શ્રી ગાયત્રિ સહસ્ર નામ સ્તોત્રમ્

નારદ ઉવાચ –

ભગવન્સર્વધર્મજ્ઞ સર્વશાસ્ત્રવિશારદ ।

શ્રુતિસ્મૃતિપુરાણાનાં રહસ્યં ત્વન્મુખાચ્છ્રુતમ્ ॥ 1 ॥

સર્વપાપહરં દેવ યેન વિદ્યા પ્રવર્તતે ।

કેન વા બ્રહ્મવિજ્ઞાનં કિં નુ વા મોક્ષસાધનમ્ ॥ 2 ॥

બ્રાહ્મણાનાં ગતિઃ કેન કેન વા મૃત્યુ નાશનમ્ ।

ઐહિકામુષ્મિકફલં કેન વા પદ્મલોચન ॥ 3 ॥

વક્તુમર્હસ્યશેષેણ સર્વે નિખિલમાદિતઃ ।

શ્રીનારાયણ ઉવાચ –

સાધુ સાધુ મહાપ્રાજ્ઞ સમ્યક્ પૃષ્ટં ત્વયાઽનઘ ॥ 4 ॥

શૃણુ વક્ષ્યામિ યત્નેન ગાયત્ર્યષ્ટસહસ્રકમ્ ।

નામ્નાં શુભાનાં દિવ્યાનાં સર્વપાપવિનાશનમ્ ॥ 5 ॥

સૃષ્ટ્યાદૌ યદ્ભગવતા પૂર્વે પ્રોક્તં બ્રવીમિ તે ।

અષ્ટોત્તરસહસ્રસ્ય ઋષિર્બ્રહ્મા પ્રકીર્તિતઃ ॥ 6 ॥

છન્દોઽનુષ્ટુપ્તથા દેવી ગાયત્રીં દેવતા સ્મૃતા ।

હલોબીજાનિ તસ્યૈવ સ્વરાઃ શક્તય ઈરિતાઃ ॥ 7 ॥

અઙ્ગન્યાસકરન્યાસાવુચ્યેતે માતૃકાક્ષરૈઃ ।

અથ ધ્યાનં પ્રવક્ષ્યામિ સાધકાનાં હિતાય વૈ ॥ 8 ॥

ધ્યાનમ્

રક્તશ્વેતહિરણ્યનીલધવલૈર્યુક્તાં ત્રિનીત્રોજ્જ્વલાં

રક્તાં રક્તનવસ્રજં મણિગણૈર્યુક્તાં કુમારીમિમામ્ ।

ગાયત્રીં કમલાસનાં કરતલવ્યાનદ્ધકુણ્ડામ્બુજાં

પદ્માક્ષીં ચ વરસ્રજં ચ દધતીં હંસાધિરૂઢાં ભજે ॥ 9 ॥

અચિન્ત્યલક્ષણાવ્યક્તાપ્યર્થમાતૃમહેશ્વરી ।

અમૃતાર્ણવમધ્યસ્થાપ્યજિતા ચાપરાજિતા ॥ 10 ॥

અણિમાદિગુણાધારાપ્યર્કમણ્ડલસંસ્થિતા ।

અજરાજાપરાધર્મા અક્ષસૂત્રધરાધરા ॥ 11 ॥

અકારાદિક્ષકારાન્તાપ્યરિષડ્વર્ગભેદિની ।

અઞ્જનાદ્રિપ્રતીકાશાપ્યઞ્જનાદ્રિનિવાસિની ॥ 12 ॥

અદિતિશ્ચાજપાવિદ્યાપ્યરવિન્દનિભેક્ષણા ।

અન્તર્બહિઃસ્થિતાવિદ્યાધ્વંસિની ચાન્તરાત્મિકા ॥ 13 ॥

અજા ચાજમુખાવાસાપ્યરવિન્દનિભાનના ।

અર્ધમાત્રાર્થદાનજ્ઞાપ્યરિમણ્ડલમર્દિની ॥ 14 ॥

અસુરઘ્ની હ્યમાવાસ્યાપ્યલક્ષ્મીઘ્ન્યન્ત્યજાર્ચિતા ।

આદિલક્ષ્મીશ્ચાદિશક્તિરાકૃતિશ્ચાયતાનના ॥ 15 ॥

આદિત્યપદવીચારાપ્યાદિત્યપરિસેવિતા ।

આચાર્યાવર્તનાચારાપ્યાદિમૂર્તિનિવાસિની ॥ 16 ॥

આગ્નેયી ચામરી ચાદ્યા ચારાધ્યા ચાસનસ્થિતા ।

આધારનિલયાધારા ચાકાશાન્તનિવાસિની ॥ 17 ॥

આદ્યાક્ષરસમાયુક્તા ચાન્તરાકાશરૂપિણી ।

આદિત્યમણ્ડલગતા ચાન્તરધ્વાન્તનાશિની ॥ 18 ॥

ઇન્દિરા ચેષ્ટદા ચેષ્ટા ચેન્દીવરનિભેક્ષણા ।

