মূক পঞ্চ শতি 3 - স্তুতি শতকম্

মূক পঞ্চ শতি 3 - স্তুতি শতকম্

শ্লোক 1

পাণ্ডিত্যং পরমেশ্বরি স্তুতিবিধৌ নৈবাশ্রযন্তে গিরাং

বৈরিঞ্চান্যপি গুম্ফনানি বিগলদ্গর্বাণি শর্বাণি তে ।

স্তোতুং ত্বাং পরিফুল্লনীলনলিনশ্যামাক্ষি কামাক্ষি মাং

বাচালীকুরুতে তথাপি নিতরাং ত্বত্পাদসেবাদরঃ

শ্লোক 2

তাপিঞ্ছস্তবকত্বিষে তনুভৃতাং দারিদ্র্যমুদ্রাদ্বিষে

সংসারাখ্যতমোমুষে পুররিপোর্বামাঙ্কসীমাজুষে ।

কম্পাতীরমুপেযুষে কবযতাং জিহ্বাকুটীং জগ্মুষে

বিশ্বত্রাণপুষে নমোঽস্তু সততং তস্মৈ পরঞ্জ্যোতিষে

॥1॥

শ্লোক 3

যে সন্ধ্যারুণযন্তি শঙ্করজটাকান্তারচন্রার্ভকং

সিন্দূরন্তি চ যে পুরন্দরবধূসীমন্তসীমান্তরে ।

পুণ্য.ং যে পরিপক্কযন্তি ভজতাং কাঞ্চীপুরে মামমী

পাযাসুঃ পরমেশ্বরপ্রণযিনীপাদোদ্ভবাঃ পাংসবঃ

॥2॥

শ্লোক 4

কামাডম্বরপূরযা শশিরুচা কম্রস্মিতানাং ত্বিষা

কামারেরনুরাগসিন্ধুমধিকং কল্লোলিতং তন্বতী ।

কামাক্ষীতি সমস্তসজ্জননুতা কল্যাণদাত্রী নৃণাং

কারুণ্যাকুলমানসা ভগবতী কম্পাতটে জৃম্ভতে

॥3॥

শ্লোক 5

কামাক্ষীণপরাক্রমপ্রকটনং সম্ভাবযন্তী দৃশা

শ্যামা ক্ষীরসহোদরস্মিতরুচিপ্রক্ষালিতাশান্তরা ।

কামাক্ষীজনমৌলিভূষণমণির্বাচাং পরা দেবতা

কামাক্ষীতি বিভাতি কাপি করুণা কম্পাতটিন্যাস্তটে

॥4॥

শ্লোক 6

শ্যামা কাচন চন্দ্রিকা ত্রিভুবনে পুণ্যাত্মনামাননে

সীমাশূন্যকবিত্ববর্ষজননী যা কাপি কাদম্বিনী ।

মারারাতিমনোবিমোহনবিধৌ কাচিতত্তমঃকন্দলী

কামাক্ষ্যাঃ করুণাকটাক্ষলহরী কামায মে কল্পতাম্

॥5॥

শ্লোক 7

প্রৌঢধ্বান্তকদম্বকে কুমুদিনীপুণ্যাঙ্কুরং দর্শযন্

জ্যোত্স্নাসঙ্গমনেঽপি কোকমিথুনং মিশ্রং সমুদ্ভাবযন্ ।

কালিন্দীলহরীদশাং প্রকটযন্কম্রাং নভস্যদ্ভুতাং

কশ্চিন্নেত্রমহোত্সবো বিজযতে কাঞ্চীপুরে শূলিনঃ

॥6॥

শ্লোক 8

তন্দ্রাহীনতমালনীলসুষমৈস্তারুণ্যলীলাগৃহৈঃ

তারানাথকিশোরলাঞ্ছিতকচৈস্তাম্রারবিন্দেক্ষণৈঃ ।

মাতঃ সংশ্রযতাং মনো মনসিজপ্রাগল্ভ্যনাডিন্ধমৈঃ

কম্পাতীরচরৈর্ঘনস্তনভরৈঃ পুণ্যাঙ্করৈঃ শাঙ্করৈঃ

॥7॥

শ্লোক 9

নিত্যং নিশ্চলতামুপেত্য মরুতাং রক্ষাবিধিং পুষ্ণতী

তেজস্সঞ্চযপাটবেন কিরণানুষ্ণদ্যুতের্মুষ্ণতী ।

কাঞ্চীমধ্যগতাপি দীপ্তিজননী বিশ্বান্তরে জৃম্ভতে

কাচিচ্চিত্রমহো স্মৃতাপি তমসাং নির্বাপিকা দীপিকা

॥8॥

শ্লোক 10

কান্তৈঃ কেশরুচাং চযৈর্ভ্রমরিতং মন্দস্মিতৈঃ পুষ্পিতং

কান্ত্যা পল্লবিতং পদাম্বুরুহযোর্নেত্রত্বিষা পত্রিতম্ ।

কম্পাতীরবনান্তরং বিদধতী কল্যাণজন্মস্থলী

কাঞ্চীমধ্যমহামণির্বিজযতে কাচিত্কৃপাকন্দলী

॥9॥

শ্লোক 11

রাকাচন্দ্রসমানকান্তিবদনা নাকাধিরাজস্তুতা

মূকানামপি কুর্বতী সুরধনীনীকাশবাগ্বৈভবম্ ।

শ্রীকাঞ্চীনগরীবিহাররসিকা শোকাপহন্ত্রী সতাম্

একা পুণ্যপরম্পরা পশুপতেরাকারিণী রাজতে

॥10॥

শ্লোক 12

