സങ്ക്ഷേപ രാമായണമ്

സങ്ക്ഷേപ രാമായണമ്

ശ്ലോക 1

ശ്രീമദ്വാല്മീകീയ രാമായണേ ബാലകാണ്ഡമ് ।

അഥ പ്രഥമസ്സര്ഗഃ ।

തപസ്സ്വാധ്യായനിരതം തപസ്വീ വാഗ്വിദാം വരമ് ।

നാരദം പരിപപ്രച്ഛ വാല്മീകിര്മുനിപുങ്ഗവമ്

ശ്ലോക 2

കോഽന്വസ്മിന്സാമ്പ്രതം ലോകേ ഗുണവാന് കശ്ച വീര്യവാന് ।

ധര്മജ്ഞശ്ച കൃതജ്ഞശ്ച സത്യവാക്യോ ദൃഢവ്രതഃ

॥ 1 ॥

ശ്ലോക 3

ചാരിത്രേണ ച കോ യുക്തഃ സര്വഭൂതേഷു കോ ഹിതഃ ।

വിദ്വാന് കഃ കഃ സമര്ഥശ്ച കശ്ചൈകപ്രിയദര്ശനഃ

॥ 2 ॥

ശ്ലോക 4

ആത്മവാന് കോ ജിതക്രോധോ ദ്യുതിമാന് കോഽനസൂയകഃ ।

കസ്യ ബിഭ്യതി ദേവാശ്ച ജാതരോഷസ്യ സംയുഗേ

॥ 3 ॥

ശ്ലോക 5

ഏതദിച്ഛാമ്യഹം ശ്രോതും പരം കൌതൂഹലം ഹി മേ ।

മഹര്ഷേ ത്വം സമര്ഥോഽസി ജ്ഞാതുമേവംവിധം നരമ്

॥ 4 ॥

ശ്ലോക 6

ശ്രുത്വാ ചൈതത്ത്രിലോകജ്ഞോ വാല്മീകേര്നാരദോ വചഃ ।

ശ്രൂയതാമിതി ചാമന്ത്ര്യ പ്രഹൃഷ്ടോ വാക്യമബ്രവീത്

॥ 5 ॥

ശ്ലോക 7

ബഹവോ ദുര്ലഭാശ്ചൈവ യേ ത്വയാ കീര്തിതാ ഗുണാഃ ।

മുനേ വക്ഷ്യാമ്യഹം ബുദ്ധ്വാ തൈര്യുക്തഃ ശ്രൂയതാം നരഃ

॥ 6 ॥

ശ്ലോക 8

ഇക്ഷ്വാകുവംശപ്രഭവോ രാമോ നാമ ജനൈഃ ശ്രുതഃ ।

നിയതാത്മാ മഹാവീര്യോ ദ്യുതിമാന് ധൃതിമാന് വശീ

॥ 7 ॥

ശ്ലോക 9

ബുദ്ധിമാന് നീതിമാന് വാഗ്മീ ശ്രീമാന് ശത്രുനിബര്ഹണഃ ।

വിപുലാംസോ മഹാബാഹുഃ കമ്ബുഗ്രീവോ മഹാഹനുഃ

॥ 8 ॥

ശ്ലോക 10

മഹോരസ്കോ മഹേഷ്വാസോ ഗൂഢജത്രുരരിന്ദമഃ ।

ആജാനുബാഹുഃ സുശിരാഃ സുലലാടഃ സുവിക്രമഃ

॥ 9 ॥

ശ്ലോക 11

സമഃ സമവിഭക്താങ്ഗഃ സ്നിഗ്ധവര്ണഃ പ്രതാപവാന് ।

പീനവക്ഷാ വിശാലാക്ഷോ ലക്ഷ്മീവാന് ശുഭലക്ഷണഃ

॥ 10 ॥

ശ്ലോക 12

ധര്മജ്ഞഃ സത്യസന്ധശ്ച പ്രജാനാം ച ഹിതേ രതഃ ।

യശസ്വീ ജ്ഞാനസമ്പന്നഃ ശുചിര്വശ്യഃ സമാധിമാന്

॥ 11 ॥

ശ്ലോക 13

പ്രജാപതിസമഃ ശ്രീമാന് ധാതാ രിപുനിഷൂദനഃ ।

രക്ഷിതാ ജീവലോകസ്യ ധര്മസ്യ പരിരക്ഷിതാ

॥ 12 ॥

ശ്ലോക 14

