നടരാജ സ്തോത്രം (പതഞ്ജലി കൃതമ്)

നടരാജ സ്തോത്രം (പതഞ്ജലി കൃതമ്)

ശ്ലോക 1

അഥ ചരണശൃങ്ഗരഹിത ശ്രീ നടരാജ സ്തോത്രം

സദഞ്ചിത-മുദഞ്ചിത നികുഞ്ചിത പദം ഝലഝലം-ചലിത മഞ്ജു കടകമ് ।

പതഞ്ജലി ദൃഗഞ്ജന-മനഞ്ജന-മചഞ്ചലപദം ജനന ഭഞ്ജന കരമ് ।

കദമ്ബരുചിമമ്ബരവസം പരമമമ്ബുദ കദമ്ബ കവിഡമ്ബക ഗലമ്

ചിദമ്ബുധി മണിം ബുധ ഹൃദമ്ബുജ രവിം പര ചിദമ്ബര നടം ഹൃദി ഭജ

ശ്ലോക 2

ഹരം ത്രിപുര ഭഞ്ജന-മനന്തകൃതകങ്കണ-മഖണ്ഡദയ-മന്തരഹിതം

വിരിഞ്ചിസുരസംഹതിപുരന്ധര വിചിന്തിതപദം തരുണചന്ദ്രമകുടമ് ।

പരം പദ വിഖണ്ഡിതയമം ഭസിത മണ്ഡിതതനും മദനവഞ്ചന പരം

ചിരന്തനമമും പ്രണവസഞ്ചിതനിധിം പര ചിദമ്ബര നടം ഹൃദി ഭജ

॥ 1 ॥

ശ്ലോക 3

അവന്തമഖിലം ജഗദഭങ്ഗ ഗുണതുങ്ഗമമതം ധൃതവിധും സുരസരിത്-

തരങ്ഗ നികുരുമ്ബ ധൃതി ലമ്പട ജടം ശമനദമ്ഭസുഹരം ഭവഹരമ് ।

ശിവം ദശദിഗന്തര വിജൃമ്ഭിതകരം കരലസന്മൃഗശിശും പശുപതിം

ഹരം ശശിധനഞ്ജയപതങ്ഗനയനം പര ചിദമ്ബര നടം ഹൃദി ഭജ

॥ 2 ॥

ശ്ലോക 4

അനന്തനവരത്നവിലസത്കടകകിങ്കിണിഝലം ഝലഝലം ഝലരവം

മുകുന്ദവിധി ഹസ്തഗതമദ്ദല ലയധ്വനിധിമിദ്ധിമിത നര്തന പദമ് ।

ശകുന്തരഥ ബര്ഹിരഥ നന്ദിമുഖ ഭൃങ്ഗിരിടിസങ്ഘനികടം ഭയഹരമ്

സനന്ദ സനക പ്രമുഖ വന്ദിത പദം പര ചിദമ്ബര നടം ഹൃദി ഭജ

॥ 3 ॥

ശ്ലോക 5

അനന്തമഹസം ത്രിദശവന്ദ്യ ചരണം മുനി ഹൃദന്തര വസന്തമമലമ്

കബന്ധ വിയദിന്ദ്വവനി ഗന്ധവഹ വഹ്നിമഖ ബന്ധുരവിമഞ്ജു വപുഷമ് ।

അനന്തവിഭവം ത്രിജഗദന്തര മണിം ത്രിനയനം ത്രിപുര ഖണ്ഡന പരമ്

സനന്ദ മുനി വന്ദിത പദം സകരുണം പര ചിദമ്ബര നടം ഹൃദി ഭജ

॥ 4 ॥

ശ്ലോക 6

അചിന്ത്യമലിവൃന്ദ രുചി ബന്ധുരഗലം കുരിത കുന്ദ നികുരുമ്ബ ധവലമ്

മുകുന്ദ സുര വൃന്ദ ബല ഹന്തൃ കൃത വന്ദന ലസന്തമഹികുണ്ഡല ധരമ് ।

അകമ്പമനുകമ്പിത രതിം സുജന മങ്ഗലനിധിം ഗജഹരം പശുപതിമ്

ധനഞ്ജയ നുതം പ്രണത രഞ്ജനപരം പര ചിദമ്ബര നടം ഹൃദി ഭജ

॥ 5 ॥

ശ്ലോക 7

പരം സുരവരം പുരഹരം പശുപതിം ജനിത ദന്തിമുഖ ഷണ്മുഖമമും

മൃഡം കനക പിങ്ഗല ജടം സനക പങ്കജ രവിം സുമനസം ഹിമരുചിമ് ।

അസങ്ഘമനസം ജലധി ജന്മഗരലം കവലയന്ത മതുലം ഗുണനിധിമ്

സനന്ദ വരദം ശമിതമിന്ദു വദനം പര ചിദമ്ബര നടം ഹൃദി ഭജ

॥ 6 ॥

ശ്ലോക 8

അജം ക്ഷിതിരഥം ഭുജഗപുങ്ഗവഗുണം കനക ശൃങ്ഗി ധനുഷം കരലസത്

കുരങ്ഗ പൃഥു ടങ്ക പരശും രുചിര കുങ്കുമ രുചിം ഡമരുകം ച ദധതമ് ।

മുകുന്ദ വിശിഖം നമദവന്ധ്യ ഫലദം നിഗമ വൃന്ദ തുരഗം നിരുപമം

സ ചണ്ഡികമമും ഝടിതി സംഹൃതപുരം പര ചിദമ്ബര നടം ഹൃദി ഭജ

॥ 7 ॥

ശ്ലോക 9

അനങ്ഗപരിപന്ഥിനമജം ക്ഷിതി ധുരന്ധരമലം കരുണയന്തമഖിലം

ജ്വലന്തമനലം ദധതമന്തകരിപും സതതമിന്ദ്ര സുരവന്ദിതപദമ് ।

ഉദഞ്ചദരവിന്ദകുല ബന്ധുശത ബിമ്ബരുചി സംഹതി സുഗന്ധി വപുഷം

പതഞ്ജലി നുതം പ്രണവ പഞ്ജര ശുകം പര ചിദമ്ബര നടം ഹൃദി ഭജ

॥ 8 ॥

ശ്ലോക 10

ഇതി സ്തവമമും ഭുജഗപുങ്ഗവ കൃതം പ്രതിദിനം പഠതി യഃ കൃതമുഖഃ

സദഃ പ്രഭുപദ ദ്വിതയദര്ശനപദം സുലലിതം ചരണ ശൃങ്ഗ രഹിതമ് ।

സരഃ പ്രഭവ സമ്ഭവ ഹരിത്പതി ഹരിപ്രമുഖ ദിവ്യനുത ശങ്കരപദം

സ ഗച്ഛതി പരം ന തു ജനുര്ജലനിധിം പരമദുഃഖജനകം ദുരിതദമ്

॥ 9 ॥

ശ്ലോക 11

ഇതി ശ്രീ പതഞ്ജലിമുനി പ്രണീതം ചരണശൃങ്ഗരഹിത നടരാജ സ്തോത്രം സമ്പൂര്ണമ് ॥