Aditya Kavacham
ఆదిత్య కవచమ్
Aditya Kavacham
ఆదిత్య కవచమ్
శ్లోక 1
అస్య శ్రీ ఆదిత్యకవచస్తోత్రమహామన్త్రస్య అగస్త్యో భగవానృషిః అనుష్టుప్ఛన్దః ఆదిత్యో దేవతా శ్రీం బీజం ణీం శక్తిః సూం కీలకం మమ ఆదిత్యప్రసాదసిద్ధ్యర్థే జపే వినియోగః ।
ధ్యానం
జపాకుసుమసఙ్కాశం ద్విభుజం పద్మహస్తకమ్
సిన్దూరామ్బరమాల్యం చ రక్తగన్ధానులేపనమ్ ।
మాణిక్యరత్నఖచిత-సర్వాభరణభూషితమ్
సప్తాశ్వరథవాహం తు మేరుం చైవ ప్రదక్షిణమ్ ॥
దేవాసురవరైర్వన్ద్యం ఘృణిభిః పరిసేవితమ్ ।
ధ్యాయేత్పఠేత్సువర్ణాభం సూర్యస్య కవచం ముదా ॥
కవచం
ఘృణిః పాతు శిరోదేశే సూర్యః పాతు లలాటకమ్ ।
ఆదిత్యో లోచనే పాతు శ్రుతీ పాతు దివాకరః ॥
ఘ్రాణం పాతు సదా భానుః ముఖం పాతు సదారవిః ।
జిహ్వాం పాతు జగన్నేత్రః కణ్ఠం పాతు విభావసుః ॥
స్కన్ధౌ గ్రహపతిః పాతు భుజౌ పాతు ప్రభాకరః ।
కరావబ్జకరః పాతు హృదయం పాతు నభోమణిః ॥
ద్వాదశాత్మా కటిం పాతు సవితా పాతు సక్థినీ ।
ఊరూ పాతు సురశ్రేష్టో జానునీ పాతు భాస్కరః ॥
జఙ్ఘే మే పాతు మార్తాణ్డో గుల్ఫౌ పాతు త్విషామ్పతిః ।
పాదౌ దినమణిః పాతు పాతు మిత్రోఽఖిలం వపుః ॥
ఆదిత్యకవచం పుణ్యమభేద్యం వజ్రసన్నిభమ్ ।
సర్వరోగభయాదిభ్యో ముచ్యతే నాత్ర సంశయః ॥
సంవత్సరముపాసిత్వా సామ్రాజ్యపదవీం లభేత్ ।
అశేషరోగశాన్త్యర్థం ధ్యాయేదాదిత్యమణ్డలమ్ ।
ఆదిత్య మణ్డల స్తుతిః –
అనేకరత్నసంయుక్తం స్వర్ణమాణిక్యభూషణమ్ ।
కల్పవృక్షసమాకీర్ణం కదమ్బకుసుమప్రియమ్ ॥
సిన్దూరవర్ణాయ సుమణ్డలాయ
సువర్ణరత్నాభరణాయ తుభ్యమ్ ।
పద్మాదినేత్రే చ సుపఙ్కజాయ
బ్రహ్మేన్ద్ర-నారాయణ-శఙ్కరాయ ॥
సంరక్తచూర్ణం ససువర్ణతోయం
సకుఙ్కుమాభం సకుశం సపుష్పమ్ ।
ప్రదత్తమాదాయ చ హేమపాత్రే
ప్రశస్తనాదం భగవన్ ప్రసీద ॥
ఇతి ఆదిత్యకవచమ్ ।