శ్రీ సుబ్రహ్మణ్య సహస్ర నామ స్తోత్రమ్

శ్రీ సుబ్రహ్మణ్య సహస్ర నామ స్తోత్రమ్

ఋషయ ఊచుః ।

సర్వశాస్త్రార్థతత్త్వజ్ఞ సర్వలోకోపకారక ।

వయం చాతిథయః ప్రాప్తా ఆతిథేయోఽసి సువ్రత ॥ 1 ॥

జ్ఞానదానేన సంసారసాగరాత్తారయస్వ నః ।

కలౌ కలుషచిత్తా యే నరాః పాపరతాః సదా ॥ 2 ॥

కేన స్తోత్రేణ ముచ్యన్తే సర్వపాతకబన్ధనాత్ ।

ఇష్టసిద్ధికరం పుణ్యం దుఃఖదారిద్ర్యనాశనమ్ ॥ 3 ॥

సర్వరోగహరం స్తోత్రం సూత నో వక్తుమర్హసి ।

శ్రీసూత ఉవాచ ।

శృణుధ్వం ఋషయః సర్వే నైమిశారణ్యవాసినః ॥ 4 ॥

తత్త్వజ్ఞానతపోనిష్ఠాః సర్వశాస్త్రవిశారదాః ।

స్వయమ్భువా పురా ప్రోక్తం నారదాయ మహాత్మనే ॥ 5 ॥

తదహం సమ్ప్రవక్ష్యామి శ్రోతుం కౌతూహలం యది ।

ఋషయ ఊచుః ।

కిమాహ భగవాన్బ్రహ్మా నారదాయ మహాత్మనే ॥ 6 ॥

సూతపుత్ర మహాభాగ వక్తుమర్హసి సామ్ప్రతమ్ ।

శ్రీసూత ఉవాచ ।

దివ్యసింహాసనాసీనం సర్వదేవైరభిష్టుతమ్ ॥ 7 ॥

సాష్టాఙ్గం ప్రణిపత్యైనం బ్రహ్మాణం భువనేశ్వరమ్ ।

నారదః పరిపప్రచ్ఛ కృతాఞ్జలిరుపస్థితః ॥ 8 ॥

నారద ఉవాచ ।

లోకనాథ సురశ్రేష్ఠ సర్వజ్ఞ కరుణాకర ।

షణ్ముఖస్య పరం స్తోత్రం పావనం పాపనాశనమ్ ॥ 9 ॥

హే ధాతః పుత్రవాత్సల్యాత్తద్వద ప్రణతాయ మే ।

ఉపదిశ్య తు మామేవం రక్ష రక్ష కృపానిధే ॥ 10 ॥

బ్రహ్మోవాచ ।

శృణు వక్ష్యామి దేవర్షే స్తవరాజమిదం పరమ్ ।

మాతృకామాలికాయుక్తం జ్ఞానమోక్షసుఖప్రదమ్ ॥ 11 ॥

సహస్రాణి చ నామాని షణ్ముఖస్య మహాత్మనః ।

యాని నామాని దివ్యాని దుఃఖరోగహరాణి చ ॥ 12 ॥

తాని నామాని వక్ష్యామి కృపయా త్వయి నారద ।

జపమాత్రేణ సిద్ధ్యన్తి మనసా చిన్తితాన్యపి ॥ 13 ॥

ఇహాముత్ర పరం భోగం లభతే నాత్ర సంశయః ।

ఇదం స్తోత్రం పరం పుణ్యం కోటియజ్ఞఫలప్రదమ్ ।

సన్దేహో నాత్ర కర్తవ్యః శృణు మే నిశ్చితం వచః ॥ 14 ॥

ఓం అస్య శ్రీసుబ్రహ్మణ్యసహస్రనామస్తోత్ర మహామన్త్రస్య బ్రహ్మా ఋషిః అనుష్టుప్ఛన్దః సుబ్రహ్మణ్యో దేవతా శరజన్మాక్షయ ఇతి బీజం శక్తిధరోఽక్షయ కార్తికేయ ఇతి శక్తిః క్రౌఞ్చధర ఇతి కీలకం శిఖివాహన ఇతి కవచం షణ్ముఖాయ ఇతి ధ్యానం శ్రీసుబ్రహ్మణ్య ప్రసాదసిద్ధ్యర్థే జపే వినియోగః ।

కరన్యాసః –

ఓం శం ఓఙ్కారస్వరూపాయ ఓజోధరాయ ఓజస్వినే సుహృదయాయ హృష్టచిత్తాత్మనే భాస్వరరూపాయ అఙ్గుష్ఠాభ్యాం నమః ।

