Upadesha Saram (Ramana Maharshi)

upadeza sAraM (ramaNa maharSi)

zloka 1

karturAjJayA prApyate phalam |

karma kiM paraM karma tajjaDam || 1 ||

kRtimahodadhau patanakAraNam |

phalamazAzvataM gatinirodhakam || 2 ||

IzvarArpitaM necchayA kRtam |

cittazodhakaM muktisAdhakam || 3 ||

kAyavAGmanaH kAryamuttamam |

pUjanaM japazcintanaM kramAt || 4 ||

jagata IzadhI yuktasevanam |

aSTamUrtibhRddevapUjanam || 5 ||

uttamastavAduccamandataH |

cittajaM japadhyAnamuttamam || 6 ||

AjyadhArayA srotasA samam |

saralacintanaM viralataH param || 7 ||

bhedabhAvanAt so'hamityasau |

bhAvanA'bhidA pAvanI matA || 8 ||

bhAvazUnyasadbhAvasusthitiH |

bhAvanAbalAdbhaktiruttamA || 9 ||

hRtsthale manaH svasthatA kriyA |

bhaktiyogabodhAzca nizcitam || 10 ||

vAyurodhanAllIyate manaH |

jAlapakSivadrodhasAdhanam || 11 ||

cittavAyavazcitkriyAyutAH |

zAkhayordvayI zaktimUlakA || 12 ||

layavinAzane ubhayarodhane |

layagataM punarbhavati no mRtam || 13 ||

prANabandhanAllInamAnasam |

ekacintanAnnAzametyadaH || 14 ||

naSTamAnasotkRSTayoginaH |

kRtyamasti kiM svasthitiM yataH || 15 ||

dRzyavAritaM cittamAtmanaH |

cittvadarzanaM tattvadarzanam || 16 ||

mAnasaM tu kiM mArgaNe kRte |

naiva mAnasaM mArga ArjavAt || 17 ||

vRttayastvahaM vRttimAzritAH |

vRttayo mano viddhyahaM manaH || 18 ||

ahamayaM kuto bhavati cinvataH |

ayi patatyahaM nijavicAraNam || 19 ||

ahami nAzabhAjyahamahantayA |

sphurati hRtsvayaM paramapUrNasat || 20 ||

idamahaM padA'bhikhyamanvaham |

ahamilInake'pyalayasattayA || 21 ||

vigrahendriyaprANadhItamaH |

nAhamekasattajjaDaM hyasat || 22 ||

sattvabhAsikA citkvavetarA |

sattayA hi ciccittayA hyaham || 23 ||

IzajIvayorveSadhIbhidA |

satsvabhAvato vastu kevalam || 24 ||

veSahAnataH svAtmadarzanam |

IzadarzanaM svAtmarUpataH || 25 ||

AtmasaMsthitiH svAtmadarzanam |

AtmanirdvayAdAtmaniSThatA || 26 ||

jJAnavarjitA'jJAnahInacit |

jJAnamasti kiM jJAtumantaram || 27 ||

kiM svarUpamityAtmadarzane |

avyayA'bhavA''pUrNacitsukham || 28 ||

bandhamuktyatItaM paraM sukham |

vindatIha jIvastu daivikaH || 29 ||

ahamapetakaM nijavibhAnakam |

mahadidantapo ramanavAgiyam || 30 ||