મૂક પઞ્ચ શતિ 3 - સ્તુતિ શતકમ્

મૂક પઞ્ચ શતિ 3 - સ્તુતિ શતકમ્

શ્લોક 1

પાણ્ડિત્યં પરમેશ્વરિ સ્તુતિવિધૌ નૈવાશ્રયન્તે ગિરાં

વૈરિઞ્ચાન્યપિ ગુમ્ફનાનિ વિગલદ્ગર્વાણિ શર્વાણિ તે ।

સ્તોતું ત્વાં પરિફુલ્લનીલનલિનશ્યામાક્ષિ કામાક્ષિ માં

વાચાલીકુરુતે તથાપિ નિતરાં ત્વત્પાદસેવાદરઃ

શ્લોક 2

તાપિઞ્છસ્તબકત્વિષે તનુભૃતાં દારિદ્ર્યમુદ્રાદ્વિષે

સંસારાખ્યતમોમુષે પુરરિપોર્વામાઙ્કસીમાજુષે ।

કમ્પાતીરમુપેયુષે કવયતાં જિહ્વાકુટીં જગ્મુષે

વિશ્વત્રાણપુષે નમોઽસ્તુ સતતં તસ્મૈ પરઞ્જ્યોતિષે

॥1॥

શ્લોક 3

યે સન્ધ્યારુણયન્તિ શઙ્કરજટાકાન્તારચન્રાર્ભકં

સિન્દૂરન્તિ ચ યે પુરન્દરવધૂસીમન્તસીમાન્તરે ।

પુણ્ય.ં યે પરિપક્કયન્તિ ભજતાં કાઞ્ચીપુરે મામમી

પાયાસુઃ પરમેશ્વરપ્રણયિનીપાદોદ્ભવાઃ પાંસવઃ

॥2॥

શ્લોક 4

કામાડમ્બરપૂરયા શશિરુચા કમ્રસ્મિતાનાં ત્વિષા

કામારેરનુરાગસિન્ધુમધિકં કલ્લોલિતં તન્વતી ।

કામાક્ષીતિ સમસ્તસજ્જનનુતા કલ્યાણદાત્રી નૃણાં

કારુણ્યાકુલમાનસા ભગવતી કમ્પાતટે જૃમ્ભતે

॥3॥

શ્લોક 5

કામાક્ષીણપરાક્રમપ્રકટનં સમ્ભાવયન્તી દૃશા

શ્યામા ક્ષીરસહોદરસ્મિતરુચિપ્રક્ષાલિતાશાન્તરા ।

કામાક્ષીજનમૌલિભૂષણમણિર્વાચાં પરા દેવતા

કામાક્ષીતિ વિભાતિ કાપિ કરુણા કમ્પાતટિન્યાસ્તટે

॥4॥

શ્લોક 6

શ્યામા કાચન ચન્દ્રિકા ત્રિભુવને પુણ્યાત્મનામાનને

સીમાશૂન્યકવિત્વવર્ષજનની યા કાપિ કાદમ્બિની ।

મારારાતિમનોવિમોહનવિધૌ કાચિતત્તમઃકન્દલી

કામાક્ષ્યાઃ કરુણાકટાક્ષલહરી કામાય મે કલ્પતામ્

॥5॥

શ્લોક 7

પ્રૌઢધ્વાન્તકદમ્બકે કુમુદિનીપુણ્યાઙ્કુરં દર્શયન્

જ્યોત્સ્નાસઙ્ગમનેઽપિ કોકમિથુનં મિશ્રં સમુદ્ભાવયન્ ।

કાલિન્દીલહરીદશાં પ્રકટયન્કમ્રાં નભસ્યદ્ભુતાં

કશ્ચિન્નેત્રમહોત્સવો વિજયતે કાઞ્ચીપુરે શૂલિનઃ

॥6॥

શ્લોક 8

તન્દ્રાહીનતમાલનીલસુષમૈસ્તારુણ્યલીલાગૃહૈઃ

તારાનાથકિશોરલાઞ્છિતકચૈસ્તામ્રારવિન્દેક્ષણૈઃ ।

માતઃ સંશ્રયતાં મનો મનસિજપ્રાગલ્ભ્યનાડિન્ધમૈઃ

કમ્પાતીરચરૈર્ઘનસ્તનભરૈઃ પુણ્યાઙ્કરૈઃ શાઙ્કરૈઃ

॥7॥

શ્લોક 9

નિત્યં નિશ્ચલતામુપેત્ય મરુતાં રક્ષાવિધિં પુષ્ણતી

તેજસ્સઞ્ચયપાટવેન કિરણાનુષ્ણદ્યુતેર્મુષ્ણતી ।

કાઞ્ચીમધ્યગતાપિ દીપ્તિજનની વિશ્વાન્તરે જૃમ્ભતે

કાચિચ્ચિત્રમહો સ્મૃતાપિ તમસાં નિર્વાપિકા દીપિકા

॥8॥

શ્લોક 10

કાન્તૈઃ કેશરુચાં ચયૈર્ભ્રમરિતં મન્દસ્મિતૈઃ પુષ્પિતં

કાન્ત્યા પલ્લવિતં પદામ્બુરુહયોર્નેત્રત્વિષા પત્રિતમ્ ।

કમ્પાતીરવનાન્તરં વિદધતી કલ્યાણજન્મસ્થલી

કાઞ્ચીમધ્યમહામણિર્વિજયતે કાચિત્કૃપાકન્દલી

॥9॥

શ્લોક 11

રાકાચન્દ્રસમાનકાન્તિવદના નાકાધિરાજસ્તુતા

મૂકાનામપિ કુર્વતી સુરધનીનીકાશવાગ્વૈભવમ્ ।

શ્રીકાઞ્ચીનગરીવિહારરસિકા શોકાપહન્ત્રી સતામ્

એકા પુણ્યપરમ્પરા પશુપતેરાકારિણી રાજતે

॥10॥

શ્લોક 12