জাতা শীতলশৈলতঃ সুকৃতিনাং দৃশ্যা পরং দেহিনাং

লোকানাং ক্ষণমাত্রসংস্মরণতঃ সন্তাপবিচ্ছেদিনী ।

আশ্চর্যং বহু খেলনং বিতনুতে নৈশ্চল্যমাবিভ্রতী

কম্পাযাস্তটসীম্নি কাপি তটিনী কারুণ্যপাথোমযী

॥11॥

শ্লোক 13

ঐক্যং যেন বিরচ্যতে হরতনৌ দম্ভাবপুম্ভাবুকে

রেখা যত্কচসীম্নি শেখরদশাং নৈশাকরী গাহতে ।

ঔন্নত্যং মুহুরেতি যেন স মহান্মেনাসখঃ সানুমান্

কম্পাতীরবিহারিণা সশরণাস্তেনৈব ধাম্না বযম্

॥12॥

শ্লোক 14

অক্ষ্ণোশ্চ স্তনযোঃ শ্রিযা শ্রবণযোর্বাহ্বোশ্চ মূলং স্পৃশন্

উত্তংসেন মুখেন চ প্রতিদিনং দ্রুহ্যন্পযোজন্মনে ।

মাধুর্যেণ গিরাং গতেন মৃদুনা হংসাঙ্গনাং হ্রেপযন্

কাঞ্চীসীম্নি চকাস্তি কোঽপি কবিতাসন্তানবীজাঙ্কুরঃ

॥13॥

শ্লোক 15

খণ্ডং চান্দ্রমসং বতংসমনিশং কাঞ্চীপুরে খেলনং

কালাযশ্ছবিতস্করীং তনুরুচিং কর্ণজপে লোচনে ।

তারুণ্যোষ্মনখম্পচং স্তনভরং জঙ্ঘাস্পৃশং কুন্তলং

ভাগ্যং দেশিকসঞ্চিতং মম কদা সম্পাদযেদম্বিকে

॥14॥

শ্লোক 16

তন্বানং নিজকেলিসৌধসরণিং নৈসর্গিকীণাং গিরাং

কেদারং কবিমল্লসূক্তিলহরীসস্যশ্রিযাং শাশ্বতম্ ।

অংহোবঞ্চনচুঞ্চু কিঞ্চন ভজে কাঞ্চীপুরীমণ্ডনং

পর্যাযচ্ছবি পাকশাসনমণেঃ পৌষ্পেষবং পৌরুষম্

॥15॥

শ্লোক 17

আলোকে মুখপঙ্কজে চ দধতী সৌধাকরীং চাতুরীং

চূডালঙ্ক্রিযমাণপঙ্কজবনীবৈরাগমপ্রক্রিযা ।

মুগ্ধস্মেরমুখী ঘন্সতনতটীমূর্চ্ছালমধ্যাঞ্চিতা

কাঞ্চীসীমনি কামিনী বিজযতে কাচিজ্জগন্মোহিনী

॥16॥

শ্লোক 18

যস্মিন্নম্ব ভবত্কটাক্ষরজনী মন্দেঽপি মন্দস্মিত-

জ্যোত্স্নাসংস্নপিতা ভবত্যভিমুখী তং প্রত্যহো দেহিনম্ ।

দ্রক্ষামাক্ষিকমাধুরীমদভরব্রীডাকরী বৈখরী

কামাক্ষি স্বযমাতনোত্যভিসৃতিং বামেক্ষণেব ক্ষণম্

॥17॥

শ্লোক 19

কালিন্দীজলকান্তযঃ স্মিতরুচিস্বর্বাহিনীপাথসি

প্রৌঢধ্বান্তরুচঃ স্ফুটাধরমহোলৌহিত্যসন্ধ্যোদযে ।

মণিক্যোপলকুণ্ডলাংশুশিখিনি ব্যামিশ্রধূমশ্রিযঃ

কল্যাণৈকভুবঃ কটাক্ষসুষমাঃ কামাক্ষি রাজন্তি তে

॥18॥

শ্লোক 20

কলকলরণত্কাঞ্চী কাঞ্চীবিভূষণমালিকা

কচভরলসচ্চন্দ্রা চন্দ্রাবতংসসধর্মিণী ।

কবিকুলগিরঃ শ্রাবংশ্রাবং মিলত্পুলকাঙ্কুরা

বিরচিতশিরঃকম্পা কম্পাতটে পরিশোভতে

॥19॥

শ্লোক 21

সরসবচসাং বীচী নীচীভবন্মধুমাধুরী

ভরিতভুবনা কীর্তির্মূর্তির্মনোভবজিত্বরী ।

জননি মনসো যোগ্যং ভোগ্যং নৃণাং তব জাযতে

কথমিব বিনা কাঞ্চীভূষে কটাক্ষতরঙ্গিতম্

॥20॥

শ্লোক 22

ভ্রমরিতসরিত্কূলো নীলোত্পলপ্রভযাঽঽভযা

নতজনতমঃখণ্ডী তুণ্ডীরসীম্নি বিজৃম্ভতে ।

অচলতপসামেকঃ পাকঃ প্রসূনশরাসন-

প্রতিভটমনোহারী নারীকুলৈকশিখামণিঃ

॥21॥

শ্লোক 23

মধুরবচসো মন্দস্মেরা মতঙ্গজগামিনঃ

তরুণিমজুষস্তাপিচ্ছাভাস্তমঃপরিপন্থিনঃ ।

কুচভরনতাঃ কুর্যুর্ভদ্রং কুরঙ্গবিলোচনাঃ

কলিতকরুণাঃ কাঞ্চীভাজঃ কপালিমহোত্সবাঃ

॥22॥

শ্লোক 24

