ಮೂಕ ಪಞ್ಚ ಶತಿ 3 - ಸ್ತುತಿ ಶತಕಮ್

ಮೂಕ ಪಞ್ಚ ಶತಿ 3 - ಸ್ತುತಿ ಶತಕಮ್

ಶ್ಲೋಕ 1

ಪಾಣ್ಡಿತ್ಯಂ ಪರಮೇಶ್ವರಿ ಸ್ತುತಿವಿಧೌ ನೈವಾಶ್ರಯನ್ತೇ ಗಿರಾಂ

ವೈರಿಞ್ಚಾನ್ಯಪಿ ಗುಮ್ಫನಾನಿ ವಿಗಲದ್ಗರ್ವಾಣಿ ಶರ್ವಾಣಿ ತೇ ।

ಸ್ತೋತುಂ ತ್ವಾಂ ಪರಿಫುಲ್ಲನೀಲನಲಿನಶ್ಯಾಮಾಕ್ಷಿ ಕಾಮಾಕ್ಷಿ ಮಾಂ

ವಾಚಾಲೀಕುರುತೇ ತಥಾಪಿ ನಿತರಾಂ ತ್ವತ್ಪಾದಸೇವಾದರಃ

ಶ್ಲೋಕ 2

ತಾಪಿಞ್ಛಸ್ತಬಕತ್ವಿಷೇ ತನುಭೃತಾಂ ದಾರಿದ್ರ್ಯಮುದ್ರಾದ್ವಿಷೇ

ಸಂಸಾರಾಖ್ಯತಮೋಮುಷೇ ಪುರರಿಪೋರ್ವಾಮಾಙ್ಕಸೀಮಾಜುಷೇ ।

ಕಮ್ಪಾತೀರಮುಪೇಯುಷೇ ಕವಯತಾಂ ಜಿಹ್ವಾಕುಟೀಂ ಜಗ್ಮುಷೇ

ವಿಶ್ವತ್ರಾಣಪುಷೇ ನಮೋಽಸ್ತು ಸತತಂ ತಸ್ಮೈ ಪರಞ್ಜ್ಯೋತಿಷೇ

॥1॥

ಶ್ಲೋಕ 3

ಯೇ ಸನ್ಧ್ಯಾರುಣಯನ್ತಿ ಶಙ್ಕರಜಟಾಕಾನ್ತಾರಚನ್ರಾರ್ಭಕಂ

ಸಿನ್ದೂರನ್ತಿ ಚ ಯೇ ಪುರನ್ದರವಧೂಸೀಮನ್ತಸೀಮಾನ್ತರೇ ।

ಪುಣ್ಯ.ಂ ಯೇ ಪರಿಪಕ್ಕಯನ್ತಿ ಭಜತಾಂ ಕಾಞ್ಚೀಪುರೇ ಮಾಮಮೀ

ಪಾಯಾಸುಃ ಪರಮೇಶ್ವರಪ್ರಣಯಿನೀಪಾದೋದ್ಭವಾಃ ಪಾಂಸವಃ

॥2॥

ಶ್ಲೋಕ 4

ಕಾಮಾಡಮ್ಬರಪೂರಯಾ ಶಶಿರುಚಾ ಕಮ್ರಸ್ಮಿತಾನಾಂ ತ್ವಿಷಾ

ಕಾಮಾರೇರನುರಾಗಸಿನ್ಧುಮಧಿಕಂ ಕಲ್ಲೋಲಿತಂ ತನ್ವತೀ ।

ಕಾಮಾಕ್ಷೀತಿ ಸಮಸ್ತಸಜ್ಜನನುತಾ ಕಲ್ಯಾಣದಾತ್ರೀ ನೃಣಾಂ

ಕಾರುಣ್ಯಾಕುಲಮಾನಸಾ ಭಗವತೀ ಕಮ್ಪಾತಟೇ ಜೃಮ್ಭತೇ

॥3॥

ಶ್ಲೋಕ 5

ಕಾಮಾಕ್ಷೀಣಪರಾಕ್ರಮಪ್ರಕಟನಂ ಸಮ್ಭಾವಯನ್ತೀ ದೃಶಾ

ಶ್ಯಾಮಾ ಕ್ಷೀರಸಹೋದರಸ್ಮಿತರುಚಿಪ್ರಕ್ಷಾಲಿತಾಶಾನ್ತರಾ ।

ಕಾಮಾಕ್ಷೀಜನಮೌಲಿಭೂಷಣಮಣಿರ್ವಾಚಾಂ ಪರಾ ದೇವತಾ

ಕಾಮಾಕ್ಷೀತಿ ವಿಭಾತಿ ಕಾಪಿ ಕರುಣಾ ಕಮ್ಪಾತಟಿನ್ಯಾಸ್ತಟೇ

॥4॥

ಶ್ಲೋಕ 6

ಶ್ಯಾಮಾ ಕಾಚನ ಚನ್ದ್ರಿಕಾ ತ್ರಿಭುವನೇ ಪುಣ್ಯಾತ್ಮನಾಮಾನನೇ

ಸೀಮಾಶೂನ್ಯಕವಿತ್ವವರ್ಷಜನನೀ ಯಾ ಕಾಪಿ ಕಾದಮ್ಬಿನೀ ।

ಮಾರಾರಾತಿಮನೋವಿಮೋಹನವಿಧೌ ಕಾಚಿತತ್ತಮಃಕನ್ದಲೀ

ಕಾಮಾಕ್ಷ್ಯಾಃ ಕರುಣಾಕಟಾಕ್ಷಲಹರೀ ಕಾಮಾಯ ಮೇ ಕಲ್ಪತಾಮ್

॥5॥

ಶ್ಲೋಕ 7

ಪ್ರೌಢಧ್ವಾನ್ತಕದಮ್ಬಕೇ ಕುಮುದಿನೀಪುಣ್ಯಾಙ್ಕುರಂ ದರ್ಶಯನ್

ಜ್ಯೋತ್ಸ್ನಾಸಙ್ಗಮನೇಽಪಿ ಕೋಕಮಿಥುನಂ ಮಿಶ್ರಂ ಸಮುದ್ಭಾವಯನ್ ।

ಕಾಲಿನ್ದೀಲಹರೀದಶಾಂ ಪ್ರಕಟಯನ್ಕಮ್ರಾಂ ನಭಸ್ಯದ್ಭುತಾಂ

ಕಶ್ಚಿನ್ನೇತ್ರಮಹೋತ್ಸವೋ ವಿಜಯತೇ ಕಾಞ್ಚೀಪುರೇ ಶೂಲಿನಃ

॥6॥

ಶ್ಲೋಕ 8

ತನ್ದ್ರಾಹೀನತಮಾಲನೀಲಸುಷಮೈಸ್ತಾರುಣ್ಯಲೀಲಾಗೃಹೈಃ

ತಾರಾನಾಥಕಿಶೋರಲಾಞ್ಛಿತಕಚೈಸ್ತಾಮ್ರಾರವಿನ್ದೇಕ್ಷಣೈಃ ।

ಮಾತಃ ಸಂಶ್ರಯತಾಂ ಮನೋ ಮನಸಿಜಪ್ರಾಗಲ್ಭ್ಯನಾಡಿನ್ಧಮೈಃ

ಕಮ್ಪಾತೀರಚರೈರ್ಘನಸ್ತನಭರೈಃ ಪುಣ್ಯಾಙ್ಕರೈಃ ಶಾಙ್ಕರೈಃ

॥7॥

ಶ್ಲೋಕ 9

ನಿತ್ಯಂ ನಿಶ್ಚಲತಾಮುಪೇತ್ಯ ಮರುತಾಂ ರಕ್ಷಾವಿಧಿಂ ಪುಷ್ಣತೀ

ತೇಜಸ್ಸಞ್ಚಯಪಾಟವೇನ ಕಿರಣಾನುಷ್ಣದ್ಯುತೇರ್ಮುಷ್ಣತೀ ।

ಕಾಞ್ಚೀಮಧ್ಯಗತಾಪಿ ದೀಪ್ತಿಜನನೀ ವಿಶ್ವಾನ್ತರೇ ಜೃಮ್ಭತೇ

ಕಾಚಿಚ್ಚಿತ್ರಮಹೋ ಸ್ಮೃತಾಪಿ ತಮಸಾಂ ನಿರ್ವಾಪಿಕಾ ದೀಪಿಕಾ

॥8॥

ಶ್ಲೋಕ 10

ಕಾನ್ತೈಃ ಕೇಶರುಚಾಂ ಚಯೈರ್ಭ್ರಮರಿತಂ ಮನ್ದಸ್ಮಿತೈಃ ಪುಷ್ಪಿತಂ

ಕಾನ್ತ್ಯಾ ಪಲ್ಲವಿತಂ ಪದಾಮ್ಬುರುಹಯೋರ್ನೇತ್ರತ್ವಿಷಾ ಪತ್ರಿತಮ್ ।

ಕಮ್ಪಾತೀರವನಾನ್ತರಂ ವಿದಧತೀ ಕಲ್ಯಾಣಜನ್ಮಸ್ಥಲೀ

ಕಾಞ್ಚೀಮಧ್ಯಮಹಾಮಣಿರ್ವಿಜಯತೇ ಕಾಚಿತ್ಕೃಪಾಕನ್ದಲೀ

॥9॥

ಶ್ಲೋಕ 11

ರಾಕಾಚನ್ದ್ರಸಮಾನಕಾನ್ತಿವದನಾ ನಾಕಾಧಿರಾಜಸ್ತುತಾ

ಮೂಕಾನಾಮಪಿ ಕುರ್ವತೀ ಸುರಧನೀನೀಕಾಶವಾಗ್ವೈಭವಮ್ ।

ಶ್ರೀಕಾಞ್ಚೀನಗರೀವಿಹಾರರಸಿಕಾ ಶೋಕಾಪಹನ್ತ್ರೀ ಸತಾಮ್

ಏಕಾ ಪುಣ್ಯಪರಮ್ಪರಾ ಪಶುಪತೇರಾಕಾರಿಣೀ ರಾಜತೇ

॥10॥

ಶ್ಲೋಕ 12

