ಶ್ರೀ ಲಕ್ಷ್ಮೀ ಹೃದಯ ಸ್ತೋತ್ರಮ್

ಶ್ರೀ ಲಕ್ಷ್ಮೀ ಹೃದಯ ಸ್ತೋತ್ರಮ್

ಶ್ಲೋಕ 1

ಅಸ್ಯ ಶ್ರೀ ಮಹಾಲಕ್ಷ್ಮೀಹೃದಯಸ್ತೋತ್ರ ಮಹಾಮನ್ತ್ರಸ್ಯ ಭಾರ್ಗವ ಋಷಿಃ, ಅನುಷ್ಟುಪಾದೀನಿ ನಾನಾಛನ್ದಾಂಸಿ, ಆದ್ಯಾದಿ ಶ್ರೀಮಹಾಲಕ್ಷ್ಮೀರ್ದೇವತಾ, ಶ್ರೀಂ ಬೀಜಂ, ಹ್ರೀಂ ಶಕ್ತಿಃ, ಐಂ ಕೀಲಕಂ, ಆದ್ಯಾದಿಮಹಾಲಕ್ಷ್ಮೀ ಪ್ರಸಾದಸಿದ್ಧ್ಯರ್ಥಂ ಜಪೇ ವಿನಿಯೋಗಃ ॥

ಋಷ್ಯಾದಿನ್ಯಾಸಃ –

ಓಂ ಭಾರ್ಗವೃಷಯೇ ನಮಃ ಶಿರಸಿ ।

ಓಂ ಅನುಷ್ಟುಪಾದಿನಾನಾಛನ್ದೋಭ್ಯೋ ನಮೋ ಮುಖೇ ।

ಓಂ ಆದ್ಯಾದಿಶ್ರೀಮಹಾಲಕ್ಷ್ಮೀ ದೇವತಾಯೈ ನಮೋ ಹೃದಯೇ ।

ಓಂ ಶ್ರೀಂ ಬೀಜಾಯ ನಮೋ ಗುಹ್ಯೇ ।

ಓಂ ಹ್ರೀಂ ಶಕ್ತಯೇ ನಮಃ ಪಾದಯೋಃ ।

ಓಂ ಐಂ ಕೀಲಕಾಯ ನಮೋ ನಾಭೌ ।

ಓಂ ವಿನಿಯೋಗಾಯ ನಮಃ ಸರ್ವಾಙ್ಗೇ ।

ಕರನ್ಯಾಸಃ –

ಓಂ ಶ್ರೀಂ ಅಙ್ಗುಷ್ಠಾಭ್ಯಾಂ ನಮಃ ।

ಓಂ ಹ್ರೀಂ ತರ್ಜನೀಭ್ಯಾಂ ನಮಃ ।

ಓಂ ಐಂ ಮಧ್ಯಮಾಭ್ಯಾಂ ನಮಃ ।

ಓಂ ಶ್ರೀಂ ಅನಾಮಿಕಾಭ್ಯಾಂ ನಮಃ ।

ಓಂ ಹ್ರೀಂ ಕನಿಷ್ಠಿಕಾಭ್ಯಾಂ ನಮಃ ।

ಓಂ ಐಂ ಕರತಲ ಕರಪೃಷ್ಠಾಭ್ಯಾಂ ನಮಃ ।

ಅಙ್ಗನ್ಯಾಸಃ –

ಓಂ ಶ್ರೀಂ ಹೃದಯಾಯ ನಮಃ ।

ಓಂ ಹ್ರೀಂ ಶಿರಸೇ ಸ್ವಾಹಾ ।

ಓಂ ಐಂ ಶಿಖಾಯೈ ವಷಟ್ ।

ಓಂ ಶ್ರೀಂ ಕವಚಾಯ ಹುಮ್ ।

ಓಂ ಹ್ರೀಂ ನೇತ್ರತ್ರಯಾಯ ವೌಷಟ್ ।

ಓಂ ಐಂ ಅಸ್ತ್ರಾಯ ಫಟ್ ।

ಓಂ ಶ್ರೀಂ ಹ್ರೀಂ ಐಂ ಇತಿ ದಿಗ್ಬನ್ಧಃ ।

ಅಥ ಧ್ಯಾನಮ್ ।

ಹಸ್ತದ್ವಯೇನ ಕಮಲೇ ಧಾರಯನ್ತೀಂ ಸ್ವಲೀಲಯಾ ।

ಹಾರನೂಪುರಸಂಯುಕ್ತಾಂ ಲಕ್ಷ್ಮೀಂ ದೇವೀಂ ವಿಚಿನ್ತಯೇ ॥

ಕೌಶೇಯಪೀತವಸನಾಮರವಿನ್ದನೇತ್ರಾಂ

ಪದ್ಮದ್ವಯಾಭಯವರೋದ್ಯತಪದ್ಮಹಸ್ತಾಮ್ ।

ಉದ್ಯಚ್ಛತಾರ್ಕಸದೃಶೀಂ ಪರಮಾಙ್ಕಸಂಸ್ಥಾಂ

ಧ್ಯಾಯೇದ್ವಿಧೀಶನತಪಾದಯುಗಾಂ ಜನಿತ್ರೀಮ್ ॥

ಪೀತವಸ್ತ್ರಾಂ ಸುವರ್ಣಾಙ್ಗೀಂ ಪದ್ಮಹಸ್ತದ್ವಾಯಾನ್ವಿತಾಮ್ ।

ಲಕ್ಷ್ಮೀಂ ಧ್ಯಾತ್ವೇತಿ ಮನ್ತ್ರೇಣ ಸ ಭವೇತ್ಪೃಥಿವೀಪತಿಃ ॥

ಮಾತುಲುಙ್ಗಂ ಗದಾಂ ಖೇಟಂ ಪಾಣೌ ಪಾತ್ರಂ ಚ ಬಿಭ್ರತೀ ।

ನಾಗಂ ಲಿಙ್ಗಂ ಚ ಯೋನಿಂ ಚ ಬಿಭ್ರತೀಂ ಚೈವ ಮೂರ್ಧನಿ ॥

[ ಇತಿ ಧ್ಯಾತ್ವಾ ಮಾನಸೋಪಚಾರೈಃ ಸಮ್ಪೂಜ್ಯ ।

ಶಙ್ಖಚಕ್ರಗದಾಹಸ್ತೇ ಶುಭ್ರವರ್ಣೇ ಸುವಾಸಿನೀ ।

ಮಮ ದೇಹಿ ವರಂ ಲಕ್ಷ್ಮೀಃ ಸರ್ವಸಿದ್ಧಿಪ್ರದಾಯಿನೀ ।

ಇತಿ ಸಮ್ಪ್ರಾರ್ಥ್ಯ ಓಂ ಶ್ರೀಂ ಹ್ರೀಂ ಐಂ ಮಹಾಲಕ್ಷ್ಮ್ಯೈ ಕಮಲಧಾರಿಣ್ಯೈ ಸಿಂಹವಾಹಿನ್ಯೈ ಸ್ವಾಹಾ ಇತಿ ಮನ್ತ್ರಂ ಜಪ್ತ್ವಾ ಪುನಃ ಪೂರ್ವವದ್ಧೃದಯಾದಿ ಷಡಙ್ಗನ್ಯಾಸಂ ಕೃತ್ವಾ ಸ್ತೋತ್ರಂ ಪಠೇತ್ । ]