ઇરાવતી ચેન્દ્રપદા ચેન્દ્રાણી ચેન્દુરૂપિણી ॥ 19 ॥

ઇક્ષુકોદણ્ડસંયુક્તા ચેષુસન્ધાનકારિણી ।

ઇન્દ્રનીલસમાકારા ચેડાપિઙ્ગલરૂપિણી ॥ 20 ॥

ઇન્દ્રાક્ષીચેશ્વરી દેવી ચેહાત્રયવિવર્જિતા ।

ઉમા ચોષા હ્યુડુનિભા ઉર્વારુકફલાનના ॥ 21 ॥

ઉડુપ્રભા ચોડુમતી હ્યુડુપા હ્યુડુમધ્યગા ।

ઊર્ધ્વા ચાપ્યૂર્ધ્વકેશી ચાપ્યૂર્ધ્વાધોગતિભેદિની ॥ 22 ॥

ઊર્ધ્વબાહુપ્રિયા ચોર્મિમાલાવાગ્ગ્રન્થદાયિની ।

ઋતં ચર્ષિરૃતુમતી ઋષિદેવનમસ્કૃતા ॥ 23 ॥

ઋગ્વેદા ઋણહર્ત્રી ચ ઋષિમણ્ડલચારિણી ।

ઋદ્ધિદા ઋજુમાર્ગસ્થા ઋજુધર્મા ઋજુપ્રદા ॥ 24 ॥

ઋગ્વેદનિલયા ઋજ્વી લુપ્તધર્મપ્રવર્તિની ।

લૂતારિવરસમ્ભૂતા લૂતાદિવિષહારિણી ॥ 25 ॥

એકાક્ષરા ચૈકમાત્રા ચૈકા ચૈકૈકનિષ્ઠિતા ।

ઐન્દ્રી હ્યૈરાવતારૂઢા ચૈહિકામુષ્મિકપ્રદા ॥ 26 ॥

ઓઙ્કારા હ્યોષધી ચોતા ચોતપ્રોતનિવાસિની ।

ઔર્વા હ્યૌષધસમ્પન્ના ઔપાસનફલપ્રદા ॥ 27 ॥

અણ્ડમધ્યસ્થિતા દેવી ચાઃકારમનુરૂપિણી ।

કાત્યાયની કાલરાત્રિઃ કામાક્ષી કામસુન્દરી ॥ 28 ॥

કમલા કામિની કાન્તા કામદા કાલકણ્ઠિની ।

કરિકુમ્ભસ્તનભરા કરવીરસુવાસિની ॥ 29 ॥

કલ્યાણી કુણ્ડલવતી કુરુક્ષેત્રનિવાસિની ।

કુરુવિન્દદલાકારા કુણ્ડલી કુમુદાલયા ॥ 30 ॥

કાલજિહ્વા કરાલાસ્યા કાલિકા કાલરૂપિણી ।

કમનીયગુણા કાન્તિઃ કલાધારા કુમુદ્વતી ॥ 31 ॥

કૌશિકી કમલાકારા કામચારપ્રભઞ્જિની ।

કૌમારી કરુણાપાઙ્ગી કકુવન્તા કરિપ્રિયા ॥ 32 ॥

કેસરી કેશવનુતા કદમ્બકુસુમપ્રિયા ।

કાલિન્દી કાલિકા કાઞ્ચી કલશોદ્ભવસંસ્તુતા ॥ 33 ॥

કામમાતા ક્રતુમતી કામરૂપા કૃપાવતી ।

કુમારી કુણ્ડનિલયા કિરાતી કીરવાહના ॥ 34 ॥

કૈકેયી કોકિલાલાપા કેતકી કુસુમપ્રિયા ।

કમણ્ડલુધરા કાલી કર્મનિર્મૂલકારિણી ॥ 35 ॥

કલહંસગતિઃ કક્ષા કૃતકૌતુકમઙ્ગલા ।

કસ્તૂરીતિલકા કમ્પ્રા કરીન્દ્રગમના કુહૂઃ ॥ 36 ॥

કર્પૂરલેપના કૃષ્ણા કપિલા કુહરાશ્રયા ।

કૂટસ્થા કુધરા કમ્રા કુક્ષિસ્થાખિલવિષ્ટપા ॥ 37 ॥

ખડ્ગખેટધરા ખર્વા ખેચરી ખગવાહના ।

ખટ્વાઙ્ગધારિણી ખ્યાતા ખગરાજોપરિસ્થિતા ॥ 38 ॥

ખલઘ્ની ખણ્ડિતજરા ખણ્ડાખ્યાનપ્રદાયિની ।

ખણ્ડેન્દુતિલકા ગઙ્ગા ગણેશગુહપૂજિતા ॥ 39 ॥

ગાયત્રી ગોમતી ગીતા ગાન્ધારી ગાનલોલુપા ।

ગૌતમી ગામિની ગાધા ગન્ધર્વાપ્સરસેવિતા ॥ 40 ॥

