శ్రీ రామ భుజఙ్గ ప్రయాత స్తోత్రమ్

శ్రీ రామ భుజఙ్గ ప్రయాత స్తోత్రమ్

శ్లోక 1

విశుద్ధం పరం సచ్చిదానన్దరూపం

గుణాధారమాధారహీనం వరేణ్యమ్ ।

మహాన్తం విభాన్తం గుహాన్తం గుణాన్తం

సుఖాన్తం స్వయం ధామ రామం ప్రపద్యే

శ్లోక 2

శివం నిత్యమేకం విభుం తారకాఖ్యం

సుఖాకారమాకారశూన్యం సుమాన్యమ్ ।

మహేశం కలేశం సురేశం పరేశం

నరేశం నిరీశం మహీశం ప్రపద్యే

॥ 1 ॥

శ్లోక 3

యదావర్ణయత్కర్ణమూలేఽన్తకాలే

శివో రామ రామేతి రామేతి కాశ్యామ్ ।

తదేకం పరం తారకబ్రహ్మరూపం

భజేఽహం భజేఽహం భజేఽహం భజేఽహమ్

॥ 2 ॥

శ్లోక 4

మహారత్నపీఠే శుభే కల్పమూలే

సుఖాసీనమాదిత్యకోటిప్రకాశమ్ ।

సదా జానకీలక్ష్మణోపేతమేకం

సదా రామచన్ద్రం భజేఽహం భజేఽహమ్

॥ 3 ॥

శ్లోక 5

క్వణద్రత్నమఞ్జీరపాదారవిన్దం

లసన్మేఖలాచారుపీతామ్బరాఢ్యమ్ ।

మహారత్నహారోల్లసత్కౌస్తుభాఙ్గం

నదచ్చఞ్చరీమఞ్జరీలోలమాలమ్

॥ 4 ॥

శ్లోక 6

లసచ్చన్ద్రికాస్మేరశోణాధరాభం

సముద్యత్పతఙ్గేన్దుకోటిప్రకాశమ్ ।

నమద్బ్రహ్మరుద్రాదికోటీరరత్న

స్ఫురత్కాన్తినీరాజనారాధితాఙ్ఘ్రిమ్

॥ 5 ॥

శ్లోక 7

పురః ప్రాఞ్జలీనాఞ్జనేయాదిభక్తాన్

స్వచిన్ముద్రయా భద్రయా బోధయన్తమ్ ।

భజేఽహం భజేఽహం సదా రామచన్ద్రం

త్వదన్యం న మన్యే న మన్యే న మన్యే

॥ 6 ॥

శ్లోక 8

యదా మత్సమీపం కృతాన్తః సమేత్య

ప్రచణ్డప్రకోపైర్భటైర్భీషయేన్మామ్ ।

తదావిష్కరోషి త్వదీయం స్వరూపం

సదాపత్ప్రణాశం సకోదణ్డబాణమ్

॥ 7 ॥

శ్లోక 9

నిజే మానసే మన్దిరే సన్నిధేహి

ప్రసీద ప్రసీద ప్రభో రామచన్ద్ర ।

ససౌమిత్రిణా కైకయీనన్దనేన

స్వశక్త్యానుభక్త్యా చ సంసేవ్యమాన

॥ 8 ॥

శ్లోక 10

స్వభక్తాగ్రగణ్యైః కపీశైర్మహీశై-

-రనీకైరనేకైశ్చ రామ ప్రసీద ।

నమస్తే నమోఽస్త్వీశ రామ ప్రసీద

ప్రశాధి ప్రశాధి ప్రకాశం ప్రభో మామ్

॥ 9 ॥

శ్లోక 11

త్వమేవాసి దైవం పరం మే యదేకం

సుచైతన్యమేతత్త్వదన్యం న మన్యే ।

యతోఽభూదమేయం వియద్వాయుతేజో

జలోర్వ్యాదికార్యం చరం చాచరం చ

॥ 10 ॥

శ్లోక 12

నమః సచ్చిదానన్దరూపాయ తస్మై

నమో దేవదేవాయ రామాయ తుభ్యమ్ ।

నమో జానకీజీవితేశాయ తుభ్యం

నమః పుణ్డరీకాయతాక్షాయ తుభ్యమ్

॥ 11 ॥

శ్లోక 13

నమో భక్తియుక్తానురక్తాయ తుభ్యం

నమః పుణ్యపుఞ్జైకలభ్యాయ తుభ్యమ్ ।

నమో వేదవేద్యాయ చాద్యాయ పుంసే

నమః సున్దరాయేన్దిరావల్లభాయ

॥ 12 ॥

శ్లోక 14

నమో విశ్వకర్త్రే నమో విశ్వహర్త్రే

నమో విశ్వభోక్త్రే నమో విశ్వమాత్రే ।

నమో విశ్వనేత్రే నమో విశ్వజేత్రే

నమో విశ్వపిత్రే నమో విశ్వమాత్రే

॥ 13 ॥

శ్లోక 15

నమస్తే నమస్తే సమస్తప్రపఞ్చ-

-ప్రభోగప్రయోగప్రమాణప్రవీణ ।

