Sri Sita Rama Stotram

zrI sItArAma stotram

zloka 1

ayodhyApuranetAraM mithilApuranAyikAm |

rAghavANAmalaGkAraM vaidehAnAmalaGkriyAm || 1 ||

raghUNAM kuladIpaM ca nimInAM kuladIpikAm |

sUryavaMzasamudbhUtaM somavaMzasamudbhavAm || 2 ||

putraM dazarathasyAdyaM putrIM janakabhUpateH |

vaziSThAnumatAcAraM zatAnandamatAnugAm || 3 ||

kausalyAgarbhasambhUtaM vedigarbhoditAM svayam |

puNDarIkavizAlAkSaM sphuradindIvarekSaNAm || 4 ||

candrakAntAnanAmbhojaM candrabimbopamAnanAm |

mattamAtaGgagamanaM mattahaMsavadhUgatAm || 5 ||

candanArdrabhujAmadhyaM kuGkumArdrakucasthalIm |

cApAlaGkRtahastAbjaM padmAlaGkRtapANikAm || 6 ||

zaraNAgatagoptAraM praNipAdaprasAdikAm |

kAlameghanibhaM rAmaM kArtasvarasamaprabhAm || 7 ||

divyasiMhAsanAsInaM divyasragvastrabhUSaNAm |

anukSaNaM kaTAkSAbhyAM anyonyekSaNakAGkSiNau || 8 ||

anyonyasadRzAkArau trailokyagRhadampatI|

imau yuvAM praNamyAhaM bhajAmyadya kRtArthatAm || 9 ||

anena stauti yaH stutyaM rAmaM sItAM ca bhaktitaH |

tasya tau tanutAM puNyAH sampadaH sakalArthadAH || 10 ||

evaM zrIrAmacandrasya jAnakyAzca vizeSataH |

kRtaM hanUmatA puNyaM stotraM sadyo vimuktidam |

yaH paThetprAtarutthAya sarvAn kAmAnavApnuyAt || 11 ||

iti hanUmatkRta-sItArAma stotraM sampUrNam ||