ગોવિન્દચરણાક્રાન્તા ગુણત્રયવિભાવિતા ।

ગન્ધર્વી ગહ્વરી ગોત્રા ગિરીશા ગહના ગમી ॥ 41 ॥

ગુહાવાસા ગુણવતી ગુરુપાપપ્રણાશિની ।

ગુર્વી ગુણવતી ગુહ્યા ગોપ્તવ્યા ગુણદાયિની ॥ 42 ॥

ગિરિજા ગુહ્યમાતઙ્ગી ગરુડધ્વજવલ્લભા ।

ગર્વાપહારિણી ગોદા ગોકુલસ્થા ગદાધરા ॥ 43 ॥

ગોકર્ણનિલયાસક્તા ગુહ્યમણ્ડલવર્તિની ।

ઘર્મદા ઘનદા ઘણ્ટા ઘોરદાનવમર્દિની ॥ 44 ॥

ઘૃણિમન્ત્રમયી ઘોષા ઘનસમ્પાતદાયિની ।

ઘણ્ટારવપ્રિયા ઘ્રાણા ઘૃણિસન્તુષ્ટકારિણી ॥ 45 ॥

ઘનારિમણ્ડલા ઘૂર્ણા ઘૃતાચી ઘનવેગિની ।

જ્ઞાનધાતુમયી ચર્ચા ચર્ચિતા ચારુહાસિની ॥ 46 ॥

ચટુલા ચણ્ડિકા ચિત્રા ચિત્રમાલ્યવિભૂષિતા ।

ચતુર્ભુજા ચારુદન્તા ચાતુરી ચરિતપ્રદા ॥ 47 ॥

ચૂલિકા ચિત્રવસ્ત્રાન્તા ચન્દ્રમઃકર્ણકુણ્ડલા ।

ચન્દ્રહાસા ચારુદાત્રી ચકોરી ચન્દ્રહાસિની ॥ 48 ॥

ચન્દ્રિકા ચન્દ્રધાત્રી ચ ચૌરી ચૌરા ચ ચણ્ડિકા ।

ચઞ્ચદ્વાગ્વાદિની ચન્દ્રચૂડા ચોરવિનાશિની ॥ 49 ॥

ચારુચન્દનલિપ્તાઙ્ગી ચઞ્ચચ્ચામરવીજિતા ।

ચારુમધ્યા ચારુગતિશ્ચન્દિલા ચન્દ્રરૂપિણી ॥ 50 ॥

ચારુહોમપ્રિયા ચાર્વાચરિતા ચક્રબાહુકા ।

ચન્દ્રમણ્ડલમધ્યસ્થા ચન્દ્રમણ્ડલદર્પણા ॥ 51 ॥

ચક્રવાકસ્તની ચેષ્ટા ચિત્રા ચારુવિલાસિની ।

ચિત્સ્વરૂપા ચન્દ્રવતી ચન્દ્રમાશ્ચન્દનપ્રિયા ॥ 52 ॥

ચોદયિત્રી ચિરપ્રજ્ઞા ચાતકા ચારુહેતુકી ।

છત્રયાતા છત્રધરા છાયા છન્દઃપરિચ્છદા ॥ 53 ॥

છાયાદેવી છિદ્રનખા છન્નેન્દ્રિયવિસર્પિણી ।

છન્દોઽનુષ્ટુપ્પ્રતિષ્ઠાન્તા છિદ્રોપદ્રવભેદિની ॥ 54 ॥

છેદા છત્રેશ્વરી છિન્ના છુરિકા છેદનપ્રિયા ।

જનની જન્મરહિતા જાતવેદા જગન્મયી ॥ 55 ॥

જાહ્નવી જટિલા જેત્રી જરામરણવર્જિતા ।

જમ્બૂદ્વીપવતી જ્વાલા જયન્તી જલશાલિની ॥ 56 ॥

જિતેન્દ્રિયા જિતક્રોધા જિતામિત્રા જગત્પ્રિયા ।

જાતરૂપમયી જિહ્વા જાનકી જગતી જરા ॥ 57 ॥

જનિત્રી જહ્નુતનયા જગત્ત્રયહિતૈષિણી ।

જ્વાલામુખી જપવતી જ્વરઘ્ની જિતવિષ્ટપા ॥ 58 ॥

જિતાક્રાન્તમયી જ્વાલા જાગ્રતી જ્વરદેવતા ।

જ્વલન્તી જલદા જ્યેષ્ઠા જ્યાઘોષાસ્ફોટદિઙ્મુખી ॥ 59 ॥

જમ્ભિની જૃમ્ભણા જૃમ્ભા જ્વલન્માણિક્યકુણ્ડલા ।

ઝિઞ્ઝિકા ઝણનિર્ઘોષા ઝઞ્ઝામારુતવેગિની ॥ 60 ॥

ઝલ્લરીવાદ્યકુશલા ઞરૂપા ઞભુજા સ્મૃતા ।

