മൂക പഞ്ച ശതി 3 - സ്തുതി ശതകമ്

മൂക പഞ്ച ശതി 3 - സ്തുതി ശതകമ്

ശ്ലോക 1

പാണ്ഡിത്യം പരമേശ്വരി സ്തുതിവിധൌ നൈവാശ്രയന്തേ ഗിരാം

വൈരിഞ്ചാന്യപി ഗുമ്ഫനാനി വിഗലദ്ഗര്വാണി ശര്വാണി തേ ।

സ്തോതും ത്വാം പരിഫുല്ലനീലനലിനശ്യാമാക്ഷി കാമാക്ഷി മാം

വാചാലീകുരുതേ തഥാപി നിതരാം ത്വത്പാദസേവാദരഃ

ശ്ലോക 2

താപിഞ്ഛസ്തബകത്വിഷേ തനുഭൃതാം ദാരിദ്ര്യമുദ്രാദ്വിഷേ

സംസാരാഖ്യതമോമുഷേ പുരരിപോര്വാമാങ്കസീമാജുഷേ ।

കമ്പാതീരമുപേയുഷേ കവയതാം ജിഹ്വാകുടീം ജഗ്മുഷേ

വിശ്വത്രാണപുഷേ നമോഽസ്തു സതതം തസ്മൈ പരഞ്ജ്യോതിഷേ

॥1॥

ശ്ലോക 3

യേ സന്ധ്യാരുണയന്തി ശങ്കരജടാകാന്താരചന്രാര്ഭകം

സിന്ദൂരന്തി ച യേ പുരന്ദരവധൂസീമന്തസീമാന്തരേ ।

പുണ്യ.ം യേ പരിപക്കയന്തി ഭജതാം കാഞ്ചീപുരേ മാമമീ

പായാസുഃ പരമേശ്വരപ്രണയിനീപാദോദ്ഭവാഃ പാംസവഃ

॥2॥

ശ്ലോക 4

കാമാഡമ്ബരപൂരയാ ശശിരുചാ കമ്രസ്മിതാനാം ത്വിഷാ

കാമാരേരനുരാഗസിന്ധുമധികം കല്ലോലിതം തന്വതീ ।

കാമാക്ഷീതി സമസ്തസജ്ജനനുതാ കല്യാണദാത്രീ നൃണാം

കാരുണ്യാകുലമാനസാ ഭഗവതീ കമ്പാതടേ ജൃമ്ഭതേ

॥3॥

ശ്ലോക 5

കാമാക്ഷീണപരാക്രമപ്രകടനം സമ്ഭാവയന്തീ ദൃശാ

ശ്യാമാ ക്ഷീരസഹോദരസ്മിതരുചിപ്രക്ഷാലിതാശാന്തരാ ।

കാമാക്ഷീജനമൌലിഭൂഷണമണിര്വാചാം പരാ ദേവതാ

കാമാക്ഷീതി വിഭാതി കാപി കരുണാ കമ്പാതടിന്യാസ്തടേ

॥4॥

ശ്ലോക 6

ശ്യാമാ കാചന ചന്ദ്രികാ ത്രിഭുവനേ പുണ്യാത്മനാമാനനേ

സീമാശൂന്യകവിത്വവര്ഷജനനീ യാ കാപി കാദമ്ബിനീ ।

മാരാരാതിമനോവിമോഹനവിധൌ കാചിതത്തമഃകന്ദലീ

കാമാക്ഷ്യാഃ കരുണാകടാക്ഷലഹരീ കാമായ മേ കല്പതാമ്

॥5॥

ശ്ലോക 7

പ്രൌഢധ്വാന്തകദമ്ബകേ കുമുദിനീപുണ്യാങ്കുരം ദര്ശയന്

ജ്യോത്സ്നാസങ്ഗമനേഽപി കോകമിഥുനം മിശ്രം സമുദ്ഭാവയന് ।

കാലിന്ദീലഹരീദശാം പ്രകടയന്കമ്രാം നഭസ്യദ്ഭുതാം

കശ്ചിന്നേത്രമഹോത്സവോ വിജയതേ കാഞ്ചീപുരേ ശൂലിനഃ

॥6॥

ശ്ലോക 8

തന്ദ്രാഹീനതമാലനീലസുഷമൈസ്താരുണ്യലീലാഗൃഹൈഃ

താരാനാഥകിശോരലാഞ്ഛിതകചൈസ്താമ്രാരവിന്ദേക്ഷണൈഃ ।

മാതഃ സംശ്രയതാം മനോ മനസിജപ്രാഗല്ഭ്യനാഡിന്ധമൈഃ

കമ്പാതീരചരൈര്ഘനസ്തനഭരൈഃ പുണ്യാങ്കരൈഃ ശാങ്കരൈഃ

॥7॥

ശ്ലോക 9

നിത്യം നിശ്ചലതാമുപേത്യ മരുതാം രക്ഷാവിധിം പുഷ്ണതീ

തേജസ്സഞ്ചയപാടവേന കിരണാനുഷ്ണദ്യുതേര്മുഷ്ണതീ ।

കാഞ്ചീമധ്യഗതാപി ദീപ്തിജനനീ വിശ്വാന്തരേ ജൃമ്ഭതേ

കാചിച്ചിത്രമഹോ സ്മൃതാപി തമസാം നിര്വാപികാ ദീപികാ

॥8॥

ശ്ലോക 10

കാന്തൈഃ കേശരുചാം ചയൈര്ഭ്രമരിതം മന്ദസ്മിതൈഃ പുഷ്പിതം

കാന്ത്യാ പല്ലവിതം പദാമ്ബുരുഹയോര്നേത്രത്വിഷാ പത്രിതമ് ।

കമ്പാതീരവനാന്തരം വിദധതീ കല്യാണജന്മസ്ഥലീ

കാഞ്ചീമധ്യമഹാമണിര്വിജയതേ കാചിത്കൃപാകന്ദലീ

॥9॥

ശ്ലോക 11

രാകാചന്ദ്രസമാനകാന്തിവദനാ നാകാധിരാജസ്തുതാ

മൂകാനാമപി കുര്വതീ സുരധനീനീകാശവാഗ്വൈഭവമ് ।

ശ്രീകാഞ്ചീനഗരീവിഹാരരസികാ ശോകാപഹന്ത്രീ സതാമ്

ഏകാ പുണ്യപരമ്പരാ പശുപതേരാകാരിണീ രാജതേ

॥10॥

ശ്ലോക 12

