ముకున్దమాలా స్తోత్రమ్

ముకున్దమాలా స్తోత్రమ్

శ్లోక 1

ఘుష్యతే యస్య నగరే రఙ్గయాత్రా దినే దినే ।

తమహం శిరసా వన్దే రాజానం కులశేఖరమ్ ॥

శ్రీవల్లభేతి వరదేతి దయాపరేతి

భక్తప్రియేతి భవలుణ్ఠనకోవిదేతి ।

నాథేతి నాగశయనేతి జగన్నివాసే-

-త్యాలాపనం ప్రతిపదం కురు మే ముకున్ద

శ్లోక 2

జయతు జయతు దేవో దేవకీనన్దనోఽయం

జయతు జయతు కృష్ణో వృష్ణివంశప్రదీపః ।

జయతు జయతు మేఘశ్యామలః కోమలాఙ్గో

జయతు జయతు పృథ్వీభారనాశో ముకున్దః

॥ 1 ॥

శ్లోక 3

ముకున్ద మూర్ధ్నా ప్రణిపత్య యాచే

భవన్తమేకాన్తమియన్తమర్థమ్ ।

అవిస్మృతిస్త్వచ్చరణారవిన్దే

భవే భవే మేఽస్తు భవత్ప్రసాదాత్

॥ 2 ॥

శ్లోక 4

నాహం వన్దే తవ చరణయోర్ద్వన్ద్వమద్వన్ద్వహేతోః

కుమ్భీపాకం గురుమపి హరే నారకం నాపనేతుమ్ ।

రమ్యారామామృదుతనులతా నన్దనే నాపి రన్తుం

భావే భావే హృదయభవనే భావయేయం భవన్తమ్

॥ 3 ॥

శ్లోక 5

నాస్థా ధర్మే న వసునిచయే నైవ కామోపభోగే

యద్యద్భవ్యం భవతు భగవన్ పూర్వకర్మానురూపమ్ ।

ఏతత్ప్రార్థ్యం మమ బహుమతం జన్మజన్మాన్తరేఽపి

త్వత్పాదామ్భోరుహయుగగతా నిశ్చలా భక్తిరస్తు

॥ 4 ॥

శ్లోక 6

దివి వా భువి వా మమాస్తు వాసో

నరకే వా నరకాన్తక ప్రకామమ్ ।

అవధీరిత శారదారవిన్దౌ

చరణౌ తే మరణేఽపి చిన్తయామి

॥ 5 ॥

శ్లోక 7

కృష్ణ త్వదీయ పదపఙ్కజపఞ్జరాన్త-

-మద్యైవ మే విశతు మానసరాజహంసః ।

ప్రాణప్రయాణసమయే కఫవాతపిత్తైః

కణ్ఠావరోధనవిధౌ స్మరణం కుతస్తే

॥ 6 ॥

శ్లోక 8

చిన్తయామి హరిమేవ సన్తతం

మన్దమన్ద హసితాననామ్బుజం

నన్దగోపతనయం పరాత్పరం

నారదాదిమునిబృన్దవన్దితమ్

॥ 7 ॥

శ్లోక 9

కరచరణసరోజే కాన్తిమన్నేత్రమీనే

శ్రమముషి భుజవీచివ్యాకులేఽగాధమార్గే ।

హరిసరసి విగాహ్యాపీయ తేజోజలౌఘం

భవమరుపరిఖిన్నః ఖేదమద్య త్యజామి

॥ 8 ॥

శ్లోక 10

సరసిజనయనే సశఙ్ఖచక్రే

మురభిది మా విరమ స్వచిత్త రన్తుమ్ ।

సుఖతరమపరం న జాతు జానే

హరిచరణస్మరణామృతేన తుల్యమ్

॥ 9 ॥

శ్లోక 11

మా భీర్మన్దమనో విచిన్త్య బహుధా యామీశ్చిరం యాతనాః

నామీ నః ప్రభవన్తి పాపరిపవః స్వామీ నను శ్రీధరః ।

ఆలస్యం వ్యపనీయ భక్తిసులభం ధ్యాయస్వ నారాయణం

