ದ್ವಾದಶ ಆರ್ಯ ಸ್ತುತಿ

ದ್ವಾದಶ ಆರ್ಯ ಸ್ತುತಿ

ಶ್ಲೋಕ 1

ಉದ್ಯನ್ನದ್ಯವಿವಸ್ವಾನಾರೋಹನ್ನುತ್ತರಾಂ ದಿವಂ ದೇವಃ ।

ಹೃದ್ರೋಗಂ ಮಮ ಸೂರ್ಯೋ ಹರಿಮಾಣಂ ಚಾಽಽಶು ನಾಶಯತು

ಶ್ಲೋಕ 2

ನಿಮಿಷಾರ್ಧೇನೈಕೇನ ದ್ವೇ ಚ ಶತೇ ದ್ವೇ ಸಹಸ್ರೇ ದ್ವೇ ।

ಕ್ರಮಮಾಣ ಯೋಜನಾನಾಂ ನಮೋಽಸ್ತು ತೇ ನಲಿನನಾಥಾಯ

॥ 1 ॥

ಶ್ಲೋಕ 3

ಕರ್ಮಜ್ಞಾನಖದಶಕಂ ಮನಶ್ಚ ಜೀವ ಇತಿ ವಿಶ್ವಸರ್ಗಾಯ ।

ದ್ವಾದಶಧಾ ಯೋ ವಿಚರತಿ ಸ ದ್ವಾದಶಮೂರ್ತಿರಸ್ತು ಮೋದಾಯ

॥ 2 ॥

ಶ್ಲೋಕ 4

ತ್ವಂ ಹಿ ಯಜೂಋಕ್ಸಾಮಃ ತ್ವಮಾಗಮಸ್ತ್ವಂ ವಷಟ್ಕಾರಃ ।

ತ್ವಂ ವಿಶ್ವಂ ತ್ವಂ ಹಂಸಃ ತ್ವಂ ಭಾನೋ ಪರಮಹಂಸಶ್ಚ

॥ 3 ॥

ಶ್ಲೋಕ 5

ಶಿವರೂಪಾತ್ ಜ್ಞಾನಮಹಂ ತ್ವತ್ತೋ ಮುಕ್ತಿಂ ಜನಾರ್ದನಾಕಾರಾತ್ ।

ಶಿಖಿರೂಪಾದೈಶ್ವರ್ಯಂ ತ್ವತ್ತಶ್ಚಾರೋಗ್ಯಮಿಚ್ಛಾಮಿ

॥ 4 ॥

ಶ್ಲೋಕ 6

ತ್ವಚಿ ದೋಷಾ ದೃಶಿ ದೋಷಾಃ ಹೃದಿ ದೋಷಾ ಯೇಽಖಿಲೇನ್ದ್ರಿಯಜದೋಷಾಃ ।

ತಾನ್ ಪೂಷಾ ಹತದೋಷಃ ಕಿಞ್ಚಿದ್ರೋಷಾಗ್ನಿನಾ ದಹತು

॥ 5 ॥

ಶ್ಲೋಕ 7

ಧರ್ಮಾರ್ಥಕಾಮಮೋಕ್ಷಪ್ರತಿರೋಧಾನುಗ್ರತಾಪವೇಗಕರಾನ್ ।

ಬನ್ದೀಕೃತೇನ್ದ್ರಿಯಗಣಾನ್ ಗದಾನ್ ವಿಖಣ್ಡಯತು ಚಣ್ಡಾಂಶುಃ

॥ 6 ॥

ಶ್ಲೋಕ 8

ಯೇನ ವಿನೇದಂ ತಿಮಿರಂ ಜಗದೇತ್ಯ ಗ್ರಸತಿ ಚರಮಚರಮಖಿಲಮ್ ।

ಧೃತಬೋಧಂ ತಂ ನಲಿನೀಭರ್ತಾರಂ ಹರ್ತಾರಮಾಪದಾಮೀಡೇ

॥ 7 ॥

ಶ್ಲೋಕ 9

ಯಸ್ಯ ಸಹಸ್ರಾಭೀಶೋರಭೀಶು ಲೇಶೋ ಹಿಮಾಂಶುಬಿಮ್ಬಗತಃ ।

ಭಾಸಯತಿ ನಕ್ತಮಖಿಲಂ ಭೇದಯತು ವಿಪದ್ಗಣಾನರುಣಃ

॥ 8 ॥

ಶ್ಲೋಕ 10

ತಿಮಿರಮಿವ ನೇತ್ರತಿಮಿರಂ ಪಟಲಮಿವಾಽಶೇಷರೋಗಪಟಲಂ ನಃ ।

ಕಾಶಮಿವಾಧಿನಿಕಾಯಂ ಕಾಲಪಿತಾ ರೋಗಯುಕ್ತತಾಂ ಹರತಾತ್

॥ 9 ॥

ಶ್ಲೋಕ 11

ವಾತಾಶ್ಮರೀಗದಾರ್ಶಸ್ತ್ವಗ್ದೋಷಮಹೋದರಪ್ರಮೇಹಾಂಶ್ಚ ।

ಗ್ರಹಣೀಭಗನ್ಧರಾಖ್ಯಾ ಮಹತೀಸ್ತ್ವಂ ಮೇ ರುಜೋ ಹಂಸಿ

॥ 10 ॥

ಶ್ಲೋಕ 12

ತ್ವಂ ಮಾತಾ ತ್ವಂ ಶರಣಂ ತ್ವಂ ಧಾತಾ ತ್ವಂ ಧನಂ ತ್ವಮಾಚಾರ್ಯಃ ।

ತ್ವಂ ತ್ರಾತಾ ತ್ವಂ ಹರ್ತಾ ವಿಪದಾಮರ್ಕ ಪ್ರಸೀದ ಮಮ ಭಾನೋ

॥ 11 ॥

ಶ್ಲೋಕ 13

ಇತ್ಯಾರ್ಯಾದ್ವಾದಶಕಂ ಸಾಮ್ಬಸ್ಯ ಪುರೋ ನಭಃಸ್ಥಲಾತ್ಪತಿತಮ್ ।

ಪಠತಾಂ ಭಾಗ್ಯಸಮೃದ್ಧಿಃ ಸಮಸ್ತರೋಗಕ್ಷಯಶ್ಚ ಸ್ಯಾತ್

॥ 12 ॥

ಶ್ಲೋಕ 14

ಇತಿ ಶ್ರೀಸಾಮ್ಬಕೃತದ್ವಾದಶಾರ್ಯಾಸೂರ್ಯಸ್ತುತಿಃ ।