જાતા શીતલશૈલતઃ સુકૃતિનાં દૃશ્યા પરં દેહિનાં

લોકાનાં ક્ષણમાત્રસંસ્મરણતઃ સન્તાપવિચ્છેદિની ।

આશ્ચર્યં બહુ ખેલનં વિતનુતે નૈશ્ચલ્યમાબિભ્રતી

કમ્પાયાસ્તટસીમ્નિ કાપિ તટિની કારુણ્યપાથોમયી

॥11॥

શ્લોક 13

ઐક્યં યેન વિરચ્યતે હરતનૌ દમ્ભાવપુમ્ભાવુકે

રેખા યત્કચસીમ્નિ શેખરદશાં નૈશાકરી ગાહતે ।

ઔન્નત્યં મુહુરેતિ યેન સ મહાન્મેનાસખઃ સાનુમાન્

કમ્પાતીરવિહારિણા સશરણાસ્તેનૈવ ધામ્ના વયમ્

॥12॥

શ્લોક 14

અક્ષ્ણોશ્ચ સ્તનયોઃ શ્રિયા શ્રવણયોર્બાહ્વોશ્ચ મૂલં સ્પૃશન્

ઉત્તંસેન મુખેન ચ પ્રતિદિનં દ્રુહ્યન્પયોજન્મને ।

માધુર્યેણ ગિરાં ગતેન મૃદુના હંસાઙ્ગનાં હ્રેપયન્

કાઞ્ચીસીમ્નિ ચકાસ્તિ કોઽપિ કવિતાસન્તાનબીજાઙ્કુરઃ

॥13॥

શ્લોક 15

ખણ્ડં ચાન્દ્રમસં વતંસમનિશં કાઞ્ચીપુરે ખેલનં

કાલાયશ્છવિતસ્કરીં તનુરુચિં કર્ણજપે લોચને ।

તારુણ્યોષ્મનખમ્પચં સ્તનભરં જઙ્ઘાસ્પૃશં કુન્તલં

ભાગ્યં દેશિકસઞ્ચિતં મમ કદા સમ્પાદયેદમ્બિકે

॥14॥

શ્લોક 16

તન્વાનં નિજકેલિસૌધસરણિં નૈસર્ગિકીણાં ગિરાં

કેદારં કવિમલ્લસૂક્તિલહરીસસ્યશ્રિયાં શાશ્વતમ્ ।

અંહોવઞ્ચનચુઞ્ચુ કિઞ્ચન ભજે કાઞ્ચીપુરીમણ્ડનં

પર્યાયચ્છવિ પાકશાસનમણેઃ પૌષ્પેષવં પૌરુષમ્

॥15॥

શ્લોક 17

આલોકે મુખપઙ્કજે ચ દધતી સૌધાકરીં ચાતુરીં

ચૂડાલઙ્ક્રિયમાણપઙ્કજવનીવૈરાગમપ્રક્રિયા ।

મુગ્ધસ્મેરમુખી ઘન્સતનતટીમૂર્ચ્છાલમધ્યાઞ્ચિતા

કાઞ્ચીસીમનિ કામિની વિજયતે કાચિજ્જગન્મોહિની

॥16॥

શ્લોક 18

યસ્મિન્નમ્બ ભવત્કટાક્ષરજની મન્દેઽપિ મન્દસ્મિત-

જ્યોત્સ્નાસંસ્નપિતા ભવત્યભિમુખી તં પ્રત્યહો દેહિનમ્ ।

દ્રક્ષામાક્ષિકમાધુરીમદભરવ્રીડાકરી વૈખરી

કામાક્ષિ સ્વયમાતનોત્યભિસૃતિં વામેક્ષણેવ ક્ષણમ્

॥17॥

શ્લોક 19

કાલિન્દીજલકાન્તયઃ સ્મિતરુચિસ્વર્વાહિનીપાથસિ

પ્રૌઢધ્વાન્તરુચઃ સ્ફુટાધરમહોલૌહિત્યસન્ધ્યોદયે ।

મણિક્યોપલકુણ્ડલાંશુશિખિનિ વ્યામિશ્રધૂમશ્રિયઃ

કલ્યાણૈકભુવઃ કટાક્ષસુષમાઃ કામાક્ષિ રાજન્તિ તે

॥18॥

શ્લોક 20

કલકલરણત્કાઞ્ચી કાઞ્ચીવિભૂષણમાલિકા

કચભરલસચ્ચન્દ્રા ચન્દ્રાવતંસસધર્મિણી ।

કવિકુલગિરઃ શ્રાવંશ્રાવં મિલત્પુલકાઙ્કુરા

વિરચિતશિરઃકમ્પા કમ્પાતટે પરિશોભતે

॥19॥

શ્લોક 21

સરસવચસાં વીચી નીચીભવન્મધુમાધુરી

ભરિતભુવના કીર્તિર્મૂર્તિર્મનોભવજિત્વરી ।

જનનિ મનસો યોગ્યં ભોગ્યં નૃણાં તવ જાયતે

કથમિવ વિના કાઞ્ચીભૂષે કટાક્ષતરઙ્ગિતમ્

॥20॥

શ્લોક 22

ભ્રમરિતસરિત્કૂલો નીલોત્પલપ્રભયાઽઽભયા

નતજનતમઃખણ્ડી તુણ્ડીરસીમ્નિ વિજૃમ્ભતે ।

અચલતપસામેકઃ પાકઃ પ્રસૂનશરાસન-

પ્રતિભટમનોહારી નારીકુલૈકશિખામણિઃ

॥21॥

શ્લોક 23

મધુરવચસો મન્દસ્મેરા મતઙ્ગજગામિનઃ

તરુણિમજુષસ્તાપિચ્છાભાસ્તમઃપરિપન્થિનઃ ।

કુચભરનતાઃ કુર્યુર્ભદ્રં કુરઙ્ગવિલોચનાઃ

કલિતકરુણાઃ કાઞ્ચીભાજઃ કપાલિમહોત્સવાઃ

॥22॥

શ્લોક 24

