ಶ್ರೀ ಮೀನಾಕ್ಷೀ ಸ್ತೋತ್ರಮ್

ಶ್ರೀ ಮೀನಾಕ್ಷೀ ಸ್ತೋತ್ರಮ್

ಶ್ಲೋಕ 1

ಶ್ರೀವಿದ್ಯೇ ಶಿವವಾಮಭಾಗನಿಲಯೇ ಶ್ರೀರಾಜರಾಜಾರ್ಚಿತೇ

ಶ್ರೀನಾಥಾದಿಗುರುಸ್ವರೂಪವಿಭವೇ ಚಿನ್ತಾಮಣೀಪೀಠಿಕೇ ।

ಶ್ರೀವಾಣೀಗಿರಿಜಾನುತಾಙ್ಘ್ರಿಕಮಲೇ ಶ್ರೀಶಾಮ್ಭವಿ ಶ್ರೀಶಿವೇ

ಮಧ್ಯಾಹ್ನೇ ಮಲಯಧ್ವಜಾಧಿಪಸುತೇ ಮಾಂ ಪಾಹಿ ಮೀನಾಮ್ಬಿಕೇ

ಶ್ಲೋಕ 2

ಚಕ್ರಸ್ಥೇಽಚಪಲೇ ಚರಾಚರಜಗನ್ನಾಥೇ ಜಗತ್ಪೂಜಿತೇ

ಆರ್ತಾಲೀವರದೇ ನತಾಭಯಕರೇ ವಕ್ಷೋಜಭಾರಾನ್ವಿತೇ ।

ವಿದ್ಯೇ ವೇದಕಲಾಪಮೌಲಿವಿದಿತೇ ವಿದ್ಯುಲ್ಲತಾವಿಗ್ರಹೇ

ಮಾತಃ ಪೂರ್ಣಸುಧಾರಸಾರ್ದ್ರಹೃದಯೇ ಮಾಂ ಪಾಹಿ ಮೀನಾಮ್ಬಿಕೇ

॥ 1 ॥

ಶ್ಲೋಕ 3

ಕೋಟೀರಾಙ್ಗದರತ್ನಕುಣ್ಡಲಧರೇ ಕೋದಣ್ಡಬಾಣಾಞ್ಚಿತೇ

ಕೋಕಾಕಾರಕುಚದ್ವಯೋಪರಿಲಸತ್ಪ್ರಾಲಮ್ಬಹಾರಾಞ್ಚಿತೇ ।

ಶಿಞ್ಜನ್ನೂಪುರಪಾದಸಾರಸಮಣೀಶ್ರೀಪಾದುಕಾಲಙ್ಕೃತೇ

ಮದ್ದಾರಿದ್ರ್ಯಭುಜಙ್ಗಗಾರುಡಖಗೇ ಮಾಂ ಪಾಹಿ ಮೀನಾಮ್ಬಿಕೇ

॥ 2 ॥

ಶ್ಲೋಕ 4

ಬ್ರಹ್ಮೇಶಾಚ್ಯುತಗೀಯಮಾನಚರಿತೇ ಪ್ರೇತಾಸನಾನ್ತಸ್ಥಿತೇ

ಪಾಶೋದಙ್ಕುಶಚಾಪಬಾಣಕಲಿತೇ ಬಾಲೇನ್ದುಚೂಡಾಞ್ಚಿತೇ ।

ಬಾಲೇ ಬಾಲಕುರಙ್ಗಲೋಲನಯನೇ ಬಾಲಾರ್ಕಕೋಟ್ಯುಜ್ಜ್ವಲೇ

ಮುದ್ರಾರಾಧಿತದೈವತೇ ಮುನಿಸುತೇ ಮಾಂ ಪಾಹಿ ಮೀನಾಮ್ಬಿಕೇ

॥ 3 ॥

ಶ್ಲೋಕ 5

ಗನ್ಧರ್ವಾಮರಯಕ್ಷಪನ್ನಗನುತೇ ಗಙ್ಗಾಧರಾಲಿಙ್ಗಿತೇ

