ಶ್ರೀ ಶ್ರೀಶೈಲ ಮಲ್ಲಿಕಾರ್ಜುನ ಸುಪ್ರಭಾತಮ್

ಶ್ರೀ ಶ್ರೀಶೈಲ ಮಲ್ಲಿಕಾರ್ಜುನ ಸುಪ್ರಭಾತಮ್

ಶ್ಲೋಕ 1

ಪ್ರಾತಸ್ಸ್ಮರಾಮಿ ಗಣನಾಥಮನಾಥಬನ್ಧುಂ

ಸಿನ್ದೂರಪೂರಪರಿಶೋಭಿತಗಣ್ಡಯುಗ್ಮಮ್ ।

ಉದ್ದಣ್ಡವಿಘ್ನಪರಿಖಣ್ಡನಚಣ್ಡದಣ್ಡ-

ಮಾಖಣ್ಡಲಾದಿಸುರನಾಯಕವೃನ್ದವನ್ದ್ಯಮ್

ಶ್ಲೋಕ 2

ಕಲಾಭ್ಯಾಂ ಚೂಡಾಲಙ್ಕೃತಶಶಿಕಲಾಭ್ಯಾಂ ನಿಜತಪಃ

ಫಲಾಭ್ಯಾಂ ಭಕ್ತೇಷು ಪ್ರಕಟಿತಫಲಾಭ್ಯಾಂ ಭವತು ಮೇ ।

ಶಿವಾಭ್ಯಾಮಾಸ್ತೀಕತ್ರಿಭುವನಶಿವಾಭ್ಯಾಂ ಹೃದಿ ಪುನ-

ರ್ಭವಾಭ್ಯಾಮಾನನ್ದಸ್ಫುರದನುಭವಾಭ್ಯಾಂ ನತಿರಿಯಮ್

॥ 1॥

ಶ್ಲೋಕ 3

ನಮಸ್ತೇ ನಮಸ್ತೇ ಮಹಾದೇವ! ಶಮ್ಭೋ!

ನಮಸ್ತೇ ನಮಸ್ತೇ ದಯಾಪೂರ್ಣಸಿನ್ಧೋ!

ನಮಸ್ತೇ ನಮಸ್ತೇ ಪ್ರಪನ್ನಾತ್ಮಬನ್ಧೋ!

ನಮಸ್ತೇ ನಮಸ್ತೇ ನಮಸ್ತೇ ಮಹೇಶ

॥ 2॥

ಶ್ಲೋಕ 4

ಶಶ್ವಚ್ಛ್ರೀಗಿರಿಮೂರ್ಧನಿ ತ್ರಿಜಗತಾಂ ರಕ್ಷಾಕೃತೌ ಲಕ್ಷಿತಾಂ

ಸಾಕ್ಷಾದಕ್ಷತಸತ್ಕಟಾಕ್ಷಸರಣಿಶ್ರೀಮತ್ಸುಧಾವರ್ಷಿಣೀಮ್ ।

ಸೋಮಾರ್ಧಾಙ್ಕಿತಮಸ್ತಕಾಂ ಪ್ರಣಮತಾಂ ನಿಸ್ಸೀಮಸಮ್ಪತ್ಪ್ರದಾಂ

ಸುಶ್ಲೋಕಾಂ ಭ್ರಮರಾಮ್ಬಿಕಾಂ ಸ್ಮಿತಮುಖೀಂ ಶಮ್ಭೋಸ್ಸಖೀಂ ತ್ವಾಂ ಸ್ತುಮಃ

॥ 3॥

ಶ್ಲೋಕ 5

ಮಾತಃ! ಪ್ರಸೀದ, ಸದಯಾ ಭವ, ಭವ್ಯಶೀಲೇ !

ಲೀಲಾಲವಾಕುಲಿತದೈತ್ಯಕುಲಾಪಹಾರೇ !

ಶ್ರೀಚಕ್ರರಾಜನಿಲಯೇ ! ಶ್ರುತಿಗೀತಕೀರ್ತೇ !

ಶ್ರೀಶೈಲನಾಥದಯಿತೇ ! ತವ ಸುಪ್ರಭಾತಮ್

॥ 4॥

ಶ್ಲೋಕ 6

ಶಮ್ಭೋ ! ಸುರೇನ್ದ್ರನುತ ! ಶಙ್ಕರ ! ಶೂಲಪಾಣೇ !

ಚನ್ದ್ರಾವತಂಸ ! ಶಿವ ! ಶರ್ವ ! ಪಿನಾಕಪಾಣೇ !

ಗಙ್ಗಾಧರ ! ಕ್ರತುಪತೇ ! ಗರುಡಧ್ವಜಾಪ್ತ !

ಶ್ರೀಮಲ್ಲಿಕಾರ್ಜುನ ವಿಭೋ ! ತವ ಸುಪ್ರಭಾತಮ್

॥ 5॥

ಶ್ಲೋಕ 7

ವಿಶ್ವೇಶ ! ವಿಶ್ವಜನಸೇವಿತ ! ವಿಶ್ವಮೂರ್ತೇ !

ವಿಶ್ವಮ್ಭರ ! ತ್ರಿಪುರಭೇದನ ! ವಿಶ್ವಯೋನೇ !

ಫಾಲಾಕ್ಷ ! ಭವ್ಯಗುಣ ! ಭೋಗಿವಿಭೂಷಣೇಶ !

ಶ್ರೀಮಲ್ಲಿಕಾರ್ಜುನ ವಿಭೋ ! ತವ ಸುಪ್ರಭಾತಮ್

॥ 6॥

ಶ್ಲೋಕ 8

ಕಲ್ಯಾಣರೂಪ ! ಕರುಣಾಕರ ! ಕಾಲಕಣ್ಠ !