કમલસુષમાક્ષ્યારોહે વિચક્ષણવીક્ષણાઃ

કુમુદસુકૃતક્રીડાચૂડાલકુન્તલબન્ધુરાઃ ।

રુચિરરુચિભિસ્તાપિચ્છશ્રીપ્રપઞ્ચનચુઞ્ચવઃ

પુરવિજયિનઃ કમ્પાતીરે સ્ફુરન્તિ મનોરથાઃ

॥23॥

શ્લોક 25

કલિતરતયઃ કાઞ્ચીલીલાવિધૌ કવિમણ્ડલી-

વચનલહરીવાસન્તીનાં વસન્તવિભૂતયઃ ।

કુશલવિધયે ભૂયાસુર્મે કુરઙ્ગવિલોચનાઃ

કુસુમવિશિખારાતેરક્ષ્ણાં કુતૂહલવિભ્રમાઃ

॥24॥

શ્લોક 26

કબલિતતમસ્કાણ્ડાસ્તુણ્ડીરમણ્ડલમણ્ડનાઃ

સરસિજવનીસન્તાનાનામરુન્તુદશેખરાઃ ।

નયનસરણેર્નેદીયંસઃ કદા નુ ભવન્તિ મે

તરુણજલદશ્યામાઃ શમ્ભોસ્તપઃફલવિભ્રમાઃ

॥25॥

શ્લોક 27

અચરમમિષું દીનં મીનધ્વજસ્ય મુખશ્રિયા

સરસિજભુવો યાનં મ્લાનં ગતેન ચ મઞ્જુના ।

ત્રિદશસદસામન્નં ખિન્નં ગિરા ચ વિતન્વતી

તિલકયતિ સા કમ્પાતીરં ત્રિલોચનસુન્દરી

॥26॥

શ્લોક 28

જનનિ ભુવને ચઙ્ક્રમ્યેઽહં કિયન્તમનેહસં

કુપુરુષકરભ્રષ્ટૈર્દુષ્ટૈર્ધનૈરુદરમ્ભરિઃ ।

તરુણકરુણે તન્દ્રાશૂન્યે તરઙ્ગય લોચને

નમતિ મયિ તે કિઞ્ચિત્કાઞ્ચીપુરીમણિદીપિકે

॥27॥

શ્લોક 29

મુનિજનમનઃપેટીરત્નં સ્ફુરત્કરુણાનટી-

વિહરણકલાગેહં કાઞ્ચીપુરીમણિભૂષણમ્ ।

જગતિ મહતો મોહવ્યાધેર્નૃણાં પરમૌષધં

પુરહરદૃશાં સાફલ્યં મે પુરઃ પરિજૃમ્ભતામ્

॥28॥

શ્લોક 30

મુનિજનમોધામ્ને ધામ્ને વચોમયજાહ્નવી-

હિમગિરિતટપ્રાગ્ભારાયાક્ષરાય પરાત્મને ।

વિહરણજુષે કાઞ્ચીદેશે મહેશ્વરલોચન-

ત્રિતયસરસક્રીડાસૌધાઙ્ગણાય નમો નમઃ

॥29॥

શ્લોક 31

મરકતરુચાં પ્રત્યાદેશં મહેશ્વરચક્ષુષામ્

અમૃતલહરીપૂરં પારં ભવાખ્યપયોનિધેઃ ।

સુચરિતફલં કાઞ્ચીભાજો જનસ્ય પચેલિમં

હિમશિખરિણો વંશસ્યૈકં વતંસમુપાસ્મહે

॥30॥

શ્લોક 32

પ્રણમનદિનારમ્ભે કમ્પાનદીસખિ તાવકે

સરસકવિતોન્મેષઃ પૂષા સતાં સમુદઞ્ચિતઃ ।

પ્રતિભટમહાપ્રૌઢપ્રોદ્યત્કવિત્વકુમુદ્વતીં

નયતિ તરસા નિદ્રામુદ્રાં નગેશ્વરકન્યકે

॥31॥

શ્લોક 33

શમિતજડિમારમ્ભા કમ્પાતટીનિકટેચરી

નિહતદુરિતસ્તોમા સોમાર્ધમુદ્રિતકુન્તલા ।

ફલિતસુમનોવાઞ્છા પાઞ્ચાયુધી પરદેવતા

સફલયતુ મે નેત્રે ગોત્રેશ્વરપ્રિયનન્દિની

॥32॥

શ્લોક 34

મમ તુ ધિષણા પીડ્યા જાડ્યાતિરેક કથં ત્વયા

કુમુદસુષમામૈત્રીપાત્રીવતંસિતકુન્તલામ્ ।

જગતિ શમિતસ્તમ્ભાં કમ્પાનદીનિલયામસૌ

શ્રિયતિ હિ ગલત્તન્દ્રા ચન્દ્રાવતંસસધર્મિણીમ્

॥33॥

શ્લોક 35

પરિમલપરીપાકોદ્રેકં પયોમુચિ કાઞ્ચને

શિખરિણિ પુનર્દ્બૈધીભાવં શશિન્યરુણાતપમ્ ।

અપિ ચ જનયન્કમ્બોર્લક્ષ્મીમનમ્બુનિ કોઽપ્યસૌ

કુસુમધનુષઃ કાઞ્ચીદેશે ચકાસ્તિ પરાક્રમઃ

॥34॥

શ્લોક 36

પુરદમયિતુર્વામોત્સઙ્ગસ્થલેન રસજ્ઞયા

સરસકવિતાભાજા કાઞ્ચીપુરોદરસીમયા ।

તટપરિસરૈર્નીહારાદ્રેર્વચોભિરકૃત્રિમૈઃ

કિમિવ ન તુલામસ્મચ્ચેતો મહેશ્વરિ ગાહતે

॥35॥

શ્લોક 37

નયનયુગલીમાસ્માકીનાં કદા નુ ફલેગ્રહીં

વિદધતિ ગતૌ વ્યાકુર્વાણા ગજેન્દ્રચમત્ક્રિયામ્ ।