మదీయం మనస్త్వత్పదద్వన్ద్వసేవాం

విధాతుం ప్రవృత్తం సుచైతన్యసిద్ధ్యై

॥ 14 ॥

శ్లోక 16

శిలాపి త్వదఙ్ఘ్రిక్షమాసఙ్గిరేణు

ప్రసాదాద్ధి చైతన్యమాధత్త రామ ।

నరస్త్వత్పదద్వన్ద్వసేవావిధానా-

-త్సుచైతన్యమేతీతి కిం చిత్రమత్ర

॥ 15 ॥

శ్లోక 17

పవిత్రం చరిత్రం విచిత్రం త్వదీయం

నరా యే స్మరన్త్యన్వహం రామచన్ద్ర ।

భవన్తం భవాన్తం భరన్తం భజన్తో

లభన్తే కృతాన్తం న పశ్యన్త్యతోఽన్తే

॥ 16 ॥

శ్లోక 18

స పుణ్యః స గణ్యః శరణ్యో మమాయం

నరో వేద యో దేవచూడామణిం త్వామ్ ।

సదాకారమేకం చిదానన్దరూపం

మనోవాగగమ్యం పరం ధామ రామ

॥ 17 ॥

శ్లోక 19

ప్రచణ్డప్రతాపప్రభావాభిభూత-

-ప్రభూతారివీర ప్రభో రామచన్ద్ర ।

బలం తే కథం వర్ణ్యతేఽతీవ బాల్యే

యతోఽఖణ్డి చణ్డీశకోదణ్డదణ్డమ్

॥ 18 ॥

శ్లోక 20

దశగ్రీవముగ్రం సపుత్రం సమిత్రం

సరిద్దుర్గమధ్యస్థరక్షోగణేశమ్ ।

భవన్తం వినా రామ వీరో నరో వా

సురో వాఽమరో వా జయేత్కస్త్రిలోక్యామ్

॥ 19 ॥

శ్లోక 21

సదా రామ రామేతి రామామృతం తే

సదారామమానన్దనిష్యన్దకన్దమ్ ।

పిబన్తం నమన్తం సుదన్తం హసన్తం

హనూమన్తమన్తర్భజే తం నితాన్తమ్

॥ 20 ॥

శ్లోక 22

సదా రామ రామేతి రామామృతం తే

సదారామమానన్దనిష్యన్దకన్దమ్ ।

పిబన్నన్వహం నన్వహం నైవ మృత్యో-

-ర్బిభేమి ప్రసాదాదసాదాత్తవైవ

॥ 21 ॥

శ్లోక 23

అసీతాసమేతైరకోదణ్డభూషై-

-రసౌమిత్రివన్ద్యైరచణ్డప్రతాపైః ।

అలఙ్కేశకాలైరసుగ్రీవమిత్రై-

-రరామాభిధేయైరలం దైవతైర్నః

॥ 22 ॥

శ్లోక 24

అవీరాసనస్థైరచిన్ముద్రికాఢ్యై-

-రభక్తాఞ్జనేయాదితత్త్వప్రకాశైః ।

అమన్దారమూలైరమన్దారమాలై-

-రరామాభిధేయైరలం దైవతైర్నః

॥ 23 ॥

శ్లోక 25

అసిన్ధుప్రకోపైరవన్ద్యప్రతాపై-

-రబన్ధుప్రయాణైరమన్దస్మితాఢ్యైః ।

అదణ్డప్రవాసైరఖణ్డప్రబోధై-

-రరామాభిధేయైరలం దైవతైర్నః

॥ 24 ॥

శ్లోక 26

హరే రామ సీతాపతే రావణారే

ఖరారే మురారేఽసురారే పరేతి ।

లపన్తం నయన్తం సదాకాలమేవం

సమాలోకయాలోకయాశేషబన్ధో

॥ 25 ॥

శ్లోక 27

నమస్తే సుమిత్రాసుపుత్రాభివన్ద్య

నమస్తే సదా కైకయీనన్దనేడ్య ।

నమస్తే సదా వానరాధీశవన్ద్య

నమస్తే నమస్తే సదా రామచన్ద్ర

॥ 26 ॥

శ్లోక 28

ప్రసీద ప్రసీద ప్రచణ్డప్రతాప

ప్రసీద ప్రసీద ప్రచణ్డారికాల ।

ప్రసీద ప్రసీద ప్రపన్నానుకమ్పిన్

ప్రసీద ప్రసీద ప్రభో రామచన్ద్ర

॥ 27 ॥

శ్లోక 29

భుజఙ్గప్రయాతం పరం వేదసారం

ముదా రామచన్ద్రస్య భక్త్యా చ నిత్యమ్ ।

పఠన్సన్తతం చిన్తయన్స్వాన్తరఙ్గే

స ఏవ స్వయం రామచన్ద్రః స ధన్యః

॥ 28 ॥

శ్లోక 30

ఇతి శ్రీమచ్ఛఙ్కరాచార్య కృతం శ్రీ రామ భుజఙ్గప్రయాత స్తోత్రమ్ ।