ఓం రం షట్కోణమధ్యనిలయాయ షట్కిరీటధరాయ శ్రీమతే షడాధారాయ తర్జనీభ్యాం నమః ।

ఓం వం షణ్ముఖాయ శరజన్మనే శుభలక్షణాయ శిఖివాహనాయ మధ్యమాభ్యాం నమః ।

ఓం ణం కృశానుసమ్భవాయ కవచినే కుక్కుటధ్వజాయ అనామికాభ్యాం నమః ।

ఓం భం కన్దర్పకోటిదీప్యమానాయ ద్విషడ్బాహవే ద్వాదశాక్షాయ కనిష్ఠికాభ్యాం నమః ।

ఓం వం ఖేటధరాయ ఖడ్గినే శక్తిహస్తాయ కరతలకరపృష్ఠాభ్యాం నమః ।

హృదయాదిన్యాసః –

ఓం శం ఓఙ్కారస్వరూపాయ ఓజోధరాయ ఓజస్వినే సుహృదయాయ హృష్టచిత్తాత్మనే భాస్వరరూపాయ హృదయాయ నమః ।

ఓం రం షట్కోణమధ్యనిలయాయ షట్కిరీటధరాయ శ్రీమతే షడాధారాయ శిరసే స్వాహా ।

ఓం వం షణ్ముఖాయ శరజన్మనే శుభలక్షణాయ శిఖివాహనాయ శిఖాయై వషట్ ।

ఓం ణం కృశానుసమ్భవాయ కవచినే కుక్కుటధ్వజాయ కవచాయ హుమ్ ।

ఓం భం కన్దర్పకోటిదీప్యమానాయ ద్విషడ్బాహవే ద్వాదశాక్షాయ నేత్రత్రయాయ వౌషట్ ।

ఓం వం ఖేటధరాయ ఖడ్గినే శక్తిహస్తాయ అస్త్రాయ ఫట్ ।

భూర్భువస్సువరోమితి దిగ్బన్ధః ।

ధ్యానమ్ ।

ధ్యాయేత్షణ్ముఖమిన్దుకోటిసదృశం రత్నప్రభాశోభితం

బాలార్కద్యుతిషట్కిరీటవిలసత్కేయూరహారాన్వితమ్ ।

కర్ణాలమ్బితకుణ్డలప్రవిలసద్గణ్డస్థలాశోభితం

కాఞ్చీకఙ్కణకిఙ్కిణీరవయుతం శృఙ్గారసారోదయమ్ ॥ 1 ॥

ధ్యాయేదీప్సితసిద్ధిదం శివసుతం శ్రీద్వాదశాక్షం గుహం

ఖేటం కుక్కుటమఙ్కుశం చ వరదం పాశం ధనుశ్చక్రకమ్ ।

వజ్రం శక్తిమసిం చ శూలమభయం దోర్భిర్ధృతం షణ్ముఖం

దేవం చిత్రమయూరవాహనగతం చిత్రామ్బరాలఙ్కృతమ్ ॥ 2 ॥

స్తోత్రమ్ ।

అచిన్త్యశక్తిరనఘస్త్వక్షోభ్యస్త్వపరాజితః ।

అనాథవత్సలోఽమోఘస్త్వశోకోఽప్యజరోఽభయః ॥ 1 ॥

అత్యుదారో హ్యఘహరస్త్వగ్రగణ్యోఽద్రిజాసుతః ।

అనన్తమహిమాఽపారోఽనన్తసౌఖ్యప్రదోఽవ్యయః ॥ 2 ॥

అనన్తమోక్షదోఽనాదిరప్రమేయోఽక్షరోఽచ్యుతః ।

అకల్మషోఽభిరామోఽగ్రధుర్యశ్చామితవిక్రమః ॥ 3 ॥

అనాథనాథో హ్యమలో హ్యప్రమత్తోఽమరప్రభుః ।

అరిన్దమోఽఖిలాధారస్త్వణిమాదిగుణోఽగ్రణీః ॥ 4 ॥

అచఞ్చలోఽమరస్తుత్యో హ్యకలఙ్కోఽమితాశనః ।

అగ్నిభూరనవద్యాఙ్గో హ్యద్భుతోఽభీష్టదాయకః ॥ 5 ॥

అతీన్ద్రియోఽప్రమేయాత్మా హ్యదృశ్యోఽవ్యక్తలక్షణః ।

ఆపద్వినాశకస్త్వార్య ఆఢ్య ఆగమసంస్తుతః ॥ 6 ॥

ఆర్తసంరక్షణస్త్వాద్య ఆనన్దస్త్వార్యసేవితః ।

