Sri Meenakshi Stotram

श्री मीनाक्षी स्तोत्रम्

श्लोक 1

श्रीविद्ये शिववामभागनिलये श्रीराजराजार्चिते

श्रीनाथादिगुरुस्वरूपविभवे चिन्तामणीपीठिके ।

श्रीवाणीगिरिजानुताङ्घ्रिकमले श्रीशाम्भवि श्रीशिवे

मध्याह्ने मलयध्वजाधिपसुते मां पाहि मीनाम्बिके

श्लोक 2

चक्रस्थेऽचपले चराचरजगन्नाथे जगत्पूजिते

आर्तालीवरदे नताभयकरे वक्षोजभारान्विते ।

विद्ये वेदकलापमौलिविदिते विद्युल्लताविग्रहे

मातः पूर्णसुधारसार्द्रहृदये मां पाहि मीनाम्बिके

॥ 1 ॥

श्लोक 3

कोटीराङ्गदरत्नकुण्डलधरे कोदण्डबाणाञ्चिते

कोकाकारकुचद्वयोपरिलसत्प्रालम्बहाराञ्चिते ।

शिञ्जन्नूपुरपादसारसमणीश्रीपादुकालङ्कृते

मद्दारिद्र्यभुजङ्गगारुडखगे मां पाहि मीनाम्बिके

॥ 2 ॥

श्लोक 4

ब्रह्मेशाच्युतगीयमानचरिते प्रेतासनान्तस्थिते

पाशोदङ्कुशचापबाणकलिते बालेन्दुचूडाञ्चिते ।

बाले बालकुरङ्गलोलनयने बालार्ककोट्युज्ज्वले

मुद्राराधितदैवते मुनिसुते मां पाहि मीनाम्बिके

॥ 3 ॥

श्लोक 5

गन्धर्वामरयक्षपन्नगनुते गङ्गाधरालिङ्गिते

गायत्रीगरुडासने कमलजे सुश्यामले सुस्थिते ।

खातीते खलदारुपावकशिखे खद्योतकोट्युज्ज्वले

मन्त्राराधितदैवते मुनिसुते मां पाही मीनाम्बिके

॥ 4 ॥

श्लोक 6

नादे नारदतुम्बुराद्यविनुते नादान्तनादात्मिके

नित्ये नीललतात्मिके निरुपमे नीवारशूकोपमे ।

कान्ते कामकले कदम्बनिलये कामेश्वराङ्कस्थिते

मद्विद्ये मदभीष्टकल्पलतिके मां पाहि मीनाम्बिके

॥ 5 ॥

श्लोक 7

वीणानादनिमीलितार्धनयने विस्रस्तचूलीभरे

ताम्बूलारुणपल्लवाधरयुते ताटङ्कहारान्विते ।

श्यामे चन्द्रकलावतंसकलिते कस्तूरिकाफालिके

पूर्णे पूर्णकलाभिरामवदने मां पाहि मीनाम्बिके

॥ 6 ॥

श्लोक 8

शब्दब्रह्ममयी चराचरमयी ज्योतिर्मयी वाङ्मयी

नित्यानन्दमयी निरञ्जनमयी तत्त्वम्मयी चिन्मयी ।

तत्त्वातीतमयी परात्परमयी मायामयी श्रीमयी

सर्वैश्वर्यमयी सदाशिवमयी मां पाहि मीनाम्बिके

॥ 7 ॥

श्लोक 9

इति श्रीमत्परमहंसपरिव्राजकाचार्यस्य श्रीगोविन्दभगवत्पूज्यपादशिष्यस्य श्रीमच्छङ्करभगवतः कृतौ मीनाक्षी स्तोत्रम् ।