ಶ್ರೀ ವೇದ ವ್ಯಾಸ ಸ್ತುತಿ

ಶ್ರೀ ವೇದ ವ್ಯಾಸ ಸ್ತುತಿ

ಶ್ಲೋಕ 1

ವ್ಯಾಸಂ ವಸಿಷ್ಠನಪ್ತಾರಂ ಶಕ್ತೇಃ ಪೌತ್ರಮಕಲ್ಮಷಮ್ ।

ಪರಾಶರಾತ್ಮಜಂ ವನ್ದೇ ಶುಕತಾತಂ ತಪೋನಿಧಿಮ್ ॥ 1

ವ್ಯಾಸಾಯ ವಿಷ್ಣುರೂಪಾಯ ವ್ಯಾಸರೂಪಾಯ ವಿಷ್ಣವೇ ।

ನಮೋ ವೈ ಬ್ರಹ್ಮನಿಧಯೇ ವಾಸಿಷ್ಠಾಯ ನಮೋ ನಮಃ ॥ 2

ಕೃಷ್ಣದ್ವೈಪಾಯನಂ ವ್ಯಾಸಂ ಸರ್ವಲೋಕಹಿತೇ ರತಮ್ ।

ವೇದಾಬ್ಜಭಾಸ್ಕರಂ ವನ್ದೇ ಶಮಾದಿನಿಲಯಂ ಮುನಿಮ್ ॥ 3

ವೇದವ್ಯಾಸಂ ಸ್ವಾತ್ಮರೂಪಂ ಸತ್ಯಸನ್ಧಂ ಪರಾಯಣಮ್ ।

ಶಾನ್ತಂ ಜಿತೇನ್ದ್ರಿಯಕ್ರೋಧಂ ಸಶಿಷ್ಯಂ ಪ್ರಣಮಾಮ್ಯಹಮ್ ॥ 4

ಅಚತುರ್ವದನೋ ಬ್ರಹ್ಮಾ ದ್ವಿಬಾಹುರಪರೋ ಹರಿಃ ।

ಅಫಾಲಲೋಚನಃ ಶಮ್ಭುಃ ಭಗವಾನ್ ಬಾದರಾಯಣಃ ॥ 5

ಶಙ್ಕರಂ ಶಙ್ಕರಾಚಾರ್ಯಂ ಕೇಶವಂ ಬಾದರಾಯಣಮ್ ।

ಸೂತ್ರಭಾಷ್ಯಕೃತೌ ವನ್ದೇ ಭಗವನ್ತೌ ಪುನಃ ಪುನಃ ॥ 6

ಬ್ರಹ್ಮಸೂತ್ರಕೃತೇ ತಸ್ಮೈ ವೇದವ್ಯಾಸಾಯ ವೇಧಸೇ ।

ಜ್ಞಾನಶಕ್ತ್ಯವತಾರಾಯ ನಮೋ ಭಗವತೋ ಹರೇಃ ॥ 7

ವ್ಯಾಸಃ ಸಮಸ್ತಧರ್ಮಾಣಾಂ ವಕ್ತಾ ಮುನಿವರೇಡಿತಃ ।

ಚಿರಞ್ಜೀವೀ ದೀರ್ಘಮಾಯುರ್ದದಾತು ಜಟಿಲೋ ಮಮ ॥ 8

ಪ್ರಜ್ಞಾಬಲೇನ ತಪಸಾ ಚತುರ್ವೇದವಿಭಾಜಕಃ ।

ಕೃಷ್ಣದ್ವೈಪಾಯನೋ ಯಶ್ಚ ತಸ್ಮೈ ಶ್ರೀಗುರವೇ ನಮಃ ॥ 9

ಜಟಾಧರಸ್ತಪೋನಿಷ್ಠಃ ಶುದ್ಧಯೋಗೋ ಜಿತೇನ್ದ್ರಿಯಃ ।

ಕೃಷ್ಣಾಜಿನಧರಃ ಕೃಷ್ಣಸ್ತಸ್ಮೈ ಶ್ರೀಗುರವೇ ನಮಃ ॥ 10

ಭಾರತಸ್ಯ ವಿಧಾತಾ ಚ ದ್ವಿತೀಯ ಇವ ಯೋ ಹರಿಃ ।

ಹರಿಭಕ್ತಿಪರೋ ಯಶ್ಚ ತಸ್ಮೈ ಶ್ರೀಗುರವೇ ನಮಃ ॥ 11

ಜಯತಿ ಪರಾಶರಸೂನುಃ ಸತ್ಯವತೀ ಹೃದಯನನ್ದನೋ ವ್ಯಾಸಃ ।

ಯಸ್ಯಾಸ್ಯ ಕಮಲಗಲಿತಂ ಭಾರತಮಮೃತಂ ಜಗತ್ಪಿಬತಿ ॥ 12

ವೇದವಿಭಾಗವಿಧಾತ್ರೇ ವಿಮಲಾಯ ಬ್ರಹ್ಮಣೇ ನಮೋ ವಿಶ್ವದೃಶೇ ।

ಸಕಲಧೃತಿಹೇತುಸಾಧನಸೂತ್ರಸೃಜೇ ಸತ್ಯವತ್ಯಭಿವ್ಯಕ್ತಿ ಮತೇ ॥ 13

ವೇದಾನ್ತವಾಕ್ಯಕುಸುಮಾನಿ ಸಮಾನಿ ಚಾರು

ಜಗ್ರನ್ಥ ಸೂತ್ರನಿಚಯೇನ ಮನೋಹರೇಣ ।

ಮೋಕ್ಷಾರ್ಥಿಲೋಕಹಿತಕಾಮನಯಾ ಮುನಿರ್ಯಃ

ತಂ ಬಾದರಾಯಣಮಹಂ ಪ್ರಣಮಾಮಿ ಭಕ್ತ್ಯಾ ॥ 14

ಇತಿ ಶ್ರೀ ವೇದವ್ಯಾಸ ಸ್ತುತಿಃ ।