ఆశ్రితేష్టార్థవరద ఆనన్ద్యార్తఫలప్రదః ॥ 7 ॥

ఆశ్చర్యరూప ఆనన్ద ఆపన్నార్తివినాశనః ।

ఇభవక్త్రానుజస్త్విష్ట ఇభాసురహరాత్మజః ॥ 8 ॥

ఇతిహాసశ్రుతిస్తుత్య ఇన్ద్రభోగఫలప్రదః ।

ఇష్టాపూర్తఫలప్రాప్తిరిష్టేష్టవరదాయకః ॥ 9 ॥

ఇహాముత్రేష్టఫలద ఇష్టదస్త్విన్ద్రవన్దితః ।

ఈడనీయస్త్వీశపుత్ర ఈప్సితార్థప్రదాయకః ॥ 10 ॥

ఈతిభీతిహరశ్చేడ్య ఈషణాత్రయవర్జితః ।

ఉదారకీర్తిరుద్యోగీ చోత్కృష్టోరుపరాక్రమః ॥ 11 ॥

ఉత్కృష్టశక్తిరుత్సాహ ఉదారశ్చోత్సవప్రియః ।

ఉజ్జృమ్భ ఉద్భవశ్చోగ్ర ఉదగ్రశ్చోగ్రలోచనః ॥ 12 ॥

ఉన్మత్త ఉగ్రశమన ఉద్వేగఘ్నోరగేశ్వరః ।

ఉరుప్రభావశ్చోదీర్ణ ఉమాపుత్ర ఉదారధీః ॥ 13 ॥

ఊర్ధ్వరేతఃసుతస్తూర్ధ్వగతిదస్తూర్జపాలకః ।

ఊర్జితస్తూర్ధ్వగస్తూర్ధ్వ ఊర్ధ్వలోకైకనాయకః ॥ 14 ॥

ఊర్జావానూర్జితోదార ఊర్జితోర్జితశాసనః ।

ఋషిదేవగణస్తుత్య ఋణత్రయవిమోచనః ॥ 15 ॥

ఋజురూపో హ్యృజుకర ఋజుమార్గప్రదర్శనః ।

ఋతమ్భరో హ్యృజుప్రీత ఋషభస్త్వృద్ధిదస్త్వృతః ॥ 16 ॥

లులితోద్ధారకో లూతభవపాశప్రభఞ్జనః ।

ఏణాఙ్కధరసత్పుత్ర ఏక ఏనోవినాశనః ॥ 17 ॥

ఐశ్వర్యదశ్చైన్ద్రభోగీ చైతిహ్యశ్చైన్ద్రవన్దితః ।

ఓజస్వీ చౌషధిస్థానమోజోదశ్చౌదనప్రదః ॥ 18 ॥

ఔదార్యశీల ఔమేయ ఔగ్ర ఔన్నత్యదాయకః ।

ఔదార్య ఔషధకర ఔషధం చౌషధాకరః ॥ 19 ॥

అంశుమానంశుమాలీడ్య అమ్బికాతనయోఽన్నదః ।

అన్ధకారిసుతోఽన్ధత్వహారీ చామ్బుజలోచనః ॥ 20 ॥

అస్తమాయోఽమరాధీశో హ్యస్పష్టోఽస్తోకపుణ్యదః ।

అస్తామిత్రోఽస్తరూపశ్చాస్ఖలత్సుగతిదాయకః ॥ 21 ॥

కార్తికేయః కామరూపః కుమారః క్రౌఞ్చదారణః ।

కామదః కారణం కామ్యః కమనీయః కృపాకరః ॥ 22 ॥

కాఞ్చనాభః కాన్తియుక్తః కామీ కామప్రదః కవిః ।

కీర్తికృత్కుక్కుటధరః కూటస్థః కువలేక్షణః ॥ 23 ॥

కుఙ్కుమాఙ్గః క్లమహరః కుశలః కుక్కుటధ్వజః ।

కుశానుసమ్భవః క్రూరః క్రూరఘ్నః కలితాపహృత్ ॥ 24 ॥

కామరూపః కల్పతరుః కాన్తః కామితదాయకః ।

కల్యాణకృత్క్లేశనాశః కృపాలుః కరుణాకరః ॥ 25 ॥

కలుషఘ్నః క్రియాశక్తిః కఠోరః కవచీ కృతీ ।

కోమలాఙ్గః కుశప్రీతః కుత్సితఘ్నః కలాధరః ॥ 26 ॥

ఖ్యాతః ఖేటధరః ఖడ్గీ ఖట్వాఙ్గీ ఖలనిగ్రహః ।

ఖ్యాతిప్రదః ఖేచరేశః ఖ్యాతేహః ఖేచరస్తుతః ॥ 27 ॥

ఖరతాపహరః స్వస్థః ఖేచరః ఖేచరాశ్రయః ।