ಜಾತಾ ಶೀತಲಶೈಲತಃ ಸುಕೃತಿನಾಂ ದೃಶ್ಯಾ ಪರಂ ದೇಹಿನಾಂ

ಲೋಕಾನಾಂ ಕ್ಷಣಮಾತ್ರಸಂಸ್ಮರಣತಃ ಸನ್ತಾಪವಿಚ್ಛೇದಿನೀ ।

ಆಶ್ಚರ್ಯಂ ಬಹು ಖೇಲನಂ ವಿತನುತೇ ನೈಶ್ಚಲ್ಯಮಾಬಿಭ್ರತೀ

ಕಮ್ಪಾಯಾಸ್ತಟಸೀಮ್ನಿ ಕಾಪಿ ತಟಿನೀ ಕಾರುಣ್ಯಪಾಥೋಮಯೀ

॥11॥

ಶ್ಲೋಕ 13

ಐಕ್ಯಂ ಯೇನ ವಿರಚ್ಯತೇ ಹರತನೌ ದಮ್ಭಾವಪುಮ್ಭಾವುಕೇ

ರೇಖಾ ಯತ್ಕಚಸೀಮ್ನಿ ಶೇಖರದಶಾಂ ನೈಶಾಕರೀ ಗಾಹತೇ ।

ಔನ್ನತ್ಯಂ ಮುಹುರೇತಿ ಯೇನ ಸ ಮಹಾನ್ಮೇನಾಸಖಃ ಸಾನುಮಾನ್

ಕಮ್ಪಾತೀರವಿಹಾರಿಣಾ ಸಶರಣಾಸ್ತೇನೈವ ಧಾಮ್ನಾ ವಯಮ್

॥12॥

ಶ್ಲೋಕ 14

ಅಕ್ಷ್ಣೋಶ್ಚ ಸ್ತನಯೋಃ ಶ್ರಿಯಾ ಶ್ರವಣಯೋರ್ಬಾಹ್ವೋಶ್ಚ ಮೂಲಂ ಸ್ಪೃಶನ್

ಉತ್ತಂಸೇನ ಮುಖೇನ ಚ ಪ್ರತಿದಿನಂ ದ್ರುಹ್ಯನ್ಪಯೋಜನ್ಮನೇ ।

ಮಾಧುರ್ಯೇಣ ಗಿರಾಂ ಗತೇನ ಮೃದುನಾ ಹಂಸಾಙ್ಗನಾಂ ಹ್ರೇಪಯನ್

ಕಾಞ್ಚೀಸೀಮ್ನಿ ಚಕಾಸ್ತಿ ಕೋಽಪಿ ಕವಿತಾಸನ್ತಾನಬೀಜಾಙ್ಕುರಃ

॥13॥

ಶ್ಲೋಕ 15

ಖಣ್ಡಂ ಚಾನ್ದ್ರಮಸಂ ವತಂಸಮನಿಶಂ ಕಾಞ್ಚೀಪುರೇ ಖೇಲನಂ

ಕಾಲಾಯಶ್ಛವಿತಸ್ಕರೀಂ ತನುರುಚಿಂ ಕರ್ಣಜಪೇ ಲೋಚನೇ ।

ತಾರುಣ್ಯೋಷ್ಮನಖಮ್ಪಚಂ ಸ್ತನಭರಂ ಜಙ್ಘಾಸ್ಪೃಶಂ ಕುನ್ತಲಂ

ಭಾಗ್ಯಂ ದೇಶಿಕಸಞ್ಚಿತಂ ಮಮ ಕದಾ ಸಮ್ಪಾದಯೇದಮ್ಬಿಕೇ

॥14॥

ಶ್ಲೋಕ 16

ತನ್ವಾನಂ ನಿಜಕೇಲಿಸೌಧಸರಣಿಂ ನೈಸರ್ಗಿಕೀಣಾಂ ಗಿರಾಂ

ಕೇದಾರಂ ಕವಿಮಲ್ಲಸೂಕ್ತಿಲಹರೀಸಸ್ಯಶ್ರಿಯಾಂ ಶಾಶ್ವತಮ್ ।

ಅಂಹೋವಞ್ಚನಚುಞ್ಚು ಕಿಞ್ಚನ ಭಜೇ ಕಾಞ್ಚೀಪುರೀಮಣ್ಡನಂ

ಪರ್ಯಾಯಚ್ಛವಿ ಪಾಕಶಾಸನಮಣೇಃ ಪೌಷ್ಪೇಷವಂ ಪೌರುಷಮ್

॥15॥

ಶ್ಲೋಕ 17

ಆಲೋಕೇ ಮುಖಪಙ್ಕಜೇ ಚ ದಧತೀ ಸೌಧಾಕರೀಂ ಚಾತುರೀಂ

ಚೂಡಾಲಙ್ಕ್ರಿಯಮಾಣಪಙ್ಕಜವನೀವೈರಾಗಮಪ್ರಕ್ರಿಯಾ ।

ಮುಗ್ಧಸ್ಮೇರಮುಖೀ ಘನ್ಸತನತಟೀಮೂರ್ಚ್ಛಾಲಮಧ್ಯಾಞ್ಚಿತಾ

ಕಾಞ್ಚೀಸೀಮನಿ ಕಾಮಿನೀ ವಿಜಯತೇ ಕಾಚಿಜ್ಜಗನ್ಮೋಹಿನೀ

॥16॥

ಶ್ಲೋಕ 18

ಯಸ್ಮಿನ್ನಮ್ಬ ಭವತ್ಕಟಾಕ್ಷರಜನೀ ಮನ್ದೇಽಪಿ ಮನ್ದಸ್ಮಿತ-

ಜ್ಯೋತ್ಸ್ನಾಸಂಸ್ನಪಿತಾ ಭವತ್ಯಭಿಮುಖೀ ತಂ ಪ್ರತ್ಯಹೋ ದೇಹಿನಮ್ ।

ದ್ರಕ್ಷಾಮಾಕ್ಷಿಕಮಾಧುರೀಮದಭರವ್ರೀಡಾಕರೀ ವೈಖರೀ

ಕಾಮಾಕ್ಷಿ ಸ್ವಯಮಾತನೋತ್ಯಭಿಸೃತಿಂ ವಾಮೇಕ್ಷಣೇವ ಕ್ಷಣಮ್

॥17॥

ಶ್ಲೋಕ 19

ಕಾಲಿನ್ದೀಜಲಕಾನ್ತಯಃ ಸ್ಮಿತರುಚಿಸ್ವರ್ವಾಹಿನೀಪಾಥಸಿ

ಪ್ರೌಢಧ್ವಾನ್ತರುಚಃ ಸ್ಫುಟಾಧರಮಹೋಲೌಹಿತ್ಯಸನ್ಧ್ಯೋದಯೇ ।

ಮಣಿಕ್ಯೋಪಲಕುಣ್ಡಲಾಂಶುಶಿಖಿನಿ ವ್ಯಾಮಿಶ್ರಧೂಮಶ್ರಿಯಃ

ಕಲ್ಯಾಣೈಕಭುವಃ ಕಟಾಕ್ಷಸುಷಮಾಃ ಕಾಮಾಕ್ಷಿ ರಾಜನ್ತಿ ತೇ

॥18॥

ಶ್ಲೋಕ 20

ಕಲಕಲರಣತ್ಕಾಞ್ಚೀ ಕಾಞ್ಚೀವಿಭೂಷಣಮಾಲಿಕಾ

ಕಚಭರಲಸಚ್ಚನ್ದ್ರಾ ಚನ್ದ್ರಾವತಂಸಸಧರ್ಮಿಣೀ ।

ಕವಿಕುಲಗಿರಃ ಶ್ರಾವಂಶ್ರಾವಂ ಮಿಲತ್ಪುಲಕಾಙ್ಕುರಾ

ವಿರಚಿತಶಿರಃಕಮ್ಪಾ ಕಮ್ಪಾತಟೇ ಪರಿಶೋಭತೇ

॥19॥

ಶ್ಲೋಕ 21

ಸರಸವಚಸಾಂ ವೀಚೀ ನೀಚೀಭವನ್ಮಧುಮಾಧುರೀ

ಭರಿತಭುವನಾ ಕೀರ್ತಿರ್ಮೂರ್ತಿರ್ಮನೋಭವಜಿತ್ವರೀ ।

ಜನನಿ ಮನಸೋ ಯೋಗ್ಯಂ ಭೋಗ್ಯಂ ನೃಣಾಂ ತವ ಜಾಯತೇ

ಕಥಮಿವ ವಿನಾ ಕಾಞ್ಚೀಭೂಷೇ ಕಟಾಕ್ಷತರಙ್ಗಿತಮ್

॥20॥

ಶ್ಲೋಕ 22

ಭ್ರಮರಿತಸರಿತ್ಕೂಲೋ ನೀಲೋತ್ಪಲಪ್ರಭಯಾಽಽಭಯಾ

ನತಜನತಮಃಖಣ್ಡೀ ತುಣ್ಡೀರಸೀಮ್ನಿ ವಿಜೃಮ್ಭತೇ ।

ಅಚಲತಪಸಾಮೇಕಃ ಪಾಕಃ ಪ್ರಸೂನಶರಾಸನ-

ಪ್ರತಿಭಟಮನೋಹಾರೀ ನಾರೀಕುಲೈಕಶಿಖಾಮಣಿಃ

॥21॥

ಶ್ಲೋಕ 23

ಮಧುರವಚಸೋ ಮನ್ದಸ್ಮೇರಾ ಮತಙ್ಗಜಗಾಮಿನಃ

ತರುಣಿಮಜುಷಸ್ತಾಪಿಚ್ಛಾಭಾಸ್ತಮಃಪರಿಪನ್ಥಿನಃ ।

ಕುಚಭರನತಾಃ ಕುರ್ಯುರ್ಭದ್ರಂ ಕುರಙ್ಗವಿಲೋಚನಾಃ

ಕಲಿತಕರುಣಾಃ ಕಾಞ್ಚೀಭಾಜಃ ಕಪಾಲಿಮಹೋತ್ಸವಾಃ

॥22॥

ಶ್ಲೋಕ 24

