Saraswati Suktam

सरस्वती सूक्तम्

श्लोक 1

-(ऋ.वे.6.61)

इ॒यम्॑ददाद्रभ॒समृ॑ण॒च्युत॒-न्दिवो᳚दासं-वँद्र्य॒श्वाय॑ दा॒शुषे᳚ ।

या शश्व᳚न्तमाच॒खशदा᳚व॒स-म्प॒णि-न्ता ते᳚ दा॒त्राणि॑ तवि॒षा स॑रस्वति

श्लोक 2

इ॒यं शुष्मे᳚भिर्बिस॒खा इ॑वारुज॒त्सानु॑ गिरी॒णा-न्त॑वि॒षेभि॑रू॒र्मिभिः॑ ।

पा॒रा॒व॒त॒घ्नीमव॑से सुवृ॒क्तिभि॑स्सर॑स्वती॒ मा वि॑वासेम धी॒तिभिः॑

॥ 1 ॥

श्लोक 3

सर॑स्वति देव॒निदो॒ नि ब॑र्​हय प्र॒जां-विँश्व॑स्य॒ बृस॑यस्य मा॒यिनः॑ ।

उ॒त क्षि॒तिभ्यो॒-ऽवनी᳚रविन्दो वि॒षमे᳚भ्यो अस्रवो वाजिनीवति

॥ 2 ॥

श्लोक 4

प्रणो᳚ दे॒वी सर॑स्वती॒ वाजे᳚भिर्वा॒जिनी᳚वती ।

धी॒नाम॑वि॒त्र्य॑वतु

॥ 3 ॥

श्लोक 5

यस्त्वा᳚ देवि सरस्वत्युपब्रू॒ते धने᳚ हि॒ते ।

इन्द्र॒-न्न वृ॑त्र॒तूर्ये᳚

॥ 4 ॥

श्लोक 6

त्व-न्दे᳚वि सरस्व॒त्यवा॒ वाजे᳚षु वाजिनि ।

रदा᳚ पू॒षेव॑ न-स्स॒निम्

॥ 5 ॥

श्लोक 7

उ॒त स्या न॒-स्सर॑स्वती घो॒रा हिर᳚ण्यवर्तनिः ।

वृ॒त्र॒घ्नी व॑ष्टि सुष्टु॒तिम्

॥ 6 ॥

श्लोक 8

यस्या᳚ अन॒न्तो अह्रु॑तस्त्वे॒षश्च॑रि॒ष्णुर᳚र्ण॒वः ।

अम॒श्चर॑ति॒ रोरु॑वत्

॥ 7 ॥

श्लोक 9

सा नो॒ विश्वा॒ अति॒ द्विष॒-स्स्वसॄ᳚र॒न्या ऋ॒ताव॑री ।

अत॒न्नहे᳚व॒ सूर्यः॑

॥ 8 ॥

श्लोक 10

उ॒त नः॑ प्रि॒या प्रि॒यासु॑ स॒प्तस्व॑सा॒ सुजु॑ष्टा ।

सर॑स्वती॒ स्तोम्या᳚ भूत्

॥ 9 ॥

श्लोक 11

आ॒प॒प्रुषी॒ पार्थि॑वान्यु॒रु रजो᳚ अ॒न्तरि॑क्षम् ।

सर॑स्वती नि॒दस्पा᳚तु

॥ 10 ॥

श्लोक 12

त्रि॒ष॒धस्था᳚ स॒प्तधा᳚तुः॒ पञ्च॑ जा॒ता व॒र्धय᳚न्ती ।

वाजे᳚वाजे॒ हव्या᳚ भूत्

॥ 11 ॥

श्लोक 13

प्र या म॑हि॒म्ना म॒हिना᳚सु॒ चेकि॑ते द्यु॒म्नेभि॑र॒न्या अ॒पसा᳚म॒पस्त॑मा ।

रथ॑ इव बृह॒ती वि॒भ्वने᳚ कृ॒तोप॒स्तुत्या᳚ चिकि॒तुषा॒ सर॑स्वती

॥ 12 ॥

श्लोक 14

सर॑स्वत्य॒भि नो᳚ नेषि॒ वस्यो॒ माप॑ स्फरीः॒ पय॑सा॒ मा न॒ आ ध॑क् ।

जु॒षस्व॑ न-स्स॒ख्या वे॒श्या᳚ च॒ मा त्व-त्क्षेत्रा॒ण्यर॑णानि गन्म

॥ 13 ॥

श्लोक 15

–(ऋ.वे.7.95)

