Sri Rama Bhujanga Prayaata Stotram

ଶ୍ରୀ ରାମ ଭୁଜଙ୍ଗ ପ୍ରଯାତ ସ୍ତୋତ୍ରମ୍

ଶ୍ଲୋକ 1

ଵିଶୁଦ୍ଧଂ ପରଂ ସଚ୍ଚିଦାନନ୍ଦରୂପଂ

ଗୁଣାଧାରମାଧାରହୀନଂ ଵରେଣ୍ଯମ୍ ।

ମହାନ୍ତଂ ଵିଭାନ୍ତଂ ଗୁହାନ୍ତଂ ଗୁଣାନ୍ତଂ

ସୁଖାନ୍ତଂ ସ୍ଵଯଂ ଧାମ ରାମଂ ପ୍ରପଦ୍ଯେ

ଶ୍ଲୋକ 2

ଶିଵଂ ନିତ୍ଯମେକଂ ଵିଭୁଂ ତାରକାଖ୍ଯଂ

ସୁଖାକାରମାକାରଶୂନ୍ଯଂ ସୁମାନ୍ଯମ୍ ।

ମହେଶଂ କଲେଶଂ ସୁରେଶଂ ପରେଶଂ

ନରେଶଂ ନିରୀଶଂ ମହୀଶଂ ପ୍ରପଦ୍ଯେ

॥ 1 ॥

ଶ୍ଲୋକ 3

ଯଦାଵର୍ଣଯତ୍କର୍ଣମୂଲେଽନ୍ତକାଲେ

ଶିଵୋ ରାମ ରାମେତି ରାମେତି କାଶ୍ଯାମ୍ ।

ତଦେକଂ ପରଂ ତାରକବ୍ରହ୍ମରୂପଂ

ଭଜେଽହଂ ଭଜେଽହଂ ଭଜେଽହଂ ଭଜେଽହମ୍

॥ 2 ॥

ଶ୍ଲୋକ 4

ମହାରତ୍ନପୀଠେ ଶୁଭେ କଲ୍ପମୂଲେ

ସୁଖାସୀନମାଦିତ୍ଯକୋଟିପ୍ରକାଶମ୍ ।

ସଦା ଜାନକୀଲକ୍ଷ୍ମଣୋପେତମେକଂ

ସଦା ରାମଚନ୍ଦ୍ରଂ ଭଜେଽହଂ ଭଜେଽହମ୍

॥ 3 ॥

ଶ୍ଲୋକ 5

କ୍ଵଣଦ୍ରତ୍ନମଞ୍ଜୀରପାଦାରଵିନ୍ଦଂ

ଲସନ୍ମେଖଲାଚାରୁପୀତାମ୍ବରାଢ୍ଯମ୍ ।

ମହାରତ୍ନହାରୋଲ୍ଲସତ୍କୌସ୍ତୁଭାଙ୍ଗଂ

ନଦଚ୍ଚଞ୍ଚରୀମଞ୍ଜରୀଲୋଲମାଲମ୍

॥ 4 ॥

ଶ୍ଲୋକ 6

ଲସଚ୍ଚନ୍ଦ୍ରିକାସ୍ମେରଶୋଣାଧରାଭଂ

ସମୁଦ୍ଯତ୍ପତଙ୍ଗେନ୍ଦୁକୋଟିପ୍ରକାଶମ୍ ।

ନମଦ୍ବ୍ରହ୍ମରୁଦ୍ରାଦିକୋଟୀରରତ୍ନ

ସ୍ଫୁରତ୍କାନ୍ତିନୀରାଜନାରାଧିତାଙ୍ଘ୍ରିମ୍

॥ 5 ॥

ଶ୍ଲୋକ 7

ପୁରଃ ପ୍ରାଞ୍ଜଲୀନାଞ୍ଜନେଯାଦିଭକ୍ତାନ୍

ସ୍ଵଚିନ୍ମୁଦ୍ରଯା ଭଦ୍ରଯା ବୋଧଯନ୍ତମ୍ ।

ଭଜେଽହଂ ଭଜେଽହଂ ସଦା ରାମଚନ୍ଦ୍ରଂ

ତ୍ଵଦନ୍ଯଂ ନ ମନ୍ଯେ ନ ମନ୍ଯେ ନ ମନ୍ଯେ

॥ 6 ॥

ଶ୍ଲୋକ 8