ಸ್ತೋತ್ರಮ್ ।

ವನ್ದೇ ಲಕ್ಷ್ಮೀಂ ಪರಮಶಿವಮಯೀಂ ಶುದ್ಧಜಾಮ್ಬೂನದಾಭಾಂ

ತೇಜೋರೂಪಾಂ ಕನಕವಸನಾಂ ಸರ್ವಭೂಷೋಜ್ಜ್ವಲಾಙ್ಗೀಮ್ ।

ಬೀಜಾಪೂರಂ ಕನಕಕಲಶಂ ಹೇಮಪದ್ಮಂ ದಧಾನಾ-

-ಮಾದ್ಯಾಂ ಶಕ್ತಿಂ ಸಕಲಜನನೀಂ ವಿಷ್ಣುವಾಮಾಙ್ಕಸಂಸ್ಥಾಮ್

ಶ್ಲೋಕ 2

ಶ್ರೀಮತ್ಸೌಭಾಗ್ಯಜನನೀಂ ಸ್ತೌಮಿ ಲಕ್ಷ್ಮೀಂ ಸನಾತನೀಮ್ ।

ಸರ್ವಕಾಮಫಲಾವಾಪ್ತಿಸಾಧನೈಕಸುಖಾವಹಾಮ್

॥ 1 ॥

ಶ್ಲೋಕ 3

ಸ್ಮರಾಮಿ ನಿತ್ಯಂ ದೇವೇಶಿ ತ್ವಯಾ ಪ್ರೇರಿತಮಾನಸಃ ।

ತ್ವದಾಜ್ಞಾಂ ಶಿರಸಾ ಧೃತ್ವಾ ಭಜಾಮಿ ಪರಮೇಶ್ವರೀಮ್

॥ 2 ॥

ಶ್ಲೋಕ 4

ಸಮಸ್ತಸಮ್ಪತ್ಸುಖದಾಂ ಮಹಾಶ್ರಿಯಂ

ಸಮಸ್ತಸೌಭಾಗ್ಯಕರೀಂ ಮಹಾಶ್ರಿಯಮ್ ।

ಸಮಸ್ತಕಲ್ಯಾಣಕರೀಂ ಮಹಾಶ್ರಿಯಂ

ಭಜಾಮ್ಯಹಂ ಜ್ಞಾನಕರೀಂ ಮಹಾಶ್ರಿಯಮ್

॥ 3 ॥

ಶ್ಲೋಕ 5

ವಿಜ್ಞಾನಸಮ್ಪತ್ಸುಖದಾಂ ಸನಾತನೀಂ

ವಿಚಿತ್ರವಾಗ್ಭೂತಿಕರೀಂ ಮನೋಹರಾಮ್ ।

ಅನನ್ತಸಮ್ಮೋದಸುಖಪ್ರದಾಯಿನೀಂ

ನಮಾಮ್ಯಹಂ ಭೂತಿಕರೀಂ ಹರಿಪ್ರಿಯಾಮ್

॥ 4 ॥

ಶ್ಲೋಕ 6

ಸಮಸ್ತಭೂತಾನ್ತರಸಂಸ್ಥಿತಾ ತ್ವಂ

ಸಮಸ್ತಭೋಕ್ತ್ರೀಶ್ವರಿ ವಿಶ್ವರೂಪೇ ।

ತನ್ನಾಸ್ತಿ ಯತ್ತ್ವದ್ವ್ಯತಿರಿಕ್ತವಸ್ತು

ತ್ವತ್ಪಾದಪದ್ಮಂ ಪ್ರಣಮಾಮ್ಯಹಂ ಶ್ರೀಃ

॥ 5 ॥

ಶ್ಲೋಕ 7

ದಾರಿದ್ರ್ಯ ದುಃಖೌಘತಮೋಪಹನ್ತ್ರೀ

ತ್ವತ್ಪಾದಪದ್ಮಂ ಮಯಿ ಸನ್ನಿಧತ್ಸ್ವ ।

ದೀನಾರ್ತಿವಿಚ್ಛೇದನಹೇತುಭೂತೈಃ

ಕೃಪಾಕಟಾಕ್ಷೈರಭಿಷಿಞ್ಚ ಮಾಂ ಶ್ರೀಃ

॥ 6 ॥

ಶ್ಲೋಕ 8

ಅಮ್ಬ ಪ್ರಸೀದ ಕರುಣಾಸುಧಯಾರ್ದ್ರದೃಷ್ಟ್ಯಾ

ಮಾಂ ತ್ವತ್ಕೃಪಾದ್ರವಿಣಗೇಹಮಿಮಂ ಕುರುಷ್ವ ।

ಆಲೋಕಯ ಪ್ರಣತಹೃದ್ಗತಶೋಕಹನ್ತ್ರೀ

ತ್ವತ್ಪಾದಪದ್ಮಯುಗಲಂ ಪ್ರಣಮಾಮ್ಯಹಂ ಶ್ರೀಃ

॥ 7 ॥

ಶ್ಲೋಕ 9

ಶಾನ್ತ್ಯೈ ನಮೋಽಸ್ತು ಶರಣಾಗತರಕ್ಷಣಾಯೈ

ಕಾನ್ತ್ಯೈ ನಮೋಽಸ್ತು ಕಮನೀಯಗುಣಾಶ್ರಯಾಯೈ ।

ಕ್ಷಾನ್ತ್ಯೈ ನಮೋಽಸ್ತು ದುರಿತಕ್ಷಯಕಾರಣಾಯೈ

ದಾತ್ರ್ಯೈ ನಮೋಽಸ್ತು ಧನಧಾನ್ಯಸಮೃದ್ಧಿದಾಯೈ

॥ 8 ॥

ಶ್ಲೋಕ 10

ಶಕ್ತ್ಯೈ ನಮೋಽಸ್ತು ಶಶಿಶೇಖರಸಂಸ್ತುತಾಯೈ

ರತ್ಯೈ ನಮೋಽಸ್ತು ರಜನೀಕರಸೋದರಾಯೈ ।

ಭಕ್ತ್ಯೈ ನಮೋಽಸ್ತು ಭವಸಾಗರತಾರಕಾಯೈ

ಮತ್ಯೈ ನಮೋಽಸ್ತು ಮಧುಸೂದನವಲ್ಲಭಾಯೈ

॥ 9 ॥

ಶ್ಲೋಕ 11

ಲಕ್ಷ್ಮ್ಯೈ ನಮೋಽಸ್ತು ಶುಭಲಕ್ಷಣಲಕ್ಷಿತಾಯೈ

ಸಿದ್ಧ್ಯೈ ನಮೋಽಸ್ತು ಶಿವಸಿದ್ಧಸುಪೂಜಿತಾಯೈ ।

ಧೃತ್ಯೈ ನಮೋಽಸ್ತ್ವಮಿತದುರ್ಗತಿಭಞ್ಜನಾಯೈ

ಗತ್ಯೈ ನಮೋಽಸ್ತು ವರಸದ್ಗತಿದಾಯಿಕಾಯೈ

॥ 10 ॥

ಶ್ಲೋಕ 12

ದೇವ್ಯೈ ನಮೋಽಸ್ತು ದಿವಿ ದೇವಗಣಾರ್ಚಿತಾಯೈ

ಭೂತ್ಯೈ ನಮೋಽಸ್ತು ಭುವನಾರ್ತಿವಿನಾಶನಾಯೈ ।

ಧಾತ್ರ್ಯೈ ನಮೋಽಸ್ತು ಧರಣೀಧರವಲ್ಲಭಾಯೈ

ಪುಷ್ಟ್ಯೈ ನಮೋಽಸ್ತು ಪುರುಷೋತ್ತಮವಲ್ಲಭಾಯೈ

॥ 11 ॥

ಶ್ಲೋಕ 13

ಸುತೀವ್ರದಾರಿದ್ರ್ಯವಿದುಃಖಹನ್ತ್ರ್ಯೈ

ನಮೋಽಸ್ತು ತೇ ಸರ್ವಭಯಾಪಹನ್ತ್ರ್ಯೈ ।

ಶ್ರೀವಿಷ್ಣುವಕ್ಷಃಸ್ಥಲಸಂಸ್ಥಿತಾಯೈ

ನಮೋ ನಮಃ ಸರ್ವವಿಭೂತಿದಾಯೈ

॥ 12 ॥

ಶ್ಲೋಕ 14

ಜಯತು ಜಯತು ಲಕ್ಷ್ಮೀರ್ಲಕ್ಷಣಾಲಙ್ಕೃತಾಙ್ಗೀ

ಜಯತು ಜಯತು ಪದ್ಮಾ ಪದ್ಮಸದ್ಮಾಭಿವನ್ದ್ಯಾ ।

ಜಯತು ಜಯತು ವಿದ್ಯಾ ವಿಷ್ಣುವಾಮಾಙ್ಕಸಂಸ್ಥಾ

ಜಯತು ಜಯತು ಸಮ್ಯಕ್ಸರ್ವಸಮ್ಪತ್ಕರೀ ಶ್ರೀಃ

॥ 13 ॥

ಶ್ಲೋಕ 15

ಜಯತು ಜಯತು ದೇವೀ ದೇವಸಙ್ಘಾಭಿಪೂಜ್ಯಾ

ಜಯತು ಜಯತು ಭದ್ರಾ ಭಾರ್ಗವೀ ಭಾಗ್ಯರೂಪಾ ।

ಜಯತು ಜಯತು ನಿತ್ಯಾ ನಿರ್ಮಲಜ್ಞಾನವೇದ್ಯಾ

ಜಯತು ಜಯತು ಸತ್ಯಾ ಸರ್ವಭೂತಾನ್ತರಸ್ಥಾ