ജാതാ ശീതലശൈലതഃ സുകൃതിനാം ദൃശ്യാ പരം ദേഹിനാം

ലോകാനാം ക്ഷണമാത്രസംസ്മരണതഃ സന്താപവിച്ഛേദിനീ ।

ആശ്ചര്യം ബഹു ഖേലനം വിതനുതേ നൈശ്ചല്യമാബിഭ്രതീ

കമ്പായാസ്തടസീമ്നി കാപി തടിനീ കാരുണ്യപാഥോമയീ

॥11॥

ശ്ലോക 13

ഐക്യം യേന വിരച്യതേ ഹരതനൌ ദമ്ഭാവപുമ്ഭാവുകേ

രേഖാ യത്കചസീമ്നി ശേഖരദശാം നൈശാകരീ ഗാഹതേ ।

ഔന്നത്യം മുഹുരേതി യേന സ മഹാന്മേനാസഖഃ സാനുമാന്

കമ്പാതീരവിഹാരിണാ സശരണാസ്തേനൈവ ധാമ്നാ വയമ്

॥12॥

ശ്ലോക 14

അക്ഷ്ണോശ്ച സ്തനയോഃ ശ്രിയാ ശ്രവണയോര്ബാഹ്വോശ്ച മൂലം സ്പൃശന്

ഉത്തംസേന മുഖേന ച പ്രതിദിനം ദ്രുഹ്യന്പയോജന്മനേ ।

മാധുര്യേണ ഗിരാം ഗതേന മൃദുനാ ഹംസാങ്ഗനാം ഹ്രേപയന്

കാഞ്ചീസീമ്നി ചകാസ്തി കോഽപി കവിതാസന്താനബീജാങ്കുരഃ

॥13॥

ശ്ലോക 15

ഖണ്ഡം ചാന്ദ്രമസം വതംസമനിശം കാഞ്ചീപുരേ ഖേലനം

കാലായശ്ഛവിതസ്കരീം തനുരുചിം കര്ണജപേ ലോചനേ ।

താരുണ്യോഷ്മനഖമ്പചം സ്തനഭരം ജങ്ഘാസ്പൃശം കുന്തലം

ഭാഗ്യം ദേശികസഞ്ചിതം മമ കദാ സമ്പാദയേദമ്ബികേ

॥14॥

ശ്ലോക 16

തന്വാനം നിജകേലിസൌധസരണിം നൈസര്ഗികീണാം ഗിരാം

കേദാരം കവിമല്ലസൂക്തിലഹരീസസ്യശ്രിയാം ശാശ്വതമ് ।

അംഹോവഞ്ചനചുഞ്ചു കിഞ്ചന ഭജേ കാഞ്ചീപുരീമണ്ഡനം

പര്യായച്ഛവി പാകശാസനമണേഃ പൌഷ്പേഷവം പൌരുഷമ്

॥15॥

ശ്ലോക 17

ആലോകേ മുഖപങ്കജേ ച ദധതീ സൌധാകരീം ചാതുരീം

ചൂഡാലങ്ക്രിയമാണപങ്കജവനീവൈരാഗമപ്രക്രിയാ ।

മുഗ്ധസ്മേരമുഖീ ഘന്സതനതടീമൂര്ച്ഛാലമധ്യാഞ്ചിതാ

കാഞ്ചീസീമനി കാമിനീ വിജയതേ കാചിജ്ജഗന്മോഹിനീ

॥16॥

ശ്ലോക 18

യസ്മിന്നമ്ബ ഭവത്കടാക്ഷരജനീ മന്ദേഽപി മന്ദസ്മിത-

ജ്യോത്സ്നാസംസ്നപിതാ ഭവത്യഭിമുഖീ തം പ്രത്യഹോ ദേഹിനമ് ।

ദ്രക്ഷാമാക്ഷികമാധുരീമദഭരവ്രീഡാകരീ വൈഖരീ

കാമാക്ഷി സ്വയമാതനോത്യഭിസൃതിം വാമേക്ഷണേവ ക്ഷണമ്

॥17॥

ശ്ലോക 19

കാലിന്ദീജലകാന്തയഃ സ്മിതരുചിസ്വര്വാഹിനീപാഥസി

പ്രൌഢധ്വാന്തരുചഃ സ്ഫുടാധരമഹോലൌഹിത്യസന്ധ്യോദയേ ।

മണിക്യോപലകുണ്ഡലാംശുശിഖിനി വ്യാമിശ്രധൂമശ്രിയഃ

കല്യാണൈകഭുവഃ കടാക്ഷസുഷമാഃ കാമാക്ഷി രാജന്തി തേ

॥18॥

ശ്ലോക 20

കലകലരണത്കാഞ്ചീ കാഞ്ചീവിഭൂഷണമാലികാ

കചഭരലസച്ചന്ദ്രാ ചന്ദ്രാവതംസസധര്മിണീ ।

കവികുലഗിരഃ ശ്രാവംശ്രാവം മിലത്പുലകാങ്കുരാ

വിരചിതശിരഃകമ്പാ കമ്പാതടേ പരിശോഭതേ

॥19॥

ശ്ലോക 21

സരസവചസാം വീചീ നീചീഭവന്മധുമാധുരീ

ഭരിതഭുവനാ കീര്തിര്മൂര്തിര്മനോഭവജിത്വരീ ।

ജനനി മനസോ യോഗ്യം ഭോഗ്യം നൃണാം തവ ജായതേ

കഥമിവ വിനാ കാഞ്ചീഭൂഷേ കടാക്ഷതരങ്ഗിതമ്

॥20॥

ശ്ലോക 22

ഭ്രമരിതസരിത്കൂലോ നീലോത്പലപ്രഭയാഽഽഭയാ

നതജനതമഃഖണ്ഡീ തുണ്ഡീരസീമ്നി വിജൃമ്ഭതേ ।

അചലതപസാമേകഃ പാകഃ പ്രസൂനശരാസന-

പ്രതിഭടമനോഹാരീ നാരീകുലൈകശിഖാമണിഃ

॥21॥

ശ്ലോക 23

മധുരവചസോ മന്ദസ്മേരാ മതങ്ഗജഗാമിനഃ

തരുണിമജുഷസ്താപിച്ഛാഭാസ്തമഃപരിപന്ഥിനഃ ।

കുചഭരനതാഃ കുര്യുര്ഭദ്രം കുരങ്ഗവിലോചനാഃ

കലിതകരുണാഃ കാഞ്ചീഭാജഃ കപാലിമഹോത്സവാഃ

॥22॥

ശ്ലോക 24

