శ్రీ వేద వ్యాస స్తుతి

శ్రీ వేద వ్యాస స్తుతి

శ్లోక 1

వ్యాసం వసిష్ఠనప్తారం శక్తేః పౌత్రమకల్మషమ్ ।

పరాశరాత్మజం వన్దే శుకతాతం తపోనిధిమ్ ॥ 1

వ్యాసాయ విష్ణురూపాయ వ్యాసరూపాయ విష్ణవే ।

నమో వై బ్రహ్మనిధయే వాసిష్ఠాయ నమో నమః ॥ 2

కృష్ణద్వైపాయనం వ్యాసం సర్వలోకహితే రతమ్ ।

వేదాబ్జభాస్కరం వన్దే శమాదినిలయం మునిమ్ ॥ 3

వేదవ్యాసం స్వాత్మరూపం సత్యసన్ధం పరాయణమ్ ।

శాన్తం జితేన్ద్రియక్రోధం సశిష్యం ప్రణమామ్యహమ్ ॥ 4

అచతుర్వదనో బ్రహ్మా ద్విబాహురపరో హరిః ।

అఫాలలోచనః శమ్భుః భగవాన్ బాదరాయణః ॥ 5

శఙ్కరం శఙ్కరాచార్యం కేశవం బాదరాయణమ్ ।

సూత్రభాష్యకృతౌ వన్దే భగవన్తౌ పునః పునః ॥ 6

బ్రహ్మసూత్రకృతే తస్మై వేదవ్యాసాయ వేధసే ।

జ్ఞానశక్త్యవతారాయ నమో భగవతో హరేః ॥ 7

వ్యాసః సమస్తధర్మాణాం వక్తా మునివరేడితః ।

చిరఞ్జీవీ దీర్ఘమాయుర్దదాతు జటిలో మమ ॥ 8

ప్రజ్ఞాబలేన తపసా చతుర్వేదవిభాజకః ।

కృష్ణద్వైపాయనో యశ్చ తస్మై శ్రీగురవే నమః ॥ 9

జటాధరస్తపోనిష్ఠః శుద్ధయోగో జితేన్ద్రియః ।

కృష్ణాజినధరః కృష్ణస్తస్మై శ్రీగురవే నమః ॥ 10

భారతస్య విధాతా చ ద్వితీయ ఇవ యో హరిః ।

హరిభక్తిపరో యశ్చ తస్మై శ్రీగురవే నమః ॥ 11

జయతి పరాశరసూనుః సత్యవతీ హృదయనన్దనో వ్యాసః ।

యస్యాస్య కమలగలితం భారతమమృతం జగత్పిబతి ॥ 12

వేదవిభాగవిధాత్రే విమలాయ బ్రహ్మణే నమో విశ్వదృశే ।

సకలధృతిహేతుసాధనసూత్రసృజే సత్యవత్యభివ్యక్తి మతే ॥ 13

వేదాన్తవాక్యకుసుమాని సమాని చారు

జగ్రన్థ సూత్రనిచయేన మనోహరేణ ।

మోక్షార్థిలోకహితకామనయా మునిర్యః

తం బాదరాయణమహం ప్రణమామి భక్త్యా ॥ 14

ఇతి శ్రీ వేదవ్యాస స్తుతిః ।