শ্রী রাম ভুজঙ্গ প্রযাত স্তোত্রম্

শ্রী রাম ভুজঙ্গ প্রযাত স্তোত্রম্

শ্লোক 1

বিশুদ্ধং পরং সচ্চিদানন্দরূপং

গুণাধারমাধারহীনং বরেণ্যম্ ।

মহান্তং বিভান্তং গুহান্তং গুণান্তং

সুখান্তং স্বযং ধাম রামং প্রপদ্যে

শ্লোক 2

শিবং নিত্যমেকং বিভুং তারকাখ্যং

সুখাকারমাকারশূন্যং সুমান্যম্ ।

মহেশং কলেশং সুরেশং পরেশং

নরেশং নিরীশং মহীশং প্রপদ্যে

॥ 1 ॥

শ্লোক 3

যদাবর্ণযত্কর্ণমূলেঽন্তকালে

শিবো রাম রামেতি রামেতি কাশ্যাম্ ।

তদেকং পরং তারকব্রহ্মরূপং

ভজেঽহং ভজেঽহং ভজেঽহং ভজেঽহম্

॥ 2 ॥

শ্লোক 4

মহারত্নপীঠে শুভে কল্পমূলে

সুখাসীনমাদিত্যকোটিপ্রকাশম্ ।

সদা জানকীলক্ষ্মণোপেতমেকং

সদা রামচন্দ্রং ভজেঽহং ভজেঽহম্

॥ 3 ॥

শ্লোক 5

ক্বণদ্রত্নমঞ্জীরপাদারবিন্দং

লসন্মেখলাচারুপীতাম্বরাঢ্যম্ ।

মহারত্নহারোল্লসত্কৌস্তুভাঙ্গং

নদচ্চঞ্চরীমঞ্জরীলোলমালম্

॥ 4 ॥

শ্লোক 6

লসচ্চন্দ্রিকাস্মেরশোণাধরাভং

সমুদ্যত্পতঙ্গেন্দুকোটিপ্রকাশম্ ।

নমদ্ব্রহ্মরুদ্রাদিকোটীররত্ন

স্ফুরত্কান্তিনীরাজনারাধিতাঙ্ঘ্রিম্

॥ 5 ॥

শ্লোক 7

পুরঃ প্রাঞ্জলীনাঞ্জনেযাদিভক্তান্

স্বচিন্মুদ্রযা ভদ্রযা বোধযন্তম্ ।

ভজেঽহং ভজেঽহং সদা রামচন্দ্রং

ত্বদন্যং ন মন্যে ন মন্যে ন মন্যে

॥ 6 ॥

শ্লোক 8

যদা মত্সমীপং কৃতান্তঃ সমেত্য

প্রচণ্ডপ্রকোপৈর্ভটৈর্ভীষযেন্মাম্ ।

তদাবিষ্করোষি ত্বদীযং স্বরূপং

সদাপত্প্রণাশং সকোদণ্ডবাণম্

॥ 7 ॥

শ্লোক 9

নিজে মানসে মন্দিরে সন্নিধেহি

প্রসীদ প্রসীদ প্রভো রামচন্দ্র ।

সসৌমিত্রিণা কৈকযীনন্দনেন

স্বশক্ত্যানুভক্ত্যা চ সংসেব্যমান

॥ 8 ॥

শ্লোক 10

স্বভক্তাগ্রগণ্যৈঃ কপীশৈর্মহীশৈ-

-রনীকৈরনেকৈশ্চ রাম প্রসীদ ।

নমস্তে নমোঽস্ত্বীশ রাম প্রসীদ

প্রশাধি প্রশাধি প্রকাশং প্রভো মাম্

॥ 9 ॥

শ্লোক 11

ত্বমেবাসি দৈবং পরং মে যদেকং

সুচৈতন্যমেতত্ত্বদন্যং ন মন্যে ।

যতোঽভূদমেযং বিযদ্বাযুতেজো

জলোর্ব্যাদিকার্যং চরং চাচরং চ

॥ 10 ॥

শ্লোক 12

নমঃ সচ্চিদানন্দরূপায তস্মৈ

নমো দেবদেবায রামায তুভ্যম্ ।

নমো জানকীজীবিতেশায তুভ্যং

নমঃ পুণ্ডরীকাযতাক্ষায তুভ্যম্

॥ 11 ॥

শ্লোক 13

নমো ভক্তিযুক্তানুরক্তায তুভ্যং

নমঃ পুণ্যপুঞ্জৈকলভ্যায তুভ্যম্ ।

নমো বেদবেদ্যায চাদ্যায পুংসে

নমঃ সুন্দরাযেন্দিরাবল্লভায

॥ 12 ॥

শ্লোক 14

নমো বিশ্বকর্ত্রে নমো বিশ্বহর্ত্রে

নমো বিশ্বভোক্ত্রে নমো বিশ্বমাত্রে ।

নমো বিশ্বনেত্রে নমো বিশ্বজেত্রে

নমো বিশ্বপিত্রে নমো বিশ্বমাত্রে

॥ 13 ॥

শ্লোক 15

নমস্তে নমস্তে সমস্তপ্রপঞ্চ-

-প্রভোগপ্রযোগপ্রমাণপ্রবীণ ।