లోకస్య వ్యసనాపనోదనకరో దాసస్య కిం న క్షమః

॥ 10 ॥

శ్లోక 12

భవజలధిగతానాం ద్వన్ద్వవాతాహతానాం

సుతదుహితృకలత్రత్రాణభారార్దితానామ్ ।

విషమవిషయతోయే మజ్జతామప్లవానాం

భవతు శరణమేకో విష్ణుపోతో నరాణామ్

॥ 11 ॥

శ్లోక 13

భవజలధిమగాధం దుస్తరం నిస్తరేయం

కథమహమితి చేతో మా స్మ గాః కాతరత్వమ్ ।

సరసిజదృశి దేవే తావకీ భక్తిరేకా

నరకభిది నిషణ్ణా తారయిష్యత్యవశ్యమ్

॥ 12 ॥

శ్లోక 14

తృష్ణాతోయే మదనపవనోద్ధూత మోహోర్మిమాలే

దారావర్తే తనయసహజగ్రాహసఙ్ఘాకులే చ ।

సంసారాఖ్యే మహతి జలధౌ మజ్జతాం నస్త్రిధామన్

పాదామ్భోజే వరద భవతో భక్తినావం ప్రయచ్ఛ

॥ 13 ॥

శ్లోక 15

మాద్రాక్షం క్షీణపుణ్యాన్ క్షణమపి భవతో భక్తిహీనాన్పదాబ్జే

మాశ్రౌషం శ్రావ్యబన్ధం తవ చరితమపాస్యాన్యదాఖ్యానజాతమ్ ।

మాస్మార్షం మాధవ త్వామపి భువనపతే చేతసాపహ్నువానా-

-న్మాభూవం త్వత్సపర్యావ్యతికరరహితో జన్మజన్మాన్తరేఽపి

॥ 14 ॥

శ్లోక 16

జిహ్వే కీర్తయ కేశవం మురరిపుం చేతో భజ శ్రీధరం

పాణిద్వన్ద్వ సమర్చయాచ్యుతకథాః శ్రోత్రద్వయ త్వం శృణు ।

కృష్ణం లోకయ లోచనద్వయ హరేర్గచ్ఛాఙ్ఘ్రియుగ్మాలయం

జిఘ్ర ఘ్రాణ ముకున్దపాదతులసీం మూర్ధన్నమాధోక్షజమ్

॥ 15 ॥

శ్లోక 17

హే లోకాః శృణుత ప్రసూతిమరణవ్యాధేశ్చికిత్సామిమాం

యోగజ్ఞాః సముదాహరన్తి మునయో యాం యాజ్ఞవల్క్యాదయః ।

అన్తర్జ్యోతిరమేయమేకమమృతం కృష్ణాఖ్యమాపీయతాం

తత్పీతం పరమౌషధం వితనుతే నిర్వాణమాత్యన్తికమ్ ॥ 17 ।

హే మర్త్యాః పరమం హితం శృణుత వో వక్ష్యామి సఙ్క్షేపతః

సంసారార్ణవమాపదూర్మిబహులం సమ్యక్ప్రవిశ్య స్థితాః ।

నానాజ్ఞానమపాస్య చేతసి నమో నారాయణాయేత్యముం

మన్త్రం సప్రణవం ప్రణామసహితం ప్రావర్తయధ్వం ముహుః

॥ 16 ॥

శ్లోక 18

పృథ్వీరేణురణుః పయాంసి కణికాః ఫల్గుః స్ఫులిఙ్గోఽలఘు-

-స్తేజో నిఃశ్వసనం మరుత్తనుతరం రన్ధ్రం సుసూక్ష్మం నభః ।

క్షుద్రా రుద్రపితామహప్రభృతయః కీటాః సమస్తాః సురాః

దృష్టే యత్ర స తావకో విజయతే భూమావధూతావధిః

॥ 18 ॥

శ్లోక 19

బద్ధేనాఞ్జలినా నతేన శిరసా గాత్రైః సరోమోద్గమైః

కణ్ఠేన స్వరగద్గదేన నయనేనోద్గీర్ణబాష్పామ్బునా ।