കമലസുഷമാക്ഷ്യാരോഹേ വിചക്ഷണവീക്ഷണാഃ

കുമുദസുകൃതക്രീഡാചൂഡാലകുന്തലബന്ധുരാഃ ।

രുചിരരുചിഭിസ്താപിച്ഛശ്രീപ്രപഞ്ചനചുഞ്ചവഃ

പുരവിജയിനഃ കമ്പാതീരേ സ്ഫുരന്തി മനോരഥാഃ

॥23॥

ശ്ലോക 25

കലിതരതയഃ കാഞ്ചീലീലാവിധൌ കവിമണ്ഡലീ-

വചനലഹരീവാസന്തീനാം വസന്തവിഭൂതയഃ ।

കുശലവിധയേ ഭൂയാസുര്മേ കുരങ്ഗവിലോചനാഃ

കുസുമവിശിഖാരാതേരക്ഷ്ണാം കുതൂഹലവിഭ്രമാഃ

॥24॥

ശ്ലോക 26

കബലിതതമസ്കാണ്ഡാസ്തുണ്ഡീരമണ്ഡലമണ്ഡനാഃ

സരസിജവനീസന്താനാനാമരുന്തുദശേഖരാഃ ।

നയനസരണേര്നേദീയംസഃ കദാ നു ഭവന്തി മേ

തരുണജലദശ്യാമാഃ ശമ്ഭോസ്തപഃഫലവിഭ്രമാഃ

॥25॥

ശ്ലോക 27

അചരമമിഷും ദീനം മീനധ്വജസ്യ മുഖശ്രിയാ

സരസിജഭുവോ യാനം മ്ലാനം ഗതേന ച മഞ്ജുനാ ।

ത്രിദശസദസാമന്നം ഖിന്നം ഗിരാ ച വിതന്വതീ

തിലകയതി സാ കമ്പാതീരം ത്രിലോചനസുന്ദരീ

॥26॥

ശ്ലോക 28

ജനനി ഭുവനേ ചങ്ക്രമ്യേഽഹം കിയന്തമനേഹസം

കുപുരുഷകരഭ്രഷ്ടൈര്ദുഷ്ടൈര്ധനൈരുദരമ്ഭരിഃ ।

തരുണകരുണേ തന്ദ്രാശൂന്യേ തരങ്ഗയ ലോചനേ

നമതി മയി തേ കിഞ്ചിത്കാഞ്ചീപുരീമണിദീപികേ

॥27॥

ശ്ലോക 29

മുനിജനമനഃപേടീരത്നം സ്ഫുരത്കരുണാനടീ-

വിഹരണകലാഗേഹം കാഞ്ചീപുരീമണിഭൂഷണമ് ।

ജഗതി മഹതോ മോഹവ്യാധേര്നൃണാം പരമൌഷധം

പുരഹരദൃശാം സാഫല്യം മേ പുരഃ പരിജൃമ്ഭതാമ്

॥28॥

ശ്ലോക 30

മുനിജനമോധാമ്നേ ധാമ്നേ വചോമയജാഹ്നവീ-

ഹിമഗിരിതടപ്രാഗ്ഭാരായാക്ഷരായ പരാത്മനേ ।

വിഹരണജുഷേ കാഞ്ചീദേശേ മഹേശ്വരലോചന-

ത്രിതയസരസക്രീഡാസൌധാങ്ഗണായ നമോ നമഃ

॥29॥

ശ്ലോക 31

മരകതരുചാം പ്രത്യാദേശം മഹേശ്വരചക്ഷുഷാമ്

അമൃതലഹരീപൂരം പാരം ഭവാഖ്യപയോനിധേഃ ।

സുചരിതഫലം കാഞ്ചീഭാജോ ജനസ്യ പചേലിമം

ഹിമശിഖരിണോ വംശസ്യൈകം വതംസമുപാസ്മഹേ

॥30॥

ശ്ലോക 32

പ്രണമനദിനാരമ്ഭേ കമ്പാനദീസഖി താവകേ

സരസകവിതോന്മേഷഃ പൂഷാ സതാം സമുദഞ്ചിതഃ ।

പ്രതിഭടമഹാപ്രൌഢപ്രോദ്യത്കവിത്വകുമുദ്വതീം

നയതി തരസാ നിദ്രാമുദ്രാം നഗേശ്വരകന്യകേ

॥31॥

ശ്ലോക 33

ശമിതജഡിമാരമ്ഭാ കമ്പാതടീനികടേചരീ

നിഹതദുരിതസ്തോമാ സോമാര്ധമുദ്രിതകുന്തലാ ।

ഫലിതസുമനോവാഞ്ഛാ പാഞ്ചായുധീ പരദേവതാ

സഫലയതു മേ നേത്രേ ഗോത്രേശ്വരപ്രിയനന്ദിനീ

॥32॥

ശ്ലോക 34

മമ തു ധിഷണാ പീഡ്യാ ജാഡ്യാതിരേക കഥം ത്വയാ

കുമുദസുഷമാമൈത്രീപാത്രീവതംസിതകുന്തലാമ് ।

ജഗതി ശമിതസ്തമ്ഭാം കമ്പാനദീനിലയാമസൌ

ശ്രിയതി ഹി ഗലത്തന്ദ്രാ ചന്ദ്രാവതംസസധര്മിണീമ്

॥33॥

ശ്ലോക 35

പരിമലപരീപാകോദ്രേകം പയോമുചി കാഞ്ചനേ

ശിഖരിണി പുനര്ദ്ബൈധീഭാവം ശശിന്യരുണാതപമ് ।

അപി ച ജനയന്കമ്ബോര്ലക്ഷ്മീമനമ്ബുനി കോഽപ്യസൌ

കുസുമധനുഷഃ കാഞ്ചീദേശേ ചകാസ്തി പരാക്രമഃ

॥34॥

ശ്ലോക 36

പുരദമയിതുര്വാമോത്സങ്ഗസ്ഥലേന രസജ്ഞയാ

സരസകവിതാഭാജാ കാഞ്ചീപുരോദരസീമയാ ।

തടപരിസരൈര്നീഹാരാദ്രേര്വചോഭിരകൃത്രിമൈഃ

കിമിവ ന തുലാമസ്മച്ചേതോ മഹേശ്വരി ഗാഹതേ

॥35॥

ശ്ലോക 37

നയനയുഗലീമാസ്മാകീനാം കദാ നു ഫലേഗ്രഹീം

വിദധതി ഗതൌ വ്യാകുര്വാണാ ഗജേന്ദ്രചമത്ക്രിയാമ് ।