কমলসুষমাক্ষ্যারোহে বিচক্ষণবীক্ষণাঃ

কুমুদসুকৃতক্রীডাচূডালকুন্তলবন্ধুরাঃ ।

রুচিররুচিভিস্তাপিচ্ছশ্রীপ্রপঞ্চনচুঞ্চবঃ

পুরবিজযিনঃ কম্পাতীরে স্ফুরন্তি মনোরথাঃ

॥23॥

শ্লোক 25

কলিতরতযঃ কাঞ্চীলীলাবিধৌ কবিমণ্ডলী-

বচনলহরীবাসন্তীনাং বসন্তবিভূতযঃ ।

কুশলবিধযে ভূযাসুর্মে কুরঙ্গবিলোচনাঃ

কুসুমবিশিখারাতেরক্ষ্ণাং কুতূহলবিভ্রমাঃ

॥24॥

শ্লোক 26

কবলিততমস্কাণ্ডাস্তুণ্ডীরমণ্ডলমণ্ডনাঃ

সরসিজবনীসন্তানানামরুন্তুদশেখরাঃ ।

নযনসরণের্নেদীযংসঃ কদা নু ভবন্তি মে

তরুণজলদশ্যামাঃ শম্ভোস্তপঃফলবিভ্রমাঃ

॥25॥

শ্লোক 27

অচরমমিষুং দীনং মীনধ্বজস্য মুখশ্রিযা

সরসিজভুবো যানং ম্লানং গতেন চ মঞ্জুনা ।

ত্রিদশসদসামন্নং খিন্নং গিরা চ বিতন্বতী

তিলকযতি সা কম্পাতীরং ত্রিলোচনসুন্দরী

॥26॥

শ্লোক 28

জননি ভুবনে চঙ্ক্রম্যেঽহং কিযন্তমনেহসং

কুপুরুষকরভ্রষ্টৈর্দুষ্টৈর্ধনৈরুদরম্ভরিঃ ।

তরুণকরুণে তন্দ্রাশূন্যে তরঙ্গয লোচনে

নমতি মযি তে কিঞ্চিত্কাঞ্চীপুরীমণিদীপিকে

॥27॥

শ্লোক 29

মুনিজনমনঃপেটীরত্নং স্ফুরত্করুণানটী-

বিহরণকলাগেহং কাঞ্চীপুরীমণিভূষণম্ ।

জগতি মহতো মোহব্যাধের্নৃণাং পরমৌষধং

পুরহরদৃশাং সাফল্যং মে পুরঃ পরিজৃম্ভতাম্

॥28॥

শ্লোক 30

মুনিজনমোধাম্নে ধাম্নে বচোমযজাহ্নবী-

হিমগিরিতটপ্রাগ্ভারাযাক্ষরায পরাত্মনে ।

বিহরণজুষে কাঞ্চীদেশে মহেশ্বরলোচন-

ত্রিতযসরসক্রীডাসৌধাঙ্গণায নমো নমঃ

॥29॥

শ্লোক 31

মরকতরুচাং প্রত্যাদেশং মহেশ্বরচক্ষুষাম্

অমৃতলহরীপূরং পারং ভবাখ্যপযোনিধেঃ ।

সুচরিতফলং কাঞ্চীভাজো জনস্য পচেলিমং

হিমশিখরিণো বংশস্যৈকং বতংসমুপাস্মহে

॥30॥

শ্লোক 32

প্রণমনদিনারম্ভে কম্পানদীসখি তাবকে

সরসকবিতোন্মেষঃ পূষা সতাং সমুদঞ্চিতঃ ।

প্রতিভটমহাপ্রৌঢপ্রোদ্যত্কবিত্বকুমুদ্বতীং

নযতি তরসা নিদ্রামুদ্রাং নগেশ্বরকন্যকে

॥31॥

শ্লোক 33

শমিতজডিমারম্ভা কম্পাতটীনিকটেচরী

নিহতদুরিতস্তোমা সোমার্ধমুদ্রিতকুন্তলা ।

ফলিতসুমনোবাঞ্ছা পাঞ্চাযুধী পরদেবতা

সফলযতু মে নেত্রে গোত্রেশ্বরপ্রিযনন্দিনী

॥32॥

শ্লোক 34

মম তু ধিষণা পীড্যা জাড্যাতিরেক কথং ত্বযা

কুমুদসুষমামৈত্রীপাত্রীবতংসিতকুন্তলাম্ ।

জগতি শমিতস্তম্ভাং কম্পানদীনিলযামসৌ

শ্রিযতি হি গলত্তন্দ্রা চন্দ্রাবতংসসধর্মিণীম্

॥33॥

শ্লোক 35

পরিমলপরীপাকোদ্রেকং পযোমুচি কাঞ্চনে

শিখরিণি পুনর্দ্বৈধীভাবং শশিন্যরুণাতপম্ ।

অপি চ জনযন্কম্বোর্লক্ষ্মীমনম্বুনি কোঽপ্যসৌ

কুসুমধনুষঃ কাঞ্চীদেশে চকাস্তি পরাক্রমঃ

॥34॥

শ্লোক 36

পুরদমযিতুর্বামোত্সঙ্গস্থলেন রসজ্ঞযা

সরসকবিতাভাজা কাঞ্চীপুরোদরসীমযা ।

তটপরিসরৈর্নীহারাদ্রের্বচোভিরকৃত্রিমৈঃ

কিমিব ন তুলামস্মচ্চেতো মহেশ্বরি গাহতে

॥35॥

শ্লোক 37

নযনযুগলীমাস্মাকীনাং কদা নু ফলেগ্রহীং

বিদধতি গতৌ ব্যাকুর্বাণা গজেন্দ্রচমত্ক্রিযাম্ ।