ಕಮಲಸುಷಮಾಕ್ಷ್ಯಾರೋಹೇ ವಿಚಕ್ಷಣವೀಕ್ಷಣಾಃ

ಕುಮುದಸುಕೃತಕ್ರೀಡಾಚೂಡಾಲಕುನ್ತಲಬನ್ಧುರಾಃ ।

ರುಚಿರರುಚಿಭಿಸ್ತಾಪಿಚ್ಛಶ್ರೀಪ್ರಪಞ್ಚನಚುಞ್ಚವಃ

ಪುರವಿಜಯಿನಃ ಕಮ್ಪಾತೀರೇ ಸ್ಫುರನ್ತಿ ಮನೋರಥಾಃ

॥23॥

ಶ್ಲೋಕ 25

ಕಲಿತರತಯಃ ಕಾಞ್ಚೀಲೀಲಾವಿಧೌ ಕವಿಮಣ್ಡಲೀ-

ವಚನಲಹರೀವಾಸನ್ತೀನಾಂ ವಸನ್ತವಿಭೂತಯಃ ।

ಕುಶಲವಿಧಯೇ ಭೂಯಾಸುರ್ಮೇ ಕುರಙ್ಗವಿಲೋಚನಾಃ

ಕುಸುಮವಿಶಿಖಾರಾತೇರಕ್ಷ್ಣಾಂ ಕುತೂಹಲವಿಭ್ರಮಾಃ

॥24॥

ಶ್ಲೋಕ 26

ಕಬಲಿತತಮಸ್ಕಾಣ್ಡಾಸ್ತುಣ್ಡೀರಮಣ್ಡಲಮಣ್ಡನಾಃ

ಸರಸಿಜವನೀಸನ್ತಾನಾನಾಮರುನ್ತುದಶೇಖರಾಃ ।

ನಯನಸರಣೇರ್ನೇದೀಯಂಸಃ ಕದಾ ನು ಭವನ್ತಿ ಮೇ

ತರುಣಜಲದಶ್ಯಾಮಾಃ ಶಮ್ಭೋಸ್ತಪಃಫಲವಿಭ್ರಮಾಃ

॥25॥

ಶ್ಲೋಕ 27

ಅಚರಮಮಿಷುಂ ದೀನಂ ಮೀನಧ್ವಜಸ್ಯ ಮುಖಶ್ರಿಯಾ

ಸರಸಿಜಭುವೋ ಯಾನಂ ಮ್ಲಾನಂ ಗತೇನ ಚ ಮಞ್ಜುನಾ ।

ತ್ರಿದಶಸದಸಾಮನ್ನಂ ಖಿನ್ನಂ ಗಿರಾ ಚ ವಿತನ್ವತೀ

ತಿಲಕಯತಿ ಸಾ ಕಮ್ಪಾತೀರಂ ತ್ರಿಲೋಚನಸುನ್ದರೀ

॥26॥

ಶ್ಲೋಕ 28

ಜನನಿ ಭುವನೇ ಚಙ್ಕ್ರಮ್ಯೇಽಹಂ ಕಿಯನ್ತಮನೇಹಸಂ

ಕುಪುರುಷಕರಭ್ರಷ್ಟೈರ್ದುಷ್ಟೈರ್ಧನೈರುದರಮ್ಭರಿಃ ।

ತರುಣಕರುಣೇ ತನ್ದ್ರಾಶೂನ್ಯೇ ತರಙ್ಗಯ ಲೋಚನೇ

ನಮತಿ ಮಯಿ ತೇ ಕಿಞ್ಚಿತ್ಕಾಞ್ಚೀಪುರೀಮಣಿದೀಪಿಕೇ

॥27॥

ಶ್ಲೋಕ 29

ಮುನಿಜನಮನಃಪೇಟೀರತ್ನಂ ಸ್ಫುರತ್ಕರುಣಾನಟೀ-

ವಿಹರಣಕಲಾಗೇಹಂ ಕಾಞ್ಚೀಪುರೀಮಣಿಭೂಷಣಮ್ ।

ಜಗತಿ ಮಹತೋ ಮೋಹವ್ಯಾಧೇರ್ನೃಣಾಂ ಪರಮೌಷಧಂ

ಪುರಹರದೃಶಾಂ ಸಾಫಲ್ಯಂ ಮೇ ಪುರಃ ಪರಿಜೃಮ್ಭತಾಮ್

॥28॥

ಶ್ಲೋಕ 30

ಮುನಿಜನಮೋಧಾಮ್ನೇ ಧಾಮ್ನೇ ವಚೋಮಯಜಾಹ್ನವೀ-

ಹಿಮಗಿರಿತಟಪ್ರಾಗ್ಭಾರಾಯಾಕ್ಷರಾಯ ಪರಾತ್ಮನೇ ।

ವಿಹರಣಜುಷೇ ಕಾಞ್ಚೀದೇಶೇ ಮಹೇಶ್ವರಲೋಚನ-

ತ್ರಿತಯಸರಸಕ್ರೀಡಾಸೌಧಾಙ್ಗಣಾಯ ನಮೋ ನಮಃ

॥29॥

ಶ್ಲೋಕ 31

ಮರಕತರುಚಾಂ ಪ್ರತ್ಯಾದೇಶಂ ಮಹೇಶ್ವರಚಕ್ಷುಷಾಮ್

ಅಮೃತಲಹರೀಪೂರಂ ಪಾರಂ ಭವಾಖ್ಯಪಯೋನಿಧೇಃ ।

ಸುಚರಿತಫಲಂ ಕಾಞ್ಚೀಭಾಜೋ ಜನಸ್ಯ ಪಚೇಲಿಮಂ

ಹಿಮಶಿಖರಿಣೋ ವಂಶಸ್ಯೈಕಂ ವತಂಸಮುಪಾಸ್ಮಹೇ

॥30॥

ಶ್ಲೋಕ 32

ಪ್ರಣಮನದಿನಾರಮ್ಭೇ ಕಮ್ಪಾನದೀಸಖಿ ತಾವಕೇ

ಸರಸಕವಿತೋನ್ಮೇಷಃ ಪೂಷಾ ಸತಾಂ ಸಮುದಞ್ಚಿತಃ ।

ಪ್ರತಿಭಟಮಹಾಪ್ರೌಢಪ್ರೋದ್ಯತ್ಕವಿತ್ವಕುಮುದ್ವತೀಂ

ನಯತಿ ತರಸಾ ನಿದ್ರಾಮುದ್ರಾಂ ನಗೇಶ್ವರಕನ್ಯಕೇ

॥31॥

ಶ್ಲೋಕ 33

ಶಮಿತಜಡಿಮಾರಮ್ಭಾ ಕಮ್ಪಾತಟೀನಿಕಟೇಚರೀ

ನಿಹತದುರಿತಸ್ತೋಮಾ ಸೋಮಾರ್ಧಮುದ್ರಿತಕುನ್ತಲಾ ।

ಫಲಿತಸುಮನೋವಾಞ್ಛಾ ಪಾಞ್ಚಾಯುಧೀ ಪರದೇವತಾ

ಸಫಲಯತು ಮೇ ನೇತ್ರೇ ಗೋತ್ರೇಶ್ವರಪ್ರಿಯನನ್ದಿನೀ

॥32॥

ಶ್ಲೋಕ 34

ಮಮ ತು ಧಿಷಣಾ ಪೀಡ್ಯಾ ಜಾಡ್ಯಾತಿರೇಕ ಕಥಂ ತ್ವಯಾ

ಕುಮುದಸುಷಮಾಮೈತ್ರೀಪಾತ್ರೀವತಂಸಿತಕುನ್ತಲಾಮ್ ।

ಜಗತಿ ಶಮಿತಸ್ತಮ್ಭಾಂ ಕಮ್ಪಾನದೀನಿಲಯಾಮಸೌ

ಶ್ರಿಯತಿ ಹಿ ಗಲತ್ತನ್ದ್ರಾ ಚನ್ದ್ರಾವತಂಸಸಧರ್ಮಿಣೀಮ್

॥33॥

ಶ್ಲೋಕ 35

ಪರಿಮಲಪರೀಪಾಕೋದ್ರೇಕಂ ಪಯೋಮುಚಿ ಕಾಞ್ಚನೇ

ಶಿಖರಿಣಿ ಪುನರ್ದ್ಬೈಧೀಭಾವಂ ಶಶಿನ್ಯರುಣಾತಪಮ್ ।

ಅಪಿ ಚ ಜನಯನ್ಕಮ್ಬೋರ್ಲಕ್ಷ್ಮೀಮನಮ್ಬುನಿ ಕೋಽಪ್ಯಸೌ

ಕುಸುಮಧನುಷಃ ಕಾಞ್ಚೀದೇಶೇ ಚಕಾಸ್ತಿ ಪರಾಕ್ರಮಃ

॥34॥

ಶ್ಲೋಕ 36

ಪುರದಮಯಿತುರ್ವಾಮೋತ್ಸಙ್ಗಸ್ಥಲೇನ ರಸಜ್ಞಯಾ

ಸರಸಕವಿತಾಭಾಜಾ ಕಾಞ್ಚೀಪುರೋದರಸೀಮಯಾ ।

ತಟಪರಿಸರೈರ್ನೀಹಾರಾದ್ರೇರ್ವಚೋಭಿರಕೃತ್ರಿಮೈಃ

ಕಿಮಿವ ನ ತುಲಾಮಸ್ಮಚ್ಚೇತೋ ಮಹೇಶ್ವರಿ ಗಾಹತೇ

॥35॥

ಶ್ಲೋಕ 37

ನಯನಯುಗಲೀಮಾಸ್ಮಾಕೀನಾಂ ಕದಾ ನು ಫಲೇಗ್ರಹೀಂ

ವಿದಧತಿ ಗತೌ ವ್ಯಾಕುರ್ವಾಣಾ ಗಜೇನ್ದ್ರಚಮತ್ಕ್ರಿಯಾಮ್ ।