മരതകരുചോ മാഹേശാനാ ഘനസ്തനനമ്രിതാഃ

സുകൃതവിഭവാഃ പ്രാഞ്ചഃ കാഞ്ചീവതംസധുരന്ധരാഃ

॥36॥

ശ്ലോക 38

മനസിജയശഃപാരമ്പര്യം മരന്ദഝരീസുവാം

കവികുലഗിരാം കന്ദം കമ്പാനദീതടമണ്ഡനമ് ।

മധുരലലിതം മത്കം ചക്ഷുര്മനീഷിമനോഹരം

പുരവിജയിനഃ സര്വസ്വം തത്പുരസ്കുരുതേ കദാ

॥37॥

ശ്ലോക 39

ശിഥിലിതതമോലീലാം നീലാരവിന്ദവിലോചനാം

ദഹനവിലസത്ഫാലാം ശ്രീകാമകോടിമുപാസ്മഹേ ।

കരധൃതസച്ഛൂലാം കാലാരിചിത്തഹരാം പരാം

മനസിജകൃപാലീലാം ലോലാലകാമലികേക്ഷണാമ്

॥38॥

ശ്ലോക 40

കലാലീലാശാലാ കവികുലവചഃകൈരവവനീ-

ശരജ്ജ്യോത്സ്നാധാരാ ശശധരശിശുശ്ലാഘ്യമുകുടീ ।

പുനീതേ നഃ കമ്പാപുലിനതടസൌഹാര്ദതരലാ

കദാ ചക്ഷുര്മാര്ഗം കനകഗിരിധാനുഷ്കമഹിഷീ

॥39॥

ശ്ലോക 41

നമഃ സ്താന്നമ്രേഭ്യഃ സ്തനഗരിമഗര്വേണ ഗുരുണാ

ദധാനേഭ്യശ്ചൂഡാഭരണമമൃതസ്യന്ദി ശിശിരമ് ।

സദാ വാസ്തവേഭ്യഃ സുവിധഭുവി കമ്പാഖ്യസരിതേ

യശോവ്യാപാരേഭ്യഃ സുകൃതവിഭവേഭ്യോ രതിപതേഃ

॥40॥

ശ്ലോക 42

അസൂയന്തീ കാചിന്മരകതരുചോ നാകിമുകുടീ-

കദമ്ബം ചുമ്ബന്തീ ചരണനഖചന്ദ്രാംശുപടലൈഃ ।

തമോമുദ്രാം വിദ്രാവയതു മമ കാഞ്ചീര്നിലയനാ

ഹരോത്സങ്ഗശ്രീമന്മണിഗൃഹമഹാദീപകലികാ

॥41॥

ശ്ലോക 43

അനാദ്യന്താ കാചിത്സുജനനയനാനന്ദജനനീ

നിരുന്ധാനാ കാന്തിം നിജരുചിവിലാസൈര്ജലമുചാമ് ।

സ്മരാരേസ്താരല്യം മനസി ജനയന്തീ സ്വയമഹോ

ഗലത്കമ്പാ ശമ്പാ പരിലസതി കമ്പാപരിസരേ

॥42॥

ശ്ലോക 44

സുധാഡിണ്ഡീരശ്രീഃ സ്മിതരുചിഷു തുണ്ഡീരവിഷയം

പരിഷ്കുര്വാണാസൌ പരിഹസിതനീലോത്പലരുചിഃ ।

സ്തനാഭ്യാമാനമ്രാ സ്തബകയതു മേ കാങ്ക്ഷിതതരും

ദൃശാമൈശാനീനാം സുകൃതഫലപാണ്ഡിത്യഗരിമാ

॥43॥

ശ്ലോക 45

കൃപാധാരാദ്രോണീ കൃപണധിഷണാനാം പ്രണമതാം

നിഹന്ത്രീ സന്താപം നിഗമമുകുടോത്തംസകലികാ ।

പരാ കാഞ്ചീലീലാപരിചയവതീ പര്വതസുതാ

ഗിരാം നീവീ ദേവീ ഗിരിശപരതന്ത്രാ വിജയതേ

॥44॥

ശ്ലോക 46

കവിത്വശ്രീകന്ദഃ സുകൃതപരിപാടീ ഹിമഗിരേഃ

വിധാത്രീ വിശ്വേഷാം വിഷമശരവീരധ്വജപടീ ।

സഖീ കമ്പാനദ്യാഃ പദഹസിതപാഥോജയുഗലീ

പുരാണോ പായാന്നഃ പുരമഥനസാമ്രാജ്യപദവീ

॥45॥

ശ്ലോക 47

ദരിദ്രാണാ മധ്യേ ദരദലിതതാപിച്ഛസുഷമാഃ

സ്തനാഭോഗക്കാന്താസ്തരുണഹരിണാങ്കാങ്കിതകചാഃ ।

ഹരാധീനാ നാനാവിബുധമുകുടീചുമ്ബിതപദാഃ

കദാ കമ്പാതീരേ കഥയ വിഹരാമോ ഗിരിസുതേ

॥46॥

ശ്ലോക 48

വരീവര്തു സ്ഥേമാ ത്വയി മമ ഗിരാം ദേവി മനസോ

നരീനര്തു പ്രൌഢാ വദനകമലേ വാക്യലഹരീ ।

ചരീചര്തു പ്രജ്ഞാജനനി ജഡിമാനഃ പരജനേ

സരീസര്തു സ്വൈരം ജനനി മയി കാമാക്ഷി കരുണാ

॥47॥

ശ്ലോക 49

ക്ഷണാത്തേ കാമാക്ഷി ഭ്രമരസുഷമാശിക്ഷണഗുരുഃ

കടാക്ഷവ്യാക്ഷേപോ മമ ഭവതു മോക്ഷായ വിപദാമ് ।

നരീനര്തു സ്വൈരം വചനലഹരീ നിര്ജരപുരീ-

സരിദ്വീചീനീചീകരണപടുരാസ്യേ മമ സദാ

॥48॥

ശ്ലോക 50

പുരസ്താന്മേ ഭൂയഃപ്രശമനപരഃ സ്താന്മമ രുജാം

പ്രചാരസ്തേ കമ്പാതടവിഹൃതിസമ്പാദിനി ദൃശോഃ ।

ഇമാം യാച്ഞാമൂരീകുരു സപദി ദൂരീകുരു തമഃ-

