શ્રી શ્રીશૈલ મલ્લિકાર્જુન સુપ્રભાતમ્

શ્રી શ્રીશૈલ મલ્લિકાર્જુન સુપ્રભાતમ્

શ્લોક 1

પ્રાતસ્સ્મરામિ ગણનાથમનાથબન્ધું

સિન્દૂરપૂરપરિશોભિતગણ્ડયુગ્મમ્ ।

ઉદ્દણ્ડવિઘ્નપરિખણ્ડનચણ્ડદણ્ડ-

માખણ્ડલાદિસુરનાયકવૃન્દવન્દ્યમ્

શ્લોક 2

કલાભ્યાં ચૂડાલઙ્કૃતશશિકલાભ્યાં નિજતપઃ

ફલાભ્યાં ભક્તેષુ પ્રકટિતફલાભ્યાં ભવતુ મે ।

શિવાભ્યામાસ્તીકત્રિભુવનશિવાભ્યાં હૃદિ પુન-

ર્ભવાભ્યામાનન્દસ્ફુરદનુભવાભ્યાં નતિરિયમ્

॥ 1॥

શ્લોક 3

નમસ્તે નમસ્તે મહાદેવ! શમ્ભો!

નમસ્તે નમસ્તે દયાપૂર્ણસિન્ધો!

નમસ્તે નમસ્તે પ્રપન્નાત્મબન્ધો!

નમસ્તે નમસ્તે નમસ્તે મહેશ

॥ 2॥

શ્લોક 4

શશ્વચ્છ્રીગિરિમૂર્ધનિ ત્રિજગતાં રક્ષાકૃતૌ લક્ષિતાં

સાક્ષાદક્ષતસત્કટાક્ષસરણિશ્રીમત્સુધાવર્ષિણીમ્ ।

સોમાર્ધાઙ્કિતમસ્તકાં પ્રણમતાં નિસ્સીમસમ્પત્પ્રદાં

સુશ્લોકાં ભ્રમરામ્બિકાં સ્મિતમુખીં શમ્ભોસ્સખીં ત્વાં સ્તુમઃ

॥ 3॥

શ્લોક 5

માતઃ! પ્રસીદ, સદયા ભવ, ભવ્યશીલે !

લીલાલવાકુલિતદૈત્યકુલાપહારે !

શ્રીચક્રરાજનિલયે ! શ્રુતિગીતકીર્તે !

શ્રીશૈલનાથદયિતે ! તવ સુપ્રભાતમ્

॥ 4॥

શ્લોક 6

શમ્ભો ! સુરેન્દ્રનુત ! શઙ્કર ! શૂલપાણે !

ચન્દ્રાવતંસ ! શિવ ! શર્વ ! પિનાકપાણે !

ગઙ્ગાધર ! ક્રતુપતે ! ગરુડધ્વજાપ્ત !

શ્રીમલ્લિકાર્જુન વિભો ! તવ સુપ્રભાતમ્

॥ 5॥

શ્લોક 7

વિશ્વેશ ! વિશ્વજનસેવિત ! વિશ્વમૂર્તે !

વિશ્વમ્ભર ! ત્રિપુરભેદન ! વિશ્વયોને !

ફાલાક્ષ ! ભવ્યગુણ ! ભોગિવિભૂષણેશ !

શ્રીમલ્લિકાર્જુન વિભો ! તવ સુપ્રભાતમ્

॥ 6॥

શ્લોક 8

કલ્યાણરૂપ ! કરુણાકર ! કાલકણ્ઠ !

કલ્પદ્રુમપ્રસવપૂજિત ! કામદાયિન્ !

દુર્નીતિદૈત્યદલનોદ્યત ! દેવ દેવ !

શ્રીમલ્લિકાર્જુન વિભો ! તવ સુપ્રભાતમ્

॥ 7॥

શ્લોક 9

ગૌરીમનોહર ! ગણેશ્વરસેવિતાઙ્ઘ્રે !

ગન્ધર્વયક્ષસુરકિન્નરગીતકીર્તે !

ગણ્ડાવલમ્બિફણિકુણ્ડલમણ્ડિતાસ્ય !

શ્રીમલ્લિકાર્જુન વિભો ! તવ સુપ્રભાતમ્

॥ 8॥

શ્લોક 10

નાગેન્દ્રભૂષણ ! નિરીહિત ! નિર્વિકાર !

નિર્માય ! નિશ્ચલ ! નિરર્ગલ ! નાગભેદિન્ ।

નારાયણીપ્રિય ! નતેષ્ટદ ! નિર્મલાત્મન્ !

શ્રીપર્વતાધિપ ! વિભો ! તવ સુપ્રભાતમ્

॥ 9॥

શ્લોક 11

સૃષ્ટં ત્વયૈવ જગદેતદશેષમીશ !

રક્ષાવિધિશ્ચ વિધિગોચર ! તાવકીનઃ ।

સંહારશક્તિરપિ શઙ્કર ! કિઙ્કરી તે

શ્રીશૈલશેખર વિભો ! તવ સુપ્રભાતમ્

॥ 10॥

શ્લોક 12

એકસ્ત્વમેવ બહુધા ભવ ! ભાસિ લોકે

નિશ્શઙ્કધીર્વૃષભકેતન ! મલ્લિનાથ !

શ્રીભ્રામરીપ્રય ! સુખાશ્રય ! લોકનાથ !

શ્રીશૈલશેખર વિભો ! તવ સુપ્રભાતમ્

॥ 11॥

શ્લોક 13

પાતાલગાઙ્ગજલમજ્જનનિર્મલાઙ્ગાઃ

ભસ્મત્રિપુણ્ડ્રસમલઙ્કૃતફાલભાગાઃ ।

ગાયન્તિ દેવમુનિભક્તજના ભવન્તં

શ્રીમલ્લિકાર્જુન વિભો ! તવ સુપ્રભાતમ્

॥ 12॥

શ્લોક 14

સારસ્વતામ્બુયુતભોગવતીશ્રિતાયાઃ

બ્રહ્મેશવિષ્ણુગિરિચુમ્બિતકૃષ્ણવેણ્યાઃ ।

સોપાનમાર્ગમધિરુહ્ય ભજન્તિ ભક્તાઃ

શ્રીમલ્લિકાર્જુન વિભો ! તવ સુપ્રભાતમ્

॥ 13॥

શ્લોક 15

શ્રીમલ્લિકાર્જુનમહેશ્વરસુપ્રભાત-

સ્તોત્રં પઠન્તિ ભુવિ યે મનુજાઃ પ્રભાતે ।

તે સર્વ સૌખ્યમનુભૂય પરાનવાપ્યં

શ્રીશામ્ભવં પદમવાપ્ય મુદં લભન્તે

॥ 14॥

શ્લોક 16

ઇતિ શ્રીમલ્લિકાર્જુનસુપ્રભાતં સમ્પૂર્ણમ્ ।