ଯଦା ମତ୍ସମୀପଂ କୃତାନ୍ତଃ ସମେତ୍ଯ

ପ୍ରଚଣ୍ଡପ୍ରକୋପୈର୍ଭଟୈର୍ଭୀଷଯେନ୍ମାମ୍ ।

ତଦାଵିଷ୍କରୋଷି ତ୍ଵଦୀଯଂ ସ୍ଵରୂପଂ

ସଦାପତ୍ପ୍ରଣାଶଂ ସକୋଦଣ୍ଡବାଣମ୍

॥ 7 ॥

ଶ୍ଲୋକ 9

ନିଜେ ମାନସେ ମନ୍ଦିରେ ସନ୍ନିଧେହି

ପ୍ରସୀଦ ପ୍ରସୀଦ ପ୍ରଭୋ ରାମଚନ୍ଦ୍ର ।

ସସୌମିତ୍ରିଣା କୈକଯୀନନ୍ଦନେନ

ସ୍ଵଶକ୍ତ୍ଯାନୁଭକ୍ତ୍ଯା ଚ ସଂସେଵ୍ଯମାନ

॥ 8 ॥

ଶ୍ଲୋକ 10

ସ୍ଵଭକ୍ତାଗ୍ରଗଣ୍ଯୈଃ କପୀଶୈର୍ମହୀଶୈ-

-ରନୀକୈରନେକୈଶ୍ଚ ରାମ ପ୍ରସୀଦ ।

ନମସ୍ତେ ନମୋଽସ୍ତ୍ଵୀଶ ରାମ ପ୍ରସୀଦ

ପ୍ରଶାଧି ପ୍ରଶାଧି ପ୍ରକାଶଂ ପ୍ରଭୋ ମାମ୍

॥ 9 ॥

ଶ୍ଲୋକ 11

ତ୍ଵମେଵାସି ଦୈଵଂ ପରଂ ମେ ଯଦେକଂ

ସୁଚୈତନ୍ଯମେତତ୍ତ୍ଵଦନ୍ଯଂ ନ ମନ୍ଯେ ।

ଯତୋଽଭୂଦମେଯଂ ଵିଯଦ୍ଵାଯୁତେଜୋ

ଜଲୋର୍ଵ୍ଯାଦିକାର୍ଯଂ ଚରଂ ଚାଚରଂ ଚ

॥ 10 ॥

ଶ୍ଲୋକ 12

ନମଃ ସଚ୍ଚିଦାନନ୍ଦରୂପାଯ ତସ୍ମୈ

ନମୋ ଦେଵଦେଵାଯ ରାମାଯ ତୁଭ୍ଯମ୍ ।

ନମୋ ଜାନକୀଜୀଵିତେଶାଯ ତୁଭ୍ଯଂ

ନମଃ ପୁଣ୍ଡରୀକାଯତାକ୍ଷାଯ ତୁଭ୍ଯମ୍

॥ 11 ॥

ଶ୍ଲୋକ 13

ନମୋ ଭକ୍ତିଯୁକ୍ତାନୁରକ୍ତାଯ ତୁଭ୍ଯଂ

ନମଃ ପୁଣ୍ଯପୁଞ୍ଜୈକଲଭ୍ଯାଯ ତୁଭ୍ଯମ୍ ।

ନମୋ ଵେଦଵେଦ୍ଯାଯ ଚାଦ୍ଯାଯ ପୁଂସେ

ନମଃ ସୁନ୍ଦରାଯେନ୍ଦିରାଵଲ୍ଲଭାଯ

॥ 12 ॥

ଶ୍ଲୋକ 14

ନମୋ ଵିଶ୍ଵକର୍ତ୍ରେ ନମୋ ଵିଶ୍ଵହର୍ତ୍ରେ

ନମୋ ଵିଶ୍ଵଭୋକ୍ତ୍ରେ ନମୋ ଵିଶ୍ଵମାତ୍ରେ ।

ନମୋ ଵିଶ୍ଵନେତ୍ରେ ନମୋ ଵିଶ୍ଵଜେତ୍ରେ

ନମୋ ଵିଶ୍ଵପିତ୍ରେ ନମୋ ଵିଶ୍ଵମାତ୍ରେ

॥ 13 ॥

ଶ୍ଲୋକ 15

ନମସ୍ତେ ନମସ୍ତେ ସମସ୍ତପ୍ରପଞ୍ଚ-

-ପ୍ରଭୋଗପ୍ରଯୋଗପ୍ରମାଣପ୍ରଵୀଣ ।