प्र क्षोद॑सा॒ धाय॑सा सस्र ए॒षा सर॑स्वती ध॒रुण॒माय॑सी॒ पूः ।

प्र॒बाब॑धाना र॒थ्ये᳚व याति॒ विश्वा᳚ अ॒पो म॑हि॒ना सिन्धु॑र॒न्याः

॥ 14 ॥

श्लोक 16

एका᳚चेत॒त्सर॑स्वती न॒दीनां॒ शुचि᳚र्य॒ती गि॒रिभ्य॒ आ स॑मु॒द्रात् ।

रा॒यश्चेत᳚न्ती॒ भुव॑नस्य॒ भूरे᳚र्घृ॒त-म्पयो᳚ दुदुहे॒ नाहु॑षाय

॥ 15 ॥

श्लोक 17

स वा᳚वृधे॒ नर्यो॒ योष॑णासु॒ वृषा॒ शिशु᳚र्वृष॒भो य॒ज्ञिया᳚सु ।

स वा॒जिन᳚-म्म॒घव॑द्भ्यो दधाति॒ वि सा॒तये᳚ त॒न्व᳚-म्मामृजीत

॥ 16 ॥

श्लोक 18

उ॒त स्या न॒-स्सर॑स्वती जुषा॒णोप॑ श्रवत्सु॒भगा᳚ य॒ज्ञे अ॒स्मिन्न् ।

मि॒तज्ञु॑भिर्नम॒स्यै᳚रिया॒ना रा॒या यु॒जा चि॒दुत्त॑रा॒ सखि॑भ्यः

॥ 17 ॥

श्लोक 19

इ॒मा जुह्वा᳚ना यु॒ष्मदा नमो᳚भिः॒ प्रति॒ स्तोमं᳚ सरस्वति जुषस्व ।

तव॒ शर्म᳚न्प्रि॒यत॑मे॒ दधा᳚ना॒ उप॑ स्थेयाम शर॒ण-न्न वृ॒क्षम्

॥ 18 ॥

श्लोक 20

अ॒यमु॑ ते सरस्वति॒ वसि॑ष्ठो॒ द्वारा᳚वृ॒तस्य॑ सुभगे॒ व्या᳚वः ।

वर्ध॑ शुभ्रे स्तुव॒ते रा᳚सि॒ वाजा॑न्यू॒य-म्पा᳚त स्व॒स्तिभि॒-स्सदा᳚ नः

॥ 19 ॥

श्लोक 21

(ऋ.वे.7.96)

बृ॒हदु॑ गायिषे॒ वचो᳚-ऽसु॒र्या᳚ न॒दीना᳚म् ।

सर॑स्वती॒मिन्म॑हया सुवृ॒क्तिभि॒स्स्तोमै᳚र्वसिष्ठ॒ रोद॑सी

॥ 20 ॥

श्लोक 22

उ॒भे यत्ते᳚ महि॒ना शु॑भ्रे॒ अन्ध॑सी अधिक्षि॒यन्ति॑ पू॒रवः॑ ।

सा नो᳚ बोध्यवि॒त्री म॒रुत्स॑खा॒ चोद॒ राधो᳚ म॒घोना᳚म्

॥ 21 ॥

श्लोक 23

भ॒द्रमिद्भ॒द्रा कृ॑णव॒त्सर॑स्व॒त्यक॑वारी चेतति वा॒जिनी᳚वती ।

गृ॒णा॒ना ज॑मदग्नि॒वत्स्तु॑वा॒ना च॑ वसिष्ठ॒वत्

॥ 22 ॥

श्लोक 24

ज॒नी॒यन्तो॒ न्वग्र॑वः पुत्री॒यन्तः॑ सु॒दान॑वः ।

सर॑स्वन्तं हवामहे

॥ 23 ॥

श्लोक 25

ये ते᳚ सरस्व ऊ॒र्मयो॒ मधु॑मन्तो घृत॒श्चुतः॑ ।

तेभि᳚र्नो-ऽवि॒ता भ॒व

॥ 24 ॥

श्लोक 26

पी॒पि॒वांसं॒ सर॑स्वत॒-स्स्तनं॒-योँ वि॒श्वद॑र्​शतः ।

भ॒क्षी॒महि॑ प्र॒जामिषम्᳚

॥ 25 ॥

श्लोक 27

(ऋ.वे.2.41.16)

अम्बि॑तमे॒ नदी᳚तमे॒ देवि॑तमे॒ सर॑स्वति ।

अ॒प्र॒श॒स्ता इ॑व स्मसि॒ प्रश॑स्तिमम्ब नस्कृधि

॥ 26 ॥

श्लोक 28

त्वे विश्वा᳚ सरस्वति श्रि॒तायूं᳚षि दे॒व्याम् ।

शु॒नहो᳚त्रेषु मत्स्व प्र॒जा-न्दे᳚वि दिदिड्ढि नः

॥ 27 ॥

श्लोक 29

इ॒मा ब्रह्म॑ सरस्वति जु॒षस्व॑ वाजिनीवति ।

या ते॒ मन्म॑ गृत्सम॒दा ऋ॑तावरि प्रि॒या दे॒वेषु॒ जुह्व॑ति

॥ 28 ॥

श्लोक 30

(ऋ.वे.1.3.10)