॥ 14 ॥

ಶ್ಲೋಕ 16

ಜಯತು ಜಯತು ರಮ್ಯಾ ರತ್ನಗರ್ಭಾನ್ತರಸ್ಥಾ

ಜಯತು ಜಯತು ಶುದ್ಧಾ ಶುದ್ಧಜಾಮ್ಬೂನದಾಭಾ ।

ಜಯತು ಜಯತು ಕಾನ್ತಾ ಕಾನ್ತಿಮದ್ಭಾಸಿತಾಙ್ಗೀ

ಜಯತು ಜಯತು ಶಾನ್ತಾ ಶೀಘ್ರಮಾಗಚ್ಛ ಸೌಮ್ಯೇ

॥ 15 ॥

ಶ್ಲೋಕ 17

ಯಸ್ಯಾಃ ಕಲಾಯಾಃ ಕಮಲೋದ್ಭವಾದ್ಯಾ

ರುದ್ರಾಶ್ಚ ಶಕ್ರ ಪ್ರಮುಖಾಶ್ಚ ದೇವಾಃ ।

ಜೀವನ್ತಿ ಸರ್ವೇಽಪಿ ಸಶಕ್ತಯಸ್ತೇ

ಪ್ರಭುತ್ವಮಾಪ್ತಾಃ ಪರಮಾಯುಷಸ್ತೇ

॥ 16 ॥

ಶ್ಲೋಕ 18

ಲಿಲೇಖ ನಿಟಿಲೇ ವಿಧಿರ್ಮಮ ಲಿಪಿಂ ವಿಸೃಜ್ಯಾನ್ತರಂ

ತ್ವಯಾ ವಿಲಿಖಿತವ್ಯಮೇತದಿತಿ ತತ್ಫಲಪ್ರಾಪ್ತಯೇ ।

ತದನ್ತರಫಲೇಸ್ಫುಟಂ ಕಮಲವಾಸಿನೀ ಶ್ರೀರಿಮಾಂ

ಸಮರ್ಪಯ ಸಮುದ್ರಿಕಾಂ ಸಕಲಭಾಗ್ಯಸಂಸೂಚಿಕಾಮ್

॥ 17 ॥

ಶ್ಲೋಕ 19

ಕಲಯಾ ತೇ ಯಥಾ ದೇವಿ ಜೀವನ್ತಿ ಸಚರಾಚರಾಃ ।

ತಥಾ ಸಮ್ಪತ್ಕರೇ ಲಕ್ಷ್ಮಿ ಸರ್ವದಾ ಸಮ್ಪ್ರಸೀದ ಮೇ

॥ 18 ॥

ಶ್ಲೋಕ 20

ಯಥಾ ವಿಷ್ಣುರ್ಧ್ರುವೇ ನಿತ್ಯಂ ಸ್ವಕಲಾಂ ಸನ್ನ್ಯವೇಶಯತ್ ।

ತಥೈವ ಸ್ವಕಲಾಂ ಲಕ್ಷ್ಮಿ ಮಯಿ ಸಮ್ಯಕ್ ಸಮರ್ಪಯ

॥ 19 ॥

ಶ್ಲೋಕ 21

ಸರ್ವಸೌಖ್ಯಪ್ರದೇ ದೇವಿ ಭಕ್ತಾನಾಮಭಯಪ್ರದೇ ।

ಅಚಲಾಂ ಕುರು ಯತ್ನೇನ ಕಲಾಂ ಮಯಿ ನಿವೇಶಿತಾಮ್

॥ 20 ॥

ಶ್ಲೋಕ 22

ಮುದಾಸ್ತಾಂ ಮತ್ಫಾಲೇ ಪರಮಪದಲಕ್ಷ್ಮೀಃ ಸ್ಫುಟಕಲಾ

ಸದಾ ವೈಕುಣ್ಠಶ್ರೀರ್ನಿವಸತು ಕಲಾ ಮೇ ನಯನಯೋಃ ।

ವಸೇತ್ಸತ್ಯೇ ಲೋಕೇ ಮಮ ವಚಸಿ ಲಕ್ಷ್ಮೀರ್ವರಕಲಾ

ಶ್ರಿಯಃ ಶ್ವೇತದ್ವೀಪೇ ನಿವಸತು ಕಲಾ ಮೇ ಸ್ವಕರಯೋಃ

॥ 21 ॥

ಶ್ಲೋಕ 23

ತಾವನ್ನಿತ್ಯಂ ಮಮಾಙ್ಗೇಷು ಕ್ಷೀರಾಬ್ಧೌ ಶ್ರೀಕಲಾ ವಸೇತ್ ।

ಸೂರ್ಯಾಚನ್ದ್ರಮಸೌ ಯಾವದ್ಯಾವಲ್ಲಕ್ಷ್ಮೀಪತಿಃ ಶ್ರಿಯಾಃ

॥ 22 ॥

ಶ್ಲೋಕ 24

ಸರ್ವಮಙ್ಗಲಸಮ್ಪೂರ್ಣಾ ಸರ್ವೈಶ್ವರ್ಯಸಮನ್ವಿತಾ ।

ಆದ್ಯಾದಿ ಶ್ರೀರ್ಮಹಾಲಕ್ಷ್ಮೀ ತ್ವತ್ಕಲಾ ಮಯಿ ತಿಷ್ಠತು

॥ 23 ॥

ಶ್ಲೋಕ 25

ಅಜ್ಞಾನತಿಮಿರಂ ಹನ್ತುಂ ಶುದ್ಧಜ್ಞಾನಪ್ರಕಾಶಿಕಾ ।

ಸರ್ವೈಶ್ವರ್ಯಪ್ರದಾ ಮೇಽಸ್ತು ತ್ವತ್ಕಲಾ ಮಯಿ ಸಂಸ್ಥಿತಾ

॥ 24 ॥

ಶ್ಲೋಕ 26

ಅಲಕ್ಷ್ಮೀಂ ಹರತು ಕ್ಷಿಪ್ರಂ ತಮಃ ಸೂರ್ಯಪ್ರಭಾ ಯಥಾ ।

ವಿತನೋತು ಮಮ ಶ್ರೇಯಸ್ತ್ವತ್ಕಲಾ ಮಯಿ ಸಂಸ್ಥಿತಾ

॥ 25 ॥

ಶ್ಲೋಕ 27

ಐಶ್ವರ್ಯಮಙ್ಗಲೋತ್ಪತ್ತಿಸ್ತ್ವತ್ಕಲಾಯಾಂ ನಿಧೀಯತೇ ।

ಮಯಿ ತಸ್ಮಾತ್ಕೃತಾರ್ಥೋಽಸ್ಮಿ ಪಾತ್ರಮಸ್ಮಿ ಸ್ಥಿತೇಸ್ತವ

॥ 26 ॥

ಶ್ಲೋಕ 28

ಭವದಾವೇಶಭಾಗ್ಯಾರ್ಹೋ ಭಾಗ್ಯವಾನಸ್ಮಿ ಭಾರ್ಗವಿ ।

ತ್ವತ್ಪ್ರಸಾದಾತ್ಪವಿತ್ರೋಽಹಂ ಲೋಕಮಾತರ್ನಮೋಽಸ್ತು ತೇ

॥ 27 ॥

ಶ್ಲೋಕ 29

ಪುನಾಸಿ ಮಾಂ ತ್ವತ್ಕಲಯೈವ ಯಸ್ಮಾ-

-ದತಃ ಸಮಾಗಚ್ಛ ಮಮಾಗ್ರತಸ್ತ್ವಮ್ ।

ಪರಂ ಪದಂ ಶ್ರೀರ್ಭವ ಸುಪ್ರಸನ್ನಾ

ಮಯ್ಯಚ್ಯುತೇನ ಪ್ರವಿಶಾದಿಲಕ್ಷ್ಮೀಃ

॥ 28 ॥

ಶ್ಲೋಕ 30

ಶ್ರೀವೈಕುಣ್ಠಸ್ಥಿತೇ ಲಕ್ಷ್ಮಿ ಸಮಾಗಚ್ಛ ಮಮಾಗ್ರತಃ ।

ನಾರಾಯಣೇನ ಸಹ ಮಾಂ ಕೃಪಾದೃಷ್ಟ್ಯಾಽವಲೋಕಯ

॥ 29 ॥

ಶ್ಲೋಕ 31

ಸತ್ಯಲೋಕಸ್ಥಿತೇ ಲಕ್ಷ್ಮಿ ತ್ವಂ ಮಮಾಗಚ್ಛ ಸನ್ನಿಧಿಮ್ ।

ವಾಸುದೇವೇನ ಸಹಿತಾ ಪ್ರಸೀದ ವರದಾ ಭವ

॥ 30 ॥

ಶ್ಲೋಕ 32

ಶ್ವೇತದ್ವೀಪಸ್ಥಿತೇ ಲಕ್ಷ್ಮಿ ಶೀಘ್ರಮಾಗಚ್ಛ ಸುವ್ರತೇ ।

ವಿಷ್ಣುನಾ ಸಹಿತೇ ದೇವಿ ಜಗನ್ಮಾತಃ ಪ್ರಸೀದ ಮೇ

॥ 31 ॥

ಶ್ಲೋಕ 33

ಕ್ಷೀರಾಮ್ಬುಧಿಸ್ಥಿತೇ ಲಕ್ಷ್ಮಿ ಸಮಾಗಚ್ಛ ಸಮಾಧವಾ ।

ತ್ವತ್ಕೃಪಾದೃಷ್ಟಿಸುಧಯಾ ಸತತಂ ಮಾಂ ವಿಲೋಕಯ

॥ 32 ॥

ಶ್ಲೋಕ 34

