ಶ್ರೀ ರಾಮ ಭುಜಙ್ಗ ಪ್ರಯಾತ ಸ್ತೋತ್ರಮ್

ಶ್ರೀ ರಾಮ ಭುಜಙ್ಗ ಪ್ರಯಾತ ಸ್ತೋತ್ರಮ್

ಶ್ಲೋಕ 1

ವಿಶುದ್ಧಂ ಪರಂ ಸಚ್ಚಿದಾನನ್ದರೂಪಂ

ಗುಣಾಧಾರಮಾಧಾರಹೀನಂ ವರೇಣ್ಯಮ್ ।

ಮಹಾನ್ತಂ ವಿಭಾನ್ತಂ ಗುಹಾನ್ತಂ ಗುಣಾನ್ತಂ

ಸುಖಾನ್ತಂ ಸ್ವಯಂ ಧಾಮ ರಾಮಂ ಪ್ರಪದ್ಯೇ

ಶ್ಲೋಕ 2

ಶಿವಂ ನಿತ್ಯಮೇಕಂ ವಿಭುಂ ತಾರಕಾಖ್ಯಂ

ಸುಖಾಕಾರಮಾಕಾರಶೂನ್ಯಂ ಸುಮಾನ್ಯಮ್ ।

ಮಹೇಶಂ ಕಲೇಶಂ ಸುರೇಶಂ ಪರೇಶಂ

ನರೇಶಂ ನಿರೀಶಂ ಮಹೀಶಂ ಪ್ರಪದ್ಯೇ

॥ 1 ॥

ಶ್ಲೋಕ 3

ಯದಾವರ್ಣಯತ್ಕರ್ಣಮೂಲೇಽನ್ತಕಾಲೇ

ಶಿವೋ ರಾಮ ರಾಮೇತಿ ರಾಮೇತಿ ಕಾಶ್ಯಾಮ್ ।

ತದೇಕಂ ಪರಂ ತಾರಕಬ್ರಹ್ಮರೂಪಂ

ಭಜೇಽಹಂ ಭಜೇಽಹಂ ಭಜೇಽಹಂ ಭಜೇಽಹಮ್

॥ 2 ॥

ಶ್ಲೋಕ 4

ಮಹಾರತ್ನಪೀಠೇ ಶುಭೇ ಕಲ್ಪಮೂಲೇ

ಸುಖಾಸೀನಮಾದಿತ್ಯಕೋಟಿಪ್ರಕಾಶಮ್ ।

ಸದಾ ಜಾನಕೀಲಕ್ಷ್ಮಣೋಪೇತಮೇಕಂ

ಸದಾ ರಾಮಚನ್ದ್ರಂ ಭಜೇಽಹಂ ಭಜೇಽಹಮ್

॥ 3 ॥

ಶ್ಲೋಕ 5

ಕ್ವಣದ್ರತ್ನಮಞ್ಜೀರಪಾದಾರವಿನ್ದಂ

ಲಸನ್ಮೇಖಲಾಚಾರುಪೀತಾಮ್ಬರಾಢ್ಯಮ್ ।

ಮಹಾರತ್ನಹಾರೋಲ್ಲಸತ್ಕೌಸ್ತುಭಾಙ್ಗಂ

ನದಚ್ಚಞ್ಚರೀಮಞ್ಜರೀಲೋಲಮಾಲಮ್

॥ 4 ॥

ಶ್ಲೋಕ 6

ಲಸಚ್ಚನ್ದ್ರಿಕಾಸ್ಮೇರಶೋಣಾಧರಾಭಂ

ಸಮುದ್ಯತ್ಪತಙ್ಗೇನ್ದುಕೋಟಿಪ್ರಕಾಶಮ್ ।

ನಮದ್ಬ್ರಹ್ಮರುದ್ರಾದಿಕೋಟೀರರತ್ನ

ಸ್ಫುರತ್ಕಾನ್ತಿನೀರಾಜನಾರಾಧಿತಾಙ್ಘ್ರಿಮ್

॥ 5 ॥

ಶ್ಲೋಕ 7

ಪುರಃ ಪ್ರಾಞ್ಜಲೀನಾಞ್ಜನೇಯಾದಿಭಕ್ತಾನ್

ಸ್ವಚಿನ್ಮುದ್ರಯಾ ಭದ್ರಯಾ ಬೋಧಯನ್ತಮ್ ।

ಭಜೇಽಹಂ ಭಜೇಽಹಂ ಸದಾ ರಾಮಚನ್ದ್ರಂ

ತ್ವದನ್ಯಂ ನ ಮನ್ಯೇ ನ ಮನ್ಯೇ ನ ಮನ್ಯೇ

॥ 6 ॥

ಶ್ಲೋಕ 8

