Sri Devi Atharva Sheersham

श्री देव्यथर्वशीर्षम्

श्लोक 1

ॐ सर्वे वै देवा देवीमुपतस्थुः कासि त्व-म्महादेवीति

श्लोक 2

सा-ऽब्रवीदह-म्ब्रह्मस्वरूपिणी ।

मत्तः प्रकृतिपुरुषात्मक-ञ्जगत् ।

शून्य-ञ्चाशून्य-ञ्च

॥ 1 ॥

श्लोक 3

अहमानन्दानानन्दौ ।

अहं-विँज्ञानाविज्ञाने ।

अह-म्ब्रह्माब्रह्मणि वेदितव्ये ।

अह-म्पञ्चभूतान्यपञ्चभूतानि ।

अहमखिल-ञ्जगत्

॥ 2 ॥

श्लोक 4

वेदो-ऽहमवेदो-ऽहम् ।

विद्या-ऽहमविद्या-ऽहम् ।

अजा-ऽहमनजा-ऽहम् ।

अधश्चोर्ध्व-ञ्च तिर्यक्चाहम्

॥ 3 ॥

श्लोक 5

अहं रुद्रेभिर्वसुभिश्चरामि ।

अहमादित्यैरुत विश्वदेवैः ।

अह-म्मित्रावरुणावुभौ बिभर्मि ।

अहमिन्द्राग्नी अहमश्विनावुभौ

॥ 4 ॥

श्लोक 6

अहं सोम-न्त्वष्टार-म्पूषण-म्भग-न्दधामि ।

अहं-विँष्णुमुरुक्रम-म्ब्रह्माणमुत प्रजापति-न्दधामि

॥ 5 ॥

श्लोक 7

अ॒ह-न्द॑धामि॒ द्रवि॑णं ह॒विष्म॑ते सुप्रा॒व्ये॒3 यज॑मानाय सुन्व॒ते ।

अ॒हं राष्ट्री॑ स॒ङ्गम॑नी॒ वसू॑ना-ञ्चिकि॒तुषी॑ प्रथ॒मा य॒ज्ञिया॑नाम् ।

अ॒हं सु॑वे पि॒तर॑मस्य मू॒र्धन्मम॒ योनि॑र॒प्स्वन्त-स्स॑मु॒द्रे ।

य एवं-वेँद । स देवीं सम्पदमाप्नोति

॥ 6 ॥

श्लोक 8

ते देवा अब्रुवन्

नमो देव्यै महादेव्यै शिवायै सतत-न्नमः ।

नमः प्रकृत्यै भद्रायै नियताः प्रणता-स्स्म ताम्

॥ 7 ॥

श्लोक 9

ताम॒ग्निव॑र्णा॒-न्तप॑सा ज्वल॒न्तीं-वैँ॑रोच॒नी-ङ्क॑र्मफ॒लेषु॒ जुष्टा᳚म् ।

दु॒र्गा-न्दे॒वीं शर॑ण-म्प्रप॑द्यामहे-ऽसुरान्नाशयित्र्यै ते नमः

॥ 8 ॥

श्लोक 10

(ऋ.वे.8.100.11)