പരീപാകം മത്കം സപദി ബുധലോകം ച നയ മാമ്

॥49॥

ശ്ലോക 51

ഉദഞ്ചന്തീ കാഞ്ചീനഗരനിലയേ ത്വത്കരുണയാ

സമൃദ്ധാ വാഗ്ധാടീ പരിഹസിതമാധ്വീ കവയതാമ് ।

ഉപാദത്തേ മാരപ്രതിഭടജടാജൂടമുകുടീ-

കുടീരോല്ലാസിന്യാഃ ശതമഖതടിന്യാ ജയപടീമ്

॥50॥

ശ്ലോക 52

ശ്രിയം വിദ്യാം ദദ്യാജ്ജനനി നമതാം കീര്തിമമിതാം

സുപുത്രാന് പ്രാദത്തേ തവ ഝടിതി കാമാക്ഷി കരുണാ ।

ത്രിലോക്യാമാധിക്യം ത്രിപുരപരിപന്ഥിപ്രണയിനി

പ്രണാമസ്ത്വത്പാദേ ശമിതദുരിതേ കിം ന കുരുതേ

॥51॥

ശ്ലോക 53

മനഃസ്തമ്ഭം സ്തമ്ഭം ഗമയദുപകമ്പം പ്രണമതാം

സദാ ലോലം നീലം ചികുരജിതലോലമ്ബനികരമ് ।

ഗിരാം ദൂരം സ്മേരം ധൃതശശികിശോരം പശുപതേഃ

ദൃശാം യോഗ്യം ഭോഗ്യം തുഹിനഗിരിഭാഗ്യം വിജയതേ

॥52॥

ശ്ലോക 54

ഘനശ്യാമാന്കാമാന്തകമഹിഷി കാമാക്ഷി മധുരാന്

ദൃശാം പാതാനേതാനമൃതജലശീതാനനുപമാന് ।

ഭവോത്പാതേ ഭീതേ മയി വിതര നാഥേ ദൃഢഭവ-

ന്മനശ്ശോകേ മൂകേ ഹിമഗിരിപതാകേ കരുണയാ

॥53॥

ശ്ലോക 55

നതാനാം മന്ദാനാം ഭവനിഗലബന്ധാകുലധിയാം

മഹാന്ധ്യാം രുന്ധാനാമഭിലഷിതസന്താനലതികാമ് ।

ചരന്തീം കമ്പായാസ്തടഭുവി സവിത്രീം ത്രിജഗതാം

സ്മരാമസ്താം നിത്യം സ്മരമഥനജീവാതുകലികാമ്

॥54॥

ശ്ലോക 56

പരാ വിദ്യാ ഹൃദ്യാശ്രിതമദനവിദ്യാ മരകത-

പ്രഭാനീലാ ലീലാപരവശിതശൂലായുധമനാഃ ।

തമഃപൂരം ദൂരം ചരണനതപൌരന്ദരപുരീ-

മൃഗാക്ഷീ കാമാക്ഷീ കമലതരലാക്ഷീ നയതു മേ

॥55॥

ശ്ലോക 57

അഹന്താഖ്യാ മത്കം കബലയതി ഹാ ഹന്ത ഹരിണീ

ഹഠാത്സംവിദ്രൂപം ഹരമഹിഷി സസ്യാങ്കുരമസൌ ।

കടാക്ഷവ്യാക്ഷേപപ്രകടഹരിപാഷാണപടലൈഃ

ഇമാമുച്ചൈരുച്ചാടയ ഝടിതി കാമാക്ഷി കൃപയാ

॥56॥

ശ്ലോക 58

ബുധേ വാ മൂകേ വാ തവ പതതി യസ്മിന്ക്ഷണമസൌ

കടാക്ഷഃ കാമാക്ഷി പ്രകടജഡിമക്ഷോദപടിമാ ।

കഥങ്കാരം നാസ്മൈ കരമുകുലചൂഡാലമുകുടാ

നമോവാകം ബ്രൂയുര്നമുചിപരിപന്ഥിപ്രഭൃതയഃ

॥57॥

ശ്ലോക 59

പ്രതീചീം പശ്യാമഃ പ്രകടരുചിനീവാരകമണി-

പ്രഭാസധ്രീചീനാം പ്രദലിതഷഡാധാരകമലാമ് ।

ചരന്തീം സൌഷുമ്നേ പഥി പരപദേന്ദുപ്രവിഗല-

ത്സുധാര്ദ്രാം കാമാക്ഷീം പരിണതപരഞ്ജ്യോതിരുദയാമ്

॥58॥

ശ്ലോക 60

ജമ്ഭാരാതിപ്രഭൃതിമുകുടീഃ പാദയോഃ പീഠയന്തീ

ഗുമ്ഫാന്വാചാം കവിജനകൃതാന്സ്വൈരമാരാമയന്തീ ।

ശമ്പാലക്ഷ്മീം മണിഗണരുചാപാടലൈഃ പ്രാപയന്തീ

കമ്പാതീരേ കവിപരിഷദാം ജൃമ്ഭതേ ഭാഗ്യസീമാ

॥59॥

ശ്ലോക 61

ചന്ദ്രാപീഡാം ചതുരവദനാം ചഞ്ചലാപാങ്ഗലീലാം

കുന്ദസ്മേരാം കുചഭരനതാം കുന്തലോദ്ധൂതഭൃങ്ഗാമ് ।

മാരാരാതേര്മദനശിഖിനം മാംസലം ദീപയന്തീം

കാമാക്ഷീം താം കവികുലഗിരാം കല്പവല്ലീമുപാസേ

॥60॥

ശ്ലോക 62

കാലാമ്ഭോദപ്രകരസുഷമാം കാന്തിഭിസ്തിര്ജയന്തീ

കല്യാണാനാമുദയസരണിഃ കല്പവല്ലീ കവീനാമ് ।

കന്ദര്പാരേഃ പ്രിയസഹചരീ കല്മഷാണാം നിഹന്ത്രീ

കാഞ്ചീദേശം തിലകയതി സാ കാപി കാരുണ്യസീമാ

॥61॥

ശ്ലോക 63

ഊരീകുര്വന്നുരസിജതടേ ചാതുരീം ഭൂധരാണാം

പാഥോജാനാം നയനയുഗലേ പരിപന്ഥ്യം വിതന്വന് ।

കമ്പാതീരേ വിഹരതി രുചാ മോഘയന്മേഘശൈലീം