ఖణ్డేన్దుమౌలితనయః ఖేలః ఖేచరపాలకః ॥ 28 ॥

ఖస్థలః ఖణ్డితార్కశ్చ ఖేచరీజనపూజితః ।

గాఙ్గేయో గిరిజాపుత్రో గణనాథానుజో గుహః ॥ 29 ॥

గోప్తా గీర్వాణసంసేవ్యో గుణాతీతో గుహాశ్రయః ।

గతిప్రదో గుణనిధిః గమ్భీరో గిరిజాత్మజః ॥ 30 ॥

గూఢరూపో గదహరో గుణాధీశో గుణాగ్రణీః ।

గోధరో గహనో గుప్తో గర్వఘ్నో గుణవర్ధనః ॥ 31 ॥

గుహ్యో గుణజ్ఞో గీతిజ్ఞో గతాతఙ్కో గుణాశ్రయః ।

గద్యపద్యప్రియో గుణ్యో గోస్తుతో గగనేచరః ॥ 32 ॥

గణనీయచరిత్రశ్చ గతక్లేశో గుణార్ణవః ।

ఘూర్ణితాక్షో ఘృణినిధిః ఘనగమ్భీరఘోషణః ॥ 33 ॥

ఘణ్టానాదప్రియో ఘోషో ఘోరాఘౌఘవినాశనః ।

ఘనానన్దో ఘర్మహన్తా ఘృణావాన్ ఘృష్టిపాతకః ॥ 34 ॥

ఘృణీ ఘృణాకరో ఘోరో ఘోరదైత్యప్రహారకః ।

ఘటితైశ్వర్యసన్దోహో ఘనార్థో ఘనసఙ్క్రమః ॥ 35 ॥

చిత్రకృచ్చిత్రవర్ణశ్చ చఞ్చలశ్చపలద్యుతిః ।

చిన్మయశ్చిత్స్వరూపశ్చ చిరానన్దశ్చిరన్తనః ॥ 36 ॥

చిత్రకేలిశ్చిత్రతరశ్చిన్తనీయశ్చమత్కృతిః ।

చోరఘ్నశ్చతురశ్చారుశ్చామీకరవిభూషణః ॥ 37 ॥

చన్ద్రార్కకోటిసదృశశ్చన్ద్రమౌలితనూభవః ।

ఛాదితాఙ్గశ్ఛద్మహన్తా ఛేదితాఖిలపాతకః ॥ 38 ॥

ఛేదీకృతతమఃక్లేశశ్ఛత్రీకృతమహాయశాః ।

ఛాదితాశేషసన్తాపశ్ఛురితామృతసాగరః ॥ 39 ॥

ఛన్నత్రైగుణ్యరూపశ్చ ఛాతేహశ్ఛిన్నసంశయః ।

ఛన్దోమయశ్ఛన్దగామీ ఛిన్నపాశశ్ఛవిశ్ఛదః ॥ 40 ॥

జగద్ధితో జగత్పూజ్యో జగజ్జ్యేష్ఠో జగన్మయః ।

జనకో జాహ్నవీసూనుర్జితామిత్రో జగద్గురుః ॥ 41 ॥

జయీ జితేన్ద్రియో జైత్రో జరామరణవర్జితః ।

జ్యోతిర్మయో జగన్నాథో జగజ్జీవో జనాశ్రయః ॥ 42 ॥

జగత్సేవ్యో జగత్కర్తా జగత్సాక్షీ జగత్ప్రియః ।

జమ్భారివన్ద్యో జయదో జగజ్జనమనోహరః ॥ 43 ॥

జగదానన్దజనకో జనజాడ్యాపహారకః ।

జపాకుసుమసఙ్కాశో జనలోచనశోభనః ॥ 44 ॥

జనేశ్వరో జితక్రోధో జనజన్మనిబర్హణః ।

జయదో జన్తుతాపఘ్నో జితదైత్యమహావ్రజః ॥ 45 ॥

జితమాయో జితక్రోధో జితసఙ్గో జనప్రియః ।

ఝఞ్ఝానిలమహావేగో ఝరితాశేషపాతకః ॥ 46 ॥

ఝర్ఝరీకృతదైత్యౌఘో ఝల్లరీవాద్యసమ్ప్రియః ।

జ్ఞానమూర్తిర్జ్ఞానగమ్యో జ్ఞానీ జ్ఞానమహానిధిః ॥ 47 ॥

టఙ్కారనృత్తవిభవః టఙ్కవజ్రధ్వజాఙ్కితః ।

టఙ్కితాఖిలలోకశ్చ టఙ్కితైనస్తమోరవిః ॥ 48 ॥

డమ్బరప్రభవో డమ్భో డమ్బో డమరుకప్రియః । [డమడ్డ]