രക്ഷിതാ സ്വസ്യ ധര്മസ്യ സ്വജനസ്യ ച രക്ഷിതാ ।

വേദവേദാങ്ഗതത്ത്വജ്ഞോ ധനുര്വേദേ ച നിഷ്ഠിതഃ

॥ 13 ॥

ശ്ലോക 15

സര്വശാസ്ത്രാര്ഥതത്ത്വജ്ഞോ സ്മൃതിമാന്പ്രതിഭാനവാന് ।

സര്വലോകപ്രിയഃ സാധുരദീനാത്മാ വിചക്ഷണഃ

॥ 14 ॥

ശ്ലോക 16

സര്വദാഭിഗതഃ സദ്ഭിഃ സമുദ്ര ഇവ സിന്ധുഭിഃ ।

ആര്യഃ സര്വസമശ്ചൈവ സദൈകപ്രിയദര്ശനഃ

॥ 15 ॥

ശ്ലോക 17

സ ച സര്വഗുണോപേതഃ കൌസല്യാനന്ദവര്ധനഃ ।

സമുദ്ര ഇവ ഗാമ്ഭീര്യേ ധൈര്യേണ ഹിമവാനിവ

॥ 16 ॥

ശ്ലോക 18

വിഷ്ണുനാ സദൃശോ വീര്യേ സോമവത്പ്രിയദര്ശനഃ ।

കാലാഗ്നിസദൃശഃ ക്രോധേ ക്ഷമയാ പൃഥിവീസമഃ

॥ 17 ॥

ശ്ലോക 19

ധനദേന സമസ്ത്യാഗേ സത്യേ ധര്മ ഇവാപരഃ ।

തമേവം ഗുണസമ്പന്നം രാമം സത്യപരാക്രമമ്

॥ 18 ॥

ശ്ലോക 20

ജ്യേഷ്ഠം ശ്രേഷ്ഠഗുണൈര്യുക്തം പ്രിയം ദശരഥഃ സുതമ് ।

പ്രകൃതീനാം ഹിതൈര്യുക്തം പ്രകൃതി പ്രിയ കാമ്യയാ

॥ 19 ॥

ശ്ലോക 21

യൌവരാജ്യേന സംയോക്തുമൈച്ഛത്പ്രീത്യാ മഹീപതിഃ ।

തസ്യാഭിഷേകസമ്ഭാരാന് ദൃഷ്ട്വാ ഭാര്യാഽഥ കൈകയീ

॥ 20 ॥

ശ്ലോക 22

പൂര്വം ദത്തവരാ ദേവീ വരമേനമയാചത ।

വിവാസനം ച രാമസ്യ ഭരതസ്യാഭിഷേചനമ്

॥ 21 ॥

ശ്ലോക 23

സ സത്യവചനാദ്രാജാ ധര്മപാശേന സംയതഃ ।

വിവാസയാമാസ സുതം രാമം ദശരഥഃ പ്രിയമ്

॥ 22 ॥

ശ്ലോക 24

സ ജഗാമ വനം വീരഃ പ്രതിജ്ഞാമനുപാലയന് ।

പിതുര്വചനനിര്ദേശാത്കൈകേയ്യാഃ പ്രിയകാരണാത്

॥ 23 ॥

ശ്ലോക 25

തം വ്രജന്തം പ്രിയോ ഭ്രാതാ ലക്ഷ്മണോഽനുജഗാമ ഹ ।

സ്നേഹാദ്വിനയസമ്പന്നഃ സുമിത്രാനന്ദവര്ധനഃ

॥ 24 ॥

ശ്ലോക 26

ഭ്രാതരം ദയിതോ ഭ്രാതുഃ സൌഭ്രാത്രമനുദര്ശയന് ।

രാമസ്യ ദയിതാ ഭാര്യാ നിത്യം പ്രാണസമാഹിതാ

॥ 25 ॥

ശ്ലോക 27

ജനകസ്യ കുലേ ജാതാ ദേവമായേവ നിര്മിതാ ।

സര്വലക്ഷണസമ്പന്നാ നാരീണാമുത്തമാ വധൂഃ

॥ 26 ॥

ശ്ലോക 28

സീതാഽപ്യനുഗതാ രാമം ശശിനം രോഹിണീ യഥാ ।

പൌരൈരനുഗതോ ദൂരം പിത്രാ ദശരഥേന ച