ମଦୀଯଂ ମନସ୍ତ୍ଵତ୍ପଦଦ୍ଵନ୍ଦ୍ଵସେଵାଂ

ଵିଧାତୁଂ ପ୍ରଵୃତ୍ତଂ ସୁଚୈତନ୍ଯସିଦ୍ଧ୍ଯୈ

॥ 14 ॥

ଶ୍ଲୋକ 16

ଶିଲାପି ତ୍ଵଦଙ୍ଘ୍ରିକ୍ଷମାସଙ୍ଗିରେଣୁ

ପ୍ରସାଦାଦ୍ଧି ଚୈତନ୍ଯମାଧତ୍ତ ରାମ ।

ନରସ୍ତ୍ଵତ୍ପଦଦ୍ଵନ୍ଦ୍ଵସେଵାଵିଧାନା-

-ତ୍ସୁଚୈତନ୍ଯମେତୀତି କିଂ ଚିତ୍ରମତ୍ର

॥ 15 ॥

ଶ୍ଲୋକ 17

ପଵିତ୍ରଂ ଚରିତ୍ରଂ ଵିଚିତ୍ରଂ ତ୍ଵଦୀଯଂ

ନରା ଯେ ସ୍ମରନ୍ତ୍ଯନ୍ଵହଂ ରାମଚନ୍ଦ୍ର ।

ଭଵନ୍ତଂ ଭଵାନ୍ତଂ ଭରନ୍ତଂ ଭଜନ୍ତୋ

ଲଭନ୍ତେ କୃତାନ୍ତଂ ନ ପଶ୍ଯନ୍ତ୍ଯତୋଽନ୍ତେ

॥ 16 ॥

ଶ୍ଲୋକ 18

ସ ପୁଣ୍ଯଃ ସ ଗଣ୍ଯଃ ଶରଣ୍ଯୋ ମମାଯଂ

ନରୋ ଵେଦ ଯୋ ଦେଵଚୂଡାମଣିଂ ତ୍ଵାମ୍ ।

ସଦାକାରମେକଂ ଚିଦାନନ୍ଦରୂପଂ

ମନୋଵାଗଗମ୍ଯଂ ପରଂ ଧାମ ରାମ

॥ 17 ॥

ଶ୍ଲୋକ 19

ପ୍ରଚଣ୍ଡପ୍ରତାପପ୍ରଭାଵାଭିଭୂତ-

-ପ୍ରଭୂତାରିଵୀର ପ୍ରଭୋ ରାମଚନ୍ଦ୍ର ।

ବଲଂ ତେ କଥଂ ଵର୍ଣ୍ଯତେଽତୀଵ ବାଲ୍ଯେ

ଯତୋଽଖଣ୍ଡି ଚଣ୍ଡୀଶକୋଦଣ୍ଡଦଣ୍ଡମ୍

॥ 18 ॥

ଶ୍ଲୋକ 20

ଦଶଗ୍ରୀଵମୁଗ୍ରଂ ସପୁତ୍ରଂ ସମିତ୍ରଂ

ସରିଦ୍ଦୁର୍ଗମଧ୍ଯସ୍ଥରକ୍ଷୋଗଣେଶମ୍ ।

ଭଵନ୍ତଂ ଵିନା ରାମ ଵୀରୋ ନରୋ ଵା

ସୁରୋ ଵାଽମରୋ ଵା ଜଯେତ୍କସ୍ତ୍ରିଲୋକ୍ଯାମ୍

॥ 19 ॥

ଶ୍ଲୋକ 21

ସଦା ରାମ ରାମେତି ରାମାମୃତଂ ତେ

ସଦାରାମମାନନ୍ଦନିଷ୍ଯନ୍ଦକନ୍ଦମ୍ ।

ପିବନ୍ତଂ ନମନ୍ତଂ ସୁଦନ୍ତଂ ହସନ୍ତଂ

ହନୂମନ୍ତମନ୍ତର୍ଭଜେ ତଂ ନିତାନ୍ତମ୍

॥ 20 ॥

ଶ୍ଲୋକ 22

ସଦା ରାମ ରାମେତି ରାମାମୃତଂ ତେ

ସଦାରାମମାନନ୍ଦନିଷ୍ଯନ୍ଦକନ୍ଦମ୍ ।

ପିବନ୍ନନ୍ଵହଂ ନନ୍ଵହଂ ନୈଵ ମୃତ୍ଯୋ-

