Sri Bhadrakali Ashtottara Satanama Stotram

श्री भद्रकाली अष्टोत्तर शत नामा स्तोत्रं

श्लोक 1

श्रीनन्दिकेश्वर उवाच

भद्रकालीमहं वन्दे वीरभद्रसतीं शिवाम् ।

सुताम्रार्चितपादाब्जं सुखसौभाग्यदायिनीम्

श्लोक 2

अथ स्तोत्रम्

भद्रकाली कामरूपा महाविद्या यशस्विनी ।

महाश्रया महाभागा दक्षयागविभेदिनी

॥ 1 ॥

श्लोक 3

रुद्रकोपसमुद्भूता भद्रा मुद्रा शिवङ्करी ।

चन्द्रिका चन्द्रवदना रोषताम्राक्षशोभिनी

॥ 2 ॥

श्लोक 4

इन्द्रादिदमनी शान्ता चन्द्रलेखाविभूषिता ।

भक्तार्तिहारिणी मुक्ता चण्डिकानन्ददायिनी

॥ 3 ॥

श्लोक 5

सौदामिनी सुधामूर्तिः दिव्यालङ्कारभूषिता ।

सुवासिनी सुनासा च त्रिकालज्ञा धुरन्धरा

॥ 4 ॥

श्लोक 6

सर्वज्ञा सर्वलोकेशी देवयोनिरयोनिजा ।

निर्गुणा निरहङ्कारा लोककल्याणकारिणी

॥ 5 ॥

श्लोक 7

सर्वलोकप्रिया गौरी सर्वगर्वविमर्दिनी ।

तेजोवती महामाता कोटिसूर्यसमप्रभा

॥ 6 ॥

श्लोक 8

वीरभद्रकृतानन्दभोगिनी वीरसेविता ।

नारदादिमुनिस्तुत्या नित्या सत्या तपस्विनी

॥ 7 ॥

श्लोक 9

ज्ञानरूपा कलातीता भक्ताभीष्टफलप्रदा ।

कैलासनिलया शुभ्रा क्षमा श्रीः सर्वमङ्गला

॥ 8 ॥

श्लोक 10

सिद्धविद्या महाशक्तिः कामिनी पद्मलोचना ।

देवप्रिया दैत्यहन्त्री दक्षगर्वापहारिणी

॥ 9 ॥

श्लोक 11

शिवशासनकर्त्री च शैवानन्दविधायिनी ।

भवपाशनिहन्त्री च सवनाङ्गसुकारिणी

॥ 10 ॥

श्लोक 12

लम्बोदरी महाकाली भीषणास्या सुरेश्वरी ।

महानिद्रा योगनिद्रा प्रज्ञा वार्ता क्रियावती

॥ 11 ॥

श्लोक 13

पुत्रपौत्रप्रदा साध्वी सेनायुद्धसुकाङ्क्षिणी ।

इच्छा शम्भोः कृपासिन्धुः चण्डी चण्डपराक्रमा

॥ 12 ॥

श्लोक 14

शोभा भगवती माया दुर्गा नीला मनोगतिः ।

खेचरी खड्गिनी चक्रहस्ता शूलविधारिणी

॥ 13 ॥

श्लोक 15

सुबाणा शक्तिहस्ता च पादसञ्चारिणी परा ।

तपःसिद्धिप्रदा देवी वीरभद्रसहायिनी

॥ 14 ॥

श्लोक 16

धनधान्यकरी विश्वा मनोमालिन्यहारिणी ।

सुनक्षत्रोद्भवकरी वंशवृद्धिप्रदायिनी

॥ 15 ॥

श्लोक 17

ब्रह्मादिसुरसंसेव्या शाङ्करी प्रियभाषिणी ।

भूतप्रेतपिशाचादिहारिणी सुमनस्विनी

॥ 16 ॥

श्लोक 18

पुण्यक्षेत्रकृतावासा प्रत्यक्षपरमेश्वरी ।

एवं नाम्नां भद्रकाल्याः शतमष्टोत्तरं विदुः

॥ 17 ॥

श्लोक 19

पुण्यं यशो दीर्घमायुः पुत्रपौत्रं धनं बहु ।

ददाति देवी तस्याशु यः पठेत् स्तोत्रमुत्तमम्

॥ 18 ॥

श्लोक 20

भौमवारे भृगौ चैव पौर्णमास्यां विशेषतः ।

प्रातः स्नात्वा नित्यकर्म विधाय च सुभक्तिमान्

॥ 19 ॥

श्लोक 21

वीरभद्रालये भद्रां सम्पूज्य सुरसेविताम् ।

पठेत् स्तोत्रमिदं दिव्यं नाना भोगप्रदं शुभम्

॥ 20 ॥

श्लोक 22

अभीष्टसिद्धिं प्राप्नोति शीघ्रं विद्वान् परन्तप ।

अथवा स्वगृहे वीरभद्रपत्नीं समर्चयेत्

॥ 21 ॥

श्लोक 23

स्तोत्रेणानेन विधिवत् सर्वान् कामानवाप्नुयात् ।

रोगा नश्यन्ति तस्याशु योगसिद्धिं च विन्दति

॥ 22 ॥

श्लोक 24

सनत्कुमारभक्तानामिदं स्तोत्रं प्रबोधय ।

रहस्यं सारभूतं च सर्वज्ञः सम्भविष्यसि

॥ 23 ॥

श्लोक 25

इति श्रीभद्रकाल्यष्टोत्तरशतनाम स्तोत्रम् ।