॥ 27 ॥

ശ്ലോക 29

ശൃങ്ഗിബേരപുരേ സൂതം ഗങ്ഗാകൂലേ വ്യസര്ജയത് ।

ഗുഹമാസാദ്യ ധര്മാത്മാ നിഷാദാധിപതിം പ്രിയമ്

॥ 28 ॥

ശ്ലോക 30

ഗുഹേന സഹിതോ രാമഃ ലക്ഷ്മണേന ച സീതയാ ।

തേ വനേന വനം ഗത്വാ നദീസ്തീര്ത്വാ ബഹൂദകാഃ

॥ 29 ॥

ശ്ലോക 31

ചിത്രകൂടമനുപ്രാപ്യ ഭരദ്വാജസ്യ ശാസനാത് ।

രമ്യമാവസഥം കൃത്വാ രമമാണാ വനേ ത്രയഃ

॥ 30 ॥

ശ്ലോക 32

ദേവഗന്ധര്വസങ്കാശാസ്തത്ര തേ ന്യവസന്സുഖമ് ।

ചിത്രകൂടം ഗതേ രാമേ പുത്രശോകാതുരസ്തഥാ

॥ 31 ॥

ശ്ലോക 33

രാജാ ദശരഥഃ സ്വര്ഗം ജഗാമ വിലപന്സുതമ് ।

മൃതേ തു തസ്മിന്ഭരതോ വസിഷ്ഠപ്രമുഖൈര്ദ്വിജൈഃ

॥ 32 ॥

ശ്ലോക 34

നിയുജ്യമാനോ രാജ്യായ നൈച്ഛദ്രാജ്യം മഹാബലഃ ।

സ ജഗാമ വനം വീരോ രാമപാദപ്രസാദകഃ

॥ 33 ॥

ശ്ലോക 35

ഗത്വാ തു സ മഹാത്മാനം രാമം സത്യപരാക്രമമ് ।

അയാചദ്ഭ്രാതരം രാമം ആര്യഭാവപുരസ്കൃതഃ

॥ 34 ॥

ശ്ലോക 36

ത്വമേവ രാജാ ധര്മജ്ഞ ഇതി രാമം വചോഽബ്രവീത് ।

രാമോഽപി പരമോദാരഃ സുമുഖസ്സുമഹായശാഃ

॥ 35 ॥

ശ്ലോക 37

ന ചൈച്ഛത്പിതുരാദേശാദ്രാജ്യം രാമോ മഹാബലഃ ।

പാദുകേ ചാസ്യ രാജ്യായ ന്യാസം ദത്ത്വാ പുനഃ പുനഃ

॥ 36 ॥

ശ്ലോക 38

നിവര്തയാമാസ തതോ ഭരതം ഭരതാഗ്രജഃ ।

സ കാമമനവാപ്യൈവ രാമപാദാവുപസ്പൃശന്

॥ 37 ॥

ശ്ലോക 39

നന്ദിഗ്രാമേഽകരോദ്രാജ്യം രാമാഗമനകാങ്ക്ഷയാ ।

ഗതേ തു ഭരതേ ശ്രീമാന് സത്യസന്ധോ ജിതേന്ദ്രിയഃ

॥ 38 ॥

ശ്ലോക 40

രാമസ്തു പുനരാലക്ഷ്യ നാഗരസ്യ ജനസ്യ ച ।

തത്രാഗമനമേകാഗ്രോ ദണ്ഡകാന്പ്രവിവേശ ഹ

॥ 39 ॥

ശ്ലോക 41

പ്രവിശ്യ തു മഹാരണ്യം രാമോ രാജീവലോചനഃ ।

വിരാധം രാക്ഷസം ഹത്വാ ശരഭങ്ഗം ദദര്ശ ഹ

॥ 40 ॥

ശ്ലോക 42

സുതീക്ഷ്ണം ചാപ്യഗസ്ത്യം ച അഗസ്ത്യഭ്രാതരം തഥാ ।

അഗസ്ത്യവചനാച്ചൈവ ജഗ്രാഹൈന്ദ്രം ശരാസനമ്

॥ 41 ॥

ശ്ലോക 43

ഖഡ്ഗം ച പരമപ്രീതസ്തൂണീ ചാക്ഷയസായകൌ ।