കോകദ്വേഷം ശിരസി കലയന്കോഽപി വിദ്യാവിശേഷഃ

॥62॥

ശ്ലോക 64

കാഞ്ചീലീലാപരിചയവതീ കാപി താപിച്ഛലക്ഷ്മീഃ

ജാഡ്യാരണ്യേ ഹുതവഹശിഖാ ജന്മഭൂമിഃ കൃപായാഃ ।

മാകന്ദശ്രീര്മധുരകവിതാചാതുരീ കോകിലാനാം

മാര്ഗേ ഭൂയാന്മമ നയനയോര്മാന്മഥീ കാപി വിദ്യാ

॥63॥

ശ്ലോക 65

സേതുര്മാതര്മരതകമയോ ഭക്തിഭാജാം ഭവാബ്ധൌ

ലീലാലോലാ കുവലയമയീ മാന്മഥീ വൈജയന്തീ ।

കാഞ്ചീഭൂഷാ പശുപതിദൃശാം കാപി കാലാഞ്ജനാലീ

മത്കം ദുഃഖം ശിഥിലയതു തേ മഞ്ജുലാപാങ്ഗമാലാ

॥64॥

ശ്ലോക 66

വ്യാവൃണ്വാനാഃ കുവലയദലപ്രക്രിയാവൈരമുദ്രാം

വ്യാകുര്വാണാ മനസിജമഹാരാജസാമ്രാജ്യലക്ഷ്മീമ് ।

കാഞ്ചീലീലാവിഹൃതിരസികേ കാങ്ക്ഷിതം നഃ ക്രിയാസുഃ

ബന്ധച്ഛേദേ തവ നിയമിനാം ബദ്ധദീക്ഷാഃ കടാക്ഷാഃ

॥65॥

ശ്ലോക 67

കാലാമ്ഭോദേ ശശിരുചി ദലം കൈതകം ദര്ശയന്തീ

മധ്യേസൌദാമിനി മധുലിഹാം മാലികാം രാജയന്തീ ।

ഹംസാരാവം വികചകമലേ മഞ്ജുമുല്ലാസയന്തീ

കമ്പാതീരേ വിലസതി നവാ കാപി കാരുണ്യലക്ഷ്മീഃ

॥66॥

ശ്ലോക 68

ചിത്രം ചിത്രം നിജമൃദുതയാ ഭര്ത്സയന്പല്ലവാലീം

പുംസാം കാമാന്ഭുവി ച നിയതം പൂരയന്പുണ്യഭാജാമ് ।

ജാതഃ ശൈലാന്ന തു ജലനിധേഃ സ്വൈരസഞ്ചാരശീലഃ

കാഞ്ചീഭൂഷാ കലയതു ശിവം കോഽപി ചിന്താമണിര്മേ

॥67॥

ശ്ലോക 69

താമ്രാമ്ഭോജം ജലദനികടേ തത്ര ബന്ധൂകപുഷ്പം

തസ്മിന്മല്ലീകുസുമസുഷമാം തത്ര വീണാനിനാദമ് ।

വ്യാവൃന്വാനാ സുകൃതലഹരീ കാപി കാഞ്ചിനഗര്യാമ്

ഐശാനീ സാ കലയതിതരാമൈന്ദ്രജാലം വിലാസമ്

॥68॥

ശ്ലോക 70

ആഹാരാംശം ത്രിദശസദസാമാശ്രയേ ചാതകാനാമ്

ആകാശോപര്യപി ച കലയന്നാലയം തുങ്ഗമേഷാമ് ।

കമ്പാതീരേ വിഹരതിതരാം കാമധേനുഃ കവീനാം

മന്ദസ്മേരോ മദനനിഗമപ്രക്രിയാസമ്പ്രദായഃ

॥69॥

ശ്ലോക 71

ആര്ദ്രീഭൂതൈരവിരലകൃപൈരാത്തലീലാവിലാസൈഃ

ആസ്ഥാപൂര്ണൈരധികചപലൈരഞ്ചിതാമ്ഭോജശില്പൈഃ ।

കാന്തൈര്ലക്ഷ്മീലലിതഭവനൈഃ കാന്തികൈവല്യസാരൈഃ

കാശ്മല്യം നഃ കബലയതു സാ കാമകോടീ കടാക്ഷൈഃ

॥70॥

ശ്ലോക 72

ആധൂന്വന്ത്യൈ തരലനയനൈരാങ്ഗജീം വൈജയന്തീമ്

ആനന്ദിന്യൈ നിജപദജുഷാമാത്തകാഞ്ചീപുരായൈ ।

ആസ്മാകീനം ഹൃദയമഖിലൈരാഗമാനാം പ്രപഞ്ചൈഃ

ആരാധ്യായൈ സ്പൃഹയതിതരാമദിമായൈ ജനന്യൈ

॥71॥

ശ്ലോക 73

ദൂരം വാചാം ത്രിദശസദസാം ദുഃഖസിന്ധോസ്തരിത്രം

മോഹക്ഷ്വേലക്ഷിതിരുഹവനേ ക്രൂരധാരം കുഠാരമ് ।

കമ്പാതീരപ്രണയി കവിഭിര്വര്ണിതോദ്യച്ചരിത്രം

ശാന്ത്യൈ സേവേ സകലവിപദാം ശാങ്കരം തത്കലത്രമ്

॥72॥

ശ്ലോക 74

ഖണ്ഡീകൃത്യ പ്രകൃതികുടിലം കല്മഷം പ്രാതിഭശ്രീ-

ശുണ്ഡീരത്വം നിജപദജുഷാം ശൂന്യതന്ദ്രം ദിശന്തീ ।

തുണ്ഡീരാഖ്യൈ മഹതി വിഷയേ സ്വര്ണവൃഷ്ടിപ്രദാത്രീ

ചണ്ഡീ ദേവീ കലയതി രതിം ചന്ദ്രചൂഡാലചൂഡേ

॥73॥

ശ്ലോക 75

യേന ഖ്യാതോ ഭവതി സ ഗൃഹീ പൂരുഷോ മേരുധന്വാ

യദ്ദൃക്കോണേ മദനനിഗമപ്രാഭവം ബോഭവീതി ।

യത്പ്രീത്യൈവ ത്രിജഗദധിപോ ജൃമ്ഭതേ കിമ്പചാനഃ

കമ്പാതീരേ സ ജയതി മഹാന്കശ്ചിദോജോവിശേഷഃ

॥74॥

ശ്ലോക 76