মরতকরুচো মাহেশানা ঘনস্তননম্রিতাঃ

সুকৃতবিভবাঃ প্রাঞ্চঃ কাঞ্চীবতংসধুরন্ধরাঃ

॥36॥

শ্লোক 38

মনসিজযশঃপারম্পর্যং মরন্দঝরীসুবাং

কবিকুলগিরাং কন্দং কম্পানদীতটমণ্ডনম্ ।

মধুরললিতং মত্কং চক্ষুর্মনীষিমনোহরং

পুরবিজযিনঃ সর্বস্বং তত্পুরস্কুরুতে কদা

॥37॥

শ্লোক 39

শিথিলিততমোলীলাং নীলারবিন্দবিলোচনাং

দহনবিলসত্ফালাং শ্রীকামকোটিমুপাস্মহে ।

করধৃতসচ্ছূলাং কালারিচিত্তহরাং পরাং

মনসিজকৃপালীলাং লোলালকামলিকেক্ষণাম্

॥38॥

শ্লোক 40

কলালীলাশালা কবিকুলবচঃকৈরববনী-

শরজ্জ্যোত্স্নাধারা শশধরশিশুশ্লাঘ্যমুকুটী ।

পুনীতে নঃ কম্পাপুলিনতটসৌহার্দতরলা

কদা চক্ষুর্মার্গং কনকগিরিধানুষ্কমহিষী

॥39॥

শ্লোক 41

নমঃ স্তান্নম্রেভ্যঃ স্তনগরিমগর্বেণ গুরুণা

দধানেভ্যশ্চূডাভরণমমৃতস্যন্দি শিশিরম্ ।

সদা বাস্তবেভ্যঃ সুবিধভুবি কম্পাখ্যসরিতে

যশোব্যাপারেভ্যঃ সুকৃতবিভবেভ্যো রতিপতেঃ

॥40॥

শ্লোক 42

অসূযন্তী কাচিন্মরকতরুচো নাকিমুকুটী-

কদম্বং চুম্বন্তী চরণনখচন্দ্রাংশুপটলৈঃ ।

তমোমুদ্রাং বিদ্রাবযতু মম কাঞ্চীর্নিলযনা

হরোত্সঙ্গশ্রীমন্মণিগৃহমহাদীপকলিকা

॥41॥

শ্লোক 43

অনাদ্যন্তা কাচিত্সুজননযনানন্দজননী

নিরুন্ধানা কান্তিং নিজরুচিবিলাসৈর্জলমুচাম্ ।

স্মরারেস্তারল্যং মনসি জনযন্তী স্বযমহো

গলত্কম্পা শম্পা পরিলসতি কম্পাপরিসরে

॥42॥

শ্লোক 44

সুধাডিণ্ডীরশ্রীঃ স্মিতরুচিষু তুণ্ডীরবিষযং

পরিষ্কুর্বাণাসৌ পরিহসিতনীলোত্পলরুচিঃ ।

স্তনাভ্যামানম্রা স্তবকযতু মে কাঙ্ক্ষিততরুং

দৃশামৈশানীনাং সুকৃতফলপাণ্ডিত্যগরিমা

॥43॥

শ্লোক 45

কৃপাধারাদ্রোণী কৃপণধিষণানাং প্রণমতাং

নিহন্ত্রী সন্তাপং নিগমমুকুটোত্তংসকলিকা ।

পরা কাঞ্চীলীলাপরিচযবতী পর্বতসুতা

গিরাং নীবী দেবী গিরিশপরতন্ত্রা বিজযতে

॥44॥

শ্লোক 46

কবিত্বশ্রীকন্দঃ সুকৃতপরিপাটী হিমগিরেঃ

বিধাত্রী বিশ্বেষাং বিষমশরবীরধ্বজপটী ।

সখী কম্পানদ্যাঃ পদহসিতপাথোজযুগলী

পুরাণো পাযান্নঃ পুরমথনসাম্রাজ্যপদবী

॥45॥

শ্লোক 47

দরিদ্রাণা মধ্যে দরদলিততাপিচ্ছসুষমাঃ

স্তনাভোগক্কান্তাস্তরুণহরিণাঙ্কাঙ্কিতকচাঃ ।

হরাধীনা নানাবিবুধমুকুটীচুম্বিতপদাঃ

কদা কম্পাতীরে কথয বিহরামো গিরিসুতে

॥46॥

শ্লোক 48

বরীবর্তু স্থেমা ত্বযি মম গিরাং দেবি মনসো

নরীনর্তু প্রৌঢা বদনকমলে বাক্যলহরী ।

চরীচর্তু প্রজ্ঞাজননি জডিমানঃ পরজনে

সরীসর্তু স্বৈরং জননি মযি কামাক্ষি করুণা

॥47॥

শ্লোক 49

ক্ষণাত্তে কামাক্ষি ভ্রমরসুষমাশিক্ষণগুরুঃ

কটাক্ষব্যাক্ষেপো মম ভবতু মোক্ষায বিপদাম্ ।

নরীনর্তু স্বৈরং বচনলহরী নির্জরপুরী-

সরিদ্বীচীনীচীকরণপটুরাস্যে মম সদা

॥48॥

শ্লোক 50

পুরস্তান্মে ভূযঃপ্রশমনপরঃ স্তান্মম রুজাং

প্রচারস্তে কম্পাতটবিহৃতিসম্পাদিনি দৃশোঃ ।

ইমাং যাচ্ঞামূরীকুরু সপদি দূরীকুরু তমঃ-