ರತ್ನಗರ್ಭಸ್ಥಿತೇ ಲಕ್ಷ್ಮಿ ಪರಿಪೂರ್ಣೇ ಹಿರಣ್ಮಯೇ ।

ಸಮಾಗಚ್ಛ ಸಮಾಗಚ್ಛ ಸ್ಥಿತ್ವಾಽಽಶು ಪುರತೋ ಮಮ

॥ 33 ॥

ಶ್ಲೋಕ 35

ಸ್ಥಿರಾ ಭವ ಮಹಾಲಕ್ಷ್ಮಿ ನಿಶ್ಚಲಾ ಭವ ನಿರ್ಮಲೇ ।

ಪ್ರಸನ್ನೇ ಕಮಲೇ ದೇವಿ ಪ್ರಸನ್ನಹೃದಯಾ ಭವ

॥ 34 ॥

ಶ್ಲೋಕ 36

ಶ್ರೀಧರೇ ಶ್ರೀಮಹಾಭೂತೇ ತ್ವದನ್ತಃಸ್ಥಂ ಮಹಾನಿಧಿಮ್ ।

ಶೀಘ್ರಮುದ್ಧೃತ್ಯ ಪುರತಃ ಪ್ರದರ್ಶಯ ಸಮರ್ಪಯ

॥ 35 ॥

ಶ್ಲೋಕ 37

ವಸುನ್ಧರೇ ಶ್ರೀವಸುಧೇ ವಸುದೋಗ್ಧ್ರಿ ಕೃಪಾಮಯೇ ।

ತ್ವತ್ಕುಕ್ಷಿಗತಸರ್ವಸ್ವಂ ಶೀಘ್ರಂ ಮೇ ಸಮ್ಪ್ರದರ್ಶಯ

॥ 36 ॥

ಶ್ಲೋಕ 38

ವಿಷ್ಣುಪ್ರಿಯೇ ರತ್ನಗರ್ಭೇ ಸಮಸ್ತಫಲದೇ ಶಿವೇ ।

ತ್ವದ್ಗರ್ಭಗತಹೇಮಾದೀನ್ ಸಮ್ಪ್ರದರ್ಶಯ ದರ್ಶಯ

॥ 37 ॥

ಶ್ಲೋಕ 39

ರಸಾತಲಗತೇ ಲಕ್ಷ್ಮಿ ಶೀಘ್ರಮಾಗಚ್ಛ ಮೇ ಪುರಃ ।

ನ ಜಾನೇ ಪರಮಂ ರೂಪಂ ಮಾತರ್ಮೇ ಸಮ್ಪ್ರದರ್ಶಯ

॥ 38 ॥

ಶ್ಲೋಕ 40

ಆವಿರ್ಭವ ಮನೋವೇಗಾಚ್ಛೀಘ್ರಮಾಗಚ್ಛ ಮೇ ಪುರಃ ।

ಮಾ ವತ್ಸ ಭೈರಿಹೇತ್ಯುಕ್ತ್ವಾ ಕಾಮಂ ಗೌರಿವ ರಕ್ಷ ಮಾಮ್

॥ 39 ॥

ಶ್ಲೋಕ 41

ದೇವಿ ಶೀಘ್ರಂ ಸಮಾಗಚ್ಛ ಧರಣೀಗರ್ಭಸಂಸ್ಥಿತೇ ।

ಮಾತಸ್ತ್ವದ್ಭೃತ್ಯಭೃತ್ಯೋಽಹಂ ಮೃಗಯೇ ತ್ವಾಂ ಕುತೂಹಲಾತ್

॥ 40 ॥

ಶ್ಲೋಕ 42

ಉತ್ತಿಷ್ಠ ಜಾಗೃಹಿ ತ್ವಂ ಮೇ ಸಮುತ್ತಿಷ್ಠ ಸುಜಾಗೃಹಿ ।

ಅಕ್ಷಯಾನ್ ಹೇಮಕಲಶಾನ್ ಸುವರ್ಣೇನ ಸುಪೂರಿತಾನ್

॥ 41 ॥

ಶ್ಲೋಕ 43

ನಿಕ್ಷೇಪಾನ್ಮೇ ಸಮಾಕೃಷ್ಯ ಸಮುದ್ಧೃತ್ಯ ಮಮಾಗ್ರತಃ ।

ಸಮುನ್ನತಾನನಾ ಭೂತ್ವಾ ಸಮಾಧೇಹಿ ಧರಾನ್ತರಾತ್

॥ 42 ॥

ಶ್ಲೋಕ 44

ಮತ್ಸನ್ನಿಧಿಂ ಸಮಾಗಚ್ಛ ಮದಾಹಿತಕೃಪಾರಸಾತ್ ।

ಪ್ರಸೀದ ಶ್ರೇಯಸಾಂ ದೋಗ್ಧ್ರೀ ಲಕ್ಷ್ಮೀರ್ಮೇ ನಯನಾಗ್ರತಃ

॥ 43 ॥

ಶ್ಲೋಕ 45

ಅತ್ರೋಪವಿಶ ಲಕ್ಷ್ಮಿ ತ್ವಂ ಸ್ಥಿರಾ ಭವ ಹಿರಣ್ಮಯೇ ।

ಸುಸ್ಥಿರಾ ಭವ ಸಮ್ಪ್ರೀತ್ಯಾ ಪ್ರಸೀದ ವರದಾ ಭವ

॥ 44 ॥

ಶ್ಲೋಕ 46

ಆನೀತಾಂಸ್ತು ತಥಾ ದೇವಿ ನಿಧೀನ್ಮೇ ಸಮ್ಪ್ರದರ್ಶಯ ।

ಅದ್ಯ ಕ್ಷಣೇನ ಸಹಸಾ ದತ್ತ್ವಾ ಸಂರಕ್ಷ ಮಾಂ ಸದಾ

॥ 45 ॥

ಶ್ಲೋಕ 47

ಮಯಿ ತಿಷ್ಠ ತಥಾ ನಿತ್ಯಂ ಯಥೇನ್ದ್ರಾದಿಷು ತಿಷ್ಠಸಿ ।

ಅಭಯಂ ಕುರು ಮೇ ದೇವಿ ಮಹಾಲಕ್ಷ್ಮೀರ್ನಮೋಽಸ್ತು ತೇ

॥ 46 ॥

ಶ್ಲೋಕ 48

ಸಮಾಗಚ್ಛ ಮಹಾಲಕ್ಷ್ಮಿ ಶುದ್ಧಜಾಮ್ಬೂನದಪ್ರಭೇ ।

ಪ್ರಸೀದ ಪುರತಃ ಸ್ಥಿತ್ವಾ ಪ್ರಣತಂ ಮಾಂ ವಿಲೋಕಯ

॥ 47 ॥

ಶ್ಲೋಕ 49

ಲಕ್ಷ್ಮೀರ್ಭುವಂ ಗತಾ ಭಾಸಿ ಯತ್ರ ಯತ್ರ ಹಿರಣ್ಮಯೀ ।

ತತ್ರ ತತ್ರ ಸ್ಥಿತಾ ತ್ವಂ ಮೇ ತವ ರೂಪಂ ಪ್ರದರ್ಶಯ

॥ 48 ॥

ಶ್ಲೋಕ 50

ಕ್ರೀಡನ್ತೀ ಬಹುಧಾ ಭೂಮೌ ಪರಿಪೂರ್ಣಕೃಪಾಮಯಿ ।

ಮಮ ಮೂರ್ಧನಿ ತೇ ಹಸ್ತಮವಿಲಮ್ಬಿತಮರ್ಪಯ

॥ 49 ॥

ಶ್ಲೋಕ 51

ಫಲದ್ಭಾಗ್ಯೋದಯೇ ಲಕ್ಷ್ಮಿ ಸಮಸ್ತಪುರವಾಸಿನೀ ।

ಪ್ರಸೀದ ಮೇ ಮಹಾಲಕ್ಷ್ಮಿ ಪರಿಪೂರ್ಣಮನೋರಥೇ

॥ 50 ॥

ಶ್ಲೋಕ 52

ಅಯೋಧ್ಯಾದಿಷು ಸರ್ವೇಷು ನಗರೇಷು ಸಮಾಸ್ಥಿತೇ ।

ವೈಭವೈರ್ವಿವಿಧೈರ್ಯುಕ್ತೈಃ ಸಮಾಗಚ್ಛ ಮುದಾನ್ವಿತೇ

॥ 51 ॥

ಶ್ಲೋಕ 53

ಸಮಾಗಚ್ಛ ಸಮಾಗಚ್ಛ ಮಮಾಗ್ರೇ ಭವ ಸುಸ್ಥಿರಾ ।

ಕರುಣಾರಸನಿಷ್ಯನ್ದನೇತ್ರದ್ವಯ ವಿಲಾಸಿನೀ

॥ 52 ॥

ಶ್ಲೋಕ 54

॥ 53 ॥ [ನಿಷ್ಪನ್ನ]

ಸನ್ನಿಧತ್ಸ್ವ ಮಹಾಲಕ್ಷ್ಮಿ ತ್ವತ್ಪಾಣಿಂ ಮಮ ಮಸ್ತಕೇ ।

ಕರುಣಾಸುಧಯಾ ಮಾಂ ತ್ವಮಭಿಷಿಞ್ಚ್ಯ ಸ್ಥಿರಂ ಕುರು

ಶ್ಲೋಕ 55

ಸರ್ವರಾಜಗೃಹೇ ಲಕ್ಷ್ಮಿ ಸಮಾಗಚ್ಛ ಬಲಾನ್ವಿತೇ । [ಮುದಾನ್ವಿತೇ]