-ର୍ବିଭେମି ପ୍ରସାଦାଦସାଦାତ୍ତଵୈଵ

॥ 21 ॥

ଶ୍ଲୋକ 23

ଅସୀତାସମେତୈରକୋଦଣ୍ଡଭୂଷୈ-

-ରସୌମିତ୍ରିଵନ୍ଦ୍ଯୈରଚଣ୍ଡପ୍ରତାପୈଃ ।

ଅଲଙ୍କେଶକାଲୈରସୁଗ୍ରୀଵମିତ୍ରୈ-

-ରରାମାଭିଧେଯୈରଲଂ ଦୈଵତୈର୍ନଃ

॥ 22 ॥

ଶ୍ଲୋକ 24

ଅଵୀରାସନସ୍ଥୈରଚିନ୍ମୁଦ୍ରିକାଢ୍ଯୈ-

-ରଭକ୍ତାଞ୍ଜନେଯାଦିତତ୍ତ୍ଵପ୍ରକାଶୈଃ ।

ଅମନ୍ଦାରମୂଲୈରମନ୍ଦାରମାଲୈ-

-ରରାମାଭିଧେଯୈରଲଂ ଦୈଵତୈର୍ନଃ

॥ 23 ॥

ଶ୍ଲୋକ 25

ଅସିନ୍ଧୁପ୍ରକୋପୈରଵନ୍ଦ୍ଯପ୍ରତାପୈ-

-ରବନ୍ଧୁପ୍ରଯାଣୈରମନ୍ଦସ୍ମିତାଢ୍ଯୈଃ ।

ଅଦଣ୍ଡପ୍ରଵାସୈରଖଣ୍ଡପ୍ରବୋଧୈ-

-ରରାମାଭିଧେଯୈରଲଂ ଦୈଵତୈର୍ନଃ

॥ 24 ॥

ଶ୍ଲୋକ 26

ହରେ ରାମ ସୀତାପତେ ରାଵଣାରେ

ଖରାରେ ମୁରାରେଽସୁରାରେ ପରେତି ।

ଲପନ୍ତଂ ନଯନ୍ତଂ ସଦାକାଲମେଵଂ

ସମାଲୋକଯାଲୋକଯାଶେଷବନ୍ଧୋ

॥ 25 ॥

ଶ୍ଲୋକ 27

ନମସ୍ତେ ସୁମିତ୍ରାସୁପୁତ୍ରାଭିଵନ୍ଦ୍ଯ

ନମସ୍ତେ ସଦା କୈକଯୀନନ୍ଦନେଡ୍ଯ ।

ନମସ୍ତେ ସଦା ଵାନରାଧୀଶଵନ୍ଦ୍ଯ

ନମସ୍ତେ ନମସ୍ତେ ସଦା ରାମଚନ୍ଦ୍ର

॥ 26 ॥

ଶ୍ଲୋକ 28

ପ୍ରସୀଦ ପ୍ରସୀଦ ପ୍ରଚଣ୍ଡପ୍ରତାପ

ପ୍ରସୀଦ ପ୍ରସୀଦ ପ୍ରଚଣ୍ଡାରିକାଲ ।

ପ୍ରସୀଦ ପ୍ରସୀଦ ପ୍ରପନ୍ନାନୁକମ୍ପିନ୍

ପ୍ରସୀଦ ପ୍ରସୀଦ ପ୍ରଭୋ ରାମଚନ୍ଦ୍ର

॥ 27 ॥

ଶ୍ଲୋକ 29

ଭୁଜଙ୍ଗପ୍ରଯାତଂ ପରଂ ଵେଦସାରଂ

ମୁଦା ରାମଚନ୍ଦ୍ରସ୍ଯ ଭକ୍ତ୍ଯା ଚ ନିତ୍ଯମ୍ ।

ପଠନ୍ସନ୍ତତଂ ଚିନ୍ତଯନ୍ସ୍ଵାନ୍ତରଙ୍ଗେ

ସ ଏଵ ସ୍ଵଯଂ ରାମଚନ୍ଦ୍ରଃ ସ ଧନ୍ଯଃ

॥ 28 ॥

ଶ୍ଲୋକ 30

ଇତି ଶ୍ରୀମଚ୍ଛଙ୍କରାଚାର୍ଯ କୃତଂ ଶ୍ରୀ ରାମ ଭୁଜଙ୍ଗପ୍ରଯାତ ସ୍ତୋତ୍ରମ୍ ।