ટઙ્કબાણસમાયુક્તા ટઙ્કિની ટઙ્કભેદિની ॥ 61 ॥

ટઙ્કીગણકૃતાઘોષા ટઙ્કનીયમહોરસા ।

ટઙ્કારકારિણી દેવી ઠઠશબ્દનિનાદિની ॥ 62 ॥

ડામરી ડાકિની ડિમ્ભા ડુણ્ડુમારૈકનિર્જિતા ।

ડામરીતન્ત્રમાર્ગસ્થા ડમડ્ડમરુનાદિની ॥ 63 ॥

ડિણ્ડીરવસહા ડિમ્ભલસત્ક્રીડાપરાયણા ।

ઢુણ્ઢિવિઘ્નેશજનની ઢક્કાહસ્તા ઢિલિવ્રજા ॥ 64 ॥

નિત્યજ્ઞાના નિરુપમા નિર્ગુણા નર્મદા નદી ।

ત્રિગુણા ત્રિપદા તન્ત્રી તુલસી તરુણા તરુઃ ॥ 65 ॥

ત્રિવિક્રમપદાક્રાન્તા તુરીયપદગામિની ।

તરુણાદિત્યસઙ્કાશા તામસી તુહિના તુરા ॥ 66 ॥

ત્રિકાલજ્ઞાનસમ્પન્ના ત્રિવેણી ચ ત્રિલોચના ।

ત્રિશક્તિસ્ત્રિપુરા તુઙ્ગા તુરઙ્ગવદના તથા ॥ 67 ॥

તિમિઙ્ગિલગિલા તીવ્રા ત્રિસ્રોતા તામસાદિની ।

તન્ત્રમન્ત્રવિશેષજ્ઞા તનુમધ્યા ત્રિવિષ્ટપા ॥ 68 ॥

ત્રિસન્ધ્યા ત્રિસ્તની તોષાસંસ્થા તાલપ્રતાપિની ।

તાટઙ્કિની તુષારાભા તુહિનાચલવાસિની ॥ 69 ॥

તન્તુજાલસમાયુક્તા તારહારાવલિપ્રિયા ।

તિલહોમપ્રિયા તીર્થા તમાલકુસુમાકૃતિઃ ॥ 70 ॥

તારકા ત્રિયુતા તન્વી ત્રિશઙ્કુપરિવારિતા ।

તલોદરી તિલાભૂષા તાટઙ્કપ્રિયવાદિની ॥ 71 ॥

ત્રિજટા તિત્તિરી તૃષ્ણા ત્રિવિધા તરુણાકૃતિઃ ।

તપ્તકાઞ્ચનસઙ્કાશા તપ્તકાઞ્ચનભૂષણા ॥ 72 ॥

ત્રૈયમ્બકા ત્રિવર્ગા ચ ત્રિકાલજ્ઞાનદાયિની ।

તર્પણા તૃપ્તિદા તૃપ્તા તામસી તુમ્બુરુસ્તુતા ॥ 73 ॥

તાર્ક્ષ્યસ્થા ત્રિગુણાકારા ત્રિભઙ્ગી તનુવલ્લરિઃ ।

થાત્કારી થારવા થાન્તા દોહિની દીનવત્સલા ॥ 74 ॥

દાનવાન્તકરી દુર્ગા દુર્ગાસુરનિબર્હિણી ।

દેવરીતિર્દિવારાત્રિર્દ્રૌપદી દુન્દુભિસ્વના ॥ 75 ॥

દેવયાની દુરાવાસા દારિદ્ર્યોદ્ભેદિની દિવા ।

દામોદરપ્રિયા દીપ્તા દિગ્વાસા દિગ્વિમોહિની ॥ 76 ॥

દણ્ડકારણ્યનિલયા દણ્ડિની દેવપૂજિતા ।

દેવવન્દ્યા દિવિષદા દ્વેષિણી દાનવાકૃતિઃ ॥ 77 ॥

દીનાનાથસ્તુતા દીક્ષા દૈવતાદિસ્વરૂપિણી ।

ધાત્રી ધનુર્ધરા ધેનુર્ધારિણી ધર્મચારિણી ॥ 78 ॥

ધુરન્ધરા ધરાધારા ધનદા ધાન્યદોહિની ।

ધર્મશીલા ધનાધ્યક્ષા ધનુર્વેદવિશારદા ॥ 79 ॥

ધૃતિર્ધન્યા ધૃતપદા ધર્મરાજપ્રિયા ધ્રુવા ।

ધૂમાવતી ધૂમકેશી ધર્મશાસ્ત્રપ્રકાશિની ॥ 80 ॥

નન્દા નન્દપ્રિયા નિદ્રા નૃનુતા નન્દનાત્મિકા ।

નર્મદા નલિની નીલા નીલકણ્ઠસમાશ્રયા ॥ 81 ॥