ಯದಾ ಮತ್ಸಮೀಪಂ ಕೃತಾನ್ತಃ ಸಮೇತ್ಯ

ಪ್ರಚಣ್ಡಪ್ರಕೋಪೈರ್ಭಟೈರ್ಭೀಷಯೇನ್ಮಾಮ್ ।

ತದಾವಿಷ್ಕರೋಷಿ ತ್ವದೀಯಂ ಸ್ವರೂಪಂ

ಸದಾಪತ್ಪ್ರಣಾಶಂ ಸಕೋದಣ್ಡಬಾಣಮ್

॥ 7 ॥

ಶ್ಲೋಕ 9

ನಿಜೇ ಮಾನಸೇ ಮನ್ದಿರೇ ಸನ್ನಿಧೇಹಿ

ಪ್ರಸೀದ ಪ್ರಸೀದ ಪ್ರಭೋ ರಾಮಚನ್ದ್ರ ।

ಸಸೌಮಿತ್ರಿಣಾ ಕೈಕಯೀನನ್ದನೇನ

ಸ್ವಶಕ್ತ್ಯಾನುಭಕ್ತ್ಯಾ ಚ ಸಂಸೇವ್ಯಮಾನ

॥ 8 ॥

ಶ್ಲೋಕ 10

ಸ್ವಭಕ್ತಾಗ್ರಗಣ್ಯೈಃ ಕಪೀಶೈರ್ಮಹೀಶೈ-

-ರನೀಕೈರನೇಕೈಶ್ಚ ರಾಮ ಪ್ರಸೀದ ।

ನಮಸ್ತೇ ನಮೋಽಸ್ತ್ವೀಶ ರಾಮ ಪ್ರಸೀದ

ಪ್ರಶಾಧಿ ಪ್ರಶಾಧಿ ಪ್ರಕಾಶಂ ಪ್ರಭೋ ಮಾಮ್

॥ 9 ॥

ಶ್ಲೋಕ 11

ತ್ವಮೇವಾಸಿ ದೈವಂ ಪರಂ ಮೇ ಯದೇಕಂ

ಸುಚೈತನ್ಯಮೇತತ್ತ್ವದನ್ಯಂ ನ ಮನ್ಯೇ ।

ಯತೋಽಭೂದಮೇಯಂ ವಿಯದ್ವಾಯುತೇಜೋ

ಜಲೋರ್ವ್ಯಾದಿಕಾರ್ಯಂ ಚರಂ ಚಾಚರಂ ಚ

॥ 10 ॥

ಶ್ಲೋಕ 12

ನಮಃ ಸಚ್ಚಿದಾನನ್ದರೂಪಾಯ ತಸ್ಮೈ

ನಮೋ ದೇವದೇವಾಯ ರಾಮಾಯ ತುಭ್ಯಮ್ ।

ನಮೋ ಜಾನಕೀಜೀವಿತೇಶಾಯ ತುಭ್ಯಂ

ನಮಃ ಪುಣ್ಡರೀಕಾಯತಾಕ್ಷಾಯ ತುಭ್ಯಮ್

॥ 11 ॥

ಶ್ಲೋಕ 13

ನಮೋ ಭಕ್ತಿಯುಕ್ತಾನುರಕ್ತಾಯ ತುಭ್ಯಂ

ನಮಃ ಪುಣ್ಯಪುಞ್ಜೈಕಲಭ್ಯಾಯ ತುಭ್ಯಮ್ ।

ನಮೋ ವೇದವೇದ್ಯಾಯ ಚಾದ್ಯಾಯ ಪುಂಸೇ

ನಮಃ ಸುನ್ದರಾಯೇನ್ದಿರಾವಲ್ಲಭಾಯ

॥ 12 ॥

ಶ್ಲೋಕ 14

ನಮೋ ವಿಶ್ವಕರ್ತ್ರೇ ನಮೋ ವಿಶ್ವಹರ್ತ್ರೇ

ನಮೋ ವಿಶ್ವಭೋಕ್ತ್ರೇ ನಮೋ ವಿಶ್ವಮಾತ್ರೇ ।

ನಮೋ ವಿಶ್ವನೇತ್ರೇ ನಮೋ ವಿಶ್ವಜೇತ್ರೇ

ನಮೋ ವಿಶ್ವಪಿತ್ರೇ ನಮೋ ವಿಶ್ವಮಾತ್ರೇ

॥ 13 ॥

ಶ್ಲೋಕ 15

ನಮಸ್ತೇ ನಮಸ್ತೇ ಸಮಸ್ತಪ್ರಪಞ್ಚ-

-ಪ್ರಭೋಗಪ್ರಯೋಗಪ್ರಮಾಣಪ್ರವೀಣ ।

