నటరాజ స్తోత్రం (పతఞ్జలి కృతమ్)

నటరాజ స్తోత్రం (పతఞ్జలి కృతమ్)

శ్లోక 1

అథ చరణశృఙ్గరహిత శ్రీ నటరాజ స్తోత్రం

సదఞ్చిత-ముదఞ్చిత నికుఞ్చిత పదం ఝలఝలం-చలిత మఞ్జు కటకమ్ ।

పతఞ్జలి దృగఞ్జన-మనఞ్జన-మచఞ్చలపదం జనన భఞ్జన కరమ్ ।

కదమ్బరుచిమమ్బరవసం పరమమమ్బుద కదమ్బ కవిడమ్బక గలమ్

చిదమ్బుధి మణిం బుధ హృదమ్బుజ రవిం పర చిదమ్బర నటం హృది భజ

శ్లోక 2

హరం త్రిపుర భఞ్జన-మనన్తకృతకఙ్కణ-మఖణ్డదయ-మన్తరహితం

విరిఞ్చిసురసంహతిపురన్ధర విచిన్తితపదం తరుణచన్ద్రమకుటమ్ ।

పరం పద విఖణ్డితయమం భసిత మణ్డితతనుం మదనవఞ్చన పరం

చిరన్తనమముం ప్రణవసఞ్చితనిధిం పర చిదమ్బర నటం హృది భజ

॥ 1 ॥

శ్లోక 3

అవన్తమఖిలం జగదభఙ్గ గుణతుఙ్గమమతం ధృతవిధుం సురసరిత్-

తరఙ్గ నికురుమ్బ ధృతి లమ్పట జటం శమనదమ్భసుహరం భవహరమ్ ।

శివం దశదిగన్తర విజృమ్భితకరం కరలసన్మృగశిశుం పశుపతిం

హరం శశిధనఞ్జయపతఙ్గనయనం పర చిదమ్బర నటం హృది భజ

॥ 2 ॥

శ్లోక 4

అనన్తనవరత్నవిలసత్కటకకిఙ్కిణిఝలం ఝలఝలం ఝలరవం

ముకున్దవిధి హస్తగతమద్దల లయధ్వనిధిమిద్ధిమిత నర్తన పదమ్ ।

శకున్తరథ బర్హిరథ నన్దిముఖ భృఙ్గిరిటిసఙ్ఘనికటం భయహరమ్

సనన్ద సనక ప్రముఖ వన్దిత పదం పర చిదమ్బర నటం హృది భజ

॥ 3 ॥

శ్లోక 5

అనన్తమహసం త్రిదశవన్ద్య చరణం ముని హృదన్తర వసన్తమమలమ్

కబన్ధ వియదిన్ద్వవని గన్ధవహ వహ్నిమఖ బన్ధురవిమఞ్జు వపుషమ్ ।

అనన్తవిభవం త్రిజగదన్తర మణిం త్రినయనం త్రిపుర ఖణ్డన పరమ్

సనన్ద ముని వన్దిత పదం సకరుణం పర చిదమ్బర నటం హృది భజ

॥ 4 ॥

శ్లోక 6

అచిన్త్యమలివృన్ద రుచి బన్ధురగలం కురిత కున్ద నికురుమ్బ ధవలమ్

ముకున్ద సుర వృన్ద బల హన్తృ కృత వన్దన లసన్తమహికుణ్డల ధరమ్ ।

అకమ్పమనుకమ్పిత రతిం సుజన మఙ్గలనిధిం గజహరం పశుపతిమ్

ధనఞ్జయ నుతం ప్రణత రఞ్జనపరం పర చిదమ్బర నటం హృది భజ

॥ 5 ॥

శ్లోక 7

పరం సురవరం పురహరం పశుపతిం జనిత దన్తిముఖ షణ్ముఖమముం

మృడం కనక పిఙ్గల జటం సనక పఙ్కజ రవిం సుమనసం హిమరుచిమ్ ।

అసఙ్ఘమనసం జలధి జన్మగరలం కవలయన్త మతులం గుణనిధిమ్

సనన్ద వరదం శమితమిన్దు వదనం పర చిదమ్బర నటం హృది భజ

॥ 6 ॥

శ్లోక 8

అజం క్షితిరథం భుజగపుఙ్గవగుణం కనక శృఙ్గి ధనుషం కరలసత్

కురఙ్గ పృథు టఙ్క పరశుం రుచిర కుఙ్కుమ రుచిం డమరుకం చ దధతమ్ ।

ముకున్ద విశిఖం నమదవన్ధ్య ఫలదం నిగమ వృన్ద తురగం నిరుపమం

స చణ్డికమముం ఝటితి సంహృతపురం పర చిదమ్బర నటం హృది భజ

॥ 7 ॥

శ్లోక 9

అనఙ్గపరిపన్థినమజం క్షితి ధురన్ధరమలం కరుణయన్తమఖిలం

జ్వలన్తమనలం దధతమన్తకరిపుం సతతమిన్ద్ర సురవన్దితపదమ్ ।

ఉదఞ్చదరవిన్దకుల బన్ధుశత బిమ్బరుచి సంహతి సుగన్ధి వపుషం

పతఞ్జలి నుతం ప్రణవ పఞ్జర శుకం పర చిదమ్బర నటం హృది భజ

॥ 8 ॥

శ్లోక 10

ఇతి స్తవమముం భుజగపుఙ్గవ కృతం ప్రతిదినం పఠతి యః కృతముఖః

సదః ప్రభుపద ద్వితయదర్శనపదం సులలితం చరణ శృఙ్గ రహితమ్ ।

సరః ప్రభవ సమ్భవ హరిత్పతి హరిప్రముఖ దివ్యనుత శఙ్కరపదం

స గచ్ఛతి పరం న తు జనుర్జలనిధిం పరమదుఃఖజనకం దురితదమ్

॥ 9 ॥

శ్లోక 11

ఇతి శ్రీ పతఞ్జలిముని ప్రణీతం చరణశృఙ్గరహిత నటరాజ స్తోత్రం సమ్పూర్ణమ్ ॥