വസതസ്തസ്യ രാമസ്യ വനേ വനചരൈഃ സഹ

॥ 42 ॥

ശ്ലോക 44

ഋഷയോഽഭ്യാഗമന്സര്വേ വധായാസുരരക്ഷസാമ് ।

സ തേഷാം പ്രതിശുശ്രാവ രാക്ഷസാനാം തഥാ വനേ

॥ 43 ॥

ശ്ലോക 45

പ്രതിജ്ഞാതശ്ച രാമേണ വധഃ സംയതി രക്ഷസാമ് ।

ഋഷീണാമഗ്നികല്പാനാം ദണ്ഡകാരണ്യവാസിനാമ്

॥ 44 ॥

ശ്ലോക 46

തേന തത്രൈവ വസതാ ജനസ്ഥാനനിവാസിനീ ।

വിരൂപിതാ ശൂര്പണഖാ രാക്ഷസീ കാമരൂപിണീ

॥ 45 ॥

ശ്ലോക 47

തതഃ ശൂര്പണഖാവാക്യാദുദ്യുക്താന്സര്വരാക്ഷസാന് ।

ഖരം ത്രിശിരസം ചൈവ ദൂഷണം ചൈവ രാക്ഷസമ്

॥ 46 ॥

ശ്ലോക 48

നിജഘാന രണേ രാമസ്തേഷാം ചൈവ പദാനുഗാന് ।

വനേ തസ്മിന്നിവസതാ ജനസ്ഥാനനിവാസിനാമ്

॥ 47 ॥

ശ്ലോക 49

രക്ഷസാം നിഹതാന്യാസന്സഹസ്രാണി ചതുര്ദശ ।

തതോ ജ്ഞാതിവധം ശ്രുത്വാ രാവണഃ ക്രോധമൂര്ഛിതഃ

॥ 48 ॥

ശ്ലോക 50

സഹായം വരയാമാസ മാരീചം നാമ രാക്ഷസമ് ।

വാര്യമാണഃ സുബഹുശോ മാരീചേന സ രാവണഃ

॥ 49 ॥

ശ്ലോക 51

ന വിരോധോ ബലവതാ ക്ഷമോ രാവണ തേന തേ ।

അനാദൃത്യ തു തദ്വാക്യം രാവണഃ കാലചോദിതഃ

॥ 50 ॥

ശ്ലോക 52

ജഗാമ സഹമാരീചഃ തസ്യാശ്രമപദം തദാ ।

തേന മായാവിനാ ദൂരമപവാഹ്യ നൃപാത്മജൌ

॥ 51 ॥

ശ്ലോക 53

ജഹാര ഭാര്യാം രാമസ്യ ഗൃധ്രം ഹത്വാ ജടായുഷമ് ।

ഗൃധ്രം ച നിഹതം ദൃഷ്ട്വാ ഹൃതാം ശ്രുത്വാ ച മൈഥിലീമ്

॥ 52 ॥

ശ്ലോക 54

രാഘവഃ ശോകസന്തപ്തോ വിലലാപാകുലേന്ദ്രിയഃ ।

തതസ്തേനൈവ ശോകേന ഗൃധ്രം ദഗ്ധ്വാ ജടായുഷമ്

॥ 53 ॥

ശ്ലോക 55

മാര്ഗമാണോ വനേ സീതാം രാക്ഷസം സന്ദദര്ശ ഹ ।

കബന്ധം നാമ രൂപേണ വികൃതം ഘോരദര്ശനമ്

॥ 54 ॥

ശ്ലോക 56

തം നിഹത്യ മഹാബാഹുഃ ദദാഹ സ്വര്ഗതശ്ച സഃ ।

സ ചാസ്യ കഥയാമാസ ശബരീം ധര്മചാരിണീമ്

॥ 55 ॥

ശ്ലോക 57

ശ്രമണീം ധര്മനിപുണാമഭിഗച്ഛേതി രാഘവമ് ।

സോഽഭ്യഗച്ഛന്മഹാതേജാഃ ശബരീം ശത്രുസൂദനഃ

॥ 56 ॥

ശ്ലോക 58

ശബര്യാ പൂജിതഃ സമ്യഗ്രാമോ ദശരഥാത്മജഃ ।

പമ്പാതീരേ ഹനുമതാ സങ്ഗതോ വാനരേണ ഹ