ധന്യാ ധന്യാ ഗതിരിഹ ഗിരാം ദേവി കാമാക്ഷി യന്മേ

നിന്ദ്യാം ഭിന്ദ്യാത്സപദി ജഡതാം കല്മഷാദുന്മിഷന്തീമ് ।

സാധ്വീ മാധ്വീരസമധുരതാഭഞ്ജിനീ മഞ്ജുരീതിഃ

വാണീവേണീ ഝടിതി വൃണുതാത്സ്വര്ധുനീസ്പര്ധിനീ മാമ്

॥75॥

ശ്ലോക 77

യസ്യാ വാടീ ഹൃദയകമലം കൌസുമീ യോഗഭാജാം

യസ്യാഃ പീഠീ സതതശിശിരാ ശീകരൈര്മാകരന്ദൈഃ ।

യസ്യാഃ പേടീ ശ്രുതിപരിചലന്മൌലിരത്നസ്യ കാഞ്ചീ

സാ മേ സോമാഭരണമഹിഷീ സാധയേത്കാങ്ക്ഷിതാനി

॥76॥

ശ്ലോക 78

ഏകാ മാതാ സകലജഗതാമീയുഷീ ധ്യാനമുദ്രാമ്

ഏകാമ്രാധീശ്വരചരണയോരേകതാനാം സമിന്ധേ ।

താടങ്കോദ്യന്മണിഗണരുചാ താമ്രകര്ണപ്രദേശാ

താരുണ്യശ്രീസ്തബകിതതനുസ്താപസീ കാപി ബാലാ

॥77॥

ശ്ലോക 79

ദന്താദന്തിപ്രകടനകരീ ദന്തിഭിര്മന്ദയാനൈഃ

മന്ദാരാണാം മദപരിണതിം മഥ്നതീ മന്ദഹാസൈഃ ।

അങ്കൂരാഭ്യാം മനസിജതരോരങ്കിതോരാഃ കുചാഭ്യാ-

മന്തഃകാഞ്ചി സ്ഫുരതി ജഗതാമാദിമാ കാപി മാതാ

॥78॥

ശ്ലോക 80

ത്രിയമ്ബകകുടുമ്ബിനീം ത്രിപുരസുന്ദരീമിന്ദിരാം

പുലിന്ദപതിസുന്ദരീം ത്രിപുരഭൈരവീം ഭാരതീമ് ।

മതങ്ഗകുലനായികാം മഹിഷമര്ദനീം മാതൃകാം

ഭണന്തി വിബുധോത്തമാ വിഹൃതിമേവ കാമാക്ഷി തേ

॥79॥

ശ്ലോക 81

മഹാമുനിമനോനടീ മഹിതരമ്യകമ്പാതടീ-

കുടീരകവിഹാരിണീ കുടിലബോധസംഹാരിണീ ।

സദാ ഭവതു കാമിനീ സകലദേഹിനാം സ്വാമിനീ

കൃപാതിശയകിങ്കരീ മമ വിഭൂതയേ ശാങ്കരീ

॥80॥

ശ്ലോക 82

ജഡാഃ പ്രകൃതിനിര്ധനാ ജനവിലോചനാരുന്തുദാ

നരാ ജനനി വീക്ഷണം ക്ഷണമവാപ്യ കാമാക്ഷി തേ ।

വചസ്സു മധുമാധുരീം പ്രകടയന്തി പൌരന്ദരീ-

വിഭൂതിഷു വിഡമ്ബനാം വപുഷി മാന്മഥീം പ്രക്രിയാമ്

॥81॥

ശ്ലോക 83

ഘന്സതനതടസ്ഫുടസ്ഫുരിതകഞ്ചുലീചഞ്ചലീ-

കൃതത്രിപുരശാസനാ സുജനശീലിതോപാസനാ ।

ദൃശോഃ സരണിമശ്നുതേ മമ കദാ നു കാഞ്ചീപുരേ

പരാ പരമയോഗിനാം മനസി ചിത്കുലാ പുഷ്കലാ

॥82॥

ശ്ലോക 84

കവീന്ദ്രഹൃദയേചരീ പരിഗൃഹീതകാഞ്ചീപുരീ

നിരൂഢകരുണാഝരീ നിഖിലലോകരക്ഷാകരീ ।

മനഃപഥദവീയസീ മദനശാസനപ്രേയസീ

മഹാഗുണഗരീയസീ മമ ദൃശോഽസ്തു നേദീയസീ

॥83॥

ശ്ലോക 85

ധനേന ന രമാമഹേ ഖലജനാന്ന സേവാമഹേ

ന ചാപലമയാമഹേ ഭവഭയാന്ന ദൂയാമഹേ ।

സ്ഥിരാം തനുമഹേതരാം മനസി കിം ച കാഞ്ചീരത-

സ്മരാന്തകകുടുമ്ബിനീചരണപല്ലവോപാസനാമ്

॥84॥

ശ്ലോക 86

സുരാഃ പരിജനാ വപുര്മനസിജായ വൈരായതേ

ത്രിവിഷ്ടപനിതമ്ബിനീകുചതടീ ച കേലീഗിരിഃ ।

ഗിരഃ സുരഭയോ വയസ്തരുണിമാ ദരിദ്രസ്യ വാ

കടാക്ഷസരണൌ ക്ഷണം നിപതിതസ്യ കാമാക്ഷി തേ

॥85॥

ശ്ലോക 87

പവിത്രയ ജഗത്ത്രയീവിബുധബോധജീവാതുഭിഃ

പുരത്രയവിമര്ദിനഃ പുലകകഞ്ചുലീദായിഭിഃ ।

ഭവക്ഷയവിചക്ഷണൈര്വ്യസനമോക്ഷണൈര്വീക്ഷണൈഃ

നിരക്ഷരശിരോമണിം കരുണയൈവ കാമാക്ഷി മാമ്

॥86॥

ശ്ലോക 88

കദാ കലിതഖേലനാഃ കരുണയൈവ കാഞ്ചീപുരേ

കലായമുകുലത്വിഷഃ ശുഭകദമ്ബപൂര്ണാങ്കുരാഃ ।

പയോധരഭരാലസാഃ കവിജനേഷു തേ ബന്ധുരാഃ

പചേലിമകൃപാരസാ പരിപതന്തി മാര്ഗേ ദൃശോഃ

॥87॥

ശ്ലോക 89

അശോധ്യമചലോദ്ഭവം ഹൃദയനന്ദനം ദേഹിനാമ്