డమరోత్కటసన్నాదో డిమ్భరూపస్వరూపకః ॥ 49 ॥

ఢక్కానాదప్రీతికరో ఢాలితాసురసఙ్కులః ।

ఢౌకితామరసన్దోహో ఢుణ్ఢివిఘ్నేశ్వరానుజః ॥ 50 ॥

తత్త్వజ్ఞస్తత్వగస్తీవ్రస్తపోరూపస్తపోమయః ।

త్రయీమయస్త్రికాలజ్ఞస్త్రిమూర్తిస్త్రిగుణాత్మకః ॥ 51 ॥

త్రిదశేశస్తారకారిస్తాపఘ్నస్తాపసప్రియః ।

తుష్టిదస్తుష్టికృత్తీక్ష్ణస్తపోరూపస్త్రికాలవిత్ ॥ 52 ॥

స్తోతా స్తవ్యః స్తవప్రీతః స్తుతిః స్తోత్రం స్తుతిప్రియః ।

స్థితః స్థాయీ స్థాపకశ్చ స్థూలసూక్ష్మప్రదర్శకః ॥ 53 ॥

స్థవిష్ఠః స్థవిరః స్థూలః స్థానదః స్థైర్యదః స్థిరః ।

దాన్తో దయాపరో దాతా దురితఘ్నో దురాసదః ॥ 54 ॥

దర్శనీయో దయాసారో దేవదేవో దయానిధిః ।

దురాధర్షో దుర్విగాహ్యో దక్షో దర్పణశోభితః ॥ 55 ॥

దుర్ధరో దానశీలశ్చ ద్వాదశాక్షో ద్విషడ్భుజః ।

ద్విషట్కర్ణో ద్విషడ్బాహుర్దీనసన్తాపనాశనః ॥ 56 ॥

దన్దశూకేశ్వరో దేవో దివ్యో దివ్యాకృతిర్దమః ।

దీర్ఘవృత్తో దీర్ఘబాహుర్దీర్ఘదృష్టిర్దివస్పతిః ॥ 57 ॥

దణ్డో దమయితా దర్పో దేవసింహో దృఢవ్రతః ।

దుర్లభో దుర్గమో దీప్తో దుష్ప్రేక్ష్యో దివ్యమణ్డనః ॥ 58 ॥

దురోదరఘ్నో దుఃఖఘ్నో దురారిఘ్నో దిశాం పతిః ।

దుర్జయో దేవసేనేశో దుర్జ్ఞేయో దురతిక్రమః ॥ 59 ॥

దమ్భో దృప్తశ్చ దేవర్షిర్దైవజ్ఞో దైవచిన్తకః ।

ధురన్ధరో ధర్మపరో ధనదో ధృతివర్ధనః ॥ 60 ॥

ధర్మేశో ధర్మశాస్త్రజ్ఞో ధన్వీ ధర్మపరాయణః ।

ధనాధ్యక్షో ధనపతిర్ధృతిమాన్ధూతకిల్బిషః ॥ 61 ॥

ధర్మహేతుర్ధర్మశూరో ధర్మకృద్ధర్మవిద్ధ్రువః ।

ధాతా ధీమాన్ధర్మచారీ ధన్యో ధుర్యో ధృతవ్రతః ॥ 62 ॥

నిత్యోత్సవో నిత్యతృప్తో నిర్లేపో నిశ్చలాత్మకః ।

నిరవద్యో నిరాధారో నిష్కలఙ్కో నిరఞ్జనః ॥ 63 ॥

నిర్మమో నిరహఙ్కారో నిర్మోహో నిరుపద్రవః ।

నిత్యానన్దో నిరాతఙ్కో నిష్ప్రపఞ్చో నిరామయః ॥ 64 ॥

నిరవద్యో నిరీహశ్చ నిర్దర్శో నిర్మలాత్మకః ।

నిత్యానన్దో నిర్జరేశో నిఃసఙ్గో నిగమస్తుతః ॥ 65 ॥

నిష్కణ్టకో నిరాలమ్బో నిష్ప్రత్యూహో నిరుద్భవః ।

నిత్యో నియతకల్యాణో నిర్వికల్పో నిరాశ్రయః ॥ 66 ॥

నేతా నిధిర్నైకరూపో నిరాకారో నదీసుతః ।

పులిన్దకన్యారమణః పురుజిత్పరమప్రియః ॥ 67 ॥

ప్రత్యక్షమూర్తిః ప్రత్యక్షః పరేశః పూర్ణపుణ్యదః ।

పుణ్యాకరః పుణ్యరూపః పుణ్యః పుణ్యపరాయణః ॥ 68 ॥

పుణ్యోదయః పరం జ్యోతిః పుణ్యకృత్పుణ్యవర్ధనః ।

పరానన్దః పరతరః పుణ్యకీర్తిః పురాతనః ॥ 69 ॥

ప్రసన్నరూపః ప్రాణేశః పన్నగః పాపనాశనః ।

ప్రణతార్తిహరః పూర్ణః పార్వతీనన్దనః ప్రభుః ॥ 70 ॥

పూతాత్మా పురుషః ప్రాణః ప్రభవః పురుషోత్తమః ।

ప్రసన్నః పరమస్పష్టః పరః పరిబృఢః పరః ॥ 71 ॥

పరమాత్మా పరబ్రహ్మ పరార్థః ప్రియదర్శనః ।

పవిత్రః పుష్టిదః పూర్తిః పిఙ్గలః పుష్టివర్ధనః ॥ 72 ॥