॥ 57 ॥

ശ്ലോക 59

ഹനുമദ്വചനാച്ചൈവ സുഗ്രീവേണ സമാഗതഃ ।

സുഗ്രീവായ ച തത്സര്വം ശംസദ്രാമോ മഹാബലഃ

॥ 58 ॥

ശ്ലോക 60

ആദിതസ്തദ്യഥാവൃത്തം സീതയാശ്ച വിശേഷതഃ ।

സുഗ്രീവശ്ചാപി തത്സര്വം ശ്രുത്വാ രാമസ്യ വാനരഃ

॥ 59 ॥

ശ്ലോക 61

ചകാര സഖ്യം രാമേണ പ്രീതശ്ചൈവാഗ്നിസാക്ഷികമ് ।

തതോ വാനരരാജേന വൈരാനുകഥനം പ്രതി

॥ 60 ॥

ശ്ലോക 62

രാമായാവേദിതം സര്വം പ്രണയാദ്ദുഃഖിതേന ച ।

പ്രതിജ്ഞാതം ച രാമേണ തദാ വാലിവധം പ്രതി

॥ 61 ॥

ശ്ലോക 63

വാലിനശ്ച ബലം തത്ര കഥയാമാസ വാനരഃ ।

സുഗ്രീവഃ ശങ്കിതശ്ചാസീന്നിത്യം വീര്യേണ രാഘവേ

॥ 62 ॥

ശ്ലോക 64

രാഘവഃ പ്രത്യയാര്ഥം തു ദുന്ദുഭേഃ കായമുത്തമമ് ।

ദര്ശയാമാസ സുഗ്രീവോ മഹാപര്വത സന്നിഭമ്

॥ 63 ॥

ശ്ലോക 65

ഉത്സ്മയിത്വാ മഹാബാഹുഃ പ്രേക്ഷ്യ ചാസ്ഥി മഹാബലഃ ।

പാദാങ്ഗുഷ്ഠേന ചിക്ഷേപ സമ്പൂര്ണം ദശയോജനമ്

॥ 64 ॥

ശ്ലോക 66

ബിഭേദ ച പുനഃ സാലാന്സപ്തൈകേന മഹേഷുണാ ।

ഗിരിം രസാതലം ചൈവ ജനയന് പ്രത്യയം തദാ

॥ 65 ॥

ശ്ലോക 67

തതഃ പ്രീതമനാസ്തേന വിശ്വസ്തഃ സ മഹാകപിഃ ।

കിഷ്കിന്ധാം രാമസഹിതോ ജഗാമ ച ഗുഹാം തദാ

॥ 66 ॥

ശ്ലോക 68

തതോഽഗര്ജദ്ധരിവരഃ സുഗ്രീവോ ഹേമപിങ്ഗലഃ ।

തേന നാദേന മഹതാ നിര്ജഗാമ ഹരീശ്വരഃ

॥ 67 ॥

ശ്ലോക 69

അനുമാന്യ തദാ താരാം സുഗ്രീവേണ സമാഗതഃ ।

നിജഘാന ച തത്രൈനം ശരേണൈകേന രാഘവഃ

॥ 68 ॥

ശ്ലോക 70

തതഃ സുഗ്രീവവചനാദ്ധത്വാ വാലിനമാഹവേ ।

സുഗ്രീവമേവ തദ്രാജ്യേ രാഘവഃ പ്രത്യപാദയത്

॥ 69 ॥

ശ്ലോക 71

സ ച സര്വാന്സമാനീയ വാനരാന്വാനരര്ഷഭഃ ।

ദിശഃ പ്രസ്ഥാപയാമാസ ദിദൃക്ഷുര്ജനകാത്മജാമ്

॥ 70 ॥

ശ്ലോക 72

തതോ ഗൃധ്രസ്യ വചനാത്സമ്പാതേര്ഹനുമാന്ബലീ ।

ശതയോജനവിസ്തീര്ണം പുപ്ലുവേ ലവണാര്ണവമ്

॥ 71 ॥

ശ്ലോക 73

തത്ര ലങ്കാം സമാസാദ്യ പുരീം രാവണപാലിതാമ് ।

ദദര്ശ സീതാം ധ്യായന്തീം അശോകവനികാം ഗതാമ്

