శ్రీమద్భగవద్గీతా మూలమ్ - అష్టమోఽధ్యాయః

శ్రీమద్భగవద్గీతా మూలమ్ - అష్టమోఽధ్యాయః

శ్లోక 1

ఓం శ్రీ పరమాత్మనే నమః

అథ అష్టమోఽధ్యాయః ।

అక్షరపరబ్రహ్మయోగః

అర్జున ఉవాచ

కిం తద్బ్రహ్మ కిమధ్యాత్మం కిం కర్మ పురుషోత్తమ ।

అధిభూతం చ కిం ప్రోక్తమధిదైవం కిముచ్యతే

శ్లోక 2

అధియజ్ఞః కథం కోఽత్ర దేహేఽస్మిన్మధుసూదన ।

ప్రయాణకాలే చ కథం జ్ఞేయోఽసి నియతాత్మభిః

॥ 1 ॥

శ్లోక 3

శ్రీభగవానువాచ

అక్షరం బ్రహ్మ పరమం స్వభావోఽధ్యాత్మముచ్యతే ।

భూతభావోద్భవకరో విసర్గః కర్మసఞ్జ్ఞితః

॥ 2 ॥

శ్లోక 4

అధిభూతం క్షరో భావః పురుషశ్చాధిదైవతమ్ ।

అధియజ్ఞోఽహమేవాత్ర దేహే దేహభృతాం వర

॥ 3 ॥

శ్లోక 5

అన్తకాలే చ మామేవ స్మరన్ముక్త్వా కలేవరమ్ ।

యః ప్రయాతి స మద్భావం యాతి నాస్త్యత్ర సంశయః

॥ 4 ॥

శ్లోక 6

యం యం వాపి స్మరన్భావం త్యజత్యన్తే కలేవరమ్ ।

తం తమేవైతి కౌన్తేయ సదా తద్భావభావితః

॥ 5 ॥

శ్లోక 7

తస్మాత్సర్వేషు కాలేషు మామనుస్మర యుధ్య చ ।

మయ్యర్పితమనోబుద్ధిర్మామేవైష్యస్యసంశయమ్

॥ 6 ॥

శ్లోక 8

అభ్యాసయోగయుక్తేన చేతసా నాన్యగామినా ।

పరమం పురుషం దివ్యం యాతి పార్థానుచిన్తయన్

॥ 7 ॥

శ్లోక 9

కవిం పురాణమనుశాసితారమణోరణీయంసమనుస్మరేద్యః।

సర్వస్య ధాతారమచిన్త్యరూపమాదిత్యవర్ణం తమసః పరస్తాత్

॥ 8 ॥

శ్లోక 10

ప్రయాణకాలే మనసాచలేన భక్త్యా యుక్తో యోగబలేన చైవ।

భ్రువోర్మధ్యే ప్రాణమావేశ్య సమ్యక్స తం పరం పురుషముపైతి దివ్యమ్

॥ 9 ॥

శ్లోక 11

యదక్షరం వేదవిదో వదన్తి విశన్తి యద్యతయో వీతరాగాః।

యదిచ్ఛన్తో బ్రహ్మచర్యం చరన్తి తత్తే పదం సఙ్గ్రహేణ ప్రవక్ష్యే

॥ 10 ॥

శ్లోక 12

సర్వద్వారాణి సంయమ్య మనో హృది నిరుధ్య చ ।

మూర్ధ్న్యాధాయాత్మనః ప్రాణమాస్థితో యోగధారణామ్

॥ 11 ॥

శ్లోక 13

ఓమిత్యేకాక్షరం బ్రహ్మ వ్యాహరన్మామనుస్మరన్ ।

యః ప్రయాతి త్యజన్దేహం స యాతి పరమాం గతిమ్

॥ 12 ॥

శ్లోక 14

అనన్యచేతాః సతతం యో మాం స్మరతి నిత్యశః ।

తస్యాహం సులభః పార్థ నిత్యయుక్తస్య యోగినః

॥ 13 ॥