ಮರತಕರುಚೋ ಮಾಹೇಶಾನಾ ಘನಸ್ತನನಮ್ರಿತಾಃ

ಸುಕೃತವಿಭವಾಃ ಪ್ರಾಞ್ಚಃ ಕಾಞ್ಚೀವತಂಸಧುರನ್ಧರಾಃ

॥36॥

ಶ್ಲೋಕ 38

ಮನಸಿಜಯಶಃಪಾರಮ್ಪರ್ಯಂ ಮರನ್ದಝರೀಸುವಾಂ

ಕವಿಕುಲಗಿರಾಂ ಕನ್ದಂ ಕಮ್ಪಾನದೀತಟಮಣ್ಡನಮ್ ।

ಮಧುರಲಲಿತಂ ಮತ್ಕಂ ಚಕ್ಷುರ್ಮನೀಷಿಮನೋಹರಂ

ಪುರವಿಜಯಿನಃ ಸರ್ವಸ್ವಂ ತತ್ಪುರಸ್ಕುರುತೇ ಕದಾ

॥37॥

ಶ್ಲೋಕ 39

ಶಿಥಿಲಿತತಮೋಲೀಲಾಂ ನೀಲಾರವಿನ್ದವಿಲೋಚನಾಂ

ದಹನವಿಲಸತ್ಫಾಲಾಂ ಶ್ರೀಕಾಮಕೋಟಿಮುಪಾಸ್ಮಹೇ ।

ಕರಧೃತಸಚ್ಛೂಲಾಂ ಕಾಲಾರಿಚಿತ್ತಹರಾಂ ಪರಾಂ

ಮನಸಿಜಕೃಪಾಲೀಲಾಂ ಲೋಲಾಲಕಾಮಲಿಕೇಕ್ಷಣಾಮ್

॥38॥

ಶ್ಲೋಕ 40

ಕಲಾಲೀಲಾಶಾಲಾ ಕವಿಕುಲವಚಃಕೈರವವನೀ-

ಶರಜ್ಜ್ಯೋತ್ಸ್ನಾಧಾರಾ ಶಶಧರಶಿಶುಶ್ಲಾಘ್ಯಮುಕುಟೀ ।

ಪುನೀತೇ ನಃ ಕಮ್ಪಾಪುಲಿನತಟಸೌಹಾರ್ದತರಲಾ

ಕದಾ ಚಕ್ಷುರ್ಮಾರ್ಗಂ ಕನಕಗಿರಿಧಾನುಷ್ಕಮಹಿಷೀ

॥39॥

ಶ್ಲೋಕ 41

ನಮಃ ಸ್ತಾನ್ನಮ್ರೇಭ್ಯಃ ಸ್ತನಗರಿಮಗರ್ವೇಣ ಗುರುಣಾ

ದಧಾನೇಭ್ಯಶ್ಚೂಡಾಭರಣಮಮೃತಸ್ಯನ್ದಿ ಶಿಶಿರಮ್ ।

ಸದಾ ವಾಸ್ತವೇಭ್ಯಃ ಸುವಿಧಭುವಿ ಕಮ್ಪಾಖ್ಯಸರಿತೇ

ಯಶೋವ್ಯಾಪಾರೇಭ್ಯಃ ಸುಕೃತವಿಭವೇಭ್ಯೋ ರತಿಪತೇಃ

॥40॥

ಶ್ಲೋಕ 42

ಅಸೂಯನ್ತೀ ಕಾಚಿನ್ಮರಕತರುಚೋ ನಾಕಿಮುಕುಟೀ-

ಕದಮ್ಬಂ ಚುಮ್ಬನ್ತೀ ಚರಣನಖಚನ್ದ್ರಾಂಶುಪಟಲೈಃ ।

ತಮೋಮುದ್ರಾಂ ವಿದ್ರಾವಯತು ಮಮ ಕಾಞ್ಚೀರ್ನಿಲಯನಾ

ಹರೋತ್ಸಙ್ಗಶ್ರೀಮನ್ಮಣಿಗೃಹಮಹಾದೀಪಕಲಿಕಾ

॥41॥

ಶ್ಲೋಕ 43

ಅನಾದ್ಯನ್ತಾ ಕಾಚಿತ್ಸುಜನನಯನಾನನ್ದಜನನೀ

ನಿರುನ್ಧಾನಾ ಕಾನ್ತಿಂ ನಿಜರುಚಿವಿಲಾಸೈರ್ಜಲಮುಚಾಮ್ ।

ಸ್ಮರಾರೇಸ್ತಾರಲ್ಯಂ ಮನಸಿ ಜನಯನ್ತೀ ಸ್ವಯಮಹೋ

ಗಲತ್ಕಮ್ಪಾ ಶಮ್ಪಾ ಪರಿಲಸತಿ ಕಮ್ಪಾಪರಿಸರೇ

॥42॥

ಶ್ಲೋಕ 44

ಸುಧಾಡಿಣ್ಡೀರಶ್ರೀಃ ಸ್ಮಿತರುಚಿಷು ತುಣ್ಡೀರವಿಷಯಂ

ಪರಿಷ್ಕುರ್ವಾಣಾಸೌ ಪರಿಹಸಿತನೀಲೋತ್ಪಲರುಚಿಃ ।

ಸ್ತನಾಭ್ಯಾಮಾನಮ್ರಾ ಸ್ತಬಕಯತು ಮೇ ಕಾಙ್ಕ್ಷಿತತರುಂ

ದೃಶಾಮೈಶಾನೀನಾಂ ಸುಕೃತಫಲಪಾಣ್ಡಿತ್ಯಗರಿಮಾ

॥43॥

ಶ್ಲೋಕ 45

ಕೃಪಾಧಾರಾದ್ರೋಣೀ ಕೃಪಣಧಿಷಣಾನಾಂ ಪ್ರಣಮತಾಂ

ನಿಹನ್ತ್ರೀ ಸನ್ತಾಪಂ ನಿಗಮಮುಕುಟೋತ್ತಂಸಕಲಿಕಾ ।

ಪರಾ ಕಾಞ್ಚೀಲೀಲಾಪರಿಚಯವತೀ ಪರ್ವತಸುತಾ

ಗಿರಾಂ ನೀವೀ ದೇವೀ ಗಿರಿಶಪರತನ್ತ್ರಾ ವಿಜಯತೇ

॥44॥

ಶ್ಲೋಕ 46

ಕವಿತ್ವಶ್ರೀಕನ್ದಃ ಸುಕೃತಪರಿಪಾಟೀ ಹಿಮಗಿರೇಃ

ವಿಧಾತ್ರೀ ವಿಶ್ವೇಷಾಂ ವಿಷಮಶರವೀರಧ್ವಜಪಟೀ ।

ಸಖೀ ಕಮ್ಪಾನದ್ಯಾಃ ಪದಹಸಿತಪಾಥೋಜಯುಗಲೀ

ಪುರಾಣೋ ಪಾಯಾನ್ನಃ ಪುರಮಥನಸಾಮ್ರಾಜ್ಯಪದವೀ

॥45॥

ಶ್ಲೋಕ 47

ದರಿದ್ರಾಣಾ ಮಧ್ಯೇ ದರದಲಿತತಾಪಿಚ್ಛಸುಷಮಾಃ

ಸ್ತನಾಭೋಗಕ್ಕಾನ್ತಾಸ್ತರುಣಹರಿಣಾಙ್ಕಾಙ್ಕಿತಕಚಾಃ ।

ಹರಾಧೀನಾ ನಾನಾವಿಬುಧಮುಕುಟೀಚುಮ್ಬಿತಪದಾಃ

ಕದಾ ಕಮ್ಪಾತೀರೇ ಕಥಯ ವಿಹರಾಮೋ ಗಿರಿಸುತೇ

॥46॥

ಶ್ಲೋಕ 48

ವರೀವರ್ತು ಸ್ಥೇಮಾ ತ್ವಯಿ ಮಮ ಗಿರಾಂ ದೇವಿ ಮನಸೋ

ನರೀನರ್ತು ಪ್ರೌಢಾ ವದನಕಮಲೇ ವಾಕ್ಯಲಹರೀ ।

ಚರೀಚರ್ತು ಪ್ರಜ್ಞಾಜನನಿ ಜಡಿಮಾನಃ ಪರಜನೇ

ಸರೀಸರ್ತು ಸ್ವೈರಂ ಜನನಿ ಮಯಿ ಕಾಮಾಕ್ಷಿ ಕರುಣಾ

॥47॥

ಶ್ಲೋಕ 49

ಕ್ಷಣಾತ್ತೇ ಕಾಮಾಕ್ಷಿ ಭ್ರಮರಸುಷಮಾಶಿಕ್ಷಣಗುರುಃ

ಕಟಾಕ್ಷವ್ಯಾಕ್ಷೇಪೋ ಮಮ ಭವತು ಮೋಕ್ಷಾಯ ವಿಪದಾಮ್ ।

ನರೀನರ್ತು ಸ್ವೈರಂ ವಚನಲಹರೀ ನಿರ್ಜರಪುರೀ-

ಸರಿದ್ವೀಚೀನೀಚೀಕರಣಪಟುರಾಸ್ಯೇ ಮಮ ಸದಾ

॥48॥

ಶ್ಲೋಕ 50

ಪುರಸ್ತಾನ್ಮೇ ಭೂಯಃಪ್ರಶಮನಪರಃ ಸ್ತಾನ್ಮಮ ರುಜಾಂ

ಪ್ರಚಾರಸ್ತೇ ಕಮ್ಪಾತಟವಿಹೃತಿಸಮ್ಪಾದಿನಿ ದೃಶೋಃ ।

ಇಮಾಂ ಯಾಚ್ಞಾಮೂರೀಕುರು ಸಪದಿ ದೂರೀಕುರು ತಮಃ-