ಸ್ಥಿತ್ವಾಽಽಶು ಪುರತೋ ಮೇಽದ್ಯ ಪ್ರಸಾದೇನಾಽಭಯಂ ಕುರು

॥ 54 ॥

ಶ್ಲೋಕ 56

ಸಾದರಂ ಮಸ್ತಕೇ ಹಸ್ತಂ ಮಮ ತ್ವಂ ಕೃಪಯಾರ್ಪಯ ।

ಸರ್ವರಾಜಗೃಹೇ ಲಕ್ಷ್ಮಿ ತ್ವತ್ಕಲಾ ಮಯಿ ತಿಷ್ಠತು

॥ 55 ॥

ಶ್ಲೋಕ 57

ಆದ್ಯಾದಿ ಶ್ರೀಮಹಾಲಕ್ಷ್ಮಿ ವಿಷ್ಣುವಾಮಾಙ್ಕಸಂಸ್ಥಿತೇ ।

ಪ್ರತ್ಯಕ್ಷಂ ಕುರು ಮೇ ರೂಪಂ ರಕ್ಷ ಮಾಂ ಶರಣಾಗತಮ್

॥ 56 ॥

ಶ್ಲೋಕ 58

ಪ್ರಸೀದ ಮೇ ಮಹಾಲಕ್ಷ್ಮಿ ಸುಪ್ರಸೀದ ಮಹಾಶಿವೇ ।

ಅಚಲಾ ಭವ ಸಮ್ಪ್ರೀತ್ಯಾ ಸುಸ್ಥಿರಾ ಭವ ಮದ್ಗೃಹೇ

॥ 57 ॥

ಶ್ಲೋಕ 59

ಯಾವತ್ತಿಷ್ಠನ್ತಿ ವೇದಾಶ್ಚ ಯಾವಚ್ಚನ್ದ್ರದಿವಾಕರೌ ।

ಯಾವದ್ವಿಷ್ಣುಶ್ಚ ಯಾವತ್ತ್ವಂ ತಾವತ್ಕುರು ಕೃಪಾಂ ಮಯಿ

॥ 58 ॥

ಶ್ಲೋಕ 60

ಚಾನ್ದ್ರೀಕಲಾ ಯಥಾ ಶುಕ್ಲೇ ವರ್ಧತೇ ಸಾ ದಿನೇ ದಿನೇ ।

ತಥಾ ದಯಾ ತೇ ಮಯ್ಯೇವ ವರ್ಧತಾಮಭಿವರ್ಧತಾಮ್

॥ 59 ॥

ಶ್ಲೋಕ 61

ಯಥಾ ವೈಕುಣ್ಠನಗರೇ ಯಥಾ ವೈ ಕ್ಷೀರಸಾಗರೇ ।

ತಥಾ ಮದ್ಭವನೇ ತಿಷ್ಠ ಸ್ಥಿರಂ ಶ್ರೀವಿಷ್ಣುನಾ ಸಹ

॥ 60 ॥

ಶ್ಲೋಕ 62

ಯೋಗಿನಾಂ ಹೃದಯೇ ನಿತ್ಯಂ ಯಥಾ ತಿಷ್ಠಸಿ ವಿಷ್ಣುನಾ ।

ತಥಾ ಮದ್ಭವನೇ ತಿಷ್ಠ ಸ್ಥಿರಂ ಶ್ರೀವಿಷ್ಣುನಾ ಸಹ

॥ 61 ॥

ಶ್ಲೋಕ 63

ನಾರಾಯಣಸ್ಯ ಹೃದಯೇ ಭವತೀ ಯಥಾಸ್ತೇ

ನಾರಾಯಣೋಽಪಿ ತವ ಹೃತ್ಕಮಲೇ ಯಥಾಸ್ತೇ ।

ನಾರಾಯಣಸ್ತ್ವಮಪಿ ನಿತ್ಯಮುಭೌ ತಥೈವ

ತೌ ತಿಷ್ಠತಾಂ ಹೃದಿ ಮಮಾಪಿ ದಯಾನ್ವಿತೌ ಶ್ರೀಃ

॥ 62 ॥

ಶ್ಲೋಕ 64

ವಿಜ್ಞಾನವೃದ್ಧಿಂ ಹೃದಯೇ ಕುರು ಶ್ರೀಃ

ಸೌಭಾಗ್ಯವೃದ್ಧಿಂ ಕುರು ಮೇ ಗೃಹೇ ಶ್ರೀಃ ।

ದಯಾಸುವೃದ್ಧಿಂ ಕುರುತಾಂ ಮಯಿ ಶ್ರೀಃ

ಸುವರ್ಣವೃದ್ಧಿಂ ಕುರು ಮೇ ಗೃಹೇ ಶ್ರೀಃ

॥ 63 ॥

ಶ್ಲೋಕ 65

ನ ಮಾಂ ತ್ಯಜೇಥಾಃ ಶ್ರಿತಕಲ್ಪವಲ್ಲಿ

ಸದ್ಭಕ್ತಚಿನ್ತಾಮಣಿಕಾಮಧೇನೋ ।

ವಿಶ್ವಸ್ಯ ಮಾತರ್ಭವ ಸುಪ್ರಸನ್ನಾ

ಗೃಹೇ ಕಲತ್ರೇಷು ಚ ಪುತ್ರವರ್ಗೇ

॥ 64 ॥

ಶ್ಲೋಕ 66

ಆದ್ಯಾದಿಮಾಯೇ ತ್ವಮಜಾಣ್ಡಬೀಜಂ

ತ್ವಮೇವ ಸಾಕಾರನಿರಾಕೃತಿಸ್ತ್ವಮ್ ।

ತ್ವಯಾ ಧೃತಾಶ್ಚಾಬ್ಜಭವಾಣ್ಡಸಙ್ಘಾ-

-ಶ್ಚಿತ್ರಂ ಚರಿತ್ರಂ ತವ ದೇವಿ ವಿಷ್ಣೋಃ

॥ 65 ॥

ಶ್ಲೋಕ 67

ಬ್ರಹ್ಮರುದ್ರಾದಯೋ ದೇವಾ ವೇದಾಶ್ಚಾಪಿ ನ ಶಕ್ನುಯುಃ ।

ಮಹಿಮಾನಂ ತವ ಸ್ತೋತುಂ ಮನ್ದೋಽಹಂ ಶಕ್ನುಯಾಂ ಕಥಮ್

॥ 66 ॥

ಶ್ಲೋಕ 68

ಅಮ್ಬ ತ್ವದ್ವತ್ಸವಾಕ್ಯಾನಿ ಸೂಕ್ತಾಸೂಕ್ತಾನಿ ಯಾನಿ ಚ ।

ತಾನಿ ಸ್ವೀಕುರು ಸರ್ವಜ್ಞೇ ದಯಾಲುತ್ವೇನ ಸಾದರಮ್