నిత్యం త్వచ్చరణారవిన్దయుగల ధ్యానామృతాస్వాదినా-

-మస్మాకం సరసీరుహాక్ష సతతం సమ్పద్యతాం జీవితమ్

॥ 19 ॥

శ్లోక 20

హే గోపాలక హే కృపాజలనిధే హే సిన్ధుకన్యాపతే

హే కంసాన్తక హే గజేన్ద్రకరుణాపారీణ హే మాధవ ।

హే రామానుజ హే జగత్త్రయగురో హే పుణ్డరీకాక్ష మాం

హే గోపీజననాథ పాలయ పరం జానామి న త్వాం వినా

॥ 20 ॥

శ్లోక 21

భక్తాపాయభుజఙ్గగారుడమణిస్త్రైలోక్యరక్షామణిః

గోపీలోచనచాతకామ్బుదమణిః సౌన్దర్యముద్రామణిః ।

యః కాన్తామణి రుక్మిణీ ఘనకుచద్వన్ద్వైకభూషామణిః

శ్రేయో దేవశిఖామణిర్దిశతు నో గోపాలచూడామణిః

॥ 21 ॥

శ్లోక 22

శత్రుచ్ఛేదైకమన్త్రం సకలముపనిషద్వాక్యసమ్పూజ్యమన్త్రం

సంసారోత్తారమన్త్రం సముపచితతమః సఙ్ఘనిర్యాణమన్త్రమ్ ।

సర్వైశ్వర్యైకమన్త్రం వ్యసనభుజగసన్దష్టసన్త్రాణమన్త్రం

జిహ్వే శ్రీకృష్ణమన్త్రం జప జప సతతం జన్మసాఫల్యమన్త్రమ్

॥ 22 ॥

శ్లోక 23

వ్యామోహ ప్రశమౌషధం మునిమనోవృత్తి ప్రవృత్త్యౌషధం

దైత్యేన్ద్రార్తికరౌషధం త్రిభువనీ సఞ్జీవనైకౌషధమ్ ।

భక్తాత్యన్తహితౌషధం భవభయప్రధ్వంసనైకౌషధం

శ్రేయఃప్రాప్తికరౌషధం పిబ మనః శ్రీకృష్ణదివ్యౌషధమ్

॥ 23 ॥

శ్లోక 24

ఆమ్నాయాభ్యసనాన్యరణ్యరుదితం వేదవ్రతాన్యన్వహం

మేదశ్ఛేదఫలాని పూర్తవిధయః సర్వే హుతం భస్మని ।

తీర్థానామవగాహనాని చ గజస్నానం వినా యత్పద-

-ద్వన్ద్వామ్భోరుహసంస్మృతిర్విజయతే దేవః స నారాయణః

॥ 24 ॥

శ్లోక 25

శ్రీమన్నామ ప్రోచ్య నారాయణాఖ్యం

కే న ప్రాపుర్వాఞ్ఛితం పాపినోఽపి ।

హా నః పూర్వం వాక్ప్రవృత్తా న తస్మిన్

తేన ప్రాప్తం గర్భవాసాదిదుఃఖమ్

॥ 25 ॥

శ్లోక 26

మజ్జన్మనః ఫలమిదం మధుకైటభారే

మత్ప్రార్థనీయ మదనుగ్రహ ఏష ఏవ ।

త్వద్భృత్యభృత్య పరిచారక భృత్యభృత్య

భృత్యస్య భృత్య ఇతి మాం స్మర లోకనాథ

॥ 26 ॥

శ్లోక 27

నాథే నః పురుషోత్తమే త్రిజగతామేకాధిపే చేతసా

సేవ్యే స్వస్య పదస్య దాతరి సురే నారాయణే తిష్ఠతి ।

యం కఞ్చిత్పురుషాధమం కతిపయగ్రామేశమల్పార్థదం

సేవాయై మృగయామహే నరమహో మూకా వరాకా వయమ్

॥ 27 ॥

శ్లోక 28

మదన పరిహర స్థితిం మదీయే

మనసి ముకున్దపదారవిన్దధామ్ని ।

