Sri Rama Bhujanga Prayaata Stotram

zrI rAma bhujaGga prayAta stotram

zloka 1

vizuddhaM paraM saccidAnandarUpaM

guNAdhAramAdhArahInaM vareNyam |

mahAntaM vibhAntaM guhAntaM guNAntaM

sukhAntaM svayaM dhAma rAmaM prapadye || 1 ||

zivaM nityamekaM vibhuM tArakAkhyaM

sukhAkAramAkArazUnyaM sumAnyam |

mahezaM kalezaM surezaM parezaM

narezaM nirIzaM mahIzaM prapadye || 2 ||

yadAvarNayatkarNamUle'ntakAle

zivo rAma rAmeti rAmeti kAzyAm |

tadekaM paraM tArakabrahmarUpaM

bhaje'haM bhaje'haM bhaje'haM bhaje'ham || 3 ||

mahAratnapIThe zubhe kalpamUle

sukhAsInamAdityakoTiprakAzam |

sadA jAnakIlakSmaNopetamekaM

sadA rAmacandraM bhaje'haM bhaje'ham || 4 ||

kvaNadratnamaJjIrapAdAravindaM

lasanmekhalAcArupItAmbarADhyam |

mahAratnahArollasatkaustubhAGgaM

nadaccaJcarImaJjarIlolamAlam || 5 ||

lasaccandrikAsmerazoNAdharAbhaM

samudyatpataGgendukoTiprakAzam |

namadbrahmarudrAdikoTIraratna

sphuratkAntinIrAjanArAdhitAGghrim || 6 ||

puraH prAJjalInAJjaneyAdibhaktAn

svacinmudrayA bhadrayA bodhayantam |

bhaje'haM bhaje'haM sadA rAmacandraM

tvadanyaM na manye na manye na manye || 7 ||

yadA matsamIpaM kRtAntaH sametya

pracaNDaprakopairbhaTairbhISayenmAm |

tadAviSkaroSi tvadIyaM svarUpaM

sadApatpraNAzaM sakodaNDabANam || 8 ||

nije mAnase mandire sannidhehi

prasIda prasIda prabho rAmacandra |

sasaumitriNA kaikayInandanena

svazaktyAnubhaktyA ca saMsevyamAna || 9 ||

svabhaktAgragaNyaiH kapIzairmahIzai-

-ranIkairanekaizca rAma prasIda |

namaste namo'stvIza rAma prasIda

prazAdhi prazAdhi prakAzaM prabho mAm || 10 ||

tvamevAsi daivaM paraM me yadekaM

sucaitanyametattvadanyaM na manye |

yato'bhUdameyaM viyadvAyutejo

jalorvyAdikAryaM caraM cAcaraM ca || 11 ||

namaH saccidAnandarUpAya tasmai

namo devadevAya rAmAya tubhyam |

namo jAnakIjIvitezAya tubhyaM

namaH puNDarIkAyatAkSAya tubhyam || 12 ||

namo bhaktiyuktAnuraktAya tubhyaM

namaH puNyapuJjaikalabhyAya tubhyam |

namo vedavedyAya cAdyAya puMse

namaH sundarAyendirAvallabhAya || 13 ||

namo vizvakartre namo vizvahartre

namo vizvabhoktre namo vizvamAtre |

namo vizvanetre namo vizvajetre

namo vizvapitre namo vizvamAtre || 14 ||

namaste namaste samastaprapaJca-

-prabhogaprayogapramANapravINa |

madIyaM manastvatpadadvandvasevAM

vidhAtuM pravRttaM sucaitanyasiddhyai || 15 ||

zilApi tvadaGghrikSamAsaGgireNu

prasAdAddhi caitanyamAdhatta rAma |

narastvatpadadvandvasevAvidhAnA-

-tsucaitanyametIti kiM citramatra || 16 ||

pavitraM caritraM vicitraM tvadIyaM

narA ye smarantyanvahaM rAmacandra |

bhavantaM bhavAntaM bharantaM bhajanto

labhante kRtAntaM na pazyantyato'nte || 17 ||

sa puNyaH sa gaNyaH zaraNyo mamAyaM

naro veda yo devacUDAmaNiM tvAm |

sadAkAramekaM cidAnandarUpaM

manovAgagamyaM paraM dhAma rAma || 18 ||

pracaNDapratApaprabhAvAbhibhUta-

-prabhUtArivIra prabho rAmacandra |

balaM te kathaM varNyate'tIva bAlye

yato'khaNDi caNDIzakodaNDadaNDam || 19 ||

dazagrIvamugraM saputraM samitraM

sariddurgamadhyastharakSogaNezam |

bhavantaM vinA rAma vIro naro vA

suro vA'maro vA jayetkastrilokyAm || 20 ||

sadA rAma rAmeti rAmAmRtaM te

sadArAmamAnandaniSyandakandam |

pibantaM namantaM sudantaM hasantaM

hanUmantamantarbhaje taM nitAntam || 21 ||

sadA rAma rAmeti rAmAmRtaM te

sadArAmamAnandaniSyandakandam |

pibannanvahaM nanvahaM naiva mRtyo-

-rbibhemi prasAdAdasAdAttavaiva || 22 ||

asItAsametairakodaNDabhUSai-

-rasaumitrivandyairacaNDapratApaiH |

alaGkezakAlairasugrIvamitrai-

-rarAmAbhidheyairalaM daivatairnaH || 23 ||

avIrAsanasthairacinmudrikADhyai-

-rabhaktAJjaneyAditattvaprakAzaiH |

amandAramUlairamandAramAlai-

-rarAmAbhidheyairalaM daivatairnaH || 24 ||

asindhuprakopairavandyapratApai-

-rabandhuprayANairamandasmitADhyaiH |

adaNDapravAsairakhaNDaprabodhai-

-rarAmAbhidheyairalaM daivatairnaH || 25 ||

hare rAma sItApate rAvaNAre

kharAre murAre'surAre pareti |

lapantaM nayantaM sadAkAlamevaM

samAlokayAlokayAzeSabandho || 26 ||

namaste sumitrAsuputrAbhivandya

namaste sadA kaikayInandaneDya |

namaste sadA vAnarAdhIzavandya

namaste namaste sadA rAmacandra || 27 ||

prasIda prasIda pracaNDapratApa

prasIda prasIda pracaNDArikAla |

prasIda prasIda prapannAnukampin

prasIda prasIda prabho rAmacandra || 28 ||

bhujaGgaprayAtaM paraM vedasAraM

mudA rAmacandrasya bhaktyA ca nityam |

paThansantataM cintayansvAntaraGge

sa eva svayaM rAmacandraH sa dhanyaH || 29 ||

iti zrImacchaGkarAcArya kRtaM zrI rAma bhujaGgaprayAta stotram |