મરતકરુચો માહેશાના ઘનસ્તનનમ્રિતાઃ

સુકૃતવિભવાઃ પ્રાઞ્ચઃ કાઞ્ચીવતંસધુરન્ધરાઃ

॥36॥

શ્લોક 38

મનસિજયશઃપારમ્પર્યં મરન્દઝરીસુવાં

કવિકુલગિરાં કન્દં કમ્પાનદીતટમણ્ડનમ્ ।

મધુરલલિતં મત્કં ચક્ષુર્મનીષિમનોહરં

પુરવિજયિનઃ સર્વસ્વં તત્પુરસ્કુરુતે કદા

॥37॥

શ્લોક 39

શિથિલિતતમોલીલાં નીલારવિન્દવિલોચનાં

દહનવિલસત્ફાલાં શ્રીકામકોટિમુપાસ્મહે ।

કરધૃતસચ્છૂલાં કાલારિચિત્તહરાં પરાં

મનસિજકૃપાલીલાં લોલાલકામલિકેક્ષણામ્

॥38॥

શ્લોક 40

કલાલીલાશાલા કવિકુલવચઃકૈરવવની-

શરજ્જ્યોત્સ્નાધારા શશધરશિશુશ્લાઘ્યમુકુટી ।

પુનીતે નઃ કમ્પાપુલિનતટસૌહાર્દતરલા

કદા ચક્ષુર્માર્ગં કનકગિરિધાનુષ્કમહિષી

॥39॥

શ્લોક 41

નમઃ સ્તાન્નમ્રેભ્યઃ સ્તનગરિમગર્વેણ ગુરુણા

દધાનેભ્યશ્ચૂડાભરણમમૃતસ્યન્દિ શિશિરમ્ ।

સદા વાસ્તવેભ્યઃ સુવિધભુવિ કમ્પાખ્યસરિતે

યશોવ્યાપારેભ્યઃ સુકૃતવિભવેભ્યો રતિપતેઃ

॥40॥

શ્લોક 42

અસૂયન્તી કાચિન્મરકતરુચો નાકિમુકુટી-

કદમ્બં ચુમ્બન્તી ચરણનખચન્દ્રાંશુપટલૈઃ ।

તમોમુદ્રાં વિદ્રાવયતુ મમ કાઞ્ચીર્નિલયના

હરોત્સઙ્ગશ્રીમન્મણિગૃહમહાદીપકલિકા

॥41॥

શ્લોક 43

અનાદ્યન્તા કાચિત્સુજનનયનાનન્દજનની

નિરુન્ધાના કાન્તિં નિજરુચિવિલાસૈર્જલમુચામ્ ।

સ્મરારેસ્તારલ્યં મનસિ જનયન્તી સ્વયમહો

ગલત્કમ્પા શમ્પા પરિલસતિ કમ્પાપરિસરે

॥42॥

શ્લોક 44

સુધાડિણ્ડીરશ્રીઃ સ્મિતરુચિષુ તુણ્ડીરવિષયં

પરિષ્કુર્વાણાસૌ પરિહસિતનીલોત્પલરુચિઃ ।

સ્તનાભ્યામાનમ્રા સ્તબકયતુ મે કાઙ્ક્ષિતતરું

દૃશામૈશાનીનાં સુકૃતફલપાણ્ડિત્યગરિમા

॥43॥

શ્લોક 45

કૃપાધારાદ્રોણી કૃપણધિષણાનાં પ્રણમતાં

નિહન્ત્રી સન્તાપં નિગમમુકુટોત્તંસકલિકા ।

પરા કાઞ્ચીલીલાપરિચયવતી પર્વતસુતા

ગિરાં નીવી દેવી ગિરિશપરતન્ત્રા વિજયતે

॥44॥

શ્લોક 46

કવિત્વશ્રીકન્દઃ સુકૃતપરિપાટી હિમગિરેઃ

વિધાત્રી વિશ્વેષાં વિષમશરવીરધ્વજપટી ।

સખી કમ્પાનદ્યાઃ પદહસિતપાથોજયુગલી

પુરાણો પાયાન્નઃ પુરમથનસામ્રાજ્યપદવી

॥45॥

શ્લોક 47

દરિદ્રાણા મધ્યે દરદલિતતાપિચ્છસુષમાઃ

સ્તનાભોગક્કાન્તાસ્તરુણહરિણાઙ્કાઙ્કિતકચાઃ ।

હરાધીના નાનાવિબુધમુકુટીચુમ્બિતપદાઃ

કદા કમ્પાતીરે કથય વિહરામો ગિરિસુતે

॥46॥

શ્લોક 48

વરીવર્તુ સ્થેમા ત્વયિ મમ ગિરાં દેવિ મનસો

નરીનર્તુ પ્રૌઢા વદનકમલે વાક્યલહરી ।

ચરીચર્તુ પ્રજ્ઞાજનનિ જડિમાનઃ પરજને

સરીસર્તુ સ્વૈરં જનનિ મયિ કામાક્ષિ કરુણા

॥47॥

શ્લોક 49

ક્ષણાત્તે કામાક્ષિ ભ્રમરસુષમાશિક્ષણગુરુઃ

કટાક્ષવ્યાક્ષેપો મમ ભવતુ મોક્ષાય વિપદામ્ ।

નરીનર્તુ સ્વૈરં વચનલહરી નિર્જરપુરી-

સરિદ્વીચીનીચીકરણપટુરાસ્યે મમ સદા

॥48॥

શ્લોક 50

પુરસ્તાન્મે ભૂયઃપ્રશમનપરઃ સ્તાન્મમ રુજાં

પ્રચારસ્તે કમ્પાતટવિહૃતિસમ્પાદિનિ દૃશોઃ ।

ઇમાં યાચ્ઞામૂરીકુરુ સપદિ દૂરીકુરુ તમઃ-

