધેયં જપપટપુસ્તકવરાભયકરાબ્જમ્

॥92॥

શ્લોક 94

કનકમણિકલિતભૂષાં કાલાયસકલહશીલકાન્તિકલામ્ ।

કામાક્ષિ શીલયે ત્વાં કપાલશૂલાભિરામકરકમલામ્

॥93॥

શ્લોક 95

લોહિતિમપુઞ્જમધ્યે મોહિતભુવને મુદા નિરીક્ષન્તે ।

વદનં તવ કુવયુગલં કાઞ્ચીસીમાં ચ કેઽપિ કામાક્ષિ

॥94॥

શ્લોક 96

જલધિદ્વિગુણિતહુતબહદિશાદિનેશ્વરકલાશ્વિનેયદલૈઃ ।

નલિનૈર્મહેશિ ગચ્છસિ સર્વોત્તરકરકમલદલમમલમ્

॥95॥

શ્લોક 97

સત્કૃતદેશિકચરણાઃ સબીજનિર્બીજયોગનિશ્રેણ્યા ।

અપવર્ગસૌધવલભીમારોહન્ત્યમ્બ કેઽપિ તવ કૃપયા

॥96॥

શ્લોક 98

અન્તરપિ બહિરપિ ત્વં જન્તુતતેરન્તકાન્તકૃદહન્તે ।

ચિન્તિતસન્તાનવતાં સન્તતમપિ તન્તનીષિ મહિમાનમ્

॥97॥

શ્લોક 99

કલમઞ્જુલવાગનુમિતગલપઞ્જરગતશુકગ્રહૌત્કણ્ઠ્યાત્ ।

અમ્બ રદનામ્બરં તે બિમ્બફલં શમ્બરારિણા ન્યસ્તમ્

॥98॥

શ્લોક 100

જય જય જગદમ્બ શિવે જય જય કામાક્ષિ જય જયાદ્રિસુતે ।

જય જય મહેશદયિતે જય જય ચિદ્ગગનકૌમુદીધારે

॥99॥

શ્લોક 101

આર્યાશતકં ભક્ત્યા પઠતામાર્યાકટાક્ષેણ ।

નિસ્સરતિ વદનકમલાદ્વાણી પીયૂષધોરણી દિવ્યા

॥100॥

શ્લોક 102

॥ ઇતિ આર્યાશતકં સમ્પૂર્ણમ્ ॥