ಪರೀಪಾಕಂ ಮತ್ಕಂ ಸಪದಿ ಬುಧಲೋಕಂ ಚ ನಯ ಮಾಮ್

॥49॥

ಶ್ಲೋಕ 51

ಉದಞ್ಚನ್ತೀ ಕಾಞ್ಚೀನಗರನಿಲಯೇ ತ್ವತ್ಕರುಣಯಾ

ಸಮೃದ್ಧಾ ವಾಗ್ಧಾಟೀ ಪರಿಹಸಿತಮಾಧ್ವೀ ಕವಯತಾಮ್ ।

ಉಪಾದತ್ತೇ ಮಾರಪ್ರತಿಭಟಜಟಾಜೂಟಮುಕುಟೀ-

ಕುಟೀರೋಲ್ಲಾಸಿನ್ಯಾಃ ಶತಮಖತಟಿನ್ಯಾ ಜಯಪಟೀಮ್

॥50॥

ಶ್ಲೋಕ 52

ಶ್ರಿಯಂ ವಿದ್ಯಾಂ ದದ್ಯಾಜ್ಜನನಿ ನಮತಾಂ ಕೀರ್ತಿಮಮಿತಾಂ

ಸುಪುತ್ರಾನ್ ಪ್ರಾದತ್ತೇ ತವ ಝಟಿತಿ ಕಾಮಾಕ್ಷಿ ಕರುಣಾ ।

ತ್ರಿಲೋಕ್ಯಾಮಾಧಿಕ್ಯಂ ತ್ರಿಪುರಪರಿಪನ್ಥಿಪ್ರಣಯಿನಿ

ಪ್ರಣಾಮಸ್ತ್ವತ್ಪಾದೇ ಶಮಿತದುರಿತೇ ಕಿಂ ನ ಕುರುತೇ

॥51॥

ಶ್ಲೋಕ 53

ಮನಃಸ್ತಮ್ಭಂ ಸ್ತಮ್ಭಂ ಗಮಯದುಪಕಮ್ಪಂ ಪ್ರಣಮತಾಂ

ಸದಾ ಲೋಲಂ ನೀಲಂ ಚಿಕುರಜಿತಲೋಲಮ್ಬನಿಕರಮ್ ।

ಗಿರಾಂ ದೂರಂ ಸ್ಮೇರಂ ಧೃತಶಶಿಕಿಶೋರಂ ಪಶುಪತೇಃ

ದೃಶಾಂ ಯೋಗ್ಯಂ ಭೋಗ್ಯಂ ತುಹಿನಗಿರಿಭಾಗ್ಯಂ ವಿಜಯತೇ

॥52॥

ಶ್ಲೋಕ 54

ಘನಶ್ಯಾಮಾನ್ಕಾಮಾನ್ತಕಮಹಿಷಿ ಕಾಮಾಕ್ಷಿ ಮಧುರಾನ್

ದೃಶಾಂ ಪಾತಾನೇತಾನಮೃತಜಲಶೀತಾನನುಪಮಾನ್ ।

ಭವೋತ್ಪಾತೇ ಭೀತೇ ಮಯಿ ವಿತರ ನಾಥೇ ದೃಢಭವ-

ನ್ಮನಶ್ಶೋಕೇ ಮೂಕೇ ಹಿಮಗಿರಿಪತಾಕೇ ಕರುಣಯಾ

॥53॥

ಶ್ಲೋಕ 55

ನತಾನಾಂ ಮನ್ದಾನಾಂ ಭವನಿಗಲಬನ್ಧಾಕುಲಧಿಯಾಂ

ಮಹಾನ್ಧ್ಯಾಂ ರುನ್ಧಾನಾಮಭಿಲಷಿತಸನ್ತಾನಲತಿಕಾಮ್ ।

ಚರನ್ತೀಂ ಕಮ್ಪಾಯಾಸ್ತಟಭುವಿ ಸವಿತ್ರೀಂ ತ್ರಿಜಗತಾಂ

ಸ್ಮರಾಮಸ್ತಾಂ ನಿತ್ಯಂ ಸ್ಮರಮಥನಜೀವಾತುಕಲಿಕಾಮ್

॥54॥

ಶ್ಲೋಕ 56

ಪರಾ ವಿದ್ಯಾ ಹೃದ್ಯಾಶ್ರಿತಮದನವಿದ್ಯಾ ಮರಕತ-

ಪ್ರಭಾನೀಲಾ ಲೀಲಾಪರವಶಿತಶೂಲಾಯುಧಮನಾಃ ।

ತಮಃಪೂರಂ ದೂರಂ ಚರಣನತಪೌರನ್ದರಪುರೀ-

ಮೃಗಾಕ್ಷೀ ಕಾಮಾಕ್ಷೀ ಕಮಲತರಲಾಕ್ಷೀ ನಯತು ಮೇ

॥55॥

ಶ್ಲೋಕ 57

ಅಹನ್ತಾಖ್ಯಾ ಮತ್ಕಂ ಕಬಲಯತಿ ಹಾ ಹನ್ತ ಹರಿಣೀ

ಹಠಾತ್ಸಂವಿದ್ರೂಪಂ ಹರಮಹಿಷಿ ಸಸ್ಯಾಙ್ಕುರಮಸೌ ।

ಕಟಾಕ್ಷವ್ಯಾಕ್ಷೇಪಪ್ರಕಟಹರಿಪಾಷಾಣಪಟಲೈಃ

ಇಮಾಮುಚ್ಚೈರುಚ್ಚಾಟಯ ಝಟಿತಿ ಕಾಮಾಕ್ಷಿ ಕೃಪಯಾ

॥56॥

ಶ್ಲೋಕ 58

ಬುಧೇ ವಾ ಮೂಕೇ ವಾ ತವ ಪತತಿ ಯಸ್ಮಿನ್ಕ್ಷಣಮಸೌ

ಕಟಾಕ್ಷಃ ಕಾಮಾಕ್ಷಿ ಪ್ರಕಟಜಡಿಮಕ್ಷೋದಪಟಿಮಾ ।

ಕಥಙ್ಕಾರಂ ನಾಸ್ಮೈ ಕರಮುಕುಲಚೂಡಾಲಮುಕುಟಾ

ನಮೋವಾಕಂ ಬ್ರೂಯುರ್ನಮುಚಿಪರಿಪನ್ಥಿಪ್ರಭೃತಯಃ

॥57॥

ಶ್ಲೋಕ 59

ಪ್ರತೀಚೀಂ ಪಶ್ಯಾಮಃ ಪ್ರಕಟರುಚಿನೀವಾರಕಮಣಿ-

ಪ್ರಭಾಸಧ್ರೀಚೀನಾಂ ಪ್ರದಲಿತಷಡಾಧಾರಕಮಲಾಮ್ ।

ಚರನ್ತೀಂ ಸೌಷುಮ್ನೇ ಪಥಿ ಪರಪದೇನ್ದುಪ್ರವಿಗಲ-

ತ್ಸುಧಾರ್ದ್ರಾಂ ಕಾಮಾಕ್ಷೀಂ ಪರಿಣತಪರಞ್ಜ್ಯೋತಿರುದಯಾಮ್

॥58॥

ಶ್ಲೋಕ 60

ಜಮ್ಭಾರಾತಿಪ್ರಭೃತಿಮುಕುಟೀಃ ಪಾದಯೋಃ ಪೀಠಯನ್ತೀ

ಗುಮ್ಫಾನ್ವಾಚಾಂ ಕವಿಜನಕೃತಾನ್ಸ್ವೈರಮಾರಾಮಯನ್ತೀ ।

ಶಮ್ಪಾಲಕ್ಷ್ಮೀಂ ಮಣಿಗಣರುಚಾಪಾಟಲೈಃ ಪ್ರಾಪಯನ್ತೀ

ಕಮ್ಪಾತೀರೇ ಕವಿಪರಿಷದಾಂ ಜೃಮ್ಭತೇ ಭಾಗ್ಯಸೀಮಾ

॥59॥

ಶ್ಲೋಕ 61

ಚನ್ದ್ರಾಪೀಡಾಂ ಚತುರವದನಾಂ ಚಞ್ಚಲಾಪಾಙ್ಗಲೀಲಾಂ

ಕುನ್ದಸ್ಮೇರಾಂ ಕುಚಭರನತಾಂ ಕುನ್ತಲೋದ್ಧೂತಭೃಙ್ಗಾಮ್ ।

ಮಾರಾರಾತೇರ್ಮದನಶಿಖಿನಂ ಮಾಂಸಲಂ ದೀಪಯನ್ತೀಂ

ಕಾಮಾಕ್ಷೀಂ ತಾಂ ಕವಿಕುಲಗಿರಾಂ ಕಲ್ಪವಲ್ಲೀಮುಪಾಸೇ

॥60॥

ಶ್ಲೋಕ 62

ಕಾಲಾಮ್ಭೋದಪ್ರಕರಸುಷಮಾಂ ಕಾನ್ತಿಭಿಸ್ತಿರ್ಜಯನ್ತೀ

ಕಲ್ಯಾಣಾನಾಮುದಯಸರಣಿಃ ಕಲ್ಪವಲ್ಲೀ ಕವೀನಾಮ್ ।

ಕನ್ದರ್ಪಾರೇಃ ಪ್ರಿಯಸಹಚರೀ ಕಲ್ಮಷಾಣಾಂ ನಿಹನ್ತ್ರೀ

ಕಾಞ್ಚೀದೇಶಂ ತಿಲಕಯತಿ ಸಾ ಕಾಪಿ ಕಾರುಣ್ಯಸೀಮಾ

॥61॥

ಶ್ಲೋಕ 63

ಊರೀಕುರ್ವನ್ನುರಸಿಜತಟೇ ಚಾತುರೀಂ ಭೂಧರಾಣಾಂ

ಪಾಥೋಜಾನಾಂ ನಯನಯುಗಲೇ ಪರಿಪನ್ಥ್ಯಂ ವಿತನ್ವನ್ ।

ಕಮ್ಪಾತೀರೇ ವಿಹರತಿ ರುಚಾ ಮೋಘಯನ್ಮೇಘಶೈಲೀಂ

