গণেশ অষ্টকম্

গণেশ অষ্টকম্

শ্লোক 1

সর্বে উচুঃ ।

যতোঽনন্তশক্তেরনন্তাশ্চ জীবা

যতো নির্গুণাদপ্রমেযা গুণাস্তে ।

যতো ভাতি সর্বং ত্রিধা ভেদভিন্নং

সদা তং গণেশং নমামো ভজামঃ

শ্লোক 2

যতশ্চাবিরাসীজ্জগত্সর্বমেত-

-ত্তথাব্জাসনো বিশ্বগো বিশ্বগোপ্তা ।

তথেন্দ্রাদযো দেবসঙ্ঘা মনুষ্যাঃ

সদা তং গণেশং নমামো ভজামঃ

॥ 1 ॥

শ্লোক 3

যতো বহ্নিভানূ ভবো ভূর্জলং চ

যতঃ সাগরাশ্চন্দ্রমা ব্যোম বাযুঃ ।

যতঃ স্থাবরা জঙ্গমা বৃক্ষসঙ্ঘাঃ

সদা তং গণেশং নমামো ভজামঃ

॥ 2 ॥

শ্লোক 4

যতো দানবাঃ কিন্নরা যক্ষসঙ্ঘা

যতশ্চারণা বারণাঃ শ্বাপদাশ্চ ।

যতঃ পক্ষিকীটা যতো বীরুধশ্চ

সদা তং গণেশং নমামো ভজামঃ

॥ 3 ॥

শ্লোক 5

যতো বুদ্ধিরজ্ঞাননাশো মুমুক্ষো-

-র্যতঃ সম্পদো ভক্তসন্তোষদাঃ স্যুঃ ।

যতো বিঘ্ননাশো যতঃ কার্যসিদ্ধিঃ

সদা তং গণেশং নমামো ভজামঃ

॥ 4 ॥

শ্লোক 6

যতঃ পুত্রসম্পদ্যতো বাঞ্ছিতার্থো

যতোঽভক্তবিঘ্নাস্তথাঽনেকরূপাঃ ।

যতঃ শোকমোহৌ যতঃ কাম এব

সদা তং গণেশং নমামো ভজামঃ

॥ 5 ॥

শ্লোক 7

যতোঽনন্তশক্তিঃ স শেষো বভূব

ধরাধারণেঽনেকরূপে চ শক্তঃ ।

যতোঽনেকধা স্বর্গলোকা হি নানা

সদা তং গণেশং নমামো ভজামঃ

॥ 6 ॥

শ্লোক 8

যতো বেদবাচো বিকুণ্ঠা মনোভিঃ

সদা নেতি নেতীতি যত্তা গৃণন্তি ।

পরব্রহ্মরূপং চিদানন্দভূতং

সদা তং গণেশং নমামো ভজামঃ

॥ 7 ॥

শ্লোক 9

শ্রীগণেশ উবাচ ।

পুনরূচে গণাধীশঃ স্তোত্রমেতত্পঠেন্নরঃ ।

ত্রিসন্ধ্যং ত্রিদিনং তস্য সর্বকার্যং ভবিষ্যতি

॥ 8 ॥

শ্লোক 10

যো জপেদষ্টদিবসং শ্লোকাষ্টকমিদং শুভম্ ।

অষ্টবারং চতুর্থ্যাং তু সোঽষ্টসিদ্ধীরবাপ্নুযাত্

॥ 9 ॥

শ্লোক 11

যঃ পঠেন্মাসমাত্রং তু দশবারং দিনে দিনে ।

স মোচযেদ্বন্ধগতং রাজবধ্যং ন সংশযঃ

॥ 10 ॥

শ্লোক 12

বিদ্যাকামো লভেদ্বিদ্যাং পুত্রার্থী পুত্রমাপ্নুযাত্ ।

বাঞ্ছিতাঁল্লভতে সর্বানেকবিংশতিবারতঃ

॥ 11 ॥

শ্লোক 13

যো জপেত্পরযা ভক্ত্যা গজাননপরো নরঃ ।

এবমুক্ত্বা ততো দেবশ্চান্তর্ধানং গতঃ প্রভুঃ

॥ 12 ॥

শ্লোক 14

ইতি শ্রীগণেশপুরাণে উপাসনাখণ্ডে শ্রীগণেশাষ্টকম্ ।