মদীযং মনস্ত্বত্পদদ্বন্দ্বসেবাং

বিধাতুং প্রবৃত্তং সুচৈতন্যসিদ্ধ্যৈ

॥ 14 ॥

শ্লোক 16

শিলাপি ত্বদঙ্ঘ্রিক্ষমাসঙ্গিরেণু

প্রসাদাদ্ধি চৈতন্যমাধত্ত রাম ।

নরস্ত্বত্পদদ্বন্দ্বসেবাবিধানা-

-ত্সুচৈতন্যমেতীতি কিং চিত্রমত্র

॥ 15 ॥

শ্লোক 17

পবিত্রং চরিত্রং বিচিত্রং ত্বদীযং

নরা যে স্মরন্ত্যন্বহং রামচন্দ্র ।

ভবন্তং ভবান্তং ভরন্তং ভজন্তো

লভন্তে কৃতান্তং ন পশ্যন্ত্যতোঽন্তে

॥ 16 ॥

শ্লোক 18

স পুণ্যঃ স গণ্যঃ শরণ্যো মমাযং

নরো বেদ যো দেবচূডামণিং ত্বাম্ ।

সদাকারমেকং চিদানন্দরূপং

মনোবাগগম্যং পরং ধাম রাম

॥ 17 ॥

শ্লোক 19

প্রচণ্ডপ্রতাপপ্রভাবাভিভূত-

-প্রভূতারিবীর প্রভো রামচন্দ্র ।

বলং তে কথং বর্ণ্যতেঽতীব বাল্যে

যতোঽখণ্ডি চণ্ডীশকোদণ্ডদণ্ডম্

॥ 18 ॥

শ্লোক 20

দশগ্রীবমুগ্রং সপুত্রং সমিত্রং

সরিদ্দুর্গমধ্যস্থরক্ষোগণেশম্ ।

ভবন্তং বিনা রাম বীরো নরো বা

সুরো বাঽমরো বা জযেত্কস্ত্রিলোক্যাম্

॥ 19 ॥

শ্লোক 21

সদা রাম রামেতি রামামৃতং তে

সদারামমানন্দনিষ্যন্দকন্দম্ ।

পিবন্তং নমন্তং সুদন্তং হসন্তং

হনূমন্তমন্তর্ভজে তং নিতান্তম্

॥ 20 ॥

শ্লোক 22

সদা রাম রামেতি রামামৃতং তে

সদারামমানন্দনিষ্যন্দকন্দম্ ।

পিবন্নন্বহং নন্বহং নৈব মৃত্যো-

-র্বিভেমি প্রসাদাদসাদাত্তবৈব

॥ 21 ॥

শ্লোক 23

অসীতাসমেতৈরকোদণ্ডভূষৈ-

-রসৌমিত্রিবন্দ্যৈরচণ্ডপ্রতাপৈঃ ।

অলঙ্কেশকালৈরসুগ্রীবমিত্রৈ-

-ররামাভিধেযৈরলং দৈবতৈর্নঃ

॥ 22 ॥

শ্লোক 24

অবীরাসনস্থৈরচিন্মুদ্রিকাঢ্যৈ-

-রভক্তাঞ্জনেযাদিতত্ত্বপ্রকাশৈঃ ।

অমন্দারমূলৈরমন্দারমালৈ-

-ররামাভিধেযৈরলং দৈবতৈর্নঃ

॥ 23 ॥

শ্লোক 25

অসিন্ধুপ্রকোপৈরবন্দ্যপ্রতাপৈ-

-রবন্ধুপ্রযাণৈরমন্দস্মিতাঢ্যৈঃ ।

অদণ্ডপ্রবাসৈরখণ্ডপ্রবোধৈ-

-ররামাভিধেযৈরলং দৈবতৈর্নঃ

॥ 24 ॥

শ্লোক 26

হরে রাম সীতাপতে রাবণারে

খরারে মুরারেঽসুরারে পরেতি ।

লপন্তং নযন্তং সদাকালমেবং

সমালোকযালোকযাশেষবন্ধো

॥ 25 ॥

শ্লোক 27

নমস্তে সুমিত্রাসুপুত্রাভিবন্দ্য

নমস্তে সদা কৈকযীনন্দনেড্য ।

নমস্তে সদা বানরাধীশবন্দ্য

নমস্তে নমস্তে সদা রামচন্দ্র

॥ 26 ॥

শ্লোক 28

প্রসীদ প্রসীদ প্রচণ্ডপ্রতাপ

প্রসীদ প্রসীদ প্রচণ্ডারিকাল ।

প্রসীদ প্রসীদ প্রপন্নানুকম্পিন্

প্রসীদ প্রসীদ প্রভো রামচন্দ্র

॥ 27 ॥

শ্লোক 29

ভুজঙ্গপ্রযাতং পরং বেদসারং

মুদা রামচন্দ্রস্য ভক্ত্যা চ নিত্যম্ ।

পঠন্সন্ততং চিন্তযন্স্বান্তরঙ্গে

স এব স্বযং রামচন্দ্রঃ স ধন্যঃ

॥ 28 ॥

শ্লোক 30

ইতি শ্রীমচ্ছঙ্করাচার্য কৃতং শ্রী রাম ভুজঙ্গপ্রযাত স্তোত্রম্ ।