પરીપાકં મત્કં સપદિ બુધલોકં ચ નય મામ્

॥49॥

શ્લોક 51

ઉદઞ્ચન્તી કાઞ્ચીનગરનિલયે ત્વત્કરુણયા

સમૃદ્ધા વાગ્ધાટી પરિહસિતમાધ્વી કવયતામ્ ।

ઉપાદત્તે મારપ્રતિભટજટાજૂટમુકુટી-

કુટીરોલ્લાસિન્યાઃ શતમખતટિન્યા જયપટીમ્

॥50॥

શ્લોક 52

શ્રિયં વિદ્યાં દદ્યાજ્જનનિ નમતાં કીર્તિમમિતાં

સુપુત્રાન્ પ્રાદત્તે તવ ઝટિતિ કામાક્ષિ કરુણા ।

ત્રિલોક્યામાધિક્યં ત્રિપુરપરિપન્થિપ્રણયિનિ

પ્રણામસ્ત્વત્પાદે શમિતદુરિતે કિં ન કુરુતે

॥51॥

શ્લોક 53

મનઃસ્તમ્ભં સ્તમ્ભં ગમયદુપકમ્પં પ્રણમતાં

સદા લોલં નીલં ચિકુરજિતલોલમ્બનિકરમ્ ।

ગિરાં દૂરં સ્મેરં ધૃતશશિકિશોરં પશુપતેઃ

દૃશાં યોગ્યં ભોગ્યં તુહિનગિરિભાગ્યં વિજયતે

॥52॥

શ્લોક 54

ઘનશ્યામાન્કામાન્તકમહિષિ કામાક્ષિ મધુરાન્

દૃશાં પાતાનેતાનમૃતજલશીતાનનુપમાન્ ।

ભવોત્પાતે ભીતે મયિ વિતર નાથે દૃઢભવ-

ન્મનશ્શોકે મૂકે હિમગિરિપતાકે કરુણયા

॥53॥

શ્લોક 55

નતાનાં મન્દાનાં ભવનિગલબન્ધાકુલધિયાં

મહાન્ધ્યાં રુન્ધાનામભિલષિતસન્તાનલતિકામ્ ।

ચરન્તીં કમ્પાયાસ્તટભુવિ સવિત્રીં ત્રિજગતાં

સ્મરામસ્તાં નિત્યં સ્મરમથનજીવાતુકલિકામ્

॥54॥

શ્લોક 56

પરા વિદ્યા હૃદ્યાશ્રિતમદનવિદ્યા મરકત-

પ્રભાનીલા લીલાપરવશિતશૂલાયુધમનાઃ ।

તમઃપૂરં દૂરં ચરણનતપૌરન્દરપુરી-

મૃગાક્ષી કામાક્ષી કમલતરલાક્ષી નયતુ મે

॥55॥

શ્લોક 57

અહન્તાખ્યા મત્કં કબલયતિ હા હન્ત હરિણી

હઠાત્સંવિદ્રૂપં હરમહિષિ સસ્યાઙ્કુરમસૌ ।

કટાક્ષવ્યાક્ષેપપ્રકટહરિપાષાણપટલૈઃ

ઇમામુચ્ચૈરુચ્ચાટય ઝટિતિ કામાક્ષિ કૃપયા

॥56॥

શ્લોક 58

બુધે વા મૂકે વા તવ પતતિ યસ્મિન્ક્ષણમસૌ

કટાક્ષઃ કામાક્ષિ પ્રકટજડિમક્ષોદપટિમા ।

કથઙ્કારં નાસ્મૈ કરમુકુલચૂડાલમુકુટા

નમોવાકં બ્રૂયુર્નમુચિપરિપન્થિપ્રભૃતયઃ

॥57॥

શ્લોક 59

પ્રતીચીં પશ્યામઃ પ્રકટરુચિનીવારકમણિ-

પ્રભાસધ્રીચીનાં પ્રદલિતષડાધારકમલામ્ ।

ચરન્તીં સૌષુમ્ને પથિ પરપદેન્દુપ્રવિગલ-

ત્સુધાર્દ્રાં કામાક્ષીં પરિણતપરઞ્જ્યોતિરુદયામ્

॥58॥

શ્લોક 60

જમ્ભારાતિપ્રભૃતિમુકુટીઃ પાદયોઃ પીઠયન્તી

ગુમ્ફાન્વાચાં કવિજનકૃતાન્સ્વૈરમારામયન્તી ।

શમ્પાલક્ષ્મીં મણિગણરુચાપાટલૈઃ પ્રાપયન્તી

કમ્પાતીરે કવિપરિષદાં જૃમ્ભતે ભાગ્યસીમા

॥59॥

શ્લોક 61

ચન્દ્રાપીડાં ચતુરવદનાં ચઞ્ચલાપાઙ્ગલીલાં

કુન્દસ્મેરાં કુચભરનતાં કુન્તલોદ્ધૂતભૃઙ્ગામ્ ।

મારારાતેર્મદનશિખિનં માંસલં દીપયન્તીં

કામાક્ષીં તાં કવિકુલગિરાં કલ્પવલ્લીમુપાસે

॥60॥

શ્લોક 62

કાલામ્ભોદપ્રકરસુષમાં કાન્તિભિસ્તિર્જયન્તી

કલ્યાણાનામુદયસરણિઃ કલ્પવલ્લી કવીનામ્ ।

કન્દર્પારેઃ પ્રિયસહચરી કલ્મષાણાં નિહન્ત્રી

કાઞ્ચીદેશં તિલકયતિ સા કાપિ કારુણ્યસીમા

॥61॥

શ્લોક 63

ઊરીકુર્વન્નુરસિજતટે ચાતુરીં ભૂધરાણાં

પાથોજાનાં નયનયુગલે પરિપન્થ્યં વિતન્વન્ ।

કમ્પાતીરે વિહરતિ રુચા મોઘયન્મેઘશૈલીં

