ശ്രീ മീനാക്ഷീ സ്തോത്രമ്

ശ്രീ മീനാക്ഷീ സ്തോത്രമ്

ശ്ലോക 1

ശ്രീവിദ്യേ ശിവവാമഭാഗനിലയേ ശ്രീരാജരാജാര്ചിതേ

ശ്രീനാഥാദിഗുരുസ്വരൂപവിഭവേ ചിന്താമണീപീഠികേ ।

ശ്രീവാണീഗിരിജാനുതാങ്ഘ്രികമലേ ശ്രീശാമ്ഭവി ശ്രീശിവേ

മധ്യാഹ്നേ മലയധ്വജാധിപസുതേ മാം പാഹി മീനാമ്ബികേ

ശ്ലോക 2

ചക്രസ്ഥേഽചപലേ ചരാചരജഗന്നാഥേ ജഗത്പൂജിതേ

ആര്താലീവരദേ നതാഭയകരേ വക്ഷോജഭാരാന്വിതേ ।

വിദ്യേ വേദകലാപമൌലിവിദിതേ വിദ്യുല്ലതാവിഗ്രഹേ

മാതഃ പൂര്ണസുധാരസാര്ദ്രഹൃദയേ മാം പാഹി മീനാമ്ബികേ

॥ 1 ॥

ശ്ലോക 3

കോടീരാങ്ഗദരത്നകുണ്ഡലധരേ കോദണ്ഡബാണാഞ്ചിതേ

കോകാകാരകുചദ്വയോപരിലസത്പ്രാലമ്ബഹാരാഞ്ചിതേ ।

ശിഞ്ജന്നൂപുരപാദസാരസമണീശ്രീപാദുകാലങ്കൃതേ

മദ്ദാരിദ്ര്യഭുജങ്ഗഗാരുഡഖഗേ മാം പാഹി മീനാമ്ബികേ

॥ 2 ॥

ശ്ലോക 4

ബ്രഹ്മേശാച്യുതഗീയമാനചരിതേ പ്രേതാസനാന്തസ്ഥിതേ

പാശോദങ്കുശചാപബാണകലിതേ ബാലേന്ദുചൂഡാഞ്ചിതേ ।

ബാലേ ബാലകുരങ്ഗലോലനയനേ ബാലാര്കകോട്യുജ്ജ്വലേ

മുദ്രാരാധിതദൈവതേ മുനിസുതേ മാം പാഹി മീനാമ്ബികേ

॥ 3 ॥

ശ്ലോക 5

ഗന്ധര്വാമരയക്ഷപന്നഗനുതേ ഗങ്ഗാധരാലിങ്ഗിതേ

ഗായത്രീഗരുഡാസനേ കമലജേ സുശ്യാമലേ സുസ്ഥിതേ ।

ഖാതീതേ ഖലദാരുപാവകശിഖേ ഖദ്യോതകോട്യുജ്ജ്വലേ

മന്ത്രാരാധിതദൈവതേ മുനിസുതേ മാം പാഹീ മീനാമ്ബികേ

॥ 4 ॥

ശ്ലോക 6

നാദേ നാരദതുമ്ബുരാദ്യവിനുതേ നാദാന്തനാദാത്മികേ

നിത്യേ നീലലതാത്മികേ നിരുപമേ നീവാരശൂകോപമേ ।

കാന്തേ കാമകലേ കദമ്ബനിലയേ കാമേശ്വരാങ്കസ്ഥിതേ

മദ്വിദ്യേ മദഭീഷ്ടകല്പലതികേ മാം പാഹി മീനാമ്ബികേ

॥ 5 ॥

ശ്ലോക 7

വീണാനാദനിമീലിതാര്ധനയനേ വിസ്രസ്തചൂലീഭരേ

താമ്ബൂലാരുണപല്ലവാധരയുതേ താടങ്കഹാരാന്വിതേ ।

ശ്യാമേ ചന്ദ്രകലാവതംസകലിതേ കസ്തൂരികാഫാലികേ

പൂര്ണേ പൂര്ണകലാഭിരാമവദനേ മാം പാഹി മീനാമ്ബികേ

॥ 6 ॥

ശ്ലോക 8

ശബ്ദബ്രഹ്മമയീ ചരാചരമയീ ജ്യോതിര്മയീ വാങ്മയീ

നിത്യാനന്ദമയീ നിരഞ്ജനമയീ തത്ത്വമ്മയീ ചിന്മയീ ।

തത്ത്വാതീതമയീ പരാത്പരമയീ മായാമയീ ശ്രീമയീ

സര്വൈശ്വര്യമയീ സദാശിവമയീ മാം പാഹി മീനാമ്ബികേ

॥ 7 ॥

ശ്ലോക 9

ഇതി ശ്രീമത്പരമഹംസപരിവ്രാജകാചാര്യസ്യ ശ്രീഗോവിന്ദഭഗവത്പൂജ്യപാദശിഷ്യസ്യ ശ്രീമച്ഛങ്കരഭഗവതഃ കൃതൌ മീനാക്ഷീ സ്തോത്രമ് ।