അനര്ഘമധികാഞ്ചി തത്കിമപി രത്നമുദ്ദ്യോതതേ ।

അനേന സമലങ്കൃതാ ജയതി ശങ്കരാങ്കസ്ഥലീ

കദാസ്യ മമ മാനസം വ്രജതി പേടികാവിഭ്രമമ്

॥88॥

ശ്ലോക 90

പരാമൃതഝരീപ്ലുതാ ജയതി നിത്യമന്തശ്ചരീ

ഭുവാമപി ബഹിശ്ചരീ പരമസംവിദേകാത്മികാ ।

മഹദ്ഭിരപരോക്ഷിതാ സതതമേവ കാഞ്ചീപുരേ

മമാന്വഹമഹമ്മതിര്മനസി ഭാതു മാഹേശ്വരീ

॥89॥

ശ്ലോക 91

തമോവിപിനധാവിനം സതതമേവ കാഞ്ചീപുരേ

വിഹാരരസികാ പരാ പരമസംവിദുര്വീരുഹേ ।

കടാക്ഷനിഗലൈര്ദൃഢം ഹൃദയദുഷ്ടദന്താവലം

ചിരം നയതു മാമകം ത്രിപുരവൈരിസീമന്തിനീ

॥90॥

ശ്ലോക 92

ത്വമേവ സതി ചണ്ഡികാ ത്വമസി ദേവി ചാമുണ്ഡികാ

ത്വമേവ പരമാതൃകാ ത്വമപി യോഗിനീരൂപിണീ ।

ത്വമേവ കില ശാമ്ഭവീ ത്വമസി കാമകോടീ ജയാ

ത്വമേവ വിജയാ ത്വയി ത്രിജഗദമ്ബ കിം ബ്രൂമഹേ

॥91॥

ശ്ലോക 93

പരേ ജനനി പാര്വതി പ്രണതപാലിനി പ്രാതിഭ-

പ്രദാത്രി പരമേശ്വരി ത്രിജഗദാശ്രിതേ ശാശ്വതേ ।

ത്രിയമ്ബകകുടുമ്ബിനി ത്രിപദസങ്ഗിനി ത്രീക്ഷണേ

ത്രിശക്തിമയി വീക്ഷണം മയി നിധേഹി കാമാക്ഷി തേ

॥92॥

ശ്ലോക 94

മനോമധുകരോത്സവം വിദധതീ മനീഷാജുഷാം

സ്വയമ്പ്രഭവവൈഖരീവിപിനവീഥികാലമ്ബിനീ ।

അഹോ ശിശിരിതാ കൃപാമധുരസേന കമ്പാതടേ

ചരാചരവിധായിനീ ചലതി കാപി ചിന്മഞ്ജരീ

॥93॥

ശ്ലോക 95

കലാവതി കലാഭൃതോ മുകുടസീമ്നി ലീലാവതി

സ്പൃഹാവതി മഹേശ്വരേ ഭുവനമോഹനേ ഭാസ്വതി ।

പ്രഭാവതി രമേ സദാ മഹിതരൂപശോഭാവതി

ത്വരാവതി പരേ സതാം ഗുരുകൃപാമ്ബുധാരാവതി

॥94॥

ശ്ലോക 96

ത്വയൈവ ജഗദമ്ബയാ ഭുവനമണ്ഡലം സൂയതേ

ത്വയൈവ കരുണാര്ദ്രയാ തദപി രക്ഷണം നീയതേ ।

ത്വയൈവ ഖരകോപയാ നയനപാവകേ ഹൂയതേ

ത്വയൈവ കില നിത്യയാ ജഗതി സന്തതം സ്ഥീയതേ

॥95॥

ശ്ലോക 97

ചരാചരജഗന്മയീം സകലഹൃന്മയീം ചിന്മയീം

ഗുണത്രയമയീം ജഗത്ത്രയമയീം ത്രിധാമാമയീമ് ।

പരാപരമയീം സദാ ദശദിശാം നിശാഹര്മയീം

പരാം സതതസന്മയീം മനസി ചിന്മയീം ശീലയേ

॥96॥

ശ്ലോക 98

ജയ ജഗദമ്ബികേ ഹരകുടുമ്ബിനി വക്ത്രരുചാ

ജിതശരദമ്ബുജേ ഘനവിഡമ്ബിനി കേശരുചാ ।

പരമവലമ്ബനം കുരു സദാ പരരൂപധരേ

മമ ഗതസംവിദോ ജഡിമഡമ്ബരതാണ്ഡവിനഃ

॥97॥

ശ്ലോക 99

ഭുവനജനനി ഭൂഷാഭൂതചന്ദ്രേ നമസ്തേ

കലുഷശമനി കമ്പാതീരഗേഹേ നമസ്തേ ।

നിഖിലനിഗമവേദ്യേ നിത്യരൂപേ നമസ്തേ

പരശിവമയി പാശച്ഛേദഹസ്തേ നമസ്തേ

॥98॥

ശ്ലോക 100

ക്വണത്കാഞ്ചീ കാഞ്ചീപുരമണിവിപഞ്ചീലയഝരീ-

ശിരഃകമ്പാ കമ്പാവസതിരനുകമ്പാജലനിധിഃ ।

ഘനശ്യാമാ ശ്യാമാ കഠിനകുചസീമാ മനസി മേ

മൃഗാക്ഷീ കാമാക്ഷീ ഹരനടനസാക്ഷീ വിഹരതാത്

॥99॥

ശ്ലോക 101

സമരവിജയകോടീ സാധകാനന്ദധാടീ

മൃദുഗുണപരിപേടീ മുഖ്യകാദമ്ബവാടീ ।

മുനിനുതപരിപാടീ മോഹിതാജാണ്ഡകോടീ

പരമശിവവധൂടീ പാതു മാം കാമകോടീ

॥100॥

ശ്ലോക 102

ഇമം പരവരപ്രദം പ്രകൃതിപേശലം പാവനം

പരാപരചിദാകൃതിപ്രകടനപ്രദീപായിതമ് ।

സ്തവം പഠതി നിത്യദാ മനസി ഭാവയന്നമ്ബികാം

ജപൈരലമലം മഖൈരധികദേഹസംശോഷണൈഃ

॥101॥

ശ്ലോക 103

॥ ഇതി സ്തുതിശതകം സമ്പൂര്ണമ് ॥