નારાયણપ્રિયા નિત્યા નિર્મલા નિર્ગુણા નિધિઃ ।

નિરાધારા નિરુપમા નિત્યશુદ્ધા નિરઞ્જના ॥ 82 ॥

નાદબિન્દુકલાતીતા નાદબિન્દુકલાત્મિકા ।

નૃસિંહિની નગધરા નૃપનાગવિભૂષિતા ॥ 83 ॥

નરકક્લેશશમની નારાયણપદોદ્ભવા ।

નિરવદ્યા નિરાકારા નારદપ્રિયકારિણી ॥ 84 ॥

નાનાજ્યોતિઃ સમાખ્યાતા નિધિદા નિર્મલાત્મિકા ।

નવસૂત્રધરા નીતિર્નિરુપદ્રવકારિણી ॥ 85 ॥

નન્દજા નવરત્નાઢ્યા નૈમિષારણ્યવાસિની ।

નવનીતપ્રિયા નારી નીલજીમૂતનિસ્વના ॥ 86 ॥

નિમેષિણી નદીરૂપા નીલગ્રીવા નિશીશ્વરી ।

નામાવલિર્નિશુમ્ભઘ્ની નાગલોકનિવાસિની ॥ 87 ॥

નવજામ્બૂનદપ્રખ્યા નાગલોકાધિદેવતા ।

નૂપુરાક્રાન્તચરણા નરચિત્તપ્રમોદિની ॥ 88 ॥

નિમગ્નારક્તનયના નિર્ઘાતસમનિસ્વના ।

નન્દનોદ્યાનનિલયા નિર્વ્યૂહોપરિચારિણી ॥ 89 ॥

પાર્વતી પરમોદારા પરબ્રહ્માત્મિકા પરા ।

પઞ્ચકોશવિનિર્મુક્તા પઞ્ચપાતકનાશિની ॥ 90 ॥

પરચિત્તવિધાનજ્ઞા પઞ્ચિકા પઞ્ચરૂપિણી ।

પૂર્ણિમા પરમા પ્રીતિઃ પરતેજઃ પ્રકાશિની ॥ 91 ॥

પુરાણી પૌરુષી પુણ્યા પુણ્ડરીકનિભેક્ષણા ।

પાતાલતલનિર્મગ્ના પ્રીતા પ્રીતિવિવર્ધિની ॥ 92 ॥

પાવની પાદસહિતા પેશલા પવનાશિની ।

પ્રજાપતિઃ પરિશ્રાન્તા પર્વતસ્તનમણ્ડલા ॥ 93 ॥

પદ્મપ્રિયા પદ્મસંસ્થા પદ્માક્ષી પદ્મસમ્ભવા ।

પદ્મપત્રા પદ્મપદા પદ્મિની પ્રિયભાષિણી ॥ 94 ॥

પશુપાશવિનિર્મુક્તા પુરન્ધ્રી પુરવાસિની ।

પુષ્કલા પુરુષા પર્વા પારિજાતસુમપ્રિયા ॥ 95 ॥

પતિવ્રતા પવિત્રાઙ્ગી પુષ્પહાસપરાયણા ।

પ્રજ્ઞાવતીસુતા પૌત્રી પુત્રપૂજ્યા પયસ્વિની ॥ 96 ॥

પટ્ટિપાશધરા પઙ્ક્તિઃ પિતૃલોકપ્રદાયિની ।

પુરાણી પુણ્યશીલા ચ પ્રણતાર્તિવિનાશિની ॥ 97 ॥

પ્રદ્યુમ્નજનની પુષ્ટા પિતામહપરિગ્રહા ।

પુણ્ડરીકપુરાવાસા પુણ્ડરીકસમાનના ॥ 98 ॥

પૃથુજઙ્ઘા પૃથુભુજા પૃથુપાદા પૃથૂદરી ।

પ્રવાલશોભા પિઙ્ગાક્ષી પીતવાસાઃ પ્રચાપલા ॥ 99 ॥

પ્રસવા પુષ્ટિદા પુણ્યા પ્રતિષ્ઠા પ્રણવાગતિઃ ।

પઞ્ચવર્ણા પઞ્ચવાણી પઞ્ચિકા પઞ્જરસ્થિતા ॥ 100 ॥

પરમાયા પરજ્યોતિઃ પરપ્રીતિઃ પરાગતિઃ ।

પરાકાષ્ઠા પરેશાની પાવની પાવકદ્યુતિઃ ॥ 101 ॥

પુણ્યભદ્રા પરિચ્છેદ્યા પુષ્પહાસા પૃથૂદરી ।

પીતાઙ્ગી પીતવસના પીતશય્યા પિશાચિની ॥ 102 ॥

પીતક્રિયા પિશાચઘ્ની પાટલાક્ષી પટુક્રિયા ।

