Sri Narasimha Mantra Rajapada Stotram

श्री नृसिंह मन्त्रराजपाद स्तोत्रम्

श्लोक 1

पार्वत्युवाच ।

मन्त्राणां परमं मन्त्रं गुह्यानां गुह्यमेव च ।

ब्रूहि मे नारसिंहस्य तत्त्वं मन्त्रस्य दुर्लभम् ॥

शङ्कर उवाच ।

वृत्तोत्फुल्लविशालाक्षं विपक्षक्षयदीक्षितम् ।

निनादत्रस्तविश्वाण्डं विष्णुमुग्रं नमाम्यहम्

श्लोक 2

सर्वैरवध्यतां प्राप्तं सबलौघं दितेः सुतम् ।

नखाग्रैः शकलीचक्रे यस्तं वीरं नमाम्यहम्

॥ 1 ॥

श्लोक 3

पदावष्टब्धपातालं मूर्धाऽऽविष्टत्रिविष्टपम् ।

भुजप्रविष्टाष्टदिशं महाविष्णुं नमाम्यहम्

॥ 2 ॥

श्लोक 4

ज्योतींष्यर्केन्दुनक्षत्रज्वलनादीन्यनुक्रमात् ।

ज्वलन्ति तेजसा यस्य तं ज्वलन्तं नमाम्यहम्

॥ 3 ॥

श्लोक 5

सर्वेन्द्रियैरपि विना सर्वं सर्वत्र सर्वदा ।

यो जानाति नमाम्याद्यं तमहं सर्वतोमुखम्

॥ 4 ॥

श्लोक 6

नरवत् सिंहवच्चैव यस्य रूपं महात्मनः ।

महासटं महादंष्ट्रं तं नृसिंहं नमाम्यहम्

॥ 5 ॥

श्लोक 7

यन्नामस्मरणाद्भीताः भूतवेतालराक्षसाः ।

रोगाद्याश्च प्रणश्यन्ति भीषणं तं नमाम्यहम्

॥ 6 ॥

श्लोक 8

सर्वेऽपि यं समाश्रित्य सकलं भद्रमश्नुते ।

श्रिया च भद्रया जुष्टो यस्तं भद्रं नमाम्यहम्

॥ 7 ॥

श्लोक 9

साक्षात् स्वकाले सम्प्राप्तं मृत्युं शत्रुगणान्वितम् ।

भक्तानां नाशयेद्यस्तु मृत्युमृत्युं नमाम्यहम्

॥ 8 ॥

श्लोक 10

नमस्कारात्मकं यस्मै विधायात्मनिवेदनम् ।

त्यक्तदुःखोऽखिलान् कामानश्नन्तं तं नमाम्यहम्

॥ 9 ॥

श्लोक 11

दासभूताः स्वतः सर्वे ह्यात्मानः परमात्मनः ।

अतोऽहमपि ते दासः इति मत्वा नमाम्यहम्

॥ 10 ॥

श्लोक 12

शङ्करेणादरात् प्रोक्तं पदानां तत्त्वमुत्तमम् ।

त्रिसन्ध्यं यः पठेत्तस्य श्रीविद्याऽऽयुश्च वर्धते

॥ 11 ॥

श्लोक 13

इति श्रीशङ्करकृत श्री नृसिंह मन्त्रराजपद स्तोत्रम् ।