Narayana Upanishad
নারাযণ উপনিষদ্
Narayana Upanishad
নারাযণ উপনিষদ্
শ্লোক 1
ওঁ স॒হ না॑ববতু । স॒হ নৌ॑ ভুনক্তু । স॒হ বী॒র্য॑-ঙ্করবাবহৈ ।
তে॒জ॒স্বিনা॒বধী॑তমস্তু॒ মা বি॑দ্বিষা॒বহৈ᳚ ॥
ওঁ শান্তি॒-শ্শান্তি॒-শ্শান্তিঃ॑ ॥
ওঁ অথ পুরুষো হ বৈ নারাযণো-ঽকামযত প্রজা-স্সৃ॑জেযে॒তি ।
না॒রা॒য॒ণাত্প্রা॑ণো জা॒যতে । মন-স্সর্বেন্দ্রি॑যাণি॒ চ ।
খং-বাঁযুর্জ্যোতিরাপঃ পৃথিবী বিশ্ব॑স্য ধা॒রিণী ।
না॒রা॒য॒ণাদ্ব্র॑হ্মা জা॒যতে ।
না॒রা॒য॒ণাদ্রু॑দ্রো জা॒যতে ।
না॒রা॒য॒ণাদি॑ন্দ্রো জা॒যতে ।
না॒রা॒য॒ণাত্প্রজাপতযঃ প্র॑জায॒ন্তে ।
না॒রা॒য॒ণাদ্দ্বাদশাদিত্যা রুদ্রা বসবস্সর্বাণি চ ছ॑ন্দাগ্ং॒সি ।
না॒রা॒য॒ণাদেব সমু॑ত্পদ্য॒ন্তে ।
না॒রা॒য॒ণে প্র॑বর্ত॒ন্তে ।
না॒রা॒য॒ণে প্র॑লীয॒ন্তে ॥
ওম্ । অথ নিত্যো না॑রায॒ণঃ । ব্র॒হ্মা না॑রায॒ণঃ ।
শি॒বশ্চ॑ নারায॒ণঃ । শ॒ক্রশ্চ॑ নারায॒ণঃ ।
দ্যা॒বা॒পৃ॒থি॒ব্যৌ চ॑ নারায॒ণঃ । কা॒লশ্চ॑ নারায॒ণঃ ।
দি॒শশ্চ॑ নারায॒ণঃ । ঊ॒র্ধ্বশ্চ॑ নারায॒ণঃ ।
অ॒ধশ্চ॑ নারায॒ণঃ । অ॒ন্ত॒র্ব॒হিশ্চ॑ নারায॒ণঃ ।
নারাযণ এবে॑দগ্ং স॒র্বম্ ।
যদ্ভূ॒তং-যঁচ্চ॒ ভব্যম্᳚ ।
নিষ্কলো নিরঞ্জনো নির্বিকল্পো নিরাখ্যাত-শ্শুদ্ধো দেব
একো॑ নারায॒ণঃ । ন দ্বি॒তীযো᳚স্তি॒ কশ্চি॑ত্ ।
য এ॑বং-বেঁ॒দ ।
স বিষ্ণুরেব ভবতি স বিষ্ণুরে॑ব ভ॒বতি ॥
ওমিত্য॑গ্রে ব্যা॒হরেত্ । নম ই॑তি প॒শ্চাত্ ।
না॒রা॒য॒ণাযেত্যু॑পরি॒ষ্টাত্ ।
ওমি॑ত্যেকা॒ক্ষরম্ । নম ইতি॑ দ্বে অ॒ক্ষরে ।
না॒রা॒য॒ণাযেতি পঞ্চা᳚ক্ষরা॒ণি ।
এতদ্বৈ নারাযণস্যাষ্টাক্ষ॑র-ম্প॒দম্ ।
যো হ বৈ নারাযণস্যাষ্টাক্ষর-ম্পদ॑মধ্যে॒তি ।
অনপব্রবস্সর্বমা॑যুরে॒তি ।
বিন্দতে প্রা॑জাপ॒ত্যগ্ং রাযস্পোষ॑-ঙ্গৌপ॒ত্যম্ ।
ততো-ঽমৃতত্বমশ্নুতে ততো-ঽমৃতত্বমশ্নু॑ত ই॒তি ।
য এ॑বং-বেঁ॒দ ॥
প্রত্যগানন্দ-ম্ব্রহ্ম পুরুষ-ম্প্রণব॑স্বরূ॒পম্ ।
অকার উকার মকা॑র ই॒তি ।
তানেকধা সমভরত্তদেত॑দোমি॒তি ।
যমুক্ত্বা॑ মুচ্য॑তে যো॒গী॒ জ॒ন্ম॒সংসা॑রব॒ন্ধনাত্ ।
ও-ন্নমো নারাযণাযেতি ম॑ন্ত্রোপা॒সকঃ ।
বৈকুণ্ঠভুবনলোক॑-ঙ্গমি॒ষ্যতি ।
তদিদ-ম্পর-ম্পুণ্ডরীকং-বিঁ॑জ্ঞান॒ঘনম্ ।
তস্মাত্তদিদা॑বন্মা॒ত্রম্ ।
ব্রহ্মণ্যো দেব॑কীপু॒ত্রো॒ ব্রহ্মণ্যো ম॑ধুসূ॒দনোম্ ।
সর্বভূতস্থমেক॑-ন্নারা॒যণম্ ।
কারণরূপমকার প॑রব্র॒হ্মোম্ ।
এতদথর্ব শিরো॑যো-ঽধী॒তে প্রা॒তর॑ধীযা॒নো॒ রাত্রিকৃত-ম্পাপ॑-ন্নাশ॒যতি ।
সা॒যম॑ধীযা॒নো॒ দিবসকৃত-ম্পাপ॑-ন্নাশ॒যতি ।
মাধ্যন্দিনমাদিত্যাভিমুখো॑-ঽধীযা॒নঃ॒ পঞ্চপাতকোপপাতকা᳚ত্প্রমু॒চ্যতে ।
সর্ব বেদ পারাযণ পু॑ণ্যং-লঁ॒ভতে ।
নারাযণসাযুজ্যম॑বাপ্নো॒তি॒ নারাযণ সাযুজ্যম॑বাপ্নো॒তি ।
য এ॑বং-বেঁ॒দ । ইত্যু॑প॒নিষ॑ত্ ॥
ওঁ স॒হ না॑ববতু । স॒হ নৌ॑ ভুনক্তু । স॒হ বী॒র্য॑-ঙ্করবাবহৈ ।
তে॒জ॒স্বিনা॒বধী॑তমস্তু॒ মা বি॑দ্বিষা॒বহৈ᳚ ॥
ওঁ শান্তি॒-শ্শান্তি॒-শ্শান্তিঃ॑ ॥