ಮದೀಯಂ ಮನಸ್ತ್ವತ್ಪದದ್ವನ್ದ್ವಸೇವಾಂ

ವಿಧಾತುಂ ಪ್ರವೃತ್ತಂ ಸುಚೈತನ್ಯಸಿದ್ಧ್ಯೈ

॥ 14 ॥

ಶ್ಲೋಕ 16

ಶಿಲಾಪಿ ತ್ವದಙ್ಘ್ರಿಕ್ಷಮಾಸಙ್ಗಿರೇಣು

ಪ್ರಸಾದಾದ್ಧಿ ಚೈತನ್ಯಮಾಧತ್ತ ರಾಮ ।

ನರಸ್ತ್ವತ್ಪದದ್ವನ್ದ್ವಸೇವಾವಿಧಾನಾ-

-ತ್ಸುಚೈತನ್ಯಮೇತೀತಿ ಕಿಂ ಚಿತ್ರಮತ್ರ

॥ 15 ॥

ಶ್ಲೋಕ 17

ಪವಿತ್ರಂ ಚರಿತ್ರಂ ವಿಚಿತ್ರಂ ತ್ವದೀಯಂ

ನರಾ ಯೇ ಸ್ಮರನ್ತ್ಯನ್ವಹಂ ರಾಮಚನ್ದ್ರ ।

ಭವನ್ತಂ ಭವಾನ್ತಂ ಭರನ್ತಂ ಭಜನ್ತೋ

ಲಭನ್ತೇ ಕೃತಾನ್ತಂ ನ ಪಶ್ಯನ್ತ್ಯತೋಽನ್ತೇ

॥ 16 ॥

ಶ್ಲೋಕ 18

ಸ ಪುಣ್ಯಃ ಸ ಗಣ್ಯಃ ಶರಣ್ಯೋ ಮಮಾಯಂ

ನರೋ ವೇದ ಯೋ ದೇವಚೂಡಾಮಣಿಂ ತ್ವಾಮ್ ।

ಸದಾಕಾರಮೇಕಂ ಚಿದಾನನ್ದರೂಪಂ

ಮನೋವಾಗಗಮ್ಯಂ ಪರಂ ಧಾಮ ರಾಮ

॥ 17 ॥

ಶ್ಲೋಕ 19

ಪ್ರಚಣ್ಡಪ್ರತಾಪಪ್ರಭಾವಾಭಿಭೂತ-

-ಪ್ರಭೂತಾರಿವೀರ ಪ್ರಭೋ ರಾಮಚನ್ದ್ರ ।

ಬಲಂ ತೇ ಕಥಂ ವರ್ಣ್ಯತೇಽತೀವ ಬಾಲ್ಯೇ

ಯತೋಽಖಣ್ಡಿ ಚಣ್ಡೀಶಕೋದಣ್ಡದಣ್ಡಮ್

॥ 18 ॥

ಶ್ಲೋಕ 20

ದಶಗ್ರೀವಮುಗ್ರಂ ಸಪುತ್ರಂ ಸಮಿತ್ರಂ

ಸರಿದ್ದುರ್ಗಮಧ್ಯಸ್ಥರಕ್ಷೋಗಣೇಶಮ್ ।

ಭವನ್ತಂ ವಿನಾ ರಾಮ ವೀರೋ ನರೋ ವಾ

ಸುರೋ ವಾಽಮರೋ ವಾ ಜಯೇತ್ಕಸ್ತ್ರಿಲೋಕ್ಯಾಮ್

॥ 19 ॥

ಶ್ಲೋಕ 21

ಸದಾ ರಾಮ ರಾಮೇತಿ ರಾಮಾಮೃತಂ ತೇ

ಸದಾರಾಮಮಾನನ್ದನಿಷ್ಯನ್ದಕನ್ದಮ್ ।

ಪಿಬನ್ತಂ ನಮನ್ತಂ ಸುದನ್ತಂ ಹಸನ್ತಂ

ಹನೂಮನ್ತಮನ್ತರ್ಭಜೇ ತಂ ನಿತಾನ್ತಮ್

॥ 20 ॥

ಶ್ಲೋಕ 22

ಸದಾ ರಾಮ ರಾಮೇತಿ ರಾಮಾಮೃತಂ ತೇ

ಸದಾರಾಮಮಾನನ್ದನಿಷ್ಯನ್ದಕನ್ದಮ್ ।

ಪಿಬನ್ನನ್ವಹಂ ನನ್ವಹಂ ನೈವ ಮೃತ್ಯೋ-