ಕೋಕದ್ವೇಷಂ ಶಿರಸಿ ಕಲಯನ್ಕೋಽಪಿ ವಿದ್ಯಾವಿಶೇಷಃ

॥62॥

ಶ್ಲೋಕ 64

ಕಾಞ್ಚೀಲೀಲಾಪರಿಚಯವತೀ ಕಾಪಿ ತಾಪಿಚ್ಛಲಕ್ಷ್ಮೀಃ

ಜಾಡ್ಯಾರಣ್ಯೇ ಹುತವಹಶಿಖಾ ಜನ್ಮಭೂಮಿಃ ಕೃಪಾಯಾಃ ।

ಮಾಕನ್ದಶ್ರೀರ್ಮಧುರಕವಿತಾಚಾತುರೀ ಕೋಕಿಲಾನಾಂ

ಮಾರ್ಗೇ ಭೂಯಾನ್ಮಮ ನಯನಯೋರ್ಮಾನ್ಮಥೀ ಕಾಪಿ ವಿದ್ಯಾ

॥63॥

ಶ್ಲೋಕ 65

ಸೇತುರ್ಮಾತರ್ಮರತಕಮಯೋ ಭಕ್ತಿಭಾಜಾಂ ಭವಾಬ್ಧೌ

ಲೀಲಾಲೋಲಾ ಕುವಲಯಮಯೀ ಮಾನ್ಮಥೀ ವೈಜಯನ್ತೀ ।

ಕಾಞ್ಚೀಭೂಷಾ ಪಶುಪತಿದೃಶಾಂ ಕಾಪಿ ಕಾಲಾಞ್ಜನಾಲೀ

ಮತ್ಕಂ ದುಃಖಂ ಶಿಥಿಲಯತು ತೇ ಮಞ್ಜುಲಾಪಾಙ್ಗಮಾಲಾ

॥64॥

ಶ್ಲೋಕ 66

ವ್ಯಾವೃಣ್ವಾನಾಃ ಕುವಲಯದಲಪ್ರಕ್ರಿಯಾವೈರಮುದ್ರಾಂ

ವ್ಯಾಕುರ್ವಾಣಾ ಮನಸಿಜಮಹಾರಾಜಸಾಮ್ರಾಜ್ಯಲಕ್ಷ್ಮೀಮ್ ।

ಕಾಞ್ಚೀಲೀಲಾವಿಹೃತಿರಸಿಕೇ ಕಾಙ್ಕ್ಷಿತಂ ನಃ ಕ್ರಿಯಾಸುಃ

ಬನ್ಧಚ್ಛೇದೇ ತವ ನಿಯಮಿನಾಂ ಬದ್ಧದೀಕ್ಷಾಃ ಕಟಾಕ್ಷಾಃ

॥65॥

ಶ್ಲೋಕ 67

ಕಾಲಾಮ್ಭೋದೇ ಶಶಿರುಚಿ ದಲಂ ಕೈತಕಂ ದರ್ಶಯನ್ತೀ

ಮಧ್ಯೇಸೌದಾಮಿನಿ ಮಧುಲಿಹಾಂ ಮಾಲಿಕಾಂ ರಾಜಯನ್ತೀ ।

ಹಂಸಾರಾವಂ ವಿಕಚಕಮಲೇ ಮಞ್ಜುಮುಲ್ಲಾಸಯನ್ತೀ

ಕಮ್ಪಾತೀರೇ ವಿಲಸತಿ ನವಾ ಕಾಪಿ ಕಾರುಣ್ಯಲಕ್ಷ್ಮೀಃ

॥66॥

ಶ್ಲೋಕ 68

ಚಿತ್ರಂ ಚಿತ್ರಂ ನಿಜಮೃದುತಯಾ ಭರ್ತ್ಸಯನ್ಪಲ್ಲವಾಲೀಂ

ಪುಂಸಾಂ ಕಾಮಾನ್ಭುವಿ ಚ ನಿಯತಂ ಪೂರಯನ್ಪುಣ್ಯಭಾಜಾಮ್ ।

ಜಾತಃ ಶೈಲಾನ್ನ ತು ಜಲನಿಧೇಃ ಸ್ವೈರಸಞ್ಚಾರಶೀಲಃ

ಕಾಞ್ಚೀಭೂಷಾ ಕಲಯತು ಶಿವಂ ಕೋಽಪಿ ಚಿನ್ತಾಮಣಿರ್ಮೇ

॥67॥

ಶ್ಲೋಕ 69

ತಾಮ್ರಾಮ್ಭೋಜಂ ಜಲದನಿಕಟೇ ತತ್ರ ಬನ್ಧೂಕಪುಷ್ಪಂ

ತಸ್ಮಿನ್ಮಲ್ಲೀಕುಸುಮಸುಷಮಾಂ ತತ್ರ ವೀಣಾನಿನಾದಮ್ ।

ವ್ಯಾವೃನ್ವಾನಾ ಸುಕೃತಲಹರೀ ಕಾಪಿ ಕಾಞ್ಚಿನಗರ್ಯಾಮ್

ಐಶಾನೀ ಸಾ ಕಲಯತಿತರಾಮೈನ್ದ್ರಜಾಲಂ ವಿಲಾಸಮ್

॥68॥

ಶ್ಲೋಕ 70

ಆಹಾರಾಂಶಂ ತ್ರಿದಶಸದಸಾಮಾಶ್ರಯೇ ಚಾತಕಾನಾಮ್

ಆಕಾಶೋಪರ್ಯಪಿ ಚ ಕಲಯನ್ನಾಲಯಂ ತುಙ್ಗಮೇಷಾಮ್ ।

ಕಮ್ಪಾತೀರೇ ವಿಹರತಿತರಾಂ ಕಾಮಧೇನುಃ ಕವೀನಾಂ

ಮನ್ದಸ್ಮೇರೋ ಮದನನಿಗಮಪ್ರಕ್ರಿಯಾಸಮ್ಪ್ರದಾಯಃ

॥69॥

ಶ್ಲೋಕ 71

ಆರ್ದ್ರೀಭೂತೈರವಿರಲಕೃಪೈರಾತ್ತಲೀಲಾವಿಲಾಸೈಃ

ಆಸ್ಥಾಪೂರ್ಣೈರಧಿಕಚಪಲೈರಞ್ಚಿತಾಮ್ಭೋಜಶಿಲ್ಪೈಃ ।

ಕಾನ್ತೈರ್ಲಕ್ಷ್ಮೀಲಲಿತಭವನೈಃ ಕಾನ್ತಿಕೈವಲ್ಯಸಾರೈಃ

ಕಾಶ್ಮಲ್ಯಂ ನಃ ಕಬಲಯತು ಸಾ ಕಾಮಕೋಟೀ ಕಟಾಕ್ಷೈಃ

॥70॥

ಶ್ಲೋಕ 72

ಆಧೂನ್ವನ್ತ್ಯೈ ತರಲನಯನೈರಾಙ್ಗಜೀಂ ವೈಜಯನ್ತೀಮ್

ಆನನ್ದಿನ್ಯೈ ನಿಜಪದಜುಷಾಮಾತ್ತಕಾಞ್ಚೀಪುರಾಯೈ ।

ಆಸ್ಮಾಕೀನಂ ಹೃದಯಮಖಿಲೈರಾಗಮಾನಾಂ ಪ್ರಪಞ್ಚೈಃ

ಆರಾಧ್ಯಾಯೈ ಸ್ಪೃಹಯತಿತರಾಮದಿಮಾಯೈ ಜನನ್ಯೈ

॥71॥

ಶ್ಲೋಕ 73

ದೂರಂ ವಾಚಾಂ ತ್ರಿದಶಸದಸಾಂ ದುಃಖಸಿನ್ಧೋಸ್ತರಿತ್ರಂ

ಮೋಹಕ್ಷ್ವೇಲಕ್ಷಿತಿರುಹವನೇ ಕ್ರೂರಧಾರಂ ಕುಠಾರಮ್ ।

ಕಮ್ಪಾತೀರಪ್ರಣಯಿ ಕವಿಭಿರ್ವರ್ಣಿತೋದ್ಯಚ್ಚರಿತ್ರಂ

ಶಾನ್ತ್ಯೈ ಸೇವೇ ಸಕಲವಿಪದಾಂ ಶಾಙ್ಕರಂ ತತ್ಕಲತ್ರಮ್

॥72॥

ಶ್ಲೋಕ 74

ಖಣ್ಡೀಕೃತ್ಯ ಪ್ರಕೃತಿಕುಟಿಲಂ ಕಲ್ಮಷಂ ಪ್ರಾತಿಭಶ್ರೀ-

ಶುಣ್ಡೀರತ್ವಂ ನಿಜಪದಜುಷಾಂ ಶೂನ್ಯತನ್ದ್ರಂ ದಿಶನ್ತೀ ।

ತುಣ್ಡೀರಾಖ್ಯೈ ಮಹತಿ ವಿಷಯೇ ಸ್ವರ್ಣವೃಷ್ಟಿಪ್ರದಾತ್ರೀ

ಚಣ್ಡೀ ದೇವೀ ಕಲಯತಿ ರತಿಂ ಚನ್ದ್ರಚೂಡಾಲಚೂಡೇ

॥73॥

ಶ್ಲೋಕ 75

ಯೇನ ಖ್ಯಾತೋ ಭವತಿ ಸ ಗೃಹೀ ಪೂರುಷೋ ಮೇರುಧನ್ವಾ

ಯದ್ದೃಕ್ಕೋಣೇ ಮದನನಿಗಮಪ್ರಾಭವಂ ಬೋಭವೀತಿ ।

ಯತ್ಪ್ರೀತ್ಯೈವ ತ್ರಿಜಗದಧಿಪೋ ಜೃಮ್ಭತೇ ಕಿಮ್ಪಚಾನಃ

ಕಮ್ಪಾತೀರೇ ಸ ಜಯತಿ ಮಹಾನ್ಕಶ್ಚಿದೋಜೋವಿಶೇಷಃ

॥74॥

ಶ್ಲೋಕ 76

