దేవ్యపరాధ క్షమాపణ స్తోత్రమ్

దేవ్యపరాధ క్షమాపణ స్తోత్రమ్

శ్లోక 1

న మన్త్రం నో యన్త్రం తదపి చ న జానే స్తుతిమహో

న చాహ్వానం ధ్యానం తదపి చ న జానే స్తుతికథాః ।

న జానే ముద్రాస్తే తదపి చ న జానే విలపనం

పరం జానే మాతస్త్వదనుసరణం క్లేశహరణమ్

శ్లోక 2

విధేరజ్ఞానేన ద్రవిణవిరహేణాలసతయా

విధేయాశక్యత్వాత్తవ చరణయోర్యా చ్యుతిరభూత్ ।

తదేతత్ క్షన్తవ్యం జనని సకలోద్ధారిణి శివే

కుపుత్రో జాయేత క్వచిదపి కుమాతా న భవతి

॥ 1 ॥

శ్లోక 3

పృథివ్యాం పుత్రాస్తే జనని బహవః సన్తి సరలాః

పరం తేషాం మధ్యే విరలతరలోఽహం తవ సుతః ।

మదీయోఽయం త్యాగః సముచితమిదం నో తవ శివే

కుపుత్రో జాయేత క్వచిదపి కుమాతా న భవతి

॥ 2 ॥

శ్లోక 4

జగన్మాతర్మాతస్తవ చరణసేవా న రచితా

న వా దత్తం దేవి ద్రవిణమపి భూయస్తవ మయా ।

తథాపి త్వం స్నేహం మయి నిరుపమం యత్ప్రకురుషే

కుపుత్రో జాయేత క్వచిదపి కుమాతా న భవతి

॥ 3 ॥

శ్లోక 5

పరిత్యక్తా దేవాన్వివిధవిధిసేవాకులతయా

మయా పఞ్చాశీతేరధికమపనీతే తు వయసి ।

ఇదానీం చేన్మాతస్తవ యది కృపా నాపి భవితా

నిరాలమ్బో లమ్బోదరజనని కం యామి శరణమ్

॥ 4 ॥

శ్లోక 6

శ్వపాకో జల్పాకో భవతి మధుపాకోపమగిరా

నిరాతఙ్కో రఙ్కో విహరతి చిరం కోటికనకైః ।

తవాపర్ణే కర్ణే విశతి మనువర్ణే ఫలమిదం

జనః కో జానీతే జనని జపనీయం జపవిధౌ

॥ 5 ॥

శ్లోక 7

చితాభస్మాలేపో గరలమశనం దిక్పటధరో

జటాధారీ కణ్ఠే భుజగపతిహారీ పశుపతిః ।

కపాలీ భూతేశో భజతి జగదీశైకపదవీం

భవానీ త్వత్పాణిగ్రహణపరిపాటీ ఫలమిదమ్

॥ 6 ॥

శ్లోక 8

న మోక్షస్యాకాఙ్క్షా న చ విభవవాఞ్ఛాపి చ న మే

న విజ్ఞానాపేక్షా శశిముఖి సుఖేచ్ఛాపి న పునః ।

అతస్త్వాం సంయాచే జనని జననం యాతు మమ వై

మృడానీ రుద్రాణీ శివ శివ భవానీతి జపతః

॥ 7 ॥

శ్లోక 9

నారాధితాసి విధినా వివిధోపచారైః

కిం రూక్షచిన్తనపరైర్న కృతం వచోభిః ।

శ్యామే త్వమేవ యది కిఞ్చన మయ్యనాథే

ధత్సే కృపాముచితమమ్బ పరం తవైవ

॥ 8 ॥

శ్లోక 10

ఆపత్సు మగ్నః స్మరణం త్వదీయం

కరోమి దుర్గే కరుణార్ణవే శివే ।

నైతచ్ఛఠత్వం మమ భావయేథాః

క్షుధాతృషార్తాః జననీం స్మరన్తి

॥ 9 ॥

శ్లోక 11

జగదమ్బ విచిత్రమత్ర కిం

పరిపూర్ణా కరుణాస్తి చేన్మయి ।

అపరాధపరమ్పరావృతం

న హి మాతా సముపేక్షతే సుతమ్

॥ 10 ॥

శ్లోక 12

మత్సమః పాతకీ నాస్తి పాపఘ్నీ త్వత్సమా న హి ।

ఏవం జ్ఞాత్వా మహాదేవీ యథా యోగ్యం తథా కురు

॥ 11 ॥

శ్లోక 13

ఇతి శ్రీమచ్ఛఙ్కరాచార్య విరచితం దేవ్యపరాధక్షమాపణ స్తోత్రమ్ ।