પઞ્ચભક્ષપ્રિયાચારા પૂતનાપ્રાણઘાતિની ॥ 103 ॥

પુન્નાગવનમધ્યસ્થા પુણ્યતીર્થનિષેવિતા ।

પઞ્ચાઙ્ગી ચ પરાશક્તિઃ પરમાહ્લાદકારિણી ॥ 104 ॥

પુષ્પકાણ્ડસ્થિતા પૂષા પોષિતાખિલવિષ્ટપા ।

પ્રાણપ્રિયા પઞ્ચશિખા પન્નગોપરિશાયિની ॥ 105 ॥

પઞ્ચમાત્રાત્મિકા પૃથ્વી પથિકા પૃથુદોહિની ।

પુરાણન્યાયમીમાંસા પાટલી પુષ્પગન્ધિની ॥ 106 ॥

પુણ્યપ્રજા પારદાત્રી પરમાર્ગૈકગોચરા ।

પ્રવાલશોભા પૂર્ણાશા પ્રણવા પલ્લવોદરી ॥ 107 ॥

ફલિની ફલદા ફલ્ગુઃ ફૂત્કારી ફલકાકૃતિઃ ।

ફણીન્દ્રભોગશયના ફણિમણ્ડલમણ્ડિતા ॥ 108 ॥

બાલબાલા બહુમતા બાલાતપનિભાંશુકા ।

બલભદ્રપ્રિયા વન્દ્યા બડવા બુદ્ધિસંસ્તુતા ॥ 109 ॥

બન્દીદેવી બિલવતી બડિશઘ્ની બલિપ્રિયા ।

બાન્ધવી બોધિતા બુદ્ધિર્બન્ધૂકકુસુમપ્રિયા ॥ 110 ॥

બાલભાનુપ્રભાકારા બ્રાહ્મી બ્રાહ્મણદેવતા ।

બૃહસ્પતિસ્તુતા બૃન્દા બૃન્દાવનવિહારિણી ॥ 111 ॥

બાલાકિની બિલાહારા બિલવાસા બહૂદકા ।

બહુનેત્રા બહુપદા બહુકર્ણાવતંસિકા ॥ 112 ॥

બહુબાહુયુતા બીજરૂપિણી બહુરૂપિણી ।

બિન્દુનાદકલાતીતા બિન્દુનાદસ્વરૂપિણી ॥ 113 ॥

બદ્ધગોધાઙ્ગુલિત્રાણા બદર્યાશ્રમવાસિની ।

બૃન્દારકા બૃહત્સ્કન્ધા બૃહતી બાણપાતિની ॥ 114 ॥

બૃન્દાધ્યક્ષા બહુનુતા વનિતા બહુવિક્રમા ।

બદ્ધપદ્માસનાસીના બિલ્વપત્રતલસ્થિતા ॥ 115 ॥

બોધિદ્રુમનિજાવાસા બડિસ્થા બિન્દુદર્પણા ।

બાલા બાણાસનવતી બડબાનલવેગિની ॥ 116 ॥

બ્રહ્માણ્ડબહિરન્તઃસ્થા બ્રહ્મકઙ્કણસૂત્રિણી ।

ભવાની ભીષણવતી ભાવિની ભયહારિણી ॥ 117 ॥

ભદ્રકાલી ભુજઙ્ગાક્ષી ભારતી ભારતાશયા ।

ભૈરવી ભીષણાકારા ભૂતિદા ભૂતિમાલિની ॥ 118 ॥

ભામિની ભોગનિરતા ભદ્રદા ભૂરિવિક્રમા ।

ભૂતવાસા ભૃગુલતા ભાર્ગવી ભૂસુરાર્ચિતા ॥ 119 ॥

ભાગીરથી ભોગવતી ભવનસ્થા ભિષગ્વરા ।

ભામિની ભોગિની ભાષા ભવાની ભૂરિદક્ષિણા ॥ 120 ॥

ભર્ગાત્મિકા ભીમવતી ભવબન્ધવિમોચિની ।

ભજનીયા ભૂતધાત્રીરઞ્જિતા ભુવનેશ્વરી ॥ 121 ॥

ભુજઙ્ગવલયા ભીમા ભેરુણ્ડા ભાગધેયિની ।

માતા માયા મધુમતી મધુજિહ્વા મધુપ્રિયા ॥ 122 ॥

મહાદેવી મહાભાગા માલિની મીનલોચના ।

માયાતીતા મધુમતી મધુમાંસા મધુદ્રવા ॥ 123 ॥

માનવી મધુસમ્ભૂતા મિથિલાપુરવાસિની ।

મધુકૈટભસંહર્ત્રી મેદિની મેઘમાલિની ॥ 124 ॥

મન્દોદરી મહામાયા મૈથિલી મસૃણપ્રિયા ।