পরীপাকং মত্কং সপদি বুধলোকং চ নয মাম্

॥49॥

শ্লোক 51

উদঞ্চন্তী কাঞ্চীনগরনিলযে ত্বত্করুণযা

সমৃদ্ধা বাগ্ধাটী পরিহসিতমাধ্বী কবযতাম্ ।

উপাদত্তে মারপ্রতিভটজটাজূটমুকুটী-

কুটীরোল্লাসিন্যাঃ শতমখতটিন্যা জযপটীম্

॥50॥

শ্লোক 52

শ্রিযং বিদ্যাং দদ্যাজ্জননি নমতাং কীর্তিমমিতাং

সুপুত্রান্ প্রাদত্তে তব ঝটিতি কামাক্ষি করুণা ।

ত্রিলোক্যামাধিক্যং ত্রিপুরপরিপন্থিপ্রণযিনি

প্রণামস্ত্বত্পাদে শমিতদুরিতে কিং ন কুরুতে

॥51॥

শ্লোক 53

মনঃস্তম্ভং স্তম্ভং গমযদুপকম্পং প্রণমতাং

সদা লোলং নীলং চিকুরজিতলোলম্বনিকরম্ ।

গিরাং দূরং স্মেরং ধৃতশশিকিশোরং পশুপতেঃ

দৃশাং যোগ্যং ভোগ্যং তুহিনগিরিভাগ্যং বিজযতে

॥52॥

শ্লোক 54

ঘনশ্যামান্কামান্তকমহিষি কামাক্ষি মধুরান্

দৃশাং পাতানেতানমৃতজলশীতাননুপমান্ ।

ভবোত্পাতে ভীতে মযি বিতর নাথে দৃঢভব-

ন্মনশ্শোকে মূকে হিমগিরিপতাকে করুণযা

॥53॥

শ্লোক 55

নতানাং মন্দানাং ভবনিগলবন্ধাকুলধিযাং

মহান্ধ্যাং রুন্ধানামভিলষিতসন্তানলতিকাম্ ।

চরন্তীং কম্পাযাস্তটভুবি সবিত্রীং ত্রিজগতাং

স্মরামস্তাং নিত্যং স্মরমথনজীবাতুকলিকাম্

॥54॥

শ্লোক 56

পরা বিদ্যা হৃদ্যাশ্রিতমদনবিদ্যা মরকত-

প্রভানীলা লীলাপরবশিতশূলাযুধমনাঃ ।

তমঃপূরং দূরং চরণনতপৌরন্দরপুরী-

মৃগাক্ষী কামাক্ষী কমলতরলাক্ষী নযতু মে

॥55॥

শ্লোক 57

অহন্তাখ্যা মত্কং কবলযতি হা হন্ত হরিণী

হঠাত্সংবিদ্রূপং হরমহিষি সস্যাঙ্কুরমসৌ ।

কটাক্ষব্যাক্ষেপপ্রকটহরিপাষাণপটলৈঃ

ইমামুচ্চৈরুচ্চাটয ঝটিতি কামাক্ষি কৃপযা

॥56॥

শ্লোক 58

বুধে বা মূকে বা তব পততি যস্মিন্ক্ষণমসৌ

কটাক্ষঃ কামাক্ষি প্রকটজডিমক্ষোদপটিমা ।

কথঙ্কারং নাস্মৈ করমুকুলচূডালমুকুটা

নমোবাকং ব্রূযুর্নমুচিপরিপন্থিপ্রভৃতযঃ

॥57॥

শ্লোক 59

প্রতীচীং পশ্যামঃ প্রকটরুচিনীবারকমণি-

প্রভাসধ্রীচীনাং প্রদলিতষডাধারকমলাম্ ।

চরন্তীং সৌষুম্নে পথি পরপদেন্দুপ্রবিগল-

ত্সুধার্দ্রাং কামাক্ষীং পরিণতপরঞ্জ্যোতিরুদযাম্

॥58॥

শ্লোক 60

জম্ভারাতিপ্রভৃতিমুকুটীঃ পাদযোঃ পীঠযন্তী

গুম্ফান্বাচাং কবিজনকৃতান্স্বৈরমারামযন্তী ।

শম্পালক্ষ্মীং মণিগণরুচাপাটলৈঃ প্রাপযন্তী

কম্পাতীরে কবিপরিষদাং জৃম্ভতে ভাগ্যসীমা

॥59॥

শ্লোক 61

চন্দ্রাপীডাং চতুরবদনাং চঞ্চলাপাঙ্গলীলাং

কুন্দস্মেরাং কুচভরনতাং কুন্তলোদ্ধূতভৃঙ্গাম্ ।

মারারাতের্মদনশিখিনং মাংসলং দীপযন্তীং

কামাক্ষীং তাং কবিকুলগিরাং কল্পবল্লীমুপাসে

॥60॥

শ্লোক 62

কালাম্ভোদপ্রকরসুষমাং কান্তিভিস্তির্জযন্তী

কল্যাণানামুদযসরণিঃ কল্পবল্লী কবীনাম্ ।

কন্দর্পারেঃ প্রিযসহচরী কল্মষাণাং নিহন্ত্রী

কাঞ্চীদেশং তিলকযতি সা কাপি কারুণ্যসীমা

॥61॥

শ্লোক 63

ঊরীকুর্বন্নুরসিজতটে চাতুরীং ভূধরাণাং

পাথোজানাং নযনযুগলে পরিপন্থ্যং বিতন্বন্ ।

কম্পাতীরে বিহরতি রুচা মোঘযন্মেঘশৈলীং