॥ 67 ॥

ಶ್ಲೋಕ 69

ಭವತೀಂ ಶರಣಂ ಗತ್ವಾ ಕೃತಾರ್ಥಾಃ ಸ್ಯುಃ ಪುರಾತನಾಃ ।

ಇತಿ ಸಞ್ಚಿನ್ತ್ಯ ಮನಸಾ ತ್ವಾಮಹಂ ಶರಣಂ ವ್ರಜೇ

॥ 68 ॥

ಶ್ಲೋಕ 70

ಅನನ್ತಾ ನಿತ್ಯಸುಖಿನಸ್ತ್ವದ್ಭಕ್ತಾಸ್ತ್ವತ್ಪರಾಯಣಾಃ ।

ಇತಿ ವೇದಪ್ರಮಾಣಾದ್ಧಿ ದೇವಿ ತ್ವಾಂ ಶರಣಂ ವ್ರಜೇ

॥ 69 ॥

ಶ್ಲೋಕ 71

ತವ ಪ್ರತಿಜ್ಞಾ ಮದ್ಭಕ್ತಾ ನ ನಶ್ಯನ್ತೀತ್ಯಪಿ ಕ್ವಚಿತ್ ।

ಇತಿ ಸಞ್ಚಿನ್ತ್ಯ ಸಞ್ಚಿನ್ತ್ಯ ಪ್ರಾಣಾನ್ ಸನ್ಧಾರಯಾಮ್ಯಹಮ್

॥ 70 ॥

ಶ್ಲೋಕ 72

ತ್ವದಧೀನಸ್ತ್ವಹಂ ಮಾತಸ್ತ್ವತ್ಕೃಪಾ ಮಯಿ ವಿದ್ಯತೇ ।

ಯಾವತ್ಸಮ್ಪೂರ್ಣಕಾಮಃ ಸ್ಯಾತ್ತಾವದ್ದೇಹಿ ದಯಾನಿಧೇ

॥ 71 ॥

ಶ್ಲೋಕ 73

ಕ್ಷಣಮಾತ್ರಂ ನ ಶಕ್ನೋಮಿ ಜೀವಿತುಂ ತ್ವತ್ಕೃಪಾಂ ವಿನಾ ।

ನ ಜೀವನ್ತೀಹ ಜಲಜಾ ಜಲಂ ತ್ಯಕ್ತ್ವಾ ಜಲಗ್ರಹಾಃ

॥ 72 ॥

ಶ್ಲೋಕ 74

ಯಥಾ ಹಿ ಪುತ್ರವಾತ್ಸಲ್ಯಾಜ್ಜನನೀ ಪ್ರಸ್ನುತಸ್ತನೀ ।

ವತ್ಸಂ ತ್ವರಿತಮಾಗತ್ಯ ಸಮ್ಪ್ರೀಣಯತಿ ವತ್ಸಲಾ

॥ 73 ॥

ಶ್ಲೋಕ 75

ಯದಿ ಸ್ಯಾಂ ತವ ಪುತ್ರೋಽಹಂ ಮಾತಾ ತ್ವಂ ಯದಿ ಮಾಮಕೀ ।

ದಯಾಪಯೋಧರಸ್ತನ್ಯಸುಧಾಭಿರಭಿಷಿಞ್ಚ ಮಾಮ್

॥ 74 ॥

ಶ್ಲೋಕ 76

ಮೃಗ್ಯೋ ನ ಗುಣಲೇಶೋಽಪಿ ಮಯಿ ದೋಷೈಕಮನ್ದಿರೇ ।

ಪಾಂಸೂನಾಂ ವೃಷ್ಟಿಬಿನ್ದೂನಾಂ ದೋಷಾಣಾಂ ಚ ನ ಮೇ ಮತಿಃ

॥ 75 ॥

ಶ್ಲೋಕ 77

ಪಾಪಿನಾಮಹಮೇವಾಗ್ರ್ಯೋ ದಯಾಲೂನಾಂ ತ್ವಮಗ್ರಣೀಃ ।

ದಯನೀಯೋ ಮದನ್ಯೋಽಸ್ತಿ ತವ ಕೋಽತ್ರ ಜಗತ್ತ್ರಯೇ

॥ 76 ॥

ಶ್ಲೋಕ 78

ವಿಧಿನಾಹಂ ನ ಸೃಷ್ಟಶ್ಚೇನ್ನ ಸ್ಯಾತ್ತವ ದಯಾಲುತಾ ।

ಆಮಯೋ ವಾ ನ ಸೃಷ್ಟಶ್ಚೇದೌಷಧಸ್ಯ ವೃಥೋದಯಃ

॥ 77 ॥

ಶ್ಲೋಕ 79

ಕೃಪಾ ಮದಗ್ರಜಾ ಕಿಂ ತೇ ಅಹಂ ಕಿಂ ವಾ ತದಗ್ರಜಃ ।

ವಿಚಾರ್ಯ ದೇಹಿ ಮೇ ವಿತ್ತಂ ತವ ದೇವಿ ದಯಾನಿಧೇ

॥ 78 ॥

ಶ್ಲೋಕ 80

ಮಾತಾ ಪಿತಾ ತ್ವಂ ಗುರುಸದ್ಗತಿಃ ಶ್ರೀ-

-ಸ್ತ್ವಮೇವ ಸಞ್ಜೀವನಹೇತುಭೂತಾ ।

ಅನ್ಯಂ ನ ಮನ್ಯೇ ಜಗದೇಕನಾಥೇ

ತ್ವಮೇವ ಸರ್ವಂ ಮಮ ದೇವಿ ಸತ್ಯೇ

॥ 79 ॥

ಶ್ಲೋಕ 81

ಆದ್ಯಾದಿಲಕ್ಷ್ಮೀರ್ಭವ ಸುಪ್ರಸನ್ನಾ

ವಿಶುದ್ಧವಿಜ್ಞಾನಸುಖೈಕದೋಗ್ಧ್ರೀ ।

ಅಜ್ಞಾನಹನ್ತ್ರೀ ತ್ರಿಗುಣಾತಿರಿಕ್ತಾ

ಪ್ರಜ್ಞಾನನೇತ್ರೀ ಭವ ಸುಪ್ರಸನ್ನಾ

॥ 80 ॥

ಶ್ಲೋಕ 82

ಅಶೇಷವಾಗ್ಜಾಡ್ಯಮಲಾಪಹನ್ತ್ರೀ

ನವಂ ನವಂ ಸ್ಪಷ್ಟಸುವಾಕ್ಪ್ರದಾಯಿನೀ ।

ಮಮೇಹ ಜಿಹ್ವಾಗ್ರ ಸುರಙ್ಗನರ್ತಕೀ [ನರ್ತಿನೀ]