મહાલક્ષ્મીર્મહાકાલી મહાકન્યા મહેશ્વરી ॥ 125 ॥

માહેન્દ્રી મેરુતનયા મન્દારકુસુમાર્ચિતા ।

મઞ્જુમઞ્જીરચરણા મોક્ષદા મઞ્જુભાષિણી ॥ 126 ॥

મધુરદ્રાવિણી મુદ્રા મલયા મલયાન્વિતા ।

મેધા મરકતશ્યામા માગધી મેનકાત્મજા ॥ 127 ॥

મહામારી મહાવીરા મહાશ્યામા મનુસ્તુતા ।

માતૃકા મિહિરાભાસા મુકુન્દપદવિક્રમા ॥ 128 ॥

મૂલાધારસ્થિતા મુગ્ધા મણિપૂરકવાસિની ।

મૃગાક્ષી મહિષારૂઢા મહિષાસુરમર્દિની ॥ 129 ॥

યોગાસના યોગગમ્યા યોગા યૌવનકાશ્રયા ।

યૌવની યુદ્ધમધ્યસ્થા યમુના યુગધારિણી ॥ 130 ॥

યક્ષિણી યોગયુક્તા ચ યક્ષરાજપ્રસૂતિની ।

યાત્રા યાનવિધાનજ્ઞા યદુવંશસમુદ્ભવા ॥ 131 ॥

યકારાદિહકારાન્તા યાજુષી યજ્ઞરૂપિણી ।

યામિની યોગનિરતા યાતુધાનભયઙ્કરી ॥ 132 ॥

રુક્મિણી રમણી રામા રેવતી રેણુકા રતિઃ ।

રૌદ્રી રૌદ્રપ્રિયાકારા રામમાતા રતિપ્રિયા ॥ 133 ॥

રોહિણી રાજ્યદા રેવા રમા રાજીવલોચના ।

રાકેશી રૂપસમ્પન્ના રત્નસિંહાસનસ્થિતા ॥ 134 ॥

રક્તમાલ્યામ્બરધરા રક્તગન્ધાનુલેપના ।

રાજહંસસમારૂઢા રમ્ભા રક્તબલિપ્રિયા ॥ 135 ॥

રમણીયયુગાધારા રાજિતાખિલભૂતલા ।

રુરુચર્મપરીધાના રથિની રત્નમાલિકા ॥ 136 ॥

રોગેશી રોગશમની રાવિણી રોમહર્ષિણી ।

રામચન્દ્રપદાક્રાન્તા રાવણચ્છેદકારિણી ॥ 137 ॥

રત્નવસ્ત્રપરિચ્છન્ના રથસ્થા રુક્મભૂષણા ।

લજ્જાધિદેવતા લોલા લલિતા લિઙ્ગધારિણી ॥ 138 ॥

લક્ષ્મીર્લોલા લુપ્તવિષા લોકિની લોકવિશ્રુતા ।

લજ્જા લમ્બોદરી દેવી લલના લોકધારિણી ॥ 139 ॥

વરદા વન્દિતા વિદ્યા વૈષ્ણવી વિમલાકૃતિઃ ।

વારાહી વિરજા વર્ષા વરલક્ષ્મીર્વિલાસિની ॥ 140 ॥

વિનતા વ્યોમમધ્યસ્થા વારિજાસનસંસ્થિતા ।

વારુણી વેણુસમ્ભૂતા વીતિહોત્રા વિરૂપિણી ॥ 141 ॥

વાયુમણ્ડલમધ્યસ્થા વિષ્ણુરૂપા વિધિપ્રિયા ।

વિષ્ણુપત્ની વિષ્ણુમતી વિશાલાક્ષી વસુન્ધરા ॥ 142 ॥

વામદેવપ્રિયા વેલા વજ્રિણી વસુદોહિની ।

વેદાક્ષરપરીતાઙ્ગી વાજપેયફલપ્રદા ॥ 143 ॥

વાસવી વામજનની વૈકુણ્ઠનિલયા વરા ।

વ્યાસપ્રિયા વર્મધરા વાલ્મીકિપરિસેવિતા ॥ 144 ॥

શાકમ્ભરી શિવા શાન્તા શારદા શરણાગતિઃ ।

શાતોદરી શુભાચારા શુમ્ભાસુરવિમર્દિની ॥ 145 ॥

શોભાવતી શિવાકારા શઙ્કરાર્ધશરીરિણી ।

શોણા શુભાશયા શુભ્રા શિરઃસન્ધાનકારિણી ॥ 146 ॥