કોકદ્વેષં શિરસિ કલયન્કોઽપિ વિદ્યાવિશેષઃ

॥62॥

શ્લોક 64

કાઞ્ચીલીલાપરિચયવતી કાપિ તાપિચ્છલક્ષ્મીઃ

જાડ્યારણ્યે હુતવહશિખા જન્મભૂમિઃ કૃપાયાઃ ।

માકન્દશ્રીર્મધુરકવિતાચાતુરી કોકિલાનાં

માર્ગે ભૂયાન્મમ નયનયોર્માન્મથી કાપિ વિદ્યા

॥63॥

શ્લોક 65

સેતુર્માતર્મરતકમયો ભક્તિભાજાં ભવાબ્ધૌ

લીલાલોલા કુવલયમયી માન્મથી વૈજયન્તી ।

કાઞ્ચીભૂષા પશુપતિદૃશાં કાપિ કાલાઞ્જનાલી

મત્કં દુઃખં શિથિલયતુ તે મઞ્જુલાપાઙ્ગમાલા

॥64॥

શ્લોક 66

વ્યાવૃણ્વાનાઃ કુવલયદલપ્રક્રિયાવૈરમુદ્રાં

વ્યાકુર્વાણા મનસિજમહારાજસામ્રાજ્યલક્ષ્મીમ્ ।

કાઞ્ચીલીલાવિહૃતિરસિકે કાઙ્ક્ષિતં નઃ ક્રિયાસુઃ

બન્ધચ્છેદે તવ નિયમિનાં બદ્ધદીક્ષાઃ કટાક્ષાઃ

॥65॥

શ્લોક 67

કાલામ્ભોદે શશિરુચિ દલં કૈતકં દર્શયન્તી

મધ્યેસૌદામિનિ મધુલિહાં માલિકાં રાજયન્તી ।

હંસારાવં વિકચકમલે મઞ્જુમુલ્લાસયન્તી

કમ્પાતીરે વિલસતિ નવા કાપિ કારુણ્યલક્ષ્મીઃ

॥66॥

શ્લોક 68

ચિત્રં ચિત્રં નિજમૃદુતયા ભર્ત્સયન્પલ્લવાલીં

પુંસાં કામાન્ભુવિ ચ નિયતં પૂરયન્પુણ્યભાજામ્ ।

જાતઃ શૈલાન્ન તુ જલનિધેઃ સ્વૈરસઞ્ચારશીલઃ

કાઞ્ચીભૂષા કલયતુ શિવં કોઽપિ ચિન્તામણિર્મે

॥67॥

શ્લોક 69

તામ્રામ્ભોજં જલદનિકટે તત્ર બન્ધૂકપુષ્પં

તસ્મિન્મલ્લીકુસુમસુષમાં તત્ર વીણાનિનાદમ્ ।

વ્યાવૃન્વાના સુકૃતલહરી કાપિ કાઞ્ચિનગર્યામ્

ઐશાની સા કલયતિતરામૈન્દ્રજાલં વિલાસમ્

॥68॥

શ્લોક 70

આહારાંશં ત્રિદશસદસામાશ્રયે ચાતકાનામ્

આકાશોપર્યપિ ચ કલયન્નાલયં તુઙ્ગમેષામ્ ।

કમ્પાતીરે વિહરતિતરાં કામધેનુઃ કવીનાં

મન્દસ્મેરો મદનનિગમપ્રક્રિયાસમ્પ્રદાયઃ

॥69॥

શ્લોક 71

આર્દ્રીભૂતૈરવિરલકૃપૈરાત્તલીલાવિલાસૈઃ

આસ્થાપૂર્ણૈરધિકચપલૈરઞ્ચિતામ્ભોજશિલ્પૈઃ ।

કાન્તૈર્લક્ષ્મીલલિતભવનૈઃ કાન્તિકૈવલ્યસારૈઃ

કાશ્મલ્યં નઃ કબલયતુ સા કામકોટી કટાક્ષૈઃ

॥70॥

શ્લોક 72

આધૂન્વન્ત્યૈ તરલનયનૈરાઙ્ગજીં વૈજયન્તીમ્

આનન્દિન્યૈ નિજપદજુષામાત્તકાઞ્ચીપુરાયૈ ।

આસ્માકીનં હૃદયમખિલૈરાગમાનાં પ્રપઞ્ચૈઃ

આરાધ્યાયૈ સ્પૃહયતિતરામદિમાયૈ જનન્યૈ

॥71॥

શ્લોક 73

દૂરં વાચાં ત્રિદશસદસાં દુઃખસિન્ધોસ્તરિત્રં

મોહક્ષ્વેલક્ષિતિરુહવને ક્રૂરધારં કુઠારમ્ ।

કમ્પાતીરપ્રણયિ કવિભિર્વર્ણિતોદ્યચ્ચરિત્રં

શાન્ત્યૈ સેવે સકલવિપદાં શાઙ્કરં તત્કલત્રમ્

॥72॥

શ્લોક 74

ખણ્ડીકૃત્ય પ્રકૃતિકુટિલં કલ્મષં પ્રાતિભશ્રી-

શુણ્ડીરત્વં નિજપદજુષાં શૂન્યતન્દ્રં દિશન્તી ।

તુણ્ડીરાખ્યૈ મહતિ વિષયે સ્વર્ણવૃષ્ટિપ્રદાત્રી

ચણ્ડી દેવી કલયતિ રતિં ચન્દ્રચૂડાલચૂડે

॥73॥

શ્લોક 75

યેન ખ્યાતો ભવતિ સ ગૃહી પૂરુષો મેરુધન્વા

યદ્દૃક્કોણે મદનનિગમપ્રાભવં બોભવીતિ ।

યત્પ્રીત્યૈવ ત્રિજગદધિપો જૃમ્ભતે કિમ્પચાનઃ

કમ્પાતીરે સ જયતિ મહાન્કશ્ચિદોજોવિશેષઃ

॥74॥

શ્લોક 76