दे॒वीं-वाँच॑मजनयन्त दे॒वास्तां-विँ॒श्वरू॑पाः प॒शवो॑ वदन्ति ।

सा नो॑ म॒न्द्रेष॒मूर्ज॒-न्दुहा॑ना धे॒नुर्वाग॒स्मानुप॒ सुष्टु॒तैतु॑

॥ 9 ॥

श्लोक 11

कालरात्री-म्ब्रह्मस्तुतां-वैँष्णवीं स्कन्दमातरम् ।

सरस्वतीमदिति-न्दक्षदुहितर-न्नमामः पावनां शिवाम्

॥ 10 ॥

श्लोक 12

महालक्ष्म्यै च विद्महे सर्वशक्त्यै च धीमहि ।

तन्नो देवी प्रचोदयात्

॥ 11 ॥

श्लोक 13

अदितिर्​ह्यजनिष्ट दक्ष या दुहिता तव ।

ता-न्देवा अन्वजायन्त भद्रा अमृतबन्धवः

॥ 12 ॥

श्लोक 14

कामो योनिः कमला वज्रपाणि-

र्गुहा हसा मातरिश्वाभ्रमिन्द्रः ।

पुनर्गुहा सकला मायया च

पुरूच्यैषा विश्वमातादिविद्योम्

॥ 13 ॥

श्लोक 15

एषा-ऽऽत्मशक्तिः ।

एषा विश्वमोहिनी ।

पाशाङ्कुशधनुर्बाणधरा ।

एषा श्रीमहाविद्या ।

य एवं-वेँद स शोक-न्तरति

॥ 14 ॥

श्लोक 16

नमस्ते अस्तु भगवति मातरस्मान्पाहि सर्वतः

॥ 15 ॥

श्लोक 17

सैषाष्टौ वसवः ।

सैषैकादश रुद्राः ।

सैषा द्वादशादित्याः ।

सैषा विश्वेदेवा-स्सोमपा असोमपाश्च ।

सैषा यातुधाना असुरा रक्षांसि पिशाचा यक्षा सिद्धाः ।

सैषा सत्त्वरजस्तमांसि ।

सैषा ब्रह्मविष्णुरुद्ररूपिणी ।

सैषा प्रजापतीन्द्रमनवः ।

सैषा ग्रहनक्षत्रज्योतींषि । कलाकाष्ठादिकालरूपिणी ।

तामह-म्प्रणौमि नित्यम् ।

पापापहारिणी-न्देवी-म्भुक्तिमुक्तिप्रदायिनीम् ।

अनन्तां-विँजयां शुद्धां शरण्यां शिवदां शिवाम्

॥ 16 ॥

श्लोक 18

वियदीकारसं​युँक्तं-वीँतिहोत्रसमन्वितम् ।

अर्धेन्दुलसित-न्देव्या बीजं सर्वार्थसाधकम्

॥ 17 ॥

श्लोक 19

एवमेकाक्षर-म्ब्रह्म यतय-श्शुद्धचेतसः ।

ध्यायन्ति परमानन्दमया ज्ञानाम्बुराशयः

॥ 18 ॥

श्लोक 20

वाङ्माया ब्रह्मसूस्तस्मा-थ्षष्ठं-वँक्त्रसमन्वितम् ।

सूर्यो-ऽवामश्रोत्रबिन्दुसं​युँक्तष्टात्तृतीयकः ।

नारायणेन सम्मिश्रो वायुश्चाधरयुक्ततः ।

विच्चे नवार्णको-ऽर्ण-स्स्यान्महदानन्ददायकः

॥ 19 ॥

श्लोक 21

हृत्पुण्डरीकमध्यस्था-म्प्रातस्सूर्यसमप्रभाम् ।

पाशाङ्कुशधरां सौम्यां-वँरदाभयहस्तकाम् ।

त्रिनेत्रां रक्तवसना-म्भक्तकामदुघा-म्भजे

॥ 20 ॥

श्लोक 22

नमामि त्वा-म्महादेवी-म्महाभयविनाशिनीम् ।

महादुर्गप्रशमनी-म्महाकारुण्यरूपिणीम्

॥ 21 ॥

श्लोक 23

यस्या-स्स्वरूप-म्ब्रह्मादयो न जानन्ति तस्मादुच्यते अज्ञेया ।

यस्या अन्तो न लभ्यते तस्मादुच्यते अनन्ता ।

यस्या लक्ष्य-न्नोपलक्ष्यते तस्मादुच्यते अलक्ष्या ।

यस्या जनन-न्नोपलभ्यते तस्मादुच्यते अजा ।

एकैव सर्वत्र वर्तते तस्मादुच्यते एका ।

एकैव विश्वरूपिणी तस्मादुच्यते नैका ।

अत एवोच्यते अज्ञेयानन्तालक्ष्याजैका नैकेति

॥ 22 ॥

श्लोक 24

मन्त्राणा-म्मातृका देवी शब्दाना-ञ्ज्ञानरूपिणी ।

ज्ञानाना-ञ्चिन्मयातीता शून्यानां शून्यसाक्षिणी ।

यस्याः परतर-न्नास्ति सैषा दुर्गा प्रकीर्तिता

॥ 23 ॥

श्लोक 25

ता-न्दुर्गा-न्दुर्गमा-न्देवी-न्दुराचारविघातिनीम् ।

नमामि भवभीतो-ऽहं संसारार्णवतारिणीम्

॥ 24 ॥

श्लोक 26

इदमथर्वशीर्​षं-योँ-ऽधीते स पञ्चाथर्वशीर्​षजपफलमाप्नोति ।

इदमथर्वशीर्​षमज्ञात्वा यो-ऽर्चां स्थापयति ।

शतलक्ष-म्प्रजप्त्वा-ऽपि सो-ऽर्चासिद्धि-न्न विन्दति ।

शतमष्टोत्तर-ञ्चास्य पुरश्चर्याविधि-स्स्मृतः ।

दशवार-म्पठेद्यस्तु सद्यः पापैः प्रमुच्यते ।

महादुर्गाणि तरति महादेव्याः प्रसादतः । 26 ॥

सायमधीयानो दिवसकृत-म्पाप-न्नाशयति ।

प्रातरधीयानो रात्रिकृत-म्पाप-न्नाशयति ।

साय-म्प्रातः प्रयुञ्जानो अपापो भवति ।

निशीथे तुरीयसन्ध्याया-ञ्जप्त्वा वाक्सिद्धिर्भवति ।

नूतनाया-म्प्रतिमाया-ञ्जप्त्वा देवतासान्निध्य-म्भवति ।

प्राणप्रतिष्ठाया-ञ्जप्त्वा प्राणाना-म्प्रतिष्ठा भवति ।

भौमाश्विन्या-म्महादेवीसन्निधौ जप्त्वा महामृत्यु-न्तरति ।

स महामृत्यु-न्तरति ।

य एवं-वेँद ।

इत्युपनिषत्

॥ 25 ॥

श्लोक 27

इति देव्यथर्वशीर्​षम् ।