શરાવતી શરાનન્દા શરજ્જ્યોત્સ્ના શુભાનના ।

શરભા શૂલિની શુદ્ધા શબરી શુકવાહના ॥ 147 ॥

શ્રીમતી શ્રીધરાનન્દા શ્રવણાનન્દદાયિની ।

શર્વાણી શર્વરીવન્દ્યા ષડ્ભાષા ષડૃતુપ્રિયા ॥ 148 ॥

ષડાધારસ્થિતા દેવી ષણ્મુખપ્રિયકારિણી ।

ષડઙ્ગરૂપસુમતી સુરાસુરનમસ્કૃતા ॥ 149 ॥

સરસ્વતી સદાધારા સર્વમઙ્ગલકારિણી ।

સામગાનપ્રિયા સૂક્ષ્મા સાવિત્રી સામસમ્ભવા ॥ 150 ॥

સર્વાવાસા સદાનન્દા સુસ્તની સાગરામ્બરા ।

સર્વૈશ્વર્યપ્રિયા સિદ્ધિઃ સાધુબન્ધુપરાક્રમા ॥ 151 ॥

સપ્તર્ષિમણ્ડલગતા સોમમણ્ડલવાસિની ।

સર્વજ્ઞા સાન્દ્રકરુણા સમાનાધિકવર્જિતા ॥ 152 ॥

સર્વોત્તુઙ્ગા સઙ્ગહીના સદ્ગુણા સકલેષ્ટદા ।

સરધા સૂર્યતનયા સુકેશી સોમસંહતિઃ ॥ 153 ॥

હિરણ્યવર્ણા હરિણી હ્રીઙ્કારી હંસવાહિની ।

ક્ષૌમવસ્ત્રપરીતાઙ્ગી ક્ષીરાબ્ધિતનયા ક્ષમા ॥ 154 ॥

ગાયત્રી ચૈવ સાવિત્રી પાર્વતી ચ સરસ્વતી ।

વેદગર્ભા વરારોહા શ્રીગાયત્રી પરામ્બિકા ॥ 155 ॥

ઇતિ સાહસ્રકં નામ્નાં ગાયત્ર્યાશ્ચૈવ નારદ ।

પુણ્યદં સર્વપાપઘ્નં મહાસમ્પત્તિદાયકમ્ ॥ 156 ॥

એવં નામાનિ ગાયત્ર્યાસ્તોષોત્પત્તિકરાણિ હિ ।

અષ્ટમ્યાં ચ વિશેષેણ પઠિતવ્યં દ્વિજૈઃ સહ ॥ 157 ॥

જપં કૃત્વા હોમ પૂજા ધ્યાનં કૃત્વા વિશેષતઃ ।

યસ્મૈ કસ્મૈ ન દાતવ્યં ગાયત્ર્યાસ્તુ વિશેષતઃ ॥ 158 ॥

સુભક્તાય સુશિષ્યાય વક્તવ્યં ભૂસુરાય વૈ ।

ભ્રષ્ટેભ્યઃ સાધકેભ્યશ્ચ બાન્ધવેભ્યો ન દર્શયેત્ ॥ 159 ॥

યદ્ગૃહે લિખિતં શાસ્ત્રં ભયં તસ્ય ન કસ્યચિત્ ।

ચઞ્ચલાપિસ્થિરા ભૂત્વા કમલા તત્ર તિષ્ઠતિ ॥ 160 ॥

ઇદં રહસ્યં પરમં ગુહ્યાદ્ગુહ્યતરં મહત્ ।

પુણ્યપ્રદં મનુષ્યાણાં દરિદ્રાણાં નિધિપ્રદમ્ ॥ 161 ॥

મોક્ષપ્રદં મુમુક્ષૂણાં કામિનાં સર્વકામદમ્ ।

રોગાદ્વૈ મુચ્યતે રોગી બદ્ધો મુચ્યેત બન્ધનાત્ ॥ 162 ॥

બ્રહ્મહત્યા સુરાપાનં સુવર્ણસ્તેયિનો નરાઃ ।

ગુરુતલ્પગતો વાપિ પાતકાન્મુચ્યતે સકૃત્ ॥ 163 ॥

અસત્પ્રતિગ્રહાચ્ચૈવાઽભક્ષ્યભક્ષાદ્વિશેષતઃ ।

પાખણ્ડાનૃતમુખ્યેભ્યઃ પઠનાદેવ મુચ્યતે ॥ 164 ॥

ઇદં રહસ્યમમલં મયોક્તં પદ્મજોદ્ભવ ।

બ્રહ્મસાયુજ્યદં નૄણાં સત્યં સત્યં ન સંશયઃ ॥ 165 ॥

ઇતિ શ્રીદેવીભાગવતે મહાપુરાણે દ્વાદશસ્કન્ધે ગાયત્રીસહસ્રનામ સ્તોત્ર કથનં નામ ષષ્ઠોઽધ્યાયઃ ॥