কোকদ্বেষং শিরসি কলযন্কোঽপি বিদ্যাবিশেষঃ

॥62॥

শ্লোক 64

কাঞ্চীলীলাপরিচযবতী কাপি তাপিচ্ছলক্ষ্মীঃ

জাড্যারণ্যে হুতবহশিখা জন্মভূমিঃ কৃপাযাঃ ।

মাকন্দশ্রীর্মধুরকবিতাচাতুরী কোকিলানাং

মার্গে ভূযান্মম নযনযোর্মান্মথী কাপি বিদ্যা

॥63॥

শ্লোক 65

সেতুর্মাতর্মরতকমযো ভক্তিভাজাং ভবাব্ধৌ

লীলালোলা কুবলযমযী মান্মথী বৈজযন্তী ।

কাঞ্চীভূষা পশুপতিদৃশাং কাপি কালাঞ্জনালী

মত্কং দুঃখং শিথিলযতু তে মঞ্জুলাপাঙ্গমালা

॥64॥

শ্লোক 66

ব্যাবৃণ্বানাঃ কুবলযদলপ্রক্রিযাবৈরমুদ্রাং

ব্যাকুর্বাণা মনসিজমহারাজসাম্রাজ্যলক্ষ্মীম্ ।

কাঞ্চীলীলাবিহৃতিরসিকে কাঙ্ক্ষিতং নঃ ক্রিযাসুঃ

বন্ধচ্ছেদে তব নিযমিনাং বদ্ধদীক্ষাঃ কটাক্ষাঃ

॥65॥

শ্লোক 67

কালাম্ভোদে শশিরুচি দলং কৈতকং দর্শযন্তী

মধ্যেসৌদামিনি মধুলিহাং মালিকাং রাজযন্তী ।

হংসারাবং বিকচকমলে মঞ্জুমুল্লাসযন্তী

কম্পাতীরে বিলসতি নবা কাপি কারুণ্যলক্ষ্মীঃ

॥66॥

শ্লোক 68

চিত্রং চিত্রং নিজমৃদুতযা ভর্ত্সযন্পল্লবালীং

পুংসাং কামান্ভুবি চ নিযতং পূরযন্পুণ্যভাজাম্ ।

জাতঃ শৈলান্ন তু জলনিধেঃ স্বৈরসঞ্চারশীলঃ

কাঞ্চীভূষা কলযতু শিবং কোঽপি চিন্তামণির্মে

॥67॥

শ্লোক 69

তাম্রাম্ভোজং জলদনিকটে তত্র বন্ধূকপুষ্পং

তস্মিন্মল্লীকুসুমসুষমাং তত্র বীণানিনাদম্ ।

ব্যাবৃন্বানা সুকৃতলহরী কাপি কাঞ্চিনগর্যাম্

ঐশানী সা কলযতিতরামৈন্দ্রজালং বিলাসম্

॥68॥

শ্লোক 70

আহারাংশং ত্রিদশসদসামাশ্রযে চাতকানাম্

আকাশোপর্যপি চ কলযন্নালযং তুঙ্গমেষাম্ ।

কম্পাতীরে বিহরতিতরাং কামধেনুঃ কবীনাং

মন্দস্মেরো মদননিগমপ্রক্রিযাসম্প্রদাযঃ

॥69॥

শ্লোক 71

আর্দ্রীভূতৈরবিরলকৃপৈরাত্তলীলাবিলাসৈঃ

আস্থাপূর্ণৈরধিকচপলৈরঞ্চিতাম্ভোজশিল্পৈঃ ।

কান্তৈর্লক্ষ্মীললিতভবনৈঃ কান্তিকৈবল্যসারৈঃ

কাশ্মল্যং নঃ কবলযতু সা কামকোটী কটাক্ষৈঃ

॥70॥

শ্লোক 72

আধূন্বন্ত্যৈ তরলনযনৈরাঙ্গজীং বৈজযন্তীম্

আনন্দিন্যৈ নিজপদজুষামাত্তকাঞ্চীপুরাযৈ ।

আস্মাকীনং হৃদযমখিলৈরাগমানাং প্রপঞ্চৈঃ

আরাধ্যাযৈ স্পৃহযতিতরামদিমাযৈ জনন্যৈ

॥71॥

শ্লোক 73

দূরং বাচাং ত্রিদশসদসাং দুঃখসিন্ধোস্তরিত্রং

মোহক্ষ্বেলক্ষিতিরুহবনে ক্রূরধারং কুঠারম্ ।

কম্পাতীরপ্রণযি কবিভির্বর্ণিতোদ্যচ্চরিত্রং

শান্ত্যৈ সেবে সকলবিপদাং শাঙ্করং তত্কলত্রম্

॥72॥

শ্লোক 74

খণ্ডীকৃত্য প্রকৃতিকুটিলং কল্মষং প্রাতিভশ্রী-

শুণ্ডীরত্বং নিজপদজুষাং শূন্যতন্দ্রং দিশন্তী ।

তুণ্ডীরাখ্যৈ মহতি বিষযে স্বর্ণবৃষ্টিপ্রদাত্রী

চণ্ডী দেবী কলযতি রতিং চন্দ্রচূডালচূডে

॥73॥

শ্লোক 75

যেন খ্যাতো ভবতি স গৃহী পূরুষো মেরুধন্বা

যদ্দৃক্কোণে মদননিগমপ্রাভবং বোভবীতি ।

যত্প্রীত্যৈব ত্রিজগদধিপো জৃম্ভতে কিম্পচানঃ

কম্পাতীরে স জযতি মহান্কশ্চিদোজোবিশেষঃ

॥74॥

শ্লোক 76