ધન્યા ધન્યા ગતિરિહ ગિરાં દેવિ કામાક્ષિ યન્મે

નિન્દ્યાં ભિન્દ્યાત્સપદિ જડતાં કલ્મષાદુન્મિષન્તીમ્ ।

સાધ્વી માધ્વીરસમધુરતાભઞ્જિની મઞ્જુરીતિઃ

વાણીવેણી ઝટિતિ વૃણુતાત્સ્વર્ધુનીસ્પર્ધિની મામ્

॥75॥

શ્લોક 77

યસ્યા વાટી હૃદયકમલં કૌસુમી યોગભાજાં

યસ્યાઃ પીઠી સતતશિશિરા શીકરૈર્માકરન્દૈઃ ।

યસ્યાઃ પેટી શ્રુતિપરિચલન્મૌલિરત્નસ્ય કાઞ્ચી

સા મે સોમાભરણમહિષી સાધયેત્કાઙ્ક્ષિતાનિ

॥76॥

શ્લોક 78

એકા માતા સકલજગતામીયુષી ધ્યાનમુદ્રામ્

એકામ્રાધીશ્વરચરણયોરેકતાનાં સમિન્ધે ।

તાટઙ્કોદ્યન્મણિગણરુચા તામ્રકર્ણપ્રદેશા

તારુણ્યશ્રીસ્તબકિતતનુસ્તાપસી કાપિ બાલા

॥77॥

શ્લોક 79

દન્તાદન્તિપ્રકટનકરી દન્તિભિર્મન્દયાનૈઃ

મન્દારાણાં મદપરિણતિં મથ્નતી મન્દહાસૈઃ ।

અઙ્કૂરાભ્યાં મનસિજતરોરઙ્કિતોરાઃ કુચાભ્યા-

મન્તઃકાઞ્ચિ સ્ફુરતિ જગતામાદિમા કાપિ માતા

॥78॥

શ્લોક 80

ત્રિયમ્બકકુટુમ્બિનીં ત્રિપુરસુન્દરીમિન્દિરાં

પુલિન્દપતિસુન્દરીં ત્રિપુરભૈરવીં ભારતીમ્ ।

મતઙ્ગકુલનાયિકાં મહિષમર્દનીં માતૃકાં

ભણન્તિ વિબુધોત્તમા વિહૃતિમેવ કામાક્ષિ તે

॥79॥

શ્લોક 81

મહામુનિમનોનટી મહિતરમ્યકમ્પાતટી-

કુટીરકવિહારિણી કુટિલબોધસંહારિણી ।

સદા ભવતુ કામિની સકલદેહિનાં સ્વામિની

કૃપાતિશયકિઙ્કરી મમ વિભૂતયે શાઙ્કરી

॥80॥

શ્લોક 82

જડાઃ પ્રકૃતિનિર્ધના જનવિલોચનારુન્તુદા

નરા જનનિ વીક્ષણં ક્ષણમવાપ્ય કામાક્ષિ તે ।

વચસ્સુ મધુમાધુરીં પ્રકટયન્તિ પૌરન્દરી-

વિભૂતિષુ વિડમ્બનાં વપુષિ માન્મથીં પ્રક્રિયામ્

॥81॥

શ્લોક 83

ઘન્સતનતટસ્ફુટસ્ફુરિતકઞ્ચુલીચઞ્ચલી-

કૃતત્રિપુરશાસના સુજનશીલિતોપાસના ।

દૃશોઃ સરણિમશ્નુતે મમ કદા નુ કાઞ્ચીપુરે

પરા પરમયોગિનાં મનસિ ચિત્કુલા પુષ્કલા

॥82॥

શ્લોક 84

કવીન્દ્રહૃદયેચરી પરિગૃહીતકાઞ્ચીપુરી

નિરૂઢકરુણાઝરી નિખિલલોકરક્ષાકરી ।

મનઃપથદવીયસી મદનશાસનપ્રેયસી

મહાગુણગરીયસી મમ દૃશોઽસ્તુ નેદીયસી

॥83॥

શ્લોક 85

ધનેન ન રમામહે ખલજનાન્ન સેવામહે

ન ચાપલમયામહે ભવભયાન્ન દૂયામહે ।

સ્થિરાં તનુમહેતરાં મનસિ કિં ચ કાઞ્ચીરત-

સ્મરાન્તકકુટુમ્બિનીચરણપલ્લવોપાસનામ્

॥84॥

શ્લોક 86

સુરાઃ પરિજના વપુર્મનસિજાય વૈરાયતે

ત્રિવિષ્ટપનિતમ્બિનીકુચતટી ચ કેલીગિરિઃ ।

ગિરઃ સુરભયો વયસ્તરુણિમા દરિદ્રસ્ય વા

કટાક્ષસરણૌ ક્ષણં નિપતિતસ્ય કામાક્ષિ તે

॥85॥

શ્લોક 87

પવિત્રય જગત્ત્રયીવિબુધબોધજીવાતુભિઃ

પુરત્રયવિમર્દિનઃ પુલકકઞ્ચુલીદાયિભિઃ ।

ભવક્ષયવિચક્ષણૈર્વ્યસનમોક્ષણૈર્વીક્ષણૈઃ

નિરક્ષરશિરોમણિં કરુણયૈવ કામાક્ષિ મામ્

॥86॥

શ્લોક 88

કદા કલિતખેલનાઃ કરુણયૈવ કાઞ્ચીપુરે

કલાયમુકુલત્વિષઃ શુભકદમ્બપૂર્ણાઙ્કુરાઃ ।

પયોધરભરાલસાઃ કવિજનેષુ તે બન્ધુરાઃ

પચેલિમકૃપારસા પરિપતન્તિ માર્ગે દૃશોઃ

॥87॥

શ્લોક 89

અશોધ્યમચલોદ્ભવં હૃદયનન્દનં દેહિનામ્

