નવગ્રહ સ્તોત્રમ્

નવગ્રહ સ્તોત્રમ્

શ્લોક 1

નવગ્રહ ધ્યાન શ્લોકમ્

આદિત્યાય ચ સોમાય મઙ્ગલાય બુધાય ચ ।

ગુરુ શુક્ર શનિભ્યશ્ચ રાહવે કેતવે નમઃ ॥

રવિઃ

જપાકુસુમ સઙ્કાશં કાશ્યપેયં મહાદ્યુતિમ્ ।

તમોઽરિં સર્વ પાપઘ્નં પ્રણતોસ્મિ દિવાકરમ્ ॥

ચન્દ્રઃ

દધિશઙ્ખ તુષારાભં ક્ષીરાર્ણવ સમુદ્ભવમ્ (ક્ષીરોદાર્ણવ સમ્ભવમ્) ।

નમામિ શશિનં સોમં શમ્ભો-ર્મકુટ ભૂષણમ્ ॥

કુજઃ

ધરણી ગર્ભ સમ્ભૂતં વિદ્યુત્કાન્તિ સમપ્રભમ્ ।

કુમારં શક્તિહસ્તં તં કુજં [મઙ્ગલં] પ્રણમામ્યહમ્ ॥

બુધઃ

પ્રિયઙ્ગુ કલિકાશ્યામં રૂપેણા પ્રતિમં બુધમ્ ।

સૌમ્યં સૌમ્ય (સત્વ) ગુણોપેતં તં બુધં પ્રણમામ્યહમ્ ॥

ગુરુઃ

દેવાનાં ચ ઋષીણાં ચ ગુરું કાઞ્ચનસન્નિભમ્ ।

બુદ્ધિમન્તં ત્રિલોકેશં તં નમામિ બૃહસ્પતિમ્ ॥

શુક્રઃ

હિમકુન્દ મૃણાલાભં દૈત્યાનં પરમં ગુરુમ્ ।

સર્વશાસ્ત્ર પ્રવક્તારં ભાર્ગવં પ્રણમામ્યહમ્ ॥

શનિઃ

નીલાઞ્જન સમાભાસં રવિપુત્રં યમાગ્રજમ્ ।

છાયા માર્તાણ્ડ સમ્ભૂતં તં નમામિ શનૈશ્ચરમ્ ॥

રાહુઃ

અર્ધકાયં મહાવીરં ચન્દ્રાદિત્ય વિમર્ધનમ્ ।

સિંહિકા ગર્ભ સમ્ભૂતં તં રાહું પ્રણમામ્યહમ્ ॥

કેતુઃ

પલાશ પુષ્પ સઙ્કાશં તારકાગ્રહમસ્તકમ્ ।

રૌદ્રં રૌદ્રાત્મકં ઘોરં તં કેતું પ્રણમામ્યહમ્ ॥

ફલશ્રુતિઃ

ઇતિ વ્યાસ મુખોદ્ગીતં યઃ પઠેત્સુ સમાહિતઃ ।

દિવા વા યદિ વા રાત્રૌ વિઘ્નશાન્તિ-ર્ભવિષ્યતિ ॥

નરનારી-નૃપાણાં ચ ભવે-દ્દુઃસ્વપ્ન-નાશનમ્ ।

ઐશ્વર્યમતુલં તેષામારોગ્યં પુષ્ટિ વર્ધનમ્ ॥

ગ્રહનક્ષત્રજાઃ પીડાસ્તસ્કરાગ્નિ સમુદ્ભવાઃ ।

તાસ્સર્વાઃ પ્રશમં યાન્તિ વ્યાસો બ્રૂતે ન સંશયઃ ॥

ઇતિ વ્યાસ વિરચિતં નવગ્રહ સ્તોત્રં સમ્પૂર્ણમ્ ।