ಶ್ರೀ ಕೃಷ್ಣ ಕೃಪಾ ಕಟಾಕ್ಷ ಸ್ತೋತ್ರಂ

ಶ್ರೀ ಕೃಷ್ಣ ಕೃಪಾ ಕಟಾಕ್ಷ ಸ್ತೋತ್ರಂ

ಶ್ಲೋಕ 1

ಶ್ರೀಕೃಷ್ಣ ಪ್ರಾರ್ಥನಾ

ಮೂಕಂ ಕರೋತಿ ವಾಚಾಲಂ ಪಙ್ಗು ಲಙ್ಘಯತೇ ಗಿರಿಮ್।

ಯತ್ಕೃಪಾ ತಮಹಂ ವನ್ದೇ ಪರಮಾನನ್ದ ಮಾಧವಮ್॥

ನಾಹಂ ವಸಾಮಿ ವೈಕುಣ್ಠೇ ಯೋಗಿನಾಂ ಹೃದಯೇ ನ ಚ।

ಮದ್ಭಕ್ತಾ ಯತ್ರ ಗಾಯನ್ತಿ ತತ್ರ ತಿಷ್ಠಾಮಿ ನಾರದ॥

ಅಥ ಶ್ರೀ ಕೃಷ್ಣ ಕೃಪಾ ಕಟಾಕ್ಷ ಸ್ತೋತ್ರ ॥

ಭಜೇ ವ್ರಜೈಕಮಣ್ಡನಂ ಸಮಸ್ತಪಾಪಖಣ್ಡನಂ

ಸ್ವಭಕ್ತಚಿತ್ತರಞ್ಜನಂ ಸದೈವ ನನ್ದನನ್ದನಮ್ ।

ಸುಪಿಚ್ಛಗುಚ್ಛಮಸ್ತಕಂ ಸುನಾದವೇಣುಹಸ್ತಕಂ

ಅನಙ್ಗರಙ್ಗಸಾಗರಂ ನಮಾಮಿ ಕೃಷ್ಣನಾಗರಮ್ ॥

ಮನೋಜಗರ್ವಮೋಚನಂ ವಿಶಾಲಲೋಲಲೋಚನಂ

ವಿಧೂತಗೋಪಶೋಚನಂ ನಮಾಮಿ ಪದ್ಮಲೋಚನಮ್ ।

ಕರಾರವಿನ್ದಭೂಧರಂ ಸ್ಮಿತಾವಲೋಕಸುನ್ದರಂ

ಮಹೇನ್ದ್ರಮಾನದಾರಣಂ ನಮಾಮಿ ಕೃಷ್ಣ ವಾರಣಮ್ ॥

ಕದಮ್ಬಸೂನಕುಣ್ಡಲಂ ಸುಚಾರುಗಣ್ಡಮಣ್ಡಲಂ

ವ್ರಜಾಙ್ಗನೈಕವಲ್ಲಭಂ ನಮಾಮಿ ಕೃಷ್ಣದುರ್ಲಭಮ್ ।

ಯಶೋದಯಾ ಸಮೋದಯಾ ಸಗೋಪಯಾ ಸನನ್ದಯಾ

ಯುತಂ ಸುಖೈಕದಾಯಕಂ ನಮಾಮಿ ಗೋಪನಾಯಕಮ್ ॥

ಸದೈವ ಪಾದಪಙ್ಕಜಂ ಮದೀಯ ಮಾನಸೇ ನಿಜಂ

ದಧಾನಮುಕ್ತಮಾಲಕಂ ನಮಾಮಿ ನನ್ದಬಾಲಕಮ್ ।

ಸಮಸ್ತದೋಷಶೋಷಣಂ ಸಮಸ್ತಲೋಕಪೋಷಣಂ

ಸಮಸ್ತಗೋಪಮಾನಸಂ ನಮಾಮಿ ನನ್ದಲಾಲಸಮ್ ॥

ಭುವೋ ಭರಾವತಾರಕಂ ಭವಾಬ್ಧಿಕರ್ಣಧಾರಕಂ

ಯಶೋಮತೀಕಿಶೋರಕಂ ನಮಾಮಿ ಚಿತ್ತಚೋರಕಮ್ ।

ದೃಗನ್ತಕಾನ್ತಭಙ್ಗಿನಂ ಸದಾ ಸದಾಲಿಸಙ್ಗಿನಂ

ದಿನೇ-ದಿನೇ ನವಂ-ನವಂ ನಮಾಮಿ ನನ್ದಸಮ್ಭವಮ್ ॥

ಗುಣಾಕರಂ ಸುಖಾಕರಂ ಕೃಪಾಕರಂ ಕೃಪಾಪರಂ

ಸುರದ್ವಿಷನ್ನಿಕನ್ದನಂ ನಮಾಮಿ ಗೋಪನನ್ದನಮ್ ।

ನವೀನ ಗೋಪನಾಗರಂ ನವೀನಕೇಲಿ-ಲಮ್ಪಟಂ

ನಮಾಮಿ ಮೇಘಸುನ್ದರಂ ತಡಿತ್ಪ್ರಭಾಲಸತ್ಪಟಮ್ ॥

ಸಮಸ್ತ ಗೋಪ ಮೋಹನಂ, ಹೃದಮ್ಬುಜೈಕ ಮೋದನಂ

ನಮಾಮಿಕುಞ್ಜಮಧ್ಯಗಂ ಪ್ರಸನ್ನ ಭಾನುಶೋಭನಮ್ ।

ನಿಕಾಮಕಾಮದಾಯಕಂ ದೃಗನ್ತಚಾರುಸಾಯಕಂ

ರಸಾಲವೇಣುಗಾಯಕಂ ನಮಾಮಿಕುಞ್ಜನಾಯಕಮ್ ॥

ವಿದಗ್ಧ ಗೋಪಿಕಾಮನೋ ಮನೋಜ್ಞತಲ್ಪಶಾಯಿನಂ

ನಮಾಮಿ ಕುಞ್ಜಕಾನನೇ ಪ್ರವೃದ್ಧವಹ್ನಿಪಾಯಿನಮ್ ।

ಕಿಶೋರಕಾನ್ತಿ ರಞ್ಜಿತಂ ದೃಗಞ್ಜನಂ ಸುಶೋಭಿತಂ

ಗಜೇನ್ದ್ರಮೋಕ್ಷಕಾರಿಣಂ ನಮಾಮಿ ಶ್ರೀವಿಹಾರಿಣಮ್ ॥

ಫಲಶೃತಿ

ಯದಾ ತದಾ ಯಥಾ ತಥಾ ತಥೈವ ಕೃಷ್ಣಸತ್ಕಥಾ

ಮಯಾ ಸದೈವ ಗೀಯತಾಂ ತಥಾ ಕೃಪಾ ವಿಧೀಯತಾಮ್ ।

ಪ್ರಮಾಣಿಕಾಷ್ಟಕದ್ವಯಂ ಜಪತ್ಯಧೀತ್ಯ ಯಃ ಪುಮಾನ್

ಭವೇತ್ಸ ನನ್ದನನ್ದನೇ ಭವೇ ಭವೇ ಸುಭಕ್ತಿಮಾನ ॥