పాపహారీ పాశధరః ప్రమత్తాసురశిక్షకః ।

పావనః పావకః పూజ్యః పూర్ణానన్దః పరాత్పరః ॥ 73 ॥

పుష్కలః ప్రవరః పూర్వః పితృభక్తః పురోగమః ।

ప్రాణదః ప్రాణిజనకః ప్రదిష్టః పావకోద్భవః ॥ 74 ॥

పరబ్రహ్మస్వరూపశ్చ పరమైశ్వర్యకారణమ్ ।

పరర్ధిదః పుష్టికరః ప్రకాశాత్మా ప్రతాపవాన్ ॥ 75 ॥

ప్రజ్ఞాపరః ప్రకృష్టార్థః పృథుః పృథుపరాక్రమః ।

ఫణీశ్వరః ఫణివరః ఫణామణివిభూషణః ॥ 76 ॥

ఫలదః ఫలహస్తశ్చ ఫుల్లామ్బుజవిలోచనః ।

ఫడుచ్చాటితపాపౌఘః ఫణిలోకవిభూషణః ॥ 77 ॥

బాహులేయో బృహద్రూపో బలిష్ఠో బలవాన్ బలీ ।

బ్రహ్మేశవిష్ణురూపశ్చ బుద్ధో బుద్ధిమతాం వరః ॥ 78 ॥

బాలరూపో బ్రహ్మగర్భో బ్రహ్మచారీ బుధప్రియః ।

బహుశ్రుతో బహుమతో బ్రహ్మణ్యో బ్రాహ్మణప్రియః ॥ 79 ॥

బలప్రమథనో బ్రహ్మా బహురూపో బహుప్రదః ।

బృహద్భానుతనూద్భూతో బృహత్సేనో బిలేశయః ॥ 80 ॥

బహుబాహుర్బలశ్రీమాన్ బహుదైత్యవినాశకః ।

బిలద్వారాన్తరాలస్థో బృహచ్ఛక్తిధనుర్ధరః ॥ 81 ॥

బాలార్కద్యుతిమాన్ బాలో బృహద్వక్షా బృహద్ధనుః ।

భవ్యో భోగీశ్వరో భావ్యో భవనాశో భవప్రియః ॥ 82 ॥

భక్తిగమ్యో భయహరో భావజ్ఞో భక్తసుప్రియః ।

భుక్తిముక్తిప్రదో భోగీ భగవాన్ భాగ్యవర్ధనః ॥ 83 ॥

భ్రాజిష్ణుర్భావనో భర్తా భీమో భీమపరాక్రమః ।

భూతిదో భూతికృద్భోక్తా భూతాత్మా భువనేశ్వరః ॥ 84 ॥

భావకో భీకరో భీష్మో భావకేష్టో భవోద్భవః ।

భవతాపప్రశమనో భోగవాన్ భూతభావనః ॥ 85 ॥

భోజ్యప్రదో భ్రాన్తినాశో భానుమాన్ భువనాశ్రయః ।

భూరిభోగప్రదో భద్రో భజనీయో భిషగ్వరః ॥ 86 ॥

మహాసేనో మహోదారో మహాశక్తిర్మహాద్యుతిః ।

మహాబుద్ధిర్మహావీర్యో మహోత్సాహో మహాబలః ॥ 87 ॥

మహాభోగీ మహామాయీ మేధావీ మేఖలీ మహాన్ ।

మునిస్తుతో మహామాన్యో మహానన్దో మహాయశాః ॥ 88 ॥

మహోర్జితో మాననిధిర్మనోరథఫలప్రదః ।

మహోదయో మహాపుణ్యో మహాబలపరాక్రమః ॥ 89 ॥

మానదో మతిదో మాలీ ముక్తామాలావిభూషణః ।

మనోహరో మహాముఖ్యో మహర్ధిర్మూర్తిమాన్మునిః ॥ 90 ॥

మహోత్తమో మహోపాయో మోక్షదో మఙ్గలప్రదః ।

ముదాకరో ముక్తిదాతా మహాభోగో మహోరగః ॥ 91 ॥

యశస్కరో యోగయోనిర్యోగిష్ఠో యమినాం వరః ।

యశస్వీ యోగపురుషో యోగ్యో యోగనిధిర్యమీ ॥ 92 ॥

యతిసేవ్యో యోగయుక్తో యోగవిద్యోగసిద్ధిదః ।

యన్త్రో యన్త్రీ చ యన్త్రజ్ఞో యన్త్రవాన్యన్త్రవాహకః ॥ 93 ॥

యాతనారహితో యోగీ యోగీశో యోగినాం వరః ।

రమణీయో రమ్యరూపో రసజ్ఞో రసభావనః ॥ 94 ॥

రఞ్జనో రఞ్జితో రాగీ రుచిరో రుద్రసమ్భవః ।

రణప్రియో రణోదారో రాగద్వేషవినాశనః ॥ 95 ॥

రత్నార్చీ రుచిరో రమ్యో రూపలావణ్యవిగ్రహః ।

రత్నాఙ్గదధరో రత్నభూషణో రమణీయకః ॥ 96 ॥

రుచికృద్రోచమానశ్చ రఞ్జితో రోగనాశనః ।

రాజీవాక్షో రాజరాజో రక్తమాల్యానులేపనః ॥ 97 ॥

