Rama Raksha Stotram

श्री राम रक्षा स्तोत्रम्

श्लोक 1

ॐ अस्य श्री रामरक्षा स्तोत्रमन्त्रस्य

बुधकौशिक ऋषिः

श्री सीताराम चन्द्रोदेवता

अनुष्टुप् छन्दः

सीता शक्तिः

श्रीमद् हनुमान् कीलकम्

श्रीरामचन्द्र प्रीत्यर्थे रामरक्षा स्तोत्रजपे विनियोगः ॥

ध्यानम्

ध्यायेदाजानुबाहुं धृतशर धनुषं बद्ध पद्मासनस्थं

पीतं वासोवसानं नवकमल दलस्पर्थि नेत्रं प्रसन्नम् ।

वामाङ्कारूढ सीतामुख कमलमिलल्लोचनं नीरदाभं

नानालङ्कार दीप्तं दधतमुरु जटामण्डलं रामचन्द्रम् ॥

स्तोत्रम्

चरितं रघुनाथस्य शतकोटि प्रविस्तरम् ।

एकैकमक्षरं पुंसां महापातक नाशनम्

श्लोक 2

ध्यात्वा नीलोत्पल श्यामं रामं राजीवलोचनम् ।

जानकी लक्ष्मणोपेतं जटामुकुट मण्डितम्

॥ 1 ॥

श्लोक 3

सासितूण धनुर्बाण पाणिं नक्तं चरान्तकम् ।

स्वलीलया जगत्त्रातु माविर्भूतमजं विभुम्

॥ 2 ॥

श्लोक 4

रामरक्षां पठेत्प्राज्ञः पापघ्नीं सर्वकामदाम् ।

शिरो मे राघवः पातु फालं (भालं) दशरथात्मजः

॥ 3 ॥

श्लोक 5

कौसल्येयो दृशौपातु विश्वामित्रप्रियः शृती ।

घ्राणं पातु मखत्राता मुखं सौमित्रिवत्सलः

॥ 4 ॥

श्लोक 6

जिह्वां विद्यानिधिः पातु कण्ठं भरतवन्दितः ।

स्कन्धौ दिव्यायुधः पातु भुजौ भग्नेशकार्मुकः

॥ 5 ॥

श्लोक 7

करौ सीतापतिः पातु हृदयं जामदग्न्यजित् ।

मध्यं पातु खरध्वंसी नाभिं जाम्बवदाश्रयः

॥ 6 ॥

श्लोक 8

सुग्रीवेशः कटिं पातु सक्थिनी हनुमत्-प्रभुः ।

ऊरू रघूत्तमः पातु रक्षःकुल विनाशकृत्

॥ 7 ॥

श्लोक 9

जानुनी सेतुकृत्-पातु जङ्घे दशमुखान्तकः ।

पादौ विभीषणश्रीदः पातु रामोऽखिलं वपुः

॥ 8 ॥

श्लोक 10

एतां रामबलोपेतां रक्षां यः सुकृती पठेत् ।

स चिरायुः सुखी पुत्री विजयी विनयी भवेत्

॥ 9 ॥

श्लोक 11

पाताल-भूतल-व्योम-चारिण-श्चद्म-चारिणः ।

न द्रष्टुमपि शक्तास्ते रक्षितं रामनामभिः

॥ 10 ॥

श्लोक 12

रामेति रामभद्रेति रामचन्द्रेति वा स्मरन् ।

नरो न लिप्यते पापैर्भुक्तिं मुक्तिं च विन्दति

॥ 11 ॥

श्लोक 13

जगज्जैत्रैक मन्त्रेण रामनाम्नाभि रक्षितम् ।

यः कण्ठे धारयेत्तस्य करस्थाः सर्वसिद्धयः

॥ 12 ॥

श्लोक 14

वज्रपञ्जर नामेदं यो रामकवचं स्मरेत् ।

अव्याहताज्ञः सर्वत्र लभते जयमङ्गलम्

॥ 13 ॥

श्लोक 15

आदिष्टवान्-यथा स्वप्ने रामरक्षामिमां हरः ।

तथा लिखितवान्-प्रातः प्रबुद्धौ बुधकौशिकः

॥ 14 ॥

श्लोक 16

आरामः कल्पवृक्षाणां विरामः सकलापदाम् ।

अभिराम-स्त्रिलोकानां रामः श्रीमान् स नः प्रभुः

॥ 15 ॥

श्लोक 17

तरुणौ रूपसम्पन्नौ सुकुमारौ महाबलौ ।

पुण्डरीक विशालाक्षौ चीरकृष्णाजिनाम्बरौ

॥ 16 ॥

श्लोक 18

फलमूलाशिनौ दान्तौ तापसौ ब्रह्मचारिणौ ।

पुत्रौ दशरथस्यैतौ भ्रातरौ रामलक्ष्मणौ

॥ 17 ॥

श्लोक 19

शरण्यौ सर्वसत्त्वानां श्रेष्ठौ सर्वधनुष्मताम् ।

रक्षःकुल निहन्तारौ त्रायेतां नो रघूत्तमौ

॥ 18 ॥

श्लोक 20