ಕಲ್ಪದ್ರುಮಪ್ರಸವಪೂಜಿತ ! ಕಾಮದಾಯಿನ್ !

ದುರ್ನೀತಿದೈತ್ಯದಲನೋದ್ಯತ ! ದೇವ ದೇವ !

ಶ್ರೀಮಲ್ಲಿಕಾರ್ಜುನ ವಿಭೋ ! ತವ ಸುಪ್ರಭಾತಮ್

॥ 7॥

ಶ್ಲೋಕ 9

ಗೌರೀಮನೋಹರ ! ಗಣೇಶ್ವರಸೇವಿತಾಙ್ಘ್ರೇ !

ಗನ್ಧರ್ವಯಕ್ಷಸುರಕಿನ್ನರಗೀತಕೀರ್ತೇ !

ಗಣ್ಡಾವಲಮ್ಬಿಫಣಿಕುಣ್ಡಲಮಣ್ಡಿತಾಸ್ಯ !

ಶ್ರೀಮಲ್ಲಿಕಾರ್ಜುನ ವಿಭೋ ! ತವ ಸುಪ್ರಭಾತಮ್

॥ 8॥

ಶ್ಲೋಕ 10

ನಾಗೇನ್ದ್ರಭೂಷಣ ! ನಿರೀಹಿತ ! ನಿರ್ವಿಕಾರ !

ನಿರ್ಮಾಯ ! ನಿಶ್ಚಲ ! ನಿರರ್ಗಲ ! ನಾಗಭೇದಿನ್ ।

ನಾರಾಯಣೀಪ್ರಿಯ ! ನತೇಷ್ಟದ ! ನಿರ್ಮಲಾತ್ಮನ್ !

ಶ್ರೀಪರ್ವತಾಧಿಪ ! ವಿಭೋ ! ತವ ಸುಪ್ರಭಾತಮ್

॥ 9॥

ಶ್ಲೋಕ 11

ಸೃಷ್ಟಂ ತ್ವಯೈವ ಜಗದೇತದಶೇಷಮೀಶ !

ರಕ್ಷಾವಿಧಿಶ್ಚ ವಿಧಿಗೋಚರ ! ತಾವಕೀನಃ ।

ಸಂಹಾರಶಕ್ತಿರಪಿ ಶಙ್ಕರ ! ಕಿಙ್ಕರೀ ತೇ

ಶ್ರೀಶೈಲಶೇಖರ ವಿಭೋ ! ತವ ಸುಪ್ರಭಾತಮ್

॥ 10॥

ಶ್ಲೋಕ 12

ಏಕಸ್ತ್ವಮೇವ ಬಹುಧಾ ಭವ ! ಭಾಸಿ ಲೋಕೇ

ನಿಶ್ಶಙ್ಕಧೀರ್ವೃಷಭಕೇತನ ! ಮಲ್ಲಿನಾಥ !

ಶ್ರೀಭ್ರಾಮರೀಪ್ರಯ ! ಸುಖಾಶ್ರಯ ! ಲೋಕನಾಥ !

ಶ್ರೀಶೈಲಶೇಖರ ವಿಭೋ ! ತವ ಸುಪ್ರಭಾತಮ್

॥ 11॥

ಶ್ಲೋಕ 13

ಪಾತಾಲಗಾಙ್ಗಜಲಮಜ್ಜನನಿರ್ಮಲಾಙ್ಗಾಃ

ಭಸ್ಮತ್ರಿಪುಣ್ಡ್ರಸಮಲಙ್ಕೃತಫಾಲಭಾಗಾಃ ।

ಗಾಯನ್ತಿ ದೇವಮುನಿಭಕ್ತಜನಾ ಭವನ್ತಂ

ಶ್ರೀಮಲ್ಲಿಕಾರ್ಜುನ ವಿಭೋ ! ತವ ಸುಪ್ರಭಾತಮ್

॥ 12॥

ಶ್ಲೋಕ 14

ಸಾರಸ್ವತಾಮ್ಬುಯುತಭೋಗವತೀಶ್ರಿತಾಯಾಃ

ಬ್ರಹ್ಮೇಶವಿಷ್ಣುಗಿರಿಚುಮ್ಬಿತಕೃಷ್ಣವೇಣ್ಯಾಃ ।

ಸೋಪಾನಮಾರ್ಗಮಧಿರುಹ್ಯ ಭಜನ್ತಿ ಭಕ್ತಾಃ

ಶ್ರೀಮಲ್ಲಿಕಾರ್ಜುನ ವಿಭೋ ! ತವ ಸುಪ್ರಭಾತಮ್

॥ 13॥

ಶ್ಲೋಕ 15

ಶ್ರೀಮಲ್ಲಿಕಾರ್ಜುನಮಹೇಶ್ವರಸುಪ್ರಭಾತ-

ಸ್ತೋತ್ರಂ ಪಠನ್ತಿ ಭುವಿ ಯೇ ಮನುಜಾಃ ಪ್ರಭಾತೇ ।

ತೇ ಸರ್ವ ಸೌಖ್ಯಮನುಭೂಯ ಪರಾನವಾಪ್ಯಂ

ಶ್ರೀಶಾಮ್ಭವಂ ಪದಮವಾಪ್ಯ ಮುದಂ ಲಭನ್ತೇ

॥ 14॥

ಶ್ಲೋಕ 16

ಇತಿ ಶ್ರೀಮಲ್ಲಿಕಾರ್ಜುನಸುಪ್ರಭಾತಂ ಸಮ್ಪೂರ್ಣಮ್ ।