రాజద్వేదాగమస్తుత్యో రజఃసత్త్వగుణాన్వితః ।

రజనీశకలారమ్యో రత్నకుణ్డలమణ్డితః ॥ 98 ॥

రత్నసన్మౌలిశోభాఢ్యో రణన్మఞ్జీరభూషణః ।

లోకైకనాథో లోకేశో లలితో లోకనాయకః ॥ 99 ॥

లోకరక్షో లోకశిక్షో లోకలోచనరఞ్జితః ।

లోకబన్ధుర్లోకధాతా లోకత్రయమహాహితః ॥ 100 ॥

లోకచూడామణిర్లోకవన్ద్యో లావణ్యవిగ్రహః ।

లోకాధ్యక్షస్తు లీలావాన్లోకోత్తరగుణాన్వితః ॥ 101 ॥

వరిష్ఠో వరదో వైద్యో విశిష్టో విక్రమో విభుః ।

విబుధాగ్రచరో వశ్యో వికల్పపరివర్జితః ॥ 102 ॥

విపాశో విగతాతఙ్కో విచిత్రాఙ్గో విరోచనః ।

విద్యాధరో విశుద్ధాత్మా వేదాఙ్గో విబుధప్రియః ॥ 103 ॥

వచస్కరో వ్యాపకశ్చ విజ్ఞానీ వినయాన్వితః ।

విద్వత్తమో విరోధిఘ్నో వీరో విగతరాగవాన్ ॥ 104 ॥

వీతభావో వినీతాత్మా వేదగర్భో వసుప్రదః ।

విశ్వదీప్తిర్విశాలాక్షో విజితాత్మా విభావనః ॥ 105 ॥

వేదవేద్యో విధేయాత్మా వీతదోషశ్చ వేదవిత్ ।

విశ్వకర్మా వీతభయో వాగీశో వాసవార్చితః ॥ 106 ॥

వీరధ్వంసో విశ్వమూర్తిర్విశ్వరూపో వరాసనః ।

విశాఖో విమలో వాగ్మీ విద్వాన్వేదధరో వటుః ॥ 107 ॥

వీరచూడామణిర్వీరో విద్యేశో విబుధాశ్రయః ।

విజయీ వినయీ వేత్తా వరీయాన్విరజా వసుః ॥ 108 ॥

వీరఘ్నో విజ్వరో వేద్యో వేగవాన్వీర్యవాన్వశీ ।

వరశీలో వరగుణో విశోకో వజ్రధారకః ॥ 109 ॥

శరజన్మా శక్తిధరః శత్రుఘ్నః శిఖివాహనః ।

శ్రీమాన్ శిష్టః శుచిః శుద్ధః శాశ్వతః శ్రుతిసాగరః ॥ 110 ॥

శరణ్యః శుభదః శర్మ శిష్టేష్టః శుభలక్షణః ।

శాన్తః శూలధరః శ్రేష్ఠః శుద్ధాత్మా శఙ్కరః శివః ॥ 111 ॥

శితికణ్ఠాత్మజః శూరః శాన్తిదః శోకనాశనః ।

షాణ్మాతురః షణ్ముఖశ్చ షడ్గుణైశ్వర్యసంయుతః ॥ 112 ॥

షట్చక్రస్థః షడూర్మిఘ్నః షడఙ్గశ్రుతిపారగః ।

షడ్భావరహితః షట్కః షట్ఛాస్త్రస్మృతిపారగః ॥ 113 ॥

షడ్వర్గదాతా షడ్గ్రీవః షడరిఘ్నః షడాశ్రయః ।

షట్కిరీటధరః శ్రీమాన్ షడాధారశ్చ షట్క్రమః ॥ 114 ॥

షట్కోణమధ్యనిలయః షణ్డత్వపరిహారకః ।

సేనానీః సుభగః స్కన్దః సురానన్దః సతాం గతిః ॥ 115 ॥

సుబ్రహ్మణ్యః సురాధ్యక్షః సర్వజ్ఞః సర్వదః సుఖీ ।

సులభః సిద్ధిదః సౌమ్యః సిద్ధేశః సిద్ధిసాధనః ॥ 116 ॥

సిద్ధార్థః సిద్ధసఙ్కల్పః సిద్ధసాధుః సురేశ్వరః ।

సుభుజః సర్వదృక్సాక్షీ సుప్రసాదః సనాతనః ॥ 117 ॥

సుధాపతిః స్వయఞ్జ్యోతిః స్వయమ్భూః సర్వతోముఖః ।

సమర్థః సత్కృతిః సూక్ష్మః సుఘోషః సుఖదః సుహృత్ ॥ 118 ॥

సుప్రసన్నః సురశ్రేష్ఠః సుశీలః సత్యసాధకః ।

సమ్భావ్యః సుమనాః సేవ్యః సకలాగమపారగః ॥ 119 ॥

సువ్యక్తః సచ్చిదానన్దః సువీరః సుజనాశ్రయః ।

సర్వలక్షణసమ్పన్నః సత్యధర్మపరాయణః ॥ 120 ॥

సర్వదేవమయః సత్యః సదా మృష్టాన్నదాయకః ।

సుధాపీ సుమతిః సత్యః సర్వవిఘ్నవినాశనః ॥ 121 ॥