శ్లోక 15

మాముపేత్య పునర్జన్మ దుఃఖాలయమశాశ్వతమ్ ।

నాప్నువన్తి మహాత్మానః సంసిద్ధిం పరమాం గతాః

॥ 14 ॥

శ్లోక 16

ఆబ్రహ్మభువనాల్లోకాః పునరావర్తినోఽర్జున ।

మాముపేత్య తు కౌన్తేయ పునర్జన్మ న విద్యతే

॥ 15 ॥

శ్లోక 17

సహస్రయుగపర్యన్తమహర్యద్బ్రహ్మణో విదుః ।

రాత్రిం యుగసహస్రాన్తాం తేఽహోరాత్రవిదో జనాః

॥ 16 ॥

శ్లోక 18

అవ్యక్తాద్వ్యక్తయః సర్వాః ప్రభవన్త్యహరాగమే ।

రాత్ర్యాగమే ప్రలీయన్తే తత్రైవావ్యక్తసఞ్జ్ఞకే

॥ 17 ॥

శ్లోక 19

భూతగ్రామః స ఏవాయం భూత్వా భూత్వా ప్రలీయతే ।

రాత్ర్యాగమేఽవశః పార్థ ప్రభవత్యహరాగమే

॥ 18 ॥

శ్లోక 20

పరస్తస్మాత్తు భావోఽన్యోఽవ్యక్తోఽవ్యక్తాత్సనాతనః ।

యః స సర్వేషు భూతేషు నశ్యత్సు న వినశ్యతి

॥ 19 ॥

శ్లోక 21

అవ్యక్తోఽక్షర ఇత్యుక్తస్తమాహుః పరమాం గతిమ్ ।

యం ప్రాప్య న నివర్తన్తే తద్ధామ పరమం మమ

॥ 20 ॥

శ్లోక 22

పురుషః స పరః పార్థ భక్త్యా లభ్యస్త్వనన్యయా ।

యస్యాన్తఃస్థాని భూతాని యేన సర్వమిదం తతమ్

॥ 21 ॥

శ్లోక 23

యత్ర కాలే త్వనావృత్తిమావృత్తిం చైవ యోగినః ।

ప్రయాతా యాన్తి తం కాలం వక్ష్యామి భరతర్షభ

॥ 22 ॥

శ్లోక 24

అగ్నిర్జోతిరహః శుక్లః షణ్మాసా ఉత్తరాయణమ్ ।

తత్ర ప్రయాతా గచ్ఛన్తి బ్రహ్మ బ్రహ్మవిదో జనాః

॥ 23 ॥

శ్లోక 25

ధూమో రాత్రిస్తథా కృష్ణః షణ్మాసా దక్షిణాయనమ్ ।

తత్ర చాన్ద్రమసం జ్యోతిర్యోగీ ప్రాప్య నివర్తతే

॥ 24 ॥

శ్లోక 26

శుక్లకృష్ణే గతీ హ్యేతే జగతః శాశ్వతే మతే ।

ఏకయా యాత్యనావృత్తిమన్యయావర్తతే పునః

॥ 25 ॥

శ్లోక 27

నైతే సృతీ పార్థ జానన్యోగీ ముహ్యతి కశ్చన ।

తస్మాత్సర్వేషు కాలేషు యోగయుక్తో భవార్జున

॥ 26 ॥

శ్లోక 28

వేదేషు యజ్ఞేషు తపఃసు చైవ దానేషు యత్పుణ్యఫలం ప్రదిష్టమ్।

అత్యేతి తత్సర్వమిదం విదిత్వాయోగీ పరం స్థానముపైతి చాద్యమ్

॥ 27 ॥

శ్లోక 29

ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే

శ్రీకృష్ణార్జునసంవాదే అక్షరబ్రహ్మయోగో నామాష్టమోఽధ్యాయః

॥ 28 ॥

శ్లోక 30