ಧನ್ಯಾ ಧನ್ಯಾ ಗತಿರಿಹ ಗಿರಾಂ ದೇವಿ ಕಾಮಾಕ್ಷಿ ಯನ್ಮೇ

ನಿನ್ದ್ಯಾಂ ಭಿನ್ದ್ಯಾತ್ಸಪದಿ ಜಡತಾಂ ಕಲ್ಮಷಾದುನ್ಮಿಷನ್ತೀಮ್ ।

ಸಾಧ್ವೀ ಮಾಧ್ವೀರಸಮಧುರತಾಭಞ್ಜಿನೀ ಮಞ್ಜುರೀತಿಃ

ವಾಣೀವೇಣೀ ಝಟಿತಿ ವೃಣುತಾತ್ಸ್ವರ್ಧುನೀಸ್ಪರ್ಧಿನೀ ಮಾಮ್

॥75॥

ಶ್ಲೋಕ 77

ಯಸ್ಯಾ ವಾಟೀ ಹೃದಯಕಮಲಂ ಕೌಸುಮೀ ಯೋಗಭಾಜಾಂ

ಯಸ್ಯಾಃ ಪೀಠೀ ಸತತಶಿಶಿರಾ ಶೀಕರೈರ್ಮಾಕರನ್ದೈಃ ।

ಯಸ್ಯಾಃ ಪೇಟೀ ಶ್ರುತಿಪರಿಚಲನ್ಮೌಲಿರತ್ನಸ್ಯ ಕಾಞ್ಚೀ

ಸಾ ಮೇ ಸೋಮಾಭರಣಮಹಿಷೀ ಸಾಧಯೇತ್ಕಾಙ್ಕ್ಷಿತಾನಿ

॥76॥

ಶ್ಲೋಕ 78

ಏಕಾ ಮಾತಾ ಸಕಲಜಗತಾಮೀಯುಷೀ ಧ್ಯಾನಮುದ್ರಾಮ್

ಏಕಾಮ್ರಾಧೀಶ್ವರಚರಣಯೋರೇಕತಾನಾಂ ಸಮಿನ್ಧೇ ।

ತಾಟಙ್ಕೋದ್ಯನ್ಮಣಿಗಣರುಚಾ ತಾಮ್ರಕರ್ಣಪ್ರದೇಶಾ

ತಾರುಣ್ಯಶ್ರೀಸ್ತಬಕಿತತನುಸ್ತಾಪಸೀ ಕಾಪಿ ಬಾಲಾ

॥77॥

ಶ್ಲೋಕ 79

ದನ್ತಾದನ್ತಿಪ್ರಕಟನಕರೀ ದನ್ತಿಭಿರ್ಮನ್ದಯಾನೈಃ

ಮನ್ದಾರಾಣಾಂ ಮದಪರಿಣತಿಂ ಮಥ್ನತೀ ಮನ್ದಹಾಸೈಃ ।

ಅಙ್ಕೂರಾಭ್ಯಾಂ ಮನಸಿಜತರೋರಙ್ಕಿತೋರಾಃ ಕುಚಾಭ್ಯಾ-

ಮನ್ತಃಕಾಞ್ಚಿ ಸ್ಫುರತಿ ಜಗತಾಮಾದಿಮಾ ಕಾಪಿ ಮಾತಾ

॥78॥

ಶ್ಲೋಕ 80

ತ್ರಿಯಮ್ಬಕಕುಟುಮ್ಬಿನೀಂ ತ್ರಿಪುರಸುನ್ದರೀಮಿನ್ದಿರಾಂ

ಪುಲಿನ್ದಪತಿಸುನ್ದರೀಂ ತ್ರಿಪುರಭೈರವೀಂ ಭಾರತೀಮ್ ।

ಮತಙ್ಗಕುಲನಾಯಿಕಾಂ ಮಹಿಷಮರ್ದನೀಂ ಮಾತೃಕಾಂ

ಭಣನ್ತಿ ವಿಬುಧೋತ್ತಮಾ ವಿಹೃತಿಮೇವ ಕಾಮಾಕ್ಷಿ ತೇ

॥79॥

ಶ್ಲೋಕ 81

ಮಹಾಮುನಿಮನೋನಟೀ ಮಹಿತರಮ್ಯಕಮ್ಪಾತಟೀ-

ಕುಟೀರಕವಿಹಾರಿಣೀ ಕುಟಿಲಬೋಧಸಂಹಾರಿಣೀ ।

ಸದಾ ಭವತು ಕಾಮಿನೀ ಸಕಲದೇಹಿನಾಂ ಸ್ವಾಮಿನೀ

ಕೃಪಾತಿಶಯಕಿಙ್ಕರೀ ಮಮ ವಿಭೂತಯೇ ಶಾಙ್ಕರೀ

॥80॥

ಶ್ಲೋಕ 82

ಜಡಾಃ ಪ್ರಕೃತಿನಿರ್ಧನಾ ಜನವಿಲೋಚನಾರುನ್ತುದಾ

ನರಾ ಜನನಿ ವೀಕ್ಷಣಂ ಕ್ಷಣಮವಾಪ್ಯ ಕಾಮಾಕ್ಷಿ ತೇ ।

ವಚಸ್ಸು ಮಧುಮಾಧುರೀಂ ಪ್ರಕಟಯನ್ತಿ ಪೌರನ್ದರೀ-

ವಿಭೂತಿಷು ವಿಡಮ್ಬನಾಂ ವಪುಷಿ ಮಾನ್ಮಥೀಂ ಪ್ರಕ್ರಿಯಾಮ್

॥81॥

ಶ್ಲೋಕ 83

ಘನ್ಸತನತಟಸ್ಫುಟಸ್ಫುರಿತಕಞ್ಚುಲೀಚಞ್ಚಲೀ-

ಕೃತತ್ರಿಪುರಶಾಸನಾ ಸುಜನಶೀಲಿತೋಪಾಸನಾ ।

ದೃಶೋಃ ಸರಣಿಮಶ್ನುತೇ ಮಮ ಕದಾ ನು ಕಾಞ್ಚೀಪುರೇ

ಪರಾ ಪರಮಯೋಗಿನಾಂ ಮನಸಿ ಚಿತ್ಕುಲಾ ಪುಷ್ಕಲಾ

॥82॥

ಶ್ಲೋಕ 84

ಕವೀನ್ದ್ರಹೃದಯೇಚರೀ ಪರಿಗೃಹೀತಕಾಞ್ಚೀಪುರೀ

ನಿರೂಢಕರುಣಾಝರೀ ನಿಖಿಲಲೋಕರಕ್ಷಾಕರೀ ।

ಮನಃಪಥದವೀಯಸೀ ಮದನಶಾಸನಪ್ರೇಯಸೀ

ಮಹಾಗುಣಗರೀಯಸೀ ಮಮ ದೃಶೋಽಸ್ತು ನೇದೀಯಸೀ

॥83॥

ಶ್ಲೋಕ 85

ಧನೇನ ನ ರಮಾಮಹೇ ಖಲಜನಾನ್ನ ಸೇವಾಮಹೇ

ನ ಚಾಪಲಮಯಾಮಹೇ ಭವಭಯಾನ್ನ ದೂಯಾಮಹೇ ।

ಸ್ಥಿರಾಂ ತನುಮಹೇತರಾಂ ಮನಸಿ ಕಿಂ ಚ ಕಾಞ್ಚೀರತ-

ಸ್ಮರಾನ್ತಕಕುಟುಮ್ಬಿನೀಚರಣಪಲ್ಲವೋಪಾಸನಾಮ್

॥84॥

ಶ್ಲೋಕ 86

ಸುರಾಃ ಪರಿಜನಾ ವಪುರ್ಮನಸಿಜಾಯ ವೈರಾಯತೇ

ತ್ರಿವಿಷ್ಟಪನಿತಮ್ಬಿನೀಕುಚತಟೀ ಚ ಕೇಲೀಗಿರಿಃ ।

ಗಿರಃ ಸುರಭಯೋ ವಯಸ್ತರುಣಿಮಾ ದರಿದ್ರಸ್ಯ ವಾ

ಕಟಾಕ್ಷಸರಣೌ ಕ್ಷಣಂ ನಿಪತಿತಸ್ಯ ಕಾಮಾಕ್ಷಿ ತೇ

॥85॥

ಶ್ಲೋಕ 87

ಪವಿತ್ರಯ ಜಗತ್ತ್ರಯೀವಿಬುಧಬೋಧಜೀವಾತುಭಿಃ

ಪುರತ್ರಯವಿಮರ್ದಿನಃ ಪುಲಕಕಞ್ಚುಲೀದಾಯಿಭಿಃ ।

ಭವಕ್ಷಯವಿಚಕ್ಷಣೈರ್ವ್ಯಸನಮೋಕ್ಷಣೈರ್ವೀಕ್ಷಣೈಃ

ನಿರಕ್ಷರಶಿರೋಮಣಿಂ ಕರುಣಯೈವ ಕಾಮಾಕ್ಷಿ ಮಾಮ್

॥86॥

ಶ್ಲೋಕ 88

ಕದಾ ಕಲಿತಖೇಲನಾಃ ಕರುಣಯೈವ ಕಾಞ್ಚೀಪುರೇ

ಕಲಾಯಮುಕುಲತ್ವಿಷಃ ಶುಭಕದಮ್ಬಪೂರ್ಣಾಙ್ಕುರಾಃ ।

ಪಯೋಧರಭರಾಲಸಾಃ ಕವಿಜನೇಷು ತೇ ಬನ್ಧುರಾಃ

ಪಚೇಲಿಮಕೃಪಾರಸಾ ಪರಿಪತನ್ತಿ ಮಾರ್ಗೇ ದೃಶೋಃ

॥87॥

ಶ್ಲೋಕ 89

ಅಶೋಧ್ಯಮಚಲೋದ್ಭವಂ ಹೃದಯನನ್ದನಂ ದೇಹಿನಾಮ್