సర్వదుఃఖప్రశమనః సుకుమారః సులోచనః ।

సుగ్రీవః సుధృతిః సారః సురారాధ్యః సువిక్రమః ॥ 122 ॥

సురారిఘ్నః స్వర్ణవర్ణః సర్పరాజః సదా శుచిః ।

సప్తార్చిర్భూః సురవరః సర్వాయుధవిశారదః ॥ 123 ॥

హస్తిచర్మామ్బరసుతో హస్తివాహనసేవితః ।

హస్తచిత్రాయుధధరో హృతాఘో హసితాననః ॥ 124 ॥

హేమభూషో హరిద్వర్ణో హృష్టిదో హృష్టివర్ధనః ।

హేమాద్రిభిద్ధంసరూపో హుఙ్కారహతకిల్బిషః ॥ 125 ॥

హిమాద్రిజాతాతనుజో హరికేశో హిరణ్మయః ।

హృద్యో హృష్టో హరిసఖో హంసో హంసగతిర్హవిః ॥ 126 ॥

హిరణ్యవర్ణో హితకృద్ధర్షదో హేమభూషణః ।

హరప్రియో హితకరో హతపాపో హరోద్భవః ॥ 127 ॥

క్షేమదః క్షేమకృత్క్షేమ్యః క్షేత్రజ్ఞః క్షామవర్జితః ।

క్షేత్రపాలః క్షమాధారః క్షేమక్షేత్రః క్షమాకరః ॥ 128 ॥

క్షుద్రఘ్నః క్షాన్తిదః క్షేమః క్షితిభూషః క్షమాశ్రయః ।

క్షాలితాఘః క్షితిధరః క్షీణసంరక్షణక్షమః ॥ 129 ॥

క్షణభఙ్గురసన్నద్ధఘనశోభికపర్దకః ।

క్షితిభృన్నాథతనయాముఖపఙ్కజభాస్కరః ॥ 130 ॥

క్షతాహితః క్షరః క్షన్తా క్షతదోషః క్షమానిధిః ।

క్షపితాఖిలసన్తాపః క్షపానాథసమాననః ॥ 131 ॥

ఉత్తర న్యాసః ।

కరన్యాసః –

ఓం శం ఓఙ్కారస్వరూపాయ ఓజోధరాయ ఓజస్వినే సుహృదయాయ హృష్టచిత్తాత్మనే భాస్వరరూపాయ అఙ్గుష్ఠాభ్యాం నమః ।

ఓం రం షట్కోణమధ్యనిలయాయ షట్కిరీటధరాయ శ్రీమతే షడాధారాయ తర్జనీభ్యాం నమః ।

ఓం వం షణ్ముఖాయ శరజన్మనే శుభలక్షణాయ శిఖివాహనాయ మధ్యమాభ్యాం నమః ।

ఓం ణం కృశానుసమ్భవాయ కవచినే కుక్కుటధ్వజాయ అనామికాభ్యాం నమః ।

ఓం భం కన్దర్పకోటిదీప్యమానాయ ద్విషడ్బాహవే ద్వాదశాక్షాయ కనిష్ఠికాభ్యాం నమః ।

ఓం వం ఖేటధరాయ ఖడ్గినే శక్తిహస్తాయ కరతలకరపృష్ఠాభ్యాం నమః ।

హృదయాదిన్యాసః –

ఓం శం ఓఙ్కారస్వరూపాయ ఓజోధరాయ ఓజస్వినే సుహృదయాయ హృష్టచిత్తాత్మనే భాస్వరరూపాయ హృదయాయ నమః ।

ఓం రం షట్కోణమధ్యనిలయాయ షట్కిరీటధరాయ శ్రీమతే షడాధారాయ శిరసే స్వాహా ।

ఓం వం షణ్ముఖాయ శరజన్మనే శుభలక్షణాయ శిఖివాహనాయ శిఖాయై వషట్ ।

ఓం ణం కృశానుసమ్భవాయ కవచినే కుక్కుటధ్వజాయ కవచాయ హుమ్ ।

ఓం భం కన్దర్పకోటిదీప్యమానాయ ద్విషడ్బాహవే ద్వాదశాక్షాయ నేత్రత్రయాయ వౌషట్ ।

ఓం వం ఖేటధరాయ ఖడ్గినే శక్తిహస్తాయ అస్త్రాయ ఫట్ ।

భూర్భువస్సువరోమితి దిగ్విమోకః ।

ఫలశ్రుతి ।

ఇతి నామ్నాం సహస్రాణి షణ్ముఖస్య చ నారద ।

యః పఠేచ్ఛృణుయాద్వాపి భక్తియుక్తేన చేతసా ॥ 1 ॥

స సద్యో ముచ్యతే పాపైర్మనోవాక్కాయసమ్భవైః ।

ఆయుర్వృద్ధికరం పుంసాం స్థైర్యవీర్యవివర్ధనమ్ ॥ 2 ॥

వాక్యేనైకేన వక్ష్యామి వాఞ్ఛితార్థం ప్రయచ్ఛతి ।

తస్మాత్సర్వాత్మనా బ్రహ్మన్నియమేన జపేత్సుధీః ॥ 3 ॥

ఇతి స్కన్దపురాణే ఈశ్వరప్రోక్తే బ్రహ్మనారదసంవాదే శ్రీ సుబ్రహ్మణ్య సహస్రనామ స్తోత్రమ్ ।