హరనయనకృశానునా కృశోఽసి

స్మరసి న చక్రపరాక్రమం మురారేః

॥ 28 ॥

శ్లోక 29

తత్త్వం బ్రువాణాని పరం పరస్మా-

-న్మధు క్షరన్తీవ సతాం ఫలాని ।

ప్రావర్తయ ప్రాఞ్జలిరస్మి జిహ్వే

నామాని నారాయణ గోచరాణి

॥ 29 ॥

శ్లోక 30

ఇదం శరీరం పరిణామపేశలం

పతత్యవశ్యం శ్లథసన్ధిజర్జరమ్ ।

కిమౌషధైః క్లిశ్యసి మూఢ దుర్మతే

నిరామయం కృష్ణరసాయనం పిబ

॥ 30 ॥

శ్లోక 31

దారా వారాకరవరసుతా తే తనూజో విరిఞ్చిః

స్తోతా వేదస్తవ సురగణో భృత్యవర్గః ప్రసాదః ।

ముక్తిర్మాయా జగదవికలం తావకీ దేవకీ తే

మాతా మిత్రం బలరిపుసుతస్త్వయ్యతోఽన్యన్న జానే

॥ 31 ॥

శ్లోక 32

కృష్ణో రక్షతు నో జగత్త్రయగురుః కృష్ణం నమస్యామ్యహం

కృష్ణేనామరశత్రవో వినిహతాః కృష్ణాయ తస్మై నమః ।

కృష్ణాదేవ సముత్థితం జగదిదం కృష్ణస్య దాసోఽస్మ్యహం

కృష్ణే తిష్ఠతి సర్వమేతదఖిలం హే కృష్ణ రక్షస్వ మామ్

॥ 32 ॥

శ్లోక 33

తత్త్వం ప్రసీద భగవన్ కురు మయ్యనాథే

విష్ణో కృపాం పరమకారుణికః కిల త్వమ్ ।

సంసారసాగరనిమగ్నమనన్తదీన-

-ముద్ధర్తుమర్హసి హరే పురుషోత్తమోఽసి

॥ 33 ॥

శ్లోక 34

నమామి నారాయణపాదపఙ్కజం

కరోమి నారాయణపూజనం సదా ।

వదామి నారాయణనామ నిర్మలం

స్మరామి నారాయణతత్త్వమవ్యయమ్

॥ 34 ॥

శ్లోక 35

శ్రీనాథ నారాయణ వాసుదేవ

శ్రీకృష్ణ భక్తప్రియ చక్రపాణే ।

శ్రీపద్మనాభాచ్యుత కైటభారే

శ్రీరామ పద్మాక్ష హరే మురారే

॥ 35 ॥

శ్లోక 36

అనన్త వైకుణ్ఠ ముకున్ద కృష్ణ

గోవిన్ద దామోదర మాధవేతి ।

వక్తుం సమర్థోఽపి న వక్తి కశ్చి-

-దహో జనానాం వ్యసనాభిముఖ్యమ్

॥ 36 ॥

శ్లోక 37

ధ్యాయన్తి యే విష్ణుమనన్తమవ్యయం

హృత్పద్మమధ్యే సతతం వ్యవస్థితమ్ ।

సమాహితానాం సతతాభయప్రదం

తే యాన్తి సిద్ధిం పరమాం చ వైష్ణవీమ్

॥ 37 ॥

శ్లోక 38

క్షీరసాగరతరఙ్గశీకరా-

-ఽఽసారతారకితచారుమూర్తయే ।

భోగిభోగశయనీయశాయినే

మాధవాయ మధువిద్విషే నమః

॥ 38 ॥

శ్లోక 39

యస్య ప్రియౌ శ్రుతిధరౌ కవిలోకవీరౌ

మిత్రే ద్విజన్మవరపద్మశరావభూతామ్ ।

తేనామ్బుజాక్షచరణామ్బుజషట్పదేన

రాజ్ఞా కృతా కృతిరియం కులశేఖరేణ

॥ 39 ॥

శ్లోక 40

ఇతి కులశేఖర ప్రణీతం ముకున్దమాలా ।