ಅನರ್ಘಮಧಿಕಾಞ್ಚಿ ತತ್ಕಿಮಪಿ ರತ್ನಮುದ್ದ್ಯೋತತೇ ।

ಅನೇನ ಸಮಲಙ್ಕೃತಾ ಜಯತಿ ಶಙ್ಕರಾಙ್ಕಸ್ಥಲೀ

ಕದಾಸ್ಯ ಮಮ ಮಾನಸಂ ವ್ರಜತಿ ಪೇಟಿಕಾವಿಭ್ರಮಮ್

॥88॥

ಶ್ಲೋಕ 90

ಪರಾಮೃತಝರೀಪ್ಲುತಾ ಜಯತಿ ನಿತ್ಯಮನ್ತಶ್ಚರೀ

ಭುವಾಮಪಿ ಬಹಿಶ್ಚರೀ ಪರಮಸಂವಿದೇಕಾತ್ಮಿಕಾ ।

ಮಹದ್ಭಿರಪರೋಕ್ಷಿತಾ ಸತತಮೇವ ಕಾಞ್ಚೀಪುರೇ

ಮಮಾನ್ವಹಮಹಮ್ಮತಿರ್ಮನಸಿ ಭಾತು ಮಾಹೇಶ್ವರೀ

॥89॥

ಶ್ಲೋಕ 91

ತಮೋವಿಪಿನಧಾವಿನಂ ಸತತಮೇವ ಕಾಞ್ಚೀಪುರೇ

ವಿಹಾರರಸಿಕಾ ಪರಾ ಪರಮಸಂವಿದುರ್ವೀರುಹೇ ।

ಕಟಾಕ್ಷನಿಗಲೈರ್ದೃಢಂ ಹೃದಯದುಷ್ಟದನ್ತಾವಲಂ

ಚಿರಂ ನಯತು ಮಾಮಕಂ ತ್ರಿಪುರವೈರಿಸೀಮನ್ತಿನೀ

॥90॥

ಶ್ಲೋಕ 92

ತ್ವಮೇವ ಸತಿ ಚಣ್ಡಿಕಾ ತ್ವಮಸಿ ದೇವಿ ಚಾಮುಣ್ಡಿಕಾ

ತ್ವಮೇವ ಪರಮಾತೃಕಾ ತ್ವಮಪಿ ಯೋಗಿನೀರೂಪಿಣೀ ।

ತ್ವಮೇವ ಕಿಲ ಶಾಮ್ಭವೀ ತ್ವಮಸಿ ಕಾಮಕೋಟೀ ಜಯಾ

ತ್ವಮೇವ ವಿಜಯಾ ತ್ವಯಿ ತ್ರಿಜಗದಮ್ಬ ಕಿಂ ಬ್ರೂಮಹೇ

॥91॥

ಶ್ಲೋಕ 93

ಪರೇ ಜನನಿ ಪಾರ್ವತಿ ಪ್ರಣತಪಾಲಿನಿ ಪ್ರಾತಿಭ-

ಪ್ರದಾತ್ರಿ ಪರಮೇಶ್ವರಿ ತ್ರಿಜಗದಾಶ್ರಿತೇ ಶಾಶ್ವತೇ ।

ತ್ರಿಯಮ್ಬಕಕುಟುಮ್ಬಿನಿ ತ್ರಿಪದಸಙ್ಗಿನಿ ತ್ರೀಕ್ಷಣೇ

ತ್ರಿಶಕ್ತಿಮಯಿ ವೀಕ್ಷಣಂ ಮಯಿ ನಿಧೇಹಿ ಕಾಮಾಕ್ಷಿ ತೇ

॥92॥

ಶ್ಲೋಕ 94

ಮನೋಮಧುಕರೋತ್ಸವಂ ವಿದಧತೀ ಮನೀಷಾಜುಷಾಂ

ಸ್ವಯಮ್ಪ್ರಭವವೈಖರೀವಿಪಿನವೀಥಿಕಾಲಮ್ಬಿನೀ ।

ಅಹೋ ಶಿಶಿರಿತಾ ಕೃಪಾಮಧುರಸೇನ ಕಮ್ಪಾತಟೇ

ಚರಾಚರವಿಧಾಯಿನೀ ಚಲತಿ ಕಾಪಿ ಚಿನ್ಮಞ್ಜರೀ

॥93॥

ಶ್ಲೋಕ 95

ಕಲಾವತಿ ಕಲಾಭೃತೋ ಮುಕುಟಸೀಮ್ನಿ ಲೀಲಾವತಿ

ಸ್ಪೃಹಾವತಿ ಮಹೇಶ್ವರೇ ಭುವನಮೋಹನೇ ಭಾಸ್ವತಿ ।

ಪ್ರಭಾವತಿ ರಮೇ ಸದಾ ಮಹಿತರೂಪಶೋಭಾವತಿ

ತ್ವರಾವತಿ ಪರೇ ಸತಾಂ ಗುರುಕೃಪಾಮ್ಬುಧಾರಾವತಿ

॥94॥

ಶ್ಲೋಕ 96

ತ್ವಯೈವ ಜಗದಮ್ಬಯಾ ಭುವನಮಣ್ಡಲಂ ಸೂಯತೇ

ತ್ವಯೈವ ಕರುಣಾರ್ದ್ರಯಾ ತದಪಿ ರಕ್ಷಣಂ ನೀಯತೇ ।

ತ್ವಯೈವ ಖರಕೋಪಯಾ ನಯನಪಾವಕೇ ಹೂಯತೇ

ತ್ವಯೈವ ಕಿಲ ನಿತ್ಯಯಾ ಜಗತಿ ಸನ್ತತಂ ಸ್ಥೀಯತೇ

॥95॥

ಶ್ಲೋಕ 97

ಚರಾಚರಜಗನ್ಮಯೀಂ ಸಕಲಹೃನ್ಮಯೀಂ ಚಿನ್ಮಯೀಂ

ಗುಣತ್ರಯಮಯೀಂ ಜಗತ್ತ್ರಯಮಯೀಂ ತ್ರಿಧಾಮಾಮಯೀಮ್ ।

ಪರಾಪರಮಯೀಂ ಸದಾ ದಶದಿಶಾಂ ನಿಶಾಹರ್ಮಯೀಂ

ಪರಾಂ ಸತತಸನ್ಮಯೀಂ ಮನಸಿ ಚಿನ್ಮಯೀಂ ಶೀಲಯೇ

॥96॥

ಶ್ಲೋಕ 98

ಜಯ ಜಗದಮ್ಬಿಕೇ ಹರಕುಟುಮ್ಬಿನಿ ವಕ್ತ್ರರುಚಾ

ಜಿತಶರದಮ್ಬುಜೇ ಘನವಿಡಮ್ಬಿನಿ ಕೇಶರುಚಾ ।

ಪರಮವಲಮ್ಬನಂ ಕುರು ಸದಾ ಪರರೂಪಧರೇ

ಮಮ ಗತಸಂವಿದೋ ಜಡಿಮಡಮ್ಬರತಾಣ್ಡವಿನಃ

॥97॥

ಶ್ಲೋಕ 99

ಭುವನಜನನಿ ಭೂಷಾಭೂತಚನ್ದ್ರೇ ನಮಸ್ತೇ

ಕಲುಷಶಮನಿ ಕಮ್ಪಾತೀರಗೇಹೇ ನಮಸ್ತೇ ।

ನಿಖಿಲನಿಗಮವೇದ್ಯೇ ನಿತ್ಯರೂಪೇ ನಮಸ್ತೇ

ಪರಶಿವಮಯಿ ಪಾಶಚ್ಛೇದಹಸ್ತೇ ನಮಸ್ತೇ

॥98॥

ಶ್ಲೋಕ 100

ಕ್ವಣತ್ಕಾಞ್ಚೀ ಕಾಞ್ಚೀಪುರಮಣಿವಿಪಞ್ಚೀಲಯಝರೀ-

ಶಿರಃಕಮ್ಪಾ ಕಮ್ಪಾವಸತಿರನುಕಮ್ಪಾಜಲನಿಧಿಃ ।

ಘನಶ್ಯಾಮಾ ಶ್ಯಾಮಾ ಕಠಿನಕುಚಸೀಮಾ ಮನಸಿ ಮೇ

ಮೃಗಾಕ್ಷೀ ಕಾಮಾಕ್ಷೀ ಹರನಟನಸಾಕ್ಷೀ ವಿಹರತಾತ್

॥99॥

ಶ್ಲೋಕ 101

ಸಮರವಿಜಯಕೋಟೀ ಸಾಧಕಾನನ್ದಧಾಟೀ

ಮೃದುಗುಣಪರಿಪೇಟೀ ಮುಖ್ಯಕಾದಮ್ಬವಾಟೀ ।

ಮುನಿನುತಪರಿಪಾಟೀ ಮೋಹಿತಾಜಾಣ್ಡಕೋಟೀ

ಪರಮಶಿವವಧೂಟೀ ಪಾತು ಮಾಂ ಕಾಮಕೋಟೀ

॥100॥

ಶ್ಲೋಕ 102

ಇಮಂ ಪರವರಪ್ರದಂ ಪ್ರಕೃತಿಪೇಶಲಂ ಪಾವನಂ

ಪರಾಪರಚಿದಾಕೃತಿಪ್ರಕಟನಪ್ರದೀಪಾಯಿತಮ್ ।

ಸ್ತವಂ ಪಠತಿ ನಿತ್ಯದಾ ಮನಸಿ ಭಾವಯನ್ನಮ್ಬಿಕಾಂ

ಜಪೈರಲಮಲಂ ಮಖೈರಧಿಕದೇಹಸಂಶೋಷಣೈಃ

॥101॥

ಶ್ಲೋಕ 103

॥ ಇತಿ ಸ್ತುತಿಶತಕಂ ಸಮ್ಪೂರ್ಣಮ್ ॥