અનર્ઘમધિકાઞ્ચિ તત્કિમપિ રત્નમુદ્દ્યોતતે ।

અનેન સમલઙ્કૃતા જયતિ શઙ્કરાઙ્કસ્થલી

કદાસ્ય મમ માનસં વ્રજતિ પેટિકાવિભ્રમમ્

॥88॥

શ્લોક 90

પરામૃતઝરીપ્લુતા જયતિ નિત્યમન્તશ્ચરી

ભુવામપિ બહિશ્ચરી પરમસંવિદેકાત્મિકા ।

મહદ્ભિરપરોક્ષિતા સતતમેવ કાઞ્ચીપુરે

મમાન્વહમહમ્મતિર્મનસિ ભાતુ માહેશ્વરી

॥89॥

શ્લોક 91

તમોવિપિનધાવિનં સતતમેવ કાઞ્ચીપુરે

વિહારરસિકા પરા પરમસંવિદુર્વીરુહે ।

કટાક્ષનિગલૈર્દૃઢં હૃદયદુષ્ટદન્તાવલં

ચિરં નયતુ મામકં ત્રિપુરવૈરિસીમન્તિની

॥90॥

શ્લોક 92

ત્વમેવ સતિ ચણ્ડિકા ત્વમસિ દેવિ ચામુણ્ડિકા

ત્વમેવ પરમાતૃકા ત્વમપિ યોગિનીરૂપિણી ।

ત્વમેવ કિલ શામ્ભવી ત્વમસિ કામકોટી જયા

ત્વમેવ વિજયા ત્વયિ ત્રિજગદમ્બ કિં બ્રૂમહે

॥91॥

શ્લોક 93

પરે જનનિ પાર્વતિ પ્રણતપાલિનિ પ્રાતિભ-

પ્રદાત્રિ પરમેશ્વરિ ત્રિજગદાશ્રિતે શાશ્વતે ।

ત્રિયમ્બકકુટુમ્બિનિ ત્રિપદસઙ્ગિનિ ત્રીક્ષણે

ત્રિશક્તિમયિ વીક્ષણં મયિ નિધેહિ કામાક્ષિ તે

॥92॥

શ્લોક 94

મનોમધુકરોત્સવં વિદધતી મનીષાજુષાં

સ્વયમ્પ્રભવવૈખરીવિપિનવીથિકાલમ્બિની ।

અહો શિશિરિતા કૃપામધુરસેન કમ્પાતટે

ચરાચરવિધાયિની ચલતિ કાપિ ચિન્મઞ્જરી

॥93॥

શ્લોક 95

કલાવતિ કલાભૃતો મુકુટસીમ્નિ લીલાવતિ

સ્પૃહાવતિ મહેશ્વરે ભુવનમોહને ભાસ્વતિ ।

પ્રભાવતિ રમે સદા મહિતરૂપશોભાવતિ

ત્વરાવતિ પરે સતાં ગુરુકૃપામ્બુધારાવતિ

॥94॥

શ્લોક 96

ત્વયૈવ જગદમ્બયા ભુવનમણ્ડલં સૂયતે

ત્વયૈવ કરુણાર્દ્રયા તદપિ રક્ષણં નીયતે ।

ત્વયૈવ ખરકોપયા નયનપાવકે હૂયતે

ત્વયૈવ કિલ નિત્યયા જગતિ સન્તતં સ્થીયતે

॥95॥

શ્લોક 97

ચરાચરજગન્મયીં સકલહૃન્મયીં ચિન્મયીં

ગુણત્રયમયીં જગત્ત્રયમયીં ત્રિધામામયીમ્ ।

પરાપરમયીં સદા દશદિશાં નિશાહર્મયીં

પરાં સતતસન્મયીં મનસિ ચિન્મયીં શીલયે

॥96॥

શ્લોક 98

જય જગદમ્બિકે હરકુટુમ્બિનિ વક્ત્રરુચા

જિતશરદમ્બુજે ઘનવિડમ્બિનિ કેશરુચા ।

પરમવલમ્બનં કુરુ સદા પરરૂપધરે

મમ ગતસંવિદો જડિમડમ્બરતાણ્ડવિનઃ

॥97॥

શ્લોક 99

ભુવનજનનિ ભૂષાભૂતચન્દ્રે નમસ્તે

કલુષશમનિ કમ્પાતીરગેહે નમસ્તે ।

નિખિલનિગમવેદ્યે નિત્યરૂપે નમસ્તે

પરશિવમયિ પાશચ્છેદહસ્તે નમસ્તે

॥98॥

શ્લોક 100

ક્વણત્કાઞ્ચી કાઞ્ચીપુરમણિવિપઞ્ચીલયઝરી-

શિરઃકમ્પા કમ્પાવસતિરનુકમ્પાજલનિધિઃ ।

ઘનશ્યામા શ્યામા કઠિનકુચસીમા મનસિ મે

મૃગાક્ષી કામાક્ષી હરનટનસાક્ષી વિહરતાત્

॥99॥

શ્લોક 101

સમરવિજયકોટી સાધકાનન્દધાટી

મૃદુગુણપરિપેટી મુખ્યકાદમ્બવાટી ।

મુનિનુતપરિપાટી મોહિતાજાણ્ડકોટી

પરમશિવવધૂટી પાતુ માં કામકોટી

॥100॥

શ્લોક 102

ઇમં પરવરપ્રદં પ્રકૃતિપેશલં પાવનં

પરાપરચિદાકૃતિપ્રકટનપ્રદીપાયિતમ્ ।

સ્તવં પઠતિ નિત્યદા મનસિ ભાવયન્નમ્બિકાં

જપૈરલમલં મખૈરધિકદેહસંશોષણૈઃ

॥101॥

શ્લોક 103

॥ ઇતિ સ્તુતિશતકં સમ્પૂર્ણમ્ ॥