ಗಾಯತ್ರೀಗರುಡಾಸನೇ ಕಮಲಜೇ ಸುಶ್ಯಾಮಲೇ ಸುಸ್ಥಿತೇ ।

ಖಾತೀತೇ ಖಲದಾರುಪಾವಕಶಿಖೇ ಖದ್ಯೋತಕೋಟ್ಯುಜ್ಜ್ವಲೇ

ಮನ್ತ್ರಾರಾಧಿತದೈವತೇ ಮುನಿಸುತೇ ಮಾಂ ಪಾಹೀ ಮೀನಾಮ್ಬಿಕೇ

॥ 4 ॥

ಶ್ಲೋಕ 6

ನಾದೇ ನಾರದತುಮ್ಬುರಾದ್ಯವಿನುತೇ ನಾದಾನ್ತನಾದಾತ್ಮಿಕೇ

ನಿತ್ಯೇ ನೀಲಲತಾತ್ಮಿಕೇ ನಿರುಪಮೇ ನೀವಾರಶೂಕೋಪಮೇ ।

ಕಾನ್ತೇ ಕಾಮಕಲೇ ಕದಮ್ಬನಿಲಯೇ ಕಾಮೇಶ್ವರಾಙ್ಕಸ್ಥಿತೇ

ಮದ್ವಿದ್ಯೇ ಮದಭೀಷ್ಟಕಲ್ಪಲತಿಕೇ ಮಾಂ ಪಾಹಿ ಮೀನಾಮ್ಬಿಕೇ

॥ 5 ॥

ಶ್ಲೋಕ 7

ವೀಣಾನಾದನಿಮೀಲಿತಾರ್ಧನಯನೇ ವಿಸ್ರಸ್ತಚೂಲೀಭರೇ

ತಾಮ್ಬೂಲಾರುಣಪಲ್ಲವಾಧರಯುತೇ ತಾಟಙ್ಕಹಾರಾನ್ವಿತೇ ।

ಶ್ಯಾಮೇ ಚನ್ದ್ರಕಲಾವತಂಸಕಲಿತೇ ಕಸ್ತೂರಿಕಾಫಾಲಿಕೇ

ಪೂರ್ಣೇ ಪೂರ್ಣಕಲಾಭಿರಾಮವದನೇ ಮಾಂ ಪಾಹಿ ಮೀನಾಮ್ಬಿಕೇ

॥ 6 ॥

ಶ್ಲೋಕ 8

ಶಬ್ದಬ್ರಹ್ಮಮಯೀ ಚರಾಚರಮಯೀ ಜ್ಯೋತಿರ್ಮಯೀ ವಾಙ್ಮಯೀ

ನಿತ್ಯಾನನ್ದಮಯೀ ನಿರಞ್ಜನಮಯೀ ತತ್ತ್ವಮ್ಮಯೀ ಚಿನ್ಮಯೀ ।

ತತ್ತ್ವಾತೀತಮಯೀ ಪರಾತ್ಪರಮಯೀ ಮಾಯಾಮಯೀ ಶ್ರೀಮಯೀ

ಸರ್ವೈಶ್ವರ್ಯಮಯೀ ಸದಾಶಿವಮಯೀ ಮಾಂ ಪಾಹಿ ಮೀನಾಮ್ಬಿಕೇ

॥ 7 ॥

ಶ್ಲೋಕ 9

ಇತಿ ಶ್ರೀಮತ್ಪರಮಹಂಸಪರಿವ್ರಾಜಕಾಚಾರ್ಯಸ್ಯ ಶ್ರೀಗೋವಿನ್ದಭಗವತ್ಪೂಜ್ಯಪಾದಶಿಷ್ಯಸ್ಯ ಶ್ರೀಮಚ್ಛಙ್ಕರಭಗವತಃ ಕೃತೌ ಮೀನಾಕ್ಷೀ ಸ್ತೋತ್ರಮ್ ।