॥ 72 ॥

ശ്ലോക 74

നിവേദയിത്വാഽഭിജ്ഞാനം പ്രവൃത്തിം ച നിവേദ്യ ച ।

സമാശ്വാസ്യ ച വൈദേഹീം മര്ദയാമാസ തോരണമ്

॥ 73 ॥

ശ്ലോക 75

പഞ്ച സേനാഗ്രഗാന്ഹത്വാ സപ്ത മന്ത്രിസുതാനപി ।

ശൂരമക്ഷം ച നിഷ്പിഷ്യ ഗ്രഹണം സമുപാഗമത്

॥ 74 ॥

ശ്ലോക 76

അസ്ത്രേണോന്മുക്തമാത്മാനം ജ്ഞാത്വാ പൈതാമഹാദ്വരാത് ।

മര്ഷയന്രാക്ഷസാന്വീരോ യന്ത്രിണസ്താന്യദൃച്ഛയാ

॥ 75 ॥

ശ്ലോക 77

തതോ ദഗ്ധ്വാ പുരീം ലങ്കാം ഋതേ സീതാം ച മൈഥിലീമ് ।

രാമായ പ്രിയമാഖ്യാതും പുനരായാന്മഹാകപിഃ

॥ 76 ॥

ശ്ലോക 78

സോഽഭിഗമ്യ മഹാത്മാനം കൃത്വാ രാമം പ്രദക്ഷിണമ് ।

ന്യവേദയദമേയാത്മാ ദൃഷ്ടാ സീതേതി തത്ത്വതഃ

॥ 77 ॥

ശ്ലോക 79

തതഃ സുഗ്രീവസഹിതോ ഗത്വാ തീരം മഹോദധേഃ ।

സമുദ്രം ക്ഷോഭയാമാസ ശരൈരാദിത്യസന്നിഭൈഃ

॥ 78 ॥

ശ്ലോക 80

ദര്ശയാമാസ ചാത്മാനം സമുദ്രഃ സരിതാം പതിഃ ।

സമുദ്രവചനാച്ചൈവ നലം സേതുമകാരയത്

॥ 79 ॥

ശ്ലോക 81

തേന ഗത്വാ പുരീം ലങ്കാം ഹത്വാ രാവണമാഹവേ ।

രാമഃ സീതാമനുപ്രാപ്യ പരാം വ്രീഡാമുപാഗമത്

॥ 80 ॥

ശ്ലോക 82

താമുവാച തതോ രാമഃ പരുഷം ജനസംസദി ।

അമൃഷ്യമാണാ സാ സീതാ വിവേശ ജ്വലനം സതീ

॥ 81 ॥

ശ്ലോക 83

തതോഽഗ്നിവചനാത്സീതാം ജ്ഞാത്വാ വിഗതകല്മഷാമ് ।

ബഭൌ രാമഃ സമ്പ്രഹൃഷ്ടഃ പൂജിതഃ സര്വദൈവതൈഃ

॥ 82 ॥

ശ്ലോക 84

കര്മണാ തേന മഹതാ ത്രൈലോക്യം സചരാചരമ് ।

സദേവര്ഷിഗണം തുഷ്ടം രാഘവസ്യ മഹാത്മനഃ

॥ 83 ॥

ശ്ലോക 85

അഭിഷിച്യ ച ലങ്കായാം രാക്ഷസേന്ദ്രം വിഭീഷണമ് ।

കൃതകൃത്യസ്തദാ രാമോ വിജ്വരഃ പ്രമുമോദ ഹ

॥ 84 ॥

ശ്ലോക 86

ദേവതാഭ്യോ വരം പ്രാപ്യ സമുത്ഥാപ്യ ച വാനരാന് ।

അയോധ്യാം പ്രസ്ഥിതോ രാമഃ പുഷ്പകേണ സുഹൃദ്വൃതഃ

॥ 85 ॥

ശ്ലോക 87

ഭരദ്വാജാശ്രമം ഗത്വാ രാമഃ സത്യപരാക്രമഃ ।

ഭരതസ്യാന്തികം രാമോ ഹനൂമന്തം വ്യസര്ജയത്

॥ 86 ॥

ശ്ലോക 88