-ರ್ಬಿಭೇಮಿ ಪ್ರಸಾದಾದಸಾದಾತ್ತವೈವ

॥ 21 ॥

ಶ್ಲೋಕ 23

ಅಸೀತಾಸಮೇತೈರಕೋದಣ್ಡಭೂಷೈ-

-ರಸೌಮಿತ್ರಿವನ್ದ್ಯೈರಚಣ್ಡಪ್ರತಾಪೈಃ ।

ಅಲಙ್ಕೇಶಕಾಲೈರಸುಗ್ರೀವಮಿತ್ರೈ-

-ರರಾಮಾಭಿಧೇಯೈರಲಂ ದೈವತೈರ್ನಃ

॥ 22 ॥

ಶ್ಲೋಕ 24

ಅವೀರಾಸನಸ್ಥೈರಚಿನ್ಮುದ್ರಿಕಾಢ್ಯೈ-

-ರಭಕ್ತಾಞ್ಜನೇಯಾದಿತತ್ತ್ವಪ್ರಕಾಶೈಃ ।

ಅಮನ್ದಾರಮೂಲೈರಮನ್ದಾರಮಾಲೈ-

-ರರಾಮಾಭಿಧೇಯೈರಲಂ ದೈವತೈರ್ನಃ

॥ 23 ॥

ಶ್ಲೋಕ 25

ಅಸಿನ್ಧುಪ್ರಕೋಪೈರವನ್ದ್ಯಪ್ರತಾಪೈ-

-ರಬನ್ಧುಪ್ರಯಾಣೈರಮನ್ದಸ್ಮಿತಾಢ್ಯೈಃ ।

ಅದಣ್ಡಪ್ರವಾಸೈರಖಣ್ಡಪ್ರಬೋಧೈ-

-ರರಾಮಾಭಿಧೇಯೈರಲಂ ದೈವತೈರ್ನಃ

॥ 24 ॥

ಶ್ಲೋಕ 26

ಹರೇ ರಾಮ ಸೀತಾಪತೇ ರಾವಣಾರೇ

ಖರಾರೇ ಮುರಾರೇಽಸುರಾರೇ ಪರೇತಿ ।

ಲಪನ್ತಂ ನಯನ್ತಂ ಸದಾಕಾಲಮೇವಂ

ಸಮಾಲೋಕಯಾಲೋಕಯಾಶೇಷಬನ್ಧೋ

॥ 25 ॥

ಶ್ಲೋಕ 27

ನಮಸ್ತೇ ಸುಮಿತ್ರಾಸುಪುತ್ರಾಭಿವನ್ದ್ಯ

ನಮಸ್ತೇ ಸದಾ ಕೈಕಯೀನನ್ದನೇಡ್ಯ ।

ನಮಸ್ತೇ ಸದಾ ವಾನರಾಧೀಶವನ್ದ್ಯ

ನಮಸ್ತೇ ನಮಸ್ತೇ ಸದಾ ರಾಮಚನ್ದ್ರ

॥ 26 ॥

ಶ್ಲೋಕ 28

ಪ್ರಸೀದ ಪ್ರಸೀದ ಪ್ರಚಣ್ಡಪ್ರತಾಪ

ಪ್ರಸೀದ ಪ್ರಸೀದ ಪ್ರಚಣ್ಡಾರಿಕಾಲ ।

ಪ್ರಸೀದ ಪ್ರಸೀದ ಪ್ರಪನ್ನಾನುಕಮ್ಪಿನ್

ಪ್ರಸೀದ ಪ್ರಸೀದ ಪ್ರಭೋ ರಾಮಚನ್ದ್ರ

॥ 27 ॥

ಶ್ಲೋಕ 29

ಭುಜಙ್ಗಪ್ರಯಾತಂ ಪರಂ ವೇದಸಾರಂ

ಮುದಾ ರಾಮಚನ್ದ್ರಸ್ಯ ಭಕ್ತ್ಯಾ ಚ ನಿತ್ಯಮ್ ।

ಪಠನ್ಸನ್ತತಂ ಚಿನ್ತಯನ್ಸ್ವಾನ್ತರಙ್ಗೇ

ಸ ಏವ ಸ್ವಯಂ ರಾಮಚನ್ದ್ರಃ ಸ ಧನ್ಯಃ

॥ 28 ॥

ಶ್ಲೋಕ 30

ಇತಿ ಶ್ರೀಮಚ್ಛಙ್ಕರಾಚಾರ್ಯ ಕೃತಂ ಶ್ರೀ ರಾಮ ಭುಜಙ್ಗಪ್ರಯಾತ ಸ್ತೋತ್ರಮ್ ।