पा॒व॒का न॒-स्सर॑स्वती॒ वाजे᳚भिर्वा॒जिनी᳚वती ।

य॒ज्ञं-वँ॑ष्टु धि॒याव॑सुः

॥ 29 ॥

श्लोक 31

चो॒द॒यि॒त्री सू॒नृता᳚ना॒-ञ्चेत᳚न्ती सुमती॒नाम् ।

य॒ज्ञ-न्द॑धे॒ सर॑स्वती

॥ 30 ॥

श्लोक 32

म॒हो अर्ण॒-स्सर॑स्वती॒ प्र चे᳚तयति के॒तुना᳚ ।

धियो॒ विश्वा॒ वि रा᳚जति

॥ 31 ॥

श्लोक 33

(ऋ.वे.10.17.7)

सर॑स्वती-न्देव॒यन्तो᳚ हवन्ते॒ सर॑स्वतीमध्व॒रे ता॒यमा᳚ने ।

सर॑स्वतीं सु॒कृतो᳚ अह्वयन्त॒ सर॑स्वती दा॒शुषे॒ वार्य᳚-न्दात्

॥ 32 ॥

श्लोक 34

सर॑स्वति॒ या स॒रथं᳚-यँ॒याथ॑ स्व॒धाभि॑र्देवि पि॒तृभि॒र्मद᳚न्ती ।

आ॒सद्या॒स्मिन्ब॒र्​हिषि॑ मादयस्वानमी॒वा इष॒ आ धे᳚ह्य॒स्मे

॥ 33 ॥

श्लोक 35

सर॑स्वतीं॒-याँ-म्पि॒तरो॒ हव᳚न्ते दक्षि॒णा य॒ज्ञम॑भि॒नक्ष॑माणाः ।

स॒ह॒स्रा॒र्घमि॒लो अत्र॑ भा॒गं रा॒यस्पोषं॒-यँज॑मानेषु धेहि

॥ 34 ॥

श्लोक 36

(ऋ.वे.5.43.11)

आ नो᳚ दि॒वो बृ॑ह॒तः पर्व॑ता॒दा सर॑स्वती यज॒ता ग᳚न्तु य॒ज्ञम् ।

हव᳚-न्दे॒वी जु॑जुषा॒णा घृ॒ताची᳚ श॒ग्मा-न्नो॒ वाच॑मुश॒ती शृ॑णोतु

॥ 35 ॥

श्लोक 37

(ऋ.वे.2.32.4)

रा॒काम॒हं सु॒हवां᳚ सुष्टु॒ती हु॑वे शृ॒णोतु॑ न-स्सु॒भगा॒ बोध॑तु॒ त्मना᳚ ।

सीव्य॒त्वपः॑ सू॒च्याच्छि॑द्यमानया॒ ददा᳚तु वी॒रं श॒तदा᳚यमु॒क्थ्यम्᳚

॥ 36 ॥

श्लोक 38

यास्ते᳚ राके सुम॒तयः॑ सु॒पेश॑सो॒ याभि॒र्ददा᳚सि दा॒शुषे॒ वसू᳚नि ।

ताभि᳚र्नो अ॒द्य सु॒मना᳚ उ॒पाग॑हि सहस्रपो॒षं सु॑भगे॒ ररा᳚णा

॥ 37 ॥

श्लोक 39

सिनी᳚वालि॒ पृथु॑ष्टुके॒ या दे॒वाना॒मसि॒ स्वसा᳚ ।

जु॒षस्व॑ ह॒व्यमाहु॑त-म्प्र॒जा-न्दे᳚वि दिदिड्ढि नः

॥ 38 ॥

श्लोक 40

या सु॑बा॒हु-स्स्व᳚ङ्गु॒रि-स्सु॒षूमा᳚ बहु॒सूव॑री ।

तस्यै᳚ वि॒श्पत्न्यै᳚ ह॒वि-स्सि॑नीवा॒ल्यै जु॑होतन

॥ 39 ॥

श्लोक 41

या गु॒ङ्गूर्या सि॑नीवा॒ली या रा॒का या सर॑स्वती ।

इ॒न्द्रा॒णीम॑ह्व ऊ॒तये᳚ वरुणा॒नीं स्व॒स्तये᳚

॥ 40 ॥

श्लोक 42

ॐ शान्ति॒-श्शान्ति॒-श्शान्तिः॑ ॥