శ్రీ శ్రీశైల మల్లికార్జున సుప్రభాతమ్

శ్రీ శ్రీశైల మల్లికార్జున సుప్రభాతమ్

శ్లోక 1

ప్రాతస్స్మరామి గణనాథమనాథబన్ధుం

సిన్దూరపూరపరిశోభితగణ్డయుగ్మమ్ ।

ఉద్దణ్డవిఘ్నపరిఖణ్డనచణ్డదణ్డ-

మాఖణ్డలాదిసురనాయకవృన్దవన్ద్యమ్

శ్లోక 2

కలాభ్యాం చూడాలఙ్కృతశశికలాభ్యాం నిజతపః

ఫలాభ్యాం భక్తేషు ప్రకటితఫలాభ్యాం భవతు మే ।

శివాభ్యామాస్తీకత్రిభువనశివాభ్యాం హృది పున-

ర్భవాభ్యామానన్దస్ఫురదనుభవాభ్యాం నతిరియమ్

॥ 1॥

శ్లోక 3

నమస్తే నమస్తే మహాదేవ! శమ్భో!

నమస్తే నమస్తే దయాపూర్ణసిన్ధో!

నమస్తే నమస్తే ప్రపన్నాత్మబన్ధో!

నమస్తే నమస్తే నమస్తే మహేశ

॥ 2॥

శ్లోక 4

శశ్వచ్ఛ్రీగిరిమూర్ధని త్రిజగతాం రక్షాకృతౌ లక్షితాం

సాక్షాదక్షతసత్కటాక్షసరణిశ్రీమత్సుధావర్షిణీమ్ ।

సోమార్ధాఙ్కితమస్తకాం ప్రణమతాం నిస్సీమసమ్పత్ప్రదాం

సుశ్లోకాం భ్రమరామ్బికాం స్మితముఖీం శమ్భోస్సఖీం త్వాం స్తుమః

॥ 3॥

శ్లోక 5

మాతః! ప్రసీద, సదయా భవ, భవ్యశీలే !

లీలాలవాకులితదైత్యకులాపహారే !

శ్రీచక్రరాజనిలయే ! శ్రుతిగీతకీర్తే !

శ్రీశైలనాథదయితే ! తవ సుప్రభాతమ్

॥ 4॥

శ్లోక 6

శమ్భో ! సురేన్ద్రనుత ! శఙ్కర ! శూలపాణే !

చన్ద్రావతంస ! శివ ! శర్వ ! పినాకపాణే !

గఙ్గాధర ! క్రతుపతే ! గరుడధ్వజాప్త !

శ్రీమల్లికార్జున విభో ! తవ సుప్రభాతమ్

॥ 5॥

శ్లోక 7

విశ్వేశ ! విశ్వజనసేవిత ! విశ్వమూర్తే !

విశ్వమ్భర ! త్రిపురభేదన ! విశ్వయోనే !

ఫాలాక్ష ! భవ్యగుణ ! భోగివిభూషణేశ !

శ్రీమల్లికార్జున విభో ! తవ సుప్రభాతమ్

॥ 6॥

శ్లోక 8

కల్యాణరూప ! కరుణాకర ! కాలకణ్ఠ !

కల్పద్రుమప్రసవపూజిత ! కామదాయిన్ !

దుర్నీతిదైత్యదలనోద్యత ! దేవ దేవ !

శ్రీమల్లికార్జున విభో ! తవ సుప్రభాతమ్

॥ 7॥

శ్లోక 9

గౌరీమనోహర ! గణేశ్వరసేవితాఙ్ఘ్రే !

గన్ధర్వయక్షసురకిన్నరగీతకీర్తే !

గణ్డావలమ్బిఫణికుణ్డలమణ్డితాస్య !

శ్రీమల్లికార్జున విభో ! తవ సుప్రభాతమ్

॥ 8॥

శ్లోక 10

నాగేన్ద్రభూషణ ! నిరీహిత ! నిర్వికార !

నిర్మాయ ! నిశ్చల ! నిరర్గల ! నాగభేదిన్ ।

నారాయణీప్రియ ! నతేష్టద ! నిర్మలాత్మన్ !

శ్రీపర్వతాధిప ! విభో ! తవ సుప్రభాతమ్

॥ 9॥

శ్లోక 11

సృష్టం త్వయైవ జగదేతదశేషమీశ !

రక్షావిధిశ్చ విధిగోచర ! తావకీనః ।

సంహారశక్తిరపి శఙ్కర ! కిఙ్కరీ తే

శ్రీశైలశేఖర విభో ! తవ సుప్రభాతమ్

॥ 10॥

శ్లోక 12

ఏకస్త్వమేవ బహుధా భవ ! భాసి లోకే

నిశ్శఙ్కధీర్వృషభకేతన ! మల్లినాథ !

శ్రీభ్రామరీప్రయ ! సుఖాశ్రయ ! లోకనాథ !

శ్రీశైలశేఖర విభో ! తవ సుప్రభాతమ్

॥ 11॥

శ్లోక 13

పాతాలగాఙ్గజలమజ్జననిర్మలాఙ్గాః

భస్మత్రిపుణ్డ్రసమలఙ్కృతఫాలభాగాః ।

గాయన్తి దేవమునిభక్తజనా భవన్తం

శ్రీమల్లికార్జున విభో ! తవ సుప్రభాతమ్

॥ 12॥

శ్లోక 14

సారస్వతామ్బుయుతభోగవతీశ్రితాయాః

బ్రహ్మేశవిష్ణుగిరిచుమ్బితకృష్ణవేణ్యాః ।

సోపానమార్గమధిరుహ్య భజన్తి భక్తాః

శ్రీమల్లికార్జున విభో ! తవ సుప్రభాతమ్

॥ 13॥

శ్లోక 15

శ్రీమల్లికార్జునమహేశ్వరసుప్రభాత-

స్తోత్రం పఠన్తి భువి యే మనుజాః ప్రభాతే ।

తే సర్వ సౌఖ్యమనుభూయ పరానవాప్యం

శ్రీశామ్భవం పదమవాప్య ముదం లభన్తే

॥ 14॥

శ్లోక 16

ఇతి శ్రీమల్లికార్జునసుప్రభాతం సమ్పూర్ణమ్ ।