പുനരാഖ്യായികാം ജല്പന്സുഗ്രീവസഹിതശ്ച സഃ ।

പുഷ്പകം തത്സമാരുഹ്യ നന്ദിഗ്രാമം യയൌ തദാ

॥ 87 ॥

ശ്ലോക 89

നന്ദിഗ്രാമേ ജടാം ഹിത്വാ ഭ്രാതൃഭിഃ സഹിതോഽനഘഃ ।

രാമഃ സീതാമനുപ്രാപ്യ രാജ്യം പുനരവാപ്തവാന്

॥ 88 ॥

ശ്ലോക 90

പ്രഹൃഷ്ടമുദിതോ ലോകസ്തുഷ്ടഃ പുഷ്ടഃ സുധാര്മികഃ ।

നിരാമയോ ഹ്യരോഗശ്ച ദുര്ഭിക്ഷ ഭയവര്ജിതഃ

॥ 89 ॥

ശ്ലോക 91

ന പുത്രമരണം കിഞ്ചിദ്ദ്രക്ഷ്യന്തി പുരുഷാഃ ക്വചിത് ।

നാര്യശ്ചാവിധവാ നിത്യം ഭവിഷ്യന്തി പതിവ്രതാഃ

॥ 90 ॥

ശ്ലോക 92

ന ചാഗ്നിജം ഭയം കിഞ്ചിന്നാപ്സു മജ്ജന്തി ജന്തവഃ ।

ന വാതജം ഭയം കിഞ്ചിന്നാപി ജ്വരകൃതം തഥാ

॥ 91 ॥

ശ്ലോക 93

ന ചാപി ക്ഷുദ്ഭയം തത്ര ന തസ്കരഭയം തഥാ ।

നഗരാണി ച രാഷ്ട്രാണി ധനധാന്യയുതാനി ച

॥ 92 ॥

ശ്ലോക 94

നിത്യം പ്രമുദിതാഃ സര്വേ യഥാ കൃതയുഗേ തഥാ ।

അശ്വമേധശതൈരിഷ്ട്വാ തഥാ ബഹുസുവര്ണകൈഃ

॥ 93 ॥

ശ്ലോക 95

ഗവാം കോട്യയുതം ദത്വാ ബ്രഹ്മലോകം പ്രയാസ്യതി ।

അസങ്ഖ്യേയം ധനം ദത്വാ ബ്രാഹ്മണേഭ്യോ മഹായശാഃ

॥ 94 ॥

ശ്ലോക 96

രാജവംശാന് ശതഗുണാന് സ്ഥാപയിഷ്യതി രാഘവഃ ।

ചാതുര്വര്ണ്യം ച ലോകേഽസ്മിന് സ്വേ സ്വേ ധര്മേ നിയോക്ഷ്യതി

॥ 95 ॥

ശ്ലോക 97

ദശവര്ഷസഹസ്രാണി ദശവര്ഷശതാനി ച ।

രാമോ രാജ്യമുപാസിത്വാ ബ്രഹ്മലോകം ഗമിഷ്യതി

॥ 96 ॥

ശ്ലോക 98

ഇദം പവിത്രം പാപഘ്നം പുണ്യം വേദൈശ്ച സമ്മിതമ് ।

യഃ പഠേദ്രാമചരിതം സര്വപാപൈഃ പ്രമുച്യതേ

॥ 97 ॥

ശ്ലോക 99

ഏതദാഖ്യാനമായുഷ്യം പഠന്രാമായണം നരഃ ।

സപുത്രപൌത്രഃ സഗണഃ പ്രേത്യ സ്വര്ഗേ മഹീയതേ

॥ 98 ॥

ശ്ലോക 100

പഠന് ദ്വിജോ വാഗൃഷഭത്വമീയാത്

സ്യാത് ക്ഷത്രിയോ ഭൂമിപതിത്വമീയാത് ।

വണിഗ്ജനഃ പണ്യഫലത്വമീയാത്

ജനശ്ച ശൂദ്രോഽപി മഹത്ത്വമീയാത്

॥ 99 ॥

ശ്ലോക 101

ഇത്യാര്ഷേ ശ്രീമദ്രാമായണേ വാല്മീകീയേ ആദികാവ്യേ ബാലകാണ്ഡേ നാരദവാക്യം നാമ പ്രഥമഃ സര്ഗഃ ॥