आत्त सज्य धनुषा विषुस्पृशा वक्षयाशुग निषङ्ग सङ्गिनौ ।

रक्षणाय मम रामलक्षणावग्रतः पथि सदैव गच्छताम्

॥ 19 ॥

श्लोक 21

सन्नद्धः कवची खड्गी चापबाणधरो युवा ।

गच्छन् मनोरथान्नश्च (मनोरथोऽस्माकं) रामः पातु स लक्ष्मणः

॥ 20 ॥

श्लोक 22

रामो दाशरथि श्शूरो लक्ष्मणानुचरो बली ।

काकुत्सः पुरुषः पूर्णः कौसल्येयो रघूत्तमः

॥ 21 ॥

श्लोक 23

वेदान्तवेद्यो यज्ञेशः पुराण पुरुषोत्तमः ।

जानकीवल्लभः श्रीमानप्रमेय पराक्रमः

॥ 22 ॥

श्लोक 24

इत्येतानि जपेन्नित्यं मद्भक्तः श्रद्धयान्वितः ।

अश्वमेधाधिकं पुण्यं सम्प्राप्नोति न संशयः

॥ 23 ॥

श्लोक 25

रामं दूर्वादल श्यामं पद्माक्षं पीतवाससम् ।

स्तुवन्ति नामभि-र्दिव्यैर्न ते संसारिणो नराः

॥ 24 ॥

श्लोक 26

रामं लक्ष्मण पूर्वजं रघुवरं सीतापतिं सुन्दरम्

काकुत्स्थं करुणार्णवं गुणनिधिं विप्रप्रियं धार्मिकम् ।

राजेन्द्रं सत्यसन्धं दशरथतनयं श्यामलं शान्तमूर्तिम्

वन्दे लोकाभिरामं रघुकुल तिलकं राघवं रावणारिम्

॥ 25 ॥

श्लोक 27

रामाय रामभद्राय रामचन्द्राय वेधसे ।

रघुनाथाय नाथाय सीतायाः पतये नमः

॥ 26 ॥

श्लोक 28

श्रीराम राम रघुनन्दन राम राम

श्रीराम राम भरताग्रज राम राम ।

श्रीराम राम रणकर्कश राम राम

श्रीराम राम शरणं भव राम राम

॥ 27 ॥

श्लोक 29

श्रीराम चन्द्र चरणौ मनसा स्मरामि

श्रीराम चन्द्र चरणौ वचसा गृह्णामि ।

श्रीराम चन्द्र चरणौ शिरसा नमामि

श्रीराम चन्द्र चरणौ शरणं प्रपद्ये

॥ 28 ॥

श्लोक 30

माता रामो मत्-पिता रामचन्द्रः

स्वामी रामो मत्-सखा रामचन्द्रः ।

सर्वस्वं मे रामचन्द्रो दयालुः

नान्यं जाने नैव जाने न जाने

॥ 29 ॥

श्लोक 31

दक्षिणे लक्ष्मणो यस्य वामे च (तु) जनकात्मजा ।

पुरतो मारुतिर्यस्य तं वन्दे रघुनन्दनम्

॥ 30 ॥

श्लोक 32

लोकाभिरामं रणरङ्गधीरं

राजीवनेत्रं रघुवंशनाथम् ।

कारुण्यरूपं करुणाकरं तं

श्रीरामचन्द्रं शरण्यं प्रपद्ये

॥ 31 ॥

श्लोक 33

मनोजवं मारुत तुल्य वेगं

जितेन्द्रियं बुद्धिमतां वरिष्टम् ।

वातात्मजं वानरयूथ मुख्यं

श्रीरामदूतं शरणं प्रपद्ये

॥ 32 ॥

श्लोक 34

कूजन्तं रामरामेति मधुरं मधुराक्षरम् ।

आरुह्यकविता शाखां वन्दे वाल्मीकि कोकिलम्

॥ 33 ॥

श्लोक 35

आपदामपहर्तारं दातारं सर्वसम्पदाम् ।

लोकाभिरामं श्रीरामं भूयोभूयो नमाम्यहम्

॥ 34 ॥

श्लोक 36

भर्जनं भवबीजानामर्जनं सुखसम्पदाम् ।

तर्जनं यमदूतानां राम रामेति गर्जनम्

॥ 35 ॥

श्लोक 37

रामो राजमणिः सदा विजयते रामं रमेशं भजे

रामेणाभिहता निशाचरचमू रामाय तस्मै नमः ।

रामान्नास्ति परायणं परतरं रामस्य दासोस्म्यहं

रामे चित्तलयः सदा भवतु मे भो राम मामुद्धर

॥ 36 ॥

श्लोक 38

श्रीराम राम रामेति रमे रामे मनोरमे ।

सहस्रनाम तत्तुल्यं राम नाम वरानने

॥ 37 ॥

श्लोक 39

इति श्रीबुधकौशिकमुनि विरचितं श्रीराम रक्षास्तोत्रं सम्पूर्णम् ।

श्रीराम जयराम जयजयराम ।