ಭವ ಪ್ರಸನ್ನಾ ವದನೇ ಚ ಮೇ ಶ್ರೀಃ

॥ 81 ॥

ಶ್ಲೋಕ 83

ಸಮಸ್ತಸಮ್ಪತ್ಸುವಿರಾಜಮಾನಾ

ಸಮಸ್ತತೇಜಶ್ಚಯಭಾಸಮಾನಾ ।

ವಿಷ್ಣುಪ್ರಿಯೇ ತ್ವಂ ಭವ ದೀಪ್ಯಮಾನಾ

ವಾಗ್ದೇವತಾ ಮೇ ನಯನೇ ಪ್ರಸನ್ನಾ

॥ 82 ॥

ಶ್ಲೋಕ 84

ಸರ್ವಪ್ರದರ್ಶೇ ಸಕಲಾರ್ಥದೇ ತ್ವಂ

ಪ್ರಭಾಸುಲಾವಣ್ಯದಯಾಪ್ರದೋಗ್ಧ್ರೀ ।

ಸುವರ್ಣದೇ ತ್ವಂ ಸುಮುಖೀ ಭವ ಶ್ರೀ-

-ರ್ಹಿರಣ್ಮಯೀ ಮೇ ನಯನೇ ಪ್ರಸನ್ನಾ

॥ 83 ॥

ಶ್ಲೋಕ 85

ಸರ್ವಾರ್ಥದಾ ಸರ್ವಜಗತ್ಪ್ರಸೂತಿಃ

ಸರ್ವೇಶ್ವರೀ ಸರ್ವಭಯಾಪಹನ್ತ್ರೀ ।

ಸರ್ವೋನ್ನತಾ ತ್ವಂ ಸುಮುಖೀ ಭವ ಶ್ರೀ-

-ರ್ಹಿರಣ್ಮಯೀ ಮೇ ನಯನೇ ಪ್ರಸನ್ನಾ

॥ 84 ॥

ಶ್ಲೋಕ 86

ಸಮಸ್ತವಿಘ್ನೌಘವಿನಾಶಕಾರಿಣೀ

ಸಮಸ್ತಭಕ್ತೋದ್ಧರಣೇ ವಿಚಕ್ಷಣಾ ।

ಅನನ್ತಸೌಭಾಗ್ಯಸುಖಪ್ರದಾಯಿನೀ

ಹಿರಣ್ಮಯೀ ಮೇ ನಯನೇ ಪ್ರಸನ್ನಾ

॥ 85 ॥

ಶ್ಲೋಕ 87

ದೇವಿ ಪ್ರಸೀದ ದಯನೀಯತಮಾಯ ಮಹ್ಯಂ

ದೇವಾಧಿನಾಥಭವದೇವಗಣಾಭಿವನ್ದ್ಯೇ ।

ಮಾತಸ್ತಥೈವ ಭವ ಸನ್ನಿಹಿತಾ ದೃಶೋರ್ಮೇ

ಪತ್ಯಾ ಸಮಂ ಮಮ ಮುಖೇ ಭವ ಸುಪ್ರಸನ್ನಾ

॥ 86 ॥

ಶ್ಲೋಕ 88

ಮಾ ವತ್ಸ ಭೈರಭಯದಾನಕರೋಽರ್ಪಿತಸ್ತೇ

ಮೌಲೌ ಮಮೇತಿ ಮಯಿ ದೀನದಯಾನುಕಮ್ಪೇ ।

ಮಾತಃ ಸಮರ್ಪಯ ಮುದಾ ಕರುಣಾಕಟಾಕ್ಷಂ

ಮಾಙ್ಗಲ್ಯಬೀಜಮಿಹ ನಃ ಸೃಜ ಜನ್ಮ ಮಾತಃ

॥ 87 ॥

ಶ್ಲೋಕ 89

ಕಟಾಕ್ಷ ಇಹ ಕಾಮಧುಕ್ತವ ಮನಸ್ತು ಚಿನ್ತಾಮಣಿಃ

ಕರಃ ಸುರತರುಃ ಸದಾ ನವನಿಧಿಸ್ತ್ವಮೇವೇನ್ದಿರೇ ।

ಭವೇ ತವ ದಯಾರಸೋ ಮಮ ರಸಾಯನಂ ಚಾನ್ವಹಂ

ಮುಖಂ ತವ ಕಲಾನಿಧಿರ್ವಿವಿಧವಾಞ್ಛಿತಾರ್ಥಪ್ರದಮ್

॥ 88 ॥

ಶ್ಲೋಕ 90

ಯಥಾ ರಸಸ್ಪರ್ಶನತೋಽಯಸೋಽಪಿ

ಸುವರ್ಣತಾ ಸ್ಯಾತ್ಕಮಲೇ ತಥಾ ತೇ ।

ಕಟಾಕ್ಷಸಂಸ್ಪರ್ಶನತೋ ಜನಾನಾ-

-ಮಮಙ್ಗಲಾನಾಮಪಿ ಮಙ್ಗಲತ್ವಮ್

॥ 89 ॥

ಶ್ಲೋಕ 91

ದೇಹೀತಿ ನಾಸ್ತೀತಿ ವಚಃ ಪ್ರವೇಶಾ-

-ದ್ಭೀತೋ ರಮೇ ತ್ವಾಂ ಶರಣಂ ಪ್ರಪದ್ಯೇ ।

ಅತಃ ಸದಾಽಸ್ಮಿನ್ನಭಯಪ್ರದಾ ತ್ವಂ

ಸಹೈವ ಪತ್ಯಾ ಮಯಿ ಸನ್ನಿಧೇಹಿ

॥ 90 ॥

ಶ್ಲೋಕ 92

ಕಲ್ಪದ್ರುಮೇಣ ಮಣಿನಾ ಸಹಿತಾ ಸುರಮ್ಯಾ

ಶ್ರೀಸ್ತೇ ಕಲಾ ಮಯಿ ರಸೇನ ರಸಾಯನೇನ ।

ಆಸ್ತಾಂ ಯತೋ ಮಮ ಶಿರಃಕರದೃಷ್ಟಿಪಾದ-

-ಸ್ಪೃಷ್ಟಾಃ ಸುವರ್ಣವಪುಷಃ ಸ್ಥಿರಜಙ್ಗಮಾಃ ಸ್ಯುಃ

॥ 91 ॥

ಶ್ಲೋಕ 93

ಆದ್ಯಾದಿವಿಷ್ಣೋಃ ಸ್ಥಿರಧರ್ಮಪತ್ನೀ

ತ್ವಮೇವ ಪತ್ಯಾ ಮಯಿ ಸನ್ನಿಧೇಹಿ ।

ಆದ್ಯಾದಿಲಕ್ಷ್ಮಿ ತ್ವದನುಗ್ರಹೇಣ

ಪದೇ ಪದೇ ಮೇ ನಿಧಿದರ್ಶನಂ ಸ್ಯಾತ್

॥ 92 ॥

ಶ್ಲೋಕ 94

ಆದ್ಯಾದಿಲಕ್ಷ್ಮೀಹೃದಯಂ ಪಠೇದ್ಯಃ

ಸ ರಾಜ್ಯಲಕ್ಷ್ಮೀಮಚಲಾಂ ತನೋತಿ ।

ಮಹಾದರಿದ್ರೋಽಪಿ ಭವೇದ್ಧನಾಢ್ಯ-

-ಸ್ತದನ್ವಯೇ ಶ್ರೀಃ ಸ್ಥಿರತಾಂ ಪ್ರಯಾತಿ

॥ 93 ॥

ಶ್ಲೋಕ 95

ಯಸ್ಯ ಸ್ಮರಣಮಾತ್ರೇಣ ತುಷ್ಟಾ ಸ್ಯಾದ್ವಿಷ್ಣುವಲ್ಲಭಾ ।