ধন্যা ধন্যা গতিরিহ গিরাং দেবি কামাক্ষি যন্মে

নিন্দ্যাং ভিন্দ্যাত্সপদি জডতাং কল্মষাদুন্মিষন্তীম্ ।

সাধ্বী মাধ্বীরসমধুরতাভঞ্জিনী মঞ্জুরীতিঃ

বাণীবেণী ঝটিতি বৃণুতাত্স্বর্ধুনীস্পর্ধিনী মাম্

॥75॥

শ্লোক 77

যস্যা বাটী হৃদযকমলং কৌসুমী যোগভাজাং

যস্যাঃ পীঠী সততশিশিরা শীকরৈর্মাকরন্দৈঃ ।

যস্যাঃ পেটী শ্রুতিপরিচলন্মৌলিরত্নস্য কাঞ্চী

সা মে সোমাভরণমহিষী সাধযেত্কাঙ্ক্ষিতানি

॥76॥

শ্লোক 78

একা মাতা সকলজগতামীযুষী ধ্যানমুদ্রাম্

একাম্রাধীশ্বরচরণযোরেকতানাং সমিন্ধে ।

তাটঙ্কোদ্যন্মণিগণরুচা তাম্রকর্ণপ্রদেশা

তারুণ্যশ্রীস্তবকিততনুস্তাপসী কাপি বালা

॥77॥

শ্লোক 79

দন্তাদন্তিপ্রকটনকরী দন্তিভির্মন্দযানৈঃ

মন্দারাণাং মদপরিণতিং মথ্নতী মন্দহাসৈঃ ।

অঙ্কূরাভ্যাং মনসিজতরোরঙ্কিতোরাঃ কুচাভ্যা-

মন্তঃকাঞ্চি স্ফুরতি জগতামাদিমা কাপি মাতা

॥78॥

শ্লোক 80

ত্রিযম্বককুটুম্বিনীং ত্রিপুরসুন্দরীমিন্দিরাং

পুলিন্দপতিসুন্দরীং ত্রিপুরভৈরবীং ভারতীম্ ।

মতঙ্গকুলনাযিকাং মহিষমর্দনীং মাতৃকাং

ভণন্তি বিবুধোত্তমা বিহৃতিমেব কামাক্ষি তে

॥79॥

শ্লোক 81

মহামুনিমনোনটী মহিতরম্যকম্পাতটী-

কুটীরকবিহারিণী কুটিলবোধসংহারিণী ।

সদা ভবতু কামিনী সকলদেহিনাং স্বামিনী

কৃপাতিশযকিঙ্করী মম বিভূতযে শাঙ্করী

॥80॥

শ্লোক 82

জডাঃ প্রকৃতিনির্ধনা জনবিলোচনারুন্তুদা

নরা জননি বীক্ষণং ক্ষণমবাপ্য কামাক্ষি তে ।

বচস্সু মধুমাধুরীং প্রকটযন্তি পৌরন্দরী-

বিভূতিষু বিডম্বনাং বপুষি মান্মথীং প্রক্রিযাম্

॥81॥

শ্লোক 83

ঘন্সতনতটস্ফুটস্ফুরিতকঞ্চুলীচঞ্চলী-

কৃতত্রিপুরশাসনা সুজনশীলিতোপাসনা ।

দৃশোঃ সরণিমশ্নুতে মম কদা নু কাঞ্চীপুরে

পরা পরমযোগিনাং মনসি চিত্কুলা পুষ্কলা

॥82॥

শ্লোক 84

কবীন্দ্রহৃদযেচরী পরিগৃহীতকাঞ্চীপুরী

নিরূঢকরুণাঝরী নিখিললোকরক্ষাকরী ।

মনঃপথদবীযসী মদনশাসনপ্রেযসী

মহাগুণগরীযসী মম দৃশোঽস্তু নেদীযসী

॥83॥

শ্লোক 85

ধনেন ন রমামহে খলজনান্ন সেবামহে

ন চাপলমযামহে ভবভযান্ন দূযামহে ।

স্থিরাং তনুমহেতরাং মনসি কিং চ কাঞ্চীরত-

স্মরান্তককুটুম্বিনীচরণপল্লবোপাসনাম্

॥84॥

শ্লোক 86

সুরাঃ পরিজনা বপুর্মনসিজায বৈরাযতে

ত্রিবিষ্টপনিতম্বিনীকুচতটী চ কেলীগিরিঃ ।

গিরঃ সুরভযো বযস্তরুণিমা দরিদ্রস্য বা

কটাক্ষসরণৌ ক্ষণং নিপতিতস্য কামাক্ষি তে

॥85॥

শ্লোক 87

পবিত্রয জগত্ত্রযীবিবুধবোধজীবাতুভিঃ

পুরত্রযবিমর্দিনঃ পুলককঞ্চুলীদাযিভিঃ ।

ভবক্ষযবিচক্ষণৈর্ব্যসনমোক্ষণৈর্বীক্ষণৈঃ

নিরক্ষরশিরোমণিং করুণযৈব কামাক্ষি মাম্

॥86॥

শ্লোক 88

কদা কলিতখেলনাঃ করুণযৈব কাঞ্চীপুরে

কলাযমুকুলত্বিষঃ শুভকদম্বপূর্ণাঙ্কুরাঃ ।

পযোধরভরালসাঃ কবিজনেষু তে বন্ধুরাঃ

পচেলিমকৃপারসা পরিপতন্তি মার্গে দৃশোঃ

॥87॥

শ্লোক 89

অশোধ্যমচলোদ্ভবং হৃদযনন্দনং দেহিনাম্