ತಸ್ಯಾಭೀಷ್ಟಂ ದದತ್ಯಾಶು ತಂ ಪಾಲಯತಿ ಪುತ್ರವತ್

॥ 94 ॥

ಶ್ಲೋಕ 96

ಇದಂ ರಹಸ್ಯಂ ಹೃದಯಂ ಸರ್ವಕಾಮಫಲಪ್ರದಮ್ ।

ಜಪಃ ಪಞ್ಚಸಹಸ್ರಂ ತು ಪುರಶ್ಚರಣಮುಚ್ಯತೇ

॥ 95 ॥

ಶ್ಲೋಕ 97

ತ್ರಿಕಾಲಮೇಕಕಾಲಂ ವಾ ನರೋ ಭಕ್ತಿಸಮನ್ವಿತಃ ।

ಯಃ ಪಠೇಚ್ಛೃಣುಯಾದ್ವಾಪಿ ಸ ಯಾತಿ ಪರಮಾಂ ಶ್ರಿಯಮ್

॥ 96 ॥

ಶ್ಲೋಕ 98

ಮಹಾಲಕ್ಷ್ಮೀಂ ಸಮುದ್ದಿಶ್ಯ ನಿಶಿ ಭಾರ್ಗವವಾಸರೇ ।

ಇದಂ ಶ್ರೀಹೃದಯಂ ಜಪ್ತ್ವಾ ಪಞ್ಚವಾರಂ ಧನೀ ಭವೇತ್

॥ 97 ॥

ಶ್ಲೋಕ 99

ಅನೇನ ಹೃದಯೇನಾನ್ನಂ ಗರ್ಭಿಣ್ಯಾ ಅಭಿಮನ್ತ್ರಿತಮ್ ।

ದದಾತಿ ತತ್ಕುಲೇ ಪುತ್ರೋ ಜಾಯತೇ ಶ್ರೀಪತಿಃ ಸ್ವಯಮ್

॥ 98 ॥

ಶ್ಲೋಕ 100

ನರೇಣ ವಾಽಥವಾ ನಾರ್ಯಾ ಲಕ್ಷ್ಮೀಹೃದಯಮನ್ತ್ರಿತೇ ।

ಜಲೇ ಪೀತೇ ಚ ತದ್ವಂಶೇ ಮನ್ದಭಾಗ್ಯೋ ನ ಜಾಯತೇ

॥ 99 ॥

ಶ್ಲೋಕ 101

ಯ ಆಶ್ವಿನೇ ಮಾಸಿ ಚ ಶುಕ್ಲಪಕ್ಷೇ

ರಮೋತ್ಸವೇ ಸನ್ನಿಹಿತೇ ಸುಭಕ್ತ್ಯಾ ।

ಪಠೇತ್ತಥೈಕೋತ್ತರವಾರವೃದ್ಧ್ಯಾ

ಲಭೇತ್ಸ ಸೌವರ್ಣಮಯೀಂ ಸುವೃಷ್ಟಿಮ್

॥ 100 ॥

ಶ್ಲೋಕ 102

ಯ ಏಕಭಕ್ತೋಽನ್ವಹಮೇಕವರ್ಷಂ

ವಿಶುದ್ಧಧೀಃ ಸಪ್ತತಿವಾರಜಾಪೀ ।

ಸ ಮನ್ದಭಾಗ್ಯೋಽಪಿ ರಮಾಕಟಾಕ್ಷಾ-

-ದ್ಭವೇತ್ಸಹಸ್ರಾಕ್ಷಶತಾಧಿಕಶ್ರೀಃ

॥ 101 ॥

ಶ್ಲೋಕ 103

ಶ್ರೀಶಾಙ್ಘ್ರಿಭಕ್ತಿಂ ಹರಿದಾಸದಾಸ್ಯಂ

ಪ್ರಸನ್ನಮನ್ತ್ರಾರ್ಥದೃಢೈಕನಿಷ್ಠಾಮ್ ।

ಗುರೋಃ ಸ್ಮೃತಿಂ ನಿರ್ಮಲಬೋಧಬುದ್ಧಿಂ

ಪ್ರದೇಹಿ ಮಾತಃ ಪರಮಂ ಪದಂ ಶ್ರೀಃ

॥ 102 ॥

ಶ್ಲೋಕ 104

ಪೃಥ್ವೀಪತಿತ್ವಂ ಪುರುಷೋತ್ತಮತ್ವಂ

ವಿಭೂತಿವಾಸಂ ವಿವಿಧಾರ್ಥಸಿದ್ಧಿಮ್ ।

ಸಮ್ಪೂರ್ಣಕೀರ್ತಿಂ ಬಹುವರ್ಷಭೋಗಂ

ಪ್ರದೇಹಿ ಮೇ ಲಕ್ಷ್ಮಿ ಪುನಃ ಪುನಸ್ತ್ವಮ್

॥ 103 ॥

ಶ್ಲೋಕ 105

ವಾದಾರ್ಥಸಿದ್ಧಿಂ ಬಹುಲೋಕವಶ್ಯಂ

ವಯಃ ಸ್ಥಿರತ್ವಂ ಲಲನಾಸುಭೋಗಮ್ ।

ಪೌತ್ರಾದಿಲಬ್ಧಿಂ ಸಕಲಾರ್ಥಸಿದ್ಧಿಂ

ಪ್ರದೇಹಿ ಮೇ ಭಾರ್ಗವಿ ಜನ್ಮಜನ್ಮನಿ

॥ 104 ॥

ಶ್ಲೋಕ 106

ಸುವರ್ಣವೃದ್ಧಿಂ ಕುರು ಮೇ ಗೃಹೇ ಶ್ರೀಃ

ಸುಧಾನ್ಯವೃದ್ಧಿಂ ಕುರೂ ಮೇ ಗೃಹೇ ಶ್ರೀಃ ।

ಕಲ್ಯಾಣವೃದ್ಧಿಂ ಕುರು ಮೇ ಗೃಹೇ ಶ್ರೀಃ

ವಿಭೂತಿವೃದ್ಧಿಂ ಕುರು ಮೇ ಗೃಹೇ ಶ್ರೀಃ

॥ 105 ॥

ಶ್ಲೋಕ 107

ಧ್ಯಾಯೇಲ್ಲಕ್ಷ್ಮೀಂ ಪ್ರಹಸಿತಮುಖೀಂ ಕೋಟಿಬಾಲಾರ್ಕಭಾಸಾಂ

ವಿದ್ಯುದ್ವರ್ಣಾಮ್ಬರವರಧರಾಂ ಭೂಷಣಾಢ್ಯಾಂ ಸುಶೋಭಾಮ್ ।

ಬೀಜಾಪೂರಂ ಸರಸಿಜಯುಗಂ ಬಿಭ್ರತೀಂ ಸ್ವರ್ಣಪಾತ್ರಂ

ಭರ್ತ್ರಾಯುಕ್ತಾಂ ಮುಹುರಭಯದಾಂ ಮಹ್ಯಮಪ್ಯಚ್ಯುತಶ್ರೀಃ

॥ 106 ॥

ಶ್ಲೋಕ 108

ಗುಹ್ಯಾತಿಗುಹ್ಯಗೋಪ್ತ್ರೀ ತ್ವಂ ಗೃಹಾಣಾಸ್ಮತ್ಕೃತಂ ಜಪಮ್ ।

ಸಿದ್ಧಿರ್ಭವತು ಮೇ ದೇವಿ ತ್ವತ್ಪ್ರಸಾದಾನ್ಮಯಿ ಸ್ಥಿತಾ

॥ 107 ॥

ಶ್ಲೋಕ 109

ಇತಿ ಶ್ರೀಅಥರ್ವಣರಹಸ್ಯೇ ಶ್ರೀಲಕ್ಷ್ಮೀಹೃದಯಸ್ತೋತ್ರಂ ಸಮ್ಪೂರ್ಣಮ್ ॥