অনর্ঘমধিকাঞ্চি তত্কিমপি রত্নমুদ্দ্যোততে ।

অনেন সমলঙ্কৃতা জযতি শঙ্করাঙ্কস্থলী

কদাস্য মম মানসং ব্রজতি পেটিকাবিভ্রমম্

॥88॥

শ্লোক 90

পরামৃতঝরীপ্লুতা জযতি নিত্যমন্তশ্চরী

ভুবামপি বহিশ্চরী পরমসংবিদেকাত্মিকা ।

মহদ্ভিরপরোক্ষিতা সততমেব কাঞ্চীপুরে

মমান্বহমহম্মতির্মনসি ভাতু মাহেশ্বরী

॥89॥

শ্লোক 91

তমোবিপিনধাবিনং সততমেব কাঞ্চীপুরে

বিহাররসিকা পরা পরমসংবিদুর্বীরুহে ।

কটাক্ষনিগলৈর্দৃঢং হৃদযদুষ্টদন্তাবলং

চিরং নযতু মামকং ত্রিপুরবৈরিসীমন্তিনী

॥90॥

শ্লোক 92

ত্বমেব সতি চণ্ডিকা ত্বমসি দেবি চামুণ্ডিকা

ত্বমেব পরমাতৃকা ত্বমপি যোগিনীরূপিণী ।

ত্বমেব কিল শাম্ভবী ত্বমসি কামকোটী জযা

ত্বমেব বিজযা ত্বযি ত্রিজগদম্ব কিং ব্রূমহে

॥91॥

শ্লোক 93

পরে জননি পার্বতি প্রণতপালিনি প্রাতিভ-

প্রদাত্রি পরমেশ্বরি ত্রিজগদাশ্রিতে শাশ্বতে ।

ত্রিযম্বককুটুম্বিনি ত্রিপদসঙ্গিনি ত্রীক্ষণে

ত্রিশক্তিমযি বীক্ষণং মযি নিধেহি কামাক্ষি তে

॥92॥

শ্লোক 94

মনোমধুকরোত্সবং বিদধতী মনীষাজুষাং

স্বযম্প্রভববৈখরীবিপিনবীথিকালম্বিনী ।

অহো শিশিরিতা কৃপামধুরসেন কম্পাতটে

চরাচরবিধাযিনী চলতি কাপি চিন্মঞ্জরী

॥93॥

শ্লোক 95

কলাবতি কলাভৃতো মুকুটসীম্নি লীলাবতি

স্পৃহাবতি মহেশ্বরে ভুবনমোহনে ভাস্বতি ।

প্রভাবতি রমে সদা মহিতরূপশোভাবতি

ত্বরাবতি পরে সতাং গুরুকৃপাম্বুধারাবতি

॥94॥

শ্লোক 96

ত্বযৈব জগদম্বযা ভুবনমণ্ডলং সূযতে

ত্বযৈব করুণার্দ্রযা তদপি রক্ষণং নীযতে ।

ত্বযৈব খরকোপযা নযনপাবকে হূযতে

ত্বযৈব কিল নিত্যযা জগতি সন্ততং স্থীযতে

॥95॥

শ্লোক 97

চরাচরজগন্মযীং সকলহৃন্মযীং চিন্মযীং

গুণত্রযমযীং জগত্ত্রযমযীং ত্রিধামামযীম্ ।

পরাপরমযীং সদা দশদিশাং নিশাহর্মযীং

পরাং সততসন্মযীং মনসি চিন্মযীং শীলযে

॥96॥

শ্লোক 98

জয জগদম্বিকে হরকুটুম্বিনি বক্ত্ররুচা

জিতশরদম্বুজে ঘনবিডম্বিনি কেশরুচা ।

পরমবলম্বনং কুরু সদা পররূপধরে

মম গতসংবিদো জডিমডম্বরতাণ্ডবিনঃ

॥97॥

শ্লোক 99

ভুবনজননি ভূষাভূতচন্দ্রে নমস্তে

কলুষশমনি কম্পাতীরগেহে নমস্তে ।

নিখিলনিগমবেদ্যে নিত্যরূপে নমস্তে

পরশিবমযি পাশচ্ছেদহস্তে নমস্তে

॥98॥

শ্লোক 100

ক্বণত্কাঞ্চী কাঞ্চীপুরমণিবিপঞ্চীলযঝরী-

শিরঃকম্পা কম্পাবসতিরনুকম্পাজলনিধিঃ ।

ঘনশ্যামা শ্যামা কঠিনকুচসীমা মনসি মে

মৃগাক্ষী কামাক্ষী হরনটনসাক্ষী বিহরতাত্

॥99॥

শ্লোক 101

সমরবিজযকোটী সাধকানন্দধাটী

মৃদুগুণপরিপেটী মুখ্যকাদম্ববাটী ।

মুনিনুতপরিপাটী মোহিতাজাণ্ডকোটী

পরমশিববধূটী পাতু মাং কামকোটী

॥100॥

শ্লোক 102

ইমং পরবরপ্রদং প্রকৃতিপেশলং পাবনং

পরাপরচিদাকৃতিপ্রকটনপ্রদীপাযিতম্ ।

স্তবং পঠতি নিত্যদা মনসি ভাবযন্নম্বিকাং

জপৈরলমলং মখৈরধিকদেহসংশোষণৈঃ

॥101॥

শ্লোক 103

॥ ইতি স্তুতিশতকং সম্পূর্ণম্ ॥